1. Yesuusi I erissiyo ashkkarata Yihooway naaganaadan oychchidoy aybissee?

YESUUSI saˈan deˈido wurssetta qammi, I erissiyo ashkkarata gakkana metuwaabaa qoppiis. Erissiyo ashkkarata I siiqiyo gishshawu, ba Aaway “xalahiyaappe eta naagana mala” Yesuusi A oychchiis. (Yoh. 17:14, 15) I mata wode saluwaa baanaagaanne Yihoowawu oottana koyiya oonaaranne Seexaanaa Dabloosi aggennan olettanaagaa Yesuusi eriis. Yaatiyo gishshawu, Yihoowa asawu naagoy koshshees.

2. Yihooway nu woosaa zaaranaagaa ammanettanaadan oottiyaabi aybee?

² Yihooway ba Naˈaa siiqiyo gishshawu, Yesuusa woosaa zaariis. Yihoowa ufayssanawu nuussi danddayettida ubbaa oottikko, I nuna siiqees, qassi I nuna maaddanaadaaninne naaganaadan nuuni woossiyo woosaa zaarana. Yihooway siiqiya Aawa. Yaatiyo gishshawu, ba naatussi koshshiyaabaa ubbatoo kunttana. I hegaadan oottana xayikko, A sunttay woy hayttay moorettana!

3. Ha wodiyan nuussi Yihoowa naagoy koshshiyoy aybissee?

³ Nuussi awudeegaappenne aaruwan Yihoowa maadoy koshshees. Seexaanay ‘wolqqaama hanqquwan’ duge wodhdhiis. (Ajj. 12:12) I nuna yedettiya issi issi asay ‘Xoossawu oottoos’ giidi qoppanaadan oottiis. (Yoh. 16:2) Nuuni ha alamiyaa asaappe dumma gidiyo gishshawu, Xoossaa ammanenna harati nuna yedettoosona. Asay nuna yedettiyo gaasoy ayba gidikkonne, nuuni yayyokko. Aybissi? Xoossaa Qaalay hagaadan giyo gishshataassa: “Godai ammanettiyaagaa; i inttena minttettananne qassi iitaappekka naagana.” (2 Tas. 3:3) Yihooway nuna waati naagii? I nuuyyo immiyo naaˈˈubata beˈana.

4. Efisoona 6:13-17y yootiyoogaadan, Yihooway nuna naaganawu immiyoobay aybee?

⁴ Seexaanaa qohuwaappe nuna naagana danddayiya ola miishsha ubbaa Yihooway giigissiis. (Efisoona 6:13-17 nabbaba.) Xoossay immiyo ha ola miishsha ubbay minonne maaddiyaagaa! SHin he miishshay nuna naaganaadan koyikko, nuuni he miishsha ubbaa muletoo goˈettana bessees. He ola miishshati huuphiyan huuphiyan ay bessiyoonaa? Nuuni issuwaa issuwaa ane beˈoos.

5. Tumaa qabattoy aybee, qassi nuuni hegaa gixxana koshshiyoy aybissee?

⁵ Tumaa qabattoy Xoossaa Qaalan, Geeshsha Maxaafan deˈiya tumaa qonccissees. Nuuni ha qabattuwaa gixxana bessiyoy aybissee? Seexaanay ‘wordduwawu aawa’ gidiyo gishshataassa. (Yoh. 8:44) I shaˈan qoodettiya layttawu worddotiiddinne “sa7a ubbaa” balettiiddi takkiis. (Ajj. 12:9) SHin Geeshsha Maxaafan deˈiya tumay nuuni cimettennaadan nuna naagees. Ha leemiso qabattuwaa waati gixxana danddayiyoo? Nuuni Yihoowabaa tumaa tamaariyoogan, “ayyaanaaninne tumatettan” awu goynniyoogaaninne ubbaban tumaa haasayiyoogan hegaadan oottoos.—Yoh. 4:24; Efi. 4:25; Ibr. 13:18.

6. Tiran wottiyo ola miishshan leemisettida xillotettay aybee, qassi nuuni hegaa maayana bessiyoy aybissee?

⁶ Tiran wottiyo ola miishshan leemisettida xillotettay Yihooway kessido xillotettaa maarata qonccissees. Nuuni tiran wottiyo ola miishshaa maayana bessiyoy aybissee? Tiran wottiyo ola miishshay wotaaddaraa wozanay qohettennaadan naagiyoogaadan, tiran wottiyo ola miishshan leemisettida xillotettay nu leemiso wozanaa alamee qohennaadan naagees. (Lee. 4:23) Yihooway nuuni nu kumetta wozanaappe A siiqanaadaaninne awu haggaazanaadan koyees. (Maa. 22:36, 37) Hegaa gishshawu, Seexaanay nuuni ha alamiyan deˈiyaabaanne Yihooway ixxiyoobaa siiqanaadan oottiyoogan nu kumetta wozanaappe Yihoowawu haggaazennaadan digganawu malees. (Yaaq. 4:4; 1 Yoh. 2:15, 16) I hegaadan cimmiyoogee hanana xayikko, nuuni Yihoowa ufayssennabaa oottanaadan nu bolli yedetaa gattees.

7. Tiran wottiyo ola miishshan leemisettida xillotettaa waati maayiyoo?

⁷ Yihooway loˈˈobaanne iitabaa xeelliyaagan kessido xillotettaa maarata azazettiyoogaaninne he maaratudan deˈiyoogan tiran wottiyo ola miishshan leemisettida xillotetta maayoos. (Maz. 97:10) Issoti issoti Yihooway kessido xillotettaa maarati laˈatettaa diggiyaabadan qoppana danddayoosona. SHin nuuni Geeshsha Maxaafaa maarata nu deˈuwan oosuwan peeshshiyoogaa aggikko, tiran wottiyo ba ola miishshay deexxiyaabadan qoppidi ola dembban hegaa kessiya wotaaddaraa mala gidoos. Hegee eeyyatetta! Yihoowa siiqiyaageetussi A azazoti deˈuwaa ashshiyaabappe attin, ‘deexo gidokkona.’—1 Yoh. 5:3.

8. Nu tohoy caamman leemisettida sarotettaa wonggeliyaa mishiraachchuwaa yootanawu giigettiis giyoogee woygiyoogee?

⁸ PHawuloosi nuuni caamman leemisettida sarotettaa wonggeliyaa mishiraachchuwaa yootanawu giigettidaageeta gidanaadankka minttettiis. Hegaa giyoogee nuuni Kawotettaa mishiraachchuwaa yootanawu ubbatoo giigi uttidaageeta gidana bessees giyoogaa. Nuuni Geeshsha Maxaafaa tumaa haratuyyo yootiyo wode, nu ammanoy minnees. Kumetta saˈan deˈiya Yihoowa asay eti deˈiyo sohoy awanne gidin, eti demmido injje ubbaa goˈettidi markkattiyoogaa beˈiyoogee nuna keehi minttettees. Leemisuwawu, eti ooso sohuwan woy timirtte keettan, sooppe soo biyo wode woy zalˈˈe heeran, woy shammanawu biyo wode, woy qassi Yihoowa Markka gidenna dabbota oychchanawu biyo wode, woy eriyo asaara haasayiyo  wode sabbakoosona. Nuuni sabbakiyoogaa keehi yayyidi aggikko, ola wode ba caammaa kessida wotaaddara mala gidoos; A tohoy sohuwaara qohettiis. Hegaappe denddidaagan, I bana qohuwaappe naaganawu metootees, qassi A halaqay kiittiyo azazuwaa azazettana danddayenna.

9. Ammanuwaa gita gonddalliyaa nuuni oyqqana koshshiyoy aybissee?

⁹ Wogga gonddalliyaa mala gidida ammanoy nuuni Yihoowa ammaniyo ammanuwaa qonccissiyaaba. Qaalaa gelido ubbabaa I polanaagaa nu ammanoos. “Xalahe halaqai dafidi yeddiyo wonddafiyaa tama ubbaa toissanau” he ammanoy nuna maaddana. Nuuni ha gonddalliyaa oyqqana koshshiyoy aybissee? Kaddidaageetu timirttiyan nuuni cimettennaadaaninne asay nuna boriyo wode hidootaa qanxxennaadan maaddiyo gishshataassa. Ammanoy baynnaba gidikko, harati nuuni Yihoowawu azazettennaadan oottiyo wode, eta eqettanawu wolqqaa demmokko. SHin, nuuni ooso sohuwan woy timirtte keettan Yihooway dosennabaa ubba galla ixxis giikko, nu ammanoy nuna naagees. (1 PHe. 3:15) Nuuyyo daro damoozaa demissiyaaba gidikkonne, nuuni Yihoowayyo haggaaziyo haggaazuwan nuussi danddayettida ubbabaa oottennaadan diggiya oosuwaa  ubbatoo ixxis giikko, nu ammanoy nuna naagees. (Ibr. 13:5, 6) Qassi yedetay deˈishinkka Yihoowawu ubbatoo haggaazikko, nu ammanoy nuna naagees.—1 Tas. 2:2.

10. Atotettaa birata qophee aybee, qassi hegaa nu huuphiyan wottana koshshiyoy aybisee?

¹⁰ Atotettaa birata qophee Yihooway nuussi immido hidootaa. Hegee A sheniyaa oottiyaageeta ubbaa I woytanaagaanne eti hayqqikkokka I eta denttanaagaa bessiyaaba. (1 Tas. 5:8; 1 Xim. 4:10; Tii. 1:1, 2) Birata qophee wotaaddaraa huuphiyaa naagiyoogaadan, atotettaa hidootay nu qofaa naagees. Waatidi? He hidootay nuuni Xoossay qaalaa gelidoban xeelaa wottanaadan oottees; qassi nu metuwan unˈˈettennaadan maaddees. He birata qophiyaa huuphiyan waati wottana danddayiyoo? Nuuni Xoossay qoppiyoogaadan qoppiyoogan yaatana danddayoos. Leemisuwawu, nuuni ammanttenna duretettan gidennan, Xoossan hidootaa wottoos.—Maz. 26:2; 104:34; 1 Xim. 6:17.

11. Ayyaanaa bisoy aybee, qassi nuuni hegaa goˈettana koshshiyoy aybissee?

¹¹ Ayyaanaa bisoy Xoossaa Qaalaa, Geeshsha Maxaafaa. He bisoy worddoy qonccanaadan oottees; qassi worddo timirttetuppenne qohiya meezetuppe asaa laˈa kessees. (2 Qor. 10:4, 5; 2 Xim. 3:16, 17; Ibr. 4:12) Buzo xinaatiyaaninne Xoossaa dirijjitee immiyo loohissuwan he bisuwaa loytti goˈettiyoogaa tamaaroos. (2 Xim. 2:15) Ola miishsha ubbaa bolli, Yihooway nuna naaganawu hara wolqqaamabaa immees. Hegee aybee?

12. Nuussi koshshiya harabay aybee, qassi aybissi?

¹² Gooba wotaaddaray barkka olettidi daro olanchchata xoonana danddayennaagaa erees; ayyo hara wotaaddaratu maadoy koshshees. Hegaadan, nuuni Seexaanaanne A kaalliyaageeta nurkka eqettana danddayokko; nu ishanttunne michchonttu maadoy nuussi koshshees. Kumetta saˈan nuna maaddiya ‘ishanttu’ maabaraa Yihooway nuussi immiis.—1 PHe. 2:17.

13. Ibraawe 10:24, 25y yootiyoogaadan, shiiqota shiiqiyoogan nuuni demmiyo goˈˈay aybee?

¹³ Nuuni maaduwaa demmiyo issi ogee nu shiiqota shiiqiyoogaana. (Ibraawe 10:24, 25 nabbaba.) Issi issitoo nuuni ubbay hidootaa qanxxoos. He wode, shiiqoti nuna minttettana danddayoosona. Ishanttinne michchontti wozanappe yootiyo qofan nuuni minettoos. Eti Geeshsha Maxaafaappe haasayiyo haasayatinne ootti-besoti nuuni Yihoowawu aggennan haggaazanaadan nuna denttettoosona. Qassi shiiquwaa doommanaappe kasenne wurssi simmin nu ishanttuuranne michchonttuura haasayiyoogee nuna minttettees. (1 Tas. 5:14) Nu shiiqoti nuuni harata maaddiyo injjiyaa demmanaadankka oottoosona; qassi hegee nuna ufayssees. (Oos. 20:35; Roo. 1:11, 12) Nu shiiqoti hara ogiyankka nuna maaddoosona. SHiiqoti nuuni kaseppe loytti sabbakiyaageetanne tamaarissiyaageeta gidanaadan maaddoosona. Leemisuwawu, Tamaarissanawu Goˈettiyo Waanna Miishshatu giddon deˈiyaabata goˈettiyoogaa tamaaroos. Hegaa gishshawu, gubaaˈe shiiqotussi loytta giigetta. SHiiqotun loytta ezgga. SHiiquwaappe simmin, ne tamaaridobaa oosuwan peeshsha. Yaatiyoogan, ‘Yesuus Kiristtoosayyo ammanettida wotaaddara’ gidaasa.—2 Xim. 2:3.

14. Nuna maaddiya harabay aybee?

¹⁴ Daro miilooniyan qoodettiya wolqqaama kiitanchchatikka nuna maaddoosona. Issi kiitanchcha xallay ay oottana danddayiyaakko qoppa! (Isi. 37:36) Olanchcha gidida wolqqaama kiitanchchati ay oottana danddayiyaakko qoppa. Ay asinne woy daydantti Yihoowa wolqqaama olanchchatuura olettidi xoonana danddayenna. Yihooway ubbaappe wolqqaama. Yaatiyo gishshawu, nuna eqettiyaageeti ay keena daro gidikkonne, I nunaara deˈiyo  wode, nuuni nuna eqettiyaageetuppe ubbatoo aadhdhoos. (Daan. 6:16) Hegee tuma gidiyoogaa nuuni ammanettana danddayoos. Nenaara oottiyaagee, tamaariyaagee woy ammanenna dabboy haasayiyooban woy oottiyooban neeni hidootaa qanxxiyo wode, nena maaddana danddayiya ubbabaa ane qoppa. Ha olaa neeni nerkka olettennaagaa hassaya. Neeni Yihoowa kaaletuwaa kaallaasa.

15. Isiyaasa 54:15, 17y yootiyoogaadan, Xoossaa asay sabbakiyoogaa ooninne diggana danddayennay aybissee?

¹⁵ Seexaanay haariyo alamee nuna ixxanaadan oottiya daro gaasoy deˈees. Nuuni polotikaaban oossinne mule exatokkonne olaa olettokko. Nuuni Xoossaa sunttaa awaajjoos; qassi I kessido xillotettaa maratussi azazettoosinne sarotettaa ehaana danddayiyay A Kawotettaa xalla gidiyoogaa sabbakoos. Ha alamiyaa haariyaagee iita worddanchchanne shemppuwaa woriyaagaa gidiyoogaa nuuni asawu qonccissoos. (Yoh. 8:44) Qassi Seexaanaa alamee mata wode xayanaagaa awaajjoos. SHin Seexaanaynne A kaalliyaageeti nu sabbakiyoogaa mule diggana danddayokkona. Nu danddayiyo oge ubban Yihoowa sabbiyoogaa aggokko! Seexaanay keehi wolqqaama gidikkokka, Kawotettaa mishiraachchoy kumetta saˈan asawu gakkennaadan diggana danddayibeenna. Nuuni hegaa oottana danddayidoy Yihooway nuna naagiyo gishshataassa.—Isiyaasa 54:15, 17 nabbaba.

16. Gita waayiyaa wode Yihooway ba asaa waati ashshanee?

¹⁶ Sinttappe nuna aybi naagii? Gita waayiyaa wode, Yihooway maalaalissiya naaˈˈu ogetun nuna ashshana. Koyro, worddo haymaanoote ubbaa xaaxa waaxiya Gita Baabiloono saˈaa kawotettati xayssanaadan I oottiyo wode, ammanettida ba ashkkarata I ashshana. (Ajj. 17:16-18; 18:2, 4) Kaallidi, I Seexaanaa alamiyaappe attidaageeta Armmageedoona olan xayssiyo wode ba asaa ashshana.—Ajj. 7:9, 10; 16:14, 16.

17. Nuuni Yihoowakko shiiqidi deˈiyoogee nuna waati maaddii?

¹⁷ Nuuni Yihoowakko shiiqidi deˈikko, Seexaanay nuna merinawu qohiyaabaa oottana danddayenna. I merinawu xayanaagee qoncce. (Roo. 16:20) Hegaa gishshawu ola miishsha ubbaa maaya; qassi ubbatoo hegaa goˈetta. Seexaanaaranne A alamiyaara nerkka olettanawu baaxetoppa. Ne ishanttanne michchontta maadda. Qassi Yihoowa kaaletuwaa kaalla. Neeni yaatikko, saluwan deˈiya siiqiya Aaway nena minttettanaagaanne naaganaagaa ammanettana danddayaasa.—Isi. 41:10.