1. Nkamboonzi Jesu naakakumbila Jehova kuti akwabilile basikwiiya bakwe?

MUBUSIKU bwamamanino Jesu katanajayigwa, wakali kuyeeya atala abuyumu-yumu mbubakali kuzooswaana basikwiiya bakwe. Akaambo kakuti Jesu wakali kubayanda basikwiiya bakwe, wakakumbila Wisi kuti ‘abakwabilile akaambo kamubi.’ (Joh. 17:14, 15) Jesu wakalizi kuti nabweeda kujulu, Saatani Dyabbulosi wakali kuyoozumanana kulwana aabakombi baJehova. Zili aantanganana kuti bakombi baJehova bayanda kukwabililwa.

2. Niinzi chitupa choonzyo chakuti Jehova ulazisandula nkombyo zyesu?

² Jehova wakayisandula nkombyo yaJesu akaambo kakuti ulamuyanda Mwanaakwe. Andiswe kuti twabeleka changuzu kuchita zintu zimubotezya Jehova, uyootuyanda alubo uyoozisandula nkombyo zyesu chiindi nitumukumbila kuti atukwabilile akuti atugwasye. Mbuli mutwe wampuli uuyanda bana bakwe alakwe Jehova ulabayanda bakombi bakwe. Kuti Leza waleka kutukwabilila zina lyakwe lilasampawulwa.

3. Nkamboonzi nituyanda kukwabililwa aaJehova?

³ Tuyanda kukwabililwa aaJehova kwiinda chiindi nkaambo Saatani wakatandwa kujulu alubo uli “abukali bupati.” (Ciy. 12:12) Alubo ulikupa kuti bamwi batupenzya babonaanga balikuchitila “Leza mulimo uusetekene.” (Joh. 16:2) Bamwi balatupenzya akaambo kakuti tatuchiti zintu nzibachita. Kufumbwa zintu zikonzya kupa kuti bantu batuzonde pesi tatweelede kuyoowa pe. Nkamboonzi? Nkaambo Jwi lyaLeza lyaamba kuti: “Mwami ulasyomeka, eelyo uyoomuyumya akumukwabilila  kumubi.” (2 Tes. 3:3) Jehova utukwabilila biyeni? Atubone nzila zibili.

4. Kweendelana alugwalo lwa Baefeso 6:13-17, Jehova utupedeenzi kuti atukwabilile?

⁴ Jehova utupede zilwanisyo nzitukonzya kubelesya kukulwana Saatani. (Bala Baefeso 6:13-17.) Zilwanisyo eezi nzitupedwe aaJehova zilisimide alubo zibeleka kabotu. Pesi zilakonzya kutugwasya kuti twakkala katuzizweete akuti twazumanana kuzibelesya. Kwalino, atubone kuti chilwanisyo chimwi achimwi chiimininaanzi?

5. Bbanti lyakasimpe niinzi alubo nkamboonzi nitweelede kulyaanga?

⁵ Bbanti lyakasimpe lyiiminina kasimpe kajanika muJwi lyaLeza Bbayibbele. Nkamboonzi nitweelede kwaanga bbanti eeli? Nkaambo Saatani “ngousyi wabubeji.” (Joh. 8:44) Saatani wakasaanguna chiindi kubeja alubo wazwidilila kweena “nyika yoonse.” (Ciy. 12:9) Kasimpe kali muBbayibbele kalatukwabilila kuti tuteenwi aaSaatani. Tulyaanga biyeni bbanti eeli lyakukozyanisya? Tulalyaanga kwiinda mukwiiya kasimpe kali atala aJehova, mukumukomba “mumuuya amukasimpe” akukkala katusyomeka muzintu zyoonse.—Joh. 4:24; Ef. 4:25; Heb. 13:18.

6. Chikwabilizyo chakaango chabululami niinzi alubo nkamboonzi nitweelede kuchizwaata?

⁶ Chikwabilizyo chakaango chabululami chiiminina milawu yaJehova iiluleme. Nkamboonzi nitweelede kuzwaata chikwabilizyo chakaango? Chikwabilizyo chakaango chakali kugwasya musoja kuti atayaswi aakaango, mbukubede, chikwabilizyo chakaango chabululami chikwabilila moyo wesu wakukozyanisya kuti utanyonganisigwi azintu zili munyika. (Tus. 4:23) Jehova uyanda kuti tumuyande alubo tumubelekele amoyo wesu woonse. (Mt. 22:36, 37) Pesi Saatani uyanda kuti tube aamyoyo iibili kwiinda mukupa kuti tuyande zintu zili munyika zizondwa aaJehova. (Jak. 4:4; 1 Joh. 2:15, 16) Kuti wakachilwa kupa kuti tuyande zintu zili munyika, Saatani ulatupenzya kuchitila kuti tuleke kuswiilila milawu yaJehova.

7. Tuchizwaata biyeni chikwabilizyo chakaango chabululami?

⁷ Tuzwaata chikwabilizyo chakaango chabululami kwiinda mukuswiilila milawu yaJehova akupona kweendelana anjiyo. (Int. 97:10) Bamwi babonaanga milawu yaJehova miyumu kwiiswiilila. Pesi kuti twaleka kuswiilila malayilile aali muBbayibbele tulaba mbuli musoja wakali kugwisya chikwabilizyo chakaango chiindi naakali kunkondo aakaambo kakuti wakali kubonaanga chilamulemena. Kuchita oobo mbufuba-fuba. Milawu yaJehova ‘tiiminyi pe’ kuti katumuyanda pesi ilatukwabilila.—1 Joh. 5:3.

8. Chambaanzi kuba aamawulu aalibambilide kwaambilizya makani mabotu?

⁸ Pawulu wakatusungwaazya kuti kumawulu eesu katusamide kabotu kulibambila kwaambilizya makani mabotu aaluumuno. Mulaamwi majwi, Pawulu utusungwaazya kuti tukambawuke makani mabotu aaBwaami chiindi choonse. Lusyomo lwesu lulasima chiindi nitubuzya bamwi mulumbe wamuBbayibbele. Kulatusungwaazya kubona bakombi baJehova munyika yoonse kabakambawuka makani mabotu chiindi nibali kumilimu, kuzikolo, kundawu zichitilwa mabbizinesi, aang’anda ang’anda, kuzintoolo, nibaswaya babbululu babo batali Bakamboni, nibakambawukila beenzinyina anibatakonzyi kuzwa mumaanda. Kuti twazumizya kuyoowa kuti kutukachizye kukambawuka nga tuli mbuli musoja wakali kugwisya nsangu zyakwe naakali kunkondo. Kuchita oobo, kwakali kukonzya  kupa kuti alichise kumawulu. Eezi zyakali kukonzya kupa kuti kumuyumine kulwana aabasinkondonyina alubo kwakali kumuyumina kuti aswiilile malayilile ngaakali kupegwa aamupati wabo.

9. Nkamboonzi nitweelede kunyampula ntobo mpati yalusyomo?

⁹ Ntobo mpati yalusyomo yimikilila lusyomo ndutulaalo muli Jehova. Tulaachoonzyo chakuti Jehova uyoozizuzikizya zyoonse zisyomezyo zyakwe. Lusyomo lupa kuti tukonzye “kuzima mivwi yoonse iiyaka mulilo iifwuswa amubi.” Nkamboonzi nitweelede kunyampula ntobo mpati? Nkaambo ilatukwabilila kuti tuteenwi aanjiisyo zyabasiluleyo naakuti tutayoowi nitulikusekwa. Kuti katutakwe lusyomo tuyoozumina kweenwa aabamwi kuti tuleke kuswiilila milawu yaJehova. Pesi kuti twazumanana kusyomeka chiindi nitulikusekwa kumilimu naakuti kuchikolo nga tulikutondeezya kuti tunyampwide ntobo mpati yakukozyanisya. (1 Pet. 3:15) Kuti wakaka mulimu uufozya mali nyingi akaambo kakuti ulakukachizya kuti uchite zintu zyabukombi, nga ulikutondeezya kuti usyoma Jehova. (Heb. 13:5, 6) Alubo lusyomo lulatugwasya kuti tuzumanane kukomba Jehova nikuba nitukazigwa.—1 Tes. 2:2.

10. Ngowani yalufutuko niinzi alubo nkamboonzi nitweelede kwiizwaata?

 ¹⁰ Ngowani yalufutuko mbulangilizi mbutupegwa aaJehova. Tuli aabulangilizi bwakuti Jehova uyootubusya kuti twafwa akutupa bulumbu kuti twasyomeka kulinguwe. (1 Tes. 5:8; 1 Tim. 4:10; Tit. 1:1, 2) Mbukunga ngowani yakali kukwabilila mutwe wamusoja, mbukubede andiswe, bulangilizi bukwabilila mizeezo yesu. Buyikwabilila biyeni? Bulangilizi butugwasya kuti tubikkile maanu kuzisyomezyo zyaLeza. Alubo butugwasya kuti tutakataazikani loko amapenzi ngituswaana. Tuyizwaata biyeni ngowani yakukozyanisya? Tulayizwaata kwiinda mukubona zintu mbuli mbazibona Leza. Muchikozyano, tatubikkili maanu kubunoti pesi tubikka Jehova mubusena bwakusaanguna.—Int. 26:2; 104:34; 1 Tim. 6:17.

11. Panga lyamuuya niinzi alubo nkamboonzi nitweelede kulibelesya?

¹¹ Panga lyamuuya ndiJwi lyaLeza Bbayibbele. Panga eeli lili aanguzu zyakuyubununa njiisyo zyakubeja akwaangununa bantu kuzwa kunjiisyo eezi. (2 Kor. 10:4, 5;2 Tim. 3:16, 17;Heb. 4:12) Twiiya mbutukonzya kubelesya panga eeli munzila iilikabotu kwiinda mukuchita chiiyo chesu aatulikke akutobelezya nzituyiisigwa aambunga yaLeza. (2 Tim. 2:15) Twabona mbutukwabililwa azilwanisyo nzyatupede Jehova. Kwalino, atubone zimwi nzyabelesya kuti atukwabilile.

12. Niinzi chimwi nchituyanda alubo nkamboonzi?

¹² Musoja taakali kukonzya pe kulwana basinkondonyina bali aanguzu kali aalikke pesi wakali kuyanda kugwasigwa aabamwi masoja. Munzila iikozyenie, tatukonzyi pe kuzwidilila kulwana Saatani abali kubbazu lyakwe katuli atulikke pesi tuyanda kugwasigwa aabakwesu aabachizi. Jehova utupede ‘ciinga cabakwesu’ bali munyika yoonse balibambilide kutugwasya.—1 Pet. 2:17.

13. Kweendelana alugwalo lwa Bahebrayo 10:24, 25, kunjila miswaangano kutugwasya biyeni?

¹³ Chimwi chintu chitugwasya nkunjila miswaangano. (Bala Bahebrayo 10:24, 25.) Chiindi nitukataazikene, miswaangano ilatubusilizya. Nsandulo zipegwa aabakwesu abachizi kumiswaangano zilatusungwaazya. Nkani zyamuBbayibbele azitondeezyo zitugwasya kuti tuzumanane kubelekela Jehova. Alubo tulasungwaazigwa chiindi nitwaambuula aabakwesu abachizi miswaangano kayitanatalika aniyamana. (1 Tes. 5:14) Kuyungizya aali zeezi, miswaangano itupa mweenya wakuti tugwasye bamwi alubo kugwasya bamwi kupa kuti tubotelwe. (Mil. 20:35; Rom. 1:11, 12) Alubo miswaangano itugwasya kuti tube aaluzibo mumulimu wakukambawuka. Muchikozyano, miswaangano itugwasya kuti tuzwidilile kubelesya Zibelesyo Nzitubelesya Kukuyiisya Bantu. Nkinkaako, weelede kulibambila kabotu miswaangano yambungano. Weelede kuswiilila nulikumiswaangano akubelesya nzwayiya. Kuchita zintu eezi, kuyoopa kuti ube “sikalumamba mubotu wa Kristo Jesu.”—2 Tim. 2:3.

14. Niinzi chimwi chitugwasya?

¹⁴ Chimwi chitugwasya mamiliyoni aabangelo bali aanguzu. Mungelo uumwi uli aanguzu zyakuchita zintu zipati. (Is. 37:36) Eezi zyaamba kuti, kuti bangelo kabali biingi bachita zintu zipati loko. Taakwe muntu nikuba mungelo waSaatani, uukonzya kuzunda mamiliyoni aabangelo baJehova bali aanguzu. Kuti katuli aaJehova kubbazu lyesu basinkondoma taakwe ambubabede pe. (Bab. 6:16) Kusyoma eezi kuyootugwasya kuti tulisimye chiindi babbululu besu, bantu  mbitubelekaabo ambitwiiyaabo kuchikolo nibatuchitila zintu zitali kabotu. Utalubi kuti tawuli kulwana aawulikke pe munkondo eeyi. Ulikugwasigwa aaJehova.

15. Kweendelana alugwalo lwa Isaya 54:15, 17, nkamboonzi Saatani natakonzyi kutulesya kukambawuka makani mabotu?

¹⁵ Kuli twaambo twiingi tupa kuti nyika eeyi yeendelezegwa aaSaatani ituzonde. Tatutoli lubazu mutwaambo twanyika alubo tatunjilili pe muli zyankondo. Twaambilizya atala azina lyaLeza aBwaami bwakwe kuti mbubo abulikke butakeete luumuno aanyika alubo tuswiilila milawu yakwe. Tugwasya bantu kuti babone kuti mweendelezi wanyika eeyi mubeji alubo mujayi. (Joh. 8:44) Alubo twaambilizya kuti nyika eeyi yeendelezegwa aaSaatani iyoonyonyoonwa. Saatani abatobeli bakwe tabakonzyi pe kutulesya kukambawuka. Nkinkaako, tuyoozumanana kutembawula Jehova amanguzu eesu woonse. Nikuba kuti Saatani uli aamanguzu, pesi wakachilwa kutulesya kukambawuka makani mabotu ali atala aBwaami munyika yoonse nkaambo tugwasigwa aaJehova.—Bala Isaya 54:15, 17.

16. Jehova uyoobakwabilila biyeni bakombi bakwe muchiindi chamapenzi mapati?

¹⁶ Niinzi ziyoochitika kunembo? Muchiindi chamapenzi mapati, Jehova uyootufutula munzila zibili. Chakusaanguna, uyoofutula bakombi bakwe basyomeka chiindi natakakupe kuti maami aanyika anyonyoone Bbabbiloni Mupati. (Ciy. 17:16-18; 18:2, 4) Chachibili, uyookwabilila bakombi bakwe chiindi natakanyonyoone basizibi boonse munkondo yaArmagedoni.—Ciy. 7:9, 10; 16:14, 16.

17. Kukkala katuli aabweenzinyina busimide aJehova kutugwasya biyeni?

¹⁷ Kuti katuli aabweenzinyina busimide aJehova, Saatani taakwe nzyatakachite pe kuti atunyonyoone chakumaninina. Pesi Saatani nguwe uutakanyonyoonwe chakumaninina. (Rom. 16:20) Nkinkaako, kkala kuzweete akuzumanana kubelesya zilwanisyo nzitupedwe aaJehova. Utalwani aawulikke. Gwasya bakombinyokwe alubo uswiilile malayilile aazwa kuli Jehova. Kuti wachita oobo, uyooba aachoonzyo chakuti Taata wakujulu siluyando uyookusimya alubo uyookukwabilila.—Is. 41:10.