1. Ntchifukwa wuli Yesu wangupempha Yehova kuti wavikiliyi akusambira ŵaki?

USIKU wakumaliya wa umoyu waki wa pacharu chapasi, Yesu waŵanaŵaniyanga masuzgu ngo akusambira ŵaki atingi akumanengi nangu. Chifukwa chakuti iyu waŵayanjanga ukongwa abwezi ŵaki, Yesu wangupempha Awisi kuti ‘aŵavikiliyi chifukwa cha muheni yo.’ (Yoha. 17:14, 15) Yesu waziŵanga kuti asani wawere kuchanya, Satana Dyaboli walutirizgengi kuchita nkhondu ndi munthu weyosi yo wakhumba kuteŵete Yehova. Mwaviyo, mphakuvwika kuti ŵanthu aku Yehova akhumbika kuvikilirika.

2. Kumbi tingasimikizga wuli kuti Yehova wamukengi mapempheru ngidu?

² Yehova wangumuka pempheru laku Yesu chifukwa chakuti watimuyanja Mwana Waki. Asani titesesa kukondwesa Yehova, nasi watiyanjengi kweniso wamukengi mapempheru ngidu ngakupempha chovyu ndipuso kuti wativikiliyi. Chifukwa chakuti Yehova ndi Mutu wachanju , iyu walutirizgengi kuŵaphwere ŵana ŵaki. Asani Iyu wangaleka kuchita viyo, ndikuti zina laki ndipuso mbiri yaki vinganangika!

3. Ntchifukwa wuli tikhumbika kuti Yehova wativikiliyengi mazuŵa nganu?

³ Kuluska kuvuli uku, sonu ndipu tikhumbika kuti Yehova wativikiliyengi ukongwa. Satana wakudikiskika kuchanya ndipu “we ndi ukali ukulu.” (Chivu. 12:12) Iyu waja wachichitiska kuti ŵanthu aŵanaŵanengi kuti asani atititombozga ndikuti ‘achitiya Chiuta uteŵeti wakupaturika.’ (Yoha. 16:2) Ndipu ŵanthu anyaki wo agomezga kuti kulivi Chiuta, atititombozga chifukwa chakuti tichitaku nawu cha vinthu va mucharu ichi. Kweni mwemosi mo vingaŵiya, isi titopa cha. Chifukwa wuli? Chifukwa Mazu ngaku Chiuta ngakamba kuti: “Ambuya mbakugomezgeka, ndipu akupaskeningi  nthazi ndi kukuvikiliyani ku muheni yo.” (2 Ate. 3:3) Kumbi Yehova watitivikiliya wuli? Tiyeni tikambiskani nthowa ziŵi.

4. Mwakukoliyana ndi Aefeso 6:13-17, kumbi Yehova wakutipaskanji kuti vitivikiliyengi?

⁴ Yehova wakutipaska vidya vankhondu vo vingativikiliya asani Satana watitiyukiya. (Ŵerengani Aefeso 6:13-17.) Vidya vankhondu venivi vanthazi kweniso vigwira ntchitu umampha! Kweni vidya venivi vingativikiliya pija asani tivwala chidya chechosi ndi kulutirizga kuvigwiriskiya ntchitu. Kumbi chidya chechosi chimiyanji? Tiyeni tikambiskani chechosi pakuchija.

5. Kumbi lamba wa wauneneska wamiyanji, nanga ntchifukwa wuli tikhumbika kumuvwala?

⁵ Lamba wauneneska wamiya uneneska wo usanirika mu Mazu ngaku Chiuta, Bayibolu. Ntchifukwa wuli tikhumbika kuvwala lamba mwenuyu? Chifukwa chakuti Satana ndi “wisi wa boza.” (Yoha. 8:44) Iyu waja wachikamba boza kwa vyaka masauzandi nganandi kweniso “walandizga charu chosi chapasi”! (Chivu. 12:9) Kweni uneneska wo usanirika mu Bayibolu utitivikiliya kuti tileki kupusisika. Kumbi tivwala wuli lamba wakuyeruzgiya mwenuyu? Tivwala lamba mwenuyu asani tisambira uneneska wakukwaskana ndi Yehova, titimusopa “mu mzimu ndi mu uneneska” ndipuso asani tichita vinthu vosi mwauneneska.—Yoha. 4:24; Aefe. 4:25; Ahe. 13:18.

6. Kumbi chapachifuŵa chaurunji chimiyanji, nanga ntchifukwa wuli tikhumbika kuchivwala?

⁶ Chapachifuŵa chaurunji chimiya marangu nga urunji ngaku Yehova. Ntchifukwa wuli tikhumbika kuvwala chapachifuwa? Nge mo chapachifuwa chavikiliyanga mtima chayiwu wa msilikali kuti waleki kugwazika ndi mkondu, chapachifuwa chaurunji chivikiliya mtima widu wakuyeruzgiya pamwenga kuti umunthu widu wa mkati, kuti uleki kunangika ndi vinthu viheni va mucharu ichi. (Nthanthi 4:23) Yehova wakhumba kuti timuyanjengi kweniso kumuteŵete ndi mtima widu wosi. (Mate. 22:36, 37) Mwaviyo, Satana watesesa kuti tileki kuteŵete Yehova ndi mtima widu wosi. Iyu wachita venivi mwakutichitiska kuti tiyanjengi vinthu va mucharu vo Yehova watinkha. (Yako. 4:4; 1 Yoha. 2:15, 16) Ndipu asani chiŵana chenichi chaleka kuko, iyu watitiwofyeza kuti tileki kuvwiya marangu ngaku Yehova.

7. Kumbi tivwala wuli chapachifuŵa chaurunji?

⁷ Tivwala chapachifuŵa chaurunji asani tivwiya marangu ngaku Yehova nga cho ntchamampha ndi chiheni kweniso asani tichita vinthu mwakukoliyana ndi marangu ngenanga. (Salimo 97:10) Ŵanthu anyaki angaŵanaŵana kuti marangu ngaku Yehova ngatitikandilizga kuchita vinthu vinyaki. Kweni asani taleka kugwiriskiya ntchitu fundu za mu Bayibolu pa umoyu widu, tingayanana ndi msilikali yo watuzgangapu chapachifuŵa asani wachita nkhondu chifukwa waŵanaŵananga kuti ntchizitu ukongwa. Kuchita viyo kungaŵa kupusa kukulu ukongwa! Kweni ŵanthu wo atanja Yehova awona kuti marangu ngaki “ngazitu cha,” kweni ngakutaska umoyu.—1 Yoha. 5:3.

8. Kumbi kuvwala sapatu ku maphazi ngidu tichinozgeka kupharazga uthenga wamampha kung’anamuwanji?

⁸ Paulo wangutichiska so kuti tivwali sapatu ku maphazi ngidu tichinozgeka kupharazga uthenga wamampha wa chimangu. Venivi ving’anamuwa kuti nyengu zosi tikhumbika kuja akunozgeka kupharazga uthenga wamampha wa Ufumu. Asani tikambiyaku anyidu uthenga wa mu Bayibolu, chivwanu chidu chija chakukho. Tichiskika kuwona mo ŵanthu aku Yehova pacharu chosi chapasi agwiriskiya ntchitu mpata wewosi wo angaŵa nawu kupharazga uthenga wamampha. Mwakuyeruzgiyapu, yiwu apharazga ku ntchitu, kusukulu, kumalu ngakuchitiya bizinesi, kunyumba ndi nyumba, asani aluta kuchigula vinthu, kuchiwona abali ŵawu wo Mbakaboni cha, asani akambiskana ndi ŵanthu wo atiŵaziŵa kweniso chinanga mphanyengu yo aleka kutuwapu panyumba. Asani tichita mantha ndi kuleka  kupharazga, tingayanana ndi msilikali yo wazuwanga sapatu zaki pa nyengu ya nkhondu ndipu venivi vachitiskanga kuti maphazi ngaki ngapwetekeki mwambula kusuzga. Ndipu chifukwa cha venivi, vaŵanga vakusuzga kuti wajivikiliyi asani arwani ŵaki amuyukiya kweniso walondonga cha marangu nga mura waki.

9. Ntchifukwa wuli tikhumbika kunyamuwa chishangu chikulu cha chivwanu?

⁹ Chishangu chikulu cha chivwanu, chimiya chivwanu cho te nachu mwaku Yehova. Te ndi chivwanu kuti iyu wazamufiska vo wakulayizga. Chivwanu chenichi chititiwovya “kuzimwa nachu mivi yakukole motu ya muheni yo.” Ntchifukwa wuli tikhumbika kunyamuwa chishangu chikulu chenichi? Chifukwa chititivikiliya kuti tileki kulandizgika ndi visambizu vaboza va ŵanthu akugaruka pamwenga kuti tileki kuchita mantha asani ŵanthu atitinyoza. Kwambula chivwanu, tingaŵavi nthazi zakukaniya asani ŵanthu anyaki atitichichizga kuti tiswi marangu ngaku Yehova. Kweni nyengu zosi asani tivikiliya chivwanu chidu asani te ku ntchitu pamwenga kusukulu, tituŵa kuti tanyamuwa chishangu chidu. (1 Petu. 3:15) Ndipu nyengu zosi asani tikana kugwira ntchitu ya ndalama zinandi yo yingachitiska kuti tilekengi kusopa Yehova nge mo tichitiya nyengu zosi, tituŵa kuti tanyamuwa chishangu chidu. (Ahe. 13:5, 6) Kweniso nyengu zosi asani  titeŵete Yehova chinanga kuti tisuskika, chishangu chidu chititivikiliya.—1 Ate. 2:2.

10. Kumbi chisoti chautaski ntchinthu wuli, nanga ntchifukwa wuli tikhumbika kuchivwala?

¹⁰ Chisoti chautaski, ntchilindizga cho Yehova wakutipaska. Chilindizga chenichi ntchakuti iyu wazakutitaska ku nyifwa kweniso wazakuŵapaska mphotu ŵanthu wosi wo achita khumbu laki. (1 Ate. 5:8; 1 Timo. 4:10; Tito 1:1, 2) Nge mo chisoti chayichu chavikiliyanga mutu wa msilikali, chilindizga chautaski chivikiliya maŵanaŵanu ngidu. Munthowa wuli? Chilindizga chenichi, chititiwovya kuti tiŵanaŵaniyengi ukongwa vinthu vo Chiuta wakulayizga kweniso kuti tingawonengi mwakwenere masuzgu ngo tikumana nangu. Kumbi tivwala wuli chisoti chenichi? Tivwala chisoti ichi asani maŵanaŵanu ngidu ngalutirizga kukoliyana ndi maŵanaŵanu ngaku Chiuta. Mwakuyeruzgiyapu, tiŵika chilindizga chidu mu chuma chambula kuthembeka cha, kweni kwaku Chiuta.—Salimo 26:2; 104:34; 1 Timo. 6:17.

11. Kumbi lipanga la mzimu ntchinthu wuli, ndipu ntchifukwa wuli tikhumbika kuligwiriskiya ntchitu?

¹¹ Lipanga la mzimu, ndi Mazu ngaku Chiuta, Bayibolu. Lipanga le ndi nthazi zakuvumbuwa vinthu vosi vaboza kweniso kufwatuwa ŵanthu ku ukapolu wa visambizu vosi vaboza ndipuso mijalidu yiheni. (2 Akori. 10:4, 5; 2 Timo. 3:16, 17; Ahe. 4:12) Tisambira kuligwiriskiya ntchitu umampha lipanga lenili asani tisambira pakutija kweniso kuziya mu masambiru ngo tilonde mugulu laku Chiuta. (2 Timo. 2:15) Kusazgiyapu pa vidya vankhondu, Yehova wakutipaska chidya chinyaki chanthazi ukongwa cho chititivikiliya. Kumbi ntchidya wuli?

12. Kumbi tikhumbi so chinthu wuli, ndipu ntchifukwa wuli?

¹² Msilikali yo waleka kuziŵa vinandi, waziŵa kuti wangapumana nawu yija cha asilikali anandi. Kweni wakhumbika asilikali anyaki kuti amuwovyi. Mwakuyanana waka, tingapunda cha nkhondu yakulimbana ndi Satana ndi ŵanthu wo ŵe kuchigaŵa chaki paku isi tija. Kweni tikhumbika abali ndi azichi kuti atiwovyi. Yehova wakutipaska “gulu losi la abali” pacharu chosi, wo alipu kuti atiwovyi.—1 Petu. 2:17.

13. Mwakukoliyana ndi Aheberi 10:24, 25, kumbi tiyanduwa wuli asani tiwungana?

¹³ Nthowa yimoza yo tilonde chovyu nkhusanirika pa maunganu. (Ŵerengani Aheberi 10:24, 25.) Tosi tiguŵa nyengu zinyaki. Mwaviyo, maunganu ngatitichiska ukongwa. Tichiskika ndi ndemanga zakutuliya pasi pa mtima zo abali ndi azichi apereka. Nkhani za mu Bayibolu kweniso vakuyeruzgiyapu vo akamba, vititipaska nthazi kuti tilutirizgi kuteŵete Yehova. Ndipu tichiskika so asani tikambiskana nkhani zakuchiska ndi anyidu maunganu ngechendayambi kweniso asani ngamala. (1 Ate. 5:14) Kusazgiyapu yapa, maunganu ngatitipaska so mwaŵi wakovya anyidu, vo vichitiska kuti tikondwengi. (Machi. 20:35; Aro. 1:11, 12) Maunganu ngidu ngatitiwovya so munthowa zinyaki. Ngatitiwovya kuti tisazgiyeku lusu lidu pakupharazga ndi kusambiza. Mwakuyeruzgiyapu, tisambira mo tingagwiriskiya ntchitu umampha mabuku ngo ngasanirika pa kamutu kakuti Vidya Vakusambiziya. Mwaviyo, tinozgekiyengi umampha maunganu nga mpingu. Ndipu asani te pa maunganu, tivwisiyengi mwakuphwere. Asani maunganu ngamala, mugwiriskiyengi ntchitu vo mwasambira. Asani muchitengi vinthu venivi, mujengi “msilikali wamampha waku Khristu Yesu.”—2 Timo. 2:3.

14. Kumbi tiwovyeka so wuli?

¹⁴ Tiwovyeka so ndi angelu anthazi mamiliyoni nganandi. Aŵanaŵaniyani waka vo mungelu yumoza wangachita! (Yesa. 37:36) Sonu ŵanaŵaniyani vo angelu anandi anthazi angafiska kuchita! Palivi munthu pamwenga mungelu muheni yo wangapunda asani wangalimbana ndi angelu anthazi aku Yehova. Asani Yehova we kuchigaŵa  chidu, ndikuti wo ŵe ndi isi mbanandi kuluska arwani ŵidu. (Ŵeru. 6:16) Venivi vauneneska nadi! Mwaviyo, mukumbukengi vosi venivi asani mwaguŵa ndi vo munyinu wa ku ntchitu, kusukulu pamwenga mubali winu yo ndi Kaboni cha wakamba pamwenga kuchita. Mukumbukengi so kuti muchita mwija cha nkhondu yeniyi. Mulondo ulongozgi waku Yehova, mwaviyo, watikuwovyani.

15. Nge mo pakambiya pa Yesaya 54:15, 17, ntchifukwa wuli ŵanthu aku Chiuta alekengi cha kupharazga?

¹⁵ Charu cho chilamulika ndi Satana chitititinkha pa vifukwa vakupambanapambana. Mwakuyeruzgiyapu, tichitaku cha ndali kweniso nkhondu. Tipharazga va zina laku Chiuta, tipharazga kuti Ufumu waki pe ndiwu ungazisa chimangu kweniso tivwiya marangu ngaki nga urunji. Titiŵalongo ŵanthu kuti Satana yo walamuliya charu ichi ngwaboza ndipuso ngwakubaya. (Yoha. 8:44) Kweniso tipharazga kuti pambula kuswera charu chaku Satana chibwangandulikengi. Ndipu tilekengi cha kupharazga chifukwa chaku Satana ndi ŵanthu wo ŵe kuchigaŵa chaki. Mumalu mwaki, tilutirizgengi kuthamika Yehova munthowa yeyosi yo tingafiska! Chinanga kuti Satana ngwanthazi, iyu watondekeska cha kuti uthenga wa Ufumu ufikiyi ŵanthu pacharu chosi chapasi. Venivi vichitika chifukwa chakuti Yehova watitivikiliya.—Ŵerengani Yesaya 54:15, 17.

16. Kumbi Yehova wazakuŵataska wuli ŵanthu ŵaki pa chisuzgu chikulu?

¹⁶ Kumbi ndi vinthu wuli vo vichitikengi kunthazi? Pa chisuzgu chikulu, Yehova wazakutitaska munthowa ziŵi zakuziziswa. Nthowa yakwamba, iyu wazamutaska ateŵeti ŵaki akugomezgeka pa nyengu yo wazamuchitiska kuti mafumu nga pacharu chapasi ngabwanganduwi Babiloni Mukulu, yo ndi visopa vosi vaboza. (Chivu. 17:16-18; 18:2, 4) Ndipu nthowa yachiŵi, iyu wazamutaska ŵanthu ŵaki pa Aramagedoni, pa nyengu yo wazamunanga vinthu vosi vaku Satana vo vazamujaku.—Chivu. 7:9, 10; 16:14, 16.

17. Kumbi tiyanduwa wuli asani tilutirizga kuja pa ubwezi wakukho ndi Yehova?

¹⁷ Asani tilutirizga kuja pa ubwezi wakukho ndi Yehova, palivi chechosi cho Satana wangatichita cho chingananga umoyu widu kwamuyaya. Kweni iyu ndiyu wazamubayika kwamuyaya. (Aro. 16:20) Mwaviyo, tivwali vidya vosi vankhondu ndipu tilutirizgi kuvigwiriskiya ntchitu! Mungachitanga mwija cha nkhondu yakulimbana ndi Satana. Muwovyengi abali ndi azichi ŵinu. Kweniso mulondongi ulongozgi waku Yehova. Asani muchitengi viyo, mungasimikiza kuti Awusemwi akuchanya akupaskeningi nthazi kweniso akuvikiliyeningi.—Yesa. 41:10.