1. Малы Иисус Иеговаез куриз дышетскисьёссэ утьыны?

 КУЛОН азяз уе Иисус малпаськиз шуг-секытъёс сярысь, кудъёсыныз пумиськозы солэн дышетскисьёсыз. Со яратӥз аслэсьтыз эшъёссэ, соин ик Атайзэ куриз соосты Шайтанлэсь утьыны (Иоанн 17:14, 15). Иисус тодӥз, ӝоген инме ӝутскоз шуыса, нош Шайтан азьланяз но Иеговалэн вань ужась-тыршисьёсыныз ожмаськоз шуыса. Соин ик Инмарлэсь калыксэ утьыны кулэ вал.

2. Малы ми юн оскыны быгатӥськомы, Иегова юрттэт но утиськон сярысь вӧсяськонъёсмес кылоз шуыса?

² Иегова Иисуслэсь куронзэ быдэстӥз, малы ке шуоно со аслэсьтыз Пизэ яратэ. Инмар милемыз но яратоз, ми вань кужмысьтымы тыршимы ке сое шумпоттыны. Озьы ик со кылоз милемыз, куке ми солэсь куромы милемлы юрттыны но милемыз утьыны. Иегова — яратӥсь Атай, соин ик со аслаз нылпиосыз сярысь котьку но сюлмаське. Инмар озьы ӧз лэсьты ке, солэн ӟеч нимыз саптаськоз.

3. Малы милемлы Иеговалэн утемез кулэ?

³ Тужгес но туннэ милемлы Иеговалэн утемез кулэ. Шайтан инмысь сэрпалтэмын вал. Со туж бадӟым йыркурен улэ (Усьт. 12:12). Шайтан куд-ог адямиосты оскытыны быгатӥз, милемыз уйылыса-улляса, соос Инмарлы ужало-тыршо шуыса (Иоанн 16:2). Нош соос, кинъёс Инмарлы уг оско, милемыз уйыло-улляло, малы ке шуоно ми та дуннелэн эсэпъёсызъя ум улӥське. Кыӵе муген гинэ адямиос милемыз медам уйылэ-уллялэ, соос милемыз уз кышкатэ. Малы? Малы ке шуоно Инмарлэн Кылаз гожтэмын: «Кузё-Инмар оскиськымон, Со тӥледыз юнматоз, шайтанлэсь утёз» (2 Фес. 3:3). Кызьы Иегова милемыз уте? Ойдолэ эскеромы кык амалъёсты.

4. Мар сётэ милемлы Иегова утиськон понна, Ефесъёслы 6:13—17 лыдэ басьтыса?

⁴ Иегова сётэ милемлы духовной ожмаськон тӥрлыкъёсты, кудъёсыз милемыз Шайтанлэсь утё. (Лыдӟе Ефесъёслы 6:13—17.) Та ожмаськон тӥрлыкъёс юнэсь. Но соос утёзы милемыз соку гинэ, куке ми соос пӧлысь ваньзэ дӥсяломы но вылысьтымы ум куялэ. Ойдолэ соос сярысь пыр-почгес вераськомы.

5. Мар со сыӵе зэмлыклэн еэз но малы ми сое нуллыны кулэ?

⁵ Зэмлыклэн еэз — со Инмарлэн Кылысьтыз вань зэмлыкъёс. Малы милемлы та еэз нуллоно? Малы ке шуоно Шайтан — «ӧрекчаськонлэн атаез» (Иоанн 8:44). Сюрс аръёс куспын со туж быгатыса пӧяськыны дышиз. Со «быдэс дуннелэсь визьзэ» тугаса возе! (Усьт. 12:9). Но Библиысь зэмлыкъёс юртто милемлы Шайтанлэн пӧяськонэзлы сётскытэк улыны. Ми та еэз нуллӥськомы, куке Иегова сярысь зэмлыкен тодматскиськомы, солы «духен но зэмлыкен» йыбыртъяськомы но пӧяськытэк улӥськомы (Иоанн 4:24; Еф. 4:25; Евр. 13:18).

6. Мар со сыӵе шонер улонлэн корт дӥсез но малы ми сое нуллыны кулэ?

⁶ Шонер улонлэн корт дӥсез — со Иеговалэн шонерлыко курон-косонъёсыз. Малы ми сое нуллыны кулэ? Кызьы корт дӥсь ожмаськон дыръя ожгарчилэсь сюлэмзэ уте вал, озьы ик шонер улонлэн корт дӥсез но уте милемыз, та дуннелэн учконъёсыз ми вылэ медаз пыӵалэ шуыса (Мад. 4:23). Иеговалэн потэ, ми сое мед яратомы но вань сюлмысьтымы солы мед ужаломы-тыршомы шуыса (Матф. 22:36, 37). Соин ик Шайтан тырше милесьтым сюлэммес люкыны. Со понна кулэ, ми мед яратомы шуыса сое, мае та дунне ӵектэ, нош сое Иегова адӟемпотостэм каре (Иак. 4:4; 1 Иоанн 2:15, 16). Тае лэсьтыны Шайтанлэн уг пӧрмы ке, со милемыз кышкатыны турттэ, ми Иеговалэсь медам кылзӥське ни шуыса.

7. Мар кароно шонер улонлэсь корт дӥсьсэ нуллон понна?

⁷ Ми шонер улонлэсь корт дӥсьсэ нуллӥськомы, куке ӟечез но уродэз шоры Иегова сямен учкиськомы но солэн курон-косонъёсызъя улӥськомы (Пс. 96:10). Куд-огъёсыз малпало, Иеговалэн куронъёсыз укыр чурытэсь шуыса. Но ми Библиысь возетъёсъя улэмысь дугдӥмы ке, соку кельшомы ожгарчилы, кудӥз ожмаськон дыръя вылысьтыз корт дӥсьсэ куштэ, малы ке шуоно малпа, со туж секыт шуыса. Тӥ соглаш луоды, дыр, со визьмо уз луы! Соос понна, кинъёс Иеговаез ярато, солэн «курон-косонъёсыз секытэсь ӧвӧл», малы ке шуоно соос улонэз утё (1 Иоанн 5:3).

8. Мар кароно, «Ӟеч Иворез тодытыны пыдысьтымы пыдкутчанмы дась мед луоз» шуыса?

⁸ Павел милесьтым мылкыдмес ӝутэ, «тупаса улон сярысь Ӟеч Иворез тодытыны пыдысьтымы пыдкутчанмы дась мед луоз» шуыса. Мукет сямен вераса, милемлы котьку но дась луоно Эксэйлык сярысь ӟеч иворез тодытыны. Куке ми мукетъёсызлы Библиысь иворез вераськомы, милям осконмы юнма. Ми туж шумпотӥськомы, быдэс дунне вылысь Иеговалэн ужась-тыршисьёсыз котькуд тупась учыре тодытыны тыршо шуыса! Соос тодыто уж доразы, школаын, куке коркась корка ветлыса но адямиослэн ужан интыосазы тодыто, вузкаронниосын басьясько, оскисьтэм ӵыжы-выжыоссы доры куное ветло, тодмоосынызы верасько, озьы ик соку но, куке огдырлы дорысьтызы потаны уг быгато. Ми кышканлы сётскысалмы ке но тодытэмысь дугдысалмы ке, соку кельшысалмы ожгарчилы, кудӥз ожмаськон дыръя пыдысьтыз пыдкутчанзэ кыле. Озьы со пыдзэ вӧсь карыны  быгатысал. Нош сыӵе учыре солы секыт луысал тушмонэзлэсь утиськыны но кивалтӥсезлэсь курон-косонъёссэ быдэсъяны.

9. Малы милемлы осконлэн щитэз кулэ?

⁹ Осконлэн щитэз — со Иеговалы осконмы. Ми оскиськомы, Инмар вань кылсётонъёссэ быдэстоз шуыса. Та оскон юрттэ милемлы Шайтанлэсь «ӟырдатыса лэзьям вань ньӧлъёссэ кысыны». Малы милемлы кулэ осконлэн щитэз? Солы луыса ми утиськыны быгатомы зэмос йыбырттонлэсь палэнскемъёслэн дышетонъёссылэсь но мукетъёсызлэн мыскыл каремзылэсь. Осконтэк милям кужыммы ӧй тырмысал Иеговалэсь кылзӥськыны, куке мукетъёсыз мылкыдмес ӝуто солэн эсэпъёсызлэсь кылзӥськытэк улыны. Та оскон уте милемыз, куке уж дорамы яке школаын ми осконмес утиськомы (1 Пётр 3:15). Со уте милемыз соку но, куке ми палэнтӥськомы бадӟымгес уждунэн ужез, кудӥз люкетысал милемлы Иеговалы ужаны-тыршыны (Евр. 13:5, 6). Со сяна, оскон уте милемыз, куке, уйылон-уллянъёс шоры учкытэк, ми Иеговалы ужаськомы-тыршиськомы (1 Фес. 2:2).

10. Мар со сыӵе утиськонлэн корт изьыез но малы ми сое нуллыны кулэ?

¹⁰ Утиськонлэн корт изьыез — со оскиськон,  кудзэ милемлы Иегова сётэ. Ми юн оскиськомы, Инмар бакель кароз шуыса котькинэ, кин солэсь эриксэ быдэсъя. Озьы ик оскиськомы, ми кулӥмы ке но, со милемыз улӟытоз шуыса (1 Фес. 5:8; 1 Тим. 4:10; Тит. 1:1, 2). Кызьы корт изьы ожгарчилэсь йырзэ утиз, озьы ик утиськонлэн корт изьыез милесьтым малпаськон амалмес уте. Кызьы? Оскиськон юрттэ милемлы Иеговалэсь кылсётонъёссэ тодамы возьыны но шуг-секытъёс шоры шонер учкыны. Ми та корт изьыез нуллӥськомы, куке тыршиськомы ваньмыз шоры Иеговалэн синъёсыныз учкыны. Кылсярысь, «бырись-бытмись узырлык вылэ» оскиськем интые, ми «улэп Инмар вылэ» оскиськиськомы (1 Тим. 6:17; Пс. 25:2; 103:34).

11. Мар со сыӵе духлэн мечез но малы ми сое уже кутыны кулэ?

¹¹ Мечлэн духез — со Инмарлэн Кылыз, Библия. Со быгатэ зэмлыкез пӧяськонлэсь люкыны но адямиосты мозмытыны зэмос луисьтэм дышетонъёслэсь но урод сямъёслэсь (2 Кор. 10:4, 5; 2 Тим. 3:16, 17; Евр. 4:12). Ас поннад Библиез эскерон но Инмарлэн организациезлэн дышетэмез юртто милемлы та мечез шонер уже кутыны (2 Тим. 2:15). Но духовной ожмаськон тӥрлыкъёсты сётэм сяна, Иегова милемыз мукет сямен но уте на. Кызьы?

12. Кыӵе эшшо юрттэт милемлы кулэ но малы?

¹² Быгатӥсь ожгарчи тодэ, одӥгназ трос ожгарчиосты вормыны уз быгаты шуыса. Солы эшъёсызлэн юрттэмзы кулэ. Озьы ик ми но ум быгатэ Шайтанлы но со пала кариськисьёслы пумит сылыны, вын-агайёсмы но сузэр-апайёсмы милемлы ӧз юрттэ ке. Иеговалы луыса милям вань дунневыл вынлыкмы, кудӥз милемлы котьку но юрттыны дась (1 Пётр 2:17).

13. Кызьы милемлы юртто кенешлэн пумиськонъёсыз, Еврейёслы 10:24, 25 лыдэ басьтыса?

¹³ Кылсярысь, сыӵе юрттэт ми басьтӥськомы кенешлэн пумиськонъёсаз. (Лыдӟе Еврейёслы 10:24, 25.) Милям мылкыдмы усиз ке — нош куддыръя со ваньмылэн усе,— пумиськонъёс милемыз юнматыны быгато. Милесьтым мылкыдмес ӝуто вын-агайёсмылэн но сузэр-апайёсмылэн сюлмысь сётэм валэктонъёссы, озьы ик мылкыдмес ӝутэ пумиськонлэсь азьло но со бере соосын вераськон (1 Фес. 5:14). Библия вылэ пыкиськыса дасям речьёс но вачевераськонъёс милесьтым мылкыдмес ӝуто азьланяз но Иеговалы ужаны-тыршыны. Со сяна, пумиськонъёсын милям луонлыкмы вань, мукетъёсызлы юрттыны. Со но милемлы шумпотон вае (Ап. уж. 20:35; Рим. 1:11, 12). Но та ваньмыз ӧвӧл на. Пумиськонъёсын ми умоятӥськомы быгатонлыкъёсмес, кудъёсыз юртто милемлы умойгес тодытыны но мукетъёссэ дышетыны. Кылсярысь, ми дышетскиськомы дышетон тӥрлыкъёсмес умойгес уже кутыны. Соин ик ойдолэ кенешлэн пумиськонъёсызлы умой дасяськомы, пумиськонъёс дыръя сак кылзомы но собере тодэммес уже кутомы. Озьы лэсьтыса, ми пӧлысь котькудӥз «Иисус Христослэн ӟечлыко ожмаськисез» луоз (2 Тим. 2:3).

14. Кызьы эшшо милемлы юрттэ на Иегова?

¹⁴ Озьы ик милемлы юртто трос миллион кылчинъёс. Малпалэ гинэ, мар карыны быгатэ одӥг кылчин (Ис. 37:36). Нош табере син азяды пуктэ, мар карыны быгато трос кылчинъёс! Нокин но — адями но, пери но — Иеговалэсь та кужмо ожгарчиоссэ вормыны уг быгаты. Инмармылэсь кужмогес нокин ӧвӧл. Озьыен, кӧня гинэ тушмонъёсмы милям медаз луэ, Иегова милемын ке, соос милемыз вормыны уз быгатэ  (Суд. 6:16). Та сярысь тодады возе, куке тӥледыз кышкатыны тыршо ӵош ужасьёсты, ӵош дышетскисьёсты яке ӵыжы-выжыосты, кудъёсыз Иеговалэн ужась-тыршисьёсыз уг луо. Эн вунэтэ: тӥ огнады ӧвӧл! Тӥ Иеговалэсь кылзӥськиськоды, соин ик со тӥ палан.

15. Малы нокин но уз быгаты Инмарлэсь калыксэ дугдытыны ӟеч иворез верамысь, Исаиялэн 54:15, 17 лыдэ басьтыса?

¹⁵ Ми ум паймиське, Шайтанлэн дуннеез милемыз адӟемпотостэм каре шуыса, малы ке шуоно солы трос мугъёс вань. Ми ум пыриськиське политикае но киямы ожтӥрлык ум басьтӥське. Ми вераськомы Инмарлэн нимыз сярысь. Озьы ик вераськомы, солэн Эксэйлыкез гинэ быдэс музъем вылэ тупаса улон ваёз шуыса. Ми улӥськомы шонерлыко курон-косонъёсъя. Ми ватытэк вераськомы, та дуннелэн кивалтӥсез ӧрекчаськись но адями виылӥсь шуыса (Иоанн 8:44). Ми ялӥськомы, Шайтанлэн дуннеез ӝоген быдтэмын луоз шуыса. Шайтан но со пала кариськисьёс ноку но уз быгатэ дугдытыны милемыз ӟеч иворез верамысь. Со интые, ми котькуд тупась луонлыкез уже кутомы, Иеговаез данъян понна! Шайтан туж кужмо, но со уз быгаты люкетыны Эксэйлык сярысь ӟеч иворлы музъемлэн вань интыосаз вуыны, малы ке шуоно милемыз Иегова уте. (Лыдӟе Исаиялэсь 54:15, 17.)

16. Кызьы Иегова аслэсьтыз калыксэ утёз бадӟым куректон дыръя?

¹⁶ Мар возьма милемыз азьпалан? Бадӟым куректон дыръя Иегова оскымон ужась-тыршисьёссэ утёз. Нырысь Инмарлэн калыкез утемын луоз, куке Иегова музъем вылысь кивалтӥсьёслэсь мылкыдзэс ӝутоз быдтыны Быдӟым Вавилонэз, зэмос луисьтэм религилэсь дунневыл империзэ (Усьт. 17:16—18; 18:2, 4). Собере Иегова аслэсьтыз калыксэ утёз, куке Армагеддон ожмаськонын Шайтанлэсь дуннезэ быдтоз (Усьт. 7:9, 10; 16:14, 16).

17. Кызьы милемлы юртто Иеговаен матысь кусыпъёсмы?

¹⁷ Милям Иеговаен матысь кусыпъёсмы вань ке, соку Шайтан милемлы тупатыны луонтэм изъян вайыны уз быгаты. Нош со ачиз пыраклы быдтэмын луоз (Рим. 16:20). Соин ик «Инмарлэсь ожмаськон тӥрлыкъёссэ» дӥсялэ но соосты вылысьтыды эн кыле! Эн тырше огнады ожмаськыны. Юрттэ вын-агайёслы но сузэр-апайёслы. Кылзӥське Иеговалэсь. Соку тӥ юн оскыны быгатоды, Инмысь яратӥсь Атаймы тӥледыз утёз но юнматоз шуыса (Ис. 41:10).