1. Fu san ede Yesus aksi Yehovah fu kibri den disipel fu en?

NA A lasti neti di Yesus ben de na grontapu a ben e prakseri ala den problema di den disipel fu en ben o kisi. Fu di Yesus ben lobi den disipel fu en, meki a aksi en papa fu „kibri den, so taki na ogriwan no kan du den ogri” (Yoh. 17:14, 15). Yesus ben sabi taki te a ben o drai go baka na hemel, Satan Didibri ben o tan feti nanga iniwan sma di wani dini Yehovah. A de krin taki Yehovah ben o abi fu kibri a pipel fu en.

2. Fa wi kan den seiker taki Yehovah o piki den begi fu wi?

² Yehovah piki a begi fu Yesus fu di a lobi en Manpikin. Efu wi e du muiti fu gi yesi na Yehovah a o lobi wi tu èn a o arki den begi fu wi te wi e aksi en fu yepi èn kibri wi. Neleki wan papa di e broko en ede nanga en osofamiri Yehovah o tan sorgu den pikin fu en fu di a lobi den. Efu a no ben o du dati, dan a ben o kisi porinen.

3. Fu san ede a prenspari taki Yehovah kibri wi na ini a ten disi?

³ Na ini a ten disi a prenspari srefisrefi taki Yehovah kibri wi. Den trowe Satan komoto na hemel èn „a abi bigi atibron” (Openb. 12:12). A e meki sma bribi taki den e du santa wroko gi Gado te den e frufolgu wi (Yoh. 16:2). Tra sma di no e bribi na ini Gado e frufolgu wi fu di wi no de wan pisi fu grontapu. Toku wi no abi fu frede. Fu san ede? Fu di Gado Wortu e taki: „Masra e du ala ten san a pramisi. A o gi unu deki-ati èn a o kibri unu gi na ogriwan” (2 Tes. 3:3). Fa Yehovah e kibri wi? Meki wi go luku tu fasi.

4. Te yu e luku Efeisesma 6:13-17, dan san Yehovah gi wi fu kibri wi?

⁴ Yehovah gi wi difrenti sani di kan kibri wi te Satan e kon feti nanga wi. (Leisi Efeisesma 6:13-17.) Den sani disi e wroko bun èn den man kibri wi trutru. Ma den o kibri wi soso, te wi weri ibriwan fu den ala ten. San na den sani disi? Meki wi go luku den wan-fru-wan.

5. San na a leribuba di wi musu weri èn fu san ede wi musu weri en?

⁵ „Meki ala sani di tru de leki wan leribuba di tai lontu un mindribere.” Ala sani di tru na den sani di skrifi na ini Gado Wortu Bijbel. Fu san ede wi musu weri a leribuba disi? Na fu di Satan na „a tata fu ala lei” (Yoh. 8:44). Dusundusun yari kaba a e lei èn a „kori sma na heri grontapu” (Openb. 12:9). Ma den tru tori di skrifi na ini Bijbel e kibri wi so taki Satan no man kori wi. Fa wi kan sori taki wi e weri a leribuba disi? Wi e weri en te wi kon sabi suma na Yehovah trutru, te wi e „anbegi en nanga yepi fu a santa yeye èn nanga yepi fu san tru”, èn te wi de eerlijk na ini ala san wi e du.​—Yoh. 4:24; Ef. 4:25; Hebr. 13:18.

6. San wi musu weri fu kibri wi borsu èn fu san ede wi musu weri en?

⁶ „Retidu musu de leki wan sani di unu e weri fu kibri un borsu.” Fu san ede wi musu weri en? Na ini owruten wan srudati ben e weri wan sani fu kibri en borsu so taki feanti no ben man boro en ati. Na so retidu e kibri wi ati na agersi fasi, so taki na ogri grontapu disi no abi krakti na wi tapu (Odo 4:23). Yehovah wani taki wi lobi en èn taki wi e dini en nanga wi heri ati (Mat. 22:36, 37). Ma Satan no wani dati. Dati meki a e pruberi fu meki wi lobi den sani fu grontapu di Yehovah no lobi kwetikweti (Yak. 4:4; 1 Yoh. 2:15, 16). Efu a e si taki a sani disi no e wroko, dan a o suku wan fasi fu tapu skreki gi wi so taki wi trangayesi den wet fu Yehovah.

7. O ten retidu de leki wan sani di e kibri wi borsu?

⁷ Efu wi wani taki retidu de leki wan sani di e kibri wi borsu, dan wi musu gi yesi na den wet fu Yehovah di e sori san bun èn san no bun (Ps. 97:10). Son sma feni taki den wet fu Yehovah e tapu den fu du san den wani. Ma efu wi no du san Bijbel e taki, dan wi o de leki wan srudati na ini wan feti di e puru a sani di e kibri en borsu, soso fu di a feni taki a hebi tumusi. Dati ben o de wan don sani! Den sma di lobi Yehovah no e si den wet fu en leki „wan hebi”, ma leki sani di e kibri den libi.​—1 Yoh. 5:3.

8. A faya di wi abi fu preiki a bun nyunsu fu freide musu de leki susu na wi futu. San disi wani taki?

⁸ Paulus ben taki tu dati „a faya di un abi fu preiki a bun nyunsu fu freide musu de leki susu na un futu”. Sobun, ala ten wi musu de klariklari fu preiki a bun nyunsu fu a Kownukondre. Te wi e fruteri sma a boskopu fu Bijbel, dan wi eigi bribi e kon tranga. A e gi wi deki-ati trutru fu si fa a pipel fu Yehovah na heri grontapu e suku okasi fu prati a bun nyunsu te den de na wroko, na skoro, na bisnis kontren, te den e preiki oso fu oso, te den e go bai sani, te den e go luku den famiri fu den di no de Kotoigi, te den e taki nanga tra sma di den sabi, èn srefi te den no man komoto na oso fu wan pisi ten. Efu wi ben o tapu fu preiki fu di wi e frede, dan wi ben o de leki wan srudati di e puru den  susu fu en aladi a de na ini wan feti. A ben o man kisi mankeri na en futu makriki. Efu dati pasa, dan a ben o muilek gi en fu du san a legre-edeman fu en taki.

9. Fu san ede wi musu abi wan tranga bribi?

⁹ A bribi di wi abi na ini Yehovah musu de leki „wan bigi skelt” gi wi. Wi e bribi taki a o du ala san a pramisi. Nanga a bribi disi wi man ’kiri a faya fu ala den peiri di na ogriwan e sutu kon na wi tapu’. Fu san ede wi musu abi a bigi skelt disi? A e kibri wi gi den falsi leri fu sma di drai baka gi a bribi èn a e yepi wi fu no lasi-ati te sma e krutu a bribi fu wi. Sondro bribi wi no o man kakafutu gi sma te den wani dwengi wi fu trangayesi den wet fu Yehovah. Ma ibri leisi te wi de na wrokope noso na skoro èn wi e weigri fu du wan sani di Yehovah no wani, dan a bribi fu wi de leki wan skelt di e kibri wi (1 Petr. 3:15). Efu wi e weigri fu teki wan wroko fu di a o tapu wi fu du san wi musu du leki Kresten, dan a bribi fu wi de leki wan skelt di e kibri wi (Hebr. 13:5, 6). Èn ibri leisi te wi e gi yesi Yehovah aladi wi e kisi frufolgu, dan a bribi fu wi de leki wan skelt di e kibri wi.​—1 Tes. 2:2.

10. San na a hèlm fu frulusu èn fu san ede wi musu weri en?

 ¹⁰ „A hèlm fu frulusu” na a howpu di Yehovah e gi wi. Disi na a howpu taki a o puru dede èn taki a o blesi ala den sma di e du a wani fu en (1 Tes. 5:8; 1 Tim. 4:10; Tit. 1:1, 2). Neleki fa wan hèlm e kibri na ede fu wan srudati, na so a howpu di wi abi fu kisi frulusu e kibri wi frustan. Fa so? A howpu disi e meki wi poti prakseri na den pramisi fu Gado èn a e yepi wi fu no bruya te wi e kisi problema. O ten wi kan taki dati wi e weri a hèlm disi? Wi kan taki dati te wi e du muiti fu denki soleki fa Gado e denki. Fu eksempre, wi no e poti wi frutrow tapu gudu di kan lasi gowe, ma wi e poti wi frutrow tapu Gado.​—Ps. 26:2; 104:34; 1 Tim. 6:17.

11. San na a feti-owru fu a yeye èn fu san ede wi musu gebroiki en?

¹¹ „A feti-owru fu a yeye” na Gado Wortu, Bijbel. A feti-owru dati man tyari ala sortu lei kon na krin èn a e fri sma fu falsi leri nanga takru gwenti (2 Kor. 10:4, 5; 2 Tim. 3:16, 17; Hebr. 4:12). Wi e leri fu gebroiki a feti-owru disi bun te wi e studeri Bijbel èn te wi e teki a leri di wi e kisi fu Gado organisâsi (2 Tim. 2:15). Boiti ala den fetisani disi Yehovah gi wi ete wan prenspari sani di kan kibri wi. San na dati?

12. Sortu tra sani wi abi fanowdu ete èn fu san ede?

¹² Wan bun srudati sabi taki en wawan no man wini wan bigi legre. A abi den tra srudati fanowdu. Na so wi wawan no man wini a feti teige Satan nanga den bakaman fu en. Wi abi wi brada nanga sisa fanowdu. Yehovah gi wi brada nanga sisa na heri grontapu di de klariklari fu yepi wi.​—1 Petr. 2:17.

13. Te yu e luku Hebrewsma 10:24, 25, dan fu san ede a bun fu go na den konmakandra?

¹³ Wan fasi fa wi e kisi yepi, na te wi e go na den konmakandra. (Leisi Hebrewsma 10:24, 25.) Wi alamala e firi brokosaka son leisi, ma den konmakandra kan meki wi firi bun baka. Wi e kisi deki-ati te den brada nanga sisa e gi piki nanga den heri ati. Den Bijbel-lezing nanga den demonstrâsi e gi wi a krakti fu tan dini Yehovah. Wi e kisi deki-ati tu te wi e taki nanga makandra fosi èn baka den konmakandra (1 Tes. 5:14). Boiti dati, den konmakandra e gi wi okasi tu fu yepi wi brada nanga sisa èn a sani dati e gi prisiri (Tori 20:35; Rom. 1:11, 12). Wan tra fasi de tu fa den konmakandra e yepi wi. Wan fu den sani di wi e leri, na fa fu gebroiki den sani na ini a Teaching Toolbox. Fu dati ede, sreka yusrefi bun. Te yu de na den konmakandra, arki bun, èn baka a konmakandra, du san yu leri. Te yu e du den sani disi, dan yu o tron „wan bun srudati fu Krestes Yesus”.​—2 Tim. 2:3.

14. Suma e yepi wi tu?

¹⁴ Wi e kisi yepi tu fu den milyunmilyun tranga engel. Prakseri san wán engel nomo kan du (Yes. 37:36). Prakseri now san wan heri legre fu engel ben o man du. Nowan libisma noso ogri yeye o man wini Yehovah nanga a tranga legre fu en. Yehovah abi ala makti. Sobun, efu a de na wi sei, nowan gensman o man wini wi, awinsi omeni den de (Krut. 6:16). Wi no abi fu tweifri na a sani disi! Tan prakseri a sani disi te sma na wrokope, sma na skoro, noso famiriman di no de  Kotoigi e taki noso du sani fu meki wi firi brokosaka. Memre taki a no yu wawan de na ini a feti. Yehovah de nanga yu fu di yu e gi yesi na en.

15. Soleki fa Yesaya 54:15, 17 e sori, dan fu san ede nowan sma man tapu Gado pipel fu preiki a bun nyunsu?

¹⁵ A grontapu fu Satan abi furu reide fu teige wi. Wi no e teki prati na ini politiek èn wi no e go na feti. Wi e fruteri ala sma fu Gado nen èn wi e sori den taki a Kownukondre na a wan-enkri sani di kan tyari freide kon na heri grontapu. Boiti dati, wi e tan gi yesi na den wet fu Yehovah. Wi e sori sma taki a tiriman fu grontapu na wan ogri-ati leiman èn kiriman (Yoh. 8:44). Wi e fruteri sma tu taki heri esi a grontapu fu Satan o kisi pori. Ma noiti Satan nanga den bakaman fu en o man tapu wi fu preiki. Na presi fu dati wi o tan prèise Yehovah na ala fasi. Awinsi Satan abi furu makti, toku a no o man tapu wi fu preiki a Kownukondre boskopu gi sma na heri grontapu. Wi man du a sani disi soso fu di Yehovah e kibri wi.​—Leisi Yesaya 54:15, 17.

16. Fa Yehovah o kibri en pipel na ini a bigi banawtu?

¹⁶ San musu pasa ete? Na ini a bigi banawtu Yehovah o kibri wi na tu prenspari fasi. A fosiwan, na taki a o kibri den futuboi fu en te den kownu fu grontapu o pori Babilon a Bigiwan. Dati na ala falsi kerki fu grontapu (Openb. 17:16-18; 18:2, 4). Baka dati, a o kibri en pipel te a o pori ala den tra pisi fu Satan en grontapu na ini Armagedon.​—Openb. 7:9, 10; 16:14, 16.

17. Fu san ede wi musu tan krosibei fu Yehovah?

¹⁷ Solanga wi tan krosibei fu Yehovah, Satan no o man du wi ogri fu ala ten. Fu taki en leti, na en o kisi pori fu ala ten (Rom. 16:20). Sobun, weri ala den sani di Gado gi wi fu feti a feti disi èn no puru nowan fu den! No pruberi fu feti a feti disi yu wawan. Horibaka gi yu brada nanga sisa èn du san Yehovah e taki. Efu yu du dati, dan yu kan de seiker taki yu lobi-ati hemel Papa o gi yu krakti èn taki a o kibri yu.​—Yes. 41:10.