1. Soske o Isus molingja e Jehova te arakhel leskere učenikon?

KI POSLEDNO rat taro plo životo ki Phuv, o Isus razmislingja bašo sa o predizvikija so ka oven leskere učenikon. Adaleske so manglja ple učenikon, ov molingja ple Dade te arakhel len taro o Lošno (Jovan 17:14, 15). O Isus džanlja kaj otkeda ka iranel pe ko nebo, o Satana o Beng ponadari da ka borinel pe protiv sa okola so mangena te služinen e Jehovaske. Jasno tano kaj e Jehovaskoro narodo valjani sine te ovel zaštitimo.

2. Soske šaj te ova sigurna kaj o Jehova ka odgovorinel ko amare molitve?

² O Jehova odgovoringja ki e Isuseskiri molitva adaleske so mangela sine ple Čhave. Keda daja amendar sa te kera e Jehovaskiri volja, ov amen da ka mangel hem ka odgovorinel ko amare molitve keda rodaja lestar pomoš hem zaštita. O Jehova tano jekh ljubezno Dad hem adaleske ponadari da ka grižinel pe ple čhavenge. Ako na kerela agjaar, adava nane te anel čest leskere anaveske, ili ka ruminel leskoro ugled.

3. Soske avdive valjani amenge e Jehovaskiri zaštita?

³ Amenge valjani e Jehovaskiri zaštita sar nikogaš angleder. Adaleske so o Satana sine frdimo taro nebo, ov „but tano holjamo“ (Otk. 12:12). Ov kergja nesave manuša te mislinen kaj služinena e Devleske keda progoninena amen (Jovan 16:2). A javera, kola so na verujnena ko Devel, progoninena amen adaleske so siem porazlična taro manuša ko sveto. Bizi razlika soske progoninena amen o manuša, amen na valjani te dara. Soske? Adaleske so e Devleskoro Lafi vakerela: „O Gospodari tano verno hem ov ka del tumen sila hem ka zaštitinel tumen taro okova soj Lošno“ (2. Sol. 3:3). Sar zaštitinela amen o Jehova? Te dikha duj načinija sar kerela adava.

4. Sprema Efešanite 6:13-17, so dengja amen o Jehova te šaj te zaštitinel amen?

⁴ O Jehova dengja amen jekh voeno oprema koja so šaj te zaštitinel amen taro e Satanaskere napadija. (Čitin Efešanite 6:13-17.) Akaja duhovno voeno oprema šaj celosno te zaštitinel amen. Ama, ka zaštitinel amen samo ako ponadari da uravaja sekova delo tari oprema. Te dikha so pretstavinela sekova delo tari adaja oprema.

5. Soj tano o pojas e čačipaskoro, hem soske valjani te phirava le?

⁵ O pojas e čačipaskoro pretstavinela o čačipa so arakhljovena ko e Devleskoro Lafi, ki Biblija. Soske valjani te phanda amen adava pojas? Te šaj te zaštitina amen taro Satana kova soj tano „o dad e hovajbaskoro“ (Jovan 8:44). Ov više milje berša hovavela hem „zavedinela celo sveto“ (Otk. 12:9). Ama, o čačipa so arakhljovena ki Biblija zaštitinena amen hem na mukhena te ova zavedime. Sar phiravaja adava simbolično pojas? Amen keraja adava agjaar so sikljovaja o čačipa bašo Jehova, agjaar so obožavinaja le duhoja hem čačipaja hem agjaar so mangaja ko sa te ova poštena (Jovan 4:24; Ef. 4:25; Evr. 13:18).

6. Soj tano o oklop tari pravednost, hem soske valjani te urava le?

⁶ O oklop tari pravednost pretstavinela e Jehovaskere pravedna merilija. Soske valjani te čhiva amenge ko kolin akava oklop? Isto sar so jekh oklop zaštitinela e vojnikoskoro doslovno vilo, agjaar o oklop tari pravednost zaštitinela amaro simbolično vilo taro lošno vlijanie akale lošno svetoskoro (Izr. 4:23). O Jehova očekujnela amendar te manga le hem te služina leske celo vilea (Mat. 22:36, 37). Adaleske o Satana probinela te čhinavel amen te kera adava agjaar so kerela te manga o bukja taro leskoro sveto — bukja so o Jehova mrzinela len (Jak. 4:4; 1. Jov. 2:15, 16). Hem ako adaja taktika na uspejnela, tegani ka koristinel progonstvo te šaj silaja te čhivel amen te kera nešto so na mangela o Jehova.

7. Sar uravaja o oklop tari pravednost?

⁷ Amen uravaja o oklop tari pravednost agjaar so prifatinaja e Jehovaskere merilija bašo adava soj tano ispravno, a soj pogrešno, hem agjaar so živinaja sprema adala merilija (Ps. 97:10). Nesave šaj mislinena kaj e Jehovaskere merilija ograničinena amari sloboda. Ama, ako čhinavaja te primenina o bibliska načelija ko amaro životo, tegani ka ova sar jekh vojniko kova so ki sred vojna ikalela plo oklop adaleske so mislinela kaj tano pharo. Kobor nerazumno bi ovela sine adava! Ako mangaja e Jehova, tegani leskere zapovedija nane te oven amenge phare, nego ka spasinen amaro životo (1. Jov. 5:3).

8. So značinena o lafija „uraven ko pre i spremnost te propovedina o šukar haberi“?

⁸ O Pavle isto agjaar pottikninela amen te urava ko pre i spremnost te propovedina o šukar haberi bašo mir. Adava značinela kaj valjani sekogaš te ova spremna te propovedina o šukar haberi bašo Carstvo. Keda vakeraja e javerenge baši biblisko poraka, tegani amari vera ovela pozorali. Amen siem ohrabrime keda dikhaja sar e Jehovaskoro narodo ki celo Phuv koristinela sekoja prilika te propovedinel. Na primer, ola propovedinena ki buti ili ki škola, keda džana taro kher ko kher ili ko delovna podračja, keda džana te pazarinen, keda džana te posetinen nekas tari familija so nane svedoko, ili keda kerena lafi nekasaja so pendžarena pe, pa čak keda našti te ikljoven kheraldan taro nesave pričine. Ako tari dar čhinavaja te svedočina, tegani ka ova sar jekh vojniko kova so ki vojna ikalela  ple sandale. Agjaar, lokheste bi povredinela sine ple pre hem ka ovel leske popharo te braninel pe keda o javera ka napadinen le. Isto agjaar, ka našti te ovel poslušno ko naredbe taro plo zapovedniko.

9. Soske valjani te phirava o baro štiti e verakoro?

⁹ O baro štiti e verakoro pretstavinela i vera so isi amen ko Jehova. Amen verujnaja kaj ov ka ispolninel sa ple vetuvanja. Adaja vera ka pomožinel amenge te ačhava sa o jagale strele e Lošnoskere. Soske valjani te phirava adava baro štiti? Adaleske so ov zaštitinela amen te šaj te na ova zavedime taro sikljojba e otpadnikongoro hem te na ova obeshrabrime keda o manuša kritikujnena amari vera. Bizi vera nane te ovel amen i sila te ova poslušna e Jehovaske keda o javera kerena amenge pritisok te na šuna le. Tari javer strana, sekova puti keda odbinaja te kera nešto so na mangela o Jehova, ki buti ili ki škola, sikavaja kaj phiraja amaro štiti (1. Pet. 3:15). Isto agjaar, sekova puti keda odbinaja šukar platimi buti koja so sprečinela amen te da amaro najšukar ki služba e Jehovaske, sikavaja kaj phiravaja amaro štiti (Evr. 13:5, 6). Hem sekova puti keda služinaja e Jehovaske iako isi amen protivibe, sikavaja kaj amari vera zaštitinela amen (1. Sol. 2:2).

10. Soj tano o šlemi e spasibaskoro, hem soske mora te phirava le?

 ¹⁰ O šlemi e spasibaskoro pretstavinela i nadež so dela amen o Jehova — i nadež kaj ov ka nagradinel sa okolen so kerena leskiri volja hem kaj čak ako meraja ov ka voskresninel amen (1. Sol. 5:8; 1. Tim. 4:10; Tit 1:1, 2). Isto sar o šlemi so zaštitinela sine e vojnikoskoro šero, i nadež bašo spasenie zaštitinela amare misle. Sar kerela adava? Adaja nadež pomožinela amenge te koncentririna amen ko e Devleskere vetuvanja hem te na obeshrabrina amen taro amare problemija. Sar phiravaja adava šlemi? Amen keraja adava agjaar so trudinaja amen amare misle te oven ko sklad e Devleskere mislencar. Na primer, amen na nadinaja amen ko barvalipe so nane sigurno, nego nadinaja amen ko Devel (Ps. 26:2; 104:34; 1. Tim. 6:17).

11. Soj tano o mači e duhoskoro, hem soske valjani te koristina le?

¹¹ O mači e duhoskoro pretstavinela e Devleskoro Lafi, i Biblija. Adava mači isi le mokj te čhinel taro koreno sa o hovajba hem te oslobodinel e manušen taro hovavne sikljojba hem o štetna navike (2. Kor. 10:4, 5; 2. Tim. 3:16, 17; Evr. 4:12). Amen sikljovaja šukar te koristina adava mači preku amaro lično proučibe hem preku i obuka so dobinaja la tari e Jehovaskiri organizacija (2. Tim. 2:15). Osven so dela amen i duhovno voeno oprema, o Jehova zaštitinela amen ko javer da mokjno način. Sar kerela adava?

12. So javer da valjani amenge, hem soske?

¹² Jekh iskusno vojniko džanela kaj našti korkori uspešno te borinel pe protiv jekh bari vojska. Valjani leske pomoš taro javera vojnikija. Slično agjaar, amen da našti korkori uspešno te borina amen protiv o Satana hem leskere sledbenikija. Adaleske valjani amenge i pomoš taro amare phralja hem phenja. O Jehova dengja amen ko celo sveto milionja phralja hem phenja so šaj te pomožinen amenge (1. Pet. 2:17).

13. Sprema Evreite 10:24, 25, sar pomožinena amenge amare sostanokija?

¹³ Jekh način sar dobinaja pomoš tano agjaar so prisustvujnaja ko amare sostanokija. (Čitin Evreite 10:24, 25.) Sarine ponekogaš osetinaja amen obeshrabrime. Ama o sostanokija šaj te den amen sila. Ohrabrime siem keda šunaja o komentarija taro amare phralja hem phenja. Lengere bibliska govorija hem prikazija motivirinena amen ponadari da te služina e Jehovaske. Osven adava, osetinaja amen ohrabrime keda keraja lencar lafi angleder hem palo sostanok (1. Sol. 5:14). Isto agjaar, amare sostanokija dena amen prilika te pomožina e javerenge, hem adava kerela te ova bahtale (Dela 20:35; Rim. 1:11, 12). Amare sostanokija pomožinena amenge ko javera da načinija. Ki simbolično smisla, ola pomožinena amenge pošukar te koristina amare „voena“ veštine agjaar so pomožinena amenge pošukar te propovedina hem te sikava. Na primer, sikljovaja sar delotvorno te koristina amare glavna publikacie službake. Adaleske spremin tut šukar bašo sostanokija. Džikote trajnela o sostanok, šun vnimatelno hem palo sostanok primenin adava so sikliljan. Ako kerea adala bukja, tu ka ove „šukar vojniko e Hristos Isuseskoro“ (2. Tim. 2:3).

14. Savi javer pomoš isi amen?

¹⁴ Isto agjaar, isi amen poddrška taro milionja mokjna angelija. Razmislin bašo adava so šaj samo jekh angeli te kerel! (Isa. 37:36). A akana razmislin so šaj jekh mokjno vojska angelija te kerel. Nijekh manuš ili demoni našti te pobedinel e Jehovaskere mokjno vojska. O Jehova tano Semokjno hem adaleske keda ov tano amencar amen  sekogaš ka ova posilna taro amare protivnikija, bizi razlika kobor džene tane (Sud. 6:16). Pamtin akala bukja keda nekoj taro tle kolege, součenikija ili familija so nane e Jehovaskere svedokija obeshrabrinena tut pumare lafencar ili postapkencar. Ma bistre, na sian korkori ki akaja borba. Tu sledinea e Jehovaskoro vodstvo hem adaleske ov poddržinela tut.

15. Sprema Isaija 54:15, 17, soske nikoj našti te čhinavel e Devleskere narodo te propovedinel?

¹⁵ O sveto kolea so vladinela o Satana isi le but pričine te mrzinel amen. Amen na mešinaja amen ki politika hem na učestvujnaja ko vojne. Objavinaja e Devleskoro anav, propovedinaja kaj samo leskoro Carstvo šaj te anel amenge mir hem šunaja leskere pravedna merilija. Osven adava, otkrinaja e manušenge kaj e svetoskoro vladeteli tano hovavno hem ubijco (Jovan 8:44). Hem, amen objavinaja kaj e Satanaskoro sveto panda hari ka ovel uništimo. Sepak, o Satana hem leskere sledbenikija nikogaš nane te čhinaven amaro propovedničko delo. Namesto adava, amen ka kera sa te šaj ponadari da te falina e Jehova! Iako o Satana tano mokjno, ov na uspejngja te čhinavel i poraka bašo Carstvo te propovedinel pe e manušenge ki celo Phuv. Akava šaj samo te ovel adaleske so isi amen e Jehovaskiri zaštita. (Čitin Isaija 54:15, 17.)

16. Sar o Jehova ka zaštitinel ple narodo džikote trajnela i bari nevolja?

¹⁶ So adžikerela amen ki idnina? Džikote trajnela i bari nevolja, o Jehova ka zaštitinel amen ko duj načinija. Prvo, o Jehova ka zaštitinel ple verna slugen keda o carija e phuvjakere ka uništinen o Baro Vavilon, o svetsko carstvo e hovavne religijakoro (Otk. 17:16-18; 18:2, 4). Palo dava, ov ka zaštitinel ple narodo keda ka uništinel sa adava so ačhilo taro e Satanaskoro sveto ko Armagedon (Otk. 7:9, 10; 16:14, 16).

17. Savi korist ka ovel amen ako ačhovaja paše e Jehovaja?

¹⁷ Keda ačhovaja paše e Jehovaja, tegani o Satana našti te kerel amenge trajno šteta. Ustvari, ov tano adava so ka trpinel trajno šteta (Rim. 16:20). Adaleske, urav celo voeno oprema — hem nikogaš ma ikal la tutar! Ma probin korkori te borine tut protiv o Satana hem leskoro sveto. Pomožin tle phralenge hem phenjenge hem dža palo e Jehovaskoro vodstvo. Ako kerea agjaar, šaj te ove sigurno kaj tlo manglo nebesno Dad ka del tut sila hem ka zaštitinel tut (Isa. 41:10).