1. ¿Xiñee gunabaʼ Jesús Jehová gapa ca discípulo stiʼ?

ÚLTIMU gueelaʼ guyuu Jesús lu Guidxilayú, gunna zadxaagalú ca discípulo stiʼ guendanagana. Cumu nadxiibe ca discípulo stibe la? gunábabe Bixhózebe gapa laacaʼ de Binidxabaʼ (Juan 17:14, 15). Nanna Jesús dxi guibiguetaʼ guibáʼ, zucaalú Binidxabaʼ tutiica gacalaʼdxiʼ guni ni ná Jehová. Bihuinni dxichi zaquiiñeʼ xquidxi Jehová chuʼ tu gapa laacaʼ.

2. ¿Xiñee nanna dxíchinu zacabi Jehová ca oración stinu?

² Bicabi Jehová oración stiʼ Xiiñiʼ purtiʼ nadxii laabe. Zacaca nga laanu, pa gúninu ni riuulaʼdxiʼ Jehová, laaca zannaxhiibe laanu ne zacábibe ca oración stinu ora guinábanu gacanebe ne gápabe laanu. Cumu laabe nga Bixhózenu la? siempre zápabe laanu. Purtiʼ laabe nga Dios ni dxandíʼ.

3. ¿Xiñee caquiiñenu gapa Jehová laanu?

³ Tiempu riʼ, jma caquiiñenu gapa Jehová laanu. Maʼ guládxicabe Binidxabaʼ de guibáʼ «ne guizáʼ cadxiichi» (Apoc. 12:12). Maʼ bicaa Binidxabaʼ caadxi binni guiníʼ ique cayúnicaʼ «xhiiñaʼ Dios» ora sanándacaʼ laanu (Juan 16:2). Ne xcaadxi ni qué runi cré Dios, rizanándacaʼ laanu purtiʼ qué rúninu ni nacaʼ. Cadi naquiiñeʼ guidxíbinu  purtiʼ Biblia ná: «Runi cumplir Señor ni maʼ guníʼ, ne zudii laatu stipa ne zapa laatu de Binidxabaʼ» (2 Tes. 3:3). Guidúʼyanu chupa modo rapa Jehová laanu.

4. Casi ná Efesios 6:13-17, ¿xi rudii Jehová laanu para gapa laanu?

⁴ Maʼ bidii Jehová laanu ti armadura ni zapa laanu de Binidxabaʼ (biindaʼ Efesios 6:13-17). Guizáʼ naguidxi armadura riʼ, peru cadi naquiiñeʼ gáxhanu nin ti parte stini para gápani laanu. Lu ca xcaadxi párrafo riʼ, zadúʼyanu xi runi representar cada parte stiʼ armadura riʼ.

5. ¿Xi runi representar cinturón stiʼ armadura riʼ, ne xiñee naquiiñeʼ guxhiʼnu ni ndaaninu?

⁵ Runi representar cinturón stiʼ armadura riʼ guiráʼ ni dxandíʼ zeeda lu Biblia. ¿Xiñee naquiiñeʼ guxhiʼnu cinturón riʼ ndaaninu yaʼ? Purtiʼ Binidxabaʼ nga «bixhoze guiráʼ ni rusiguii» (Juan 8:44). Maʼ stale iza cusiguiibe ne caguítebe «guiráʼ binni guidxilayú» (Apoc. 12:9). Peru ca ni dxandíʼ zeeda lu Biblia rápacani laanu para cadi quiteʼ Binidxabaʼ laanu. ¿Ximodo zanda guxhiʼnu cinturón riʼ ndaaninu yaʼ? Ra guizíʼdinu de Jehová, guni adorarnu laabe «né espíritu ne ni dxandíʼ» ne gácanu «honradu lu guiráʼ cosa» (Juan 4:24; Efes. 4:25; Heb. 13:18).

6. ¿Xi runi representar coraza ni cudii Dios laanu ne xiñee naquiiñeʼ gácunu ni?

⁶ Runi representar coraza stiʼ armadura riʼ ca ley stiʼ Jehová. ¿Xiñee naquiiñeʼ gácunu ni yaʼ? Purtiʼ cásica rapa ti coraza ladxidóʼ ti soldadu, zaqueca rapa coraza ni rudii Dios laanu ladxidoʼno para cadi chuʼ modo riníʼ ique binni guidxilayú ndaaniʼ ni (Prov. 4:23). Cayabi Jehová laanu gannaxhiinu laa ne gúninu ni ná de guidubi ladxidoʼno (Mat. 22:36, 37). Peru Binidxabaʼ racalaʼdxiʼ gannaxhiinu ca cosa ni nanalaʼdxiʼ Jehová (Sant. 4:4; 1 Juan 2:15, 16). Ne pa qué ganda gucaabe laanu guchéʼnenu ley stiʼ Jehová, zuyúbibe xcaadxi modo para gúnibe ni.

7. ¿Ximodo rácunu coraza ni rudii Jehová laanu?

⁷ Rácunu coraza riʼ ora ribáninu modo ná Jehová ne rucáʼnanu cosa malu (Sal. 97:10). Zándaca nuu binni riníʼ ique pa chinándanu ca ley stiʼ Jehová maʼ cadi libre laanu. Peru, pa gusaana de chinándanu ca conseju ni zeeda lu Biblia zeeda gácanu casi ti soldadu ni raxha coraza stiʼ lu ti guerra purtiʼ riníʼ ique guizáʼ nanaani. ¿Cadi dxandíʼ ti guendahuati nga la? Para ca ni nadxii Jehová «cadi nanaa ca mandamientu stiʼ», sínuque rulani xpídacaʼ (1 Juan 5:3, nota).

8. ¿Xi riníʼ gucáʼñeenu elaguidi ni cudii Dios laanu ne chuʼnu listu para guininu de ca noticia galán?

⁸ Laaca guníʼ Pablo naquiiñeʼ gucáʼñeenu elaguidi ne chuʼnu listu para guininu ca noticia galán ni riguixhedxí ladxidóʼ binni. Ndiʼ riníʼ, naquiiñeʼ chuʼnu listu para guni predicarnu mensaje stiʼ Reinu. Ora rinínenu xcaadxi binni de Biblia, riguidxi fe stinu. Riuʼnu gana ora ridúʼyanu qué rusaana ca xpinni Jehová ni nuu lu guidubi Guidxilayú de guni predicar. Guzéʼtenu ti ejemplu, runi predicarcaʼ ra dxiiñaʼ, ra scuela, lu ca territorio ra nuu negocio, de yoo pur yoo, ora maʼ zisicaʼ, ora rigánnacaʼ ca familia sticaʼ ni cadi naca Testigu, ora riníʼnecaʼ binni ni runibiaʼcaʼ ne runi predicarcaʼ neca qué ganda guireecaʼ de ra lídxicaʼ. Pa nusaana de ñuni predicarnu purtiʼ ridxíbinu, guizáʼ ñuniná ni laanu. Ñeeda gácanu casi ti soldadu ni raxha elaguidi ñee lu ti guerra, nánnanu zacaná  ne jma nagueenda guizaaca xiixa ne maʼ qué guni ni ná comandante stiʼ.

9. ¿Xiñee cadi naquiiñeʼ gundaʼnu escudu naroʼbaʼ stiʼ armadura ca?

⁹ Runi representar escudu naroʼbaʼ stiʼ armadura riʼ fe ni nápanu Jehová. Nápanu confianza zuni cumplir Jehová guiráʼ ni maʼ guníʼ. Racané fe ca laanu para gusuinu «ca flecha ni cá guí ni culaa Binidxabaʼ» luguianu. Cadi naquiiñeʼ gundaʼnu escudu riʼ, purtiʼ rápani laanu de ca cosa ni cadi jneza ni rusiidiʼ ca apóstata, laaca rápani laanu ora guni burla ne guiníʼ binni mal de laanu para cuee gana laanu. Pa qué gápanu fe, zaca nagana para laanu guzúʼbanu stiidxaʼ Jehová ora gucaa binni laanu gúninu xiixa ni qué riuuláʼdxibe. Peru cada biaje guni defendernu ni runi crenu ra dxiiñaʼ o ra scuela, rapa escudu stiʼ fe laanu (1 Ped. 3:15). Laaca rapa ni laanu cada biaje gucáʼnanu ti dxiiñaʼ ra ziáxanu stale purtiʼ maʼ gudixhe íquenu gúninu ni ná Jehová (Heb. 13:5, 6). Ne ora gucaalú binni laanu, rapa escudu riʼ laanu (1 Tes. 2:2).

10. ¿Xi runi representar cascu ni rulá, ne xiñee naquiiñeʼ cuʼnu ni íquenu?

¹⁰ Runi representar cascu ni rulá, esperanza  ni rudii Jehová laanu, esperanza nápanu zulabe laanu de lu náʼ guendaguti ne zaguu ndaayabe ca ni guni ni nabe (1 Tes. 5:8; 1 Tim. 4:10; Tito 1:1, 2). Cásica rapa ti cascu ique ti soldadu, zaqueca rapa esperanza nápanu Jehová xquendabiaaninu. ¿Ximodo yaʼ? Racaneni laanu guiníʼ íquenu ca promesa stiʼ Dios ne guidúʼyanu ca guendanagana ca modo ruuyaʼ Dios cani. ¿Ximodo riguʼ íquenu cascu ni rulá ca yaʼ? Ra gúninu stipa guiníʼ íquenu casi riníʼ ique Jehová. Guzéʼtenu ti ejemplu, qué riguíxhenu esperanza stinu lu ca cosa risaca ni nápanu purtiʼ zadxiñaʼ dxi zarácani, sínuque riguíxhenu esperanza stinu lu náʼ Dios (Sal. 26:2; 104:34; 1 Tim. 6:17).

11. ¿Xi runi representar espada stiʼ espíritu, ne xiñee risaca iquiiñenu ni?

¹¹ Runi representar espada stiʼ espíritu Stiidxaʼ Dios, Biblia. Napa espada riʼ poder para gacaneni binni gudii cuenta gunáʼ nga ca cosa ni cadi dxandíʼ rusiidiʼ ca religión, guixeleʼ de laacani ne gusaana de guni cosa malu (2 Cor. 10:4, 5; 2 Tim. 3:16, 17; Heb. 4:12). Rizíʼdinu iquiiñenu espada riʼ jneza ora runi estudiarnu stúbinu ne ora rinándanu ni rusiidiʼ xquidxi Dios (2 Tim. 2:15). Peru cadi armadura si riʼ nga rudii Jehová laanu, rudiibe laanu sti cosa. Guidúʼyanu xi laani.

12. ¿Xiruʼ caquiiñenu, ne xiñee?

¹² Nanna ti soldadu ni napa experiencia stubi si qué zanda guni ganar ti ejércitu, caquiiñeʼ gacané xcaadxi soldadu laa. Zaqueca nga laanu, qué zanda diʼ guni ganarnu Binidxabaʼ ne ca xpinni pa stúbisinu gucáʼlunu laacaʼ, caquiiñeʼ gacané ca hermanu stinu laanu. Maʼ bidii Jehová laanu ca hermanu stinu ni nuu lu guidubi Guidxilayú para gacanecaʼ laanu (1 Ped. 2:17).

13. Casi ná Hebreos 10:24, 25, ¿ximodo racané ca reunión ca laanu?

¹³ Lu ca reunión racané ca hermanu stinu laanu (biindaʼ Hebreos 10:24, 25). Nuu biaje rireʼnu gana. Peru ora riuunu reunión runi sentirnu galán. Ca comentariu ni rudii ca hermanu, ca demostración ne ca discursu riguucani gana laanu para cadi gusaana de gúninu ni ná Jehová. Laaca riuʼnu galán ora rinínenu ca hermanu stinu ante ne despué de reunión (1 Tes. 5:14). Ne riuʼnu nayecheʼ ora racanenu xcaadxi lu ca reunión (Hech. 20:35; Rom. 1:11, 12). Peru cadi nga si nga laani, lu ca reunión ca rizíʼdinu guni predicarnu ne gusíʼdinu jma jneza. Guzéʼtenu ti ejemplu, luni rizíʼdinu iquiiñenu ca publicación ne ca videu ni nápanu lu kit de enseñanza. Nga runi, gaca prepararnu ante chuunu reunión, gucaadiaga chaahuinu xi guiete luni ne despué gúninu ni guizíʼdinu. Pa gúninu ndiʼ, cada tobi de laanu zaca «ti buen soldadu stiʼ Cristu Jesús» ne ziuʼnu listu para gudxíʼlunu Binidxabaʼ (2 Tim. 2:3).

14. ¿Xi sti modo racané Jehová laanu?

¹⁴ Laaca racané stale millón de ángel ni napa poder laanu. Pa nánnanu xi zanda guni ti ángel si, guiníʼ íquesinu yanna xi zanda guni ti ejércitu de ángel (Is. 37:36). Nin binni ne nin ca demonio cadi nadipaʼ biaʼ nadipaʼ ejércitu de ángel stiʼ Jehová. Ti biaje bizíʼdinu jma stale tu nuuné laanu purtiʼ cayacané Jehová laanu (Juec. 6:16). Cadi guireʼnu gana pur xiixa ni guiníʼ o ni guni tuuxa compañeru de dxiiñaʼ, de scuela o  ti familia stinu laanu. Guietenaláʼdxinu, cadi stúbinu cadíndenu purtiʼ cuzúʼbanu stiidxaʼ Jehová.

15. Casi ná Isaías 54:15, 17, ¿xiñee guirutiʼ zanda gucueezaʼ xquidxi Dios?

¹⁵ Lu guidxilayú stiʼ Binidxabaʼ riʼ nabé nanalaʼdxiʼ binni laanu. Qué riuʼnu lu política ne qué riuunu lu guerra. Rusíʼdinu binni tu lá Dios, rininu Reinu si stibe zedané paz ne ruzúʼbanu stiidxaʼ Dios. Laaca rábinu binni rusiguii Binidxabaʼ ne qué riá binni (Juan 8:44). Ne laaca rininu mayaca guinitilú guidxilayú malu stiʼ Binidxabaʼ. Neca cuyubi Binidxabaʼ ne ca xpinni ximodo gusaana de gúninu ni ná Dios, qué zusaana de gusisácanu Jehová. Napa Binidxabaʼ poder peru qué huayanda gucueezabe laanu de guinínenu binni lu guidubi naca Guidxilayú de mensaje stiʼ Reinu. Ne cayanda cayúninu guiráʼ ndiʼ purtiʼ cayapa Jehová laanu (biindaʼ Isaías 54:15, 17).

16. ¿Ximodo zulá Jehová xquidxi lu gran tribulación?

¹⁶ ¿Xi zazaaca despué? Lu gran tribulación zulá Jehová laanu de chupa modo. Primé, zulabe ca xpínnibe ora gucaabe «ca rey nuu lu guidxilayú» gunitilucaʼ Babilonia guidxi roʼ, ni zeeda gaca ca religión ni qué rusiidiʼ ni dxandíʼ (Apoc. 17:16-18; 18:2, 4). Ne guiropa, zulabe xquídxibe ora gunitilú chaahuibe guidxilayú stiʼ Binidxabaʼ lu Armagedón (Apoc. 7:9, 10; 16:14, 16).

17. ¿Xiñee naquiiñeʼ chuʼnu gaxha de Jehová?

¹⁷ Qué zanda guniná Binidxabaʼ laanu pa nuunu gaxha de Jehová. Nanna dxíchinu zunduuxeʼ Jehová Binidxabaʼ para siempre (Rom. 16:20). Nga runi, gácunu armadura ni cudii Dios laanu ne qué chuʼ dxi gáxhanu ni. Cadi gacaláʼdxinu stúbinu gucáʼlunu Binidxabaʼ ne ca demonio stiʼ, gacanenu ca hermanu stinu ne chinándanu ni gabi Jehová laanu. Pa gúninu ni la? nanna dxíchinu zudii Jehová laanu stipa ne zapa laanu (Is. 41:10).