1-2. Obedo tic pa anga me konyo latin kwan me dongo nio wa i batija?

LAMINWA Amy ma bedo i lobo Fiji owaco ni, “Onongo amaro jami ma atye ka pwonyone ki i Baibul. Aniang ni man aye ada. Ento i kare ma acako ribbe ki omege ki lumege, man okonya me timo alokaloka ma mitte ki me dongo nio wa i batija.” Gin mutimme i kom Amy pwonyowa gin mo ma pire tek: Latin kwan me Baibul twero medde ki dongo nio wa i batija ka onongo kony ki bot jo mukene me kacokke.

² Lutit kwena ducu gitwero konyo jo manyen me doko lutit kwena. (Ep. 4:16) Lapainia mo ma nyinge Leilani, ma bedo i lobo Vanuatu owaco ni: “Carolok mo tye ma waco ni kulu pong ki jange. Atamo ni man bene tye ada ka odok i kom loko dano me doko lupwonnye pa Kricito; pol kare obedo tic pa jo me kacokke ducu me kelo ngat moni i ada.” Lunyodo, wadi, lurem, kacel ki lupwonye ma i cukul; gin ducu gikonyo me pwonyo latin wek odok dano muteggi. Gitimo man ki cuko cwiny latin meno ki bene pwonye jami ma pigi tego. I yo acel-lu, lutit kwena gitwero miyo tam, cuko cwiny, ki weko lanen maber pi lutino kwan me Baibul kun gikonyogi me dongo nio wa i batija.​—Car. 15:22.

3. Ngo ma ipwonyo ki i lok pa Ana, Daniel, ki Leilani?

³ Pingo omyero latit kwena ma tye ki latin kwanne cwinye obed yom ka jo mukene gikonyo latin kwanne? Nen kong gin ma Ana, ma obedo painia keken i lobo Moldova owaco, “Latin kwan mito kony mapol adada dok twero bedo tek pi lapwonye me Baibul keken me mine kony ducu ma en  mito.” Daniel *, ma bene tye painia keken i lobo Moldova owaco ni, “Pol kare lutit kwena mukene giwaco jami ma gudo cwiny latin kwan adada, ma i kine mukene an kikoma pe atamo pire.” Leilani, ma waloko i kome con-ni, otito dok tyen lok mukene, “Ka latin kwan oneno mar ki kica ma utmege ginyuto bote, man konye me niang ni wan wabedo jo pa Jehovah ada.”​—Jon 13:35.

4. Ngo ma wabinyamo i pwony man?

⁴ Ento, itwero pennye ni, ‘Ngo ma aromo timo me konyo latin kwan me dongo kadi bed pe an aye abedo lapwonye?’ Kong dong wanyamu gin ma watwero timo ka ngat mo olwongowa me cito kacel kwede ka kwan ki latin kwanne ki gin ma watwero timo ka latin kwan ocako bino i cokke. Wabineno bene kit ma luelda gitwero konyo kwede lutino kwan me dongo nio wa i batija.

5. Ngo ma myero itim ka ngat mo olwongi me cito kacel kwede ka kwan ki latin kwanne?

⁵ Ka wutye ka kwan ki latin kwan, obedo tutwalle tic pa lapwonye me konye me niang Lok pa Lubanga. Ka lapwonye olwongi me cito kacel kwede, myero inenne kekeni calo lakony kore. (Latit. 4:9, 10) Dong ngo kikome ma iromo timone me konyo latit kwena lawoti maber?

6. Ka ibicito ki latit kwena mukene ka kwan ki latin kwanne, itwero keto i tic pwony ma nonge i Carolok 20:18 nining?

⁶ Yubbe pi kwanwu. Mukwongo, peny latit kwena lawoti wek otitti lok mo i kom latin kwanne. (Kwan Carolok 20:18.) Itwero penye ni: “Ngo ma ingeyo i kom latin kwanni-ni? Pwony ango ma wubinyamo kwede tin? Ngo ma imito ni latin kwanni opwony i kwanwu ma tin? Tika tye gin mo ma omyero atim nyo awacci, nyo ma myero agwokke ki timo nyo wacone? I yo mene ma atwero cuko kwede cwiny latin kwanni me dongo?” Ngene kene ni, lapwony pe bititti mung mogo madok i kom latin kwanne, ento gin ma en biwacci-ni bibedo me kony. Lamiconari mo ma nyinge Joy maro nyamo lok magi ki jo ma en terogi me kwan ki latin kwanne. En owaco ni: “Nyamo lok ma kit man konyo latit kwena lawota me bedo ki miti me konyo latin kwanna ki me ngeyo ngo ma myero en owacci i cawa me kwanwa.”

7. Pingo mitte ni iyubbe ka ibicito ka kwan ki latin kwan pa ngat mukene?

⁷ Ka latit kwena mo olwongi me cito ka kwan ki latin kwanne, bedo ber ka iyubo pwony ma wubinyamo. (Ejira 7:10)  Daniel, omego ma kiloko i kome con-ni owaco ni: “Abedo ki pwoc ka latit kwena lawota oyubbe pi kwan ki latin kwanna. Man weko en loko jami ma konyo latin kwanna.” Medo i kom meno, latin kwan biniang ka wun ducu wuyubbe maber, dok man biweko lanen maber bote. Kadi bed pe inongo kare me yubbe maber, tute me niang pwony ma pigi tego ma wubiloko iye.

8. Itwero weko legani gudo cwiny latin kwan me Baibul nining?

⁸ Lega obedo but yub me kwano Baibul ki latin kwan ma pire tek adada, pi meno lwod gin ma ibiwaco ka latit kwena lawoti owacci ni ibilego. Man biweko legani bedo ki tyen lok maber. (Jab. 141:2) Harriet, ma bedo i lobo Japan, wiye pud po i kom lega pa lamego mo ma onongo cito kacel ki lapwonye me Baibul. En owaco ni: “Aniang ni en tye ki wat macok adada ki Jehovah, dok onongo amito bedo calo en. Onongo awinyo calo en mara adada ka olwongo nyinga i legane.”

9. Ma lubbe ki Yakobo 1:19, ngo ma itwero timo me konyo latit kwena lawoti i cawa me kwan?

⁹ Mi kony bot latit kwena lawoti i cawa me kwanwu. Laminwa mo ma tye painia keken i lobo Nigeria owaco ni: “Latit kwena lawoti ma konyo kori winyo lok ka wutye ka kwan. En miyo tam, ento pe loko madwong, pien en niang ni lapwony aye myero odor kwan.” Dong, i cawa mene ma mitte ni iloki dok ngo ma itwero lok iye? (Car. 25:11) Ter iti i cawa ma lapwony ki latin kwan gitye ka lok. (Kwan Yakobo 1:19.) Man biweko ibedo atera me miyo kony ma mitte i cawa mupore. Ngene kene ni, myero kong ilwod lok ma peya iwaco gin mo. Me labolle, pe myero ilok tutwal, ingol dog lapwony, nyo icak lok i kom gin mo mapat. Ento, iromo medo lok manok, lapeny nyo lapor mo macek me konyo latin kwan me niang maber pwony ma kitye ka lok iye. I cawa mukene, itwero winyo calo pe itye ki gin mo me ameda. Ento ka imiyo pwoc ki latin kwan dok inyutte mar, man bikonye matek me dongo.

10. Gin mutimme i kwoni twero konyo latin kwan me Baibul nining?

¹⁰ Tite gin mutimme i kwoni. Ka twero bedo me kony bot latin kwan, ci itwero titte wiye wiye kit ma inongo kwede ada, kit ma iloyo kwede ariya mo, nyo kit ma Jehovah okonyi kwede. (Jab. 78:4, 7) Gin mutimme i kwoni twero bedo gin ma latin kwan mito winyone kikome. Man twero jingo niyene nyo bene cuko cwinye me dongo nio wa i batija. Dok twero nyutte kit me loyo atematema ma en tye ka kato ki iye. (1 Pet. 5:9) Gabriel, ma tiyo macalo painia i lobo Brazil, wiye pud po i kom gin ma okonye i kare ma onongo en tye  ka kwano Baibul. En owaco ni: “I kare ma awinyo gin mutimme i kwo pa omege, apwonyo ni Jehovah neno pekki ma watye kwede. Dok ka gitwero loyo ariya magi, ci an bene atwero.”

11-12. Pingo omyero wajol latin kwan me Baibul ki yomcwiny ka obino i cokke?

¹¹ Wek latin kwan odong nio wa i batija, en myero obed tye i cokke kare ducu dok onong adwogi maber ki iye. (Ibru 10:24, 25) Pol kare, lapwonye me Baibul aye lwonge me bino i cokke pi tyen mukwongo. Ka en obino, wan ducu watwero cuko cwinye me medde ki bino i Ot me Ker. Watwero timo man nining?

¹² Jol latin kwan me Baibul ki yomcwiny. (Rom. 15:7) Ka waweko latin kwan obedo agonya i cokke, en bimedde ki bedo ki miti me bino i Ot me Ker. Labongo weko lewic make, mot latin kwan ki yomcwiny dok inyute bot jo mukene. Lok kwede, pien lapwonye gwok peya oo nyo tye ki tic mukene i cawa me cokke. Winy lok pa latin kwan, dok inyute mar. Adwogi maber ango ma latin kwan twero nongone ka ijolle ki yomcwiny? Nen kong gin mutimme i kom omego Dmitrii, ma onongo batija mwaki mogo manok angec dok kombeddi tiyo macalo lakony kor tic. Ka en otamo i kom cokkene mukwongo, en waco ni: “I kare ma omego mo onena acung woko ma lworo omaka, en ojola dok odonyo kweda i Ot me Ker. Jo mapol gubino gumota. Abedo ki ur madit adada. Man oyomo cwinya matek dok oweko atamo ni onongo bibedo ber ka watye ki cokke nino ducu. Onongo peya aneno mar ma kit man ka mo keken.”

13. Jami ma itimo twero gudo latin kwan me Baibul nining?

¹³ Wek lanen maber. Jami ma itimo twero konyo latin kwan me Baibul me moko ni enongo ada. (Mat. 5:16) Omego Vitalii, ma i kare-ni tiyo macalo painia i lobo Moldova, owaco ni: “Aneno kit ma jo me kacokke gitamo dok gikwo kwede. Man omoko bota ni Lucaden pa Jehovah aye gubedo dini me ada.”

14. Lanenni maber twero konyo ngat mo me dongo i yo me cwiny nining?

¹⁴ Wek latin kwan obed mupore me nongo batija, en myero oket i tic jami ma tye ka pwonyone. Man pol kare pe yot. Ento ka latin kwan oneno adwogi maber ma inongo pi keto cik ma igi lac me Baibul i tic, man twero tugo cwinye me lubo lanenni. (1 Kor. 11:1) Nen kong gin mutimme i kom Harriet, ma waloko i kome con-ni. En owaco ni: “Omege ki lumege onongo dong gitye ka keto i tic jami ma an atye ka pwonyo. Aneno kit ma  aromo cuko kwede cwiny jo mukene ki timo botgi kica, ki kit ma atwero nyutigi mar. Onongo pol kare giloko jami mabeco i kom jo mukene. Onongo amito lubo lanengi.”

15. Carolok 27:17 konyowa nining me neno pingo pire tek me mako lirem ki latin kwan ma bino i cokke?

¹⁵ Mak lirem ki latin kwan me Baibul. Ka latin kwan medde ki bino i cokke, medde ki nyutte mar bene. (Pil. 2:4) Pingo pe ilok kwede? Itwero tite yomcwiny ma itye kwede me neno alokaloka ma en otimo. Iromo bene penye kit ma kwanne me Baibul tye ka wot kwede, ki lok madok i kom lupacone ki dog ticce. Ento gwokke pe ipeny lapeny ma twero weko lewic make. Boko lok ma kit man twero dongo wat i kinwu. Ka imako lirem ki latin kwan me Baibul, man twero konye me dongo nio wa i batija. (Kwan Carolok 27:17.) Harriet dong kombeddi tiyo macalo painia marii. Ka wiye opo i kom kare ma pud ecako bino acaka i cokke, en waco ni: “I kare ma acako mako lurem i kacokke, acako maro bino i cokke, dok onongo abino kadi bed awinyo ni aol. Onongo amaro bedo ki lurema manyen-ni dok man okonya me juko bedo larem jo ma pe giworo Jehovah. Onongo amito bedo cok ki Jehovah kacel ki omege ki lumege. Pi man, amoko tamma me nongo batija.”

16. Ngo mukene ma itwero timo me konyo latin kwan me Baibul me bedo agonya i kacokke?

¹⁶ Ka latin kwan medde ki dongo kun timo alokaloka i kwone, konye wek owiny calo pire tek i kacokke. Itwero timo man ki jolle i gangi. (Ibru 13:2) Denis ma bedo i lobo Moldova, ka wiye opo i kom kare ma en pud tye latin kwan me Baibul, en waco ni: “Tyen mapol omege gulwonga kacel ki dakona me namo kwedgi. Gutitiwa kit ma Jehovah okonyogi kwede. Man ocuko cwinywa adada. Kare ma watero kacel ki omege magi okonyowa me moko ni wamito tic pi Jehovah dok ni kwo mamwonya tye ka kurowa.” Ka latin kwan odoko latit kwena ma peya onongo batija, itwero lwonge me nywako i tic me pwony kacel kwedi. Omego Diego, ma bedo i lobo Brazil, owaco ni: “Omege mapol gulwonga me cito i tic me pwony kwedgi. Man aye onongo obedo yo maber loyo me ngeyogi. I kare ma atiyo kacel kwedgi, apwonyo jami mapol, dok awinyo ni atye cok ki Jehovah kacel ki Yecu.”

17. Luelda gitwero konyo lutino kwan me Baibul nining?

¹⁷ Mi kare ki lutino kwan me Baibul. Wun luelda, ka wunyuto mar pi lutino kwan me Baibul, man twero konyogi me dongo nio wa i batija. Tika itwero lok ki lutino kwan  kare ki kare ka gubino i cokke? Gibiwinyo ni iparo pigi ka wi po i kom nyinggi, tutwalle ka gucako miyo lagam i cokke. Tika itwero rido cawa me cito kacel ki latit kwena mo ka kwan ki latin kwanne? Iromo konyo latin kwan matek ma loyo kit ma ibyeko kwede. Laminwa Jackie ma tye painia i lobo Nigeria owaco ni: “Lutino kwanna mapol gibedo ki ur me niang ni omego ma acito kwede-ni obedo laelda. Latin kwanna acel owaco ni: ‘Pasta me kanicawa pe twero timo meno kulu. En limo jo mulony keken dok limogi ka guculo cente!’” Latin kwan man dong bino i cokke.

18. I yo ma nining ma luelda gitwero cobo tic ma kimiyo botgi kit ma kicoyo kwede i Tic pa Lukwena 20:28?

¹⁸ Pwony lutit kwena dok icuk cwinygi. Luelda, wutye ki tic ma pire tek me konyo lutit kwena me cobo ticgi me pwony, ma man kwako pwonyo lutino kwangi. (Kwan Tic pa Lukwena 20:28.) Ka latit kwena mo lworo kwan ki latin kwanne ka in itye, ci iromo jalle me kwan ki latin kwan meno i nino meno. Jackie, ma kiloko i kome con-ni owaco ni: “Luelda kare ki kare gipenya lok i kom lutino kwanna. Ka akemme ki peko mo i kwan ki latin kwanna me Baibul, gimina tam ma tiyo.” Luelda gitwero timo jami mapol me cuko cwiny lupwonye me Baibul me medde ki tiyo ticgi. (1 Tec. 5:11) Lamego Jackie omedde ni: “Yomo cwinya adada ka luelda gicuko cwinya dok gititta ni gitye ki pwoc madit pi ticca. Lok ma kit meno kweyo cwinya calo pii mangic i nino ma ceng lyet. Lokgi me kica konya me winyo ni atye ka tiyo tic maber me kwan ki lutino kwanna dok weko abedo ki yomcwiny madwong.”​—Car. 25:25.

19. Yomcwiny ango ma wan ducu watwero bedo kwede?

¹⁹ Kadi bed kombeddi wan kikomwa wape ki latin kwan me Baibul, pud watwero konyo ngat mo me dongo i yo me cwiny. Waromo medo lok mo manok me cwako latit kwena lawotwa ka watye ka kwan ki latin kwanne. Watwero mako lirem ki lutino kwan ka gubino i Ot me Ker, dok waromo weko lanen maber pigi. Luelda gitwero cuko cwiny lutino kwan ka giminigi kare, dok gicuko cwiny lutit kwena ka gipwonyogi dok gipwoyogi pi ticgi. Wabedo ki yomcwiny madwong, kadi bed watimo gin mo matidi me konyo ngat mo me maro ki tic pi Wonwa Jehovah.