1. Σόσκε μανγκλάς ο Ιησούς κατά Ιεχωβά τι αρακχαβέλ λέσκε μαθητέν;

Ι ΤΕΛΕΥΤΑΙΑ ιράτ πριν τι μερέλ, ο Ιησούς σκεφτίνελας ο δυσκολίες σο κα νακχένας λέσκε μαθητές. Επειδή μανγκέλας πι αμαλέν, ο Ιησούς μανγκλάς πι Νταντέσταρ “τι αρακχαβέλ-λεν κατά πφιρνό”. (Ιωάν. 17:​14, 15) Ο Ιησούς τζανέλας ότι ατζεχάνικ κα βουρτίνελας κο ουρανός ντα ότι ο Σατανάς ο Διάβολος κα συνεχίνελας τι τσσουβέλ-λεν σαρέ οντουλέντζαρ σο κα μανγκένας τι υπηρετίνεν ι Ιεχωβάς. Σίγουρα, ο λαός ι Ιεχωβάσκο κα χρειαζίντιβελας αρακχαϊπέ.

2. Σόσκε μπορίνασα τι αβάς σίγουροι ότι ο Ιεχωβά κα απαντίνελ αμαρέ προσευχιέντε;

² Ο Ιεχωβά απαντιντάς κι προσευχή κι Ιησούσκι σόσκε μανγκέλα πι Τσσαβές. Άμα κεράσα σο νακχέλα αμαρέ βαστένταρ για τι κεράς ο γκι ι Ιεχωβάσκο, κα μανγκέλ αμέν-ντα, ντα κα ασουνέλ κάνα μανγκάσα λέσταρ τι βοηθίνελ-αμέν ντα τι αρακχαβέλ-αμέν. Ο Ιεχωβά ισί εκ Ντατ σο μανγκέλα-αμέν μπουτ. Οτθάρ, κα συνεχίνελ τι αρακχαβέλ πι τσσαβέν. Να μανγκέλα τι χαλάντιβελ λέσκο λατσσό ναβ!

3. Σόσκε χρειαζίντιβασα ο αρακχαϊπέ ι Ιεχωβάσκο αντιβές;

³ Αντιβές, χρειαζίντιβασα ο αρακχαϊπέ ι Ιεχωβάσκο πιο μπουτ από ποτές. Ο Μπενγκ φουρτίντιλο κατά ουρανός ντα «ισί μπουτ χολιαμέ». (Αποκ. 12:​12) Κερντάς μερικέ τζενέν τι αμντίνεν ότι κάνα τζάνα αμέντζαρ κόντρα ντένα «λατρεία ι Ντεβλές». (Ιωάν. 16:2) Γιαβερά, σο να πακιάνα κο Ντεβέλ, τζάνα αμέντζαρ κόντρα σόσκε ισινάμ διαφορετικοί κατά τζενέ κο ντουνιάς. Σαρ-ντα τι αβέν ο πράγματα, δεν πρέπει τι νταράς. Σόσκε; Επειδή ο Λάφι ι Ντεβλέσκο βακερέλα: «Ο Κύριος ισί πιστός, ντα κα ντελ-τουμέν ζορ ντα κα αρακχαβέλ-τουμέν κατά πφιρνό». (2 Θεσ. 3:3) Σαρ αρακχαβέλα-αμέν ο Ιεχωβά; Κα ντικχάς ντούι τρόποι.

4. Σο ντινάς-αμέν ο Ιεχωβά αμαρέ αρακχαϊμάσκε σαρ βακερένα ο εδάφια Εφεσίους 6:​13-17;

⁴ Ο Ιεχωβά ντινάς-αμέν εκ πανοπλία σο μπορίνελα τι αρακχαβέλ-αμέν κατά Μπενγκ, σο τσσουβέλα-λεν αμέντζαρ. (Διαβάνεν Εφεσίους 6:​13-17) Ανταγιά πνευματική πανοπλία ισί ζουρανί ντα αρακχαβέλα λατσσές! Αλλά κα αρακχαβέλ-αμέν σάντε άμα κα ιριάς σαρέ ο κομμάτια σο τθερέλα ντα να κα νικαβάς-λεν ποτές. Σο μανγκέλα τι σικαβέλ κάθε κομμάτι; Κα ντικχάς-λεν εκ εκ.

5. Σο ισί η αλήθεια σο ιριάσα σαρ εκ ζώνη, ντα σόσκε πρέπει τι ιριάς-λα;

⁵ Η αλήθεια σο ιριάσα σαρ εκ ζώνη μανγκέλα τι σικαβέλ ο αλήθειες σο ισί κο Λάφι κι Ντεβλέσκο, κι Αγία Γραφή. Σόσκε πρέπει τι ιριάς ανταγιά ζώνη; Επειδή ο Μπενγκ ισί «ο ντατ ι ψεμάσκο». (Ιωάν. 8:​44) Βακερέλα ψέματα χιλιάδες μπρεσά ακανά ντα χουχαντάς «σαρέ ι ντουνιάς». (Αποκ. 12:9) Αλλά ο αλήθειες σο τθερέλα η Γραφή αρακχαβένα-αμέν για μα τι χουχάντιβας. Σαρ ιριάσα ι αλήθεια σαρ εκ ζώνη; Κάνα σικλιάσα ι αλήθεια ι Ιεχωβάσκε, κάνα ντάσα-λες λατρεία «με πνεύμας ντα αλήθεια» ντα κάνα ισινάμ τίμιοι σαρέ κο πράγματα.​—Ιωάν. 4:​24· Εφεσ. 4:​25· Εβρ. 13:18.

6. Σο ισί η δικαιοσύνη σο ιριάσα σαρ εκ θώρακας, ντα σόσκε πρέπει τι ιριάς-λα;

⁶ Η δικαιοσύνη σο ιριάσα σαρ εκ θώρακας μανγκέλα τι σικαβέλ ο δίκαιοι κανόνες ι Ιεχωβάσκε. Σόσκε πρέπει τι ιριάς-λα; Σαρ εκ θώρακας αρακχαβέλα ι καρδιά εκχέ στρατιωτίσκι, αντικάς η δικαιοσύνη-ντα σο ιριάσα σαρ εκ θώρακας αρακχαβέλα αμαρό γκι, δηλαδή οντουβά σο ισινάμ αντρ’ αμέντε, κατά γκεραλέ πράγματα ανταλέ ντουνιάσκε. (Παρ. 4:​23) Ο Ιεχωβά μανγκέλα αμένταρ τι μανγκάς-λες ντα τι υπηρετίνας-λες σαρέ αμαρέ γκίσαρ. (Ματθ. 22:​36, 37) Οτθάρ, για μα τι υπηρετίνας ι Ιεχωβάς σαρέ αμαρέ γκίσαρ, ο Μπενγκ προσπαθίνελα τι κερέλ-αμέν τι μανγκάς ο πράγματα σο ντέλα-αμέν ανταβά ντουνιάς​—πράγματα σο μισίνελα ο Ιεχωβά. (Ιακ. 4:4· 1 Ιωάν. 2:​15, 16) Κάνα να τθερέλα αποτέλεσμας ανταβά, προσπαθίνελα τι νταραβέλ-αμέν για μα τι ντας καν κο κανόνες κι Ιεχωβάσκε.

7. Σαρ ιριάσα ι δικαιοσύνη σαρ εκ θώρακας;

⁷ Ιριάσα ι δικαιοσύνη σαρ εκ θώρακας κάνα ντάσα καν κο κανόνες κι Ιεχωβάσκε σο σικαβένα ο σωστός ντα ο λάθος. (Ψαλμ. 97:​10) Μερικοί μπορεί τι νιωθίνενα ότι ο κανόνες ι Ιεχωβάσκε λένα λένταρ λένγκι ελευθερία. Άμα όμως κα τσσιναβάας τι κεράς αμαρέ ζωγιάτε ο αρχές ι Γραφιάκε, κα μοιάζαας εκχέ στρατιωτίστε σο νικαντάς πο θώρακας καζόμ αβέλα-πες τζένγκι επειδή ισινέ λέσκε μπουτ πφαρό. Σο μπαρό ντινιλιπέ κα αβέλας ανταβά! Οντουλά σο υπηρετίνενα ι Ιεχωβάς πακιάνα ότι λέσκε εντολές «νανέ πφαρέ», αλλά ισί λένγκε αρακχαϊμάσκε.​—1 Ιωάν. 5:3.

8. Σο μανγκέλα τι βακερέλ τι ιριάς σαρ τεραχά αμαρέ πιντρέντε ο λατσσέ αμπέρια;

⁸ Κάτι γιαβέρ σο βακερέλα αμένγκε ο Παύλος τι κεράς ισί τι ιριάς σαρ τεραχά αμαρέ πιντρέντε ο λατσσέ αμπέρια της ειρήνης. Γιαβερέ λαφίντζαρ, πρέπει τι αβάς πάντα έτοιμοι τι βακεράς ο λατσσέ αμπέρια ι Βασιλειάκε. Κάνα κεράσα λάφι οντουλένγκε σο βακερέλα η Γραφή, μπαριόλα αμαρί πίστη. Λάσα μπαρί ζορ κάνα ντικχάσα σαρ αρακχένα ευκαιρίες ο υπηρέτες ι Ιεχωβάσκε για τι βακερέν ο λατσσέ αμπέρια. Για παράδειγμας, κερένα έργος κι μπουτί, κο σχολείος, κχερ κχερέστε, κάνα τζάνα τι ψωνίνεν, κάνα τζάνα τι ντικχέν πουμαρέ τζενέν σο νανέ κι αλήθεια, κάνα κερένα λάφι τζενέντζαρ σο τζανένα, ατζέ-ντα κάνα ισί πφαντέ πουμαρέ κχερέστε. Άμα κα νταράας ντα κα τσσιναβάας τι κεράς έργος, κα μοιάζαας εκχέ στρατιωτίστε σο νικαντάς πο τεραχά καζόμ αβέλα-πες τζένγκι. Κα αβέλας πιο εύκολος τι ντελ-πες κο πιντρέ. Ντα αντικάς,  κα δυσκολίντιβελας τι αρακχαβέλ-πες κο τζένγκι ντα ναστί κα κερέλας ο διαταγές πι διοικητίσκε.

9. Σόσκε χρειαζίντιβελα τι ασταράς ι πίστη σαρ εκ μπαρί ασπίδα;

⁹ Η πίστη σο ασταράσα σαρ εκ μπαρί ασπίδα μανγκέλα τι σικαβέλ ι πίστη σο τθεράσα κο Ιεχωβά. Ισινάμ σίγουροι ότι βοβ κα κερέλ σαρέ οντουλά σο βακερντάς. Ανταγιά πίστη κα βοηθίνελ-αμέν “τι σταματίνας σαρέ ο βέλη ι πφιρνέσκε σο τθερένα γιακ”. Σόσκε χρειαζίντιβελα τι ασταράς ανταγιά μπαρί ασπίδα; Επειδή αρακχαβέλα-αμέν κατά λάφια σο βακερένα ο αποστάτες ντα ντέλα-αμέν ζορ κάνα ο τζενέ πρασάνα-αμέν οντουλένγκε σο πακιάσα. Άμα να τθεράσα πίστη, να κα τθεράς ι ζορ τι τζας κόντρα οντουλέντε σο προσπαθίνενα τι κερέν-αμέν μα τι ντας καν κο κανόνες κι Ιεχωβάσκε. Οκιά μπάνταρ, κάθε φαρ σο να κεράσα κάτι σο να μπεϊντίνελα ο Ιεχωβά κι μπουτί ή κο σχολείος, ασταράσα αμαρί ασπίδα. (1 Πέτρ. 3:​15) Κάθε φαρ σο να λάσα εκ λατσσί μπουτί σο κα κερέλας-αμέν τι τσσιναβάς τι κεράς ο πιο λατσσό κι υπηρεσία κι Ιεχωβάσκι, ασταράσα αμαρί ασπίδα. (Εβρ. 13:5, 6) Ντα κάθε φαρ σο συνεχίνασα τι υπηρετίνας ι Ιεχωβάς παρόλο σο τζάνα αμέντζαρ κόντρα, αρακχαβέλα-αμέν αμαρί ασπίδα.​—1 Θεσ. 2:2.

10. Σο ισί η σωτηρία σο ιριάσα σαρ εκ περικεφαλαία, ντα σόσκε πρέπει τι ιριάς-λα;

 ¹⁰ Η σωτηρία σο ιριάσα σαρ εκ περικεφαλαία ισί η ελπίδα σο ντέλα-αμέν ο Ιεχωβά, δηλαδή ότι κα σώνελ-αμέν κατά μεριπέ ντα κα ευλογίνελ σαρέ οντουλέν σο κερένα οντουβά σο μανγκέλα βοβ. (1 Θεσ. 5:8· 1 Τιμ. 4:​10· Τίτο 1:1, 2) Σαρ η περικεφαλαία αρακχαβέλα ο σορό ι στρατιωτίσκο, αντικάς η ελπίδα-ντα τι σώντιβας αρακχαβέλα αμαρό τρόπος σκέψης. Σαρ; Ανταγιά ελπίδα βοηθίνελα-αμέν τι τθεράς αμαρέ γιακχά οντουλέντε σο βακερντάς ο Ντεβέλ ντα μα τι χασαράς αμαρό κουράγιος κατά προβλήματα. Σαρ ιριάσα ανταγιά περικεφαλαία; Άμα σκεφτίνασα αντικάς σαρ μανγκέλα ο Ντεβέλ τι σκεφτίνας. Για παράδειγμας, να τθεράσα αμαρί ελπίδα κο χουλανιπέ σο χασάρντιβελα, αλλά κο Ντεβέλ.​—Ψαλμ. 26:2· 104:​34· 1 Τιμ. 6:17.

11. Σο ισί ο σπαθίς ι πνευμάσκο, ντα σόσκε πρέπει τι χρησιμοποιήνας-λες;

¹¹ Ο σπαθίς ι πνευμάσκο ισί ο Λάφι ι Ντεβλέσκο, η Αγία Γραφή. Ανταβά σπαθίς τθερέλα ι ζορ τι πουτσσαρέλ κάθε ψέμας ντα αντικάς τι ελευθερώνελ τζενέν κατά ψεύτικος σικλιαριπέ ντα κατά μπέτι πράγματα σο ισί σικλέ τι κερέν. (2 Κορ. 10:4, 5· 2 Τιμ. 3:​16, 17· Εβρ. 4:​12) Σικλιάσα τι χρησιμοποιήνας σωστά ανταβά σπαθίς κάνα σικλιαράσα-αμέν κατά Γραφή ντα κατά πράγματα σο ντέλα-αμέν ι Ντεβλέσκι οργάνωση. (2 Τιμ. 2:​15) Εκτός κατά πανοπλία, ο Ιεχωβά αρακχαβέλα-αμέν εκχέ γιαβερέ-ντα τροπόσαρ. Σαρ;

12. Σο γιαβέρ χρειαζίντιβασα, ντα σόσκε;

¹² Εκ στρατιώτης τζανέλα ότι ναστί κα νικίνελ εκχέ μπαρέ στρατός κορκορό. Χρειαζίντιβελα βοήθεια κατά γιαβερά στρατιώτες. Αντικάς αμέν-ντα, ναστί ντάσα-λεν πέρα κορκορέ ι Μπενγκέσαρ ντα οντουλέντζαρ σο τσσίντενα λέσταρ. Χρειαζίντιβασα ι βοήθεια αμαρέ πφραλένγκι ντα αμαρέ πφενίνγκι. Ο Ιεχωβά ντινάς-αμέν πφραλέν σαρό κατά ντουνιάς για τι βοηθίνεν-αμέν.​—1 Πέτρ. 2:17.

13. Σαρ βοηθίντιβασα κάνα τζάσα κο συναθροίσεις σαρ βακερένα ο εδάφια Εβραίους 10:​24, 25;

¹³ Εκ τρόπος για τι λας βοήθεια ισί τι τζας κο συναθροίσεις. (Διαβάνεν Εβραίους 10:​24, 25) Σαρέ χασαράσα μπάζιμα αμαρί ζορ. Κάνα αβέλα-πες ανταβά, λάσα ζορ κο συναθροίσεις. Λάσα μπουτ ζορ κατά απαντήσεις σο ντένα αμαρέ πφραλά ντα πφενιά αντράλ πουμαρέ γκίσταρ. Λένγκε ομιλίες κατά Γραφή ντα λένγκε επιδείξεις κερένα-αμέν τι μανγκάς ατζέ πιο μπουτ τι υπηρετίνας ι Ιεχωβάς. Λάσα μπουτ ζορ κάνα κεράσα λάφι πριν ντα σοράν κατά συνάθροιση. (1 Θεσ. 5:​14) Επίσης, κατά συναθροίσεις λάσα χαρά σόσκε ντένα-αμέν ι ευκαιρία τι βοηθίνας ι γιαβερέν. (Πράξ. 20:​35· Ρωμ. 1:​11, 12) Αμαρέ συναθροίσεις βοηθίνενα-αμέν γιαβερέ-ντα τροπόντζαρ. Ο συναθροίσεις βοηθίνενα-αμέν τι βακεράς ντα τι σικλιαράς πιο λατσσές ο λατσσέ αμπέρια. Για παράδειγμας, σικλιάσα τι χρησιμοποιήνας πιο λατσσές ο Εργαλεία για τι Σικλιαράς. Οτθάρ, τι προετοιμάντιβεν λατσσές ι συναθροισιένγκε. Καζόμ αβέλα-πες η συνάθροιση, τι ασουνέν λατσσές. Σοράν κατά συνάθροιση, τι κερέν οντουλά σο σικλιλέν. Άμα κα κερέν ανταλά πράγματα, κα αβέν “λατσσέ στρατιώτες ι Ιησού Χριστόσκε”.​—2 Τιμ. 2:3.

14. Καγιά γιαβέρ βοήθεια τθεράσα;

¹⁴ Τθεράσα εκατομμύριε ζουρανέ αγγελόν-ντα σο βοηθίνενα-αμέν. Σκεφτίνεν σο μπορίνελα τι κερέλ σάντε εκ άγγελος! (Ησ. 37:​36) Ακανά σκεφτίνεν σο κα μπορίνελας τι κερέλ εκ ζουρανό στρατός αγγελόνγκο. Καέκ τζενό ντα καέκ δαίμονας ναστί νικίνελα ι μπουτ ζουρανέ στρατός ι Ιεχωβάσκο. Ο Ιεχωβά ισί ο πιο ζουρανό.  Οτθάρ, κάνα ισί αμέντζαρ, ισινάμ πάντα πιο ζουρανέ οντουλένταρ σο τζάνα αμέντζαρ κόντρα. (Κριτ. 6:​16) Καζόμ μπαγιά ισί ανταβά! Τι τθερέν-λεν τουμαρέ γκοντιάτε ανταλά κάνα χασαρένα τουμαρί ζορ εκχέ πραγμάσταρ σο βακερέλα ή κερέλα εκ τζενό κι μπουτί, εκ συμμαθητής ή εκ τουμαρέ τζενένταρ σο νανέ κι αλήθεια. Τι ντεν-τουμέν γκοντί ότι να ισινέν κορκορέ ανταλέ τζενγκίστε. Κερένα οντουβά σο βακερέλα ο Ιεχωβά.

15. Σόσκε καέκ να κα τσσιναβέλ ο έργος σο κεράσα σαρ βακερένα ο εδάφια Ησαΐας 54:​15, 17;

¹⁵ Ο ντουνιάς σο ισί κο βας κι Μπενγκέσκο τθερέλα μπουτ λόγους τι μισίνελ-αμέν. Ποτές να ανακατούντιβασα κο πολιτικά ντα να τζάσα κο τζένγκι. Κεράσα λάφι ι Ντεβλέσκε ναβέσκε, βακεράσα ότι σάντε λέσκι Βασιλεία μπορίνελα τι ανέλ ειρήνη ντα ντάσα καν κο δίκαιοι κανόνες λέσκε. Βακεράσα κο τζενέ ότι οντουβά σο κερέλα κουμάντος ι ντουνιάς ισί μπαρό ψεύτης ντα μουνταρέλα τζενέν. (Ιωάν. 8:​44) Ντα βακεράσα ότι ατζεχάνικ ο ντουνιάς ι Μπενγκέσκο κα καταστραφίντιβελ. Αλλά ο Μπενγκ ντα οντουλά σο τσσίντενα λέσταρ ποτές ναστί κα τσσιναβέν ο έργος σο κεράσα. Οκιά μπάνταρ, κα κεράς σο νακχέλα αμαρέ βαστένταρ για τι συνεχίνας τι δοξάνας ι Ιεχωβάς! Ο Μπενγκ ισί ζουρανό, αλλά ναστί κερντάς κάτι για μα τι ερεσέν ο λατσσέ αμπέρια σαρί κι πφουβ. Ανταβά αβιλό-πες σάντε επειδή τθεράσα ο αρακχαϊπέ ι Ιεχωβάσκο.​—Διαβάνεν Ησαΐας 54:​15, 17.

16. Σαρ κα σώνελ ο Ιεχωβά πι λαός κι μπαρί στεναχώρια;

¹⁶ Σο μπεκλεντίνασα τι αβέλ-πες; Κι μπαρί στεναχώρια, ο Ιεχωβά κα σώνελ-αμέν ντουέ εντυπωσιακέ τροπόντζαρ. Πρώτα, κα σώνελ πι αφοσιωμέ υπηρετόν κάνα κα τσσουβέλ ι πφουβιάκε βασιλιαδέν τι κερέν καταστροφή ι Μπαρέ Βαβυλωνά, σο ισί σαρέ ο ψεύτικες θρησκείες ι ντουνιάσκε. (Αποκ. 17:​16-18· 18:2, 4) Σοράν, κα σώνελ πι λαός κάνα κα κερέλ καταστροφή κο Αρμαγεδδώνας σαρέ ο γιαβερά πράγματα σο ισί κι Μπενγκέσκο ντουνιάς.​—Αποκ. 7:9, 10· 16:​14, 16.

17. Σαρ βοηθίντιβασα άμα ισινάμ πασέ κο Ιεχωβά;

¹⁷ Άμα κα ατσσάς πασέ κο Ιεχωβά, ο Μπενγκ ναστί κα κερέλ αμένγκε καέκ ζιάνι. Κι πραγματικότητα, βοβ ισί οντουβά σο κα αβέλ καταστροφή για πάντα. (Ρωμ. 16:​20) Οτθάρ, ιρίν σαρί ι πανοπλία ντα μα νικαβέν-λα ποτές! Μα προσπαθίνεν τι ντεν-λεν πέρα κορκορέ ι Μπενγκέσαρ ντα οντουλέντζαρ σο τσσίντενα λέσταρ. Τι μανγκέν βοήθεια τουμαρέ πφραλένταρ ντα πφενίνταρ. Ντα τι κερέν οντουβά σο βακερέλα τουμένγκε ο Ιεχωβά. Άμα κερένα-λεν ανταλά, τι αβέν σίγουροι ότι τουμαρό Ντατ, ο Ιεχωβά, σο μανγκέλα-τουμέν μπουτ κα ντελ-τουμέν ζορ ντα κα αρακχαβέλ-τουμέν.​—Ησ. 41:10.