1. Ha yini Yesu a kombele Yehovha kuva a sizrelela malandzra yakwe?

KA WUSIKU bya wugamu bya wutomi byakwe lani misaveni, Yesu a pimise hi swikazratu leswi vadondzrisiwa vakwe a va ta langusana na swone. Lizrandzru dzra Yesu hi vadondzrisiwa vakwe dzri mu susumetele kuva a kombela Papayi wakwe ‘leswaku a va sizrelela’ ku lwemfani. (Yh 17:14, 15) Yesu a a swi tiva leswaku ntsrhaku ka loko a tlhelele matilweni, Sathana Diyavulosi a a ta tama a lwisana ni lava va djulaka ku tizrela Yehovha. Xileswo, vhanu va Yehovha a va ta vilela nsizrelelo.

2. I yini lexi nga hi tiyisaka leswaku Yehovha a ta hlamula swikhongoto swezru?

² Yehovha a xi hlamulile xikhongoto xa Yesu hikusa awa mu zrandzra. Loko hi yentxa hinkwaswu leswi hi nga swi kotaka akuva hi nyonxisa Yehovha, a ta hi zrandzra na hine. Nakone a ta yingela swikhongoto swezru loko hi vilela mpfunu ni nsizrelelo. Yehovha a ta ya mahlweni a zron’weka hi vanakwe lava zrandzrekaka, hikusa loko a nga yentxi leswo a vhanu va ta zruka vito dzrakwe!

3. Ha yini hi vilela nsizrelelo wa Yehovha namunhla?

³ Swoswi hi vilela ngopfu mpfunu wa Yehovha ku tlula khale. Sathana a hlongoliwe matilweni, nakone a xikele misaveni na a ni ‘mahlundzru lamakulu’. (Mpf 12:12) A kote ku kholwisa vambeni leswaku loko va hi xanisa ‘va tizrela Xikwembu Nkulukumba’. (Yh 16:2) Vambeni lava va kalaka va nga pfumeli ka Xikwembu Nkulukumba, va hi xanisa hi leswi hi hambaniki ni vhanu va misava leyi. Swi nge na mhaka leswaku ha yini vhanu va hi xanisa hine a hi txhavi. Ha yini? Hikusa Zritu dzra Xikwembu Nkulukumba dzri li: ‘Kambe Hosi ya dumbeka, yi ta n’wi tiyisa ni ku n’wi londzra ku lwemfani.’ (2Te 3:3) Xana Yehovha a hi sizrelela hi ndlela yini? A hi buleni hi tindlela tibidzri.

4. Hi ku ya hi Ba-le-Efesa 6:13-17, i yini leswi Yehovha a hi nyikaka swone akuva a hi sizrelela?

⁴ Yehovha a yentxe leswaku hi va ni switlhomo leswi nga hi sizrelelaka ka minhlaselo ya Sathana. (Dondzra Ba-le-Efesa 6:13-17.) Switlhomo swoleswo swi tiyile nakone swi tizra swinene! Kambe switlhomo leswi swi to hi sizrelela ntsena loko hi tizrisa xin’wana ni xin’wana hi ndlela ya kone ni ku tlhela hi tama hi yetxa swoswo. Kambe xana xitlhomo xin’wana ni xin’wana xi tlhamuxela yini? A hi buleni ha xin’we ha xin’we xa swone.

5. I yini bandi dzra xihlayelamfuzri nakone ha yini swi sindzrisa kuva hi dzri tsrimba?

⁵ Bandi dzra xihlayelamfuzri dzri tlhamuxela xihlayelamfuzri lexi kumekaka a Zritwini dzra Xikwembu Nkulukumba ku nga Bibele. Ha yini hi fanela ku tsrimba bandi dzroledzro? Hikusa Sathana i ‘[papayi] wa ku hemba’. (Yh 8:44) Yene a ni magidi ya malembe na a hemba a tlhela a ‘kanganyisa misava hinkwayu’! (Mpf 12:9) Kambe mintiyiso leyi kumekaka a Bibeleni ya hi sizrelela akuva hi nga kanganyisiwi. Hi nga dzri tsrimbisa kuyini bandi dzrezru dzra ku fanekisela? Hi yentxa leswo hi ku dondzra xihlayelamfuzri mayelanu na Yehovha, hi ku mu gandzrela hi moya ni xihlayelamfuzri hi tlhela hi hanya hi ku dumbeka ka mintxhumu hinkwayu.​—Yh 4:24; Ef 4:25; Hb 13:18.

6. I yini muhelo kumbe xisizrelelo xa ku lulama nakone ha yini swi sindzrisa ku va hi xi yambala?

⁶ A muhelo wa ku lulama wu tlhamuxela milawu ya Yehovha ya ku lulama. Ha yini hi fanela ku wu yambala? Swanga hi leswi a muhelo kumbe xisizrelelo xa xifuva xi sizrelelaka mbilu ya musotxha akuva yi nga vavisiwi, a muhelo wa ku lulama wu sizrelela mbilu yezru akuva yi nga kokiwi hi mahanyela ya misava leyi. (Pr 4:23) Yehovha a lavisela leswaku hi mu zrandzra hi va hi mu tizrela hi mbilu yezru hinkwayu. (Mt 22:36, 37) Xileswo, Sathana a dzringisa ku yava mbilu yezru akuva hi zrandzra mintxhumu ya misava leyi​—ku nga leswi Yehovha a swi nyenyaka. (Yk 4:4; 1Yh 2:15, 16) Loko leswo swi nga tizri, a dzringisa ku hi txhavisa akuva hi hambana ni milawu ya Yehovha leyi yi lulamiki.

7. Hi nga wu yambala hi ndlela yini a muhelo kumbe xisizrelelo xa ku lulama?

⁷ Hi yambala muhelo kumbe xisizrelelo xa ku lulama hi ku hanya hi ku landzra milawu ya Yehovha leyi lulamiki, hi ku tingawula leswa ku biha ni hi ku hanya hi leswi lulamiki. (Ps 97:10) Van’wana va titwa ingi hi loko milawu ya Yehovha yo hi tsrona ntsrhunxeko. Kambe a ku tsrhika ku hanya hi ku landzra minsinya ya milawu ya Bibele a wuton’wini byezru, swi fana ni musotxha lweyi a hlivilaka xisizrelelo xa xifuva xakwe lani yimpi yi hisaka kone. Leswo a ku nga tiva wutlhazri! Loko mhunu a zrandzra Yehovha a ‘swileleto swakwe a swi bindzri’, kambe swo huluxa.​—1Yh 5:3.

8. Xana swi tlhamuxela yini ku yambala milengeni a swifambu swa evhangeli dzra ku zrula?

⁸ Pawulo a tlhele a hi kutxa ku yambala milengeni a swifambu swa nkhinkhi ya evhangeli dzra ku zrula. Hi mazritu man’wana, hi fanele ku lulamela ku zrezra madzrungula lamanene ya Mfumu. Loko hi byela vambeni hi dzrungula dzra Bibele, a lipfumelo dzrezru dzri ya dzri tiya. Swa tiyisana ku vona vhanu va Yehovha na va djuletela mikhandlu ya ku zrezra madzrungula lamanene​—a ntizrweni, a xikole, a mimbangwini ya mabindzru kumbe loko va zrezra hi muti ni muti, loko va li xitolo, loko va pfuxela maxaka lama nga liki Timboni, loko va zrezra hi xitxhuketa, ni loko tlhela va zrezra nambi loko va li ka xiyimu lexi sindzrisaka kuva va nga humi makaya. Loko hi tsrhika ku txhava ku hi hlula hi va hi yima ku zrezra, hi ta fana ni musotxha lweyi a susaka swifambu lani yimpi yi hisaka kone; a swi ta nabyala ku va a vavisiwa milenge yakwe. Mihandzru ya kone hi leswaku a swi nga ti mu nabyalela ku tivhikela  ka minhlaselo, nakone a a nge te swi kota ku landzra minkongomiso ya muzrangeli wakwe.

9. Ha yini hi fanela ku tamela xitlhangu xezru xa ku pfumela?

⁹ Xitlhangu xa ku pfumela xi tlhamuxela lipfumelo ledzri hi nga nadzru ha Yehovha. Ha dumba leswaku a ta hetisisa swidumbiso hinkwaswu leswi a swi yentxiki. Lipfumelo ledzro dzri ta hi pfuna ku timela ‘mintumbana hinkwayu leyi pfuzraka ya nala’. Ha yini hi fanela ku tamela xitlhangu xezru? Hikusa xi ta hi sizrelela ka matlhazri lawa ma nga ha hi hlaselaka ya ku fana ni tindondzro ta madukwa, kumbe ku txhaviseliwa hi swihehlo swa madzrimi. Loko hi nge na lipfumelo, a hi nga ti va ni ntamu wa ku tiyisela loko van’wana va dzringisa ku hi hambukisa akuva hi bakanya milawu ya Yehovha. Hi tlhelo dzrimbeni, a nkama lowu hi lwelaka lipfumelo dzrezru a ntizrweni kumbe a xikole hi va na tamele a xitlhangu xezru. (1Pe 3:15) Nkama lowu hi yalaka ku yamukela ntizro lowu holelaka ngopfu, kambe wu nga ha hingalataka wugandzreli byezru hi va na hi tamele a xitlhangu xezru. (Hb 13:5, 6) Xitlhangu xezru xa hi sizrelela nkama lowu hi tamaka hi tizrela Yehovha nambi loko hi kanetiwa.​—1Te 2:2.

10. I yini xintlhontlho kumbe xilembe xa ku huluka, nakone ha yini hi fanela ku xi yambala?

¹⁰ Xintlhontlho xa ku huluka i dumbo ledzri Yehovha a hi nyikaka dzrone. Ku nga dumbo  dzra leswaku a ta hi huluxa ka lifu ni leswaku a ta hakela hinkwavu lava yentxaka ku zrandzra kwakwe. (1Te 5:8; 1Tm 4:10; Ti 1:1, 2) Ku fana ni leswi xintlhontlho kumbe xilembe xa masotxha xi sizrelelaka nhloko, a dumbo dzrezru dzra huluku dzri sizrelela miyanakanyu yezru. Hi ndlela yini? Dumbo ledzro dzri hi yentxa hi beka miyanakanyu yezru ka swidumbiso swa Xikwembu Nkulukumba nakone dzri hi pfuna ku vona swikazratu hi ndlela leyinene. Hi nga xi yambalisa kuyini xilembe xolexo? Hi nga yentxa leswo hi ku beka mimpimiso yezru yi fambisana ni mimpimiso ya Xikwembu Nkulukumba. Hi xikombiso, hi beka dumbo dzrezru ka Xikwembu Nkulukumba ku nga li ka lifuyu dzra misava leyi.​—Ps 26:2; 104:34; 1Tm 6:17.

11. I yini lipanga la moya nakone ha yini hi fanela ku dzri tizrisa?

¹¹ Lipanga la moya i zritu dzra Xikwembu Nkulukumba ku nga Bibele. Lipanga dzroledzro dzri ni ntamu wa ku tsrema mazrengu hinkwawu ni ku ntsrhunxa vhanu ka wukazrawa dzra tindondzro ta madzrimi ni ku va ntsrhunxa ka swihena leswi vavisanaka. (2Ko 10:4, 5; 2Tm 3:16, 17; Hb 4:12) Hi dondzra ku tizrisa lipanga dzroledzro loko hi hamba dondzro ya ximhunu, ni loko hi yamukela ku wupfisiwa loku hi ku kumaka ka nhlengeletanu ya Xikwembu Nkulukumba. (2Tm 2:15) Handle ka switlhomo swa moya, Yehovha a hi pfuna hi ndlela yin’wana ya ntamu swinene. He yini ndlela leyo?

12. I yini swimbeni leswi hi swi vilelaka nakone ha yini?

¹² Musotxha lweyi a nga ni wuswikoti ni wutivi bya ku lwa a wa swi tiva leswaku a nge hluli loko o lwa ni butsrhu ledzrikulu na o va ye wuswake; a vilela mpfunu wa masotxhakulobye. Hi ndlela leyi fanaka, a hi nge swi koti ku lwa na Sathana ni valandzreli vakwe na ho va wuswezru, hi vilela mpfunu wa vakristekulozri. Yehovha a hi nyike nhlengeletanu ya vamakwezru va misava hinkwayu lava va tibekiseliki ku hi pfuna.​—1Pe 2:17.

13. Hi ku ya hi buku dzra Ba-Heberu 10:24, 25, xana mintlhanganu yi nga hi pfuna hi ndlela yini?

¹³ Ndlela yin’we leyi hi nga yamukelaka mpfunu ha yone ku ya a mintlhanganwini yezru ya bandla. (Dondzra Ba-Heberu 10:24, 25.) Loko hi titwa na hi hele ntamu​—minkama yimbeni—​ku ya mintlhanganwini swi nga hi yentxa hi nyonxa hi tlhela hi tiyisiwa. Tinhlamulo ta vamakwezru leti humaka mbilwini ti nga hi nyika ntamu. Wukaneli lebyi seketeliwiki a Bibeleni ni minkombiso, swi nga hi tiyisa ku va hi tama hi tizrela Yehovha. Hi tlhela hi tiyisiwa hi mabulu lawa hi vaka na wone loko mintlhanganu yi nga si sungula ni loko yi helile. (1Te 5:14) Ku yengetela ka leswo a mintlhanganu yi hi nyika mukhandlu wa ku nyonxa loku pfaka hi ku pfuna vambeni. (Min 20:35; Ro 1:11, 12) Mintlhanganu yi tlhela yi hi pfuna hi tindlela timbeni. Yi hi pfuna ku va vazrezri ni vadondzrisi lavanene a nsin’wini. Hi xikombiso, hi dondzra ku tizrisa switizro swezru swaku dondzrisa ha swone hi ndlela leyinene. Xileswo, lulamisela ha hombe mintlhanganu ya bandla. Yingiseta ha hombe loko u li mintlhanganwini. Ntsrhaku ka mintlhanganu, tizrisa leswi u swi dondzriki. Loko u yentxa leswo u ta va ‘nhenha leyinene ya Kriste Yesu’.​—2Tm 2:3.

14. He wini mpfunu wumbeni lowu hi nga na wone?

¹⁴ Hi tlhela hi va ni mpfunu wa magidigidi ya tintsrumi ta ntamu swinene. Pimisa hi leswi ntsrumi yin’we ntsena yi nga swi yentxaka. (Eza 37:36) Swoswi pimisa hi leswi ntlawa lowukulu wa tintsrumi wu nga swi yentxaka. A ku na mhunu kumbe Demona ledzri nga ni ntamu wa ku fana ni lowu Yehovha a wu nyikaka tintsrumi takwe. Yehovha i wa ntamu hinkwawu. Loko hi na yene, hi nga kota ku hlula valala vezru swi nge na mhaka leswaku va tale ku ya tlhasa kwini! (Abaṭ 6:16) Hi nga tiyiseka leswaku leswo  i ntiyiso! Ku va ni leswo a miyanakanywini swi nga hi pfuna loko hi txhavisiwa hi ntxhumu wa kukazri lowu vatizrikulozri, vadondzrikulozri kumbe maxaka yezru lawa ma nga liki vapfumeli va nga ha wu hlayaka kumbe ku swi yentxa. Dzrimuka leswaku, a wu lwi wuswaku. U landzra nkongomiso wa Yehovha.

15. Hi ku ya hi Ezaya 54:15, 17, ha yini a nge kone lweyi a nga yimisaka vhanu va Xikwembu Nkulukumba ku zrezra?

¹⁵ Misava leyi, leyi fumiwaka hi Sathana, yi ni swivangelo swinyingi swa ku tama yi hi nyenya. A hi seketeli tlhelo ni dzrin’we dzra politika nakone a hi yi yimpini. Hi huwelela vito dzra Xikwembu Nkulukumba nakone hi pfumela leswaku i Mfumu wakwe ntsena lowu taka buyisa ku zrula, hi tlhela hi tibeka hansi ka milawu ya Xikwembu Nkulukumba. Hi swi beka livaleni leswaku a mufumi wa misava leyi i muhembi ni mudlayi lwenkulu. (Yh 8:44) Nakone hi huwelela leswaku ke sala nkamanyana leswaku misava leyi ya Sathana yi helisiwa. Kambe Sathana ni malandzra yakwe va nga ti txhuka va yimisa ntizro wa ku zrezra. Hi ta tama hi kombisa ku tlangela Yehovha hi ku yentxa hinkwaswu leswi hi nga swi kotaka a ntizrweni wakwe! Nambi leswi Sathana a nga ni ntamu, a nge swi koti ku sivela leswaku a dzrungula dzra Mfumu dzri tlhasela vhanu a misaveni hinkwayu. Leswo swo koteka ntsena hi leswi hi nga ni nsizrelelo wa Yehovha.​—Dondzra Ezaya 54:15, 17.

16. Xana Yehovha a ta va huluxa hi ndlela yini vhanu vakwe hi nkama wa nhlomulo lowukulu?

¹⁶ I yini leswi taka landzrela? Hi nkama wa nhlomulo lowukulu, Yehovha a ta hi huluxa hi tindlela tibidzri ta ku hlamalisa. Ku sungula, a ta huluxa malandzra yakwe ya ku dumbeka nkama lowu a taka hlohlotela tihosi akuva ti helisa Babilona Lwenkulu, ku nga mfumu wa misava wa wukhongoti bya madzrimi. (Mpf 17:16-18; 18:2, 4) A ta tlhela a huluxa vhanu vakwe, loko a helisa misava leyi ya Sathana a Armagedoni.​—Mpf 7:9, 10; 16:14, 16.

17. Xana hi pfunekisa kuyini loko hi li vanghanu va le kusuhi va Yehovha?

¹⁷ Loko hi tama hi tsrhama kusuhi na Yehovha, Sathana a nge swi koti ku hi yentxela ntxhumu lowu taka hi vavisa minkama hinkwayu. Ku hlaya ntiyiso Sathana hi yene a taka heliseliwa wugamu. (Ro 16:20) Xileswo, yambala switlhomo swa moya u va u tama u tsrhama na swone! U nga txhuki u dzringisa ku lwa na u li wuswaku. Seketela vakristekuloni. Nakone landzra nkongomiso wa Yehovha. Loko u yentxa leswo u nga dumba leswaku Papayi waku wa le tilweni lwa nga ni lizrandzru, a ta ku tiyisa a tlhela a ku seketela.​—Eza 41:10.