1. Tanbasá Jesus husu Jeová atu tau matan ninia dixípulu sira?

IHA kalan antes Jesus mate, nia hanoin kona-ba problema oioin neʼebé ninia dixípulu sira sei hasoru. Tanba Jesus hadomi sira, nia husu ninia Aman atu “tau matan ba sira tanba aat-naʼin”. (João 17:14, 15) Jesus hatene katak depois nia fila fali ba lalehan, Diabu Satanás sei kontinua kontra ema neʼebé hakarak atu serbí Jeová. Tan neʼe, Jeová nia povu presiza hetan protesaun.

2. Tanbasá ita bele fiar katak Jeová sei hatán ita-nia orasaun?

² Jeová hatán ba Jesus nia orasaun tanba hadomi Ninia Oan-Mane. Se ita hakaʼas an atu halo Jeová kontente, nia mós sei hadomi ita, no nia sei hatán ba ita-nia orasaun atu husu ajuda no protesaun. Jeová mak Ulun ba família neʼebé hadomi ita. Tan neʼe, nia sei kontinua tau matan ba ita. Nia halo nuneʼe tanba ninia naran ka reputasaun.

3. Tanbasá ita presiza tebes hetan protesaun husi Jeová?

³ Agora ita presiza tebes hetan protesaun husi Jeová. Jesus soe tun tiha ona Satanás mai rai, no Satanás “hirus makaʼas”. (Apok 12:12) Nia konsege book ema sira neʼebé fó-terus ba ita atu fiar katak “sira halo serbisu sagradu ba Maromak”. (João 16:2) Ema seluk neʼebé la fiar Maromak fó-terus ba ita tanba ita la hanesan ho ema iha mundu. Maski ema fó-terus ba ita ho razaun oioin, maibé ita la taʼuk. Tanbasá? Tanba Bíblia hatete: “Naʼi mak laran-metin, no nia sei hametin imi no proteje imi husi aat-naʼin.” (2 Tes 3:3) Oinsá Jeová proteje ita? Mai ita koʼalia kona-ba dalan rua.

4. Tuir Éfeso 6:13-17, Jeová fó saida atu proteje ita?

⁴ Jeová fó ba ita ekipamentu funu nian neʼebé bele proteje ita bainhira Satanás ataka ita. (Lee Éfeso 6:13-17.) Ekipamentu funu nian neʼe mak forte no diʼak. Maibé neʼe bele  proteje ita só deʼit se ita uza ekipamentu neʼe kompletu no la hasai fali. Parte ida-idak husi ekipamentu neʼe reprezenta saida? Mai ita koʼalia kona-ba neʼe.

5. Saida mak sintu lia-loos nian? Tanbasá ita presiza uza ida-neʼe?

⁵ Sintu lia-loos nian reprezenta lia-loos husi Bíblia. Tanbasá ita presiza uza sintu neʼe? Tanba Satanás mak “lia-bosok nia aman”. (João 8:44) Nia bosok durante tinan rihun ba rihun ona no nia “lohi ema iha mundu tomak”. (Apok 12:9) Maibé lia-loos husi Bíblia proteje ita atu Satanás labele lohi ita. Oinsá ita bele uza sintu neʼe? Ita halo ida-neʼe hodi aprende lia-loos kona-ba Jeová, adora nia ho “espíritu no lia-loos”, no hatudu laran-moos iha buat hotu.—João 4:24; Éf 4:25; Ebr 13:18.

6. Besi neʼebé taka hirus-matan reprezenta saida? Tanbasá ita presiza uza ida-neʼe?

⁶ Besi neʼebé taka hirus-matan reprezenta Jeová nia matadalan neʼebé loos. Tanbasá ita presiza uza ida-neʼe? Besi neʼebé taka hirus-matan proteje soldadu nia fuan, nuneʼe mós hahalok loos proteje ita-nia laran atu ita la hetan influénsia husi mundu. (Prov 4:23) Jeová hakarak ita atu hadomi nia no serbí nia ho laran tomak. (Mt 22:36, 37) Tan neʼe, Satanás koko atu hapara ita atu la serbí Jeová ho laran tomak liuhusi book ita atu hadomi buat sira neʼebé iha mundu neʼe neʼebé Jeová odi. (Tgo 4:4; 1 João 2:15, 16) No se nia la konsege halo nuneʼe, nia sei koko atu fó-terus ba ita atu nuneʼe ita la halo tuir tan Jeová nia matadalan.

7. Oinsá ita uza besi neʼebé taka hirus-matan?

⁷ Ita uza besi neʼebé taka hirus-matan husi Jeová hodi simu Jeová nia matadalan kona-ba buat neʼebé loos no sala, no moris tuir ida-neʼe. (Sal 97:10) Ema balu hanoin katak Jeová nia matadalan hanetik sira-nia liberdade. Maibé se ita la halo tuir tan Bíblia nia prinsípiu, ita hanesan ho soldadu neʼebé funu hela maibé hasai besi neʼebé taka ninia hirus-matan tanba hanoin katak neʼe mak todan loos. Neʼe mak desizaun neʼebé beik. Se ita hadomi Jeová, “ninia ukun-fuan sira la todan”, maibé bele salva ita-nia moris.—1 João 5:3, nota.

8. Oinsá ita bele sai prontu atu haklaken liafuan diʼak dame nian?

⁸ Paulo anima ita atu sai prontu atu haklaken liafuan diʼak dame nian hanesan uza sapatu iha ita-nia ain. Neʼe katak ita sempre buka oportunidade atu haklaken kona-ba Maromak nia Ukun. Bainhira ita koʼalia ho ema seluk kona-ba Bíblia nia mensajen, neʼe bele hametin ita-nia fiar. Ita kontente atu haree Jeová nia povu iha mundu tomak buka oportunidade atu haklaken liafuan diʼak iha fatin oioin. Porezemplu, sira haklaken iha serbisu-fatin, iha eskola, iha fatin negósiu, husi uma ba uma, bainhira kompras, vizita família, koʼalia ho kolega sira, no maski labele sai husi uma. Se ita sai taʼuk no para haklaken, ita hanesan soldadu neʼebé funu hela maibé hasai ninia sapatu. Ninia ain sei kanek. Rezultadu mak fasil deʼit ba inimigu atu ataka nia, no nia mós labele halo tuir komandante nia orden.

9. Tanbasá ita presiza lori eskudu boot fiar nian?

⁹ Eskudu boot fiar nian reprezenta ita-nia fiar ba Jeová. Ita fiar katak Jeová sei kumpre ninia promesa hotu. Fiar neʼe sei ajuda ita atu “hamate rama-oan hotu neʼebé lakan ho ahi husi aat-naʼin”. Tanbasá ita presiza lori eskudu boot neʼe?  Tanba ida-neʼe proteje ita atu la monu ba lia-bosok husi ema neʼebé kontra lia-loos ka ita la sai laran-kraik bainhira ema hatún ita-nia fiar. Se ita la iha fiar, susar ba ita atu hamriik metin bainhira ema book ita atu kontra Jeová nia matadalan. Bainhira ita defende ita-nia fiar iha serbisu-fatin ka eskola, ita hetan protesaun husi ita-nia eskudu boot fiar nian. (1 Ped 3:15) Bainhira ema oferese ita serbisu ho saláriu boot neʼebé bele hanetik ita atu adora Jeová, maibé ita la simu ida-neʼe, ita hetan protesaun husi ita-nia eskudu boot fiar nian. (Ebr 13:5, 6) Bainhira ita serbí Jeová maski ema kontra ita, ita hetan protesaun husi ita-nia eskudu boot fiar nian.​—1 Tes 2:2.

10. Saida mak kapasete salvasaun nian? Tanbasá ita presiza uza ida-neʼe?

¹⁰ Kapasete salvasaun nian mak esperansa neʼebé Jeová fó mai ita. Ita iha esperansa katak se ita mate, Jeová sei fó moris-hiʼas ba ita no nia sei fó kolen ba ema hotu neʼebé halo tuir ninia hakarak. (1 Tes 5:8; 1 Tim 4:10; Tito 1:1, 2) Kapasete proteje soldadu nia ulun, nuneʼe mós ita-nia esperansa atu hetan salvasaun sei proteje ita-nia kbiit atu hanoin.  Oinsá? Esperansa neʼe ajuda ita atu tau fokus nafatin ba Maromak nia promesa sira no ajuda ita atu iha hanoin neʼebé loos kona-ba ita-nia problema. Oinsá ita uza kapasete neʼe? Ita halo nuneʼe hodi iha hanoin neʼebé hanesan Maromak nian. Porezemplu, ita tau esperansa ba Maromak, laʼós ba rikusoin neʼebé bele lakon.​—Sal 26:2; 104:34; 1 Tim 6:17.

11. Saida mak surik espíritu nian? Tanbasá ita presiza uza ida-neʼe?

¹¹ Surik espíritu nian mak Maromak nia Liafuan. Surik neʼe iha kbiit atu hatudu sai lia-bosok oioin no halo ema livre husi hanorin falsu no husi toman neʼebé la diʼak. (2 Kor 10:4, 5; 2 Tim 3:16, 17; Ebr 4:12) Ita aprende atu uza didiʼak surik neʼe liuhusi estuda mesak no simu treinu husi Maromak nia organizasaun. (2 Tim 2:15) Maibé Jeová mós fó buat seluk tan atu proteje ita. Saida mak neʼe?

12. Saida tan mak ita presiza no tanbasá?

¹² Soldadu neʼebé iha esperiénsia hatene katak nia labele manán funu se nia luta mesak. Nia presiza soldadu sira seluk nia ajuda. Nuneʼe mós ita labele manán hasoru Satanás no sira neʼebé apoia nia, se ita mesak deʼit. Ita presiza irmaun-irmán sira-nia ajuda. Jeová fó ba ita, irmaun-irmán sira iha mundu tomak neʼebé bele ajuda ita.​—1 Ped 2:17.

13. Tuir Ebreu 10:24, 25, ita hetan benefísiu saida deʼit kuandu tuir reuniaun sira?

¹³ Dalan ida ita hetan ajuda mak hodi tuir reuniaun sira. (Lee Ebreu 10:24, 25.) Dala ruma ita hotu sente laran-kraik, maibé reuniaun sira bele anima ita. Ita hetan anima husi irmaun-irmán sira-nia komentáriu neʼebé hatoʼo ho laran. Diskursu husi Bíblia no mós aprezentasaun sira hametin ita-nia hakarak atu serbí Jeová. Bainhira ita koʼalia ba malu iha dalan neʼebé hametin malu antes no depois reuniaun sira, neʼe bele anima ita. (1 Tes 5:14) Reuniaun sira mós fó oportunidade ba ita atu ajuda ema seluk no neʼe halo ita sente haksolok. (Após 20:35; Rom 1:11, 12) Reuniaun sira mós ajuda ita atu aumenta ita-nia matenek iha serbisu haklaken. Porezemplu, ita aprende oinsá atu uza didiʼak Ekipamentu Hanorin nian. Tan neʼe, prepara didiʼak ba reuniaun sira. Durante reuniaun, rona didiʼak. No mós aplika buat neʼebé ita aprende husi reuniaun. Hodi halo nuneʼe, ita sei sai “Kristu Jesus nia soldadu neʼebé diʼak”.​—2 Tim 2:3.

14. Saida tan mak bele ajuda ita?

¹⁴ Ita mós hetan ajuda husi anju millaun ba millaun neʼebé iha kbiit boot. Hanoin toʼok buat neʼebé anju ida bele halo. (Isa 37:36) Agora hanoin toʼok buat neʼebé anju barak bele kumpre. La iha ema ida ka anju aat ida neʼebé bele manán Jeová nia tropa neʼebé forsa boot. Jeová mak kbiit boot liu hotu. Tan neʼe, se nia apoia ita, ita sei iha kbiit boot liu fali ema neʼebé kontra ita. (Juís 6:16) Ita bele fiar duni ida-neʼe. Hanoin kona-ba neʼe bainhira ita sente taʼuk tanba buat neʼebé ita-nia kolega serbisu, kolega eskola, ka família hatete ka halo. Hanoin-hetan katak ita la presiza luta mesak. Jeová sei apoia ita tanba ita halo tuir ninia matadalan.

15. Tuir Isaias 54:15, 17, tanbasá ema labele hanetik Maromak nia povu atu haklaken?

¹⁵ Satanás mak kontrola ema iha  mundu neʼe no sira iha razaun oioin atu odi ita. Ita neutrál ho buat polítiku no ita la hola parte iha funu. Ita haklaken kona-ba Maromak nia naran, fó sai katak ninia Ukun deʼit mak bele lori dame, no halo tuir ninia matadalan neʼebé loos. Ita hatudu sai katak ukun-naʼin mundu neʼe nian ka Satanás mak lohidór no ohodór. (João 8:44) No ita fó sai katak lakleur tan Satanás nia mundu sei lakon. Satanás no sira neʼebé apoia nia sei nunka bele hapara ita-nia serbisu haklaken. Ita sei kontinua fó glória ba Jeová iha dalan oioin tuir ita-nia kbiit. Maski Satanás iha kbiit, maibé nia labele hanetik ita atu haklaken liafuan diʼak iha mundu tomak. Ita bele halo nuneʼe tanba Jeová proteje ita.​—Lee Isaias 54:15, 17.

16. Iha dalan saida deʼit mak Jeová sei salva ninia povu durante terus boot?

¹⁶ Saida mak sei akontese iha futuru? Durante terus boot, Jeová sei salva ita iha dalan rua. Primeiru, nia sei salva ninia povu neʼebé laran-metin bainhira nia book liurai sira iha mundu atu halakon Babilónia Boot ka relijiaun falsu. (Apok 17:16-18; 18:2, 4) Tuirmai nia sei salva ninia povu iha funu Armagedon bainhira nia halakon buat seluk hotu husi Satanás nia mundu.​—Apok 7:9, 10; 16:14, 16.

17. Ita hetan benefísiu saida hodi nafatin hakbesik ba Jeová?

¹⁷ Bainhira ita nafatin hakbesik ba Jeová, Satanás labele lori susar ba ita ba nafatin. Tuir loloos, nia mak sei lakon ba nafatin. (Rom 16:20) Tan neʼe, uza ekipamentu funu nian kompletu, no keta hasai ida-neʼe. Keta koko atu luta mesak. Apoia irmaun-irmán sira. Halo tuir Jeová nia matadalan. Se ita halo nuneʼe, ita bele fiar katak Aman Jeová sei hametin ita no proteje ita.​—Isa 41:10.