1. Juu ya ki Yesu waamuloombele Yehova abalabukile basambi bakue?

MU MUSITA wa busiku bwakue bwa kupeleezia, Yesu waali watontonkania palua maavia akaba kwaluka na basambi bakue. Paantu waali wabatonene babibuza bakue, Yesu waamuloombele Baba wakue ‘abalabukile ku Olia Mubi.’ (Yoan. 17:14, 15) Yesu waali wamanine nangue kisia weene kubuela ku muulu, Sataana Kibanda wakaba kuluisia kila muntu wakaba kutona kumubombela Yehova. Kakiine, bantu bakue Yehova bakabiile kukingililua.

2. Ni kiki kyatusininkizia nangue Yehova wakaba kwasuka mapepo etu?

² Yehova waasukile lipepo lyakue Yesu, Muana Wakue paantu amutonene. Kine twakita maka etu onse eevi kumusaansamusia Yehova, wakaba kututona ni fwefue, kabili wakaba kupooza maano ku mapepo etu akumuloomba atukwasie ni kutukingilila. Paantu weene ni Mutue wa lupua ali waemenana, Yehova wakaba kutwalilila kwemena mu ntono baana bakue. Kine takitile evio, liina lyakue telikindikua ni lulumbi lwakue luli kwinooneka!

3. Juu ya ki loonu tukabiile kukingililua na Yehova?

³ Onu, i musita utukabiile kukwasiiwa saana na Yehova kuliko musita waapitile. Sataana waafumiiziwe ku muulu ni kupoozua pa kyalo ‘wafiitilue saana.’ (Nfy. 12:12) Ali mukulengia ni bantu bange basitutonene batontonkanie nangue musita ubali batukyuzia, “balibamubombela Leeza.” (Yoan. 16:2) Bantu bange basiizi kumubombela Leeza, bali batukyuzia paantu tupuseene ni bantu ba ku kyalo. Anzia kine ni kiki kili kulengia bantu batukyuzie, fwefue te tunvuile muenzo. Juu ya ki? Pantu Mulandu Wakue Leeza ulandile eevi: “Mulopue ni wa kisinka, kabili waakamilumia ni kumikingilila ku Olia Mubi.” (2 Bat. 3:3) Yehova ali watukingilila siani? Tuli kumona bintu bibili byatupeele.

4. Kukoonkana ni Baefeso 6:13-17, Yehova atupeele ki eevi kutukingilila?

⁴ Yehova atupeele biluilo byakutukingilila kine Sataana watusakukila. (Soma Baefeso 6:13-17.) Biluilo bifumine kuli Leeza bili ni maka kabili bili byakwasia saana! Inzi pa kunti tukingililue, tupalile kuvuala ni kutualilila kubombia kila kiluilo. Kila kiluilo kili na mana ki? Tulondoluele kimo-kimo.

5. Musipi wa mu kitungu wa kisinka ni kiki, kabili juu ya ki tupalile kuuvuala?

⁵ Musipi wa mu kitungu wa kisinka ulangiliile bisinka bili mu mu Mulandu Wakue Leeza, Bibilia. Juu ya ki tupalile kuvuala musipi wa mu kitungu? Paantu Sataana i “ntuntuko ya bufi.” (Yoan. 8:44) Wakita miaka ingi wali mukubeepa ni kuzeezia “bekala kyalo bonse”! (Nfy. 12:9) Inzi bisinka bili mu Bibilia bili kyatukingilila te kunti tutioke mutima. Tuli twavuala siani ozo musipi wa mu kitungu wa mufuano? Tuli twavuala kupitila kusambilila kisinka palwakue Yehova, kumupupa weene “na mupasi ni kisinka” kabili kupitila kuya twali ba kisinka mu bintu byonse.​—Yoan. 4:24; Baef. 4:25; Baeb. 13:18.

6. Kivwalo kya kwikingilila mu nkulo kya nsaambu kilangiliile ki, kabili juu ya ki tupalile kukivuala?

⁶ Kivwalo kya kwikingilila mu nkulo kya nsambu kilangiliile mafunde a nsaambu akue Yehova. Juu ya ki tupalile kukivuala? Nga evelia kivwalo kya kwikingilila mu nkulo vikili kyakingilila mutima wakue lukale, kivwalo kya kwikingilila mu nkulo kya nsaambu kili kyatukingilila eevi tekuti bintu bibiipile bya mu keenu kyalo binoone aali yeetu. (Tus Maf. 4:23) Yehova aswapiile tumutone ni kumubombela na mutima weetu onse. (Mat. 22:36, 37) Pakaako, Sataana ali waezia kutukita tulekele kumubombela Yehova. Ali wakita evio kupitila kutulengia tutone bintu bya mu kyalo​—beelia bisuulile Yehova. (Yak. 4:4; 1 Yoan. 2:15, 16) Kine ozo muteo waanda, ali waezia kutukyuzia eevi atulengie tukite kintu kisiizi kutona Yehova.

7. Tuli twavuala siani kivwalo kya kwikingilila mu nkulo kya nsaambu?

⁷ Tuli twavuala kivwalo kya kwikingilila mu nkulo kya nsaambu kupitila kwitabila mufunde akue Yehova alandiile palua bintu biweeme ni bibiipile, ni kwikala kukoonkana ni azo mafunde. (Malum. 97:10) Bantu bange kunti bamona nangue mafunde akue Yehova abatanine bantu buntungua. Inzi kine twaandua kubombia mafunde ali mu Bibilia, tuli kwalukasie nga lukale olia wavuula kivwalo kyakue kya kwikingilila mu nkulo musita lwali mu vita paantu waunvua nangue kyafina saana. Kakiine kukita evio ni bupuba saana! Inzi kine tumutonene Yehova tuli kumona nangue malaizio akue “teakolele ata kanini” inzi ali atusuunga.​—1 Yoan. 5:3.

8. Kuvuala bilatu bya kutwala mpunda iweeme kuli mana ki?

⁸ Paulo watusoka tuvuale bilatu bya kuya kutuala mpunda iweeme ya mutende. I kulanda, lyonse tupalile kuya twaiteaniizie eevi kusimikila mpunda iweeme ya Bukolo. Musita utuli twababuilako bange mpunda ili mu Bibilia, kiketekelo kyetu kili kyakosa. Tuli mukukoseleziiwa kakiine kumona bantu bakue Yehova bali mu kyalo kyonse vibali mukubombia kila musita ubali kupata eevi kusimikila mpunda iweeme fuasi yonse kubali kusaangua. Kwa mufuano, bali basimikila nsesi kwa nsesi ao ku fuasi ya bantu bengi, musita ubali ku miilo, ku masomo, ao musita ubali baya ku nsoko ao lubali baya kwendela bantu ba mu lupua basili Bakasininkizia ao musita ubali balanda ni bantu babamaneene nabo. Kine twaunvua mwenzo ni kulekela kusimikila, tuli kwaluka nga lukale wavuula  bilatu byakue musita lwali ku vita; maulu akue teakokola na kukisika. Ni bili kufuminamo, kine basakukilua ali kwandua kwisampulula, kabili ali kwandua kukoonka malaizio akue mukulu wakue.

9. Juu ya ki tupalile kutwama kisoolelo kikata kya kiketekelo?

⁹ Kisoolelo kikata kya kiketekelo kilangiliile kiketekelo kyetu kuli Yehova. Tuketekeele nangue wakaba kufikilizia bintu byonse byatulaile. Kekio kiketekelo kyakaba kutukwasia “kuzimiiziako mivui yonse ya mulilo ili yalasua na Olia Mubi.” Juu ya ki tupalile kutwama keekio kisoolelo kikata? Paantu kili kyatukingilila eevi masambilizio a babisanguka tekuti atutione mutima ao kutioka mutima kine bantu batuseka juu ya bintu bituzumiine. Kine te tuli na kiketekelo, tetukaba kuya twali ni maka a kutukwasia kwimana sinta kine bantu baezia kututiinta eevi tekuti tukindike mafunde akue Yehova. Inzi musita utuli ku miilo ao ku masomo, kine twakana kukita kintu kelia kisiizi kutona Yehova, kukita evio kwalangilila nangue tutweme kisoolelo kyetu. (1 Pet. 3:15) Kabili kila musita utuli twakaana kubomba miilo ya kulipua nfalanga ingi paantu ili kututwamina musita wa kumubombela Yehova, twalangilila nangue tutweme kisoolelo kyetu. (Baeb. 13:5, 6) Kabili, kila musita utuli twamubombela Yehova anzia kine twapingua,  kiketekelo kyetu kili kyatukingilila.​—1 Bat. 2:2.

10. Kisote kya kyuma kya bupusuko ni kiki, kabili juu ya ki tupalile kukivuala?

¹⁰ Kisote kya kyuma kya bupusuko i kiswapilo kitupeelue na Yehova kya kulanda nangue wakaba kutupususia, kabili wakabakubapeela kilambu balia balibakita kutona kwakue. (1 Bat. 5:8; 1 Tim. 4:10; Tit. 1:1, 2) Nga evelia kisote kya kyuma vikili kyakingilila mutue wakue lukale, kiswapilo kili kyasuunga buviinde bwetu bwa kutontonkania. Mu nzila ki? Kiswapilo kili kyatukwasia tutwalilile kupooza maano ku bulayo bwakue Leeza, kabili kili kyatukwasia tekuti tutitikilue na maavia etu. Tuli twavuala siani kekio kisote kya kyuma? Tuli twakita evio kupitila kutontonkania kukoonkana ni vili vyatontonkania Leeza. Kwa mufuano, tuli twabiika kiswapilo kyetu apana mu bintu bya mpuni nga evelia bunoonsi, inzi kuli Leeza.​—Malum. 26:2; 104:34; 1 Tim. 6:17.

11. Kipanga kya mupasi ni kiki, kabili juu ya ki tupalile kukibombia?

¹¹ Kipanga kya mupasi i Mulandu Wakue Leeza, Bibilia. Kekio kipanga kili ni buvinde bwa kufiikula bufi bwa kila musango ni kufumia bantu mu buzia bwa masambilizio a bufi ni mibeele ibiipile. (2 Bakor. 10:4, 5; 2 Tim. 3:16, 17; Baeb. 4:12) Lisambilio lya bunke ni kubeleziiwa kutuli twapata mu kuteania kwakue Leeza i bili byatukwasia kubombia buino kekio kipanga. (2 Tim. 2:15) Kuongezia pa bebio biluilo, Yehova ali watukingilila kabili kupitila nzila inge yalumine. Ni nzila ki ezio?

12. Ni kiki kinge kitukabiile, kabili juu ya ki?

¹² Lukale ali ni kibelezio ali waikala wamanine nangue taviinda kuluana na kisepe kikata wali bunke, akabiile kukwasiiwa na balukale nakue. Enka evio, ni fwefue tetuviinda kuluana ni Sataana pamo ni bantu bakue twali bunke, tupalile kukwasiiwa na balupua ni bankazi betu. Yehova atupeele balukale bengi bakutukwasia mu vita. Babo balukale ni ‘bazumizi neetu’ ba mu kyalo kyonse.​—1 Pet. 2:17.

13. Nga vilandile Baebrania 10:24, 25, kulonghaana kuli kwatukwasia siani?

¹³ Kusaanguako ku kulonghaana i nzila imo ili yatukwasia. (Soma Baebrania 10:24, 25.) Fwe bonse tuli twatioka mutima mu nsita kampanda. Kine twatioka mutima, kulonghaana kuli kwatuteekia mutima. Tuli twakoseleziiwa kupitila byasuko byaweeme bili byaleeta balupua ni bankazi. Maasi aswapiile Bibilia pamo ni biputulua bibali bapisia bili byatupeele maka ni kutusonsezia tutwalilile kumubombela Yehova. Kabili tuli twakoseleziana musita utuli twalanziana ntanzi ni kisia kulonghana. (1 Bat. 5:14) Kabili, kulonghaana kuli kwatupeela fuasi ya kubakwasia bange, ni kukita evio kuli kwatuleetela nsaansa. (Miil Bat. 20:35; Bar. 1:11, 12) Kulonghaana kwetu kuli kwatukwasia kabili mu nzila inge. Kuli kwatukwasia kwaluka bakasimika ni bakasambilizia baweeme. Kwa mufuano, tuli twasambilila vya kubombia buino Biombo Byetu bya Kusambiliziiziako. Pakaako, teania buino kulonghaana. Musita wa kulonghaana, tuilizia wapoozeleko maano. Kisia kulonghaana, bombia bintu biwasambililanga. Kine wakita evio uli kwaluka “lukale wa kisinka wakua Yesu Kristu.”​—2 Tim. 2:3.

14. Ni bukwasi ki bunge butuli nabo?

¹⁴ Kabili tuli twakwasiiwa na ma milioni engi a ba malaika bali ni maka. Tontonkania kintu kyaakitile malaika umo sie! (Is. 37:36) Kusiali umone bintu bili kuviinda kukita kisepe kili ni maka kya ba malaika. Te kuli muntu ao kibanda kili ni maka nga kisepe kili ni maka kya ba malaika bakue Yehova. Yehova i ali saana ni maka. Kansi musita lwali pamo ni fwefue, lyonse tuli kuya twali ni maka kupita  baluani betu atasie baye bali banga. (Bap. 6:16) Keekio ni kisinka kakiine! Uye walangulukile baalia bonse bali kukukwasia musita uwatioka mutima juu ya bintu bili kulanda ao kukita mubombi nobe, balia bauli wasoma nabo, ao bantu ba mu lupua basizumiine. Languluka nangue mu ezi vita te uli bunke. Uli mukuya wakoonka butunguluzi bwakue Yehova.

15. Nga vilandile Isaya 54:15, 17, juu ya ki bantu bakue Leeza te bakaba kulekeziiwa miilo ya kusimikila?

¹⁵ Kyalo kitunguluilue na Sataana kili ni nsaambu ingi ili mukulengia kitusuule. Tetwizi kwiingizia ata kaniini mu bintu bya politike ao mu vita. Tuli twasimikila liina lyakue Leeza, tuli twalanda naangue Bukolo bwakuesie bunke i bwakaba kuleeta mutende, kabili tukoonkele mafunde akue a nsaambu. Tuli twabasininkiziizia bantu nangue kateeka wa keenu kyalo abiipile, ni wa bufi kabili ni ngipaani. (Yoan. 8:44) Kabili tuli twasimikila nangue leenusie kyalo kyakue Sataana kwasiala kikabe kwinoonua. Inzi, Sataana pamo ni bantu bakue te bakaba kuviinda ata kaniini kutulekezia miilo ya kusimikila. Anzia evio, twakaba kutwalilila kumulumbania Yehova mu nzila yonse! Anzia kine Sataana ali ni maka saana, tanaviindepo kulekezia ezi munda ya Bukolo ili mukusimikilua ku bantu mwaya kyalo. Tuli twaviinda kukita evio paantu Yehova ali watukingilila.​—Soma Isaya 54:15, 17.

16. Musita wa lyemo likata, Yehova wakaba kukita ki ku bantu bakue?

¹⁶ Ni bintu ki byakaba kukitika ku ntaanzi? Musita wa lyemo likata, Yehova wakaba kutusuunga. Kya mambo, waakaba kusuunga babombi bakue ba kisinka musita luakaba kusonsezia ba makolo bali pa kyalo bakabe kumwinoona Babiloni Mukulu, i kulanda ma diini onse a bufi. (Nfy. 17:16-18; 18:2, 4) Kusiali wakaba kupususia bantu bakue musita lwakaba kwinona ku vita ya Armagedoni seemu yakaba kuya yasielepo ya kyalo kyakue Sataana.​—Nfy. 7:9, 10; 16:14, 16.

17. Kine twatwalilila kuya twali peeli ni Yehova tuli kunoonkelamo ki?

¹⁷ Kine twatwalilila kumupalama Leeza, Sataana takaba kukita ata kintu kyakutukisia loonse. Inzi weene i wakaba kwinoonua loonse. (Bar. 16:20) Pakaako, vuala biluilo byonse ni kutualilila kubibombia! Te kwezia kuluana ni Sataana pamo ni kyalo kyakue wali bunke. Bakwasie balupua ni bankazi bobe. Kabili koonka butunguluzi bwakue Yehova. Kine wakita evio, uli kuya wali ni kisinka nangue Baba obe wa ku muulu ali ni ntono, wakaba kukupeela maka ni kukukingilila.​—Is. 41:10.