1. Akin et impikasi nen Jesus ya bantayan nen Jehova iray papatumbok to?

DIAD samay labi antis ya ompatey si Jesus, sankanonot to ray problema tan subok ya arapen na saray disipulo to. Inar-aro to ra kanian oniay impikasi tod Ama to: “Bantayan mo ra lapud samay mauges.” (Juan 17:14, 15) Amta nen Jesus ya no sikatoy ompawil lad tawen, agnin siansia ontunday Satanas a Diablo ed pilalaban tod saray lingkor nen Jehova. Kanian kakkaukolan day proteksion To.

2. Akin et makaseguro tayo ya ebatan nen Jehova iray pikakasi tayo?

² Inebatan nen Jehova so pikakasi na Anak to ta inar-aro to. Kanian no gawaen tayo met so anggaay nayarian tayon napaliket si Aman Jehova, ar-aroen to tayo met tan ebatan to ray pikakasi tayo no onkerew tayoy tulong tan proteksion to. Maar-aron Ama si Jehova kanian segurado ya asikasoen to tayo ran ananak to. Ta no paulyanan to tayo, naderal so mismon ngaran odino reputasyon to.

3. Akin et kakkaukolan tayoy proteksion nen Jehova natan?

³ Talagan kakkaukolan tayoy proteksion nen Jehova. Akin ey? On ta nibantak lay Satanas diad dalin tan “agaylay pasnok to.” (Apo. 12:12) Susugsogan to iramay mamapairap ed sikatayo kanian iisipen da ni ingen ya say gagawaen da et “sagradon panaglingkor ed Dios.” (Juan 16:2) Say arum ya mamapairap ed sikatayo et agmanisia ed Dios tan kabusol da tayo lapud duma tayo ed sikara. Pero anggapoy nepeg tayon takotan ta ibabaga na Biblia: “Matoor so Katawan, tan pabiskegen to kayo tan protektaan to kayo ed samay mauges.” (2 Tes. 3:3) Panon itayon proprotektaan nen Jehova? Pantongtongan tayo so duaran paraan.

4. Base ed Efeso 6:13-17, antoy inter nen Jehova pian naprotektaan itayo?

⁴ Inikdan itayo nen Jehova na kompleton armas ya manprotekta ed sikatayo diad iyataki nen Satanas. (Basaen so Efeso 6:13-17.) Matibay iyan espiritual ya armas! Balet naprotektaan tayo labat no amin ya parte na satan et akasulong ed sikatayo tan agtayon balot ekalen. Antoy isisimbolo na kada parte? Sansakeyen tayon aralen iratan.

5. Anto so balkes na katuaan, tan akin et importante ya ibalkes tayo itan?

⁵ Say balkes na katuaan et isisimbolo to ray katuaan ya walad Salita na Dios, say Biblia. Akin et importantin ibalkes tayo itan? On ta si Satanas et “ama na tila.” (Juan 8:44) Eksperton mantila si Satanas ta nilibon taon to la itan ya gagawaen. Anggad natan et ibabalang toy “interon mundo”! (Apo. 12:9) Pero no kabisado tayo ray katuaan ed Biblia, agto tayo nibalang. Panon tayo sirin ya nisulong iyan simbolikon balkes? Nepeg ya aralen tayo ray katuaan tungkol ed si Jehova, mandayew tayod sikato “diad espiritu tan katuaan,” tan matua tayo ed amin ya gagawaen tayo.—Juan 4:24; Efe. 4:25; Heb. 13:18.

6. Anto so samben na inkatunong, tan akin et importantin isulong tayo itan?

⁶ Say samben na inkatunong et isisimbolo to ray matunong ya estandarte nen Jehova. Akin et importantin isulong tayo itan? No panon ya proprotektaan na samben so literal ya puso na sundalo, say samben na inkatunong et proprotektaan toy simbolikon puso odino say inkatoo tayo pian ag-itayo naimpluensyaan na sayan mauges ya mundo. (Pro. 4:23) Say aawaten labat nen Jehova et interon-puson panaglingkor tan panangaro. (Mat. 22:36, 37) Kanian manggagaway paraan si Satanas pian napaldua so puso tayo. Uusaren to ray iyoopresi na sayan mundo pian aroen tayo iray kabusol nen Jehova. (Sant. 4:4; 1 Juan 2:15, 16) Pero no agto tayo nin siansia natukso, taktakoten tan pairapen to tayo pian agtayo la unoren si Jehova.

7. Panon tayon nisulong so samben na inkatunong?

⁷ Akasulong ed sikatayo so samben na inkatunong no uunoren tayo ray estandarte nen Jehova ed no antoy duga tan aliwa. (Sal. 97:10) Iisipen balet na arum ya masyadon istrikto si Aman Jehova. Pero tandaan, no agtayo iyaplika iray prinsipyo ed Biblia, singa tayo sundalo ya anta peles na laban et inekal toy samben to ta nabebelatan kuno. Palpalaran ya sundalo! No inaro tayoy Jehova, agtayo ipapasen ya “makapabelat” iray ganggan to, noagta ipasen tayo ya proteksion iratan.—1 Juan 5:3.

8. Antoy nepeg tayon gawaen pian nibagan say sali tayo et akasandalyas?

⁸ Insulat met nen Pablo ya importantin saray sali tayo et akasandalyas pian akaparaan tayon mangiyabawag na maong a balita na kareenan. Labay ton ibaga, nepeg ya akaparaan tayon lanang ya ipulong so maong a balita na Panarian. No ipupulong tayo so mensahe na Biblia, ombiskeg so mismon pananisia tayo. Makapaliket ya naamtaan ya saray lingkor nen Jehova ed interon mundo et sasamboten day amin ya pankanawnawan ipulong so maong a balita—diad trabaho, eskuelaan, lugar na negosyo, kaabungan, tan no mititindaan o mansho-shopping ira, no ompapasyar irad saray kakanayon dan aliwan Tasi, no kaistoryaan da ray kabat da, tan anggan sano ag-ira makaalis ed abung da. No manpatalo tayod takot tan ontunda tayo lan manpulong, singa tayo sundalo ya anta peles na laban et inekal toy sandalyas to! Matmainomay  laingen ya nasugatan so sali to, nairapan lan milaban, tan agto la natumbok so ganggan na komander to.

9. Akin et importante ya awi-awit tayoy baleg a samper na pananisia?

⁹ Say baleg a samper na pananisia et isisimbolo toy pananisia tayo ed si Jehova. Kombinsido tayo ya tooren toy amin ya sipan to. Say ontan ya klase na pananisia so ontulong pian ‘naerep tayoy amin a mandarlang a pana na samay mauges.’ Akin et importante ya awi-awit tayo iyan baleg a samper? On ta atan so manprotekta ed sikatayo pian ag-itayo naimpluensyaan na bangat na saray apostata tan ag-itayo nataktakot na saray mamabalaw ed sikatayo. No anggapoy pananisia tayo, ombigay tayon tampol no tuksoen odino kombinsien itayo na arum ya ag-unoren si Jehova. Pero no awi-awit tayoy baleg a samper tayo, sarasarag tayon idepensa iray papanisiaan tayo no wala tayod trabaho o diad eskuelaan. (1 Ped. 3:15) No awi-awit tayoy baleg a samper tayo, agtayo awaten so trabaho ya amta tayon apektoen toy panagdayew tayod si Jehova. (Heb. 13:5, 6) Tan no awi-awit tayoy baleg a samper tayo, manmatoor tayod si Jehova anggano pairapen tan busolen itayo na arum.—1 Tes. 2:2.

10. Anto so hilmit na kililiktar, tan akin et importante ya isulong tayo itan?

 ¹⁰ Say hilmit na kililiktar et isisimbolo toy ilalo ya inter nen Jehova—say ilalo ya iliktar to tayod patey tan ikdan to tayo na premyo no gawaen tayoy panlabayan to. (1 Tes. 5:8; 1 Tim. 4:10; Tito 1:1, 2) No panon ya proprotektaan na literal ya hilmit so ulo na sundalo, proprotektaan na ilalo tayo so panagnonot tayo. Akin et nibaga tayo itan? On ta no malinlinew ed nonot tayo iray sipan na Dios, agtayo onsuko anggano wala ray problema. Panon tayon nisulong iyan hilmit? Nepeg tayon seguroen ya say panagnonot tayo et mipara ed panagnonot na Dios. Singa bilang, bibilinen itayo na Biblia ya aliwan saray materyal ya kayamanan so panilaloan tayo, noagta si Jehova.—Sal. 26:2; 104:34; 1 Tim. 6:17.

11. Anto so espada na masanton espiritu, tan akin et importante ya usaren tayo itan?

¹¹ Say espada na masanton espiritu et isisimbolo toy Salita na Dios, say Biblia. Makmakdem tan makapanyari iyan espada, kanian sarag to tayon ibulos ed saray palson bangat tan pakiwasen to tayon itunda iray mauges ya kagagawa. (2 Cor. 10:4, 5; 2 Tim. 3:16, 17; Heb. 4:12) Nakabisado tayon usaren iyan espada no manpi-personal study tayo tan no iyaplika tayo iray panangipasal ya manlalapud organisasyon na Dios. (2 Tim. 2:15) Likud ed kompleton armas, wala ni inter nen Jehova pian naprotektaan itayo. Anto itan?

12. Anto ni kaukolan tayo, tan akin?

¹² Anggano marundunong ya milaban so sakey a sundalo, imposiblin natalo toy dakdakel ya kalaban no bukbukor to labat. Kaukolan toy tulong na saray kapara ton sundalo. Ontan met so situasyon tayo natan. Agtayo sarag ya taloen si Satanas tan saray dakdakel ya alipores to no bukbukor tayo; kaukolan tayoy tulong na agagi. Uusaren nen Jehova irayan minilyon ya sundalo ed interon mundo pian ontulong ed espiritual ya pilalaban tayo.—1 Ped. 2:17.

13. Base ed Hebreo 10:24, 25, antoy nitutulong ed sikatayo na saray aral?

¹³ Say sakey a paraan ya natulongan itayo na agagi et no miaral tayo. (Basaen so Hebreo 10:24, 25.) No bilang ta nadidismaya tan onkakapuy tayo, ombiskeg so liknaan tayo diad saray aral. Napapaseseg tayo ed saray impapuson komento na saray agagi tan ombibiskeg so determinasyon tayon manmatoor ed si Jehova diad saray paliwawa tan demonstrasyon ya nibase ed Biblia. Napapaseseg itayo met diad piistoryaan tayod saray agagi antis tan kayari na aral. (1 Tes. 5:14) Tan no pasesegen tayo met iray agagi, naaruman so liket tayo. (Gawa 20:35; Roma 1:11, 12) Diad saray aral et nipapasal itayo met pian magmaliw tayon mas epektibo ed panagpulong tan panangiyaral na Biblia. Singa bilang, nanaaralan tayo no panon so dugan pangusar ed saray publikasyon ya walad Uusaren ed Panagbangat (Teaching Toolbox). Kanian manparaan kan maong parad saray aral. Legan na aral, dengel kan maong. Tan iyaplikam iray nanaaralan mo. No ontan so gawaen mo, magmaliw kan “maong a sundalo nen Kristo Jesus.”—2 Tim. 2:3.

14. Siopa ni ray ontutulong ed sikatayo?

¹⁴ Tutulongan itayo met na minilyon ya makapanyari iran anghel. Isip mo pay nagawaan na anggan sakey labat ya anghel. (Isa. 37:36) No say sakey ya anghel et makapanyari la, panon to ni kasi no sakey la ran armada? Anggan anto ni tay gawaen na sakey a too o demonyo, agbalot manalo ed makapanyarin armada nen Jehova. Si Jehova so Makapanyarin-amin, kanian no kaiba tayoy Jehova, seguradon manalo tayo anggano dakdakel ni tay  kalaban! (Ukom 6:16) Nonot mon lanang itan pian agka ontakot anggan anto ni tay ibaga o gawaen na katrabahom, kaklasem, odino kanayon mon aliwan Tasi. Tandaan, agmo bukbukor ed sayan laban. Seguradon tulongan ka nen Jehova ta tutumboken moy panangigiya to.

15. Base ed Isaias 54:15, 17, akin et anggapon balot so makapanpatunda ed sikatayon manpulong?

¹⁵ Dakdakel so rason no akin ya kabusol itayon maong na sayan mundo nen Satanas. Agtayon balot mibabali ed politika tan agtayo mansusundalo. Ipupulong tayoy ngaran na Dios, ipapaamta tayod totoo ya say Panarian to labat so mangiter na deen ed interon mundo, tan uunoren tayo ray matunong ya estandarte to. Ipapaamta tayod totoo ya say manuuley ed sayan mundo et matila tan sankaugesan ya managpatey! (Juan 8:44) Tan ipupulong tayo ya asingsingger lan naderal iyan mundo nen Satanas. Sasalien nen Satanas tan saray alipores to ya patundaen itayon manpulong pero agda tayo napatunda. Lalo tayo ni ingen ya mamapasya ed panagpulong ta labay tayon nirayew si Jehova! Anggano walay pakayari nen Satanas, agton balot napatunda so panagpulong ed interon mundo. Prueba itan ya proprotektaan itayo nen Jehova.—Basaen so Isaias 54:15, 17.

16. Panon ya protektaan nen Jehova iray lingkor to legan na baleg a kairapan?

¹⁶ Antoy asingger lan nagawa? Diad duaran parte na baleg a kairapan, protektaan itayo nen Jehova. Unona, protektaan to iray matoor ya lingkor to no deralen la na saray arari ed interon mundo so Makapanyarin Babilonia odino empiryo na palson relihyon. (Apo. 17:16-18; 18:2, 4) Komadua, protektaan to ray lingkor to diad Armagedon no deralen to la iray akeran kabiangan na mundo nen Satanas.—Apo. 7:9, 10; 16:14, 16.

17. Akin et importante ya mansiansia tayon maapit ed si Jehova?

¹⁷ No mansiansia tayon maapit ed si Aman Jehova, anggapon balot so nagawaan nen Satanas ya pansengegan na permanentin kaderal tayo. Diad tua, sikato so naderal! (Roma 16:20) Kanian isulong mo so kompleton armas ya inter nen Jehova tan agmon balot eekalen! Agka milalaban ya bukor. Patulongan kad saray agagi tan tulongan mo met ira. Tan tumbok moy panangigiya nen Jehova. No ontan so gawaen mo, makapanmatalek ka ya pabiskegen tan protektaan ka na maar-aron Ama tayo, si Jehova.—Isa. 41:10.