1. Yesu mwasaba Yehova ati ateghaye abigha biwe busanaki?

OMO kiro ky’omwiso ky’engebe ya Yesu oko kihugho, Yesu abya akalengekania oko maligho awo abigha biwe bangalabiremo. Kundi Yesu abya anzire abigha biwe mwasaba Tata wiwe ati “ateghayebo oko Mubi.” (Yoa. 17:14, 15) Yesu abya inianasi ngoko akendisuba elubula, neryo Sitani Diabolo akendilola embere erilwa n’abandu abanzire erikolera Yehova. Busana n’ekyo abandu b’oMungu bakendilagha oko buteya.

2. Ekyangaleka itwikirirya tuti Yehova akendisubirya oko misabe yetu niki?

² Yehova mwasubirya oko musabe wa Yesu kundi anzire Mughala wiwe. Twamayikasa erimutsemesya akatwanza kandi akatuwatikaya n’erisubirya oko misabe yetu n’erituteya. Yehova ni Tata w’olwanzo, neryo syalyumbaya eriteya abana biwe. Atetakola atya erina liwe kutse olukengerwa luwe ilukenditsumwa!

3. Busanaki tulaghire oko buteya bwa Yehova munabwire?

³ Munabwire tulaghire oko buwatikya bwa Yehova ko kutsibu kulenga kera. Sitani abirighuswa erilua elubula “inyanahitene kutsibu.” (Erib. 12:12) Abirileka abandu balebe ibalengekania bati omughulu bakatwendereraya bakabya nga “bakakola omubiri w’oMungu.” (Yoa. 16:2) Abandi abatikirirye oMungu bakatwendereraya kundi bakalangira ngoko emibere yetu yisighene n’ey’abandu b’ekihugho. Nomo abandu bangatwenderererya bati situlisagha. Busanaki? Kundi ekinywa ky’oMungu kikabugha kiti: ‘OMukama syalireghula kandi asyabasikya [kutse eribaha akaghala] n’eribateya oko mubi oyo.’ (2 Tes. 3:3) Yehova akatuteghaya ati? Tukanaye oko syonzira ibiri esyo akatuteghayamo.

4. Ngoko kihandikirwe omo Abanya Efeso 6:13-17, Yehova abirituhaki busana n’erituteya?

⁴ Yehova abirihiraho ebindu kutse ebyamano by’amalwa ebyangatuteya omughulu Sitani akalwa netu. (Soma Abanya Efeso 6:13-17.) Ebindu by’amalwa ebyo Yehova akatuha biri n’akaghala kandi bikakola ndeke! Aliwe litolere isitwaleka erikolesya obuli kindu ky’amalwa twamanza tuti kituteghaye. Obuli kindu ky’amalwa kikasosekanayaki? Tukanaye kubyo mo kighuma-kighuma.

5. Omukoba w’ekwenene w’omo mbindi niki, kandi busanaki litolere itwambalagho?

⁵ Omukoba w’omo mbindi w’ekwenene akasosekanaya ekwenene eyikabanika omo Kinywa ky’oMungu eBiblia. Busanaki litolere itwambala omukoba w’omo mbindi? Kundi Sitani yo “ise w’amabehi.” (Yoa. 8:44) Erilua kera, abiritebya abandu bangyi kutsibu kandi “akateba ekihugo kyosi”! (Erib. 12:9) Aliwe ekwenene eyikabanika omo Biblia ikatuteghaya eritenditebibwa naye. Nikwa tukambala tuti omukoba w’ekwenene oyu? Tukambalagho omwigha ekwenene oko Yehova, omwimuramya “omo kirimu n’omo kwenene,” n’omwikola ebibuya omo myatsi yosi.​—Yoa. 4:24; Efe. 4:25; Ebr. 13:18.

6. Ekindu ky’amalwa ekikateghaya ekikuba ekitunganene niki, kandi busanaki tutolere itwambalakyo?

⁶ Ekindu ky’amalwa ekikateghaya ekikuba ekitunganene kikasosekanaya esyokanuni sya Yehova esitunganene. Ekindu ky’amalwa ekikateghaya ekikuba kikateghaya omutima w’omusuda syatsimitawe, kutya n’ekindu ky’amalwa ikikateghaya ekikuba ekitunganene kikateghaya omutima wetu ow’ekisosekano, ni bughambu omundu w’emwisi atoke eritenditsandibwa n’emyatsi mibi y’ekihugho kino. (Emi. 4:23) Yehova anzire itwamwanza n’erimukolera n’omutima wetu wosi. (Mat. 22:36, 37) Neryo Sitani akasonda eritukakirya erikolera Yehova n’omutima wetu wosi omwitutsotsya eryanza ebindu by’ekihugho​—ebyo Yehova aponire. (Yak. 4:4; 1 Yoa. 2:15, 16) Kandi amabitaluka erituhamba omo kitegho ekyo, akasondaya esindi nzira esyangaleka itwakola emyatsi eyitahambene n’esyokanuni sya Yehova.

7. Tukambala tuti ekindu ekyamalwa ekikateghaya ekikuba ekitunganene?

⁷ Tukambala ekindu ekikateghaya ekikuba ekitunganene eriligha esyokanuni sya Yehova esitunganene esilebirye ebyuwene n’ebituwene n’erikwamasyo. (Esy. 97:10) Abandi banganalengekania bati esyokanuni sya Yehova sikaleka ibatabya omo bwiranda. Aliwe twamabileka erikolesya esyokanuni sy’eBiblia sy’omo ngebe yetu, tukabya ng’omusuda oyukalusaya ekindu kyamalwa ekikateghaya ekikuba kiwe omughulu ali omo malwa kundi mwakalengekanaya ati kyamabya nga kyamalitoha. Amakola atya obo ini bukiru! Naho abakasikaya ebihano bya Yehova ‘sibalilangira nga bilitohire,’ aliwe bakabilangira ng’ebikabaha engebe.​—1 Yoa. 5:3.

8. Eribya itune n’ebiryato eby’engulu yuwene ni bughambuki?

⁸ Paulo mwatuhana ati twambale ebiryato byʼEngulu Yowene yʼobuholo. Ekyo ni bughambu tutolere itwabya itunayiteghekenie eritula engulu mbuya y’oBwami. Omughulu tukabwira abandi b’oko ngulu eyikabanika omo Biblia, tukabya itunemuwatya obwikirirya bwetu. Kikatsemesaya omughulu tukalangira ngoko abandu ba Yehova omo kihughu kyosi bakakolesaya obuli kanya ako bakasunga eritulughania engulu mbuya y’ehosi. Eky’erileberyako, bakatulira oko mubírí, ekalasi, omo buli nyumba kutse eyiri esyoduka, omughulu bakaghula oko bindu, omughulu bakalenderera abandu b’oko kihanda kyabo abate Bimiri ba Yehova, kutse omughulu bakakanaya  n’abandu abo basi. Twamabyubaha neryo itwaleka eritulira itukendibya ng’omusuda oyukalusaya ebiryato. Kwenene ebisando by’omusuda oyo ibikendihutala, kandi isyenditoka eriyilwirako omughulu enzighu yikendimwasira, kandi isyenditoka erikwama obusondoli b’omukulu wabo.

9. Busanaki tutolere itwahamba engabo yetu y’obwikirirya?

⁹ Engabo y’erikirirya yikasosekanaya obwikirirya obo tuli nabo oko Yehova. Twikirirye ngoko Yehova akendisyaberererya esyondaghane siwe syosi. Obwikirirya obo bukaleka ‘itwatoka erilimya emisoha yosi yʼomuliro yʼomubi.’ Busanaki litolere itwahamba engabo eyo? Kundi engabo yikatuteghaya okwitenditebibwa n’amakangirirya w’abakayisamambula okwikirirya, kandi sitwangabunika mutima omughulu abandu bakatusekereraya. Tutetabya n’obwikirirya itukendibula akaghala ak’erisikya Yehova omughulu abandi bakatukasa eritendisikya esyokanuni siwe. Aliwe omughulu tukaghana ebyo Yehova aponire oko kasi kutse oko kalasi, omughulu oyo obwikirirya bwetu bukatuteghaya. (1 Pet. 3:15) Oko mughulu wosi tukakolera Yehova nomo abandu banemutwendererya. (Ebr. 13:5, 6) Obwikirirya bwetu bukatuteghaya.​—1 Tes. 2:2.

10. Esapwe y’omulamo niki, kandi busanaki litolere itwambalayo?

 ¹⁰ Akakira kutse esapwe y’omulamo w’amaha wetu awo Yehova akatuha—amaha w’eriyiketera tuti Yehova akasyahemba abandu bosi abakakola erisonda liwe, kandi tuti n’omo twangahola tuli n’amaha w’erisyalubuka. (1 Tes. 5:8; 1 Tim. 4:10; Tito 1:1, 2) Ngoko esapwe y’omusuda yikateghaya omutwe wiwe, kutya n’amaha wetu w’omulamo akateghaya obutoki bwetu obw’erilengekania. Omo nzira yahi? Amaha ayo akaleka itwahira amalengekania wetu w’oko syondaghane sy’oMungu kandi akatuwatikaya eritendibunika mutima busana n’amaligho awo tukalolako. Tukambala esapwe yo tuti? Omughulu tukabya n’amalengekania awahambene n’amalengekenia w’oMungu. Eky’erileberyako tukahira amaha wetu w’oko Mungu aliwe situlihiragho omo bindu ebikahwaho.​—Esy. 26:2; 104:34; 1 Tim. 6:17.

11. Omuyali w’ekirimu niki kandi busanaki litolere itwakolesyagho?

¹¹ Omuyali w’ekirimu kye Kinywa ky’oMungu, eBiblia. Omuyali oyo awite akaghala ak’eritukangania amabehi neryo itwalua omo bukobe bw’amakangirirya w’amabehi n’emitsye mibi. (2 Kor. 10:4, 5; 2 Tim. 3:16, 17; Ebr. 4:12) Tukigha erikolesya omuyali oyo wo ndeke omughulu tukayilisaya eKinywa ky’oMungu kandi omughulu tukakangiriribawa n’endondeka y’oMungu. (2 Tim. 2:15) Eritomeka oko bindu by’amalwa, hane eyindi nzira eyo Yehova akatuteghayamo. Enzira eyo ni yahi?

12. Tulaghire oko bundi buwatikya bwahi, kandi busanaki?

¹² Omusuda oyukalire asi ngoko iyuwene syangatoka erisinga emilondo y’esyonzighu siwe; alaghire oko buwatikya bw’abasuda balikyabo. Kutya, itwibene sitwangasinga Sitani n’abandu biwe; tulaghire oko buwatikya bw’abaghala n’abali betu. Yehova abirituha “abalikyetu Abakristo” abomo kihugho kyosi abangatuwatikya.​—1 Pet. 2:17.

13. Ngoko kihandikirwe omo Abaebrania 10:24, 25, emihindano yetu ikatuwatikaya yiti?

¹³ Enzira nguma eyo tukabaniramo obuwatikya w’omughulu tukaya oko mihindano yetu. (Soma Abaebrania 10:24, 25.) Itwe bosi, eribunika mutima likanatuhikira omughulu tukabya omo mibere eyo emihindano yetu ikatusubaya m’omutima. Tukasubibawa m’omutima omo nzira y’ebisubiryo by’abaghala n’abali betu ebikalua oko mutima. Emikania eyihulikirirene n’eBiblia, n’eby’erileberyako ebikalabibawa bikatutsotsaya erilola embere erikolera Yehova. Kandi tukasubibawa mutima omughulu tukakanaya n’abali n’abaghala betu embere n’enyuma sy’omuhindano. (1 Tes. 5:14) Kandi emihindano yetu ikatuha akanya k’eribana ubutseme obukaluura omwiwatikya abandi. (Emib. 20:35; Rom. 1:11, 12) Kandi emihindano yetu ikatuwatikaya omo sindi nzira. Ikatuwatikaya eribya n’eritulera n’eribya bakangirirya babuya. Eky’erileberyako, tukigha ngoko twangakolesya ebitsapo ebyo tubeghere erikolesya omo mubírí w’eritulira. Busana n’ekyo, ubye ukayiteghekania ndeke oko mihindano y’endeko. Omughulu w’emihindano uhulikirire ndeke, n’enyuma sy’omuhindano ukolesaye ebyo ulyigha. Wamakola utya iwukendibya ‘ng’omusuda mubuya wa Kristo Yesu.’​—2 Tim. 2:3.

14. Tuwite obundi buwatikya bwahi?

¹⁴ Tukawatikibawa n’abamalaika bangyi kutsibu abawite akaghala. Terilengekania oko ekyo omumalaika mughuma angakola! (Isa. 37:36) Neryo ulengekanaye oko ebyo emilondo y’abamalaika banganakola. Sihali omundu kutse esyombinga esyangasinga emilondo y’abamalaika abalwi ba Yehova. Yehova ni mutoki w’ebyosi, busana nekyo omughulu ali haghuma  netu tukabya n’akaghala kulenga esyonzighu syetu nomo syangabya singahi. (Abat. 6:16) Twikirirye ngoko ekyo ni kwenene! Lengekanaya oko abosi abangakuwatikya omughulu omundu mulebe ekalasi kutse oko kasi amakubahisya, kutse omundu w’omo kihinda kyaghu amakubahisya omo mwatsi owamabugha kutse amakola. W’ibuke ngoko siuli iwuwene omo malwa. Ukakwama obusondoli bwa Yehova.

15. Ngoko kihandikirwe omo Isaya 54:15, 17, busanaki sihali omundu n’omughuma oyo wangakakirya abandu b’oMungu eritulira?

¹⁵ Hali myatsi mingyi eyikaleka ekihugho kya Sitani ikyatupona. Situliyingiraya omo politike n’omo malwa. Tukaminyisaya erina ly’oMungu n’eritulira ngoko oBwami bwiwe busa bo bwangatuletera obuholo bw’ekwenene kandi tukasikaya esyokanuni siwe esitunganene. Tukatulira abandu ngoko omutabali w’ekihugho kino ni mubehi kandi ni mwiti. (Yoa. 8:44) Kandi tukakanganaya abandu ngoko hakisiya hake ekihugho kya Sitani ikyatoghotibwa. Kwenene Sitani n’abandu biwe sibangimania n’ahake omubírí wetu w’eritulira. Busana n’ekyo, tukendilola embere eripipa Yehova omwikolesya esyonzira syosi ngoko twangatoka! Sitani nomo anawite obutoki, syangatoka erikakirya engulu y’oBwami eritulaghanibwa oko bandu b’omo kihugho kyosi. Ekyo kikatokekana kundi Yehova akatuteghaya.​—Soma Isaya 54:15, 17.

16. Omughulu w’obulighe bunene Yehova akasyalamaya abandu biwe bo ati?

¹⁶ Omo biro ebikasa Yehova akendisyatuteya ati? Omughulu w’obulighe bunene Yehova akasyatulamaya omo nzira ibiri. Enzira y’erimbere akasyalamaya abaghombe biwe bataleghula, omughulu akandikuna abami b’ekihugho eritoghotya eBabeli Mukulu, ebisomo byosi eby’amabehi. (Erib. 17:16-18; 18:2, 4) Eky’akabiri Yehova akasyalamaya abandu biwe omughulu akenditoghotya ekihugho kya Sitani n’abandu biwe abakasyabya ibakineho oko Armagedoni.​—Erib. 7:9, 10; 16:14, 16.

17. Obwira obuwene na Yehova bwanganatuwatikya buti?

¹⁷ Omughulu tukabya n’obwira obuwene na Yehova Sitani syangakola ekindu kyosi-kyosi ekyangatuhutalia olwosi. (Rom. 16:20) Yo Sitani yukendisyatoghotibwa kera na kere. Neryo wambale ebindu byosi byamalwa! Uyitsinge erikolesyabyo. Uwatikaye abaghala na bali betu. Kandi ukwame obusondoli bwa Yehova. Wamakola utya iwukendikirirya ngoko Tata wawu w’elubula akendikutsemera n’erikuteya.​—Isa. 41:10.