1. Ke ka baka la’ng Jesu a ile a kgopela Jehofa gore a šireletše barutiwa ba gagwe?

BOŠEGONG bja pele ga ge a ka bolawa, Jesu o be a nagana ka mathata ao a bego a tla wela barutiwa ba gagwe. Ka baka la ge Jesu a be a rata barutiwa ba gagwe, o ile a kgopela Tatagwe gore a “ba šireletše ka baka la yo kgopo.” (Joh. 17:14, 15) Jesu o be a tseba gore ka morago ga gore a boele legodimong, Sathane o be a tlo tšwela pele a elwa le motho yo mongwe le yo mongwe yo a nyakago go hlankela Jehofa. Ke ka baka leo re hlokago gore Jehofa a re šireletše.

2. Re ka kgodiša ke eng gore Jehofa o tlo araba dithapelo tša rena?

² Jehofa o ile a araba dithapelo tša Jesu ka gobane o rata Morwa yoo wa gagwe. Le rena ge re ka dira sohle seo re ka se kgonago go kgahliša Jehofa, o tla re rata le go theetša dithapelo tša rena ge re mo kgopela gore a re thuše le go re šireletša. Ka ge Jehofa e le Tate yo a nago le lerato, o tla tšwela pele a hlokomela bana ba gagwe. Ge a ka se dire bjalo, seo se tla senya leina la gagwe!

3. Ke ka baka la’ng lehono re hloka gore Jehofa a re šireletše?

³ Lehono re hloka tšhireletšo ya Jehofa go feta le ge e le neng pele. Ka baka la’ng? Ka gobane Sathane o rakilwe legodimong “a galefile kudu.” (Kut. 12:12) O dirile gore batho ba bangwe ba nagane gore ge ba re tlaiša ba direla “Modimo tirelo e kgethwa.” (Joh. 16:2) Ba bangwe bao ba sa dumelego go Modimo ba re tlaiša ka gobane re sa dire dilo tšeo ba di dirago. Go sa šetšwe gore ke ka baka la eng batho ba re tlaiša, ga re tšhoge. Ke ka baka la’ng re sa tšhoge? Ka gobane Beibele e re: “Morena o a botega, o tla le matlafatša gomme a le šireletša go yo kgopo.” (2 Bathes. 3:3) Jehofa o re šireletša bjang? A re boledišaneng ka ditsela tše pedi tšeo a di dirišago go re šireletša.

4. Go ya ka Baefeso 6:13-17, Jehofa o re file eng go re šireletša?

⁴ Jehofa o re file ditlhamo tše di feletšego tšeo di ka re šireletšago ge Sathane a re hlasela. (Bala Baefeso 6:13-17.) Ditlhamo tše tšeo di tšwago go Modimo di na le matla e bile di a šoma! Eupša re swanetše go diriša e nngwe le e nngwe ya ditlhamo tšeo ge e ba re nyaka gore di re šireletše. Ditlhamo tšeo di swantšhetša’ng? Re tlo boledišana ka e nngwe le e nngwe ya tšona.

5. Lepanta la therešo le emela’ng, gona ke ka baka la’ng re swanetše go itlema ka lona?

⁵ Lepanta la therešo le emela ditherešo tšeo re di hwetšago ka Lentšung la Modimo e lego Beibele. Ke ka baka la’ng re swanetše go itlema ka lepanta leo? Ka gobane Sathane ke “tatago maaka.” (Joh. 8:44) O na le mengwaga e mentši kudu a bolela maaka e bile o ‘timeditše lefase ka moka.’ (Kut. 12:9) Eupša ditherešo tša ka Beibeleng di a re šireletša gore Sathane a se ke a re fora. Re ka itlema bjang ka lepanta la therešo? Re ka itlema ka lona ka go ithuta therešo ka Jehofa gomme ra mo rapela “ka moya le ka therešo” le go itshwara ka go botega dilong tšohle.—Joh. 4:24; Baef. 4:25; Baheb. 13:18.

6. Sephemelasefega sa toko se emela’ng, gona ke ka baka la’ng re swanetše go se apara?

⁶ Sephemelasefega sa toko se emela melao ya Jehofa ya go loka. Ke ka baka la’ng re swanetše go se apara? Ka ge sephemelasefega se be se šireletša pelo ya lešole gore e se ke ya gobala, le sephemelasefega sa toka se šireletša pelo ya rena ya seswantšhetšo gore e se ke ya senywa ke mekgwa ya lefase. (Die. 4:23) Jehofa o nyaka gore re mo rate le go mo hlankela ka pelo ka moka. (Mat. 22:36, 37) Eupša Sathane o leka go re thibela gore re se ke ra hlankela Jehofa ka dipelo tša rena ka moka ka go dira gore re rate dilo tša lefase tšeo Jehofa a di hloilego. (Jak. 4:4; 1 Joh. 2:15, 16) Ge leano leo la gagwe le sa šome, o tla re tlaiša e le gore re dire selo seo se sa kgahlišego Jehofa.

7. Re apara bjang sephemelasefega sa toko?

⁷ Re apara sephemelasefega sa toko ka go kwa melao ya Jehofa ya seo a rego se lokile le seo se fošagetšego le ka go phela ka go dumelelana le melao yeo ya gagwe. (Ps. 97:10) Batho ba bangwe ba ka nagana gore melao ya Jehofa e a re gatelela. Eupša ge re ka tlogela go phela ka melao ya Modimo, re tla be re swana le lešole leo le apolago sephemelasefega sa lona le le ntweng le re se a imela. Bjoo e tla ba e le bošilo bjo bogolo kudu! Ge re rata Jehofa, melao ya gagwe ga ‘e re imele’ eupša e a re hola.—1 Joh. 5:3.

8. Go ra go re’ng go hlama dinao tša rena ka go itokišeletša go bolela ditaba tše dibotse?

⁸ Paulo o ile a re kgothaletša gore re hlame dinao tša rena ka go itokišeletša go bolela ditaba tše dibotse tša khutšo. Se se ra gore re swanetše go dula re ikemišeditše go botša ba bangwe molaetša wa Beibele. Ge re botša ba bangwe molaetša woo, tumelo ya rena e tia le go feta. Go a re kgothatša go bona kamoo bana babo rena le dikgaetšedi lefaseng ka moka ba dirišago sebaka se sengwe le se sengwe seo ba se hwetšago go ruta batho ka Beibele. Ka mohlala, ba ruta batho Beibele ge ba le mošomong, sekolong, ge ba le tšhemong ka ntlo le ntlo, mafelong a kgwebo, ge ba le mabenkeleng, ge ba etetše ba gabo bona bao e sego Dihlatse tša Jehofa goba ba boledišana le batho ba bangwe bao ba ba tlwaetšego. E bile ba bolela le ba bangwe ka Beibele le ge ba sa kgone go tšwa ka gae. Ge re ka tšhoga kudu gomme ra tlogela go bolela ditaba tše dibotse, re tla be re swana le lešole leo le apolago dieta tša lona ge le le ntweng. Dinao tša lona di tla gobala gabonolo. Ke moka ge le gobetše le ka se sa kgona  go itšhireletša ge le hlaselwa e bile le ka se sa kgona go latela ditaelo tšeo le di newago.

9. Ke ka baka la’ng re swanetše go swara kotse e kgolo ya tumelo?

⁹ Kotse e kgolo ya tumelo e emela tumelo yeo re nago le yona go Jehofa. Re a tshepa gore o tla re direla dilo ka moka tšeo a re tshepišitšego tšona. Tumelo ya rena e tla re thuša “go tima mesebe ka moka e tukago ya yo kgopo.” Ke ka baka la’ng re swanetše go swara kotse yeo e kgolo? Ka gobane e re šireletša gore re se ke ra forwa ke dithuto tša maaka tša bahlanogi le gore re se ke ra fela matla ge batho ba bangwe ba re kwera. Ge re se na tumelo re ka se kgone go gana ge batho ba re goketša gore re se sa kwa melao ya Jehofa. Eupša nako e nngwe le e nngwe ge re gana go dira seo Jehofa a sa se ratego ge re le mošomong goba sekolong, tumelo ya rena yeo e swanago le kotse e a re šireletša. (1 Pet. 3:15) Nako e nngwe le e nngwe ge re gana mošomo wo o tla re patelago tšhelete e ntši kudu eupša wo o tlago go re šitiša go hlankela Jehofa, tumelo ya rena yeo e swanago le kotse e a re šireletša. (Baheb. 13:5, 6) E bile nako e nngwe le e nngwe ge re hlankela Jehofa le ge re ganetšwa, tumelo ya rena yeo e swanago le kotse e a re šireletša.—1 Bathes. 2:2.

10. Kefa ya phološo e emela’ng, gona ke ka baka la’ng re swanetše go e rwala?

 ¹⁰ Kefa ya phološo e emela kholofelo yeo Modimo a re neago yona. Ke kholofelo ya gore o tla nea batho ka moka bao ba dirago thato ya gagwe moputso, e bile le ge re ka hlokofala o tla re tsoša. (1 Bathes. 5:8; 1 Tim. 4:10; Tito 1:1, 2) Go no swana le ge kefa e šireletša hlogo ya lešole, le kholofelo ya rena ya gore re tlo phologa e šireletša menagano ya rena. E re šireletša bjang? Kholofelo yeo e dira gore re dule re naganne ka dilo tšeo Jehofa a re tshepišitšego tšona, e bile e re thuša gore re se ke ra nyamišwa kudu ke mathata ao a re welago. Re rwala bjang kefa yeo? Re e rwala ka go dira sohle seo re ka se kgonago gore re bone dilo ka tsela yeo Jehofa a di bonago ka yona. Ka mohlala, ga re holofele mahumo a sa kgonthišegago, eupša re holofela Modimo.—Ps. 26:2; 104:34; 1 Tim. 6:17.

11. Tšhoša ya moya e emela’ng, gona ke ka baka la’ng re swanetše go e diriša?

¹¹ Tšhoša ya moya e emela Lentšu la Modimo e lego Beibele. Tšhoša yeo e na le matla a go utolla maaka a mehuta ka moka le go lokolla batho bokgobeng bja dithuto tša maaka gotee le mekgweng yeo Modimo a e hloilego. (2 Bakor. 10:4, 5; 2 Tim. 3:16, 17; Baheb. 4:12) Re ithuta go diriša tšhoša yeo gabotse ge re ipha nako ya go ithuta Beibele re nnoši le ka tlwaetšo yeo re e hwetšago ka mokgatlong wa Modimo. (2 Tim. 2:15) Go fihla ga bjale re ithutile gore Modimo o diriša ditlhamo tše di feletšego go re šireletša, eupša go na le tsela e nngwe gape yeo a e dirišago go re šireletša. Tsela yeo ke efe?

12. Ke’ng se sengwe gape seo re se hlokago, gona ka baka la’ng?

¹² Lešole leo e lego kgale le eya ntweng, le a tseba gore le ka se fenye mašole a mantši le nnoši, eupša le hloka thušo ya mašole a mangwe. Le rena re ka se kgone go fenya Sathane le batho ba gagwe re nnoši, re hloka thušo ya bana babo rena le dikgaetšedi. Jehofa o re neile ‘mokgatlo wa bana babo rena’ wa lefaseng ka moka gore o kgone go re thuša.—1 Pet. 2:17.

13. Go ya ka Baheberu 10:24, 25, go ba gona dibokeng go re hola bjang?

¹³ Tsela e nngwe yeo re ka hwetšago thekgo ke ka go ya dibokeng. (Bala Baheberu 10:24, 25.) Ka dinako tše dingwe re fela re nyama. Ge re ikwa ka tsela yeo, go ya dibokeng go tla re kgothatša. Re a kgothatšega ge re ekwa dikarabo tšeo di tšwago pelong tša bana babo rena le dikgaetšedi. Dipolelo tšeo di theilwego Beibeleng le dipontšho tša bana babo rena di a re matlafatša le go re kgothaletša go tšwela pele re hlankela Jehofa. Re a kgothatšega ge re boledišana le bona pele le ka morago ga diboka. (1 Bathes. 5:14) E bile go ba gona dibokeng go re fa sebaka sa gore re kgone go thuša ba bangwe, gomme seo se a re thabiša. (Dit. 20:35; Baroma 1:11, 12) Diboka tša rena di re thuša ka ditsela tše dintši. Di re thuša gore re be le bokgoni bja go ruta ba bangwe ka Beibele. Ka mohlala, re ithuta go diriša gabotse dilo tšeo di lego go Teaching Toolbox. Ka baka leo, lokišetša diboka gabotse. Theetša gabotse ka nako ya diboka. Ka morago ga diboka, diriša seo o ithutilego sona. Ka go dira bjalo, o tla ba “mohlabani yo mobotse wa Kriste Jesu.”—2 Tim. 2:3.

14. Ke thušo efe e nngwe gape yeo re nago le yona?

¹⁴ Re hwetša thušo le go barongwa ba matla ba dimilionemilione. Nagana ka seo morongwa o tee feela a kgonago go se dira! (Jes. 37:36) Ka morago ga moo o nagane ka seo barongwa ba bantši ba ka kgonago go se dira. Ga go na motho goba motemona yoo a ka fenyago madira a Jehofa a matla. Jehofa o na le matla kudu. Bjale ge a re thekga re ba matla kudu go feta batho bao ba re ganetšago, go sa šetšwe gore ke ba bantši gakaakang. (Baa. 6:16) Ruri  re kgodišegile gore seo ke nnete! Nagana ka bao ka moka ba ka kgonago go go thuša ge o nyamišitšwe ke seo se ka bolelwago goba sa dirwa ke bao o šomago le bona, bao o tsenago le bona sekolo goba ba geno bao e sego Dihlatse tša Jehofa. Gopola gore Jehofa o go thuša go lwa. O go botša dilo tšeo o swanetšego go di dira.

15. Go ya ka Jesaya 54:15, 17, ke ka baka la’ng go se na motho yo a ka dirago gore batho ba Modimo ba tlogele go bolela ditaba tše dibotse?

¹⁵ Lefase le leo le laolwago ke Sathane le na le mabaka a mantši a go re hloya. Ga re thekge mekgatlo le ge e le efe ya dipolotiki e bile ga re tsenele bošole. Re ruta batho leina la Modimo le gore ke Mmušo wa gagwe feela wo o tlago go dira gore go be le khutšo, e bile re phela ka melao ya gagwe ya go loka. Re bontšha batho gore mmuši wa lefase le ke yo mobe, o bolela maaka e bile ke mmolai. (Joh. 8:44) Le gona re ba botša gore kgauswinyane lefase le la Sathane le tlo fedišwa. Sathane le batho ba gagwe ba ka se tsoge ba kgonne go thibela modiro wa rena wa go bolela ditaba tše dibotse. Go e na le moo, re tla tšwela pele re tumiša Jehofa ka tsela e nngwe le e nngwe yeo re kgonago! Le ge Sathane a na le matla, ga a kgone go thibela gore ditaba tše dibotse di bolelwe lefaseng ka moka. Re kgona go bolela ditaba tšeo tše dibotse ka gobane Jehofa ke yena a re šireletšago.—Bala Jesaya 54:15, 17.

16. Jehofa o tlo direla batho ba gagwe eng nakong ya masetlapelo a magolo?

¹⁶ Go tlo direga’ng nakong e tlago? Nakong ya masetlapelo a magolo, Jehofa o tlo re phološa. Sa mathomo, o tlo phološa bahlanka ba gagwe ba botegago ge a dira gore dikgoši tša lefase di hlasele Babilona o Mogolo, e lego madumedi ka moka a maaka. (Kut. 17:16-18; 18:2, 4) E bile o tlo phološa bahlanka ba gagwe ge a fediša lefase ka moka la Sathane ka Haramagedone.—Kut. 7:9, 10; 16:14, 16.

17. Go dula re na le segwera se sebotse le Jehofa go re hola bjang?

¹⁷ Ge re dula re na le segwera se sebotse le Jehofa, Sathane a ka se kgone go re dira selo. Ke yena a tlago go fedišetšwa sa ruri. (Baroma 16:20) Dula o apere ditlhamo tše di feletšego le go di diriša! O se ke wa leka go lwa le Sathane le batho ba gagwe o nnoši. Thekga bana beno le dikgaetšedi gomme o dire dilo ka moka tšeo Jehofa a go laelago gore o di dire. Ge o ka dira bjalo, o tla kgodišega gore Tatago wa legodimong yo a go ratago o tla go matlafatša le go go šireletša.—Jes. 41:10.