1. Kay ano nga naghangyo hi Jesus kan Jehova nga bantayan an iya mga disipulo?

HA ULTIMO nga gab-i han kinabuhi ni Jesus dinhi ha tuna, ginhunahuna niya an mga problema nga aatubangon han iya mga disipulo. Tungod kay hinigugma niya hira, naghangyo hi Jesus ha iya Amay nga “bantayan . . . hira tungod han usa nga maraot.” (Juan 17:14, 15) Maaram hi Jesus nga kon bumalik na hiya ha langit, padayon nga makikig-away hi Satanas nga Yawa ha bisan hin-o nga naruruyag mag-alagad kan Jehova. Salit an katawohan ni Jehova nagkikinahanglan gud hin proteksyon.

2. Paonan-o kita makakasiguro nga babatunon ni Jehova an aton mga pag-ampo?

² Ginbaton ni Jehova an pag-ampo ni Jesus tungod kay hinigugma niya an iya Anak. Kon bubuhaton naton an aton pinakamaopay basi mapalipay hi Jehova, hihigugmaon liwat kita niya ngan pamamatian niya an aton mga pag-ampo para han bulig ngan proteksyon. Sugad nga mahigugmaon nga Amay, padayon nga aatamanon ni Jehova an iya mga anak. Kon diri niya ito bubuhaton, mapapasiparahan an iya ngaran o madadaot an iya reputasyon.

3. Kay ano nga kinahanglan naton yana an proteksyon ni Jehova?

³ Mas kinahanglan gud naton yana an proteksyon ni Jehova. Hi Satanas ginpaiwas ha langit nga “may daku nga kasina.” (Pah. 12:12) Gin-impluwensyahan niya an pipira nga tawo nga maghunahuna nga kon gintitimaraot kita nira, nagbubuhat hira “hin sagrado nga pag-alagad ha Dios.” (Juan 16:2) An iba, nga diri natoo ha Dios, nagtitimaraot ha aton kay diri kita pariho ha mga tawo ha kalibotan. Anoman an ira rason, diri kita nahahadlok. Kay ano? Kay an Pulong han Dios nasiring: “An Ginoo matinumanon, ngan paririg-unon kamo niya ngan papanalipdan kamo tikang ha usa nga maraot.” (2 Tes. 3:3) Paonan-o kita ginpuproteksyonan ni Jehova? Hisgotan naton an duha nga paagi.

4. Sumala ha Efeso 6:13-17, ano an iginhatag ha aton ni Jehova nga makakapanalipod ha aton?

⁴ Gintagan kita ni Jehova hin mga gamit nga pan-girra nga magpapanalipod ha aton tikang ha mga pag-atake ni Satanas. (Basaha an Efeso 6:13-17.) Inin espirituwal nga mga gamit nga pan-girra marig-on gud ngan epektibo! Pero mapuproteksyonan la kita hito kon isusul-ot naton an tagsa hito​—ngan diri naton ito huhukason. Ano an ginrirepresentaran han tagsa hito nga mga gamit nga pan-girra? Hisgotan naton ito.

5. Ano an paha han kamatuoran, ngan kay ano nga kinahanglan naton ito isul-ot?

⁵ An paha han kamatuoran nagrirepresentar han mga kamatuoran nga aada ha Pulong han Dios, an Biblia. Kay ano nga kinahanglan naton isul-ot ini nga paha? Tungod kay hi Satanas “an amay han kabuwaan.” (Juan 8:44) Yinukot ka tuig na nga nagbibinuwa hiya ngan ginlilimbongan niya an “bug-os nga inuukyan nga tuna”! (Pah. 12:9) Pero an mga kamatuoran nga aada ha Biblia nagpapanalipod ha aton nga diri kita malimbongan. Paonan-o naton iginsusul-ot inin simboliko nga paha? Ginhihimo naton ito pinaagi ha paghibaro han kamatuoran mahitungod kan Jehova, pagsingba ha iya “ha espiritu ngan ha kamatuoran,” ngan paggawi hin tangkod ha ngatanan nga butang.​—Juan 4:24; Efe. 4:25; Heb. 13:18.

6. Ano an kutamaya han katadongan, ngan kay ano nga kinahanglan naton ito isul-ot?

⁶ An kutamaya han katadongan nagrirepresentar han matadong nga mga suruklan ni Jehova. Kay ano nga kinahanglan naton isul-ot ito nga kutamaya? Sugad la nga an kutamaya nagpuprotektar ha literal nga kasingkasing han usa nga sundalo basi diri ito maigo, an kutamaya han katadongan nagpuprotektar han aton simboliko nga kasingkasing, o sulod nga pagkatawo, tikang ha maraot nga mga impluwensya hini nga kalibotan. (Prob. 4:23) Naglalaom hi Jehova nga hihigugmaon ta hiya ngan mag-aalagad kita ha iya ha aton bug-os nga kasingkasing. (Mat. 22:36, 37) Salit naniningkamot hi Satanas nga bahinon an aton kasingkasing pinaagi ha pag-impluwensya ha aton nga higugmaon an mga butang hini nga kalibotan​—mga butang nga ginkakangalasan ni Jehova. (San. 4:4; 1 Juan 2:15, 16) Ngan kon ito nga iya taktika diri maglampos, tatarhugon kita niya basi buhaton an mga butang nga supak ha mga suruklan ni Jehova.

7. Paonan-o naton iginsusul-ot an kutamaya han katadongan?

⁷ Iginsusul-ot naton an kutamaya han katadongan pinaagi ha pagkarawat han mga suruklan ni Jehova ha kon ano an husto ngan sayop ngan ha pagkinabuhi uyon hito nga mga suruklan. (Sal. 97:10) An iba bangin naghuhunahuna nga an mga suruklan ni Jehova naglilimita han aton kagawasan. Pero kon diri na kita mag-aaplikar han mga prinsipyo ha Biblia, magigin pariho kita hin sundalo nga ginhukas an iya kutamaya samtang aada ha girra tungod kay naghuhunahuna hiya nga sobra ito kabug-at. Kalurongan gud ito! Pero para ha mga nahigugma kan Jehova, an iya mga sugo “diri mabug-at,” lugod nagtatalwas ito hin kinabuhi.​—1 Juan 5:3.

8. Ano an karuyag sidngon han pagsul-ot ha aton mga tiil hin sandalyas basi magin andam ha pagpasamwak han maopay nga sumat?

⁸ Gin-aaghat liwat kita ni Pablo nga sul-otan an aton mga tiil hin sandalyas basi magin andam kita ha pagpasamwak han maopay nga sumat han kamurayawan. Karuyag sidngon, kinahanglan pirme kita andam ha pagsangyaw han maopay nga sumat han Ginhadian. Kon iginsusumat naton ha iba an mensahe han Biblia, napaparig-on mismo an aton pagtoo. Makapadasig gud makita kon paonan-o an katawohan ni Jehova ha bug-os nga tuna namimiling hin mga higayon nga ipasamwak an maopay nga sumat​—ha trabaho, ha eskwelahan, ha lugar han negosyo, kon nagsasangyaw ha balay-balay, namamalit, nabisita ha diri Saksi nga mga paryente, nakikiistorya ha mga kakilala,  ngan bisan pa ngani kon aada na la hira ha ira balay. Kon magpapadaog kita ha kahadlok ngan diri na magsasangyaw, magigin pariho kita ha usa nga sundalo nga ginhukas an iya sandalyas samtang aada ha girra; masayon nga masasamaran an iya mga tiil. Salit makukurian hiya ha pagdepensa kon atakehon hiya, ngan diri niya masusunod an mga sugo han iya kumander.

9. Kay ano nga kinahanglan naton dad-on an daku nga taming han pagtoo?

⁹ An daku nga taming han pagtoo nagrirepresentar han aton pagtoo kan Jehova. Nasarig kita nga tutumanon niya an ngatanan niya nga saad. Ito nga pagtoo mabulig ha aton nga ‘maparong an ngatanan nga naglalaga nga pana han usa nga maraot.’ Kay ano nga kinahanglan naton dad-on ito nga daku nga taming? Tungod kay nagpuprotektar ito ha aton nga diri malimbongan han mga katutdoan han mga apostata o diri manluya kon gintatamay an aton mga gintotoohan. Kon waray kita pagtoo, diri kita magkakaada kusog nga sundon hi Jehova kon ginpipresyur kita nga talapason an iya mga suruklan. Ha luyo nga bahin, ha kada panahon nga naninindogan kita para ha aton pagtoo ha trabaho o ha eskwelahan, napuprotektaran kita han aton taming. (1 Ped. 3:15) Ha kada panahon nga diri naton ginkakarawat an usa nga trabaho nga daku an sweldo tungod kay mauulang hito an aton pag-alagad, napuprotektaran kita han aton taming. (Heb. 13:5, 6) Ngan  ha kada panahon nga nag-aalagad kita kan Jehova bisan pa han pagkontra, napuprotektaran kita han aton taming.​—1 Tes. 2:2.

10. Ano an helmet han katalwasan, ngan kay ano nga kinahanglan naton ito isul-ot?

¹⁰ An helmet han katalwasan amo an paglaom nga iginhahatag ha aton ni Jehova​—an paglaom nga tatalwason kita niya tikang ha kamatayon ngan babalosan an ngatanan nga nagbubuhat han iya kaburut-on. (1 Tes. 5:8; 1 Tim. 4:10; Tito 1:1, 2) Sugad la nga an literal nga helmet nagpuprotektar ha ulo han usa nga sundalo, an paglaom han katalwasan nagpuprotektar han aton abilidad ha paghunahuna. Ha ano nga paagi? Ito nga paglaom nabulig ha aton nga makapokus ha mga saad han Dios ngan magkaada husto nga panhunahuna ha mga problema. Paonan-o naton iginsusul-ot ito nga helmet? Ginbubuhat naton ito pinaagi ha pagsiguro nga an aton panhunahuna uyon pirme ha panhunahuna han Dios. Pananglitan, nasarig kita, diri ha waray kasigurohan nga karikohan, kondi ha Dios.​—Sal. 26:2; 104:34; 1 Tim. 6:17.

11. Ano an espada han espiritu, ngan kay ano nga kinahanglan naton ito gamiton?

¹¹ An espada han espiritu amo an Pulong han Dios, an Biblia. Ito nga espada may gahum ha pagbuhayhag han bisan ano nga kabuwaan ngan ha paghatag hin kagawasan ha mga tawo tikang ha pagkauripon han buwa nga mga katutdoan ngan nakakadaot nga mga buhat. (2 Cor. 10:4, 5; 2 Tim. 3:16, 17; Heb. 4:12) Nahibabaro kita ha paggamit hin maopay hito nga espada pinaagi ha personal nga pag-aram ngan ha pagbansay nga aton nakakarawat tikang ha organisasyon han Dios. (2 Tim. 2:15) Labot pa ha mga gamit nga pan-girra, naghahatag hi Jehova hin iba pa nga marig-on gud nga proteksyon. Ano ito?

12. Ano pa an kinahanglan naton, ngan kay ano?

¹² Maaram an eksperyensyado nga sundalo nga diri hiya magdadaog kontra ha damu nga kasundalohan kon nag-uusahan la hiya; kinahanglan niya an bulig han iya mga igkasi-sundalo. Sugad man, diri kita maglalampos ha pakig-away kan Satanas ngan ha mga nasuporta ha iya kon nag-uusahan la kita; kinahanglan naton an bulig han aton kabugtoan. Hi Jehova nagtatagana ha aton hin bug-os-kalibotan nga pagminagburugto nga andam bumulig ha aton.​—1 Ped. 2:17.

13. Sumala ha Hebreo 10:24, 25, ano an mga kapulsanan ha pagtambong ha aton mga katirok?

¹³ Usa nga paagi nga nakakakarawat kita hin bulig amo an pag-atender ha aton mga katirok. (Basaha an Hebreo 10:24, 25.) Kon nanluluya kita​—sugad han usahay nga inaabat naton ngatanan​—an mga katirok nakakadasig ha aton. Napaparig-on kita han kinasingkasing nga mga komento han kabugtoan. An ira mga pahayag ngan mga pasundayag nga basado ha Biblia nagpaparig-on han aton determinasyon nga mag-alagad kan Jehova. Ngan an aton makaparig-on nga pakig-istorya antes ngan katapos han mga katirok nakakadasig ha aton. (1 Tes. 5:14) Dugang pa, an aton mga katirok naghahatag ha aton hin oportunidad nga abaton an kalipay ha pagbulig ha iba. (Buh. 20:35; Roma 1:11, 12) An aton mga katirok nabulig liwat ha aton ha iba pa nga paagi. Nabulig ito ha aton nga magin mas maopay ha ministeryo. Pananglitan, nahibabaro kita nga gamiton hin epektibo an aton mga garamiton ha Toolbox ha Pagpanutdo. Salit pag-andam hin maopay para ha mga katirok ha kongregasyon. Durante han katirok, pamati hin maopay. Katapos han katirok, iaplikar an pagbansay nga imo nakarawat. Kon bubuhaton mo ini, magigin “maopay [ka] nga sundalo ni Kristo Jesus.”​—2 Tim. 2:3.

14. Hin-o pa an makakabulig ha aton?

¹⁴ Pirme liwat kita ginbubuligan han minilyon nga gamhanan nga mga anghel. Hunahunaa kon ano an kaya buhaton han usa la nga anghel! (Isa. 37:36) Yana hunahunaa kon ano an kaya buhaton han gamhanan nga hugpo han mga anghel. Waray tawo o demonyo nga makakapirde han  gamhanan nga kasundalohan ni Jehova. Waray malabaw ha gahum ni Jehova. Salit kon kaupod naton hiya, pirme kita magigin mas makusog ha mga nakontra ha aton, anoman hira kadamu. (Huk. 6:16) Makakasiguro gud kita hito! Pirme ito hinumdumi kon nanluluya ka tungod han ginsisiring o ginbubuhat han usa mo nga katrabaho, kaeskwela, o diri tumuroo nga paryente. Hinumdumi, diri ka nag-uusahan hini nga pakig-away. Ginsusunod mo an giya ni Jehova.

15. Sumala ha Isaias 54:15, 17, kay ano nga diri gud mapapahilom an katawohan han Dios?

¹⁵ An kalibotan nga kontrolado ni Satanas may damu nga rason nga mangalas ha aton. Nagpapabilin kita nga neutral ha politika ngan diri nakikigbahin ha girra. Iginpapakilala naton an ngaran han Dios, iginsasangyaw nga an Ginhadian amo gud la an paglaom nga magkaada kamurayawan, ngan ginsusunod an iya matadong nga mga suruklan. Iginbubuhayhag naton nga an magmarando hini nga kalibotan buwaon gud ngan parapamatay. (Juan 8:44) Ngan iginpapasamwak naton nga hirani na bungkagon an kalibotan ni Satanas. Pero diri gud kita mapapahilom ni Satanas ngan han iya mga sumurunod. Ha kabaliktaran, padayon kita nga magdadayaw kan Jehova ha anoman nga paagi nga aton mahihimo! Bisan kon gamhanan hi Satanas, diri niya kaya pugngan nga makaabot ha mga tawo ha bug-os nga kalibotan an mensahe han Ginhadian. Nahihimo la ini tungod kay ginpuproteksyonan kita ni Jehova.​—Basaha an Isaias 54:15, 17.

16. Paonan-o tatalwason ni Jehova an iya katawohan ha daku nga kasakitan?

¹⁶ Ano an mahitatabo ha tiarabot? Ha daku nga kasakitan, tatalwason kita ni Jehova ha duha nga urusahon nga paagi. Siyahan, iya tatalwason an iya maunungon nga mga surugoon ha panahon nga pagiuson na niya an mga hadi ha tuna nga bungkagon an Babilonya nga Gamhanan, an imperyo han buwa nga relihiyon. (Pah. 17:16-18; 18:2, 4) Katapos, iya tatalwason an iya katawohan kon bungkagon na niya ha Armagedon an nabibilin pa nga mga elemento han kalibotan ni Satanas.​—Pah. 7:9, 10; 16:14, 16.

17. Paonan-o kita nagpapahimulos han aton pagpabilin nga duok kan Jehova?

¹⁷ Kon magpapabilin kita nga duok kan Jehova, waray mahihimo ha aton hi Satanas nga makakadaot ha aton ha kadayonan. Lugod, hiya an mabubungkag ha kadayonan. (Roma 16:20) Salit isul-ot an kompleto nga mga gamit nga pan-girra​—ngan ayaw ito hukasa! Ayaw pagsoloha an imo pakig-away kan Satanas ngan ha iya kalibotan. Buligi an imo kabugtoan. Ngan sunda an giya ni Jehova. Kon bubuhaton mo ito, makakasarig ka nga paririg-unon ngan puproteksyonan ka han imo mahigugmaon nga Amay ha langit.​—Isa. 41:10.