1. Ánni kʼoakitsonile Jesús je Jeobá nga katasíkuinda je chjotatjenngile.

NITJE̱N nga tokʼoatjínsa tsakʼejna i̱ Sonʼnde je Jesús, kui kisikjaʼaitsjen je kjoa xi kjoaʼatojin je chjotatjenngile. Nga tsjoake koan, i kitsole je Nʼaile: “Tokui xi bʼetsʼoantje nga kʼoasʼin si̱kuindai, jméni nga je xi tsʼen likui sikaosíni” (Juan 17:14, 15). Kʼianga jekoaini ya ngʼajmi, je Jesús be nga tosi tonda kʼoetʼale Na̱i je xi mele nga je Jeobá sixále. Kuinga machjénni nga je Jeobá sikuinda naxinandále.

2. Ánni kʼoéjngosíñá tokoán nga kjuinrʼoéná je Jeobá kʼianga kʼoétsʼoalee.

² Nga tsjoake Jeobá je ʼNdíle kinrʼoéle kʼianga tsakʼétsʼoale. Tsa kʼoénelee yaoná nga kʼoasʼiaan josʼin mele je Jeobá kʼoati tsjoake koa̱nná, kjuinrʼoéná nga si̱jélee nganʼio kʼoa sikuindaná. Je Jeobá jngoo Nʼai xi nʼio tsjoakená kʼoa sikuindaná ngantsjai. Tsa tsínlani kʼoasʼin je Jeobá alikuijin nda kʼoaxki̱.

3. Ánni machjénni nga je Jeobá sikuindaná.

³ Ngisaa machjénná ndʼaibi nga je Jeobá sikuindaná, nga̱ je Na̱i i Sonʼnde kinikʼatjenjenngi kʼoa nʼio jtile (Apoc. 12:12). Tjínkʼa xi kʼoasʼin síkjaʼaitsjen nga Niná tjíosíxále kʼianga fitjenngikená, kʼoa jé Na̱i xotísʼín nga kʼoasʼin síkjaʼaitsjen kʼani chjota (Juan 16:2). Kʼoa je xi tsín makjainle tʼatsʼe Niná, fitjenngikená nga̱ tsín ya nojiaan yaoná jmeni xi chon sonʼnde. Ninga kʼoalani alikui nokjoaan, je Biblia itso: “Je Niná kjaínga nʼiotʼakon, nga nʼio sikatíono, sikuindano nga tsín sikaono je xi tsʼen” (2 Tes. 3:3). Jaola koya kataʼyaa josʼin síkuindaná je Jeobá.

4. Tojo tso Efesios 6:13-17, jméni xi tsjoáná je Jeobá nga síkuindaná.

⁴ Je Jeobá tsjoáná je xi basenkaoná nga tsín sikiʼaonná jmeni xi síkaoná je Na̱i (tʼexkiai Efesios 6:13-17). Je xi tsjoáná je Jeobá yaa mangóson jotsakjayo je sondado nga ki kjoajchán. Je xi tsjoáná je Jeobá nʼio nda basenkaoná, tonga tokʼiaa koasenkaoná tsa chʼa̱kjá ngayeje xi tsjoáná. Kataʼyala  jmé xi tsoyanile nga jngó jngó koya xi chʼakjá xi tʼatsʼe Niná nroani. *

5. Jmé xi tsoyanile je xjoa̱xínkjándía xi jngoyale xi ñaki kʼoatjín, kʼoa ánni machjénni nga kʼoékjá.

⁵ Je xjoa̱xínkjándía xi jngoyale xi ñaki kʼoatjín kui tsoyanile je Énle Niná xi ñaki kʼoatjín xi faʼaitʼa ya Biblia. Ánni machjénni nga kʼoékjá xjoa̱xín jebi. Kuinga “nʼaile kjoandiso” je Na̱i (Juan 8:44). Jenʼio nkjín jmi nó nga tíbʼéndiso kʼoa jetsakʼanachale chjota jngo tjíjtsa Sonʼnde (Apoc. 12:9). Tonga nga ʼyaa jmeni xi tso je Énle Niná xi faʼaitʼa ya Biblia alikui bʼanachaná. Jósʼin bʼekjá je xjoa̱xínkjándía xi jngoyale xi ñaki kʼoatjín. Kʼiaa nga ʼyaa jokjoantjínni xi tʼatsʼe Jeobá, nga kʼoasʼin jchaxkoán josʼin mele kʼoa nga nda kjuinkoaa yaoná (Juan 4:24; Efes. 4:25; Heb. 13:18).

6. Jméni je najñoki̱cha̱ xi jngoyale kjoa xi tjínle kjoakixi, kʼoa ánni machjénni nga chʼa̱kjá.

⁶ Je najñoki̱cha̱ xi jngoyale kjoa xi tjínle kjoakixi kui tsoyanile je kjoatéxoma xi tsjoáná je Jeobá. Ánni machjénni nga chʼa̱kjá. Tojosʼin tsakasenkao je ni̱ma̱le sondado je najñoki̱cha̱ xi tsakʼakjá, je najñoki̱cha̱ xi jngoyale kjoa xi tjínle kjoakixi kʼoatisʼin basenkaoná nga tsínkui faʼasʼenjin ni̱ma̱ná je kjoafaʼaitsjen xi tjín sonʼnde (Prov. 4:23). Je Jeobá kui xi mele nga tsjoacha katamaa kʼoa nga ñaki kao ngayeje ni̱ma̱ná si̱xálee (Mat. 22:36, 37). Kui xi mele je Na̱i nga xkoa̱ya katasʼe je ni̱ma̱ná, kʼoa nga kui koa̱ntsjoachaa jmeni xi tjín sonʼnde xi jtike je Jeobá (Sant. 4:4; 1 Juan 2:15, 16). Tsa tsín kʼoasʼiaan josʼin mele je Na̱i, básjaisale josʼín nga kui kʼoasʼiaan xi tsín sasénle je Jeobá.

7. Jósʼin chʼakjá je najñoki̱cha̱ xi jngoyale kjoa xi tjínle kjoakixi.

⁷ Chʼakjáñá je najñoki̱cha̱ jebi xi jngoyale kjoa xi tjínle kjoakixi kʼianga kʼoasʼin mangínkoaa yaoná josʼin mele je Jeobá, kʼoa nga kʼoasʼin nikjaʼaitsjeen josʼin síkjaʼaitsjen je tʼatsʼe xi ndatjín kao xi chʼaotjín (Sal. 97:10). Tsakui nichxin kʼoasʼin síkjaʼaitsjen kʼa chjota nga nʼio tse xi bʼechjoalee yaoná kʼianga nitjosoán je kjoatéxomale Jeobá. Tonga tsa tsín si̱tjosoán je kjoafaʼaitsjen xi tsjoá Biblia, yajin koa̱nngósoán jngo sondado xi faʼáxin je najñoki̱cha̱ xi yʼakjá kʼianga tíkján kʼoa kʼoasʼin sikjaʼaitsjen nga nʼio ai. To chjota chinijin tsa kʼoasʼin. Tonga je xi tsjoake je Jeobá alikui kʼoasʼin síkjaʼaitsjen nga ñʼai tjín je kjoatéxomale, tosaa kʼoasʼin síkjaʼaitsjen nga kui xi basenkaoná (1 Juan 5:3).

8. Jmé xi tsoyanile nga fayaa je jté xi jngoyale nga tiyondaa nga ʼmiyasoán je énnda.

⁸ Je Pablo kʼoakitso nga tjínnele kjoáyaa je jté xi jngoyale nga tiyondaa nga kʼuínyasoán je énnda xi tsjoá xi nyʼán tjín. Kui xi tsonile nga tiyondaa ngantsjai nga kʼuínyaa je énnda xi tʼatsʼe Chjotaxále Niná. Ngisaa nʼio sʼejna je kjoamakjainná nga kui chjakaonajmíñá chjota jmeni xi tso Biblia. Tsjoa sʼe tokoán nga tjíotsoyason jngo tjíjtsa Sonʼnde je choʼndale Jeobá. Tobʼelañá, tsoyason ya tʼaxále, ya ndʼiaskuela, jña saténa tsojmi, nga xki̱ ndʼia xki̱ ndʼia, nga tsojmi fikatse, nga fisíxatʼa xínkjín xi tsín testigole Jeobá ma, fákaonajmíni Énle Niná je chjota xi bexkon, kʼoa tsoyason ninga kʼia nga tsín ma bitjo ndʼiale. Tsa tokui nga nokjoaan nga tsín tikʼuínyasonñá, yajin koa̱nngósoán joni jngo sondado xi kʼia  bʼasje jtéle nga tjíokján. Tijejin sikiʼaonni yaole, ngisajin ñʼai koa̱nle nga sikuinda yaole kʼoa likuijin koaitjenngi josʼin koandiaale je xi séntítjonle.

9. Ánni machjénni nga chʼaa je ki̱cha̱ xi bájchxochjoa yaoná xi jngoyale je xi makjainná.

⁹ Je ki̱cha̱ xi bájchxochjoa yaoná xi ngoyale je xi makjainná kui tsoyanile nga makjainná xi tʼatsʼe Jeobá. Makjainná nga sitjoson ngayeje jmeni xi tso. Nga makjainná basenkaoná nga nikjitsʼoaa “je flecha xi títi xi tsʼe na̱i”. Tjínnele chʼaa ki̱cha̱ jebi, nga̱ kui xi basenkaoná nga tsín makjainná jmeni xi tso je chjota xi yátsʼi̱n binyále Niná. Kʼoa kui xi basenkaoná nga tsín nikʼajenlee tokoán nga ʼya xi besinná kʼoa nga ʼya xi jotsoná. Tsa tsínná kjoamakjain, ñʼaijin koa̱nná nga si̱tjosonlee je Jeobá kʼianga ʼya xi kʼoakuitsoná nga kui kʼoasʼiaan xi tsín sasénle. Tonga kʼianga tsínkui kʼoanʼia xi tsín sasénle je Jeobá ya tʼaxáná kʼoa tsa ya ndʼiaskuela, kui xi tsonile nga tíbasenkaoná je kjoamakjainná (1 Ped. 3:15). Kʼoati basenkaoná je kjoamakjainná nga tsín chjoe je xá xi bʼaitʼaná. Tsakui nichxin nda koa̱nchjíná, tonga tsakui kʼoechjoaná nga tsín tinda si̱xánilee je Jeobá (Heb. 13:5, 6). Kʼianga kixi mangíntʼalee je Jeobá nga ʼya xi batiochjoaná, kui xi tsonile nga tíbasenkaoná je kjoamakjainná (1 Tes. 2:2).

10. Jméni je xombeki̱cha̱ xi jngoyale kjoabitjontjainá, kʼoa ánni nga kui kʼoéyañá.

 ¹⁰ Je xombeki̱cha̱ xi jngoyale kjoabitjontjainá kui tsoyanile je kjoachoya xi tsjoáná Jeobá. Je Jeobá kʼoatso nga tse kjoanda tsjoále je xi kʼoasʼin josʼin mele. Kʼoa ninga kuiyá, sikjaʼáyanile (1 Tes. 5:8; 1 Tim. 4:10; Tito 1:1, 2). Tojosʼin basenkao jko̱ sondado je xombeki̱cha̱, je kjoachoya xi tjínná nga kuitjo̱ntjé, basenkao je kjoafaʼaitsjenná. Basenkaoná nga kui ngisa nikjaʼaitsjeen jmeni xi tso je Niná nga sʼin, kʼoa nga tsínkui nʼio nikjáojiaan je kjoa xi bitjatojiaan. Nga bʼeyaa jkoaa je xombeki̱cha̱ xi jngoyale kjoabitjontjainá, kui xi tsonile nga bʼenelee yaoná nga kʼoasʼin nikjaʼaitsjeen josʼin síkjaʼaitsjen je Jeobá. Tobʼelañá, alikui kui ninʼiotʼaa je kjoanyiná xi toxitsjoani, tosaa je Niná ninʼiotʼaa (Sal. 26:2; 104:34; 1 Tim. 6:17).

11. Jméni je espada xi tsʼe espíritu, kʼoa ánni nga kui si̱chjénñá.

¹¹ Je espada xi tsʼe espíritu kui je Énle Niná xi faʼaitʼa ya Biblia. Je espada jebi, nʼio tjínle nganʼio nga̱ síkʼéjnatsen xi tsínni kʼoatjín, kʼoa binyakao je chjota nga tsín tikui makjainnile xi to énndiso kʼoa nga tsín tikui kʼoasʼínni xi chʼaotjín (2 Cor. 10:4, 5; 2 Tim. 3:16, 17; Heb. 4:12). Je xi basenkaoná nga nda nichjén, kʼiaa nga chotʼayá nga toñá kʼoa nga tsoyaná je naxinandále Niná (2 Tim. 2:15). Tonga ali tsa tokuijin jmeni xi jekachotʼayajiaan xi tsjoáná je Jeobá nga basenkaoná. Kataʼyalasa josasʼin basenkaoná.

12. Jmésa xi machjénná, kʼoa ánni.

¹² Jngo sondado xi jenʼio nda be josʼin kján nga fi kjoajchán, be nga tsín kʼoakoa̱nle nga toje. Be nga machjénle nganʼiole sondado xi ngikʼa. Kʼoatisʼinni tsanda ñá, alikui si̱kinjelee je Na̱i kao xi ya tsjoánganʼiole tsa toñá, machjénná nganʼiole je ndsʼee. Kʼoasʼin basenkaoniná je Jeobá nga tjío je ndsʼee jngo tjíjtsa Sonʼnde (1 Ped. 2:17).

13. Tojo tso Hebreos 10:24, 25, jósʼin binyakaoná nga biyojtián.

¹³ Nio binyakaoná kʼianga mangián kjoajtín (tʼexkiai Hebreos 10:24, 25). * Ngatsʼiñá nga sakʼoa nroajen tokoán. Tonga kʼianga mangián kjoajtín nda satío tokoán. Nga tsjoá comentariole je ndsʼee tsjoánganʼioná, kʼoa jme xi faʼachoya ya jinjtín kʼoa kao kjoanokjoaya xi faʼa basenkaoná nga tosi tonda nixálee je Jeobá. Nda satío tokoán kʼianga chobakaonajmiá je ndsʼee nga kje fitsʼiajin je kjoajtínná kʼoa kʼianga jefetʼa (1 Tes. 5:14). Kʼoati tsjoa sʼe tokoán kʼianga binyakoaa xi kjaʼaí nga mangián kjoajtín (Hech. 20:35; Rom. 1:11, 12). Nkjínsa koya josʼin binyakaoná nga mangián kjoajtín. ʼMiyaná josʼiaan nga ngisa nda kʼuínyasoán kʼoa nga ngisa nda koakoyalee Biblia je chjota. Tobʼelañá, ʼmiyaná josʼiaan nga ngisa nda si̱chjén je xo̱n kao video xi bʼasje je naxinandále Niná. Kuinga machjénsíni nga tongini chótʼayajiaan jmeni xi faʼa ya kjoajtín, nga jetísʼejna kjoajtín nda kuinyañoaa, kʼoa xijekoa̱n, kjuintjenngiaa kjoafaʼaitsjen xi kuinóʼyá. Tsa kʼoasʼiaan ngayeje jebi “joni tsa sondado xi nda fitʼale Jesucristo” alikui sikinjená je kontraná (2 Tim. 2:3).

14. Jmésani xi basenkaoná.

¹⁴ Nʼio nkjín millón mani je ánkje xi binyakaoná. Tsa nʼio tse nganʼio tjínle nga tojngo ánkje, si̱kjaʼaitsjenla jmeni xi koa̱nle sʼin je xi millón mani (Is. 37:36). Nijngojinla chjota kʼoa nijejinla na̱i xi ndajin sikinjele  je ánkjele Jeobá. Je Jeobá nʼio tse nganʼio tjínle, kʼoa nga je Jeobá basenkaoná ngisaa tse nganʼio sʼená ninga nkjín koa̱nni xi koaitjenngikená (Juec. 6:16). ʼYañá nga ñaki kʼoatjín jebi. Si̱kjaʼaitsjenjiaan nga nʼio nkjín mani je xi binyakaoná kʼiatsa síkinroajen tokoán jmeni xi tsoná kʼoa tsa jme xi síkaoná je xi ñatjen nixá, xi ñatjen mangián skuela, kʼoa tsa jngo xíngiaa xi tsín testigole Jeobá ma. Si̱kjaʼaitsjeen nga tsín toñá tiyoaa, jé Jeobá koasenkaoná kʼiatsa kjuintjenngiaa josʼin bándiaaná.

15. Tojo tso Isaías 54:15, 17, ánni nga tsín ʼya xi koa̱nnile kʼoechjoale je naxinandále Niná nga kuitsoyason.

¹⁵ Nga je Na̱i kjinentsja jmeni xi chon sonʼnde, nkjín koya anni nga majtikeniná je chjota. Alikui kjoa política nojiaan yaoná kʼoa alikui kjoajchán mangián. Kui ʼmiyalee je chjota joʼmi je Niná, kʼoaʼmilee nga toje Chjotaxále Niná xi kjoaʼaíkao kjoanyʼán kʼoa mangíntjenngiñá je kjoatéxomale. Kʼoaʼmilee je chjota nga je xi kjinentsja sonʼnde ndʼaibi ndisoní kʼoa nʼio tsʼen (Juan 8:44). Kʼoa kui ʼmiyasoán nga jeme tjóxin jmeni xi chonle sonʼnde je Na̱i. Tonga je Na̱i kʼoa kao xi ya fitʼale, alikui je kʼoakoa̱nle nga kʼoechjoale nga kʼoasʼin ʼmiyasoán, tosaa tosi tonda fasjailee josʼin ʼmiyasoán nga chʼasjengʼaa je Jeobá. Ninga tjínle nganʼio je Na̱i, alikui je kʼoakjimale nga tíbʼéchjoale nga tíʼmiyale Énle Niná je chjota jngo tjíjtsa Sonʼnde. Kuinga kjima kʼoatinʼiañá nga je Jeobá tísíkuindaná (tʼexkiai Isaías 54:15, 17). *

16. Jósʼin kʼoasjentjai Jeobá je naxinandále kʼianga kjoaʼaí je kjoañʼai xi nʼio tse.

¹⁶ Jméni xi koa̱n nichxin xi nroaján. Jao koya tjínni josʼin kʼoasjentjainá je Jeobá kʼianga tíjna je kjoañʼai xi nʼio tse. Xi títjon, kʼoasjentjai je choʼndale xi kixi fitʼale kʼianga je chjotatítjon xi batéxoma xi tjío Sonʼnde sikjeson je Babilonia xi nʼioje, xi tsonile, ngatsʼi je religión ndiso (Apoc. 17:16-18; 18:2, 4). Xi majaoni, kʼoasjentjai naxinandále kʼianga kjoaʼaí je Armagedón nga sikjeson jmesani xi je Na̱i kjinentsja (Apoc. 7:9, 10; 16:14, 16).

17. Ánni machjénni nga tsínkʼia si̱kjinlee je Jeobá.

¹⁷ Tsa tsín si̱kjinlee je Jeobá alikui koa̱nle nga tondiaa sikiʼaonná je Na̱i, nga̱ tosaa je xi tondiaa jchajin (Rom. 16:20). Kuinga machjénsíni nga chʼa̱kjá ngayeje xi tʼatsʼe Niná nroani kʼoa alikʼia chja̱ʼaxinlee yaoná. Alikui toñá chʼaa yaoná nga kuixkantʼakoaa je Na̱i kao jmeni xi chonle sonʼnde. Kʼoainganʼiolee je ndsʼee kʼoa kjuintjenngiaa jotsoná je Jeobá. Tsa kʼoasʼiaan, alikui jao tjín tokoán nga je Jeobá tsjoánganʼioná kʼoa sikuindaná (Is. 41:10).