1. Ligongo chichi Yesu ŵamŵendile Yehofa kuti ŵaloleleje chenene ŵakulijiganya ŵakwe?

CHILO chakuti malaŵi gakwe Yesu chawulajidwe, jwalakwe jwaganichisyaga mnope yakusawusya yachasimane nayo ŵakulijiganya ŵakwe. Ligongo lyakuti ŵanonyelaga mnope ŵakulijiganya ŵakwe, jwalakwe ŵapopesile kwa Atati ŵakwe kuti “ŵasunje chenene” kogopela “jwakusakala jula.” (Yoh. 17:14, 15) Yesu ŵamanyililaga kuti pachawujile kwinani, Satana chapitilisye kulimbana ni ŵakutumichila ŵa Mlungu. Ni ligongo lyakwe Yehofa akusasosekwa kwachenjela ŵandu ŵakwe.

2. Ana mpaka tuŵe ŵakusimichisya chamtuli kuti Yehofa mpaka ajanje mapopelo getu?

² Yehofa ŵajanjile lipopelo lya Yesu ligongo lyakuti akusamnonyela mnope. M’wejisoni naga tukutenda yakumsangalasya Yehofa, nikuti chachitunonyela, chachijanga mapopelo getu soni chachituchenjela. Ligongo lyakuti Yehofa akusatunonyela, chapitilisyepe kutusamalila mpela ŵanache ŵakwe. Yehofa nganaŵa alesile kutusamalila, ligongo kutenda yeleyi mpaka kutendekasye kuti ŵandu akalichimbichisyaga lina lyakwe, soni yeleyi mpaka yijonanje mbili jakwe.

3. Ligongo chichi apano ni patukusosekwa mnope chikamuchisyo cha Yehofa?

³ Masiku agano ni patukusosekwa mnope kuti Yehofa atuchenjeleje. Satana jwatopoledwe kwinani, mwamti “ali jwawukali mnope.” (Chiw. 12:12) Jwalakwe ayikene pakwatendekasya ŵandu ŵakusatulagasya kuganisya kuti yakutendayo kuli ‘kumtumichila Mlungu.’ (Yoh. 16:2) Ŵandu ŵangakusamkulupilila Mlungu akusatulagasya ligongo lyakuti ngatukutenda yakusatendaga ŵane m’chilambochi. Chinga ŵandu atulagasyeje pa ligongo lyapi, ngatukusosekwa kutenda woga. Tukuŵecheta yeleyi ligongo Maloŵe ga Mlungu gakusati, “Ambuje ali ŵakulupichika, mwakuti tachimlimbisya mitima jemanja ni kumchinjilichisya kwa jwakusakala jula.” (2 Ates. 3:3) Ana  Yehofa mpaka atuchenjele chamtuli? Kwende tukambilane matala gaŵili gampaka atendele yeleyi.

4. Ana lilemba lya Aefeso 6:13-17, likulosya kuti Yehofa atupele chichi?

⁴ Yehofa atupele yida yampaka yitukamuchisye kulichenjela ku yindu akusatenda Satana pakusaka kutulinga. (Aŵalanje Aefeso 6:13-17.) Yida yakutyochela kwa Mlungu yili yamachili soni yakamuchisya. Nambo kuti yida yeleyi yituchenjele, tukusosekwa kukamulichisya masengo yida yosope. Ana chida chilichose chikusajimila chichi? Kwende tutande kukambilana chimo ni chimo.

5. Ana lamba jwa usyesyene juli chichi? Nambi ligongo chichi tukusosekwa kuwala lambaju?

⁵ Lamba jwa usyesyene jukusajimila usyesyene watukusawupata m’Maloŵe ga Mlungu gagali m’Baibulo. Tukusosekwa kuwala lamba jweleju ligongo lyakuti Satana “ali atati ŵaunami wosope.” (Yoh. 8:44) Kwa yaka yejinji, jwalakwe aŵele ali mkwalambusya ŵandu soni kwasokonasya “pachilambo chosope chapasi.” (Chiw. 12:9) Nambo usyesyene watukusawupata m’Baibulo mpaka utuchenjele naga jwine akutulambusya. Ana mpaka tuwale chamtuli lamba jwakuwanichisyaju? Mpaka tutende yeleyi mwakulijiganya usyesyene wakwamba Yehofa, kumlambila jwalakwe mwamsimu soni mu usyesyene, nambosoni kutenda yindu yosope mwachilungamo.—Yoh. 4:24; Aef. 4:25; Aheb. 13:18.

6. Ana chakulichinjilichisya pamtima chachilungamo chili chichi? Ligongo chichi tukusosekwa kuwala chida chelechi?

⁶ Chakulichinjilichisya pamtima chachilungamo chikwimila malamusi gakulungama ga Yehofa. Ligongo chichi tukusosekwa kuwala chakulichinjilichisya pamtimachi? Chida chelechi chikusamchinjilichisya msilikali kuti akasomedwa ni mipamba. Mwakulandana ni yeleyi, chakulichinjilichisya pamtima chachilungamo chikusawuchenjela mtima wetu wakuwanichisya ku yindu yachinyengo ya mchilambo chakusakalachi. (Mis. 4:23) Yehofa akusasakaga kuti tumnonyele soni kumtumichila jwalakwe ni mtima wetu wosope. (Mat. 22:36, 37) Nambo Satana akusatutendekasya kuti tuyinonyeleje mnope yindu yayili m’chilambochi, yele Yehofa akusaŵenganaga nayo. (Yak. 4:4; 1 Yoh. 2:15, 16) Soni Satana payiweni kuti mapulani gakwe ngagakamula, akusayika pakututendekasya kuti tukase malamusi ga Mlungu.

7. Ana tukusawala chamtuli chakulichinjilichisya pamtima chachilungamo?

⁷ Tukusawala chakulichinjilichisya pamtima chachilungamo, mwakupikanila soni kutenda yagakusasala malamusi ga Yehofa pangani ja yindu yayili yambone ni yakusakala. (Sal. 97:10) Ŵandu ŵane akusasala kuti malamusi ga Yehofa ngagakusampa mundu ufulu soni gali gakusawusya. Nambo naga tukuleka kukamulichisya masengo yajikusasala Baibulo, nikuti mpaka tulandane ni msilikali jwalesile yida ligongo lyakuyiwona usito, nambo ngondo jili mkati. Nambo kweleku mpaka kuŵe kupwambwana kusyesyene. Kwa ŵandu ŵakusamnonyelaga Yehofa, malamusi gakwe nganigaŵa gakusitopesya, nambo gali gakulupusya umi.—1 Yoh. 5:3.

8. Ana kuwala sapato pakosechela kulalichila ngani syambone kukusagopolela chichi?

⁸ Paulo jwatulimbikasisyesoni kuti tuwale sapato pakosechela kulalichila ngani syambone syamtendele. Kuŵecheta kwine, ndaŵi syosope tuŵeje ŵakoseka kulalichila ngani syambone sya Uchimwene wa Mlungu. Naga tukwasalila ŵane yajikusasala Baibulo chikulupi chetu mpaka chilimbe. Yili yakulimbikasya kwawona abale ni alongo ali mkulalichila ngani syambone pachilambo chosope chapasi. Akusatenda yeleyi pakulalichila ali kusukulu, kumasengo, malo gakusatendela bisinesi soni pandaŵi jilijose japatile upile wakutenda yeleyo. Naga tukutenda woga ni kuleka kulalichila, mpaka tulandane ni msilikali jwawusile sapato syakwe ngondo jili mkati. Yeleyi mpaka yimtendekasye kuti awulale soni mpaka alepele kulichenjela. Jwalakwe nganaŵa akombwele kukuya malamusi ga kungondo gaŵapele jwamkulungwa jwawo.

9. Ligongo chichi tukusosekwa kunyakula chida chakulichinjilichisya cha chikulupi?

 ⁹ Chakulichinjilichisya chekulungwa chachikulupi chikwimila chikulupi chatukwete pa Yehofa. Tukwete chikulupi chakuti jwalakwe chachikwanilisya yindu yosope yakusatusalila. Chikulupi chelechi chikusatukamuchisya kuti tukombole ‘kusimisya mapanga gosope gakukolela moto ga Satana.’ Ligongo chichi tukusosekwa kunyakula chida chakulichinjilichisyachi? Tukusosekwa kutenda yeleyi ligongo chikusatukamuchisya kuti tukajigalikaga ni yijiganyo ya ŵampatuko nambosoni kuti tukadandawulaga ŵandu ŵane pakutuŵechetela yachipongwe. Naga nganitukola chikulupi mpaka yiŵe yakusawusya kuti tuŵe ŵakulimba ŵane pakutunyenjelela kuti tukapikanila malamusi ga Yehofa. Ndaŵi jilijose patukuchiŵichila kunyuma chikulupi chetu chinga patuli kusukulu kapena kumasengo yikusaŵa mpela kuti tunyakwile chakulinjilichisyachi. (1 Pet. 3:15) Nambosoni ndaŵi jilijose patukukana kukamula masengo gampaka gasokonasye kulambila kwetu Yehofa, yikusaŵa mpela tunyakwile chida chakulichinjilichisyachi. (Aheb. 13:5, 6) Chidachi chikusatukamuchisya ndaŵi jilijose patukupitilisyape kumtumichila Yehofa atamose ŵandu ali mkutusisya.—1 Ates. 2:2.

10. Ana chisoti chachikulupusyo chili chichi? Ligongo chichi tukusosekwa kuwala chisotichi?

¹⁰ Chisoti cha chikulupusyo chikwimila chembecheyo  chatupele Yehofa, chakuti chachimasya chiwa, nambosoni kwapa yindu yambone ŵandu ŵakusatenda yakusasaka jwalakwe. (1 Ates. 5:8; 1 Tim. 4:10; Tit. 1:1, 2) Mpela mwayikusaŵela kuti chisoti chisyesyene chikusamkamuchisya msilikali kuti akawulala mumtwe, nombe chembeyo chikusatukamuchisya kuti tuganisyeje chenene. Ana yeleyi yikusakomboleka chamtuli? Chembecheyo chelechi chikusatukamuchisya kuti tuganichisyeje mnope yaŵasasile Mlungu kuti chachitutendela soni chikusatukamuchisya kuti tuyiwoneje mwakuŵajilwa yindu yatukusasimana nayo. Ana tukusawala chamtuli chisoti chelechi? Tukusawala chisotichi patukulingalinga kuganisya mwakamulana ni nganisyo sya Mlungu. Mwachisyasyo mmalo mwa kudalila mnope yipanje, tukusamdalila Mlungu.—Sal. 26:2; 104:34; 1 Tim. 6:17.

11. Ana upanga wa msimu uli chichi? Ligongo chichi tukusosekwa kukamulichisya masengo upangawu?

¹¹ Upanga wa msimu uli maloŵe ga Mlungu gakusasimanikwa m’Baibulo. Upanga welewu ukwete machili gakutyosya mabosa galigose nambosoni kwagopola ŵandu ku kapolo wa yijiganyo yaunami soni kundamo syakusakala mnope. (2 Akoli. 10:4, 5; 2 Tim. 3:16, 17; Aheb. 4:12) Tukusamanyilila kukamulichisya chenene masengo upanga welewu, mwakulijiganya pajika maloŵe ga Mlungu nambosoni majiganyo gane gatukusapochela mlikuga lya Yehofa. (2 Tim. 2:15) Kupwatika pa yida yakutuchenjela yatukambileneyi, Yehofa akusatuchenjelasoni kupitila m’litala line. Ana ni litala lyakwe lyapi?

12. Ana jwalijose akusosekwa kumanyilila chichi?

¹² Msilikali jwakusamanyilila chenene kuputa ngondo, akusamanyililasoni kuti mwajika jakwe nganaŵa akombwele kwagomeka achimmagongo ŵakwe, mmalo mwakwe akusasosechela chikamuchisyo cha asilikali achimjakwe. Mwakulandana ni yeleyi m’wejisoni pajika nganituŵa tukombwele kumgomeka Satana yimpepe ni ŵandu ŵali kumbali jakwe. Nambo tukusasosechela chikamuchisyo cha abale ni alongo kuti tukombole kutenda yeleyi. Yehofa atupele ‘ŵakulupilila achimjetu’ ŵajinji pachilambo chosope ŵampaka atukamuchisye kuputa ngondoji.—1 Pet. 2:17.

13. Mwakamulana ni Ahebeli 10:24, 25, ana kusimanikwa pa misongano kwana umbone wamtuli?

¹³ Litala limo lyatukusapatila chikamuchisyo lili kusimanikwa pa misongano ja mpingo. (Aŵalanje Ahebeli 10:24, 25.) Ndaŵi sine wosopewe tukusatenguka. Nambo misongano mpaka jitulimbikasye. Ndemanga syakutyochela pasi pamtima syakusapeleka abale ni alongo sikusatulimbikasya mnope. Ngani sya m’Baibulo syasikusaŵechetedwa soni yisyasyo yakusatenda abale ni alongo yikusatulimbikasya kuti tumtumichileje Yehofa. Tukusalimbikasidwa patukukunguluka ni abale ni alongo misongano mkanijitande soni pajimasile. (1 Ates. 5: 14) Misongano jikusatupa upile wakwakamuchisya ŵane soni yeleyi yikusatukamuchisya kuti tuŵeje ŵakusangalala. (Mase. 20:35; Alo. 1:1, 12) Misonganoji jikusatukamuchisyasoni mmatala gane. Jikusatukamuchisya kuti tupakomboleje kulalichila soni kwiganya. Mwachisyasyo tukusamanyilila kakamulichisye chenene masengo ka yindu yakwiganyila, myoyo tukosecheleje chenene misongano ja mpingo. Patuli pa misongano tupikanichisyeje chenene yatukulijiganyayo soni misonganoji pajimasile tuyikamulichisyeje masengo yatulijiganyisyeyo. Kutenda yeleyi kuchitukamuchisya kuti tuŵe “msilikali jwambone jwa Klistu Yesu.”—2 Tim. 2:3.

14. Ana Yehofa akusatukamuchisyasoni m’litala line lyapi?

¹⁴ Tukwete malayika gejinji gamachili mnope gagakusatukamuchisya. Agambe ganichisya yalikusakombola kutenda lilayika limpepe. (Yes. 37:36) Naga lilayika limpepe likusatenda yindu yakusimonjesya mnope, ana gulu ja malayika mpaka jitende yakwika papi? Pangali chiŵanda kapena mundu jwampaka akole machili kulipunda likuga lya ngondo lya Yehofa. Paja Yehofa mpaka amkamuchisye mundu jumo jwali jwakulupichika kuti akombole kulimbana ni ŵandu  ŵakusisya atamose ali atupile chamtuli. (Ŵak. 6:16) Pangali jwampaka akanile yeleyi. Myoyo akusosekwa kukumbuchilaga yeleyi pakulagasidwa ni achimjawo ŵakumasengo, kusukulu kapena ŵandu ŵangakulupilila pakwaŵechetela yineyakwe. Akumbuchilejesoni kuti nganaŵa jika pakuputa ngondoji nambo Yehofa ni jwakwalongolela.

15. Ana lilemba lya Yesaya 54:15, 17, likulosya chamtuli kuti pangali jwampaka ŵalekasye ŵandu ŵa Mlungu kukamula masengo gakulalichila?

¹⁵ Pana magongo gejinji gampaka gatendekasye ŵandu ŵali m’chilambo cha Satanachi kuti atuŵenjeje. Ngatukusatenda nawo yandale kapena kwinjilila nawo yangondo. Tukusalalichila ya lina lya Mlungu, kwasalila ŵane ya Uchimwene wakwe wawuchiyikasya mtendele nambosoni kupikanila malamusi gakwe gakulungama. Tukusitwakamuchisya ŵandu kumanyilila kuti Satana jwali jwakulamulila jwa chilambochi ali jwa unami soni jwakuwulaga ŵandu. (Yoh. 8:44) Tukusitwasalila ŵandu kuti chilambo cha Satanachi chichijonanjidwe pamkaŵapa. Myoyo ngasitukunda kuti Satana kapena ŵandu ŵali kumbali jakwe atulekasye kutenda yeleyi. Kupwatika pelepa tuchikamulichisya masengo upile uliwose watukwete kuti tumchimbichisye Yehofa. Atamose kuti Satana akwete machili, nambo akulepela kulekasya masengo gakwalalichila ŵandu ngani syambone pachilambo chosope. Satana akulepela kutenda yeleyi ligongo lyakuti Yehofa ni jwakutuchenjela.—Aŵalanje Yesaya 54:15, 17.

16. Ana Yehofa chachakulupusya chamtuli ŵandu ŵakwe pandaŵi ja yisawusyo yekulungwa?

¹⁶ Ana kusogoloku tukwembecheya chichi? Pandaŵi ja yisawusyo yekulungwa, Yehofa chachitukulupusya mmatala gaŵili gakusimonjesya mnope. Litala lyandanda, chachakulupusya ŵakutumichila ŵakwe pandaŵi jele jwalakwe chachatendekasya achayimwene ŵa pachilambo chapasi kuti amjimuchile Babulo Jwamkulungwa, jwali chitepo cha dini jaunami. (Chiw. 17:16-18; 18:2, 4) Litala lyaŵili, Yehofa chachakulupusya ŵandu ŵakwe, pandaŵi jichachimalisyaga konanga ŵakusakala wosope ŵali m’chilambo cha Satanachi pa Alamagedo.—Chiw. 7:9, 10; 16:14, 16.

17. Ana kupitilisya kuŵa paunasi ni Yehofa kukwete umbone wamtuli?

¹⁷ Naga tukupitilisya kuŵa paunasi wambone ni Yehofa, nikuti Satana pangali champaka atende pakusaka kutuwulasya. Soni yisyesyene yakwe yili yakuti jwalakwe ni jutachijonanjidwa kwampaka kalakala. (Alo. 16:20) Myoyo awale yida yosope yangondo soni akaleka kuyikamulichisya masengo. Akasalinga kuputa ngondo jakulimbana ni Satanaji mwajika jawo. Konjechesya pelepa ŵakamuchisyeje abale ni alongo soni akuyeje malamusi ga Yehofa. Naga akutenda yeleyi ni kuti chachiŵa ŵakusimichisya kuti Yehofa jwali Mtati jwachinonyelo, chachalimbisya soni kwachenjela.—Yes. 41:10.