1. Ntakhara heeni Yesu aaveka wi Yehova awaakihe oohuserya awe?

MU OHIYU wookuchula wa okumi awe ntoko muchu veelaponi, Yesu aanuupuwela vooloca sa makacamiho yaawo oohuserya awe yaahaalaaya ohoolela. Osivela aareiyeno ntakhara asinthamwene awe, waamuceenyerya Yesu oveka wa Tiithi awe: “Muwaakihe wa oonanara owo.” (Yoh. 17:14, 15) Yesu aanasuwela wi moohilekela aahaala okookela wirimu, nave wi Satana Musaserya aahaala otitelela owana ni oothene yaale yaahaala ochuna omurumeela Yehova. Mwawiihiiha, achu a Yehova yaahaala ochuna waakihiwa.

2. Tiheeni enanlekecha wi Yehova onahaala waakhula mavekelo ahu?

² Nthowa na omusivela Mwanawe, Yehova aapaka yeeyo Yesu aavenkeiye. Wakhala wi ninnapaka owetha wahu wi nimwiiwelele Yehova, owo tho onahaala onisivela nave onahaala owiriyana mavekelo ahu vooloca sa nikhaviheryo ni okhapelela. Yehova ori ntoko Tiithi yoowo onapwacha emusi awe. Owo harwa ahiya waakhapelela moosivela anamwane awe. Wakhala wi henreno nsina nawe naari ophwanelela wawe onamunyemuliwa!

3. Ntakhara heeni ninnachuna okhapeleliwa ni Yehova olelo?

³ Ninnachuna okhapelela wa Yehova hiihaano opwaha khalai. Satana ohiikariwa wirimu, nave ookhuruwela veelaponi yavathi “ni wiica otokotoko.” (Wup. 12:12, BNM) Owo onnaweeriha achu wuupuwela wi vaavaa ananiikaraaya onapaka mukhalelo wa “omulapa Muluku.” (Yoh. 16:2) Akina yaawo ahinamweemererya Muluku, annaniica nthowa nawi nri oohiyana ni achu a mweelaponi. Moohiphwacha mathowa yaawo anaweeriha achu oniica, hannaphwanela woova. Ntakhara heeni? Nthowa nawi Masu a Muluku ani: “Apwiya toororomeleya, yaawo anamootikitheryaani ni owaakihaani wa mulipa oonanara owo.” (2 Tes. 3:3) Ti mwawiihai Yehova onanikhapeleleiye? Hankooni noone mikhalelo miili.

4. Mwawiiwanana ni Éfeso 6:13-17, tiheeni Yehova onivanheiye wi enikhapelele?

⁴ Yehova oonivaha sawiisaakihano seiho inahaala onikhapelela ntakhara ohiphela wa Satana. (Mwaalakhanye Éfeso 6:13-17.) Sawiisaakihano seiha soomunepani ti sakuru nave sinnalapa phaama! Nyenya iho inanwerya onikhapelela pahiru wakhala wi ninnapharihela soothene nave tho wakhala wi hanirunle. Sawiisaakihano seiha ineemelela eheeni? Hankooni noone.

5. Nrampa na eparipari tiheeni, nave ntakhara heeni ninnaphwanela owara?

⁵ Nrampa neeparipari nneemelela iparipari seiho inaphwanyeya Mmasu a Muluku, Piipiliya. Ntakhara heeni ninnaphwanela owara? Nthowa nawi Satana “tiithi awootha.” (Yoh. 8:44) Owo oomaliha iyaakha sincipale oothaka nave tho aahuwelihaka “achu eelapo yoothene”! (Wup. 12:9) Nyenya iparipari seiho iri Mpiipiliyani sinnanikhaviherya wi nihiwokiwe ni yoowo. Nni niware hai nrampa nenla? Moorweela wa ohuserya eparipari vooloca sa Yehova, omulapela “mwa munepa ni mwa eparipari” nave tho okhala oororomeleya mu ichu soothene.—Yoh. 4:24; Éfe. 4:25; Ahe. 13:18.

6. Yawiisaakihano ya wookololowa tiheeni, nave ntakhara heeni ninnaphwanela owara?

⁶ Yawiisaakihano yawookololowa eneemelela malamulo awookololowa a Yehova. Ntakhara heeni ninnaphwanela owara? Yawiisaakihano yeela yaanamukhapelela mukhoco wi ahihommwe ni nsipaaca naari nivaka. Moolikana, yawiisaakihano yawookololowa ennakhapelela murima ahu, naari wi, omuchu ahu wampuwa. Yawiisaakihano yeela heneemererya wi omuchu ahu wa mpuwa onanarihiwe ni ovolowela woonanara wa elapo yeela. (Masi. 4:23) Yehova onachuna wi nimusiveleke ni omurumeela yoowo ni murima woothene. (Mat. 22:36, 37) Tinthowa nene, Satana oneereryeiye okawanya murima ahu, wi nsiveleke ichu sa mulaponi, ichu seiho Yehova oniiceiye. (Tiy. 4:4; 1 Yoh. 2:15, 16) Nave wakhala wi muraakho yoola hophanre muteko, owo onneererya oniceecheiha wi aneerihe ohiiwelela malamulo a Yehova.

7. Nnawara hai yawiisaakihano yawookololowa?

⁷ Ninnawara yawiisaakihano yawookololowa moorweela wa weemererya malamulo a Yehova vooloca sa yeeyo eri yaphaama ni yoonanara, nave tho moorweela wa okhala mwawiiwanana ni yaawo. (Sal. 97:10) Akina anuupuwela wi malamulo a Yehova annaweeriha ohikhala ootaphuwa. Nyenya mulapeli a Yehova yoowo onahiya opharihela malakiheryo a Mpiipiliyani mu okumi awe, onalikana ni mukhoco yoowo onarula yawiisaakihano awe variyari va ekhoco nthowa nawi ennalimela. Weerano hiiha waahaala okhala ololo! Wa yaawo anamusivela Yehova, hanoona ‘malamulo awe okhala oolimela,’ nyenya anoona okhala echu yeeyo enahaala ovuluxa okumi aya.—1 Yoh. 5:3.

8. Enataphulela eheeni owariha inaani sahu wi nrehereryeye olaleerya michaka saphaama?

⁸ Paulo tho ooniceenyerya owariha inaani sahu michaka yaphaama ya murecele, wi nikhale oorehereryeya. Mmasu makina, nnaphwanela okhala oorehereryeya olaleerya michaka saphaama sa Omwene. Vaavaa nnaaleelaahu akina michaka sa Mpiipiliyani, nroromelo nahu ninnakhala noolipa. Ti yoohakalaliha owoona achu a Yehova mu elapo yoothene yaavyaka ekari wi elaleerye michaka saphaama—omutekoni, oxikola, mmapuro a nakoso, olaleerya empa ni empa, vaavaa anathumaaya ichu, vaavaa anaaxekuryaaya amusi oohiroromela, vaavaa anachekulaaya ni achu ahaasuwenlaaya, nave tho ophiyerya elukuluku ahinaweryaaya okhuma vaate. Wakhala wi nohoova nave nihiya olaleerya, nnahaala okhala ntoko mukhoco yoowo onarula isapatu sawe variyari va ekhoco; mwawaakuveya inaani sawe saahaala ophoreya.  Ntoko yookhumela, owo aahaala ohipheliwa mookhweya, nave haahaala owerya ochariha malakiheryo a muhooleli awe.

9. Ntakhara heeni ninnaphwanela owara yawiisaakihano ya nroromelo?

⁹ Yawiisaakihano ya nroromelo eneemelela nroromelo nryaahuno mwa Yehova. Hiyaano ninnaroromela wi Yehova onahaala waakhwaniherya soororomeliha sawe soothene. Nroromelo nenla ninnanikhaviherya ‘oshipihano mavaka oovarela a mulipa oonanara.’ Ntakhara heeni ninnaphwanela opharihela yawiisaakihano ya nroromelo? Nthowa nawi eyo enanwerya onikhapelela wi nihiwokiwe ni mahusiheryo a alipa oomwaryeya, nave tho wi nihiceecheihiwe ni yaale anaakaaha soororomela sahu. Nihikhanlevo nroromelo, hinni nikhale oolipa vaavaa akina aneereryaaya onlekecha wi nihiiwelele malamulo a Yehova. Nyenya ilukuluku soothene nnakhoocaahu opaka yeeyo Yehova oniiceiye, omutekoni, oxikola, nnawara yawiisaakihano ahu ya nroromelo. (1 Ped. 3:15) Ilukuluku soothene vaavaa nnakhoocaahu muteko yoowo onaliva phaama nthowa na osuwela wi muteko owo onahaala onanariha makupa ahu oomunepani, nnawara yawiisaakihano ahu. (Ahe. 13:5, 6) Nave tho ilukuluku soothene nnatitelelaahu omurumeela Yehova moohipwacha wiiciwa, nnakhapeleliwa ni yawiisaakihano ahu ya nroromelo.—1 Tes. 2:2.

10. Kapaseti a ovuluxa tiheeni, nave ntakhara heeni ninnaphwanela onwara?

 ¹⁰ Kapaseti a ovuluxa oneemelela ewehereryo yeeyo Yehova onivanheiye—ewehereryo yawi owo onahaala onivuluxa wa okhwa, nave wi onahaala waareeliha oothene yaale anapaka yookhwela awe. (1 Tes. 5:8; 1 Tim. 4:10; Tito 1:1, 2) Hiiha ntoko kapaseti aakhapeleleiye muru wa mukhoco, kapaseti ahu a ovuluxa onnakhapelela muupuwelo ahu. Mwawiihai? Ewehereryo yeeyo Yehova onanivaheiye, ennaneeriha okhala ootikitheryeya mu soororomeliha sawe nave ennaneeriha okhalano moonelo woophimelela vooloca sa makacamiho. Nni ninware hai kapaseti ahu? Ninneerano yeela moorweela wa wuupuwela hiiha ntoko Yehova onuupuweleiye. Ntoko yootakiherya, hannakuha ewehereryo ahu mmuhakhu yoowo ohinaroromeleya, nyenya mwa Muluku.—Sal. 26:2; 104:34; 1 Tim. 6:17.

11. Nlema na munepa tiheeni, nave ntakhara heeni ninnaphwanela opharihela?

¹¹ Nlema na munepa nneemelela Masu a Muluku, Piipiliya. Nlema nenla nookhalano owerya wa ovaanya wootha ori woothene ni waataphula achu wa mahusiheryo oowoka ni sookhovelela soonanara. (2 Kor. 10:4, 5; 2 Tim. 3:16, 17; Ahe. 4:12) Ninnahuserya opharihela phaama nlema nenla moorweela wa yoohuserya ya muchu mukhateiye ni ovyakiha yoowo nnaakhelaahu mmarehereryo a Muluku. (2 Tim. 2:15) Ohiya pahiru onivaha sawiisaakihano soomunepani, Yehova oonivaha mukhalelo mukina wa waakiha. Waakiha taani?

12. Echu taani ekina nnachunaahu, nave ntakhara heeni?

¹² Mukhoco a mavyakelo onnasuwela wi hani awerye waavootha amwiicani ancipale mukhateiye; owo onnachuna nikhaviheryo na akhoco akina. Moolikana, hiniwerya omvootha Satana ni akhaviheryi awe wakhala wi nnawaniha mukhatiihu; ninnachuna nikhaviheryo na anna ni arokora ahu. Tinthowa nene Yehova onivanheiye ‘onna ahu’ wa elapo yoothene, yoowo ori wooreheryeya onikhaviherya.—1 Ped. 2:17, BNM.

13. Mwawiiwanana ni Ahebri 10:24, 25, mithukumano sahu inanikhaviherya hai?

¹³ Mukhalelo mmoha wa waakhela nikhaviheryo nenlo nnachunaahu, ori moorweela wa ophiya mmithukumano. (Mwaalakhanye Ahebri 10:24, 25.) Oothene ahu nnanwerya okhala ooceecheya mu ilukuluku ikina. Wakhala wi eyo yoheereya, mithukumano inanwerya onilipiha. Maakhulo ookhumela vathi va murima a anna ni arokora ahu ananwerya onilipiha. Miyaha saya seiho inathipeleya Mpiipiliyani ni sawooniherya sinnanceenyerya otitelela omurumeela Yehova. Nave tho ochekula ni yaawo mithukumano ihaakumve naari omakuchuwelo, ennanihakalaliha. (1 Tes. 5:14) Mwawaaceererya, mmithukumano ninnahakalala waakhaviherya akina. (Saw. 20:35; Aro. 1:11, 12) Mithukumano tho sinnanikhaviherya mmikhalelo mikina. Iho sinnaaceererya mavyakelo ahu ntoko alaleeryi ni ahusiha. Nto yootakiherya, ninnahuserya mukhalelo wa opharihela phaama Ikaruma sahu sa Ohusihano. Mwawiihiiha, mwiirehereryeke phaama ntakhara mithukumano. Variyari va mithukumano, muwiriyaneke phaama. Simanle mithukumano, mpharihele yeeyo muhusenryaanyu. Mu weerano yeela, munahaala okhala “mukhoco aphaama a Kristu Yeesu.”—2 Tim. 2:3.

14. Nikhaviheryo taani nikina nryaahuno?

¹⁴ Nookhalano tho nikhaviheryo na amilyawu a ankeelo oowerya. Muupuwele yeeyo munkeelo mmoharu pahi onaweryeiye opaka! (Isa. 37:36) Vano mwaanyiherye yeeyo nikhuuru na ankeelo nnaweryaaya opaka. Haavo muchu naari mano nsololo, nnawerya olikana nnikhuuru  nenla noowerya na Yehova. Yehova ta owerya woothene. Mwawiihiiha, vaavaa onakhaleiye ni hiyo, nnanwerya okhala akuru waapwaha amwiicani ahu, moohipwacha waaca waya. (Amut. 6:16) Nave ela chiryene eparipari! Mwawiihiiha muupuweleke yeela wakhala wi mooceecheya nthowa na echu yeeyo nthamwene anyu naari mmusi anyu ohiri Namoona opankeiye naari olonceiye. Muupuwele wi hamuri mukhatiinyu mu ekhoco yeela. Yehova ori ohoolo wanyu oohoolelakaani.

15. Mwawiiwanana ni Isaiya 54:15, 17, ntakhara heeni haavo oni awerye waamaaliha achu a Muluku?

¹⁵ Elapo yeela enahooleliwa ni Satana aakhalavo mathowa mancipale aneeriha wi niiciweke. Hiyaano hinniivoliiherya mu epoliitika naari owaniha ekhoco. Ninnalaleya nsina na Muluku, ninnalaleerya wi Omwene awe tonahaala oruuha murecele wa achu, nave ninniiwelela malamulo awe awookololowa. Ninnaloca wi mulamuleli a elapo yeela nawoothe mutokotoko nave tho mulipa awiipha. (Yoh. 8:44) Nave hiyaano ninnaloca wi moohilekela, elapo ya Satana enahaala otoloxiwa. Nyenya Satana ni akhaviheryi awe herwa enimaaliha. Moohiyana, nnahaala omucicimiha Yehova mmikhalelo soothene nnaweryaahu! Naamwi arino ikuru, Satana hawerya ohiiha wi michaka saphaama sa Omwene saaphwanye achu oothene orukurerya elapo. Nave soothene seiha ti sooweryeya nthowa nawi Yehova onnanaakiha.—Mwaalakhanye Isaiya 54:15, 17.

16. Ti mwawiihai Yehova oneereiye aavuluxe achu awe variyari va yoohooxa etokotoko?

¹⁶ Tiheeni enahaala weereya moohilekela? Variyari va yoohooxa etokotoko, Yehova onahaala onivuluxa mmikhalelo miili sootikhiniha. Woopacerya, owo onahaala waavuluxa alapeli awe oororomeleya vaavaa oneereiye aaceenyerye alamuleli a elapo yavathi omutoloxa Papulu Mutokotoko, malapelo oothene atheru. (Wup. 17:16-18; 18:2, 4) Voocharela, owo onahaala waavuluxa achu awe mmukhalelo mukina, vaavaa oneereiye atoloxe makupa oohalela a elapo ya Satana mu Armaketo.—Wup. 7:9, 10; 16:14, 16.

17. Ntakhara heeni ninnaphwanela otitelela omwaacamela Yehova?

¹⁷ Wakhala wi nootitelela omwaacamela Yehova, Satana harwa eera echu yeeyo enahaala onipahula moomalela. Mweeparipari, owo tonahaala otoloxiwa moomalela. (Aro. 16:20) Mwawiihiiha, muware sawiisaakihano sanyu soothene—nave muhirweru murule! Muheererye owaniha mukhatiinyu. Mwaakhaviherye anna ni arokora anyu. Nave mucharihe ohoolela wa Yehova. Wakhala wi moheerano hiiha, munanwerya ororomela wi Tiithi anyu oosivela a wirimu, onahaala woolipihaani ni owaakihaani.—Isa. 41:10.