1. ¿Tleka Jesús okilui Jehová ma kinmalui imachtijkauan?

SAIKTLAMI youak ijkuak Jesús okatka nikan tlaltikpak omokuayejyeko nochi ouijkayotl tlen kixnamikiskiaj imachtijkauan. Ye okintlasojtlaya, ik non, okilui iTajtsin ma kinmalui “para amo makinkajkayawa n amokualitlakatl” (Juan 17:14, 15). Ye okimatoka ijkuak yaskia iluikak, Satanás ok kintlajyouiltiskia itekipanojkauan Jehová. Ik non, ok moneki ma kinmalui Jehová akinmej kitekichiuiliaj.

2. ¿Tleka tikneltokaj Jehová technankilis ijkuak tiktlatlaujtiaj?

² Jehová okichi tlen okitlajtlanili Jesús porque kitlasojtla. Tla timochijchikauaj tikyolpaktiaj Jehová, ye techtlasojtlas uan technankilis ijkuak tikiluiskej ma techpaleui uan ma techmalui. Ye toTajtsin tlen techtlasojtla, ik non, nochipa techmaluis. Tla amo ijkon kichiuaskia, kiteititiskia amo melauak tlen kijtosneki itoka.

3. ¿Tleka moneki ma techmalui Jehová?

³ Axkan okachi moneki ma techmalui Jehová. Okiualtlamotlakej Satanás nikan tlaltikpak “iwa kualankamiki” (Apoc. 12:12). Ye yokichi miakej tlen techtlajyouiltiaj ma kineltokakan kichiuaj “se kuali tekitl inawak Dios” (Juan 16:2). Sekimej tlen amo kineltokaj toTajtsin Dios techtlajyouiltiaj porque amo tikchiuaj ken yejuan. Pero amo timomojtiaj porque Biblia kijtoua Jehová “nochipa kichiwa tlan kijtoa, iwa Ye nomechmakas chikawálistli iwa nomechpalewis para amo xiwetsikah imak n amokualitlakatl” (2 Tes. 3:3). Ma tikitakan ome tlamantli tlen ika techmaluia.

4. Ijkon ken kijtoua Efesios 6:13-17, ¿tlen techmaka Jehová para ika ma timopaleuikan?

⁴ Jehová techmaka ken yetoskia se tepostli para ika timopaleuiskej ijkuak Satanás kichiua seki tlamantli para ayakmo ma timouikakan iuan Jehová (xiktlajtolti Efesios 6:13-17). Non tepostli chikauak uan techpaleuis pero moneki nochi ma tiktekitiltikan. Axkan timomachtiskej tlen kijtosneki sejse tepostli.

5. ¿Tlen kijtosneki timotlajkoteliniskej “ika n milák tlájtoli”? Uan ¿tleka moneki ijkon ma tikchiuakan?

⁵ “Ximotlajkotelinikah ika n milák tlájtoli”. Non kijtosneki nochi tlen kajki itech iTlajtol toTajtsin Dios. ¿Tleka moneki timotlajkoteliniskej “ika n milák tlájtoli”? Porque Satanás “ye n teta de nochteh non tlakajkayawah” (Juan 8:44). Yimiak xiuitl tlakajkayajtok uan miakej yokinkajkaya (Apoc. 12:9). Pero tlen kijtoua Biblia techpaleuia para amo ma techkajkayaua. ¿Ken uelis timotlajkoteliniskej? Tla timomachtiaj tlen Biblia kijtoua itech Jehová uan tikueyichiuaj “ika espíritu uan ika melauak” uan tla ‘tikchiwah nochi tlan kuali’ (Juan 4:24, TNM; Efes. 4:25; Heb. 13:18).

6. ¿Tlen kijtosneki “koto de tépostli” uan tleka moneki ma tikmotlalilikan?

⁶ “Koto de tépostli”. Non kijtosneki itlanauatiluan Jehová. ¿Tleka moneki ma tikmotlalilikan? Yiuejkika soldados okimoelpantlaliliayaj se tepostli para amo kikojkoskiaj inyolo. Noijki ijkon tla tikmotlaliliskej “koto de tépostli” kimaluis toyolo uan amo kijtlakos tlen kichiuaj akinmej amo kitekichiuiliaj toTajtsin Dios (Prov. 4:23). Jehová kineki ma tiktlasojtlakan uan ma tiktekichiuilikan ika nochi toyolo (Mat. 22:36, 37). Ik non, Satanás kineki kijtlakos toyolo ika nochi tlen onka itech nin tlaltikpak pero nochi non Jehová kikokolia (Sant. 4:4; 1 Juan 2:15, 16). Ijkuak Satanás kita amo ueli kijtlakoua inyolo itekipanojkauan Jehová, peua kintlajyouiltia para ma kichiuakan tlen amo kuali.

7. ¿Ken tikmotlaliliaj “koto de tépostli”?

⁷ Tikmotlaliliaj “koto de tépostli” ijkuak tiknekij tikchiuaskej tlen Jehová kipaktia uan amo tikchiuaj tlen amo kipaktia (Sal. 97:10). Sekimej mokuayejyekouaj tlen techiluia Jehová kichiua amo ma tikchiuakan miak tlamantli. Pero tla amo tikchiuaj tlen kijtoua Biblia techpanos ken se soldado tlen kimokixtilia tlen ika moelpanpaleuia porque mokuayejyekoua sapanoua etik. Akin ijkon kichiua kiteititia amo kuali mokuayejyekoua. Akinmej kitlasojtlaj Jehová amo mokuayejyekouaj itlanauatiluan “owi se kintlakita”, yejuan kimatokej melauak kinpaleuia (1 Juan 5:3).

8. ¿Tlen kijtosneki ijkuak Pablo okijto “ximokaktikah para nontetlapowitiweh de n kualitlájtoli”?

⁸ Pablo noijki okijto: “Ximokaktikah para nontetlapowitiweh de n kualitlájtoli”. Non kijtosneki san kanin ma titetlapouikan tlen kichiuas iTekiuajkayo toTajtsin Dios. Ijkuak titetlapouiaj tlen kijtoua Biblia okachi titlaneltokaj. Tiyolpakij tikinmitaj itekipanojkauan Jehová mochijchikauaj tetlapouiskej. Tetlapouiaj kanin tekipanouaj, kanin momachtiaj, tekalijtik, kanin tlanemakaj, ijkuak motlakouitiuij, ijkuak kintlajpalouaj infamiliares tlen amo iTlaixpantijkauan Jehová. Noijki kintlapouiaj akinmej kinmixmatij uan mochijchikauaj tetlapouiskej ijkuak amo ueli kanaj yauij.  Techijtlakos tla amo titetlapouiskej. Yetoskia ken se soldado tlen kinmokixtilia ikakuan ijkuak moteuijtok: uelis kikojkoskej, amo uelis mopaleuis uan amo kichiuas tlen kinauatis akin kiyekantok.

9. ¿Tleka moneki tikpixtoskej ‘tépostli non ika timopaleuiah’?

⁹ “Tépostli non ika nonmopalewiskeh”. Non kijtosneki ijkuak titlaneltokaj itech Jehová. Uan tikneltokaj kichiuas nochi tlen yokijto. Noijki techpaleuis ‘tiktsakuiliskeh ijkuak n diablo techmojmotlas ika kuawitl non xotlatok’. Non tepostli techpaleuia amo ma tikneltokakan tlen tlamachtiaj akinmej kixnamikij Jehová uan ijkuak sekimej techpinauiaj uan techteneuaj. Tlamo timoyolkokoskej uan ayakmo tiknekiskej tiktekichiuiliskej Jehová. Tla amo titlaneltokaj, amo tiktlakamatiskej Jehová ijkuak sekimej techchiualtiskej ma titlajtlakolchiuakan. Ijkuak titetlapouiaj kanin titekipanouaj uan kanin timomachtiaj tiktekitiltiaj ‘tépostli non ika timopaleuiah’ (1 Ped. 3:15). Ijkuak titlaneltokaj techpaleuia amo tikselikan se tekitl maski okachi techtlaxtlauiskej porque non kichiuas ayakmo ma tiktekichiuilikan Jehová (Heb. 13:5, 6).  Noijki techpaleuia totlaneltokilis ijkuak amo tikkauaj Jehová maski techtlajyouiltiaj (1 Tes. 2:2).

10. ¿Tlen kijtosneki “tépostli non ika timomakixtiah” uan tleka moneki tiktekitiltiskej?

¹⁰ “Ximokuaonakiltikah n tépostli non ika timomakixtiah”. Non kijtosneki tlen tikchiaj techmakas Jehová, ijkuak ye kichiuas ayakmo ma yeto mikilistli uan kinteochiuas akinmej kitlakamatij (1 Tes. 5:8; 1 Tim. 4:10; Tito 1:1, 2). Ijkon ken ijkuak ikaj kimotlalilia itlaj itech itsonteko para amitlaj ma kipano, tlen tikchiaj kimaluia tokuayejyekol. ¿Ken techpaleuia? Techpaleuia ma tikilnamiktokan tlen toTajtsin Dios kichiuas uan amo sapanoua ma techtekipacho tlen techpanotok. ¿Ken ‘tikmokuaonakiltiah n tépostli non ika timomakixtiah’? Ijkuak timochijchikauaj timokuayejyekoskej ken Jehová. Ik non, amo tikchiaj ma techpaleui tomin porque tikneltokaj toTajtsin Dios techpaleuis (Sal. 26:2; 104:34; 1 Tim. 6:17).

11. ¿Tlen “espada non techmaka n Espíritu Santo” uan tleka moneki tiktekitiltiskej?

¹¹ “Espada non techmaka n Espíritu Santo” kijtosneki iTlajtol toTajtsin Dios. Nin espada kiteititia tlen amo melauak uan techpaleuia amo ma tikneltokakan tlen tlamachtiaj religiones. Noijki techpaleuia ayakmo ma tikchiuakan tlen amo kipaktia toTajtsin Dios (2 Cor. 10:4, 5; 2 Tim. 3:16, 17; Heb. 4:12). Tikitaj ken tiktekitiltiskej nin espada ijkuak timomachtiaj uan noijki ijkuak ialtepe Jehová techiluia tlen moneki tikchiuaskej (2 Tim. 2:15). Pero Jehová amo techmaka san non tlamantli para ika timopaleuiskej, noijki techmaka okse tlamantli. Ma tikitakan.

12. ¿Tlen okseki techpaleuis uan tleka?

¹² Se soldado tlen kimati tlateuis kimatok san ye inselti amo uelis kintlanilis akinmej inmiuan moteuis, moneki mopaleuiskej miakej soldados. Noijki ijkon tejuan toselti amo uelis tiktlaniliskej Satanás nion amo kuali ejekamej, moneki ma techpaleuikan tokniuan. Jehová techmaka miakej tokniuan itech nochi tlaltikpak uan yejuan techpaleuiaj (1 Ped. 2:17).

13. Ijkon ken kijtoua Hebreos 10:24, 25, ¿ken techpaleuia ijkuak timonechikouaj?

¹³ Tokniuan techpaleuiaj ijkuak timonechikouaj (xiktlajtolti Hebreos 10:24, 25). Tinochtin ualeua timoyolkokouaj pero timoyolchikauaj ijkuak timonechikouaj. Ompa tikkakij tlen kijtouaj tokniuan uan techyolchikauaj. Tlamachtilmej uan tlapoualismej tlen ompa kitemakaj, techpaleuiaj ma tiktekichiuilikan Jehová. Noijki timoyolchikauaj ijkuak timotlapouiaj iuan tokniuan ijkuak peuaj uan ijkuak tlamij nechikolmej (1 Tes. 5:14). Ijkuak timonechikouaj uelis tikinpaleuiskej tokniuan uan ijkon tiyolpakiskej (Hech. 20:35; Rom. 1:11, 12). Ompa noijki techmachtiaj ken okachi kuali titetlapouiskej uan titlamachtiskej. Techiluiaj ken uelis tiktekitiltiskej tlen ika titlamachtiaj. Ik non, nochipa ma timomachtikan tlen tikitaskej ijkuak timonechikoskej uan ompa kuali ma titlakakikan uan satepan ma tikchiuakan tlen ompa otimomachtijkej. Tla tikchiuaj nochi tlen yotikijtojkej, uelis titlateuiskej uan tiyetoskej ken “se kuali soldado de Cristo Jesús” (2 Tim. 2:3).

14. ¿Akinmej noijki techpaleuiaj?

¹⁴ Noijki techpaleuiaj sapanoua miakej ángeles. Yitikmatij tlen uelis kichiuas se ángel. Pero axkan ma timokuayejyekokan  nochi tlen uelis kichiuaskej nochtin ángeles (Is. 37:36). Nion se tlaltikpaktlakatl nion se amo kuali ejekatl amo uelis kintlanilis iángeles Jehová. Ye akin okachi chikauak uan tla ye touan kajki, tiyetoskej okachi tichikauakej maski miakej techixnamikiskej (Juec. 6:16). ¡Nochipa ma tikilnamiktokan! Uan okachi ijkuak timoyolkokouaj porque itlaj otechilui akin iuan titekipanouaj, timomachtiaj noso se tofamiliar tlen amo kitekichiuilia Jehová. Ma tikilnamiktokan amo toselti tikatej, Jehová techyekana.

15. Ijkon ken kijtoua Isaías 54:15, 17, ¿tleka amikaj uelis kichiuas ayakmo ma titetlapouikan?

¹⁵ Nikan tlaltikpak tlanauatijtok Satanás, ik non, techkokoliaj. Amo kanaj timokajkalakiaj nion itech guerras. Tiktematiltiaj itoka toTajtsin Dios, tikijtouaj san iTekiuajkayo kichiuas ma tiyetokan ika yolseuilistli uan tiktlakamatij itlanauatiluan. Tikijtouaj akin tlanauatia nikan tlaltikpak san tlakajkayaua uan se temikti (Juan 8:44). Noijki tiktematiltiaj yitlamis nochi tlen Satanás kiyekantok. Ye uan amo kuali ejekamej amo uelis kichiuaskej ayakmo ma titetlapouikan. Nochipa tiktemoskej ken tikueyichiuaskej Jehová. Maski Satanás chikauak, amo techtsakuilia porque itech nochi tlaltikpak titetlapouijtokej itech iTekiuajkayo toTajtsin Dios. Titetlapouiaj porque Jehová techmaluia (xiktlajtolti Isaías 54:15, 17).

16. ¿Ken kinmakixtis Jehová itekipanojkauan ijkuak uits ueyi tlajyouilistli?

¹⁶ ¿Tlen panos satepan? Ijkuak uits ueyi tlajyouilistli, Jehová kichiuas ome tlamantli uan ijkon techmakixtis. Achto, kinmakixtis itekipanojkauan tlen nochipa kitlasojtlaj ijkuak “wejweyi tlanawatijkeh itech nin tlaltíkpaktli” kipojpoloskej ueyi Babilonia, kijtosneki nochi religiones tlen tlakajkayauaj (Apoc. 17:16-18; 18:2, 4). Noijki Jehová kinmakixtis itekipanojkauan itech Armagedón ijkuak kipojpolos nochi tlen kiyekantok Satanás (Apoc. 7:9, 10; 16:14, 16).

17. ¿Tleka moneki kuali timouikaskej iuan Jehová?

¹⁷ Tla kuali timouikaj iuan Jehová, Satanás amo kichiuas ayakmo ma titlaneltokakan. Ye akin kixpoloskej (Rom. 16:20). Ik non, nochipa ma tiktekitiltikan tepostli tlen Jehová techmaka para ika timopaleuiskej uan amo keman ma tikmokixtilikan. Amo san toselti tikatej, ma timopaleuikan iuan tokniuan uan ma tiktlakamatikan Jehová. Tla ijkon tikchiuaskej, toTajtsin Dios akin techtlasojtla techyolchikauas uan techmaluis (Is. 41:10).