1. Ngbanga ti nyen la Jésus ahunda lani na Jéhovah ti bâ ndo na ndö ti adisciple ti lo?

NA NDANGBA bï ti Jésus tongana zo, lo gbu li lani na ndö ti akpale so adisciple ti lo ayeke wara. Ndali ti so lo ye ala, lo hunda na Babâ ti lo ti “bâ ndo na ndö ti ala ngbanga ti Zo ti sioni.” (Jean 17:14, 15). Jésus ahinga lani so na peko ti so lo kiri na yayu, Satan Zabolo ayeke ngbâ ti sara bira na zo kue so aye ti sara na Jéhovah. Tongaso, azo ti Jéhovah abezoin ti tene lo bata ala.

2. Tongana nyen la e lingbi ti hinga na bê ti e kue so Jéhovah ayeke kiri tënë na asambela ti e?

² Jéhovah akiri lani tënë na sambela ti Molenge ti lo Jésus ndali ti so Lo ye lo. Tongana e sara kue ti zia ngia na bê ti Jéhovah, lo yeke ye nga e, nga lo yeke mä asambela so e sara ti hunda lo ti mû maboko na e nga ti bata e. So Jéhovah ayeke mbeni Mokonzi ti sewa so aye azo ti sewa ti lo, lo yeke ngbâ ti bâ lege ti amolenge ti lo. Tongana lo sara ni ape, iri ti lo ayeke buba.

3. Ngbanga ti nyen la laso e bezoin ti tene Jéhovah abata e?

³ Laso, e bezoin ti tene Jéhovah abata e mingi ahon ti kozo. A tomba Satan na yayu awe, na “lo yeke na kota ngonzo”. (Apoc. 12:12). Lo sara si ambeni zo apensé so tongana ala sara aye ti ngangu na e, ‘kua ti Nzapa la ala sara so.’ (Jean 16:2). Ambeni zo so amä na bê na Nzapa ape ayeke sara aye ti ngangu na e ndali ti so e sara ye tongana ti azo ti dunia so ape. Atâa ye ni ayeke so wa, e lingbi ti sara mbeto ape. Ngbanga ti nyen? Ngbanga ti so Bible atene: “Seigneur ayeke  be-ta-zo, na lo yeke sara ande si ala luti ngangu nga lo yeke bata ala si Zo ti sioni asara ye na ala pëpe.” (2 aThes. 3:3). Tongana nyen la Jéhovah ayeke bata e? Zia e bâ alege use so lo yeke sara ni.

4. Ti gue oko na aÉphésien 6:13-17, nyen la Jéhovah amû na e ti bata e?

⁴ Jéhovah amû na e aye ti bira so alingbi ti bata e na ngoi so Satan aga na bira na terê ti e. (Diko aÉphésien 6:13-17.) Aye ti bira so Nzapa amû na e so ayeke ngangu nga asara kua nzoni. Me a yeke bata e gï tongana e yü ni oko oko kue na terê ti e nga e bata ni angbâ na terê ti e. Aye ti bira so oko oko kue aye ti sara tënë ti nyen? Zia e sara tënë na ndö ni oko na oko kue.

5. Ceinture ti tâ tënë ayeke nyen? Ngbanga ti nyen la a lingbi e kanga ni na gbe ti yâ ti e?

⁵ Ceinture ti tâ tënë ayeke atâ tënë so ayeke na yâ ti Bible. Ngbanga ti nyen la a lingbi e kanga ni na gbe ti yâ ti e? Ngbanga ti so Satan ayeke “babâ ti mvene.” (Jean 8:44). Lo tene mvene ahon ngu saki mingi awe nga lo handa “azo na ndö ti sese kue”. (Apoc. 12:9). Me atâ tënë ti Bible abata e si lo handa e ape. E yeke kanga ceinture ti tâ tënë na gbe ti yâ ti e tongana nyen? E yeke kanga ni tongana e manda tâ tënë na ndö ti Jéhovah, e voro lo “na yingo nga na tâ tënë” nga e sara ye na lege ni na yâ ti aye kue.—Jean 4:24; aÉph. 4:25; aHéb. 13:18.

6. Bongo ti wen ti mbilimbili ayeke nyen? Ngbanga ti nyen la a lingbi e yü ni na kate ti e?

⁶ Bongo ti wen ti mbilimbili ayeke aye so Jéhovah ahunda na e ti sara. Ngbanga ti nyen la a lingbi e yü ni na kate ti e? Gï tongana ti so bongo ti wen ayeke bata bê ti mbeni turugu si kokora akpo ni ape, bongo ti wen ti mbilimbili ayeke bata bê ti e na lege ti fä wala zo ti yâ ni ti e si asioni sarango ye ti dunia so abuba ni ape (aProv. 4:23). Jéhovah aye si e ndoye lo nga e sara na lo na bê ti e kue (Mat. 22:36, 37). Me Satan ayeke gi ti tene bê ti e aduti use use na lege so lo yeke pusu e ti ye aye ti dunia so, so Jéhovah ake ni (Jacq. 4:4; 1 Jean 2:15, 16). Nga tongana lo sara ni gbä, lo yeke gi ti zia mbeto na yâ ti e si e sara ye so Jéhovah ake.

7. E yeke yü bongo ti wen ti mbilimbili tongana nyen?

⁷ E yeke yü bongo ti wen ti mbilimbili na kate ti e tongana e yeda na aye so Jéhovah atene ayeke na lege ni wala ayeke na lege ni ape nga e sara ye alingbi na ni (Ps. 97:10). Ambeni zo alingbi ti bâ so aye so Jéhovah ahunda na e ti sara akanga lege na liberté ti e. Me tongana e zia ti sara ye alingbi na amama-ndia ti Bible, e yeke duti tongana mbeni turugu so azi bongo ti wen so ayeke na kate ti lo na ngoi so bira angbâ ti kporo ndali ti so lo pensé so ane mingi. So ye ti buba! Ti azo so aye Jéhovah, acommandement ti lo ayeke ye so “ane pëpe,” me a yeke ye so abata fini ti ala.—1 Jean 5:3.

8. Ti yü agbakuru ti nzoni tënë tongana poro na gere ti e aye ti tene nyen?

⁸ Paul awa nga e ti yü agbakuru ti nzoni tënë ti siriri tongana poro na gere ti e. So ti tene a lingbi e duti lakue nduru ti fa nzoni tënë ti Royaume. Tongana e fa tënë ti Bible na azo, mabe ti e ayeke kpengba. Tongana e bâ tongana nyen la awakua ti Jéhovah na ndö ti sese kue ayeke fa tënë na alege kue so azi na ala akpengba e mingi. Na tapande, ala yeke fa tënë na place ti kua wala na ekole, da na da, na ando ti dengo buze, na ngoi so ala gue ti vo ye, na ngoi so ala gue ti bâ afami ti ala so ayeke aTémoin ape wala na ngoi so ala yeke sara lisoro na azo so ala hinga ala nga même  na ngoi so ala yeke gï na yanga-da. Tongana mbeto asara e si e zia ti fa tënë, e yeke duti tongana mbeni turugu so azi poro na gere ti lo na ngoi ti bira; a yeke duti ngangu ape ti tene lo wara kä na gere ti lo. A yeke duti ngangu na lo ti tiri nga lo lingbi ape ti sara ye alingbi na yanga so kota zo ti lo amû.

9. Ngbanga ti nyen la e bezoin ti mû kota vala ti mabe?

⁹ Kota vala ti mabe aye ti sara tënë ti mabe so e yeke na ni na Jéhovah. E yeke na confiance so lo yeke sara ye alingbi na azendo ti lo kue. Mabe so ayeke mû maboko na e “ti mingo wâ ti akokora kue ti Zo ti sioni.” Ngbanga ti nyen la e bezoin ti mû kota vala so? Ngbanga ti so a yeke bata e si afango ye ti a-apostat ahanda e ape nga e découragé ape na ngoi so azo ahe e ndali ti aye so e mä na bê na ni. Tongana e yeke na mabe ape, e yeke wara ngangu ape ti luti na azo so agi ti pusu e ti sara sanka ti aye so Jéhovah ahunda na e. Me ngoi oko oko kue so e ke ti sara mbeni ye so Jéhovah ake na place ti kua wala na ekole, vala ti e ayeke bata e la (1 Pi. 3:15). Ngoi oko oko kue so e ke mbeni kua so a futa e dä nzoni mingi me so ayeke kanga lege na e ti voro Jéhovah nzoni, vala ti e ayeke bata e la (aHéb. 13:5, 6). Nga na ngoi kue so e ngbâ ti  sara na Jéhovah atâa a kanga lege na e, vala ti e ayeke bata e la.—1 aThes. 2:2.

10. Casque ti salut ayeke nyen? Ngbanga ti nyen la a lingbi e yü ni?

¹⁰ Casque ti salut ayeke beku so Jéhovah amû na e, beku so lo yeke sö e ande na kuâ nga so lo yeke futa azo kue so asara ye so bê ti lo aye (1 aThes. 5:8; 1 Tim. 4:10; Tite 1:1, 2). Legeoko tongana ti so mbeni casque ayeke bata li ti mbeni turugu, beku ti salut ayeke bata ngangu ti gbungo li ti e. Na lege wa? Beku so ayeke sara si li ti e angbâ na ndö ti azendo ti Nzapa nga ayeke mû maboko na e ti duti na nzoni bango ndo na ndö ti akpale ti e. E yeke yü casque so tongana nyen? E yeke yü ni tongana e ngbâ ti sara si apensé ti e ague oko na ti Nzapa. Na tapande, e zia beku ti e pëpe na ndö ti amosoro so ayeke ye ti ziango bê dä pëpe, me na ndö ti Nzapa.—Ps. 26:2; 104:34; 1 Tim. 6:17.

11. Épée ti yingo ayeke nyen? Ngbanga ti nyen la a lingbi e sara kua na ni?

¹¹ Épée ti yingo ayeke Bible. Épée so ayeke na ngangu ti fa na gigi nda ti amvene kue nga ti zi azo na gbe ti ngbâa ti afango ye ti wataka nga na asioni sarango ye (2 aCor. 10:4, 5; 2 Tim. 3:16, 17; aHéb. 4:12). E yeke manda ti sara kua nzoni na épée so na lege ti mandango ye e wani nga na lege ti afango ye so e wara na mbage ti bungbi ti Jéhovah (2 Tim. 2:15). Na ndö ti aye ti bira so Jéhovah amû na e, lo mû nga na e mbeni ngangu ye so ayeke bata e. A yeke nyen?

12. Mbeni ye nde wa la e bezoin ni? Ngbanga ti nyen?

¹² Mbeni turugu so ahinga ti tiri bira mingi ahinga so gï lo oko lo lingbi ti sö benda na ndö ti gbâ ti aturugu ape; lo bezoin mungo maboko ti amba ti lo aturugu. Legeoko nga, gï e oko e lingbi pëpe ti luti na Satan nga na azo so amû peko ti lo; e bezoin mungo maboko ti aita ti e. Jéhovah amû na e “sewa ti aita” so ayeke na yâ ti dunia kue so alingbi ti mû maboko na e.—1 Pi. 2:17.

13. Ti gue oko na aHébreu 10:24, 25, abungbi ti e ayeke mû maboko na e tongana nyen?

¹³ E yeke wara nga mungo maboko na lege ti abungbi ti e. (Diko aHébreu 10:24, 25.) E kue na ambeni ngoi e yeke découragé, me tongana a si, abungbi alingbi ti kpengba e. Acommentaire so aita amû na bê ti ala kue ayeke kpengba e. Adiskur nga na adevoir so aita ayeke sara alingbi ti pusu e ti ngbâ ti sara na Jéhovah. Nga, apendere lisoro so e sara kozo nga na peko ti bungbi ayeke kpengba e (1 aThes. 5:14). Na ndo ni, abungbi ti e amû lege na e ti wara ngia so zo ayeke wara tongana lo mû maboko na amba ti lo (Kus. 20:35; aRom. 1:11, 12). Abungbi ti e amû nga maboko na e na ambeni lege nde. Abungbi amû maboko na e ti duti anzoni wafango tënë nga anzoni wafango ye. Na tapande, e yeke manda ti sara kua nzoni na agbakuru so e yeke fa na ye na azo. Tongaso, leke abungbi nzoni. Na ngoi ti bungbi, mä tënë nzoni. Sara ye alingbi na aye so mo manda na bungbi. Tongana mo sara aye so, mo yeke ga “mbeni nzoni turugu ti Christ Jésus.”—2 Tim. 2:3.

14. Mbeni mungo maboko nde wa la e yeke na ni?

¹⁴ Gbâ ti a-ange so ayeke ngangu mingi ayeke mû nga maboko na e. Gbu li na ndö ti ye so mbeni ange oko apeut ti sara (És. 37:36). Fadeso gbu li na ndö ti ye so gbâ ti angangu ange alingbi ti sara. Mbeni zo wala mbeni sioni yingo alingbi na angangu turugu ti Jéhovah so ape. Jéhovah ayeke ngangu mingi. Tongaso, tongana lo yeke na terê ti e, e yeke duti lakue ngangu ahon azo so ake e atâa wungo ti ala ayeke oke (aJu. 6:16). Tënë  so ayeke biani tâ tënë. Girisa atënë so ape tongana mbeni mba ti mo ti place ti kua, ti ekole wala mbeni fami so ayeke Témoin ape atene mbeni tënë wala asara mbeni ye ti zia mbeto na yâ ti mo. Girisa ape so mo yeke mo oko ape na yâ ti tiri so. Jéhovah la ayeke fa lege na mo.

15. Tongana ti so Ésaïe 54:15, 17 atene, ngbanga ti nyen la zo oko alingbi pëpe ti sara si awakua ti Nzapa azia ti fa tënë?

¹⁵ Dunia so ayeke na gbe ti komandema ti Satan ayeke na araison mingi ti ke e. E yeke sara poroso ape nga e yeke sara bira ape. E yeke fa iri ti Nzapa na azo, e yeke fa na ala so gï Royaume ti lo oko la ayeke ga na siriri nga e yeke sara ye alingbi na aye so lo hunda na e. E yeke fa na azo so zo so ayeke komande na ndö ti dunia so ayeke sioni zo ti mvene nga zo ti fango zo (Jean 8:44). E yeke fa nga so a ga nduru ti futi dunia ti Satan awe. Ye oko, Satan na azo ti lo ayeke kanga yanga ti e lâ oko ape. Me e yeke ngbâ ti mû gonda na Jéhovah na alege kue so e lingbi ti sara. Atâa so Satan ayeke na ngangu mingi, lo wara lege ape ti kanga lege na tënë ti Royaume ti si na azo na ndö ti sese kue. A yeke ngbanga ti so Jéhovah ayeke bata e.—Diko Ésaïe 54:15, 17.

16. Jéhovah ayeke sö ande awakua ti lo na ngoi ti kota ye ti vundu tongana nyen?

¹⁶ Nyen la ayeke ku e na devant? Na ngoi ti kota ye ti vundu, Jéhovah ayeke sö e ande na alege use so ahon gbungo li ti zo. Kozo ni, lo yeke sö awakua be-ta-zo ti lo na ngoi so lo yeke pusu agbia ti sese ti futi Babylone, Ngangu gbata, abungbi ti vorongo nzapa ti wataka kue (Apoc. 17:16-18; 18:2, 4). Na pekoni, lo yeke sö azo ti lo na ngoi so lo yeke futi tanga ti aye ti dunia ti Satan na Harmaguédon.—Apoc. 7:9, 10; 16:14, 16.

17. Ti ngbâ nduru na Jéhovah ayeke mû maboko na e tongana nyen?

¹⁷ Tongana e ngbâ nduru na Jéhovah, Satan alingbi pëpe ti sara na e mbeni sioni ye so angbâ lakue lakue. Ti tâ tënë ni, lo la a yeke futi ande lo biani biani (aRom. 16:20). Tongaso, yü aye ti bira kue nga zi ni ape. Gi ti tiri gï mo oko ape. Mû maboko na aita ti mo. Nga, zia Jéhovah afa lege na mo. Tongana mo sara ni, mo lingbi ti hinga biani so Babâ ti mo ti yayu so aye mo mingi ayeke kpengba mo nga ayeke bata mo.—És. 41:10.