1. Kaia ne fakamolemole atu a Iesu ki a Ieova ke tausi atu ana soko?

I TE ‵toe po o tena olaga e pelā me se tagata, ne mafaufau a Iesu ki mea faiga‵ta kolā ka fe‵paki mo ana soko. Ona ko tena alofa ki ana taugasoa, ne fakamolemole atu a Iesu ki tena Tamana ke “tausi . . . latou ona ko te tino masei.” (Ioa. 17:14, 15) Ne iloa ne Iesu me kafai ko foki atu a ia ki te lagi, ka tumau eiloa Satani te Tiapolo i te taua atu ki so se tino telā e manako o tavini atu ki a Ieova. E manino ‵lei, me ma‵nako a tino o Ieova ki se puipuiga.

2. E mafai pefea o mautinoa i a tatou me ka tali mai a Ieova ki ‵tou ‵talo?

² Ne tali ne Ieova te ‵talo a Iesu ona ko tena alofa ki Tena Tama. Kafai e taumafai malosi tatou o fakafiafia a Ieova, ka alofa mai foki a ia ki a tatou, kae ka fakalogologo mai a ia ki ‵tou ‵talo mō se fesoasoani mo se puipuiga. E pelā me se Matai, ka tumau eiloa a Ieova i te tausi mai mo te atafai ki ana tama‵liki, me e mafai i ei o fakamasei a tena igoa io me ko tena ata!

3. Kaia ko manakogina i ei ne tatou te puipuiga a Ieova i aso nei?

³ Ko manakogina nei ne tatou a te puipuiga a Ieova i lō taimi mua. A Satani ko oti ne ‵pei ifo mai te lagi, “kae ko oko eiloa i te kaitaua.” (Faka. 12:12) Ko oti ne fai ne ia a nisi tino kolā e fakasaua mai ke mafau‵fau me e ofo atu ne latou “se taviniga tapu ki te Atua.” (Ioa. 16:2) A nisi tino kolā e se tali‵tonu ki te Atua, e fakasaua mai me e se ‵kau atu tatou ki te lalolagi. Faitalia me se a te pogai e fakasaua ei tatou, e mafai eiloa o loto tali‵tonu tatou. Kaia? Me fai mai te Muna a te Atua: “A te Aliki e fakamaoni, kae ka fakamalosi kae puipui ne ia koutou mai te tino masei.” (2 Tesa. 3:3) I te auala fea e puipui ei ne Ieova tatou? Ke sau‵tala tatou ki auala e lua.

4. E ‵tusa mo te Efeso 6:13-17, se a te mea ne tuku mai ne Ieova ke puipui ei tatou?

⁴ Ko oti ne tuku mai ne Ieova ki a tatou se gatu tau ke mafai o puipui tatou mai osomaiga a Satani. (Faitau te Efeso 6:13-17.) A te gatu tau tenei e malosi kae aoga! Kae ka puipui ne ia tatou māfai fua e fakapei ne tatou a vaega takitasi o te gatu tau—kae fakaaoga faeloa. Ne a mea e fakauiga ki ei a vaega takitasi o te gatu tau? Ke na onoono tatou ki ei.

5. Se a te fusi o te munatonu, kae kaia e ‵tau ei o fakapei ki luga i a tatou?

⁵ A te fusi o te munatonu e fakauiga ki muna‵tonu e maua i te Muna a te Atua, ko te Tusi Tapu. Kaia e ‵tau ei o fakapei ki a tatou a te fusi tenei? Me i a Satani ko te “tamana foki o te loi.” (Ioa. 8:44) Ne loi a ia mō se fia afe o tausaga kae ne takitaki ‵se ne ia a “te lalolagi nofoaki kātoa”! (Faka. 12:9) Kae ko muna‵tonu kolā e maua i te Tusi Tapu e puipui ei tatou ke mo a e fakaloiloigina. E fakapei pefea ki a tatou a te fusi fakatusa tenei? E fakapei ne tatou mai te tauloto ki te munatonu e uiga ki a Ieova, mai te tapuaki ki a ia “i te agaga mo te munatonu,” kae ke fakamaoni tatou i mea katoa.—Ioa. 4:24; Efe. 4:25; Epe. 13:18.

6. Se a te ufi fatafata o te amiotonu, kae kaia e ‵tau o fakapei ki luga i a tatou?

⁶ A te ufi fatafata o te amiotonu e fakauiga ki tulaga amio‵tonu o Ieova. Kaia e ‵tau ei o fakapei ki luga i a tatou te ufi fatafata? E pelā mo te ufi fatafata e puipui ei a te fatu o se sotia ke mo a ma pakia, e puipui ne te ufi fatafata o te amiotonu a ‵tou loto mai fakamalosiga ma‵sei o te lalolagi tenei. (Faata. 4:23) E manako a Ieova ko tatou ke a‵lofa kae tavini atu ki a ia mo ‵tou loto kātoa. (Mata. 22:36, 37) Tela la, e taumafai a Satani o vaelua ‵tou loto ko te mea ke fia‵fia tatou ki mea kolā e ofo mai ne te lalolagi—ko mea kolā e takalialia ki ei a Ieova. (Iako. 4:4; 1 Ioa. 2:15, 16) Kae kafai e se galue te mea tenā, ka taumafai a ia o fakasaua tatou ko te mea ke ‵teke tatou ki tulaga o Ieova.

7. E fakapei pefea ki luga i a tatou a te ufi fatafata o te amiotonu?

⁷ E fakapei ne tatou a te ufi fatafata o te amiotonu mai te talia ne tatou a tulaga o Ieova e uiga ki te mea tonu mo te mea ‵se, kae ola e ‵tusa mo tulaga konā. (Sala. 97:10) Nisi tino e mafau‵fau me i tulaga o Ieova ko tō faiga‵ta. Kae kafai ko se fakagalue ne tatou a fakatakitakiga i te Tusi Tapu i ‵tou olaga, ka fai tatou pelā me se sotia telā e tapale tena ufi fatafata i te taimi o te taua, me mafaufau a ia me ko tō ‵mafa. Mafaga o mea valea tenā! A fakatonuga a Ieova e “se ‵mafa” ki a latou kolā e a‵lofa ki a ia, kae faka‵sao i ei olotou ola.—1 Ioa. 5:3.

8. Se a te uiga ke pei a taka i ‵tou vae kae toka o folafola atu te tala ‵lei o te filemu?

⁸ E fakamalosi mai foki a Paulo ke pei ne tatou a taka i ‵tou vae kae ke toka o folafola atu te tala ‵lei o te filemu. Ko tena uiga, e ‵tau o toka faeloa tatou o talai atu te tala ‵lei o te Malo. Kafai e fakailoa atu ne tatou te fekau mai te Tusi Tapu ki nisi tino, ka fakamalosigina i ei ‵tou fakatuanaki. E fakamalosi loto ke lavea atu me i tino o Ieova i te lalolagi kātoa e ‵sala atu ki avanoaga ke folafola atu te tala ‵lei—māfai e ‵nofo atu i koga ga‵lue, i te akoga, i pisinisi, māfai e talai mai fale ki fale, ‵togi mea i sitoa, asi atu ki kāiga sē tali‵tonu, sau‵tala mo taugasoa, kae penā foki māfai e ‵nofo i te fale. Kafai e ma‵taku tatou kae fakagata te talai atu, ka fai eiloa tatou e pelā me se sotia telā e tapale ana taka i te taimi o te taua; ka faigofie o pa‵kia ana vae. Kae ka faigata eiloa o puipui a ia mai te fili, kae ka se mafai foki o tautali faka‵lei a ia ki fakatonuga a tena pule.

9. Kaia e tāua ei ke tauave ne tatou a te talita lasi o te fakatuanaki?

 ⁹ A te talita lasi o te fakatuanaki e fakauiga ki te fakatuanaki o tatou ki a Ieova. E tali‵tonu tatou me ka fakataunu ne ia ana tautoga katoa. Ka fesoasoani mai a te fakatuanaki tenā ke tamate ne tatou ki ei “a matasana ‵ka a te tino masei.” Kaia e tāua ke tauave ne tatou a te talita lasi tenei? Me puipui ei tatou ke mo a e fakaloiloigina ne akoakoga a aposetate kae ke mo a foki ma loto vāi‵vai māfai ko fakatauemu mai a tino ki a tatou. E aunoa mo te fakatuanaki, ka se maua ne tatou a te malosi ke ‵teke atu a tino kolā e taumafai o fakamalosi mai tatou ke se faka‵logo ki a Ieova. I te suā feitu, kafai e tauave faeloa ne tatou a te ‵tou talita lasi o te fakatuanaki i te koga ga‵lue io me ko te akoga, ka puipui faeloa tatou. (1 Pe. 3:15) Kafai e se talia ne tatou se galuega ‵togi ‵lei telā ka fakalavelave mai ki te ‵tou tapuakiga, ka puipui tatou ne te ‵tou fakatuanaki. (Epe. 13:5, 6) Kae i taimi takitasi e tavini tatou ki a Ieova faitalia a ‵tekemaiga, e puipui tatou ne te ‵tou fakatuanaki.—1 Tesa. 2:2.

10. Se a te puloutau o te fakaolataga, kae kaia e ‵tau o fakapei ki luga i a tatou?

¹⁰ A te puloutau o te fakaolataga ko te fakamoemoega e tuku mai ne Ieova ki a tatou—ko  te fakamoemoega me ka faka‵sao ne ia tatou mai te mate kae taui atu a tino katoa kolā e fai tena loto. (1 Tesa. 5:8; 1 Timo. 4:10; Tito 1:1, 2) E pelā mo te puloutau o se sotia e puipui ei tena ulu, e puipui ne te fakamoemoega mō te fakaolataga a ‵tou mafaufauga. I te auala fea? E fai ne te fakamoemoega tenā ke ‵saga tonu atu tatou ki tautoga a te Atua, kae fesoasoani mai ke maua ne tatou se kilokiloga ‵lei ki ‵tou fakalavelave. E fakapei pefea ki luga i a tatou a te puloutau? Mai te taumafai ke faka‵pau a ‵tou mafaufauga mo mafaufauga o te Atua. E pelā me se fakaakoakoga, e se fakavae a ‵tou fakamoemoega ki koloa sē mautinoa, kae ki te Atua.—Sala. 26:2; 104:34; 1 Timo. 6:17.

11. Se a te pelu o te agaga, kae kaia e ‵tau ei o fakaaoga ne tatou?

¹¹ A te pelu o te agaga ko te Muna a te Atua, ko te Tusi Tapu. E isi se malosi o te pelu tenā ke fakaasi faka‵sau atu ei so se loi kae ke fakasaoloto atu a tino mai te ‵nofo pologa ki akoakoga ‵se mo faifaiga ma‵sei. (2 Koli. 10:4, 5; 2 Timo. 3:16, 17; Epe. 4:12) E tauloto tatou ke iloa o fakaaoga faka‵lei te pelu tenā e auala i sukesukega totino mo akoakoga kolā e maua ne tatou mai te fakapotopotoga a te Atua. (2 Timo. 2:15) I tafa o te gatu tau, e tuku mai foki ne Ieova ki a tatou se suā vaega o te puipuiga. Se a te mea tenā?

12. Se a te fesoasoani e manakogina ne tatou, kae kaia?

¹² E iloa ne se sotia apo me e se mafai o manumalo a ia i te taua atu ki se kautau lasi i a ia loa; e manakogina ne ia te fesoasoani o nisi sotia. E penā foki tatou, e se mafai o manumalo māfai e taua atu tatou ki a Satani mo ana tino i a tatou loa. E ma‵nako tatou ki te fesoasoani o ‵tou taina mo tuagane. Ko oti ne fakatoka ne Ieova “se kautaina” i te lalolagi kātoa kolā e mafai o fesoasoani mai ki a tatou.—1 Pe. 2:17.

13. E ‵tusa mo te Epelu 10:24, 25, e aoga pefea ‵tou fakatasiga ki a tatou?

¹³ Tasi o auala e maua ne tatou te fesoasoani ko te ‵kau atu ki ‵tou fakatasiga. (Faitau te Epelu 10:24, 25.) Kafai e loto vāi‵vai tatou i nisi taimi, e fakamalosi mai a fakatasiga ki a tatou. E fakamalosigina tatou ne tali a ‵tou taina mo tuagane kolā e fai mo te loto kātoa. A olotou lāuga mo fakaasiga e fakamalosi aka i ei tatou ke tumau i te tavini atu ki a Ieova. A sau‵talaga fakamalosi loto mai mua io me mai tua o fakatasiga e fakamalosi ei tatou. (1 Tesa. 5:14) E se gata i ei, e maua ne tatou te avanoaga i ‵tou fakatasiga ke fesoasoani atu ki nisi tino. (Galu. 20:35; Loma 1:11, 12) E uke aka foki a nisi auala e fesoasoani mai ei ‵tou fakatasiga ki a tatou. E momea aka i ei a te ‵tou ata‵mai ke fai pelā me ne tino talai mo faiakoga apo i te galuega talai. Pelā me se fakaakoakoga, e tauloto tatou ke apo i te fakaaogaga o te Pusa o Mea Faigaluega mō Akoakoga. Tela la, ke fakatoka faka‵lei ki fakatasiga a te fakapotopotoga. I fakatasiga, ke fakalogo‵logo faka‵lei. Ka oti te fakatasiga, ke fakagalue akoakoga kolā ne maua ne koe. Mai te faiga penā, ka fai eiloa koe pelā me “se sotia ‵lei a Keliso Iesu.”—2 Timo. 2:3.

14. Se a te suā fesoasoani e maua ne tatou?

¹⁴ E maua foki ne tatou a te fesoasoani o te fia miliona o agelu ma‵losi. Mafaufau aka la ki se mea telā e mafai o fai fua ne se agelu tokotasi! (Isa. 37:36) Mafaufau aka la ki mea ka mafai ne se kautau lasi o agelu o fai. E seai se tagata io me se temoni e mafai o faka‵pau tena malosi ki te kautau malosi a Ieova. A Ieova e malosi fakafia atu. Kafai e ‵kau fakatasi a ia mo tatou, ka sili fakafia atu a te ‵tou ma‵losi i  lō ‵tou fili, faitalia te tokouke o latou. (Fama. 6:16) Ko oko loa i te ‵tonu o te mea tenā! Ke masaua faeloa ne koe a manatu konā māfai ko loto vāivāi koe i pati e fai atu ne se tino e ga‵lue mo koe, se tamaliki i te akoga io me se kāiga sē talitonu o koe. Masaua me e se ko koe fua tokotasi i te taua tenei. E tautali loa koe ki te fakatonuga a Ieova.

15. E ‵tusa mo te Isaia 54:15, 17, kaia e se mafai ei ne se tino o taofi a tino o te Atua mai te talai atu?

¹⁵ E uke a pogai e takalia‵lia mai ei te lalolagi telā e pule ki ei a Satani. E tumau tatou i te sē ‵kau atu ki mea fakapolitiki io me ko kautau. E folafola atu ne tatou a te igoa o te Atua, me i te Malo ko te fakamoemoega fua e tasi ke maua te filemu, kae ola e ‵tusa mo ana tulaga amio‵tonu. E fakaasi faka‵sau atu ne tatou i te pule o te lalolagi tenei se tino loi kae tatino. (Ioa. 8:44) Kae fakailoa atu ne tatou ki tino me ko pili mai te fakaseaiga o te lalolagi a Satani. Ka se mafai eiloa ne Satani mo ana tino o fakagata te ‵tou galuega talai. I lō te fai penā, ka tavae faeloa ne tatou a Ieova i so se auala telā e mafai o fai tatou penā! E tiga eiloa te malosi o Satani, seki mafai eiloa o taofi ne ia a te fekau o te Malo ke oko atu ki tino i te lalolagi kātoa. E mafai fua ne tatou o fai te mea tenā ona fua ko te puipuiga a Ieova.—Faitau te Isaia 54:15, 17.

16. Ka faka‵sao pefea ne Ieova ana tino i te taimi o te fakalavelave lasi?

¹⁶ Ne a mea ka ‵tupu i aso mai mua? I te taimi o te fakalavelave lasi, ka faka‵sao eiloa ne Ieova tatou i auala fakaofoofogia e lua. Muamua la, ka faka‵sao ne ia ana tavini fakamaoni māfai ko fakaaoga ne ia a tupu o te lalolagi ke fakaseai a Papelonia te Sili, te emupaea o lotu ‵se. (Faka. 17:16-18; 18:2, 4) Ka oti ko faka‵sao ei ne ia ana tino māfai ko fakaseai atu ne ia te ‵toega o te lalolagi a Satani i Amaketo.—Faka. 7:9, 10; 16:14, 16.

17. E aoga pefea ki a tatou a te tumau i te fakapilipili atu ki a Ieova?

¹⁷ Kafai e tumau tatou i te fakapili‵pili ki a Ieova, ka se mafai ne Satani o fai se mea ke fakalogo‵mae mai ki a tatou ki te se-gata-mai. A te ‵tonuga loa, ko ia ka fakaseai atu ki te se-gata-mai. (Loma 16:20) Tela la, ke na fakapei ki luga i a tatou a vaega katoa o te gatu tau—kae fakaaoga faeloa! Sa taumafai o taua atu ki a Satani i a koe loa. Ke ‵lago atu ki ou taina mo tuagane. Kae ke fakalogo ki fakatonuga a Ieova. Kafai e fai koe penā, ka loto talitonu koe me ka fakamalosi kae puipui koe ne tou Tamana alofa i te lagi.—Isa. 41:10.