1. Mu bungu dia nti Yezu kalombela kwe Yehova kakengerela milongoki miandi?

MU MPIMPA ya mansukina yi kayôkesa ha mutoto, Yezu wadimbitila mu misamu mia mpasi miaketi turila milongoki miandi. Luzolo mu ndiku zandi lwatuma Yezu mu lomba kwe Tata’andi kabakengerela mu bungu dia nkwa-mbi. (Za 17:14, 15,) Yezu wazaba ti bu kaketi kâla ku mazulu, Satana mbo kaketi tatamana mu nata muzingu kwe bantu bô bazololo mu sarila Yehova. Wa matieleka, kanda dia Yehova mbo diaketi bâ na nsatu ba kengerela dio.

2. Mu bungu dia nti tulendi bêla na lukwikulu ti Yehova mbo kahanina mvutu mu tusambulu tweto?

² Yehova wahanina lusambulu lwa Yezu mvutu mu bungu ti Mwana’andi wa kazololo. Tala ti tusariri ngolo mu tâ Yehova nsayi, mbo katuzolo mpe mbo kahanina tusambulu tweto mvutu bu tumulombaka katubakisa mpe katukengerela. Ntiana kwa Mfumu-kanda, Yehova mbo katatamana mu kipa bala bandi na luzolo lwalwansoni. Nkumbu’andi mbo yibeba tala ti ka siri’â bo ko!

3. Mu bungu dia nti twe na nsatu Yehova katukengerela lumbu ti?

³ Lumbu ti, nkatika nsatu ye neto Yehova katukengerela. Satana bamukuma ku mazulu mpe “nkesi zazingi” ze nandi. (Nza. 12:12, NWT) Wanata bantu mu kwikila ti bu batukwamisaka, ‘mikayulu bahanaka kwe Nzambi.’ (Za 16:2) Bantu bakaka balembo kwikilaka mu Nzambi, mbo batukwamisaka mu bungu ti ka tulandaka ndiatulu ya nza yi ko. Mu musamu ni musamu wutula ka tufweti’â tabâ na bunkuta ko. Mu bungu dia nti? Mu bungu ti Zu dia Nzambi ditêle ti: “Mfumu wa kwikama wena, mbo  kaluyika ngolo mpe mbo kalukengerela mu nkwa-mbi.” (2 Tes. 3:3, NWT) Ngano Yehova bwe katukengerelaka? Tazonzeleno mpila zole.

4. Tintwari na Bisi-Efeze 6:13-17, nti Yehova katuhana mu tu kengerela?

⁴ Yehova watuhana binwanunu ngatu biatukengerelaka mu ntangu Satana yi katunwanisaka. (Tanga Bisi-Efeze 6:13-17.) Binwanunu bio bia timpeve ngolo biena mpe bubote bisalaka! Kâ, ngatu biatukengerela, tufweti bia lwata biabiansoni​—mpe tufweti tatamana mu bâ na bio. Ngano muna tinwanunu nti tita songela? Buna, tazonzeleno muna tinwanunu.

5. Musinga-luketo wa matieleka ni nti, mpe mu bungu dia nti tufweti wa lwatila?

⁵ Musinga-luketo wa matieleka ni matieleka ma tubakaka mu Zu dia Nzambi, Bibila. Mu bungu dia nti tufweti lwatila musinga-luketo wo? Mu bungu ti Satana ‘tata dia bungungu diena.’ (Za 8:44) Tûka mivu mbo kasarilaka bungungu bwandi mu wubakasa “nza ya mukaka.” (Nza. 12:9, NWT) Kâ, matieleka me mu Bibila mbo matukengerelaka mu lembo wubakana. Bwe tulendi lwatila musinga-luketo wo? Mbo tulwataka wo bu tulongokaka matieleka matariri Yehova na bu tumusambilaka mu mpeve na mu matieleka, mpe bu tudiatilaka mu bunsungu mu misamu miamiansoni.​—Za 4:24; Efz. 4:25; Ebr. 13:18.

6. Tinkuti tia buderede tikengerelaka mutima ni nti, mpe mu bungu dia nti tufweti tia lwatila?

⁶ Tinkuti tia buderede tikengerelaka mutima ni mitieno mia buderede mia Yehova. Mu bungu dia nti tufweti tia lwatila? Ntiana kwa tinkuti tikengerelaka mutima bu tikengerela mutima wa tinwani ngatu tima tialembo mu wubula, tinkuti tia buderede tikengerelaka mutima, mbo tikengerelaka timuntu tieto tia kati ngatu misamu mia mbi mia nza mialembo tu sobesa. (Bin. 4:23) Yehova zololo ti tamuzolo mpe tamusarila mu mutima’eto wawansoni. (Mat. 22:36, 37) Ntiangu Satana kayêlaka mu kaba mutima’eto bu katunataka mu zolo bima bie mu nza​—bima bi yinaka Yehova. (Zaki 4:4; 1 Za 2:15, 16) Tala ti ka bubêle’â ko, mbo kayêlaka mu tu tâ bunkuta ngatu talembo tumamana mitieno mia Yehova.

7. Ngano bwe tulwatilaka tinkuti tia buderede tikengerelaka mutima?

⁷ Mbo tulwataka tinkuti tia buderede tikengerelaka mutima bu tutumamanaka mitieno mia Yehova mitariri mbote na mbi. (Mik. 97:10) Bantu bakaka balendi banza ti mitieno mia Yehova ka mitomo’â tu hanaka timpwanza ko. Kâ, tala ti tubikiri mu sarila mitieno mia Bibila mu luzingu lweto, mbo tubâ ntiana tinwani tikaturi tinkuti tiandi mu ntangu ya muzingu mu bungu ti mbo katabanza ti dema tiena. Mbo bubâ nkatika buzoba! Kwe bantu bô bazololo Yehova, ntumunu zandi “ka zena dema ko,” kâ vukisa zivukisaka.​—1 Za 5:3, NWT.

8. Ngano lwata mapapa ma luhemo mu samuna nsangu za mbote bwe wuta zolo tâ?

⁸ Paulo watulomba mu lwata mapapa ma luhemo mu samuna nsangu za mbote za tidzunu. Wuzololo tâ ti, ntangu zazansoni tufweti bâka ba kubama mu samuna nsangu za mbote za Timfumu. Bu tuzonzelaka misamu mie mu Bibila kwe bantu bakaka, timinu tieto mbo tiyikamaka ngolo. Mbo wututindisaka bu tumonaka kanda dia Yehova mu nza yayansoni bu disarilaka bweso bwabwansoni bumonekaka mu samuna nsangu za mbote mu mbuka zi bena​—mu tifwani mbo basamunaka ku tisalu, ku lukolo, mu nzo na nzo, mu mabiro, ku mazandu, na mu ntangu yi bakwe talaka bibuti biawu bilembolo Mbangi za Yehova peleko kwe bantu ba bazebi. Tala ti tubêle na bunkuta mpe tubikiri mu samuna, mbo tukwizi bâ ntiana tinwani tikaturi mapapa mandi mu ntangu ya  muzingu; ka wukwizi’â bâ musamu wa mpasi ko ngatu malu mandi malwala. Mbo wubâ musamu wa mpasi kwe yandi mu tikengerela, mpe kabâ na lenda ko dia landa ntumunu za mfumu’andi.

9. Mu bungu dia nti tufweti bêla na tibabulu tieto tia tinene tia timinu?

⁹ Tibabulu tia tinene tia timinnu ni timinu tieto mu Yehova. Lukwikulu lwe neto ti mbo kalungisa makani mandi mamansoni. Timinu tio mbo titubakisa mu “honda tiya twa madionga mamansoni ma nkwa-mbi.” Mu bungu dia nti tufweti bêla na tibabulu tia tinene? Mu bungu ti mbo titukengerelaka ngatu ndongosolo za ba-aposta ka zituwubakasandi, mpe mu ntangu bantu yi batuseheselaka ka tunôkandi. Tala ti timinu kâni, ka tubâ na ngolo ko mu tumamana Yehova mu ntangu yi batulomba mu diata mitieno miandi. Ku lweka lwakaka, mu ntangu yi tunwaninaka timinu tieto ku tisalu peleko ku lukolo mbo tusongelaka ti tibabulu tieto tie neto. (1 Pi. 3:15) Ntangu zazansoni zi tukalaka tisalu tifutaka bubote, kâ titukabakasa mu sa nsambululu’eto buna bufwanakane, mbo tusongelaka ti tibabulu tieto tie neto. (Ebr. 13:5, 6) Mpe ntangu zazansoni zi tusarilaka Yehova ntono nkwamusu, tibabulu tieto mbo titukengerelaka.​—1 Tes. 2:2.

10. Mpu ya mvukulu yikengerelaka mutu ni nti, mpe mu bungu dia nti tufweti ya lwatila?

 ¹⁰ Mpu ya mvukulu yikengerelaka mutu ni tivuvu ti tu hanaka Yehova​—tivuvu tie neto ti Yehova mbo katukûla mu lufwa mpe mbo kasenda bô basarilaka luzolo lwandi. (1 Tes. 5:8; 1 Tim. 4:10; Tite 1:1, 2) Ntiana kwa mpu yikengerelaka mutu bu yikengerelaka mutu wa tinwani, tivuvu tieto mu mvukulu mbo tikengerelaka lenda dieto dia banza. Ngano mu ntia mpila? Tivuvu tio mbo titubakisaka mu tûla mabanza meto mamansoni mu makani ma Nzambi, mpe mbo titubakisaka mu lembo bâ na lwaka lwa yôka mu misamu mi tubwabanaka na mio. Bwe tulendi lwatila mpu yikengerelaka mutu? Mbo tulwataka yo bu tutatamanaka mu bâ na mabanza mamosi na Nzambi. Mu tifwani, kani tatûla tivuvu tieto mu bimvwama, mbo tubâka na tivuvu mu Nzambi.​—Mik. 26:2; 104:34; 1 Tim. 6:17.

11. Mbele ya muzingu ya timpeve ni nti, mpe mu bungu dia nti tufweti ya sarila?

¹¹ Mbele ya muzingu ya timpeve ni Zu dia Nzambi, Bibila. Mbele yo ya muzingu mbo yizabikisaka bungungu bwabwansoni, mpe mbo yikûlaka bantu mu ndongosolo za bungungu na mu nsalulu za mbi. (2 Kor. 10:4, 5; 2 Tim. 3:16, 17; Ebr. 4:12) Mbo tulongokaka mu sarila mbele yo buna bufwanakane, bu tusaka ndongokolo ya beto beni, mpe mu kubika ku batukubikaka mu organizasio ya Nzambi. (2 Tim. 2:15) Yehova mbo katuhanaka mpila yakaka ya ngolo mu tu kengerela. Ngano mpila yango ni ye?

12. Nti biakaka bie neto nsatu, mpe mu bungu dia nti?

¹² Tinwani ti batomo kubika tizebi ti mu ngolo za yandi kaka ka lendi’â kalenda ko mu nwana na mukangu wa binwani; nsatu lubakusu ye nandi ya bampwana’andi. Mpila mosi mpe, ka tulendi’â tatelamana Satana ko na bilandi biandi mu ngolo za beto kaka; nsatu lubakusu ye neto ya bampangi. Yehova watuhana “timvuka tia bampangi” titubakisaka.​—1 Pi. 2:17, NWT.

13. Tintwari na Bahebre 10:24, 25, ntia ndandu tubakaka bu tukwendaka ku tukutakanu?

¹³ Mpila yimosi yi tubakilaka lubakusu ni mu kwendaka ku tukutakanu tweto. (Tanga Bahebre 10:24, 25.) Ntangu zakaka​—beto bansoni mbo tunôkaka​—kâ tukutakanu tulendi tu tindisa. Mbo tubakaka lutindusu mu mvutu za bunsungu zi hanaka bampangi. Binzonzi na devware zi basaka zisikamanaka mu Bibila mbo ziyikaka ngolo nzengolo’eto ya tatamana mu sarila Yehova. Mpe bimoko bitungaka bi tusaka ntete lukutakanu lwabatika na ha manima ma lukutakunu, mbo bitutindisaka. (1 Tes. 5:14) Musamu wakaka, ku tukutakanu bweso bwe neto bwa bakisa bantu bakaka, mpe musamu wo mbo wututâka nsayi. (Bis. 20:35; Rom. 1:11, 12) Tukutakanu mbo tutubakisaka mpe mu bâ bisamuni bia mbote na milongi mia mbote. Mu tifwani, mbo tulongokaka mu tomo zaba mu sarila bisalulu bia mulongi. Buna, tomo kubamaka mu bungu dia tukutakanu twatwansoni twa timvuka. Mu ntangu ya lukutakanu tomo tekaka kutu, ha manima sarila malongi ma bakiri. Bu sila bo, mbo bâ ‘tinwani tia matieleka tia Kristo Yezu.’​—2 Tim. 2:3.

14. Ntia lubakusu lwakaka lwe neto?

¹⁴ Lubakusu mpe lwe neto lwa milio za bambazi ba ngolo. Banza’eti mu mio mi lendi yirika mbazi yimosi! (Iza. 37:36) Bwawu bu ti banza lenda die na mukangu wa ngolo wa bambazi. Ka kwena muntu ko peleko demo yiyôkele mukangu wa binwani wa Yehova mu ngolo. Yehova ni Yandi we Nkwa-Ngolo-Zazansoni. Buna bu kabâka neto tintwari, ntangu zazansoni ngolo kwa zibâka neto yôka bantu batutelamanaka ni bu sa ti babingi bena. (Mfu. 6:16) Diangana musamu wo wa matieleka  wena! Lundaka mabanza mo mu mutu mu ntangu mpwana’aku ya ku tisalu, ya ku lukolo peleko muntu wa kanda diaku bu wukutêlaka peleko bu wukuyirikaka musamu wulendi ku nôkesa. Kâ bambuka ti ka wena nge kaka ko mu muzingu wo. Lutwalusu lwa Yehova landaka.

15. Tintwari na Izaya 54:15, 17, mu bungu dia nti kanda dia Nzambi dilembo fukila?

¹⁵ Misamu miamingi misaka ti nza ye mu lutumu lwa Satana yatuyina. Kani kabwe ka tukotaka misamu mia politike ko mpe ka tusimbaka mata ko. Nkumbu ya Nzambi tusamunaka, mbo tusingasaka ti Timfumu tiandi kwa tilendi nata tidzunu ha mototo, mpe mbo tutumamanaka mitieno miandi mia buderede. Mbo tusongelaka kwe bantu ti mfumu ya nza yi ni nkwa-mbi. (Za 8:44) Mpe mbo tusamunaka ti ntamana nza ya Satana mbo yifuka. Kani kabwe, Satana na bilandi biandi ka batufukisa ko. Kâ mbo tutatamana mu kembela Yehova mu mpila zazansoni zi tulenda! Ni bu sa ti Satana ngolo ze nandi, ka lendi’â kakabakasa tisalu tia samuna nsangu za Timfumu ko mu nza yayansoni. Musamu wo mbo wulamaka mu bungu ti Yehova tu kengerelaka.​—Tanga Izaya 54:15, 17.

16. Bwe Yehova kavukisila kanda diandi mu ntangu ya mpasi ziyôkele?

¹⁶ Ngano nti bita tu kêla? Mu ntangu ya mpasi ziyôkele, Yehova mbo katukengerela mu mpila zole za nzitukulu. Mpila ya ntete, Yehova mbo kavukisa bisari biandi bia kwikama mu ntangu yi katuma mitinu mia mutoto mu fukisa Babilone ya Yinene, wuzololo tâ mabundu mamansoni ma bungungu. (Nza. 17:16-18; 18:2, 4) Mpila ya nzole, Yehova mbo kavukisa kanda diandi mu ntangu yi kafukisa bimonikisi bia Satana mu muzingu wa Armagedo.​—Nza. 7:9, 10; 16:14, 16.

17. Bu tutatamana mu bâ penepene na Yehova, ntia ndandu tubaka?

¹⁷ Bu tutatamana mu bâ penepene na Yehova, ntangu zazansoni Satana ka lendi’â katumwisa mpasi ko. Tala ti muntu wumona mpasi za ntangu zazansoni ni yandi beni. (Rom. 16:20) Buna, lwata binwanunu biaku biabiansoni​—mpe kukatulandi bio! Kuyêlandi mu nwana muzingu nge kaka. Bakisa mpangi zaku. Mpe landa lutwalusu lwa Yehova. Wamana sila bo, lendi bâ na lukwikulu ti Tata’aku dia luzolo die ku mazulu mbo kakukengerela.​—Iza. 41:10.