1. Ngenyi Jesu wakakumbira Jehovha kuti angwarire vajiji vake?

PA USIKU hwokupejisira hwa Jesu inga mundhu pasi pano, wairangarira ngo pamusoro po zvineso zvaizosongana no vajiji vake. Ngo ndava yo rudo hwaainga nahwo ku shamwari jake iji, Jesu wakaita mukumbiro kuna Babake ‘kuti avangwarire’ ku mushati. (Johani 17:14, 15) Jesu waizviziva kuti paaizohwirira kudenga, Sathana Dhiyabhu waizoenderera mberi ecihwisana no mundhu ari wese anoda kushandira Jehovha. Ngo kudaro, zvakajeka kuti vandhu va Jehovha vaizoda kubeswa.

2. Tingavisa kudini no cokwadi cokuti Jehovha anozodavira mukumbiro jedu?

² Jehovha wakadavira mukumbiro wa Jesu ngokuti waida maningi Mwana wake. Kudari tikaita zvatinokwanisa kuti tidakajise Jehovha, iyena anozotidavo no kudavira mukumbiro jatinoita kuti atibesere no kutijivirira. Inga musoro wo Mbhuri, Jehovha anozoenderera mberi ecitaja vana vake ngo rudo. Ngokuti zvaizorerusa maningi zina rake kana kusvipisa mugariro wake kudari akatama kuzviita!

3. Ngenyi tinoda kujivirihwa ndi Jehovha nyamasi uno?

³ Itusu wari tinoda maningi kujivirihwa ndi Jehovha kupinda kare. Sathana wakakhandihwa kuvha kudenga, “wakazara ngo runya.” (Apokalipsi 12:12) Iyena anoita kuti vandhu vamweni varangarire kuti pavanotiteverera vari kuitira ‘Mwari basa rakacena.’ (Johani 16:2, Shanduro yeNyika Itsva) Vandhu vamweni vacikatendi Mwari, vanotiteverera ngokuti atiiti zviro zvinoitwa ngo vandhu vacikanamati Mwari. Azvinenyi kuti vanotiteverera ngo ndava yenyi, itusu atithyi. Ngenyi atithyi? Ngokuti Soko ra Mwari rinoti: “Tenji, mugondeki: anozomuvangisa no kumungwarira ku muxati.” (2 VaTesalònika 3:3) Jehovha anotijiviririsa kudini? Ngativone njira mbiri.

4. Mukuzwirana no VaEfeso 6:13-17, Jehovha anotipenyi kuti atijivirire?

⁴ Jehovha anotipa zvijito zvo hondo zvinotijivirira pa kuhwiswa ndi Sathana. (Verenganyi VaEfeso 6:13-17.) Zvijito zvo kumujimu izvi zvakavanga, i zvinobudirira pa kuhwisana! Asi izvona zvinozotijivirira kudari tikazvisimira no kugara tinazvo. Cijito cimwe na cimwe cinoimirirenyi? Ngativone njira mbiri.

5. Icinyi bhande ro cokwadi, ngenyi tinodikana kurisimira?

⁵ Bhande ro cokwadi rinoimirira zvokadi zvinowanika mu Bhaibheri, Soko ra Mwari. Ngenyi tinodikana kurisimira? Ngokuti Sathana ndiyena “baba wo unyepi.” (Johani 8:44) Iyena ari kunyepa ko zviuru zvo makore, ecicengeja vandhu mu “nyika yese.” (Apokalipsi 12:9) Asi cokwadi cinowanika mu Bhaibheri, cinotijivirira kuti titame kucengejwa. Tingasimirisa kudini bhande iri ro kuezanisira? Tinorisimira ngo kujija ngo pamusoro pa Jehovha, kumunamata ‘tecitungamirihwa ngo mujimu mucena no cokwadi’ no kuva takagondeka pa zviro zvese.—Johani 4:24; VaEfeso 4:25; Vaheberi 13:18.

6. Icinyi muthavo wo ururami, ngenyi tinodikana kuusimira?

⁶ Muthavo wo ururami unoimirira ndhungamiriro jakarurama ja Jehovha. Ngenyi tinodikana kuusimira? Inga muthavo unojivira mwoyo wo musoca kuti ucabaiwa, muthavo wo ururami unojivirira mwoyo wo kuezanisira, mundhu wo mukati, kuti ucasvipiswa ngo zviro zvakashata zvo nyika ino. (Mazwi Akangwara 4:23) Jehovha anovetera kuti timude no kumushandira ngo mwoyo wese. (Mateu 22:36, 37) Ngo kudaro, Sathana anovangisira kuti aparajanise mwoyo wedu ngo kutiita kuti tide zviro zvo nyika zvinonyenywa ndi Jehovha. (Jakobo 4:4; 1 Johani 2:15, 16) Kudari zvikatama kushanda, iyena anotiitisa kuti tiite zviro zvinonyangajisa Jehovha.

7. Tinosimirisa kudini muthavo wo ururami?

⁷ Tinosimira muthavo wo ururami ngo kutendera ndhungamiriro ja Jehovha ngo pamusoro po zvakanaka no zvakashata no kupona mukuzwirana no ndhungamiriro iji. (Nduyo 97:10) Vamweni vanovona kuti ndhungamiriro ja Jehovha jinobzinyirira maningi. Asi kudari tikaregera kushandisa ndhungamiriro jo Bhaibheri mu upenyu hwedu, zvaizoezana no musoca anovhisa muthavo wake pakati po hondo ngokuti unorema maningi. Uhu waizova urethe hwakakura maningi! Kuna vaya vanoda Jehovha, mupango “yake airemi,” asi inoponesa upenyu.—1 Johani 5:3.

8. Zvinoda kurevenyi kusimira magwada, tova takanasirira kuti titokotese masoko akanaka?

⁸ Pauro anotingwajazve kuti tisimire magwada mu soka medu, kuti tikasike kutokotesa masoko akanaka o runyararo. Zvinoda kureva kuti tinodikana kuva takanasirira mukuvo wese kuti ticumaire masoko akanaka o Umambo. Patinovhunja vamweni masoko ari mu Bhaibheri, rutendo hwedu hunovanga. Zvinovangisa maningi kuvona kuti vandhu va Jehovha kutenderera pasi pese, vari kupsaka manera o kutokotesa masoko akanaka mu nyika yese. Inga muezaniso, ivona vanocumaera pavanonga vari kubasa, kucikora, nyumba ngo nyumba, mumabazari, povanovona ukama hucikatendi no povanosongana no vandhu vovanoziva, pikija povanonga vacikabudi panyumba pa mukuvo wakati kuti. Kudari tikathya tokonehwa kucumaira, taizoezana no musoca anovhisa magwada ake pa mukuvo unoitwa hondo; soka jake ajinesi kukhuvazika. Inga muviyo, zvinozomunesera kuti ajijivirire, i aazokwanisi kuzwira ndhungamiriro jo mutungamiriri wake.

9. Ngenyi tinodikana kubata muvhiko wo rutendo?

 ⁹ Muvhiko wo rutendo unoimirira rutendo hwatinahwo kuna Jehovha. Itusu tinothemba kuti iyena anozokwanirisa zvigondiso zvake. Rutendo uhu hunozotibesera “kujima ndiwona mupaxa yese yakabwaka ya Sathana.” Ngenyi tinodikana kubata muvhiko? Ngokuti unotijivirira kuti ticabaiwa ngo jijiso jo vacengeji kana pa kuthyisijihwa ngo vandhu vanoshora zvatinotenda. Ticina rutendo, atizovi no simba ro kucijikira vamweni povanoda kutikhohwesa kuti tiphuruse ndhungamiriro ja Jehovha. Ngo divi rimweni, mukuvo wese watinojivirira rutendo hwedu kubasa kana kucikora, tiri kubata muvhiko wedu. (1 Pedru 3:15) Mukuvo wese watinoregera basa rinopoceresa ushoni, raizophinga urongwa hwedu hwo kunamata, tiri kubata muvhiko wedu. (Vaheberi 13:5, 6) Mukuvo wese watinoshandira Jehovha pikija teciteverehwa, tiri kujivirihwa ngo muvhiko wedu.—1 VaTesalònika 2:2.

10. Icinyi cigoko co ruponeso, ngenyi tinodikana kucisimira?

¹⁰ Cigoko co ruponeso ivetero yotinopuwa ndi Jehovha yokuti iyena anozotiponesa ku rufu no kupfupa vandhu vanoita zvaanoda. (1 VaTesalònika 5:8; 1 Timoti 4:10; Tito 1:1,  2) Inga cigoko cinojivirira musoro wo musoca, vetero yo ruponeso inojivirira murangariro wedu. Mu njira yapi? Vetero iyi inotiita kuti tigare takasotesesa zvigondiso zva Mwari, yotiita kuti titame kunyiswa ngo zvineso zvedu. Tinosimirisa kudini cigoko ici? Tinocisimira ngo kugara tecirangarira mukuzwirana no murangariro ja Mwari. Inga muezaniso, ativeteri kana kugonda upfumi hunopera, asi tinogonda Mwari.—Nduyo 26:2; 104:34; 1 Timoti 6:17.

11. Icinyi banga ro mujimu, ngenyi tinodikana kurishandisa?

¹¹ Banga ro mujimu i Bhaibheri, Soko ra Mwari. Banga iri rino simba ro kubudisa pambhene manyepo ari ese no kusujunura vandhu ku uranda hwo jijiso jo kunyepa no zvirovejeso zvinokhuvaza. (2 VaKorinto 10:4, 5; 2 Timoti 3:16, 17; Vaheberi 4:12) Tinozokwanisa kushandisa ushoni banga iri, ngo kuita jijo yo mundhu ega no kujijiswa kwatinoitwa ngo sangano ra Jehovha. (2 Timoti 2:15) Kusiyapo zvijito izvi zvokuhwa ndizvona, Jehovha anotipazve jiviriro imweni yakavanga maningi. Ngoyapi?

12. Ngozvapi zvatinodazve? Tinozvida ngo ndava yenyi?

¹² Musoca ano uzivi, anoziva kuti aakwanisi kubudirira pa kuhwisana no masoca akawanda ari ega; iyena anoda besero ro masoca doni ake. Mukufananavo, itusu atibudiriri pa kuhwisana na Sathana no vateveri vake tiri tega; tinoda besero ro hama no hambzaji jedu. Jehovha wakatipa besero ro “hama” jo munyika yese.—1 Pedru 2:17.

13. Mukuzwirana no Vaheberi 10:24, 25, tinobesereka kudini ngo kuva pa musongano?

¹³ Njira imweni yotinobeserekazve ndiyona, ngo yokuva pa musongano. (Verenganyi Vaheberi 10:24, 25.) Patinonga takarembejeka, inga zvinotiitikira nguva jimweni, musongano jinotivangisa. Tinovangiswa ngo mupinguro jinoitwa ngo mwoyo wese ngo hama no hambzaji jedu. Hurukuro jakacijikira mu Bhaibheri no kuezanisira kunoitwa pa musongano, zvinovangisa cisungo cedu co kushandira Jehovha. Mabhuyo anoitwa musongano ucito watanga no pakupera ko musongano, anotivangisa. (1 VaTesalònika 5:14) Mukuengejera, musongano jinotipa mukana wo kuwana mudakaro ngo kubesera vamweni. (Maitiro o Vapostori 20:35; VaRoma 1:11, 12) Musongano jedu jinotibeserazve ngo njira imweni. Ijona jinotibesera kuti ticumaire no kujijisa ushoni. Inga muezaniso, ijona jinobesera kuti tishandise ushoni mabhuku ari mu Bhokiso Redu ro Mathurusi o Kujijisa. Ngo kudaro, nasiriranyi ushoni zvinozojijwa pa musongano jo ungano. Pajinonga jeciitwa, nasanyi kupurukira. Pa kupera ko musongano, shandisanyi zvomajija. Mukaita zviro izvi, munozova “soca rakanaka ra Kristu Jesu.”—2 Timoti 2:3.

14. Ngorapi besero rimweni ratinaro?

¹⁴ Tinobesehwa ngo mamiriyau akawanda maningi o ngirozi jino simba. Rangariranyi zvinokwanisa kuitwa ngo ngirozi imwe basi! (Isaia 37:36) Waro rangariranyi ngo pamusoro po zvinokwanisa kuitwa ngo cikwata co ngirozi jino simba. Akuna mundhu kana dhimoni rinoezana no cikwata co hondo cino simba ca Jehovha. Jehovha ngo wo masimba ese. Iyena paanova na itusu, tinozova no simba mukuvo wese kupinda vavengi vedu, azvinenyi kuti vakawandisa kudini. (Vatongi 6:16) Izvo ndizvonadi kamare! Garanyi mecirangarira izvi wari pamunojizwa kuti muri kuthyisijihwa ngo ciro cakadari inga zvinobhuiwa kana zvinoitwa ngo vadoni vo kubasa, shamwari jo kucikora no ukama hucikatendi.  Mucakanganwa kuti imwimwi amuripi mwega pa kuhwa uku. Imwimwi muri kuteveja ndhungamiriro ja Jehovha.

15. Mukuzwirana na Isaia 54:15, 17, ngenyi apana anokwanisa kuita kuti vandhu vatame kuzwa masoko akanaka?

¹⁵ Nyika iri kutongwari ndi Sathana, ino mathangwe mazinji o kutinyenya. Itusu atibeseri divi riri rese ro zvomatongehwe o nyika no kuenda ku hondo. Tinotokotesa zina ra Mwari, tecicumaira kuti Umambo hwake basi ndihwona unokwanisa kuviisa runyararo no kuzwira mutemo jake jakarurama. Tinokhombija vandhu vese kuti mutongi wo nyika, imunyepi, wakashata nokuti muurayi. (Johani 8:44) Tinozivisazve kuti kupejwa ko nyika ya Sathana kwaaphedo. Asi Sathana no vateveri vake avakwanisi kuita kuti titame kuita basa ro kucumaira. Mukusiyana, itusu tinozoenderera mberi tecipsaka manera ariese kuti tisimbe Jehovha! Pikija Sathana ano simba rakakurisa kudini, aakwanisi kuita kuti vandhu vatame kuzwa masoko akanaka Umambo hwa Mwari mu nyika yese. Izvi zvinokwanisika ngo kubesehwa ndi Jehovha basi.—Verenganyi Isaia 54:15, 17.

16. Jehovha anozoponesa kudini vandhu vake pa dambujiko guru?

¹⁶ Ngozvapi zvinozoitika kumbejiyo? Pa dambujiko guru, Jehovha anozoponesa vandhu vake ngo njira mbiri jinokahamarisa. Yokutanga, iyena anozoponesa vashandiri vake vakagondeka pa mukuvo waanozoita kuti majimambo o nyika aparaje Bhabhironi Guru, cine ro pasi pese ro ciara co kunyepa. (Apokalipsi 17:16-18; 18:2, 4) Perapo, anozoponesa vandhu vake paanozoparaja divi rinosara ro nyika ya Sathana pa Armagedhoni.—Apokalipsi 7:9, 10; 16:14, 16.

17. Tinobesereka kudini ngo kugara phedo na Jehovha?

¹⁷ Patinogara phedo na Jehovha, Sathana apana caanoita cinozotikhuvaza kwenda no kwenda. Zvokadi, iyena ndiyena anozoparajwa mbhera narini. (VaRoma 16:20) Ngo kudaro, simiranyi zvijito zvo kuhwa ndizvona, mogara nazvo! Mucapsaka kuhwisana pa hondo iyi mwega. Beseranyi hama no hambzaji jenyu. Tevejanyi ndhungamiriro ja Jehovha. Mukaita kudaro, munozothemba kuti Baba wenyu vo kudenga vanozomuvangisa no kumujivirira.—Isaia 41:10.