1. Aiseā na talosaga atu ai Iesu iā Ieova ina ia leoleo ona soo?

I LE pō mulimuli o le soifuaga o Iesu o se tagata, na ia manatunatu ai i faafitauli o le a fesagaʻia e ona soo. Na uunaʻia Iesu e le alofa mo ona soo e talosaga atu i lona Tamā “ia leoleo iā i latou ona o lē ua leaga.” (Ioa. 17:14, 15) Na silafia e Iesu, pe a toe foʻi i le lagi o le a faaauau pea ona faasagatau Satani le Tiapolo i so o se tasi e fia auauna iā Ieova. O lea la, e manaʻomia e tagata o Ieova le puipuiga.

2. E faapefea ona tatou mautinoa o le a tali mai Ieova i a tatou tatalo?

² Na tali Ieova i tatalo a Iesu ona e alofa i Lona Alo. Pe a tatou faia le mea sili e faafiafia ai le finagalo o Ieova, o le a ia alofa iā i tatou ma faafofoga mai i a tatou tatalo mo se fesoasoani ma le puipuiga. E faaauau pea ona tausia ma le alofa e Ieova lana fanau, ona o ia o se Ulu e manatu mamafa i lona aiga. Pe a ia lē faia faapea, o le a taʻuleagaina ai lona suafa ma lona talaaga.

3. Aiseā e tatou te manaʻomia ai le puipuiga a Ieova i aso nei?

³ Ua sili atu ona tatou manaʻomia le puipuiga a Ieova i le taimi lenei nai lo se isi lava taimi, auā ua lafo ifo Satani i le lalolagi “ua lotoa tele.” (Faaa. 12:12) Ua ia faasesēina nisi o loo sauāina i tatou, e manatu o loo latou faia “se auaunaga paia i le Atua.” (Ioa. 16:2) O nisi ua latou sauāina i tatou, ona e lē o i tatou o ni tagata o le lalolagi. Po o le ā lava le māfuaaga e sauāina ai i tatou ae e tatou te lē fefefe ai. Aiseā? Ona o loo faapea mai le Afioga a le Atua: “E faamaoni le Alii, e na te faatumauina outou ma puipuia outou mai lē o leaga.”(2 Tesa.  3:3) E faapefea ona puipuia i tatou e Ieova? Seʻi o tatou iloiloina ni auala se lua.

4. E tusa ai ma le Efeso 6:13-17, o le ā ua saunia e Ieova mo i tatou?

⁴ Ua saunia e Ieova le ofutau e puipuia ai i tatou mai i osofaʻiga a Satani. (Faitau le Efeso 6:13-17.) E malosi ma aogā lenei ofutau faaleagaga. Ae e faatoʻā mafai ona puipuia i tatou e lenei ofutau, pe a tatou oofu ma faaauau pea ona ofuina ona vaega taʻitasi. O le ā ua faaāta mai e vaega taʻitasi o le ofutau? Seʻi o tatou iloiloina ona vaega taʻitasi.

5. O le ā le fusipaʻu o le upu moni, ma aiseā e tatau ai ona tatou fusiina?

⁵ Ua faaāta e le fusipaʻu o le upu moni, le upu moni o loo i le Afioga a le Atua le Tusi Paia. Aiseā e tatau ai ona tatou fusiina lenei fusipaʻu? Talu ai o Satani o “le tamā o le pepelo.” (Ioa. 8:44) Ua faitau afe tausaga o pepelo Satani ma o loo ia “faasesēina le lalolagi atoa.” (Faaa. 12:9) Ae ua puipuia i tatou e le upu moni o le Tusi Paia mai le faasesēina. E faapefea ona tatou fusiina lenei fusipaʻu faafaatusa? E tatou te faia faapea e ala i le aʻoaʻoina o le upu moni e faatatau iā Ieova, tapuaʻi iā te ia “i le agaga ma le upu moni,” ma fai mea uma ma le faamaoni.—Ioa. 4:24; Efe. 4:25; Epe. 13:18.

6. O le ā le ufifatafata o le amiotonu, ma aiseā e tatau ai ona tatou ofuina?

⁶ Ua faaāta e le ufifatafata o le amiotonu tapulaa amiotonu a Ieova. Aiseā e tatau ai ona tatou ofuina le ufifatafata? E pei ona puipuia e se ufifatafata le fatu o se fitafita mai le faamanuʻalia, e faapena foʻi ona puipuia e le ufifatafata o le amiotonu o tatou loto po o le tagata i totonu, mai aafiaga leaga o lenei lalolagi. (Faata. 4:23) E faatalitalia i tatou e Ieova e auauna ma alolofa iā te ia ma o tatou loto atoa. (Mata. 22:36, 37) E taumafai Satani ia vaeluaina o tatou loto, e ala i le faaosooso o i tatou e mananaʻo i mea a le lalolagi lea e inosia e Ieova. (Iako. 4:4; 1 Ioa. 2:15, 16) Ae pe a lē taulau ana togafiti, ona ia taumafai lea e sauāina i tatou ina ia tatou faia ai ni gaoioiga e feteenaʻi ma tapulaa a Ieova.

7. E faapefea ona tatou ofuina le ufifatafata o le amiotonu?

⁷ E tatou te ofuina le ufifatafata o le amiotonu, pe a tatou usitaʻia tapulaa a Ieova e iloa ai le mea saʻo ma le mea sesē, ma faatatau na tapulaa i o tatou olaga. (Sala. 97:10) Ua manatu nisi ua soona faasāsā naʻuā tapulaa a Ieova. Peitaʻi, pe a tatou lē toe faatatauina mataupu silisili a le Tusi Paia i o tatou olaga, ua pei la i tatou o se fitafita ua aveese lona ufifatafata a o fai le taua, ona e manatu ua mamafa tele. Pagā le valea o lenā faaiʻuga! Ae o i latou e alolofa iā Ieova, e latou te iloa “e lē mamafa” ana poloaʻiga ae e faasaoina ai ola.—1 Ioa. 5:3.

8. O le ā e uiga i ai le faaseevaeina o tatou vae e nofosauni e talaʻi le tala lelei?

⁸ Ua faalaeiauina foʻi i tatou e Paulo ina ia faaseevaeina o tatou vae e nofosauni e talaʻi le tala lelei o le filemu. I se isi faaupuga, e tatau ona tatou nofosauni e talaʻi le tala lelei o le Malo. E faamalosia o tatou lava faatuatua pe a tatou faasoa atu le feʻau o le Tusi Paia i isi. O se faalaeiauga le vaaia o tagata o Ieova i le lalolagi o loo saʻili avanoa e faalauiloa atu ai le tala lelei i aʻoga, galuega, oganuu pisinisi, pe talaʻi mai i lea fale i lea fale. O nisi e latou te faasoa atu le feʻau pe a fai faatauga, asiasi i aiga lē talitonu, talanoa faasamasamanoa ma ē masani ai pe nofo foʻi i le fale. Pe a tatou fefefe ma lē toe talaʻi, ua pei la i tatou o se fitafita ua talai ese ona seevae a o fai le taua, o le a faigofie ona faamanuʻalia ona vae. O le iʻuga, o le a faigatā ona ia puipuia o ia ma lē mafai ai ona mulimuli i faatonuga a lona taʻitaʻiʻau.

9. Aiseā e manaʻomia ai ona tatou tauaveina le talita telē o le faatuatua?

 ⁹ Ua faaāta e le talita telē o le faatuatua lo tatou faatuatua iā Ieova. E tatou te mautinoa o le a ia faataunuuina ana folafolaga uma. O le faatuatua e fesoasoani iā i tatou e “tineia ai aū fanafana mū uma a lē o loo leaga.” Aiseā e manaʻomia ai ona tatou tauaveina lenei talita telē? Ona e puipuia ai i tatou mai le faasesēina i aʻoaʻoga a i latou ua liliu ese mai le upu moni. E tatou te lē lotovaivai ai foʻi pe a ulagia i tatou ona o tatou talitonuga. A aunoa ma le faatuatua, o le a leai se malosi e tetee atu ai i ē faamalosia i tatou ia lē amanaʻia tapulaa a Ieova. Ae o taimi uma e tatou te teena ai le faia o se mea e lē fiafia ai le finagalo o Ieova i le galuega po o le aʻoga, ua tatou tauaveina la lo tatou talita. (1 Pete. 3:15) O taimi uma foʻi e tatou te lē talia ai se galuega e lelei le totogi ona e lē fetaui ma ā tatou faasologa o le tapuaʻiga, ua tatou tauaveina lo tatou talita. (Epe. 13:5, 6) E puipuia i tatou e lo tatou talita i taimi uma e tatou te auauna ai iā Ieova e ui i teteega.—1 Tesa. 2:2.

10. O le ā le puloutau o le faaolataga, ma aiseā e manaʻomia ai ona tatou pulouina?

¹⁰ O le puloutau o le faaolataga, o le faamoemoe mai iā Ieova. E tatou te faamoemoe o le  a tauia e Ieova i latou uma e faia lona finagalo, ma e tusa lava pe tatou te feoti o le a ia toe faatutūina i tatou. (1 Tesa. 5:8; 1 Timo. 4:10; Tito 1:1, 2) E pei lava ona puipuia e se puloutau le ulu o se fitafita, e faapena foʻi ona puipuia e le faamoemoe o le faaolataga o tatou mafaufauga. E faapefea? O lenā faamoemoe e tatou te taulaʻi ai pea i folafolaga a le Atua, ma fesoasoani ia saʻo ai la tatou vaaiga i faafitauli. E faapefea ona tatou pulouina lenei puloutau? E ala i le faaōgatusa o tatou mafaufauga ma le finagalo o le Atua. O se faataʻitaʻiga, e tatou te lē faamoemoe i ʻoa e lē tumau, ae e tatou te faamoemoe i le Atua.—Sala. 26:2; 104:34; 1 Timo. 6:17.

11. O le ā le pelu o le agaga, ma aiseā e manaʻomia ai ona tatou faaaogāina?

¹¹ O le pelu o le agaga, o le Afioga a le Atua le Tusi Paia. E iai le malosi i lenā pelu e vaevaeina ai faiga taufaasesē uma ma faasaʻoloto mai ai tagata i le faapologaina i aʻoaʻoga sesē ma masaniga leaga. (2 Kori. 10:4, 5; 2 Timo. 3:16, 17; Epe. 4:12) E tatou te aʻoaʻoina le auala e faaaogā lelei ai lenei pelu, e ala i suʻesuʻega a le tagata lava ia ma toleniga ua tatou maua mai i le faalapotopotoga a le Atua. (2 Timo. 2:15) Ua saunia foʻi e Ieova se isi puipuiga malosi mo i tatou. O le ā lenā puipuiga?

12. O le ā le isi fesoasoani e tatou te manaʻomia, ma aiseā?

¹² E iloa e se fitafita tomai, e lē mafai ona tau na o ia faasaga i se ʻautau to’atele ma manumalo ai. E na te manaʻomia le fesoasoani a isi fitafita. E lē mafai foʻi ona tatou manumalo mai iā Satani ma ana ʻau pe a tatou tetee atu na o i tatou. E tatou te manaʻomia le fesoasoani a o tatou uso ma tuafāfine. Ua saunia e Ieova lo tatou “ʻauuso atoa” e fesoasoani iā i tatou.—1 Pete. 2:17.

13. I le Eperu e 10:24, 25, o ā aogā e tatou te maua mai i sauniga?

¹³ O se tasi o auala e tatou te maua ai le fesoasoani, o le auai i a tatou sauniga. (Faitau le Eperu 10:24, 25.) E iai taimi e tatou te lagona uma ai le lotovaivai, ae e faamalosia i tatou pe a auai i sauniga. E faalaeiauina i tatou i sao lava saunia o uso ma tuafāfine. O lauga faale-Tusi Paia ma faataʻitaʻiga i sauniga, e faamalosia ai lo tatou maumauaʻi e auauna iā Ieova. E faamalosia foʻi i tatou i talanoaga faalaeiau a o leʻi amata pe māeʻa foʻi le sauniga. (1 Tesa. 5:14) O a tatou sauniga o se avanoa e tatou te fesoasoani ai i isi, ma maua ai le olioli. (Galu. 20:35; Roma 1:11, 12) E iai foʻi isi vala e fesoasoani ai sauniga iā i tatou. E faaleleia ai o tatou tomai o ni tagata talaʻi ma ni faiaʻoga. O se faaaʻoaʻoga, ua tatou aʻoaʻoina i sauniga le auala e faaaogā lelei ai la tatou meafaigaluega mo le aʻoaʻo atu. O lea, ia sauniuni lelei mo sauniga a le faapotopotoga ma faalogo lelei a o fai le sauniga. Pe a māeʻa le sauniga, ia faatatau le toleniga na e maua mai ai. O le faia o na mea, o le a avea ai oe “o se fitafita lelei a Keriso Iesu.”—2 Timo. 2:3.

14. O ā isi fesoasoani o loo mafai ona tatou mauaina?

¹⁴ Ua tatou maua foʻi le fesoasoani a le faitau afe o agelu malolosi. Seʻi manatu i mea e mafai ona fai e se agelu? (Isa. 37:36) Ae, seʻi manatu la i mea e mafai ona faataunuu e se ʻautau o agelu malolosi? E leai se tagata po o se temoni e mafai ona faatoʻilaloina le ʻautau malosi a Ieova. Po o le ā lava le toʻatele o ē faasagatau mai, ae e sili atu ona malosi se auauna faamaoni a Ieova ona o loo ʻau Ieova ma ia. (Faama. 6:16) Maʻeu le moni o lenā manatu! Ia manatua pea lenā manatu pe a e lagona le lotovaivai i se tala po o se gaoioiga e fai atu e se tasi e te lua faigaluega pe aʻoaʻoga faatasi, po o se tauaiga lē talitonu. Ia manatua  e lē na o oe o loo tauina lenei taua. O loo ʻau Ieova ma oe ona o loo e mulimuli i ana taʻiala.

15. E tusa ai ma le Isaia 54:15, 17, aiseā e lē mafai ai e se tasi ona taofia le galuega talaʻi a tagata o le Atua?

¹⁵ E tele māfuaaga e ʻinoʻino ai le lalolagi o loo pulea e Satani iā i tatou. E faaauau pea ona tatou matuā solitū i faiga faapolotiki, ma e tatou te lē auai foʻi i vaegaʻau. E tatou te faalauiloa le suafa o le Atua, faaauiluma lona Malo ua na o le pau lea o le faamoemoe mo le filemu, ma usitaʻia ana tapulaa amiotonu. E tatou te faamaonia atu o le pule o lenei lalolagi o le tamā o le pepelo ma o se fasioti tagata. (Ioa. 8:44) E tatou te talaʻia atu foʻi ua toeitiiti ona faaumatia lea o le lalolagi a Satani. E lē mafai ona taofia e Satani ma ana ʻau la tatou galuega talaʻi. E tatou te faamamaluina pea Ieova i auala uma e tatou te mafaia. E ui e malosi Satani, ae e lē mafai ona ia taofia le oo atu o le feʻau o le Malo i le lalolagi aoao. O le puipuiga a Ieova ua mafai ai ona tatou faataunuuina lenā galuega.—Faitau le Isaia 54:15, 17.

16. O ā auala o le a faasaoina ai e Ieova ona tagata i le taimi o le puapuaga tele?

¹⁶ O ā mea o le a tutupu i le lumanaʻi? I le taimi o le puapuaga tele, o le a faasaoina i tatou e Ieova i ni auala mataʻina se lua. Muamua, o le a ia faasaoina ana auauna i le taimi e na te faapogaia ai tupu o le lalolagi e faaumatia Papelonia le Aai Tele le emepaea o lotu sesē. (Faaa. 17:16-18; 18:2, 4) O le a ia faasaoina foʻi ona tagata pe a ia faaumatia atoatoa iā Amaketo le vaega o le a totoe o le lalolagi a Satani.—Faaa. 7:9, 10; 16:14, 16.

17. E faapefea ona aogā iā i tatou le vavalalata pea iā Ieova?

¹⁷ E lē mafai e Satani ona faaleagaina i tatou e faavavau pe a tatou vavalalata pea iā Ieova. O le mea moni o le a faaumatia Satani e faavavau. (Roma 16:20) O lea, ia tatou oofu ma faaauau pea ona ofuina le ofutau atoatoa. Ia aua lava neʻi e tau na o oe faasaga iā Satani ma lana lalolagi. Ia fesoasoani i ou uso ma tuafāfine ma ia mulimuli i le taʻitaʻiga a Ieova. O le faia faapea, o le a e mautinoa ai e faamalosia ma puipuia oe e lou Tamā alofa i le lagi.—Isa. 41:10.