1. Bua tshinyi Yezu uvua mulombe Yehowa bua akube bayidi bende?

BUTUKU bua muladilu wa lufu lua Yezu, Yezu uvua wela meji a ntatu ivua bayidi bende mua kupetangana nayi. Bu muvuaye munange balunda bende, wakalomba Tatuende bua ‘abalame bua bualu bua mubi.’ (Yone 17:14, 15) Yezu uvua mumanye ne: pavuaye upingana mu diulu, Satana uvua ne bua kushala uluisha muntu yonso uvua musue kuenzela Yehowa mudimu. Bua bualu ebu, bantu ba Yehowa bavua dijinga ne bukubi.

2. Ntshinyi tshidi mua kutujadikila ne: Yehowa neandamune masambila etu?

² Yehowa wakandamuna disambila dia Yezu bualu mmunange Muanende. Tuetu tuenza muetu muonso bua kusankisha Yehowa, neatunange petu, ne neatuteleje patuamulomba bua atuambuluishe ne atukube. Bu mudi Yehowa Tatu wa dinanga, neatungunuke ne kutabalela bana bende ne dinanga dionso. Yeye kayi muenze nanku udi unyanga lumu luende.

3. Bua tshinyi tudi dijinga ne bukubi bua Yehowa lelu?

³ Tudi dijinga ne bukubi bua Yehowa lelu kupita muvuabi kumpala. Bakadi bipate Satana mu diulu, “muikale ne tshiji tshikole.” (Buak. 12:12) Mmufikishe bamue bantu badi batukengesha ku diela meji ne: badi benzela “Nzambi mudimu wa tshijila.” (Yone 16:2) Badi kabayi bitabuja Nzambi bobu batu batukengesha bualu tudi bashilangane nabu ku malu atudi tuenza. Nansha bobu batukengesha bua bualu kayi, tuetu katuena ne buôwa to, bualu Dîyi dia Nzambi didi diamba ne: “Mukalenge udi ne lulamatu, ne yeye neanukoleshe ne neanukube kudi mubi.” (2 Tes. 3:3) Mmushindu kayi utu Yehowa utukuba? Tumonayi mishindu ibidi.

4. Bilondeshile Efeso 6:13-17, ntshinyi tshidi Yehowa mutulongoluele bua kutukuba?

⁴ Yehowa mmutulongoluele bia mvita bidi mua kutukuba padi Satana utuluisha. (Bala Efeso 6:13-17.) Bia mvita bia mu nyuma ebi mbikole ne bidi bikubangana bimpe menemene! Kadi bua kutukubabi anu tuetu bavuale tshia mvita tshionso katuyi tutshiumbusha to. Tshia mvita tshionso tshidi tshileja tshinyi? Tuanji tumonayi tshia mvita tshionso ku tshimue ku tshimue.

5. Mukaba wa bulelela ntshinyi? Bua tshinyi tudi ne bua kuwusuika?

⁵ Mukaba wa bulelela udi uleja bulelela bua mu Bible Dîyi dia Nzambi. Bua tshinyi tudi ne bua kuvuala mukaba eu? Bualu Satana ‘ntatu wa dishima.’ (Yone 8:44) Mmushimangane kukadi bidimu binunu ne binunu ne mmupambuishe “ba pa buloba bonso”! (Buak. 12:9) Kadi bulelela bua mu Bible budi buenza bua kabatushimi to. Mmushindu kayi utudi tusuika mukaba wa mu tshimfuanyi eu? Tudi tuwusuika patudi tulonga bulelela budi butangila Yehowa, patudi tumutendelela “ne nyuma ne bulelela,” ne patudi tuenda mu bululame mu malu onso.​—Yone 4:24; Ef. 4:25; Eb. 13:18.

6. Tshibuikilu tshia pa tshiadi tshia buakane ntshinyi? Bua tshinyi tudi ne bua kutshivuala?

⁶ Tshibuikilu tshia pa tshiadi tshia buakane tshidi tshileja mikenji miakane ya Yehowa. Bua tshinyi tudi ne bua kutshivuala? Anu mutu tshibuikilu tshia pa tshiadi tshikuba muoyo wa musalayi bua mikete kayimubuedi, tshibuikilu tshia pa tshiadi tshia buakane tshidi patshi tshikuba muoyo wetu wa mu tshimfuanyi, anyi tshitudi munda, bua malu mabi a panu kaawunyangi to. (Nsu. 4:23) Yehowa mmusue bua tumunange ne tumuenzele mudimu ne muoyo wetu mujima. (Mat. 22:36, 37) Kadi Satana yeye udi utusaka bua tunange malu a panu adi Yehowa mukine, uteta bua kupandulula muoyo wetu. (Yak. 4:4; 1 Yone 2:15, 16) Buteyi ebu bobu kabuyi buende, neajinge kutuzakeja bua tuenze bualu kampanda budi bushipa mikenji ya Yehowa.

7. Mmunyi mutudi tuvuala tshibuikilu tshia pa tshiadi tshia buakane?

⁷ Tudi tuvuala tshibuikilu tshia pa tshiadi tshia buakane patudi tuitaba mikenji ya Yehowa ya tshidi tshimpe ne tshidi tshibi ne tuyitumikila. (Mis. 97:10) Bamue badi mua kumona ne: mikenji ya Yehowa idi ipangishangana malu a bungi. Kadi tuetu balekele ditumikila mêyi manene a mu Bible, tudi tuenza anu bu musalayi mu mvita idi itua ipela, umbusha tshibuikilu tshiende tshia pa tshiadi umona yeye ne: tshidi tshimunemena bujitu. Yeye muenze nanku si udi ne kaba kashale! Bua badi banange Yehowa, mikenji yende “kayena ne bujitu” to, kadi idi ipandishangana.​—1 Yone 5:3.

8. Kuvuala bisabata ku makasa bua kuikala badilongolole bua kuamba lumu luimpe lua ditalala kudi kumvuija tshinyi?

⁸ Paulo udi utulomba kabidi bua kuvuala bisabata ku makasa bua kuikala badilongolole bua kuamba lumu luimpe lua ditalala. Mbuena kuamba ne: tudi ne bua kuikala badilongolole dîba dionso bua kuyisha lumu luimpe lua Bukalenge. Patudi tuambila bakuabu mukenji wa mu Bible, ditabuja dietu didi dikola. Bidi bitukankamija bikole bua kumona mudi bantu ba Yehowa pa buloba bujima bakeba mpunga ya kuyisha lumu luimpe padibu ku mudimu, mu tulasa, miaba itu bantu bendela mishinga ne padibu baya ku nzubu ne ku nzubu, padibu baya mu bisalu, baya kutangila balela babu badi kabayi Bantemu, padibu bapetangana ne bantu badibu bamanyangane nabu anyi nansha padibu ku nzubu kabayi ne mushindu wa kupatuka bua tshikondo kampanda. Tuetu tumvua buôwa tulekela kuyisha,  tudi tufuana musalayi udi uvula bisabata mu mvita; udi mua kutapika bipepele. Dîba adi kakuluangana mvita bimpe to, ne nebimukolele bua kulonda dîyi dia mfumuende.

9. Bua tshinyi bidi bikengela tuambule ngabu munene wa ditabuja?

⁹ Ngabu munene wa ditabuja udi uleja ditabuja ditudi nadi mu Yehowa. Tudi ne ditabuja dia ne: neakumbaje milayi yende yonso. Ditabuja adi nedituambuluishe bua ‘kujima mikete yonso ya kapia ya mubi.’ Bua tshinyi bidi bikengela tuambule ngabu munene eu? Bualu udi utuambuluisha bua malongesha a batontolodi kaatusesuishi anyi bua katuteketshi mu maboko padi bantu babipisha malu atudi tuitabuja. Tuetu katuyi ne ditabuja, katuakuikala ne bukole bua kukandamana patusaka bantu bua kushipa mikenji ya Yehowa to. Kadi musangu wonso utudi tuakuila ditabuja dietu ku mudimu anyi mu tulasa, tudi tuleja mutudi bambule ngabu wetu. (1 Pet. 3:15) Musangu wonso utudi tubenga mudimu wa makuta a bungi udi mua kutupangisha bua kuikala kutendelela Yehowa, tudi tuleja mutudi bambule ngabu wetu. (Eb. 13:5, 6) Musangu wonso utudi kabidi tuenzela Yehowa mudimu nansha batuluisha, tudi tuleja mutudi bambule ngabu wetu.​—1 Tes. 2:2.

10. Tshifulu tshia lupandu ntshinyi? Bua tshinyi tudi ne bua kutshivuala?

 ¹⁰ Tshifulu tshia lupandu nditekemena didi Yehowa mutupeshe dia ne: neatubishe ku lufu ne neafute bonso badi benza disua diende. (1 Tes. 5:8; 1 Tim. 4:10; Tito 1:1, 2) Anu mutu tshifulu tshikuba mutu wa musalayi, ditekemena dia lupandu didi dikuba bieledi bietu bia meji. Mushindu kayi? Didi dienza bua tushale batuishile mêsu pa milayi ya Nzambi ne dienza bua tumone ntatu itudi nayi mu mushindu muimpe. Mmunyi mutudi tuvuala tshifulu etshi? Tudi tutshivuala patudi tuela meji mutu Nzambi uela. Tshilejilu, katuena bateke ditekemena dietu mu biuma bidi mua kujimina lelu ne malaba to, kadi tudi baditeke kudi Nzambi.​—Mis. 26:2; 104:34; 1 Tim. 6:17.

11. Muele wa mvita wa nyuma ntshinyi? Bua tshinyi bidi bikengela tuluangane nawu?

¹¹ Muele wa mvita wa nyuma m’Bible Dîyi dia Nzambi. Muele au udi ne bukole bua kutapa mashimi a mishindu yonso kuapandulula ne kumbusha bantu ku bupika bua malongesha a dishima ne ku bibidilu bibi. (2 Kol. 10:4, 5; 2 Tim. 3:16, 17; Eb. 4:12) Tudi tulonga mua kuluangana mvita ne muele au mudibi bikengela patudi tudilongela ne padi bulongolodi bua Nzambi butulongesha. (2 Tim. 2:15) Pa kumbusha bia mvita ebi, Yehowa udi utukuba kabidi mu mushindu mukuabu; wowu au udi pawu ne bukole bua bungi. Nguepi au?

12. Ntshinyi tshikuabu tshitudi natshi dijinga? Bua tshinyi?

¹² Musalayi udi mumanye mvita utu mumanye ne: yeye nkayende kena mua kuluangana ne tshiluilu tshinene tshia basalayi ne kutshitshimuna to; bidi bikengela bayiluangane ne basalayi nende. Ke mudibi kabidi buetu tuetu, katuena mua kutshimuna mvita itudi tuluangana ne Satana ne bena diende tuetu nkayetu to; tudi dijinga ne dikuatshisha dia bena Kristo netu. Yehowa mmutupeshe “tshisumbu tshijima tshia bana betu” ba pa buloba bujima. Badiku bua kutuambuluisha.​—1 Pet. 2:17.

13. Bilondeshile Ebelu 10:24, 25, mmunyi mudi dibuela mu bisangilu dituambuluisha?

¹³ Umue mushindu utudi tupeta dikuatshisha nkubuela mu bisangilu. (Bala Ebelu 10:24, 25.) Bisangilu bidi mua kutukankamija patudi tuteketa mu mikolo bualu kutu misangu itutu tuetu bonso tuteketa mu mikolo. Mandamuna atu bena Kristo netu bafila ne muoyo mujima atu atukankamija. Miyuki ya malu a mu Bible ne manaya atubu benza bitu bitukolesha bua kutungunuka ne kuenzela Yehowa mudimu. Nansha diyukila ne bena Kristo netu malu adi akolesha ku muoyo kumpala kua bisangilu ne panyima pabi ditu padi ditukankamija. (1 Tes. 5:14) Bualu bukuabu: bisangilu bitu bitupesha mpunga wa kumvua disanka ditu muntu umvua padiye wambuluisha bakuabu. (Bien. 20:35; Lomo 1:11, 12) Bisangilu bitu bituambuluisha kabidi mu mushindu mukuabu. Bidi bitupaya bua kuyisha, bienza anu bu ne: bidi bitupesha mayele makuabu a mua kuluangana mvita. Tshilejilu, tudi tulonga mua kuyisha bimpe menemene ne biamu bia mudimu bidi mu Bintu bietu bia kulongesha nabi. Nanku ikala ulongolola bisangilu bionso bimpe. Paukadi mu bisangilu, bilondesha ne ntema. Padibi bijika, teka malu audi mulongamu mu tshienzedi. Wewe wenza malu aa, neulue “musalayi muimpe wa Kristo Yezu.”​—2 Tim. 2:3.

14. Ndiambuluisha kayi dikuabu kabidi ditudi nadi?

¹⁴ Badi batuambuluisha kabidi kudi banjelu ba bukole bungi kabuyi kuamba. Anji elabi meji bua tshidi muanjelu umue tshianana mua kuenza! (Yesh. 37:36) Mpindieu ela meji a tshidi tshiluilu tshia banjelu ba bukole mua kuenza.  Kakuena muntu anyi demon udi mua kutua tshiluilu tshia Yehowa tshia bukole tshiadi to. Tudi mua kuamba ne: Ntemu umue udi ne lulamatu kusangisha ne Yehowa badi benza tshiluilu tshinene. (Bal. 6:16) Atshi si ntshiotshi! Ikala uvuluka malu aa padi bena mudimu nenu, balongi benu, anyi balela bebe badi kabayi Bantemu bakuamba anyi bakuenzela bualu budi mua kukutekesha mu mikolo. Funda ulame, kuena nkayebe mu mvita iudi uluangana to. Udi ulonda buludiki bua Yehowa.

15. Bilondeshile Yeshaya 54:15, 17, bua tshinyi kabakupuwisha bantu ba Nzambi mukana?

¹⁵ Kudi malu a bungi adi asaka bantu badi ku bukokeshi bua Satana bua kutukina. Katutu tubuelakana mu malu a tshididi anyi tuya ku mvita to. Tutu tumanyisha bantu dîna dia Nzambi, tubayisha ne: anu Bukalenge buende ke buatuadila bantu ditalala, ne tutumikila mikenji yende miakane. Tudi tuela mukokeshi wa buloba ebu patoke bualu mmuena dishima wa kalanda musenga ne mushipianganyi. (Yone 8:44) Tutu tumanyisha kabidi bantu bua kabutu ka bulongolodi bua Satana kakadi kanunka. Satana ne bena diende kabakutupuwisha mukana nansha kakese. Tuetu netutungunuke ne kutumbisha Yehowa, tumutumbisha mu mushindu wonso utudi tupeta! Nansha mudi Satana ne bukole bua bungi, ki mmukumbane bua kuimanyika mukenji wa Bukalenge bua kawufiki kudi bantu pa buloba bujima to. Mbienzeke nanku anu bualu Yehowa udi utukuba.​—Bala Yeshaya 54:15, 17.

16. Mmunyi muapandisha Yehowa bantu bende mu dikenga dinene?

¹⁶ Ntshinyi tshienzeke kumpala eku? Mu dikenga dinene, Yehowa neatupandishe mu mishindu ibidi ya dikema. Wa kumpala, neapandishe batendeledi bende badi bamulamate tshikondo tshiasakaye bakalenge ba pa buloba bua kubutula bitendelelu bia dishima bidi bienza Babilona munene. (Buak. 17:16-18; 18:2, 4) Muibidi, neapandishe bantu bende pabutulaye bishadile bia mu bulongolodi bua Satana ku Armagedone.​—Buak. 7:9, 10; 16:14, 16.

17. Tuetu bashale pabuipi ne Yehowa bidi bituambuluisha ku tshinyi?

¹⁷ Tuetu bashale pabuipi ne Yehowa, Satana kakutuenzela bualu nansha bumue budi mua kutuenzela bibi bua kashidi to. Yeye ke wenzelabu tshia musangu umue bua kashidi. (Lomo 16:20) Nanku vuala bia mvita bionso, kubivudi to! Kutetshi bua kuluangana mvita nkayebe to. Ambuluisha bena Kristo nebe, ne londa buludiki bua Yehowa. Wewe wenza nanku, newikale mutuishibue ne: Tatu webe wa mu diulu muena dinanga neakupeshe bukole ne neakukube.​—Yesh. 41:10.