1. ¿Tleka Jesús okitlajtlanili Jehová makintlajpiya inomachtijkauan?

IJKUAK ikimiktiskiaj Jesús, yejua opeuj tlanemilia itech nochi tlen kixnamikiskiaj inomachtijkauan. Jesús kintlasojtlaya inomachtijkauan, ika yejon, okitlajtlanili iTaj makintlajpiya itech Diablo (Juan 17:14, 15). Yejua kuajli kimatstoya ika, ijkuak oksejpa nokuepaskia iluikak, Satanás kimixnamikiskia nochimej akin kinekiskiaj kitekichiuiliskej toTajtsin. Kuajli nesi ika noneki matechpaleui Jehová.

2. ¿Tleka kuajli tikmatstokej ika Jehová kichiuas tlen tiktlajtlaniliaj ipan teoyotl?

² Jehová okichiuj tlen Jesús okitlajtlanili pampa kitlasojtlaya. Tla tejuamej tikyolpaktiaj Jehová, yejua noijki techtlasojtlas niman techpaleuis niman techtlajpiyas ijkuak tiktlajtlaniliskej. ToTajtsin nochipa kintlajpiyas ikoneuan pampa yejua se Tajtli akin melak tetlasojtla. Yejua melak xkuajli nomachiliskia tla xijkon kichiuaskia.

3. ¿Tleka melak noneki matechtlajpiya Jehová?

³ Aman melak noneki matechtlajpiya Jehová pampa yokuajtlajkalkej Satanás ipan yejuin tlaltikpaktli, niman Satanás melak kualantok (Apoc. 12:12). Satanás yokichiuj ika miyekej makinemilikan ika, ijkuak techtlaueltokaj, kichiujtokej tlen toTajtsin kuelita (Juan 16:2). Oksekimej, akin xtlaneltokaj itech toTajtsin, techtlauelitaj pampa xtikchiuaj ijkon ken yejuamej. Maski ijkon, tejuamej xtomojtiaj pampa Biblia kijtoua: “Pero toTEKO nochipa kichiua tlen kijtoua. Niman yejua mechyolchikauas niman mechmanauis itech on diablo” (2 Tes. 3:3). Matikitakan kenon techtlajpiya Jehová.

4. Itech tlen kijtoua Efesios 6:13-17, ¿tlenon techmaka Jehová?

⁴ Jehová techinmaka miyek “armas” tlen techpaleuiyaj matikxikokan nochi tlen Satanás texchiuilia (xpoua Efesios 6:13-17). San ika, yejuin “armas” san uelis techpaleuiskej tla kuajli tikintekitiltiaj niman tla kuajli tikintotlaliltiaj. Aman matikitakan tlenon kinneskayotiaj yejuin “armas”.

5. ¿Tlenon kineskayotia ilpikatl noso cinturón, niman tleka noneki ika matotlajkosalokan?

⁵ Ilpikatl noso cinturón. Yejuin kineskayotia nochi tlen melauak temachtia Biblia. ¿Tleka melak noneki matotlajkosalokan ika yejuin cinturón? Pampa Satanás melak miyekej kinkajkayaujtika (Juan 8:44). Yejua desde yeuejkaui uajtlakajkayaujtiuj niman melak miyekej yokinkajkayauj (Apoc. 12:9). San ika, tlen melauak temachtia Biblia techpaleuiya maka matechkajkayaua. ¿Kenon uelis totlajkosaloskej ika yejuin cinturón? Tla kuajli tikasikamatij tlen Biblia temachtia itech Jehová, tla tikueyichiuaj ika nochi toyojlo niman tla tikchiuaj tlen kuajli (Juan 4:24; Efes. 4:25; Heb. 13:18).

6. ¿Tlenon kineskayotia teposchaleco, niman tleka melak noneki matotlaliltikan?

⁶ Teposchaleco. Yejuin kineskayotia itlanauatiluan Jehová. ¿Tleka melak noneki matotlaliltikan yejuin teposchaleco? Pampa, ijkon ken se teposchaleco kitlajpiya iyoltsin se soldado, itlanauatiluan toTajtsin noijki kitlajpiya toyoltsin itech tlen xkuajli (Prov. 4:23). Jehová technauatia matiktlasojtlakan niman matiktlakamatikan ika nochi toyojlo (Mat. 22:36, 37). Ika yejon, Satanás kineki kijtlakos toyojlo ika tlen onka ipan yejuin tlaltikpaktli. Kineki matikchiuakan tlen Jehová xkuelita (Sant. 4:4; 1 Juan 2:15, 16). Yejua melak kitejtemouilia kenon techkajkayauas niman ijkon maka matiktlakamatikan Jehová.

7. ¿Kenon uelis totlaliltiskej yejuin teposchaleco?

⁷ ¿Kenon uelis totlaliltiskej yejuin teposchaleco? Tla tikintlakamatij itlanauatiluan Jehová niman tla tikasikamatij ika san yejua kinamiki makijto tlenon kuajli niman tlenon xkuajli (Sal. 97:10). Kanaj miyekej kinemiliaj ika toTajtsin xtechkauilia matikchiuakan tlen tejuamej tiknekij. San ika, tla tokauiliaj matechkajkayauakan niman xok tikchiuaj tlen technauatia toTajtsin, tikchiujtoskiaj ijkon ken se soldado akin nemi ipan guerra niman kinokixtilia iteposchaleco san pampa kinemilia ika melak yetik. ¿Xmelak ika xtitlamachilisejkej yeskiaj tla ijkon tikchiuaskiaj? Akin tiktlasojtlaj Jehová xtiknemiliaj ika itlanauatiluan “yetikej” noso ika ouijtika tikintlakamatiskej (1 Juan 5:3). Tejuamej kuajli tikmatstokej ika itlanauatiluan toTajtsin techpaleuiskej matimakisakan.

8. ¿Tlenon okijtosnek Pablo ijkuak okijto ika noneki tikintotlaliltiskej tozapatos noso tokakuan para tontenojnotsaskej?

⁸ Zapatos noso kaktin. Pablo okijto ika noneki tikintotlaliltiskej tokakuan para tikonteijliskej “on kuajli tlajtojli yejuan kitemaka yolseuilistli”. Yejuin kijtosneki ika noneki nochipa tokojtiliskej tikteijliskej iTlajtol toTajtsin. Ijkuak titenojnotsaj, totlaneltokil más chikaui. Melak techyolpaktia tikmatiskej ika tokniuan nochiuiyan tenojnotstokej. Yejuamej tenojnotsaj kampa tekitij, kampa nomachtiaj, kampa tlanemakalo niman techajchan. Noijki, tenojnotsaj ijkuak ontlakouaj, ijkuak komintlajpalouaj inchanejkauan akin xnomachtiaj noso ijkuak tlajtouaj imiuan inteixmatkauan. Niman miyekej tokniuan tenojnotsaj maski xuelij kisaj de inchan. Melak techijtlakoskia tla tijkajkauaj ika titenojnotsaj san pampa tomojtiaj. Tla tijkajkauaskiaj ika titenojnotsaj, tikchiujtoskiaj ijkon ken se soldado akin nemi ipan guerra niman kinnokixtilia  ikakuan. ¿Xmelak ika yejuin soldado totoka noikxikokoskia, xnimantsin ueliskia yas kampa nomanauiskia niman xueliskia kitlakamatis itlayekankauj?

9. ¿Tleka noneki matiktekitiltikan yejuin escudo?

⁹ Escudo. Yejuin kineskayotia totlaneltokil itech Jehová. Kuajli tikneltokaj ika yejua kichiuas nochi tlen yokijto. Totlaneltokil techpaleuis matikintsakuilikan iflechas Satanás tlen uajtlikuitiuej. ¿Tleka noneki matiktekitiltikan yejuin escudo? Pampa yejuin techpaleuiya maka matechkajkayauakan akin kijtouaj tlen xmelauak itech ikalpan toTajtsin, niman noijki techpaleuiya matitlaxikokan ijkuak oksekimej techpijpinaujtiaj noso techuijuikaltiaj. Tla tijkajkauaj ika titlaneltokaj itech Jehová, oksekimej nimantsin uelis texchiualtiskej matikchiuakan tlen yejua xkuelita. San ika, ijkuak tejuamej tiktlakamatij Jehová ijkuak oksekimej texchiualtisnekij matikchiuakan tlen xkuajli kampa titekitij noso kampa tomachtiaj, kijtosneki ika totlaneltokil techpaleuijtika (1 Ped. 3:15). Ijkuak tejuamej xtikseliaj se ueyi tekitl pampa tikitaj ika xtechkauilis kuajli matiktekichiuilikan Jehová, kijtosneki ika totlaneltokil techpaleuijtika (Heb. 13:5, 6). Noijki, ijkuak xtiktlalkauiyaj Jehová ijkuak techtlaueltokaj, kijtosneki ika totlaneltokil techpaleuijtika (1 Tes. 2:2).

10. ¿Tlenon kineskayotia casco, niman tleka noneki matotlaliltikan?

 ¹⁰ Casco. Yejuin kineskayotia tlen toTajtsin yokijto kichiuas topampa ika tlayekapan: ika techteochiuas niman ika techmakas se nemilistli tlen xkeman tlamis (1 Tes. 5:8; 1 Tim. 4:10; Tito 1:1, 2). Ijkon ken se casco kitlajpiya itsontekon se soldado, tlen tikchiaj ika tlayekapan noijki kitlajpiya totlamachilis. Kema, techpaleuiya matitlanemilijtokan itech tlen Jehová yokijto kichiuas ika tlayekapan. Niman techpaleuiya maka melak matajmanakan ijkuak tikixnamikij tlen ouijtika. ¿Kenon tiktotlaliltiaj yejuin casco? Ijkuak tokojtiliaj titlanemiliskej ijkon ken Jehová. Tejuamej tikmatstokej ika tlen onka ipan yejuin tlaltikpaktli xuelis techpaleuis, ika yejon, san titlaneltokaj itech Jehová (Sal. 26:2; 104:34; 1 Tim. 6:17).

11. ¿Tlenon kineskayotia espada, niman tleka noneki matiktekitiltikan?

¹¹ Espada. Yejuin kineskayotia iTlajtol toTajtsin, Biblia. Yejuin espada techpaleuiya matikitakan tla itlaj melauak noso xmelauak, techpaleuiya matijkajkauakan tlen xkuajli niman kichiua maka sa matikneltokakan tlen xmelauak temachtiaj okseki religiones (2 Cor. 10:4, 5; 2 Tim. 3:16, 17; Heb. 4:12). Tla tejuamej san toseselti tomachtiaj niman tikchiuaj ijkon ken ikalpan toTajtsin techijlia, uelis kuajli tiktekitiltiskej yejuin espada (2 Tim. 2:15). Aman matikitakan kenon más techpaleuiya Jehová.

12. ¿Akinomej techpaleuiyaj matikixnamikikan Satanás?

¹² Se soldado akin youejkauj tlaixnamiktinemi kuajli kimatstika ika xuelis san iselti ontlaixnamikis, noneki yas imiuan oksekimej soldados. Ijkon ken yejuin soldado, tejuamej noijki kuajli tikmatstokej ika xuelis san toselti tikixnamikiskej Satanás niman akin kipaleuiyaj. ¡Noneki matechpaleuikan tokniuan! Jehová yotechinmakak miyekej tokniuan para matechpaleuikan (1 Ped. 2:17).

13. Itech tlen kijtoua Hebreos 10:24, 25, ¿kenon techpaleuiyaj tlanechikoltin?

¹³ Tokniuan uelis techpaleuiskej tla tiauej tlanechikoltin (xpoua Hebreos 10:24, 25). Melauak, tinochimej toyolkokouaj, san ika, ijkuak tiauej tlanechikoltin, más kuajli tomachiliaj. Ijkuak tijkakij kenon tlanankiliaj tokniuan, toyolchikauaj. Niman intlamachtiluan tokniuan techyolchikauaj más kuajli matiktekichiuilikan Jehová. Noijki, toyolchikauaj ijkuak titlajtlajtouaj imiuan tokniuan achto peuas tlanechikojli niman sakin ika yotlan (1 Tes. 5:14). Ijkuak tiauej tlanechikoltin, ueli tikinpaleuiyaj tokniuan, niman yejon techyolpaktia (Hech. 20:35; Rom. 1:11, 12). Tlanechikoltin noijki techpaleuiyaj más kuajli matitemachtikan, matitenojnotsakan, matikintekitiltikan toamatlajkuiloluan niman videos tlen ika titemachtiaj. Yejua ika, melak noneki kuajli matomachtikan tlen tikitaskej ipan tlanechikojli, kuajli matitlakakikan niman matikchiuakan tlen ompa techijliaj. Tla ijkon tikchiuaj, tiktlaniskej Satanás niman tochiuaskej “se kuajli soldado itech JesuCristo” (2 Tim. 2:3).

14. ¿Akinomej noijki techpaleuijtokej?

¹⁴ Maka matikilkauakan ika techpaleuijtokej melak miyekej iluikaktekitkej. Biblia kijtoua ika nochimej iluikaktekitkej melak kojtikej (Is. 37:36). Xnemi nion se tlakatl niman nion se demonio akin uelis kintlanis iiluikaktekitkauan Jehová. Biblia kijtoua ika uelis titetlaniskej maski tikmachiliskej ika san toselti tinemij, pampa Jehová touan nemi (Juec. 6:16). Tla kemantika se akin iuan tomachtiaj, akin iuan titekitij noso se tochanejkauj akin xnomachtia texchiuilia tlen xkuajli, maka matikilkauakan ika Jehová techpaleuis. Tejuamej xsan toselti titlaixnamiktokej, Jehová touan nemi.

15. Itech tlen kijtoua Isaías 54:15, 17, ¿tleka Satanás niman akin kinyekana xuelis kichiuaskej maka sa matitenojnotsakan?

¹⁵ Akin kinokauiliaj makinyekana Satanás melak techtlauelitaj. ¿Tleka? Pampa xtokalaktiaj ipan política niman pampa xtiauej ipan guerra. Noijki, techtlauelitaj pampa tikteijliaj kenon itoka toTajtsin, ika san iTekiuajyo uelis tlayektlalis ipan yejuin tlaltikpaktli niman pampa tikintlakamatij itlanauatiluan Jehová. Niman miyekej techtlauelitaj pampa tikteijliaj ika Satanás, akin tlayekantok ipan yejuin tlaltikpaktli, se tlakajkayaujketl niman temiktijketl (Juan 8:44). Noijki, techtlauelitaj pampa tikteijliaj ika sa achijtsin poliui para kinpopoloskej akin xkuajkualtin. San ika, nion Satanás nion akin kipaleuiyaj xuelis techteltiskej. Tejuamej nochipa tikteijlijtoskej tlen kineki Jehová. Maski Satanás melak kojtik, xuelis kichiuas maka sa matitenojnotsakan. ¿Tleka? Pampa Jehová techtlajpiya (xpoua Isaías 54:15, 17).

16. ¿Tlenon kichiuas Jehová ipan ueyi tlajyouilistli niman ijkon techmakixtis?

¹⁶ ¿Tlenon kichiuas Jehová ipan ueyi tlajyouilistli niman ijkon techmakixtis? Kachtopa, yejua kichiuas ika tekiuajkej makipopolokan Ueyixtika Babilonia, tlen kineskayotia tlaneltokiltin tlen xmelajkej (Apoc. 17:16-18; 18:2, 4). Niman noijki, kimakixtis ikalpan ipan guerra tlen itoka Armagedón ijkuak kipopolos nochi tlen Satanás kiyekantok ipan tlaltikpaktli (Apoc. 7:9, 10; 16:14, 16).

17. ¿Tleka xnoneki tiktlalkauiskej Jehová?

¹⁷ Tla tejuamej xtiktlalkauiyaj Jehová, Satanás xtlaj uelis texchiuilis. Maka matikilkauakan ika Satanás yejua akin kipopoloskej (Rom. 16:20). Kuakon, kuajli matikintotlaliltikan niman kuajli matikintekitiltikan nochi “armas” tlen Jehová techinmaka. Maka matikilkauakan ika xsan toselti titlaixnamiktokej, matopaleuikan intech tokniuan niman nochipa matiktlakamatikan Jehová. Tla ijkon tikchiuaj, kuajli tikmatstoskej ika Jehová techyolchikauas niman techtlajpiyas (Is. 41:10).