MWAHA WOOSOMIYA 13
Yehova nonikhikicera cani?
“Apwiiya akhanle ookhuluvelya, ni ayo anaahala wuulipihani ni wuukhikicerani wiira Ntakhali huupankeni itthu.”—2 ATESAL. 3:3.
NCIPO 124 Nkhale ookhuluvelya
NINHALA WIITTHUCANI? *
1. Nlattuni Yesu wanlepenlyaawe Yehova wiira aakhalenle attharyaawe?
UHIYU waya nihuku noomalela ukumyaawe watuninyani, Yesu ahoopuwela cinene masakha yaahala waaphwanya attharyaawe. Nlattu wo waafenta cinene attharyaawe, Yesu ahowiirela athumwaane: “Mwaakhalenle nlattu wa Ntakhali.” (Joau 17:14, 15) Yesu ancuwela wiira woohipica anhala uturuwela wiirimu, ni ancuwela wiira Sotwani, Tiyapu, anhala umwaanana otheene ule aahala upheela unswalela Yehova. Phimaana, apoovu a Yehova yanhala upheela ukhikiceriya.
2. Isiyani innikupaliha wiira Yehova naahala waakhula mavekelweehu?
2 Yehova ahopanka itthu Yesu yaalepenlyaawe kontha uyo nanfenta cinene Mwanawe. Hiiva neekurumicaka umwiiwelela Yehova, uyo ciicammo naahala unifenta. Ni nalompanka nanlepelaka wiira anikavihere ni anikhikicere, uyo naahala unaakhula. Yehova khanle Nnyari oofenta. Phimaana, uyo khanhala uhiya waawacera asaanaawe. Unari wiira khaapanka iyo, ncina nawe awula imaannyaawe yanhala unanarihiya!
3. Kontha isiyani mahukwaala ninaatepa upheela ukhikiceriya?
3 Mahukwaala, hiiva ninaatepa upheela cinene ukhikiceriya ni Yehova. Sotwani hoomoliya wiirimu, ni nna co ri watuninyani ni ri “ooviruweene cinene.” (Apoka. 12:12) Uyo naawiiriha atthu akiina wuupuwela wiira unilupattha hiiva ikhanle inanna ayova ‘yonvarela nteko Nluku.’ (Joau 16:2) Atthu akiina ahinaamini wiira Nluku haavo anaanilupattha nlattu woonoona wiira hiiva ninaavirikana naatthu o ntuninyani. Hataa atthu yanilupatthaka nlattu wosiyani, hi khaninlamuliya woova. Kontha isiyani? Kontha Nuulumo na Nluku nineera: “Apwiiya akhanle ookhuluvelya, ni ayo anaahala wuulipihani ni wuukhikicerani wiira Ntakhali huupankeni itthu.” (2 Atesal. 3:3) Manannani Yehova cinnikhikiceraawe? Nttwee noone mananna meeli.
YEHOVA HONIVAHA IKARUMA COKHOTTO
4. Toko cinthoonyeraaya Efesu 6:13-17, isiyani Yehova inivahilyaawe wiira anikhikicere?
4 Yehova honivaka ikaruma cokhotto cinnikhikicera wiira Sotwani hinikhitiri. (Nsome Efesu 6:13-17. *) Masi hiiva ninhala ukhikiceriya navarelaka nteko ikaruma cotheene ni naahiruleke nanka ikaruma imoca. Isiyani inthoonyeraaya khula ikaruma yokhotto? Nttwee noone.
5. Isintu yo ikhweeli inthoonyera isiyani, ni nlattuni ninlamuliyeehu uwara?
5 Isintu yo ikhweeli inthoonyera ikhweeli ciri nnuulumoni na Nluku, Ibiiblya. Nlattuni ninlamuliyeehu uwara iyo isintwiiyo? Kontha Sotwani khanle “athumwaane wootha.” (Joau 8:44) Uyo hokhala myaakha cinci oothaka ni aahapusaka atthu “ituninya yotheene inkhaliya.” (Apoka. 12:9) Masi ikhweeli cimphwanyannya mbiiblyani cinaanikavihera uhithepiya ni Sotwani. Isiyani inlamuliyeehu upanka wiira niware iyo isintwiiyo? Nihaana niitthucaka ikhweeli cinonttonkaca Yehova tipani, nihaana ninswalelaka “wo nnepa ni ikhweeli” ni nihaana nikhalaka atthu ookhuluvelya nhina wo citthu cotheene.—Joau 4:24; Efesu 4:25; Mabere. 13:18.
Isintu: Ikhweeli co nnuulumoni na Nluku
6. Nikhikicero nosariya ninthoonyera isiyani, ni nlattuni ninlamuliyeehu uwara?
6 Nikhikicero nosariya ninthoonyera malamulo osariya a Yehova. Nlattuni ninlamuliyeehu uwara nno nikhikiceronno? Khalayi, nikhikicero naawarawe natoropa nankhikicera nrimaawe wiira hihomiye niikatana awula ni nivaka. Inanna imocaaru, nikhikicero nosariya ninaanikhikicera wiira citthu coohinamaana co ntuninyani cihirukunuse nrimeehu awula makhalelweehu. (Miru. 4:23) Yehova nopheela wiira ninfente ni ninswalele ninrimeehu wotheene. (Mat. 22:36, 37) Phimaana, Sotwani naamananiha waawanyaniha nrimeehu, wiira cinicivele citthu co ntuninyani cinonrusa Yehova. (Tiya. 4:4; 1 Jo. 2:15, 16) Ni aahikhitiriki unipanka iyo, uyo khanoocya; naahala unilupattha wiira amananihe unihiiha wiiwelela malamulo a Yehova.
Nikhikicero: Malamulo osariya a Yehova
7. Manannani hiiva cinwareehu nikhikicero nosariya?
7 Hiiva ninwara nikhikicero nosariya natthunaka malamulo a Yehova anhimya isiyani ikhanle itthu yooreera ni yoonanara, ni neekurumicaka weettela ayo malamulwaayo. (Isaa. 97:10) Atthu akhwaawe anoopuwela wiira malamulo a Yehova anaanihiiha wiitaphula. Masi ntthu nonswalela Yehova nohiya weettela mattharelelo o mbiiblyani, nolikanaca ni natoropa norula nikhikicero nawe ilavaniyakoono ikhotto, nlattu wowuupuwela wiira ninanlemela cinene. Upanka commo waahala ukhala ulolo! Ntthu nonfenta Yehova, khanoopuwela wiira malamulo a Yehova anaalemela cinene awula anaarika weettela, masi uyo noona ukhala itthu inhala woopola ukumyaawe.—1 Jo. 5:3.
8. Uwara ivirattho nnyaani wihu, nikhalaka owiitthenkaceene wiira nilalyee ihapari comaana, maanaaya isiyani?
8 Apostolu Paulu ciicammo honikurumica uwara ivirattho nnyaani wihu, nikhalaka owiitthenkaceene wiira nilalyee ihapari comaana co nnema. Iyo maanaaya wiira khula ukati, nihaana nikhalaka owiitthenkaceene wiira nilalyeere ihapari comaana co Umwene. Naalalyeeraka akhwiihu myaha co mbiiblyani, waamini wihu unaakhala woolipa cinene. Unaanitteela nrima uwoona apoovu a Yehova ntuninyani motheene yaavyaka mananna oolalyeera ihapari comaana—untekoni, ucikolani, mapuro antumihaciya, mmawaani, yarwaaka upacari, yarwaaka uwootola amucyaaya ahikhanle Masaahiti a Yehova, ukati woowoopana mwaha atthu ahinaacuwelaaya, ni mpaka hataa yakhumelelaka itthu ihinaakhitiriha ukhuma wapuwani waya. Unari wiira hiiva ninaakhala owoova ni ninaahiya ulalyeera, naahala ulikanaca ni natoropa norula ivirattho cawe ilavaniyakoono ikhotto. Natoropa aahala upanka iyo, khaahala upica urakala nnyaani. Ni arakalaka, uyo khaahala ukhitiri wiikhikicera ni wanhala unrika upanka citthu caahalaawe urumiya naakomantantyaawe ookhottoni.
Ivirattho: Ukhala owiitthenkaceene wiira nilalyeere ihapari comaana
9. Nlattuni ninlamuliyeehu uvarela nteko nkhikicero muulupale ukhanle waamini?
9 Nkhikicero muulupale ukhanle waamini unthoonyera umwaamini wihu Yehova. Hiiva ninaakhuluvela wiira Yehova naahala wiirannyeeha citthu cotheene cikhuluvelihilyaawe. Nwo waamininwo unaanikavihera ‘uttipihaca mavaka otheene oopharela a Ntakhali.’ Nlattuni unlamuliyeehu uvarela nteko uyo nkhikicero muulupalyooyo? Kontha uyo unaanikhikicera wiira nihithepiye naatthu anwuuluma pusya apoovu a Yehova, ni wiira nihiwoove ale anvaanyiha citthu cinkupaliihu. Woohaamini, khaninhala ukhitiri ulipa atthu akhwaawe yanikhanyererihaka upanka itthu yonrusa Yehova. Masi khula ukati unkhotteehu upanka itthu yonrusa Yehova, untekoni awula ucikolani, ninthoonyera wiira ninaavarela nteko nkhikicerweehu. (1 Pet. 3:15) Khula ukati unkhotteehu nteko wonsurukhu mwinci, nlattu woocuwela wiira uyo ntekooyo khunhala univaha ukati wonswalela Yehova saana, ninthoonyera wiira ninaavarela nteko nkhikicerweehu. (Mabere. 13:5, 6) Ni khula ukati uhinhiyeehu unswalela Yehova hataa nilupatthiyaka, waamini wihu unaanikhikicera.—1 Atesal. 2:2.
Nkhikicero muulupale: Umwaamini Yehova ni waamini inatiri cawe
10. Ikapaseeti ikhanle woopwa inthoonyera isiyani, ni nlattuni ninlamuliyeehu uwara?
10 Ikapaseeti ikhanle woopwa inthoonyera nweherero woohoolo Yehova univahilyaawe wo waavaha iparakha atthu otheene ampanka itthu impheelaawe, ni woonunweleliha nakhwaaka. (1 Atesal. 5:8; 1 Tim. 4:10; Titu 1:1, 2) Toko ikapaseeti caakhikiceraaya muru wa natoropa, ikapaseetiihu ikhanle woopwa inaakhikicera moopuwelelweehu. Manannani? Nweherero woohoolo Yehova univahilyaawe unaanikavihera wuupuwela iparakha cikhuluvelihilyaawe ni unaanikavihera uwehera saana masakha annikhumelela. Isiyani ninlamuliyeehu upanka wiira niware iyo ikapaseetiiyo? Hiiva ninwara iyo ikapaseetiiyo neekurumicaka wuupuwela toko Yehova cinoopuwelaawe. Wootakihera, hiiva khaninkhuluvela cinene mihakhu coohikhweeli, masi ninonkhuluvela Nluku.—Isaa. 26:2; 104:34; 1 Tim. 6:17.
Ikapaseeti: Nweherero wo waakhela ukumi woohimala wahoolo
11. Soowa awula ikatana yo nnepa ikhanle isiyani, ni nlattuni ninlamuliyeehu uvarela nteko?
11 Soowa awula ikatana yo nnepa nikhanle Nuulumo na Nluku, Ibiiblya. Iyo ikataneeyo inaakhitiri ukumihera woonene khula itthu yowoothiya, ni uwoopola atthu wiira ahiye ukupali citthu cowoothiya ni upanka citthu coohinamaana. (2 Akor. 10:4, 5; 2 Tim. 3:16, 17; Mabere. 4:12) Usoma Ibiiblya veekha ni malakihero anvahiyeehu mumphwinkoni wa Yehova, phi citthu cinnikavihera wiitthuca uvarela nteko saana iyo ikataneeyo. (2 Tim. 2:15) Uhiya paahi univaha ikaruma cokhotto, Yehova ciicammo naanikhikicera niinanna ikhwaawe. Inannani?
Soowa awula ikatana: Nuulumo na Nluku, Ibiiblya
NKHOTTONI INAANEEHU KHANIRI VEEKHA
12. Isiyani inhala unikhitiriha waana ikhotto irineehu, ni nlattuni?
12 Nakhotto omaana naacuwela wiira khanhala ukhitiri waatthema anatoropa enci veekha cawe. Uyo haana akaviheriyaka naanatoropa akhwaawe. Inanna imocaaru, hi khaninhala ukhitiri untthema Sotwani ni atthwaawe neekurumicaka veekha cihu; nihaana nikaviheriyaka ni mayamunneehu ni asirokorihu. Phimaana Yehova honivaha “mphwinko wo mayamunna” o ntuninyani motheene ari niiraati wiira anikavihere.—1 Pet. 2:17.
13. Toko cineeraaya Maberewu 10:24, 25, mikutthaano cihu cinnikavihera cani?
13 Inanna imoca yookaviheriya naakhwiihu ukhanle urwaa umikutthaanoni. (Nsome Maberewu 10:24, 25. *) Otheene cihu, uhaavo ukati unkhaleehu oovololaca. Ukati unkhaleehu commo, mikutthaano pooti univaha ikuru cimpheeleehu. Ikomentariyu cinvahaaya mayamunneehu ni asirokorihu ninrimaaya wotheene, cinaanilipiha. Myaha co mbiiblyani cintaphulelelaaya ni mathoonyero ampankaaya, anaanikurumica uhihiya unswalela Yehova. Ni uwoopana mwaha cihinancera mikutthaano awula camalaka, unaaniphwanyiha ikuru venci. (1 Atesal. 5:14) Ciicammo, umikutthaanoni ninaakhalana ukati wowaakavihera akhwiihu ni unaanitteela nrima naakaviheraka. (Mite. 20:35; Aroo. 1:11, 12) Mikutthaano ciicammo cinaanikavihera niinanna ikhwaawe. Mikutthaano cihu cinaanikavihera wiitthuca ulalyeera ni usomiha Ibiiblya saana. Wootakihera, nwo phineetthuceehu uvarela nteko saana ikaruma cinnikavihera wiitthuciha Ibiiblya. Phimaana, ukati wo mikutthaano, nviriyane saana. Camalaka mikutthaano, mweettele citthu ciitthucileenyu. Mwapankaka iyo, nyuuva nnaahala ukhalala “natoropa omaana a Yesu Kristu.”—2 Tim. 2:3.
14. Phaapani-tho annikavihera nkhottoni inaaneehu?
14 Hiiva ciicammo ninaakaviheriya ni malayikha menci okuru. Muupuwele itthu inkhitiryaaya upanka nlayikha nimoca paahi! (Isai. 37:36) Vano muupuwele isiyani yaahalaaya upanka malayikha menci. Khaavo hataa pinaatamu awula nciini ninlikanana malayikha okuru a Yehova. Yehova khanle Nakuru-Cotheene. Phimaana, Yehova akhalaka wamoca ni hiiva, thi hi ninkhala oolipa cinene waapwaha ale annilupattha, hataa ukhalaka wiira ayo ari enci unipwaha hiiva. (Masuw. 6:16) Ni iyo ikhanle ikhweeli yoohivaanyihaniya! Phimaana, mwakhalaka ni masukhuli nlattu woopankiya awula wuulumeliya itthu yoohiloka ni ntthu nonsomaneenyu, nonvaraneenyu nteko awula mmuciinyu hikhanle Saahiti a Yehova, nwuupuwele otheene arineenyu wiira yuukavihereni. Nhiliyale wiira nyuuva khanri veekha nkhottoni inaaneenyu. Yehova ri ni nyuuva wiira oohooleleni.
YEHOVA KHANHALA UHIYA UNIKHIKICERA
15. Toko cinthoonyeraaya Isaiya 54:15, 17, kontha isiyani khaavo nohala ukhitiri waahiiha apoovu a Nluku ulalyeera?
15 Ila ituninya ya Sotwani inkhaleehwiila ihaana isariya yoonithanya. Hi khanineekelakeliha nsiyaasani ni mmakhottoni. Hi ninaalalyeera ncina na Nluku, ninaahimya wiira Umwene wa Nluku paahi phinhala ukhitiri waawaanela nnema apinaatamu ni ninawiiwelela malamulwaawe osariya. Hi ninaathoonyera wiira nhooleli o ila ituninyeela khanle mwaneene wootha ni nakhirini ooverihela. (Joau 8:44) Ni ninaalalyeera wiira woohipica, ituninya ya Sotwani inaahala umalamalihiya. Unookhalaru commo, Sotwani ni atthwaawe khanhala ukhitiri unihiiha ulalyeera. Uhiya commo, hi khaninhala uhiya unttottopela Yehova ni mananna otheene anhaleehu ukhitiri. Sotwani hataa akhalanaka ikuru, uyo khanhala ukhitiri unihiiha waalalyeera myaha co Umwene atthu o ntuninyani motheene. Ni hiiva ninkhitiri upanka citthu cotheenennyo kontha ninaakhikiceriya ni Yehova.—Nsome Isaiya 54:15, 17. *
16. Ukati wo masakha moolupale, Yehova nohala uwoopola cani apoovwaawe?
16 Isiyani inhala ukhumelela woohipica? Ukati wo masakha moolupale, Yehova naahala unoopola niinanna piili cooreera. Woopacera, uyo naahala uwoopola atthu ookhuluvelya anonswalela ukati unhalaawe waakurumica mamwene o watuninyani wiira amalamalihe Ibabilooniya Yuulupale, cikhanle ittiini cowootha cotheene. (Apoka. 17:16-18; 18:2, 4) Vano, uyo naahala uwoopola apoovwaawe niinanna ikhwaawe, ukati unhalaawe umalamaliha ituninya yotheene ya Sotwani, ukhottoni yo Harmacetom.—Apoka. 7:9, 10; 16:14, 16.
17. Nlattuni ninlamuliyeehu uhihiya umpatthanana Yehova?
17 Naahihiyeke umpatthanana Yehova, khiivo itthu Sotwani inhalaawe upanka inhala uniwaanela ihasara yoohimala. Khweeliini, uyova phinhala umalamalihiya wiira hikhale-tho. (Aroo. 16:20) Phimaana, nware ikaruma cokhotto cotheene—ni nhirule mena vakaani! Nhimananihe waana ikhotto veekha cinyu. Mwaakavihere mayamunneenyu ni asirokorinyu o wanlokoni. Ni ntthare malakihero annivahaawe Yehova. Mwapankaka commo, nkupali wiira Apaapeenyu onifento anaahala wuulipihani ni wuukhikicerani.—Isai. 41:10.
NCIPO 149 Um Cântico de Vitória
^ par. 5 Yehova naanilipiha ni naanikhikicera nhina wo citthu caahala uhonona upatthani urineehu nuuyova, ni nhina wo citthu caahala uniwaanela masakha oohimala. Nhina ula mwahoola, ninaahala waakhula ala makohwaala: Nlattuni nimpheeleehu ukhikiceriya? Manannani Yehova cinnikhikiceraawe? Ni isiyani ninlamuliyeehu upanka wiira Yehova anikhikicere?
^ par. 4 Efesu 6:13 Hataa phimaana, nwarele ikaruma cokhotto cotheene ca Nluku, wiira mwavilele naphiyaka nihuku nootakhala, ni nnamalihileene upanka citthu cotheene, mwakhale oolipeene. 14 Phimaana, mwiilipihace, nwarelaka isintu yo ikhweeli yootthukiya sana-saana, ni nwarele nikhikicero nosariya 15 ni nware ivirattho nnyaani winyu, nkhalaka owiitthenkaceene wiira nlalyee ihapari comaana co nnema. 16 Uhiya citthu cotheene ciyo, nvarele nteko nkhikicero muulupale ukhanle waamini, nnohaleenyu uttipihera mavaka otheene oopharela a Ntakhali. 17 Mwaamini ciicammo ikapaseeti ikhanle woopwa, ni soowa awula ikatana yo nnepa, ikhanle nuulumo na Nluku.
^ par. 13 Maberewu 10:24 Ni nihaana niwaceranaka wiira nikurumicane uthoonyera nifento ni upanka miteko comaana, 25 woohihiya uthukumana, toko cilamalenlyaaya atthu akiina, masi nilipihanaka, utepa wanooneehu waattamela nihuku.
^ par. 15 Isaiya 54:15 “Ntthu ootuphelaka, kahi wiira thi mi kinhala unruma. Ule nohala wuutuphela naahala utthemiya nlattu waawaa. 17 Khiivo ikaruma yokhotto ipankiye wiira uhasaraniye inhala wuukhitiri, ni weeva unaahala uhukhumu khula nuulumo ninhala uwootherya nihuku nowuulumaceriya milattu. Nna phiniweherero naatthu anonswalela Yehova, ni isariya caya thimi kirina,” Yehova phinhimya.
