1. Etke Jesus ear kajjitõk ippãn Jeova bwe en kõjparok ri-kal̦oor ro an?

ILO boñõn eo ãliktata in an kar Jesus mour ãinwõt juon armej, ear l̦õmn̦ak kõn wãween ko reppen ri-kal̦oor ro an renaaj kar jelm̦aiki. Kõn an yokwe rein m̦õttan, Jesus ear kajjitõk ippãn Jemãn bwe en “kõjparok er jãn ri-nana eo.” (Jon 17:14, 15) Jesus ear jel̦ã bwe ãlikin an naaj bar jepl̦aak ñan lañ, Setan Tepil̦ eo enaaj wõnm̦aanl̦o̦k wõt im tarin̦aeiki jabdewõt eo ekõn̦aan karejar ñan Jeova. Kõn men in, alikkar bwe armej ro an Jeova renaaj aikuj bõk kõjparok.

2. Etke jejel̦ã bwe Jeova enaaj uwaake jar ko ad?

² Jeova ear uwaake jar eo an Jesus kõnke Ej yokwe eo Nejin. El̦aññe jenaaj kate kõj joñan wõt ad maroñ ñan kabuñbũruon Jeova, enaaj bareinwõt yokwe kõj, im enaaj eo̦roñ jar ko ad ñe jej kajjitõk ñan bõk jipañ im kõjparok jãne. Jeova ej juon Jemãn el̦ap yokwe ippãn. Kõn men in, enaaj wõnm̦aanl̦o̦k wõt im lale im kõjparok ajri ro nejin. El̦aññe ejjab ãindein, men in enaaj ko̦kkure ãt eo etan em̦m̦an!

3. Etke jej aikuji kõjparok eo an Jeova ilo raan kein?

³ Kiiõ el̦apl̦o̦k ad aikuji kõjparok eo an Jeova. Em̦õj jolal̦tak Setan jãn lañ im “el̦ap an illu.” (Rev. 12:12) Em̦õj an kõm̦m̦an bwe jet iaan ro rej jum̦ae im kaeñtaan kõj, ren l̦õmn̦ak bwe ilo aer ãindein, rej kõm̦m̦ane “juon jerbal eokkwõjarjar ñan Anij.” (Jon 16:2) Im ñan ro jet me rejjab tõmak ilo Anij, rej jum̦ae im kaeñtaan kõj kõnke jeoktak jãn armejin lal̦ in. Jekdo̦o̦n ta un eo, ak jemaroñ lõke im jab mijak. Etke? Kõnke Naanin Anij ej ba: “Irooj etiljek, im enaaj kõkajoor im kõjparok  kom̦ jãn eo enana.” (2 Tes. 3:3) Ewi wãween an Jeova kõjparok kõj? Jen etale ruo wãween ko.

4. Ekkar ñan Epesõs 6:13-17, ta ko em̦õj an Jeova litok ñan kõjparok kõj?

⁴ Em̦õj an Jeova letok kein tarin̦ae ko jemaroñ kõn̦aki ñan kõjparok kõj bwe Setan en jab ko̦kkure kõj. (Riit Epesõs 6:13-17.) Kein tarin̦ae kein, rekajoor im remaroñ jipañ kõj! Bõtab renaaj kõjparok wõt kõj el̦aññe jenaaj kõn̦ak kajjojo iaaer​—im jab utũki. Kajjojo iaan kein tarin̦ae kein rej jutak kõn ta? Eokwe, jen etale kajjojo iaaer.

5. Ta kañũr in m̦ool eo, im etke jej aikuj in kõn̦ake?

⁵ Kañũr in m̦ool eo ej jutak kõn katak ko rem̦ool ilo Naanin Anij, Baibõl̦ eo. Etke jej aikuj kõn̦ak kañũr in? Kõnke Setan ej jemãn riab. (Jon 8:44) Elõñ to̦ujin iiõ ko in an kal̦apl̦o̦k an jel̦ã kilen riab im em̦õj an m̦on̦e “aolepen lal̦ in”! (Rev. 12:9) Bõtab katak ko rem̦ool jãn Baibõl̦ rej kõjparok kõj jãn ad tõmaki riab kein. Ewi wãween ad kõn̦ake kañũr in ilo kõkkar? Jej kõm̦m̦ane men in ikijjeen ad katak kõn m̦ool eo kõn Jeova, kabuñ ñane “ekkar ñan tõl eo an jetõb kwõjarjar im ekkar ñan m̦ool eo,” im ikijjeen ad m̦ool ilo men otemjej jej kõm̦m̦ani.​—Jon 4:24; Eps. 4:25; Hib. 13:18.

6. Ta penjãn ob in wãnõk eo, im etke jej aikuj in kõn̦ake?

⁶ Penjãn ob in wãnõk eo ej jutak kõn kien ko rewãnõk an Jeova. Etke jej aikuj kõn̦ak penjãn ob in? Ãinwõt an juon penjãn ob kõjparok menono eo an juon rũttarin̦ae jãn aer wie, ãindein an penjãn ob in wãnõk eo kõjparok bũruod ak armej eo itulowa, jãn men ko renana an lal̦ in. (JK. 4:23) Jeova ej kõtmãne bwe jen yokwe im karejar ñane kõn aolepen bũruod. (Matu 22:36, 37) Kõn men in, Setan ej kajjioñ in kõjepel bũruod ilo an kajjioñ kõm̦m̦an bwe jen yokwe men ko an lal̦ in​—men ko Jeova ediki. (Jem. 4:4; 1 Jon 2:15, 16) Im ñe ejjab lo tõprak ilo wãween in, enaaj kajjioñ kaamijak kõj bwe jen rupe kien ko an Jeova.

7. Ewi wãween ad kõn̦ake penjãn ob in wãnõk eo?

⁷ Jej kõn̦ake penjãn ob in wãnõk eo ilo ad pokake kien ko an Jeova ikijjeen ta ko rejim̦we im rebõd, im ilo ad mour ekkar ñan kien kein. (Sam 97:10) Ewõr ro rej l̦õmn̦ak bwe kien ko an Jeova el̦ap aer pen im eddo. Bõtab el̦aññe jen kar bõjrak jãn ad jerbali naanin kakapilõk ko jãn Baibõl̦ ilo mour ko ad, jenaaj ãinwõt juon rũttarin̦ae me ej utũk penjãn ob eo an lukwõl̦pãn juon iien tarin̦ae kõnke ej l̦õmn̦ak bwe el̦ap an eddo. Men in en kar juon menin bwebwe! Ñan ro me rej yokwe Jeova, kien ko an “rejjab eddo,” ak rej juon men me enaaj lo̦mo̦o̦ren er.​—1 Jon 5:3.

8. Ta mel̦el̦ein ñan kõn̦ak juuj ko ad bwe jen pojakin kwal̦o̦k kõn ennaan eo em̦m̦an?

⁸ Paul ej bar rõjañ kõj bwe jen kõn̦ak juuj ko ad bwe jen pojakin kwal̦o̦k kõn ennaan eo em̦m̦an kõn aenõm̦m̦an. Ak ilo bar juon wãween jemaroñ ba, jej aikuj in pojak aolep iien ñan kwal̦o̦k naan kõn ennaan eo em̦m̦an kõn Aelõñ eo. Ñe jej kwal̦o̦k ennaan eo jãn Baibõl̦ ñan ro jet, tõmak eo ad make ej kajoorl̦o̦k. El̦ap ad bõk kõketak ilo ad loe an armej ro an Jeova ipel̦aakin lal̦ in pukot iien ko repel̦l̦o̦k ñan kwal̦o̦k kõn ennaan eo em̦m̦an​—ilo jikin jerbal, ilo jikuul̦, ilo jikin peejnej ko im ñe rej kwal̦o̦k naan jãn em̦ ñan em̦, ñe rej kaikujkuj, lol̦o̦k ro nukũer me rejjab pãd ilo m̦ool eo, bwebwenato ippãn ro jet rejel̦ã kajjier, im joñan ilo bar iien ko me rejjab maroñ diwõj jãn m̦õko im̦weer ium̦win jidik iien. El̦aññe jen kar kõtl̦o̦k bwe ad mijak en kabõjrak kõj jãn ad kwal̦o̦k naan, jen kar  ãinwõt juon rũttarin̦ae me ej utũk juuj ko an ilo juon iien tarin̦ae, im enaaj pidodo an jorrããn neen. Innem, enaaj pidodol̦o̦k aer tarin̦aeiki, im eban maroñ l̦oore naanin tõl ko an kapen eo an.

9. Etke jej aikuj in bõke ippãd kein tõrak eo el̦ap kõn tõmak?

⁹ Kein tõrak eo el̦ap kõn tõmak ej jutak kõn tõmak eo ad ilo Jeova. Jej tõmak bwe enaaj kajejjete aolep kallim̦ur ko an. Tõmak in ad enaaj jipañ kõj ñan “kune aolep m̦ade kijeek ko an ri-nana eo.” Etke jej aikuj in bõke ippãd kein tõrak in el̦ap? Kõnke ej jipañ kõjparok kõj jãn ad po ilo katak ko an ri-jum̦ae ro me rar ilo̦k jãn m̦ool eo, ak ñan jab mijak im ebbweer kõn naanin kajjirere ko an ro rej pere kõj. Ñe ejjel̦o̦k ad tõmak, eban wõr ippãd kajoor eo ñan jum̦ae ro jet ñe rej kajjioñ in kareel kõj ñan kõjekdo̦o̦ne kien ko an Jeova. Ijoke, kajjojo iien me jej jutak pen kõn tõmak eo ad ilo jikin jerbal ak ilo jikuul̦, ej pãd ippãd kein tõrak eo ad. (1 Pit. 3:15) Kajjojo iien jejjab bõk juon jerbal el̦ap on̦ããn me enaaj kapañ ad kabuñ ñan Jeova, ej pãd ippãd kein tõrak eo ad. (Hib. 13:5, 6) Im kajjojo iien jej karejar ñan Jeova meñe jej iioon matõrtõr im jum̦ae, jej bõk kõjparok jãn kein tõrak eo ad.​—1 Tes. 2:2.

10. Ta el̦mõt in lo̦mo̦o̦r eo, im etke jej aikuj in kõn̦ake?

 ¹⁰ El̦mõt in lo̦mo̦o̦r eo ej kõjatdikdik eo Jeova ej letok ñan kõj—kõjatdikdik eo bwe enaaj lo̦mo̦o̦ren kõj jãn mej im enaaj kõjeraam̦m̦an aolep ro rej kõm̦anm̦an ankilaan. (1 Tes. 5:8; 1 Tim. 4:10; Tai. 1:1, 2) Ãinwõt an juon el̦mõt kõjparok bõran juon rũttarin̦ae, kõjatdikdik eo ñan bõk lo̦mo̦o̦r ej kõjparok l̦õmn̦ak ko ad. Ewi wãween? Kõjatdikdik in ej kõm̦m̦an bwe jen l̦õmn̦ak wõt kõn kallim̦ur ko an Anij im ej jipañ kõj ñan bõk l̦õmn̦ak eo ejim̦we kõn apañ ko jej iiooni. Ewi wãween ad kõn̦ak el̦mõt in? Jej kõn̦ake ilo ad kõm̦m̦an bwe l̦õmn̦ak ko ad ren ãinwõt l̦õmn̦ak ko an Anij. Ñan waanjoñak, jej likũt ad kõjatdikdik, ejjab ioon m̦weiuk ko em̦õkaj aer jako, ak ioon Anij.​—Sam 26:2; 104:34; 1 Tim. 6:17.

11. Ta jãje eo kar lewaj ikijjeen jetõb kwõjarjar, im etke jej aikuj kõjerbale?

¹¹ Jãje eo kar lewaj ikijjeen jetõb kwõjarjar ej Naanin Anij, Baibõl̦ eo. Jãje in ewõr an maroñ ñan wie jabdewõt kain men ko retao im ñan karõl̦o̦k armej ro jãn aer kõm̦akoko ium̦win katak ko reriab im m̦anit ko rekauwõtata. (2 Kor. 10:4, 5; 2 Tim. 3:16, 17; Hib. 4:12) Jej katak kilen kõjerbale jãje in ilo jim̦we ikijjeen ad katak ippãd make im ikijjeen kamminene ko jej bũki jãn doulul eo an Anij. (2 Tim. 2:15) Kobal̦o̦k ippãn kein tarin̦ae ko, Jeova ej bar letok ñan kõj juon kain kein kõjparok me el̦ap an kajoor. Ta in?

12. Ta eo juon jej aikuji, im etke?

¹² Juon rũttarin̦ae me ewõr imminene ko ippãn ejel̦ã bwe ejjab maroñ anjo̦ ioon juon jarin tarin̦ae el̦ap make iaan; ej aikuji jipañ eo an rũttarin̦ae ro jet m̦õttan. Ejja ãindeinl̦o̦k wõt, jejjab maroñ anjo̦ ioon Setan im ro rej l̦oore, make iaad; jej aikuji jipañ eo an ro jeid im jatid. Em̦õj an Jeova letok ñan kõj “ro jeid im jatid ilo tõmak” ipel̦aakin lal̦ in me repojak in jipañ kõj.​—1 Pit. 2:17.

13. Ekkar ñan Hibru 10:24, 25, ta tokjãn ko jej bũki itok jãn ad pãd ilo iien kweilo̦k ko?

¹³ Juon wãween jej bõk jipañ, ej ikijjeen ad etal ñan iien kweilo̦k ko ad. (Riit Hibru 10:24, 25.) Ñe jej ebbweer—juon men me jet iien ej wal̦o̦k ñan kõj aolep—kweilo̦k ko remaroñ kõkajoor kõj. Jej bõk kõketak jãn uwaak ko an ro jeid im jatid me rej kwal̦o̦ki jãn bũrueer. Katak ko aer me rej pedped ioon Baibõl̦ im waanjoñak ko rej kwal̦o̦ki ijo im̦aan, rej kõkajoor kõn̦aan eo ad ñan karejar ñan Jeova. Im bwebwenato ko ad ippãn doon me rekõketak m̦okta jãn im ãlikin kweilo̦k, rej kõkajoor kõj. (1 Tes. 5:14) Im kobal̦o̦k ippãn men in, kweilo̦k ko ad rej kõpel̦l̦o̦k juon iien ñan ad lo lañlõñ eo me ej itok jãn ad jipañ ro jet. (Jrb. 20:35; Rom 1:11, 12) Kweilo̦k ko ad rej bar jipañ kõj ilo wãween ko jet. Ilo kõkkar, jemaroñ ba rej jipañ kakõm̦anm̦anl̦o̦k kilen ad tarin̦ae, ikijjeen aer jipañ kõj bwe jen pojak ñan kwal̦o̦k naan. Ñan waanjoñak, jej katak kilen kõjerbal kein jerbal ko ilo Nien Kein Jerbal eo Ad ñan Katakin ilo wãween eo ejejjet. Kõn men in, en em̦m̦an ad kõpooji katak ko ad ñan iien kweilo̦k ko an eklejia. Ilo iien kweilo̦k, jen lukkuun roñjake. Im ãlikin iien kweilo̦k, jerbale katak ko jaar bũki. Ilo am̦ kõm̦m̦ani wãween kein, kwõnaaj erom “juon rũttarin̦ae em̦m̦an an Christ Jesus.”​—2 Tim. 2:3.

14. Kein jipañ ta eo juon epel̦l̦o̦k ñan kõj?

¹⁴ Jej bareinwõt bõk jipañ jãn elõñ milien enjel̦ ro rekajoor. Baj l̦õmn̦ak m̦õk kõn ta eo juon wõt enjel̦ emaroñ kõm̦m̦ane! (Ais. 37:36) Kiiõ, l̦õmn̦ak m̦õk kõn ta eo juon kumi in enjel̦ ro rekajoor emaroñ naaj katõprake. Ejjel̦o̦k juon armej ak enjel̦ enana ej joñan wõt juon ippãn kumi in rũttarin̦ae ro an Jeova me  el̦ap aer kajoor. Jeova ej make wõt kajoor tata. Innem ñe ej pãd ippãd, jenaaj aolep iien kajoorl̦o̦k jãn ro rej jum̦aik kõj, jekdo̦o̦n ewi joñan uwaaer. (Eka. 6:16) Joñan an baj m̦ool men in! Em̦m̦an ñan keememej men kein ñe kwõj ebbweer kõn juon men me juon eo kwõj jerbal ippãn, kwõj jikuul̦ ippãn, ak juon nukum̦ ej ba ak kõm̦m̦ane ñan eok. Keememej bwe kwõjjab make iaam̦ ilo tarin̦ae in. Kwõj l̦oore tõl eo an Jeova, kõn men in enaaj jipañ eok.

15. Ekkar ñan Aiseia 54:15, 17, etke ejjel̦o̦k juon emaroñ iuuni armej ro an Anij ñan bõjrak jãn aer kwal̦o̦k naan?

¹⁵ Elõñ un ko unin an lal̦ in me ej pãd ium̦win maroñ eo an Setan, dike kõj. Jejjab bõk kun̦aad ilo aitwerõk ko an kien im jejjab bõk kun̦aad ilo tarin̦ae. Jej kwal̦o̦k kõn etan Anij, kwal̦o̦k bwe Aelõñ eo an ej kien eo wõt me emaroñ bõktok aenõm̦m̦an, im jej rejetak kien ko an rewãnõk. Jej kwal̦o̦k ñan armej ro bwe ri-tõl eo an lal̦ in, ej juon ri-riab ekanooj in nana im ej juon ri-uror. (Jon 8:44) Im jej kwal̦o̦k bwe m̦õttan jidik enaaj jeepepl̦o̦k jukjukun pãd in an Setan. Bõtab, Setan im ro rej l̦oore reban maroñ kabõjrak kõj jãn ad kwal̦o̦k naan. Ijello̦kun ad bõjrak, jenaaj wõnm̦aanl̦o̦k wõt im nõbar Jeova ilo ad kõjerbal jabdewõt wãween ko ewõr ippãd ñan kõm̦m̦ane men in! Meñe Setan ekajoor, ak ejjañin de maroñ bõbrae an ennaan eo kõn Aelõñ eo tõpar armej ro ipel̦aakin lal̦ in. Un eo wõt unin an maroñ tõprak men in, ej kõnke epãd ippãd kõjparok eo jãn Jeova.​—Riit Aiseia 54:15, 17.

16. Ewi wãween an naaj Jeova lo̦mo̦o̦ren armej ro an ilo iien eñtaan eo el̦ap?

¹⁶ Ta ko renaaj wal̦o̦k ilo raan ko im̦aan? Ilo iien eñtaan eo el̦ap, Jeova enaaj lo̦mo̦o̦ren kõj ilo ruo wãween ko rekabwilõñlõñ. M̦oktata, enaaj lo̦mo̦o̦ren ri-karejar ro an retiljek ilo iien eo me enaaj kõm̦m̦an bwe kiiñ ro an lal̦ ren ko̦kkure Babil̦on El̦ap, doulul in aolep kabuñ ko reriab. (Rev. 17:16-18; 18:2, 4) Innem, enaaj lo̦mo̦o̦ren armej ro an ñe enaaj jol̦o̦k bween men ko rej m̦õttan lal̦ in an Setan, ilo Armagedon.​—Rev. 7:9, 10; 16:14, 16.

17. Ewi wãween ad bõk tokjãn ñe jej pãd epaake wõt Jeova?

¹⁷ Ñe jej pãd epaake wõt Jeova, Setan eban kõm̦m̦an jabdewõt men me enaaj ko̦kkure kõj ñan indeeo. Ilo m̦ool, e eo enaaj bõk ko̦kkure ñan indeeo. (Rom 16:20) Kõn men in, jen kõn̦ak aolepen kein tarin̦ae ko​—im jab utũki! Jab kajjioñ tarin̦ae make iaam. Rejetake rũttõmak ro jeim̦ im jatũm̦. Im l̦oore tõl eo an Jeova. El̦aññe kwõnaaj ãindein, kwõmaroñ lõke bwe Jem̦am̦ ilañ eo el̦ap yokwe ippãn, enaaj kõkajoor eok im kõjparok eok.​—Ais. 41:10.