1. Dikon Hesus a pidi Yehova pa protehá su disipelnan?

E ÚLTIMO anochi ku Hesus tabata aki riba tera komo hende, e tabata pensa riba e retonan ku su disipelnan lo a haña nan kuné. Debí ku e tabata stima nan, el a pidi su Tata pa “protehá nan pa motibu di e Malbado.” (Huan 17:14, 15) Hesus tabata sa ku ora e bai bèk shelu, Satanas e Diabel lo a sigui lucha kontra esnan ku ke sirbi Yehova. Pues anto, Yehova su sirbidónan mester di protekshon.

2. Dikon nos por tin sigur ku Yehova lo kontestá nos orashonnan?

² Yehova a kontestá e orashon di su Yu, Hesus, pasobra e tabata stim’é. Si nos hasi esfuerso pa agradá Yehova, lo e stima nos tambe i lo e kontestá nos ora nos pidié yudansa i protekshon. Yehova ta un Tata ku ta stima su yunan, pues lo e sigui kuida nos. Si e no hasi esei, lo e daña su nòmber i reputashon.

3. Dikon nos mester di Yehova su protekshon?

³ Awor mas ku nunka nos mester di Yehova su protekshon. Satanas a ser bentá for di shelu, i e ta “yen di rabia.” (Rev. 12:12 ) El a logra konvensé algun hende ku ora nan ta persiguí nos, nan ta rindiendo “sirbishi sagrado na Dios.” (Huan 16:2) Otronan, ku no ta kere den Dios, ta persiguí nos pasobra nos ta diferente for di hende den mundu. Sea kual sea e kaso, nos no tin miedu. Dikon nò? Pasobra Beibel ta bisa: “Señor ta fiel na su palabra, i lo e fortalesé boso i protehá boso di e Malbado.” (2 Tes. 3:3) Laga nos wak dos manera ku Yehova ta protehá nos.

4. Segun Efesionan 6:13-17, kiko Yehova ta duna nos pa protehá nos?

⁴ Yehova ta duna nos un armadura spiritual ku ta protehá nos kontra e atakenan di Satanas. (Lesa Efesionan 6:13-17.) E armadura ei ta fuerte i útil! Pero, lo e protehá nos solamente si nos tin tur parti di dje bistí—sin kita niun. Kiko kada parti ta representá? Laga nos ban wak.

5. Kiko e faha di e bèrdat ta, i dikon nos mester bistié?

⁵ E faha di e bèrdat ta representá e bèrdatnan den Beibel. Dikon nos mester bisti e faha ei? Pa asina nos ser protehá for di Satanas, kende ta “e tata di mentira.” (Huan 8:44) Pa míles di aña e ta un gañadó i a logra “gaña henter e tera habitá.” (Rev. 12:9) Pero, e bèrdatnan ku tin den Beibel ta protehá nos di Satanas su mentiranan. Den ki sentido nos ta bisti e faha ei? Esei ta ora nos ta siña e bèrdat tokante Yehova, ador’é “ku spiritu i ku bèrdat” i komportá nos mes na un manera onesto den tur kos.—Huan 4:24; Efe. 4:25; Heb. 13:18.

6. Kiko e harnas di hustisia ta, i dikon nos mester bistié?

⁶ E harnas di hustisia ta representá Yehova su normanan hustu. Dikon nos mester bistié? Un harnas ta protehá kurason di un sòldá. Di mes manera, e harnas di hustisia ta protehá nos kurason, esta, e persona ku nos ta di paden, for di e influensianan malbado di e mundu. (Pro. 4:23) Yehova ta ferwagt ku nos ta stim’é i sirbié ku henter nos kurason. (Mat. 22:36, 37) P’esei, Satanas ta purba di dividí nos kurason lagando nos stima e kosnan ku tin den mundu—nèt e kosnan ku Yehova ta odia. (Sant. 4:4; 1 Huan 2:15, 16) Anto si e no logra ku esei, lo e purba di preshoná nos pa hasi algu ku no ta agradá Yehova.

7. Den ki sentido nos ta bisti e harnas di hustisia?

⁷ Nos ta bisti e harnas di hustisia ora nos ta obedesé Yehova su normanan di loke ta bon i malu. (Sal. 97:10) Algun hende ta pensa ku e normanan ei ta kita nan libertat. Pero si nos stòp di apliká e prinsipionan di Beibel den nos bida, nos lo ta manera un sòldá ku ta kita su harnas meimei di bataya pasobra segun e, su harnas ta muchu pisá. Esei lo ta hopi bobo! Esnan ku ta stima Yehova no ta pensa ku su mandamentunan ta pisá, pero ku nan ta salba nan bida.—1 Huan 5:3.

8. Kiko ke men tin nos pia bistí ku e sandalia pa prediká e bon notisia di pas?

⁸ Pablo ta animá nos tambe pa nos tin nos pia bistí ku e sandalia pa prediká e bon notisia di pas. Ku otro palabra, semper nos mester ta prepará pa prediká e bon notisia di Reino. Ora nos papia ku otro hende tokante e mensahe ei, nos fe ta bira mas fuerte. I ta dushi pa mira kon Yehova su pueblo rònt mundu ta probechá di tur oportunidat pa prediká. Por ehèmpel, nan ta prediká na trabou, na skol, di kas pa kas, den teritorio di negoshi, ora nan ta hasi kompra, bishitá famianan ku no ta Testigu òf kòmbersá ku konosínan i asta ora nan no por sali for di kas pa un tempu. Pero si nos stòp di prediká debí ku nos tin miedu, nos ta manera un sòldá ku ta kita su sandalia meimei di bataya. Sin  su sandalia bistí, fásilmente e por heridá su pia. Anto ku su pia heridá, lo ta difísil p’e defendé su mes ora e ser ataká. Tampoko lo e no por sigui òrdu di su komandante.

9. Dikon nos mester karga e eskudo grandi di fe?

⁹ E eskudo grandi di fe ta representá e fe ku nos tin den Yehova. Nos tin sigur ku lo e kumpli ku tur su promesanan. Fe ta yuda nos “paga tur e flechanan sendí di e Malbado.” Dikon nos mester karga e eskudo grandi ei? Pasobra e ta protehá nos ya asina e siñansanan apóstata no ta engañá nos i nos no ta desanimá ora hende kritiká nos kreensianan. Sin fe nos lo no tin forsa pa obedesé Yehova ora hende ta pone preshon riba nos pa desobedes’é. Pero, kada bes ku nos nenga di hasi algu ku Yehova no ta gusta, sea ta na trabou òf na skol, nos tin nos eskudo di fe tené. (1 Ped. 3:15) Kada biaha ku nos nenga un trabou ku tin mihó pago pero ku ta stroba nos di duna Yehova lo mihó, nos tin nos eskudo di fe tené. (Heb. 13:5, 6) Anto kada biaha ku nos sirbi Yehova apesar di oposishon, nos tin nos eskudo di fe tené.—1 Tes. 2:2.

10. Kiko e hèlm di salbashon ta, i dikon nos mester bistié?

 ¹⁰ E hèlm di salbashon ta e speransa ku Yehova ta duna nos—e speransa ku lo e rekompensá tur esnan ku ta hasi su boluntat. Asta si nos muri, lo e resusitá nos. (1 Tes. 5:8; 1 Tim. 4:10; Tito 1:1, 2) Meskos ku un hèlm ta protehá kabes di un sòldá, e speransa di salbashon ta protehá nos kapasidat di pensa. Kon asina? E ta yuda nos keda enfoká riba Yehova su promesanan i ta yuda nos pa no ansha di mas tokante nos problemanan. Den ki sentido nos ta bisti e hèlm ei? Esei ta ora nos pensamentu ta di akuerdo ku Yehova su pensamentu. Por ehèmpel, nos ta pone nos speransa, no den rikesa insigur, sino den Dios.—Sal. 26:2; 104:34; 1 Tim. 6:17.

11. Kiko e spada di spiritu ta, i dikon nos mester us’é?

¹¹ E spada di spiritu ta e Palabra di Dios, Beibel. E spada ei tin poder pa saka na kla kualke mentira i libra hende for di siñansanan falsu i mal hábito. (2 Kor. 10:4, 5; 2 Tim. 3:16, 17; Heb. 4:12) Nos ta siña kon pa usa e spada ei mediante estudio personal i e entrenamentu ku nos ta haña for di Dios su organisashon. (2 Tim. 2:15) Aparte di e armadura, tin mas manera ku Yehova ta protehá nos.

12. Kiko mas nos mester, i dikon?

¹² Un sòldá ku eksperensia sa ku e so no por gana un ehérsito grandi; e mester di yudansa di su kompañeronan. Di mes manera, nos so no por gana e lucha kontra Satanas i su kompinchinan; nos mester di yudansa di nos rumannan. Yehova a duna nos un hermandat mundial ku t’ei kla pa yuda nos.—1 Ped. 2:17.

13. Segun Hebreonan 10:24 i 25, kon nos reunionnan ta yuda nos?

¹³ Un manera ku nos ta haña yudansa ta ora nos bai nos reunionnan. (Lesa Hebreonan 10:24, 25.) Ratu ratu nos tur sa sinti nos desanimá, pero ora nos bai reunion, nos ta sinti nos bon. E bunita komentarionan di nos rumannan ta animá nos, i e diskurso- i demostrashonnan basá riba Beibel ta motivá nos pa sigui sirbi Yehova. I e kòmbersashonnan ku nos tin promé i despues di reunion tambe ta animá nos. (1 Tes. 5:14) Ademas, nos reunionnan ta duna nos oportunidat di sinti e goso di yuda otro rumannan. (Echo. 20:35; Rom. 1:11, 12) Pero, nos reunionnan ta yuda nos ku otro kosnan tambe. Einan nos ta siña kon pa bira mihó predikadó i maestro di e bon notisia. Por ehèmpel, nos ta siña usa e publikashonnan den nos Kaha di Hèrmènt pa Siña Hende e Bèrdat. P’esei, prepará bon pa e reunion, skucha ku atenshon i despues apliká loke bo a siña. Ora bo hasi esei, bo ta bira “un bon sòldá di Kristu Hesus.”—2 Tim. 2:3.

14. Ki otro yudansa nos por konta kuné?

¹⁴ Nos tin tambe yudansa di miónes di angel poderoso. Nos sa kiko ún solo angel a hasi! (Isa. 37:36) Awor, imaginá kiko henter un ehérsito di nan por hasi. Niun hende, ni demoño, no por gana Yehova su ehérsito poderoso. Un hende a yega di bisa ku asta si por parse ku bo ta bo so, tanten bo tin Yehova boso ta e mayoria. (Hues. 6:16) Anto esei ta bèrdat! Keda kòrda esei ora un kolega, un kompañero di klas òf un famia ku no ta Testigu bisa òf hasi algu ku por  desanimá bo. Kòrda ku bo no ta bo so. Tanten ku bo ta sigui Yehova su instrukshonnan, bo por konta ku su yudansa.

15. Segun Isaías 54:15 i 17, dikon nada no por stòp nos di prediká?

¹⁵ Satanas i e mundu bou di su kontrol tin hopi motibu pa odia nos. Nos no ta mete den asuntunan polítiko ni ta bai guera. Nos ta siña hende tokante e nòmber di Dios, prediká ku su Reino so lo trese pas i obedesé su normanan hustu. Nos ta saka na kla ku e gobernante di e mundu akí ta un mentiroso di marka mayor i un asesino sin eskrúpulo. (Huan 8:44) Anto nos ta prediká ku destrukshon di Satanas su mundu ta hopi serka. Pero, nunka Satanas i su kompinchinan no por stòp nos di prediká. Al kontrario, nos ta sigui alabá Yehova na tur manera ku nos por. Nos sa ku Satanas ta poderoso, pero e no por stroba e mensahe di Reino yega na hende rònt mundu. Nos por hasi tur esakinan pasobra Yehova ta protehá nos!—Lesa Isaías 54:15, 17.

16. Kon Yehova lo salba nos durante e tribulashon grandi?

¹⁶ Kiko ta spera nos? Durante e tribulashon grandi, Yehova lo salba nos dos biaha. Promé, ora e pone e reinan di tera destruí Babilonia e Grandi, ku ta representá tur religion falsu. (Rev. 17:16-18; 18:2, 4) Di dos, lo e salba nos ora ku e destruí e sobrá di Satanas su mundu na Armagedon.—Rev. 7:9, 10; 16:14, 16.

17. Dikon ta importante pa nos keda serka Yehova?

¹⁷ Si nos keda serka Yehova, Satanas no por kousa nos niun daño ireparabel. Pero, e bèrdat ta ku ta é lo sufri un daño ireparabel; ta é lo ser destruí pa semper. (Rom. 16:20) Pues, bisti bo armadura—i no kit’é! No purba di lucha bo so. Yuda bo rumannan. I sigui e instrukshonnan ku Yehova ta duna. Si bo hasi esei, lo bo por tin sigur ku bo Tata selestial ku stima bo ta fortalesé i protehá bo.—Isa. 41:10.