1. Habwaki Yesu yasabire Yahwe kulinda abegeswa be?

HA ITUMBI ery’okumalirra Yesu akyali omu nsi, akaba natekerezaaho ebizibu ebisobora kuhika h’abegeswa be. Habw’okugonza Yesu akaba ainiire banywani be, akasaba Ise ngu: “Obalinde [habw’omubi].” (Yoh. 17:14, 15) Yesu akaba akimanyire ngu hanyuma y’okugaruka omu iguru, Sitaani akaba nagenda kugumizaamu narwanisa omuntu wena ayakugondeze kuheereza Yahwe. Nahabweki abantu ba Yahwe bakwetaagire obulinzi.

2. Kiki ekisobora kutugumya ngu Yahwe naija kugarukamu esaara zaitu?

² Yahwe akagarukamu esaara ya Yesu habwokuba amugonza. Kakuba tulengaho kukora kyona ekirukusoboka kusemeza Yahwe, naitwe naija kutugonza kandi naija kugarukamu esaara zaitu obuturamusaba kutukonyera kandi n’okutulinda. Nk’Omutwe gw’eka arukufaayo, Yahwe naija kugumizaamu n’afaaho abaana be. Kakuba eki atakikora, nikijumisa ibara lye.

3. Habwaki nitwetaaga obulinzi bwa Yahwe omu kasumi kanu?

³ Nitwetaaga obulinzi bwa Yahwe kukira na kara. Sitaani akabingwa omu iguru “ayina ekiniga kingi.” (Kus. 12:12) Sitaani asoboire kuletera abamu kutekereza ngu ‘nibaheereza Ruhanga’ kuraba omu kutuhiganiza. (Yoh. 16:2) Abandi abatarukwikiririza omuli Ruhanga, batuhiganiza habwokuba nitwahukana n’abantu b’ensi. Ensonga yoona ey’ebaletera kutuhiganiza tikiri kikuru, ekikuru kiri ngu titubatiina. Habwaki? Habwokuba Ekigambo kya Ruhanga nikigamba ngu: ‘Mukama waitu w’okwesiga, alitugumya kandi alitulinda hali omubi.’ (2 Bas. 3:3) Yahwe atulinda omu miringo ki? Leka tubazeeho emiringo ebiri.

4. Kusigikirra ha Abefeso 6:13-17, kiki Yahwe eky’atuhaire kutulinda?

⁴ Yahwe atuhaire ekijwaro eky’okurwanisa, ekisobora kutulinda Sitaani obw’atutahirra. (Soma Abefeso 6:13-17.) Ekijwaro kinu eky’okurwanisa kuruga hali Ruhanga ky’amaani kandi nikikora kurungi. Baitu nikiija kutulinda kakuba tujwara ebicweka byakyo byona kandi tukaikara tubijwaire. Buli kicweka nikimanyisa ki? Leka tubazeeho buli kicweka.

5. Omweko ogw’amananu nigumanyisa ki, kandi habwaki tusemeriire kugujwara?

⁵ Omweko ogw’amananu nigumanyisa amananu agarukusangwa omu Kigambo kya Ruhanga, Baibuli. Habwaki tusemeriire kujwara omweko gunu? Nukwo tutahabisibwa Sitaani “ise ebisuba.” (Yoh. 8:44) Amazire enkumi n’enkumi y’emyaka nabiiha ebisuba kandi ahabisize “ensi zona”! (Kus. 12:9) Baitu amananu agarukusangwa omu Baibuli gatulinda tutahabisibwa. Omweko gunu ogw’amananu tugujwara tuta? Tugujwara obutwega amananu agarukukwata hali Yahwe, obutumuramya “omu mwoyo namananu,” kandi n’obutuba b’amananu omu byona ebitukora.​—Yoh. 4:24; Bef. 4:25; Baheb. 13:18.

6. Ekyaha kifuba eky’okuhikirra nikimanyisa ki, kandi habwaki tusemeriire kukijwara?

⁶ Ekyaha kifuba eky’okuhikirra nikimanyisa endengo za Yahwe ez’okuhikirra. Habwaki tusemeriire kujwara ekyaha kifuba? Nk’oku ekyaha kifuba kirinda omutima gw’omusirikale gutacumitwa, ekyaha kufuba eky’okuhikirra kirinda omuntu waitu ow’omunda nukwo atahabisibwa ebintu ebibi ebirukukorwa omu nsi. (Nfu. 4:23) Yahwe n’atunihirramu kumugonza kandi n’okumuheereza n’omutima gwaitu gwona. (Mat. 22:36, 37) Sitaani alengaho kubaganiza omutima gwaitu, kuraba omu kutuletera kugonza ebintu by’ensi Yahwe ebyanoba. (Yak. 4:4; 1 Yoh. 2:15, 16) Kandi akakodyo ako obukatakora, alengeho kutuhambiriza kucwa emisingi ya Yahwe.

7. Tujwara tuta eky’omu kifuba eky’okuhikirra?

⁷ Tujwara eky’omu kifuba eky’okuhikirra obutwikiriza endengo za Yahwe ezirukukwata ha kihikire n’ekitahikire kandi n’obutworobera endengo ezi. (Zab. 97:10) Abamu nibasobora kutekereza ngu endengo za Yahwe nizimaraho abantu obugabe. Baitu kakuba tuleka kuteeka emisingi ya Baibuli omu bwomeezi bwaitu, nitusisana n’omusirikale owali omu bulemu hagati baitu ow’ahaimu eky’omu kifuba kye habwokuba natekereza ngu nikiremera muno. Eki nikiba ky’obudoma muno! Hali abo abarukugonza Yahwe ebiragiro bye, “tibirukulemera,” baitu bijuna obwomeezi bwabo.​—1 Yoh. 5:3.

8. Nikimanyisa ki kujwara enkaito?

⁸ Kandi Paulo natutererra kujwara enkaito nukwo twikale twetekaniize kutebeza amakuru amarungi ag’obusinge. Eki nikimanyisa ngu, tusemeriire kwikara twetekaniize kutebeza amakuru amarungi. Obutugambiraho abantu abandi obutumwa obuli omu Baibuli, kigumya kwikiriza kwaitu. Mali kanikigarramu amaani kurora omulingo abantu ba Yahwe omu nsi yoona bakozesa buli kagisa koona kurangirra amakuru amarungi. Kinu bakikora ha mirimo, omu masomero, omu biikaro bya bizinesi, nju ha nju, obu baba bagenzere kugura ebintu, kubungira abanyabuzaale baabo abatali omu mananu, obu baba n’abantu bamanyire, kandi n’obu baba batarukusobora kuruga omu ka. Kakuba tutiina kandi tukaleka kutebeza, nitusisana n’omusirikale ow’aihamu enkaito ze omu bulemu hagati. Nikyanguha muno ebigere bye kuhutaara. Ekirugamu, aba atakyasobora kwerwanaho kandi n’okuhondera ebiragiro eby’omudumizi we.

9. Habwaki nitwetaaga kuhimba engabu enkooto ey’okwikiriza?

 ⁹ Engabu enkooto ey’okwikiriza n’emanyisa okwikiriza okutwine omuli Yahwe. Twine okwikiriza ngu naija kuhikiriza emirago ye. Okwikiriza oku nikwija kutukonyera “okuraza emisogi yona eyomurro eyomubi.” Habwaki nitwetaaga kuhimba engabu enu enkooto? Habwokuba etulinda tutahabisibwa enyegesa ezaabo abecwireho ekitebe rundi kutatiina habw’ebigambo by’abo abatusekereza. Kakuba turaaba tutaine okwikiriza titurukwija kuba n’amaani ag’okwanga, abantu abandi obubaratusoonasoona kucwa endengo za Yahwe. Buli murundi twanga kukora ekintu Yahwe eky’arukunoba obutuba tuli ha mulimo, rundi ha isomero, okwikiriza kwaitu kuba nikutulinda. (1 Pet. 3:15) Buli murundi twanga kwikiriza omulimo ogurukusasura sente nyingi baitu ogurukusobora kutulemesa kuramya Yahwe kurungi, tuba nituhimba engabu yaitu. (Baheb. 13:5, 6) Kandi buli murundi tuheereza Yahwe n’obutuba nituhakanizibwa, tuba nitulindwa engabu yaitu.​—1 Bas. 2:2.

10. Enkofiira ey’okujunwa n’emanyisa ki, kandi habwaki tusemeriire kugijwara?

¹⁰ Enkofiira ey’okujuna nukwo okunihira Yahwe okw’atuha. Nitunihira ngu naija kutujuna  kuruga omu kufa kandi ahe empeera abo boona abakora eby’agonza. (1 Bas. 5:8; 1 Tim. 4:10; Tit. 1:1, 2) Nk’oku enkofiira erinda omutwe gw’omusirikale, okunihira kwaitu okw’okujuna kulinda entekereza yaitu. Omu mulingo ki? Okunihira oku kutukonyera kwikara tutaireho omutima emirago ya Ruhanga kandi kutukonyera kutetuntura muno habw’ebizibu byaitu. Enkofiira enu tugijwara tuta? Kinu tukikora obutukigumya ngu entekereza yaitu n’eikiranganiza n’entekereza ya Ruhanga. Ekyokurorraho, okunihira kwaitu titukuteeka omu itungo eritarukwesigwa baitu omuli Ruhanga.​—Zab. 26:2; 104:34; 1 Tim. 6:17.

11. Empirima ey’omwoyo niyo eha, kandi habwaki nitwetaaga kugikozesa?

¹¹ Empirima ey’omwoyo nikyo Ekigambo kya Ruhanga Baibuli. Empirima enu ine amaani ag’okwoleka ekisuba kyona kandi nokucungura abantu kuruga omu nyegesa ez’ebisuba hamu n’ez’akabi. (2 Kol. 10:4, 5; 2 Tim. 3:16, 17; Baheb. 4:12) Twega kukozesa empirima enu kurungi kuraba omu kwesomesa kurungi, hamu n’okutendekwa okututunga kuruga omu kitebe kya Yahwe. (2 Tim. 2:15) Kwongera ha kijwaro eky’okurwanisa, haroho omulingo ogundi ogw’amaani Yahwe ogw’atulindamu. Omulingo ogu nugwo guha?

12. Kintu ki ekindi ekiturukwetaaga, kandi habwaki?

¹² Omusirikale ow’amazire akasumi n’arwana akimanyire ngu tasobora kurwanisa ihe ery’amaani ali wenka; nayetaaga obukonyezi obw’Abasirikale bagenzi be. Omu mulingo nugwo gumu, titusobora kurwanisa Sitaani hamu n’abahondezi be tukabasingura tuli itwenka; nitwetaaga obusagiki bw’ab’oruganda na banyaanya itwe. Yahwe atuhaire ‘bene baitu’ omu nsi yoona abetekaniize kutukonyera.​—1 Pet. 2:17.

13. Kusigikirra ha Abaheburaniya 10:24, 25, tugasirwa tuta obutugenda omu nsorrokano?

¹³ Kugenda omu nsorrokano nugwo gumu ha miringo tutungamu obusagiki. (Soma Abaheburaniya 10:24, 25.) Obwire obumu itwena tuhwamu amaani​—eki obukibaho ensorrokano nizisobora kutugarramu amaani. Tugarurwamu amaani ebyokugarukamu eby’Abakristaayo bagenzi baitu ebiruga ha mutima. Embazo ezibaha ezirukusigikirra ha Baibuli hamu n’ebyokurorraho, bitwekambisa kugumizaamu nituheereza Yahwe. Tugarukwamu amaani obutubaza nabo ensorrokano zitakatandikire kandi na hanyuma yazo. (1 Bas. 5:14) Ekindi, ensorrokano zaitu zitukonyera kutunga okusemererwa okuruga omu kukonyera abandi. (Eng. 20:35; Bar. 1:11, 12) Ensorrokano zaitu zitukonyera n’omu miringo endi. Zitukonyera kweyongera kufooka abatebezi kandi abegesa abarungi. Ekyokurorraho, twega nk’oku tusobora kukozesa kurungi Ebikwato Byaitu Ebitukozesa Kwegesa. Nahabweki tekaniza kurungi ensorrokano ez’ekitebe. Obworaaba oli omu rusorrokano, huliriza kurungi. Hanyuma y’orusorrokano, teka omu nkora okutendekwa okw’otungire. Obw’orakora ebintu ebirungi nk’ebi, noija kufooka ‘omurwani omurungi owa Kristo Yesu.’​—2 Tim. 2:3.

14. Bukonyezi ki obundi obutwine?

¹⁴ Twine n’obusagiki obw’obukaikuru n’obukaikuru obwa bamalaika ab’amaani. Tekerezaaho ekintu malaika omu wenka eky’asobora kukora! (Is. 37:36) Hati tekerezaaho ihe ly’abamalaika ab’amaani ekibasobora kukora. Busaho muntu rundi daimoni ey’esobora kusingura ihe lya Yahwe ery’amaani. Yahwe nuwe nakirrayo kimu amaani, nahabweki obwaba alinaitwe, twikara tuli b’amaani kukira abarukutuhakaniza n’obuba nibaingana nkaha. (Bac. 6:16) Eki kihikiire  kimu! Tekerezaaho abo boona abasobora kukukonyera obwoba ohoirwemu amaani habw’ekintu omukozi mutaahi wawe, omwegi mugenzi wawe, rundi omunyabuzaale wawe ow’atali omu mananu eky’agambire rundi eky’akozere. Ijuka ngu omu bulemu bunu, torukurwana wenka. Nohondera oburagirizi bwa Yahwe, nahabweki nakusagika.

15. Kusigikirra ha Isaya 54:15, 17, habwaki hataroho omuntu wena ow’asobora kuhambiriza abantu ba Ruhanga kuleka kutebeza?

¹⁵ Haroho ensonga nyingi eziretera ensi eyeri hansi y’obwebembezi bwa Sitaani kutunoba. Titugwera rubaju omu by’obulemi kandi titwejumbira omu bulemu. Turangirra ibara lya Ruhanga, tutebeza ngu Obukama bwa Ruhanga nubwo bwonka oburaleeta obusinge, kandi tuhondera endengo ze ez’okuhikirra. Twoleka abantu ngu omulemi w’ensi enu mubi, mubiihi w’ebisuba kandi mwisi. (Yoh. 8:44) Kandi turangirra ngu omu kasumi akatali kahara ensi ya Sitaani negenda kuhwerekerezebwa. Baitu Sitaani n’abahondezi be tibalisobora kututanga kukora omulimo gw’okutebeza. Oihireho nitwija kugumizaami nituheereza Yahwe omu mulingo gwona oguturukusobora! N’obukiraaba ngu Sitaani aine amaani maingi, tasoboire kutanga omulimo gw’okutebezaaho Obukama kuhikaho abantu omu nsi yoona. Kinu kisobokere habwokuba twine obulinzi bwa Yahwe.​—Soma Isaya 54:15, 17.

16. Yahwe naija kujuna ata abantu be omu kasumi ak’omuhito omwingi?

¹⁶ Kiki ekirukwija omu maiso? Omu kasumi ak’omuhito omwingi, Yahwe naija kutujuna omu miringo ebiri erukuhuniriza. Ogw’okubanza, naija kujuna baheereza be abesigwa omu kasumi nambere araletera abakama ab’ensi kuhwerekereza Baburoni orukooto, ezi nizo ediini ez’ebisuba. (Kus. 17:16-18; 18:2, 4) Hanyuma, naija kujuna abantu be obw’arahwerekereza ensi ya Sitaani omu bulemu obwa Haramagedoni.​—Kus. 7:9, 10; 16:14, 16.

17. Tugasirwa tuta obutwikara haihi na Yahwe?

¹⁷ Obutwikara haihi na Yahwe, busaho kintu kyona Sitaani eky’asobora kutukora kutuhikyaho akabi habw’ebiro n’ebiro. Oihireho nuwe alihwerekerezebwa habw’ebiro n’ebiro. (Bar. 16:20) Nahabweki jwara ebicweka byona eby’ekijwaro eky’okurwanisa​—Kandi oikale okijwaire! Otalengaho kurwana obulemu bunu wenka. Sagika Abakristaayo bagenzi bawe. Kandi hondera oburagirizi bwa Yahwe. Kakuba okora binu byona, okigumye ngu So ow’omu iguru kandi ow’okugonza naija kukugumya kandi akulinde.​—Is. 41:10.