1. Иисус Адазын өөреникчилерин камгалаар кылдыр чүге дилээн?

ИИСУС өөреникчилеринге ынак болгаш, чок апаарының мурнунда олар дээш сагыжы аарып турган. Ол дээрже үне бээрге, олар боттары артып каар турган. Бурганга бараалгап турар улусче Эрлик халдаар деп, ол билгеш, оларны камгалаарын Адазындан дилээн (Ин. 17:14, 15). Ынчангаш Бурганның бараалгакчыларынга камгалал херек турган.

2. Иегова камгалал дилээн мөргүлдеривиске харыылаар деп чүге бүзүрээр бис?

² Иегова Оглунга ынак болгаш, ооң мөргүлүнге харыылаан. Бис база Иегованы өөртүрүн кызар болзувусса, Ол бистиң камгалал дилээн мөргүлдеривиске албан харыылаар. Иегова — ынакшылдыг Ада болгаш, ажы-төлү дээш сагыш човап турар. Чүге дизе Ол ыдыктыг адын бодап чоруур.

3. Иегованың камгалалы биске чүге херек?

³ Амгы үеде Иегованың камгалалы биске кажангызындан-даа артык херек. Эрлик дээрден дүжүр октаттырган болгаш, «хөлчок килеңнээн» (Ажыд. 12:12). Бисти истеп сүрүп турар чамдык улус «Бурганга бараан болуп» турар деп бодап, Эрликке мегеледип алган (Ин. 16:2). А өске улус бо делегейде кижилерге дөмей эвес боорувуска, бисти истеп сүрүп турар. Ындыг-даа болза, олардан кортпас бис, чүге дизе Библияда: «Дээрги-Чаяакчы сөзүнге шынчы. Ол силерни быжыктырар база бузуттуг эрликтен кадагалаар» — дээн (2 Фес. 3:3). Иегова бисти кандыг ийи арганың  дузазы-биле камгалап турарын сайгарып көөр бис.

4. Иегова бисти камгалаар дээш чүнү берген? (Эфесчилерге 6:13—17).

⁴ Иегова бисти Эрликтиң халдаашкыннарындан камгалаар дээш, чепсек-херекселди берген. (Номчуптуңар: Эфесчилерге 6:13—17.) Олар бүзүрелдиг болгаш быжыг. Оларның шуптузун кеткеш, ужулбас болузувусса, чүгле ынчан камгалал алыр бис. Ам чепсек-херексел бүрүзүн сайгарыптаалыңар.

5. Алыс шынның куру дээрге чүл ол база ону чүге куржанып алыр ужурлуг бис?

⁵ Алыс шынның куру дээрге Библияда бижиттинген бүгү алыс шын-дыр. Муң-муң чылдар бурунгаар «нүгүл-мегениң адазы» апарган Эрлик бүгү делегейни дуурайлап чоруур! (Ин. 8:44; Ажыд. 12:9). Ынчангаш ооң мегезинге алыспас дээш, ол курну куржанып алыр ужурлуг бис. Иегованың дугайында алыс шынны билип, Аңаа бараалгап, бүгү талазы-биле шынчы боор болзувусса, ону куржанып алганывыс ол болур (Ин. 4:24; Эф. 4:25; Евр. 13:18).

6. Чөптүг-шынныг чоруктуң куяк хеви дээрге чүл ол база ону чүге кедип алыр ужурлуг бис?

⁶ Чөптүг-шынныг чоруктуң куяк хеви дээрге Иегованың чөптүг-шынныг негелделери-дир. Дайынчы кижиниң куяк хеви ооң чүрээн камгалаары дег, чөптүг-шынныг чоруктуң куяк хеви бисти бо делегейниң багай салдарындан камгалаар (У. ч. 4:23). Иегова бисти Аңаа бүгү-ле чүрээвистен ынак болурувусту күзеп турар (Мф. 22:36, 37). А Эрлик бисти Иегованың хөңнү чок чүүлдеринге ынак апарзын дээш, бар шаа-биле кызып турар (Иак. 4:4; 1 Ин. 2:15, 16). А кажан сорулгазы бүтпейн баарга, ол бисти коргудуп, Иеговага удурланырынче ыдалап турар.

7. Чөптүг-шынныг чоруктуң куяк хевин канчаар кедерил?

⁷ Иегованың тургузуп кааны эки-бакты ылгаар негелделерин сагып чурттаар болзувусса, чөптүг-шынныг чоруктуң куяк хевин кедип алган боор бис (Ыд. ыр. 96:10). Чамдык улус Бурганның негелделерин хөлүн эрттир шыңгыы деп санаар. Бир эвес бис библейжи дүрүмнерни хажыдып эгелээр болзувусса, дайын кидин-түлүк бооп турар үеде куяк хевин аар чүве-дир дээш уштуп каапкан кижиге дөмей боор бис. Ол дыка-ла мелегей-дир бе? Иеговага ынак болзувусса, Ооң чагыгларын күүседири берге эвес боор, чүге дээрге оон амы-тынывыс хамааржыр болгай (1 Ин. 5:3).

8. «Буянныг Медээни суртаалдаарынга белениңер — бутка кедер идииңер болзун» дээрге чүү дээни ол?

⁸ Павел элчин: «Амыр-тайбың дугайында Буянныг Медээни суртаалдаарынга белениңер — бутка кедер идииңер болзун» — дээн. Өскээр чугаалаарга, кажан-даа суртаалдаарынга белен болуңар дээн. Өөрүнчүг чүүл, бүгү делегейде Бурганның бараалгакчылары кандыг-даа арганы ажыглап тургаш, суртаалдап турар! Чижээ, олар ажылынга, школага, хөй-ниити черлеринге, садыгларга, бажыңнарны кезип азы Бурганга бүзүревес төрелдеринге аалдап чорааш, безин кезек үе ишти бажыңындан үнүп шыдавас-даа болза, таныыр улузунга буянныг медээни суртаалдап турар. Бир эвес суртаалдаарындан коргар болзувусса, дайын үезинде идиин уштуп каапкан дайынчы кижиге дөмей болур бис. Ындыг дайынчы будун кемдедип алгаш, шериг баштыңының айтыышкыннарын күүседип шыдавайн, дайзынынга удур тулчуп шыдавайн баар.

9. Бүзүрелдиң дозуг-камгалалын тудуп алыры чүге эргежок чугула?

 ⁹ Бүзүрелдиң дозуг-камгалалы дээрге Иегова шупту аазаашкыннарын күүседиптер деп бүзүрээри-дир. Бүзүрелдиң ачызында «бузуттуг эрликтиң хамык оттуг согуннарын дозуп шыдаар» бис. Ол ышкаш ооң ачызында ойталакчыларның меге өөредиглеринге алыспас бис база улус бисти бак сөглээрге, тогбас бис. Бир эвес бүзүрел чок турган болзувусса, улус Бурганның дүрүмнерин хажыдыптар кылдыр бисти ыдалаарга, алзыптар ийик бис. Ынчангаш ажылывыска азы школага идегеливисти камгалаарынга бүзүрел херек (1 Пет. 3:15). Бүзүрел оон ыңай бисти Иеговага бараалгаарынга шаптыктаар, хөй шалыңныг ажылдан ойталаарынга дузалап турар (Евр. 13:5, 6). Удурланыышкыннар турза-даа, Иеговага бараалгаарывыска биске база-ла бүзүрел дузалап турар (1 Фес. 2:2).

10. Камгалалдың куяк бөргү дээрге чүл ол база ону чүге кедер ужурлуг бис?

¹⁰ Камгалалдың куяк бөргү дээрге Иегованың берип турар идегели-дир. Иегова Ооң күзел-соруун күүседип турар шупту бараалгакчыларын албан шаңнаар. Олар амы-тынындан чарлы-даа бээр болза, катап  диргизиптер (1 Фес. 5:8; 1 Тим. 4:10; Тит. 1:1, 2). Куяк бөрт дайынчы кижиниң бажын камгалап турганы дег, идегел база угаан-бодалывысты камгалап турар. Канчаар? Бис идегелдиң ачызында Бурганның аазаашкыннарын утпас бис база бергелер түр када дээш эмин эрттир дүвүревес бис. Бүгү чүүлче Иегованың көрүжү-биле көөр болзувусса, куяк бөрттү кедип алган боор бис. Чижээ, бис «идегел чок эртине-байлакка» эвес, а Бурганга ынанып турар бис (1 Тим. 6:17; Ыд. ыр. 25:2; 103:34).

11. Сүлдениң хылыжы дээрге чүл ол база ону чүге ажыглаар ужурлуг бис?

¹¹ Сүлдениң хылыжы дээрге Бурганның Сөзү-дүр. Ооң ачызында бис шынны мегеден ылгап билип, меге өөредиглерден болгаш багай чаңчылдардан адырлырынга улуска дузалап турар бис (2 Кор. 10:4, 5; 2 Тим. 3:16, 17; Евр. 4:12). Библияны хууда өөренип, Бурганның организациязының удуртулгазын эдерер болзувусса, ол хылышты шын ажыглап өөренип алыр бис (2 Тим. 2:15). Бо чепсектерден аңгыда, Иегова бисти оон ыңай канчаар камгалап турар?

12. Биске оон ыңай кымның дузазы херек база чүге?

¹² Дуржулгалыг дайынчы бүгү аг-шеригге удур чааскаан демисежип шыдавас деп билир. Ооң-биле дөмей, биске база Эрликке болгаш ооң талалакчыларынга удур туржурунга акы-угбаларывыстың дузазы херек. Иегованың ачызында биске үргүлчү дуза кадарынга белен делегей чергелиг ха-дуңмавыс бар (1 Пет. 2:17).

13. Еврейлерге 10:24, 25-тен алырга, чыыштар биске канчаар дузалап турар?

¹³ Шак ындыг деткимчени чыыштан ап турар бис. (Номчуптуңар: Еврейлерге 10:24, 25.) Кижи бүрүзү өйлеп-өйлеп ундарай бээр. Ындыг үеде акы-угбаларывыстың хей-аът көдүрер харыылары, даалгалары база библейжи илеткелдер бисти сорук киирер (1 Фес. 5:14). Оон аңгыда, чыыштың бетинде азы соонда ха-дуңмавыс-биле аралажып тургаш, өөрүшкүнү миннир бис (Аж.-ч. 20:35; Рим. 1:11, 12). Чыышка суртаалдаар база өөреникчилер белеткээр арга-мергежиливисти бедидип турар бис. Чижээ, суртаалдаар херекселдерни шын ажыглап өөренип турар бис. Ынчангаш чыыштарга эки белеткенип, программаны кичээнгейлиг дыңнап, билип алган чүүлүвүстү ажыглаарын кызаалыңар. Ынчан «Христос Иисустуң бердинген дайынчылары» болур бис (2 Тим. 2:3).

14. Иегова биске оон ыңай канчаар дузалап турарыл?

¹⁴ Биске оон ыңай күчү-күштүг дүк-түмен дээрниң төлээлери дузалап турар. Чаңгыс дээрниң төлээзи безин чүнү кылып болур ийик, сактып келиңер даан (Иса. 37:36). А аг-шериг дээрниң төлээлери кайы хире кайгамчык чүүлдү кылып болур деп бодаар силер! Оларга кым-даа, кижилер-даа, буктар-даа удурланып шыдавас. Иегова кымдан-даа артык күштүг. Иегованың талазында боор болзувусса, биске кым-даа удурланып шыдавас (Башт. 6:16). Ынчангаш кады ажылдап турар улузуңардан, чаңгысклассчыларыңардан азы Бурганга бүзүревес төрелдериңерден коргуп турар болзуңарза, чааскаан эвес силер! Иегованы дыңнап турар болзуңарза, Ол силерниң талаңарда боор.

15. Исайя 54:15, 17-ден алырга, Бурганның чонун чүге кым-даа тургузуп шыдавас?

¹⁵ Бо делегейниң биске хөңнү чок болур чылдагааннары дыка хөй. Бис политикага  киришпейн, ок-чепсек тутпайн турар бис. Бурганның адын алдаржыдып, чүгле Ооң Чагыргазы бүдүн делегейге тайбыңны тургузар деп чугаалап, Ооң чөптүг-шынныг дүрүмнеринге чагыртып чоруур бис. Ол ышкаш бо делегейниң чагырыкчызы Эрликти өлүрүкчү болгаш мегечи деп сойгалап, ооң делегейи удавас узуткаттырар деп чарлап турар бис (Ин. 8:44). Эрлик болгаш ооң талалакчылары бисти тургузуп шыдавас. Бис соксаар хамаанчок, Иегованы алдаржыдар дээш бар-ла аргаларны ажыглаар бис! Эрлик чеже-даа күштүг болза, буянныг медээни черниң шупту булуңнарынга суртаалдап чедирер бис, чүге дизе бисти Иегова камгалап турар. (Номчуптуңар: Исайя 54:15, 17.)

16. Бурган коргунчуг хилинчек үезинде чонун канчаар камгалаар?

¹⁶ Бисти чүү манап турар? Бурган коргунчуг хилинчек үезинде шынчы бараалгакчыларын камгалаар. Канчаар? Бурган чер-делегейниң хааннарын шупту меге шажыннарны, Өндүр улуг Вавилонну, узуткаарынче оттурар (Ажыд. 17:16—18; 18:2, 4). Оон Ол Армагеддон дайынынга Эрликтиң делегейиниң когун үзүп, Бодунуң чонун камгалаар (Ажыд. 7:9, 10; 16:14, 16).

17. Иегова-биле быжыг хамаарылга биске канчаар дузалап турар?

¹⁷ Бир эвес Иегова-биле быжыг хамаарылгалыг болзуңарза, силерге Эрлик эттинмес хире хораны чедирип шыдавас. А Эрликтиң бодун мөңге узуткаашкын манап турар (Рим. 16:20). Ынчангаш «Бурганның чепсек-херекселин» кедип алгаш, оларны ужулбаңар! Чааскаан дайылдашпаңар. Акы-угбаларны деткиңер. Иеговага дыңнангыр болуңар. Ынчан дээрде Адаңар силерни деткип, камгалаар (Иса. 41:10).