1. Ndaŵa yanji Yesu esenga Yehova kuti ayanganile ophunzila ŵake?

PA USIKU wosilizhyila wa moyo wake wa pacalo, Yesu enzoganizila za mavuto yamene ophunzila ŵake akakumane nayo. Cifukwa cakuti enzoŵakonda ophunzila ŵake, Yesu esenga Ausuwake kuti ‘aŵayanganile kuyopela muipa.’ (Yoh. 17:14, 15) Yesu enzoziŵa kuti akayowelela kululu, Satana Maleŵania akalimbane na aliyense amene ofunishisha kutumikila Yehova. Tetyo, atumiki a Yehova enzofunika kutetezewa.

2. N’cinji cingatisimikizhyile kuti Yehova oyankha mapemphelo ŵasu?

² Yehova eyankha pemphelo ya Yesu cifukwa cakuti omukonda. Ngati tuyesayesa kucita zinthu zomukondwelesha, yove atikonde. Ndipo akoyankha mapemphelo ŵasu osenga thandizo na citetezo. Yehova ni Ausuwasu acikondi. Tetyo, apitilizhye kusamalila ŵana ŵake. Kungankhale kusalemekeza zina yake olo kuononga mbili yake ngati angaleke kucita izi.

3. Ndaŵa yanji tufunika citetezo ca Yehova masiku ŵano?

³ Lomba, tufunika citetezo ca Yehova kupambana kale. Ndaŵa yanji? Cifukwa cakuti Satana ecosewako kululu, “ndipo ali na ukali ukulu.” (Chiv. 12:12) Yove wacitisha ŵanthu ayakine kuganiza kuti ngati otinzunza niye kuti ocita “utumiki wopatulika kwa Mulungu.” (Yoh. 16:2) Ayakine amene okhulupilila lini Mulungu otinzunza cifukwa tusiyana na ŵanthu a m’calo. Olo kuti ŵanthu angatinzunze pa vifukwa votyani, tucita lini wowa. Ndaŵa yanji? Cifukwa Mau a Mulungu olaŵila kuti: “Asikulu ni okhulupilika ndipo akutang’isheni nokutetezani ku muipa.” (2 Ates. 3:3) Kansi Yehova otiteteza tyani? Tiyeni tilaŵizhyane njila ziŵili mwakucitila zamene izi.

4. Molingana na Aefeso 6:13-17, kansi Yehova watipasa cinji kuti atiteteze?

⁴ Yehova watipasa zida zamene zingatiteteze kwa Satana. (Ŵelengani Aefeso 6:13-17.) Zida izi zofumila kwa Mulungu ni zamphamvu koma soti zuseŵenza luweme. Koma tufunika kuseŵenzesha cida ciliconse kuti tipitilizhye kunkhala otetezeka. Kansi cida ciliconse cupanamila cinji? Lomba tiyeni tilaŵizhyane cimozi na cimozi.

5. Kansi bande yacendi ni cinji, ndipo ndaŵa yanji tufunika kuivwala?

⁵ Bande yacendi yupanamila cendi copezeka m’Mau a Mulungu, Baibo. Ndaŵa yanji tufunika kuvwala bande iyi? Cifukwa Satana ni “tata wa wenye.” (Yoh. 8:44) Yove wankhala otala wenye kwa vyaka masauzande anyinji ndipo wasoŵesha ŵanthu “pacalo conse.” (Chiv. 12:9) Koma cendi copezeka m’Baibo cutiteteza kuti tisasoŵeshewe. Kansi tuvwala tyani bande yophiphilisila yamene iyi? Tucita izi mwa kuphunzila cendi cokhuza Yehova, mwa kumulambila “mosogolelewa na mzimu na cendi,” koma soti kucita vinthu vonse moona mtima.​—Yoh. 4:24; Aef. 4:25; Aheb. 13:18.

6. Kansi cozitetezela pacifuwa ca cilungamo cupanamila cinji, ndipo ndaŵa yanji tufunika kucivwala?

⁶ Cozitetezela pacifuwa ca cilungamo cupanamila malamulo olungama a Yehova. Ndaŵa yanji tufunika kuvwala cozitetezela pacifuwa ca cilungamo camene ici? Monga ni mwamene covwala pacifuwa cutetezela mtima wa msoja, naco cozitetezela pacifuwa ca cilungamo cuteteza mtima wasu ku visonkhezelo viipa va calo ca Satana. (Miy. 4:23) Yehova ofuna kuti tikomukonda nomutumikila na mtima wonse. (Mat. 22:36, 37) Koma Satana oyesayesa kutipangisha kuleka kutumikila Yehova na mtima wonse mwa kuticitisha kukonda vinthu va m’calo vakuzonda Yehova. (Yak. 4:4; 1 Yoh. 2:15, 16) Ngati waona kuti msampha uyu uliyoseŵenze, yove otiyofya kapena kutinzunza kuti ticite vinthu vamene vukondwelesha lini Yehova.

7. Kansi tuvwala tyani cozitetezela pacifuwa ca cilungamo?

⁷ Tuvwala cozitetezela pacifuwa ca cilungamo mwa kumvwila malamulo a Yehova olungama okhuza cabwino na ciipa nocita vinthu mokatizhyana na malamulo amene awo. (Sal. 97:10) Ayakine angaganize kuti malamulo a Yehova ni ovuta. Koma ngati tingaleke kukonkha mfundo za m’Baibo pa umoyo wasu, tingankhale monga ni msoja wamene wavula cozitetezela pacifuwa pakati pa nkhondo, cifukwa coganiza kuti ni colema ngako. Uku kungankhale kusoŵa nzelu. Kuli ŵala amene okonda Yehova, malamulo ŵake ni “osaŵeŵesha,” koma ni opulumusa moyo.​—1 Yoh. 5:3.

8. Kansi kuvwala nsapato zokonzekela kulalikila uthenga uweme kutanthauzanji?

⁸ Paulo etilimbikisha kuvwala nsapato zokonzekela kulalikila uthenga uweme wamtendele. Izi zuonesha kuti tufunika kunkhala okonzeka nthawi zonse kulalikila uthenga uweme wa Ufumu. Ngati tuuzhya ayakine uthenga wa m’Baibo, cikhulupililo casu cutang’ilako. Tulimbikishiwa kuona atumiki a Yehova pacalo conse olalikila uthenga uweme kulikonse kwaali. Mwacisanzo, olalikila ku nchito, ku sukulu, ku ng’anda na ng’anda, ku malo amalonda, ku mashopu, kwa abanja amene ni osakhulupilila koma soti olalikila ŵanthu ŵakunkhala nao pafupi. Ngati tingacite wowa noleka kulalikila, tingankhale monga ni msoja wamene wavula nsapato mkati mwa nkhondo ndipo angazicite mosavuta ku mendo. Cifukwa ca izi angapaiwe mosavuta  na adani ndipo angakangiwe kukonkha malamulo ya mkulu wa masoja.

9. Ndaŵa yanji tufunika kunyamula cishango cikulu ca cikhulupililo?

⁹ Cishango cikulu ca cikhulupililo cupanamila cikhulupililo catili naco pa Yehova. Tukhulupilila kuti Yehova akakwanilishe malonjezo ŵake onse. Cikhulupililo cutiyavya “kuzimya mikondo yonse yoyaka mulilo ya muipa.” Ndaŵa yanji tufunika kunyamula cishango cikulu camene ici? Cifukwa cutiteteza ku viphunziso vawenye va ŵanthu ampatuko ndipo tufooka lini ngati ŵanthu osusha zatukhulupilila. Ngati tiliye cikhulupililo tingakangiwe kumvwila Yehova ngati ayakine atilimbikisha kucita vinthu viipa. Koma nthawi zonse ngati tukana kucita vinthu vakuzonda Yehova ku nchito koma soti ku sukulu, tuonesha kuti cikhulupililo cutiteteza. (1 Pet. 3:15) Nthawi zonse tikakana nchito ya malipilo anyinji yamene yutilola lini kutumikila Yehova, niye kuti cikhulupililo cutiteteza. (Aheb. 13:5, 6) Ndipo ngati tupitilizhya kutumikila Yehova olo kuti tusushiwa, niye kuti cikhulupililo cutiteteza.​—1 Ates. 2:2.

10. Kansi cisote ca cipulumuso n’cinji, ndipo ndaŵa yanji tufunika kucivwala?

¹⁰ Cisote ca cipulumuso ni ciyembekezo cakutipasa  Yehova cakuti akatwale mphoto kwa onse amene ocita cifunilo cake koma soti kuti olo tingafwe yove akatiukishe. (1 Ates. 5:8; 1 Tim. 4:10; Tito 1:1, 2) Monga ni mwamene cisote cutetezela mutu wa msoja, naco ciyembekezo ca cipulumuso cuteteza maganizo ŵasu. Motyani? Ciyembekezo cutiyavya kuika maganizo ŵasu pa malonjezo a Mulungu ndipo cutiyavya soti kuona mavuto m’njila yoyenelela. Kansi tuvwala tyani cisote ici? Mwa kuona vinthu monga ni mwakuvionela Mulungu. Mwacisanzo, tuika lini ciyembekezo casu pa cuma, koma pa Mulungu.​—Sal. 26:2; 104:34; 1 Tim. 6:17.

11. Kansi cipula ca mzimu n’cinji, ndipo ndaŵa yanji tufunika kuciseŵenzesha?

¹¹ Cipula ca mzimu ni Mau a Mulungu, Baibo. Cipula ici ni camphamvu ngako cakuti cukwanisha kususha vinthu vawenye nomasula ŵanthu ku viphunziso vawenye na minkhalidwe iipa. (2 Akor. 10:4, 5; 2 Tim. 3:16, 17; Aheb. 4:12) Tuphunzila kuseŵenzesha luweme cipula ici mwa kucita phunzilo yapaseka koma soti kupitila m’maphunzilo yatulandila m’gulu ya Mulungu. (2 Tim. 2:15) Kuyangizhyila pa zida za nkhondo, Yehova watipasa soti cinthu ciyakine camphamvu ngako. Kansi n’cotyani?

12. Kansi n’cinji ciyakine catufunikila, ndipo ndaŵa yanji?

¹² Msoja wamene oziŵa luweme kuniata nkhondo, oziŵa kuti anganiatane lini na adani ŵake anyinji payeka, koma ofunikila thandizo ya masoja ayakine. Molingana na izi, tingapambane lini nkhondo yolimbana na Satana pa seo seka, koma tufunika thandizo ya akwasu na azilongosi. Yehova watipasa gulu ya pacalo conse ya “akwasu na azilongosi” kuti atiyavye.​—1 Pet. 2:17.

13. Molingana na Aheberi 10:24, 25, kansi kupezeka pa misonkhano kutipindulisha tyani?

¹³ Njila imozi yatulandilila thandizo ni kupezeka pa misonkhano. (Ŵelengani Aheberi 10:24, 25.) Nthawi ziyakine tufooka. Koma ngati izi zacitika, misonkhano ingatilimbikishe. Tulimbikishiwa ngako na ndemanga zofumila pansi pa mtima zakutwala akwasu na azilongosi. Ndipo nkhani za m’Baibo na visanzo vakutwala vutilimbikisha kupitilizhya kutumikila Yehova. Ndipo makambilano yatunkhala nayo tikaliyoyamba misonkhano koma soti pavuli pake yotilimbikisha ngako. (1 Ates. 5:14) Kuyangizhyila apo, misonkhano yutipasa soti mipata yoyavya ayakine, ndipo izi zuleta cimwemwe. (Mac. 20:35; Aro. 1:11, 12) Misonkhano yotiyavya soti m’njila ziyakine. Yotiyavya kunkhala alaliki na aphunzisi aluso. Mwacisanzo, tuphunzila moseŵenzeshela mwaluso zida zopezeka mu Thuboksi ya Zofalisa Zophunzisila. Tetyo, mukokonzekela luweme misonkhano ya mpingo. Pa misonkhano mukomvwishila mosamala ndipo pavuli pa misonkhano mukoseŵenzesha zamwaphunzila. Mukacita izi, munkhale “msoja muweme wa Khristu Yesu.”​—2 Tim. 2:3.

14. Kansi ni thandizo iyakine yotyani yatili nayo?

¹⁴ Tili soti na thandizo ya angelo amphamvu mamiliyoni anyinji. Ganizilani tyala zaangacite mngelo m’mozi. (Yes. 37:36) Lomba ganizilani zaangakwanishe kucita angelo mamiliyoni anyinji. Paliye munthu olo ciŵanda cingakwanishe kulimbana na gulu ya mphamvu ya Yehova. Yehova ni wamphamvu ngako. Tetyo ngati ali kumbali yasu, nthawi zonse tipitilizhye kunkhala amphamvu kupambana otisusha olo kuti angankhale anyinji tyani. (Ower. 6:16) Nise osimikizhya kuti izi n’zacendi. Mukokumbukila izi m’maganizo  mwanu ngati muyanu wa ku nchito, wa ku sukulu olo wabanja wanu wosakhulupilila wakucitilani vinthu viipa kapena wakulaŵililani vinthu vofookesha. Mukokumbukila kuti muli lini mweka pa nkhondo iyi, koma muli na Yehova.

15. Molingana na Yesaya 54:15, 17, ndaŵa yanji paliye cinthu cingaleshe atumiki a Yehova kulalikila?

¹⁵ Calo ca Satana cili na vifukwa vinyinji votizondela. Tucilikiza lini zandale ndipo tutolamo lini mbali m’nkhondo. Tulalikila za zina ya Yehova noyavya ŵanthu kuziŵa kuti ni Ufumu wa Mulungu tyala wamene ungakwanishe kuleta mtendele. Koma soti tumvwila malamulo ŵake olungama. Tuyavya ŵanthu kuona kuti wolamulila wa calo ici, ni wawenye koma soti ni opaya ŵanthu. (Yoh. 8:44) Tuuzhya ŵanthu kuti lombapano calo ca Satana cionongewe. Ndipo Satana na ŵanthu amene ali ku mbali yake akwanishe lini kulesha nchito yolalikila. M’malomwake, tipitilizhye kutamanda Yehova mulimonse mwatingakwanishile. Olo kuti Satana ali na mphamvu, yove wakangiwa kulesha nchito yolalikila pacalo conse. Izi zili teti cifukwa cakuti Yehova otiyavya notiteteza.​—Ŵelengani Yesaya 54:15, 17.

16. Kansi Yehova akapulumuse tyani ŵanthu ŵake pa cisauso cikulu?

¹⁶ Kansi n’cinji cati cicitike lombapano? Pa cisauso cikulu, Yehova akatipulumuse m’njila ziŵili zodabwisa. Coyamba, akateteze atumiki ŵake okhulupilika pa nthawi yati yove akacitishe mafumu a pacalo kuononga Babulo Mkulu, wamene ni cipembezo cawenye. (Chiv. 17:16-18; 18:2, 4) Pavuli pake akapulumuse ŵanthu ŵake pati akaononge mbali yonse yosala ya calo ca Satana pa Aramagedo.​—Chiv. 7:9, 10; 16:14, 16.

17. Kansi tupindula tyani tikapitilizhya kunkhala okhulupilika kwa Yehova?

¹⁷ Ngati tipitilizhye kunkhala okhulupilika kwa Yehova, Satana angationonge lini. Koma yove niye wati akaonongewe. (Aro. 16:20) Tetyo, vwalani zida zonse za nkhondo nopitilizhya kuziseŵenzesha! Mukopewa kulimbana na Satana na calo cake pa mweo mweka. Koma mukocilikiza akwasu na azilongosi nokonkha malangizo a Yehova. Mukacita izi, munkhale na cidalilo cakuti Ausuwanu acikondi apitilizhye kukutang’ishani nokutetezani.​—Yes. 41:10.