1-2. Ni oha ori kubasa kukwasa omwegi wa Bibuli kutunguka akahika aha kubatizibwa?

AMY otwire omuri Fiji akagamba ati: “Nkaba ninkunda ebi nabire ndi kwega omuri Bibuli. Nkamanya ku ni amazima. Konka ku natandikire kwekwatanisa na benetata na banyanyazi nibwo nakozire empinduka, natunguka kandi nahika aha kubatizibwa.” Ebyahikire ahari Amy nibitwegesa ishomo ry’omugasho. Omwegi wa Bibuli natunguka ahika n’aha kubatizibwa yatunga obuyambi bw’abandi omu kibina.

² Buri muburizi nabasa kutuma ekibina cayeyongera. (Efe 4:16) Omupayoniya ori kwetwa Leilani, otwire omuri Vanuatu, akagamba ati: “Agaterine nigata igufa. Obwe rero ni co kimwe n’aha kwegesa abegi ba Bibuli; ab’omu kibina bona nibakwasa omwegi kwija omu mazima.” Abazire, abanyabuzare, abanywani n’abashomesa bona nibakwasa omwana kuba omuntu okuzire. Eco nibakikora bari kugaruramu omwana wabo amani kandi bari kumwegesa amashomo g’omugasho. Ababurizi na bo nibabasa kuha obuhabuzi abegi babo ba Bibuli, babahiga kandi babatereho ecokureberaho kirungi ekirabakwase kutunguka bakahika aha kubatizibwa.—Enf 15:22.

3. Ni enki eki ori kwegera aha bigambo ebi Ana, Dorin, na Leilani bagambire?

³ Ahabw’enki omuburizi ashemerire kushemererwa abandi baburizi bakwasa omwegi weye? Reba eki omupayoniya w’omutano ori kwetwa Ana otwire omuri Moldova yagambire, ari kugira ati: “Kigumire omuntu omwe kukwasa omwegi wa Bibuli kutunguka.” Dorin, omupayoniya w’omutano w’omuri  eryo ihanga na we ni ko yakirebire. Akamba ati: “Obwire bwingi, abandi baburizi nibagamba ekintu eki nabire ntakatekatekireho ekiri kuhika omwegi aha mutima.” Leilani nagamba endijo nshonga ati: “Rukundo eyi bari kwereka omwegi nemukwasa kureba ku turi abahereza ba Yehova.”—Yoh 13:35.

4. Ni enki eki twaza kushwijuma omuri eki kicweka?

⁴ Konka nitubasa kwebuza ngu: ‘Ni bata oku ndi kubasa kukwasa omwegi wa Bibuli kutunguka kandi atari inye ndi kumwegesa?’ Reka turebe eki turi kubasa kukora omuburizi yatushaba ngu tugende hamwe kwegesa omwegi weye wa Bibuli n’eki turi kubasa kukora ogo mwegi yatandika kwija omu nterane. Nambwenu twaza kureba oku abazehe bari kubasa kukwasa abegi ba Bibuli bakahika aha kubatizibwa.

5. Ni guha mugasho ogu ori kuba oyine omuburizi yakweta ngu mugende hamwe kwegesa omwegi wa Bibuli?

⁵ Mwaba muri kwegesa omwegi wa Bibuli, omuburizi weye ni we oyine obujunanizibwa bw’okumushobororera Ekigambo ca Ruhanga. Omuburizi yakushaba ngu muze kwegesa omwegi wa Bibuli muri hamwe, noba oriyo kumuyamba kusha. (Mub 4:9, 10) Konka shi ni enki eki ori kubasa kukora kugira ngu obe omuyambi murungi mwaba muri kwegesa omwegi?

6. Omuburizi yakushaba ngu mugende hamwe kwegesa omwegi wa Bibuli, ni bata oku ori kubasa kuta omu nkora omusinge oguri omu Nfumu 20:18?

⁶ Tebekanisiza ecegeso ca Bibuli. Oshemerire kubanza wabuza omuburizi ebiri kukwata aha mwegi weye. (Shoma omu Nfumu 20:18.) Nobasa kumubuza ngu: “Ni enki eki ori kumanya aha mwegi wawe wa Bibuli? Ni kiha kicweka eki mwahikaho? Noyenda ngu eki kicweka kimukwase ki? Mbehi hariho ekintu eki nshemerire kugamba ninga eki nshemerire kwerinda twaba turi kwegesa? Ni enki eki nshemerire kukora kugira ngu mpige omwegi kugira entunguka?” Ni amazima omuburizi tari kukugambira amabanga g’omwegi weye, konka ebi arakugambire nibibasa kukuyamba. Omumishonari ori kwetwa Joy nakunda kuganira ahari ebyo bintu n’abu ari kugenda na bo kwegesa abegi beye. Akagamba ati: “Ebyo biganiro nibikwasa owu nagenda na we kuburira kumanya ge omwegi n’oku ari kubasa kumukwasa.”

7. Omuburizi yakweta ngu mugende hamwe kwegesa omwegi wa Bibuli ahabw’enki oshemerire kutebekanisa ge?

⁷ Omuburizi yakweta ngu mugende hamwe kwegesa omwegi wa Bibuli nikiba kirungi watebekanisa ekicweka ekiriyegwa. (Ezr 7:10) Mwenetata ori kwetwa Dorin owu  twaba twagambireho akagira ati: “Ninshemererwa owu twagenda hamwe kuburira yaba atebekanisize. Eco nikituma yatanga ebitekateko ebihikire.” Nambwenu omwegi nareba ku mwena mutebekanisize kandi nimuba mwamuteraho ecokureberaho kirungi. Nobasa kutatunga obwire bw’okutebekanisa ge, konka nobasa kukwata obwire orebamu enshonga nkuru.

8. Ni enki eki ori kubasa kukora kugira ngu eshara eyi washabira aha cegeso ca Bibuli ebe eri ndungi?

⁸ Eshara ni ekintu c’omugasho mwaza kwegesa omuntu Bibuli. Obwe rero, oshemerire kutekateka aha bi oragambe bakuha eshara. Eco nikija kutuma eshara yawe yaba ndungi. (Zab 141:2) Hanae, otwire omuri Japan acayijuka eshara y’omunyanyazi owabire ashendekize omuburizi weye wa Bibuli. Akagamba ati: “Nkareba oku yabire ayine obunywani burungi na Yehova, kandi nanye nkaba ndi kwenda kuba nka we. Nambwenu nkehurira ge ku yagambire izina ryange omu shara.”

9. Tukuratize ebiri omuri Yakobo 1:19, ni enki eki ori kubasa kukora kugira ngu okwase owu mugenzire hamwe kwegesa omwegi wa Bibuli?

⁹ Shagika omuburizi mwaba muri aha cegeso. Omamuyovbi, omupayoniya w’omutano w’omuri Nayigeriya akagamba ati: “Omuyambi murungi ni ori kukuratira mwaba muri kwega. Nagira ebi yagamba konka tari kugamba byingi ahabw’okuba omuburizi ni we ari kuba ayebembire.” Ni bata oku ori kubasa kumanya obwire obu oshemerire kugamba mwaba muri kwegesa? (Enf 25:11) Hurikiza oyetonzire omuburizi n’omwegi baba bari kuganira. (Shoma omuri Yakobo 1:19.) Eco nikikukwasa kumanya obwire burungi bw’okuyamba. Konka oshemerire kubanza watekateka otakagambire. Ecokurebera: Toshemerire kugamba byingi, kuteganisa omuburizi yaba ari kushoborora, ninga shi kugamba ebintu ebitari kushushana n’ebi muri kwegaho. Konka ku oragambe ebitekateko bigufu, ecokureberaho ninga shi ekibuzo, nobasa kukwasa omwegi kushoborocerwa enshonga eyi muri kwegaho. Hine obwire obu ori kureba kitari kwetengesa ngu hagire eki wagamba. Konka ku orasime omwegi kandi okereka ku nomufaho, mazima noba wamuyamba kutunguka.

10. Ni bata oku ebyakuhikireho biri kubasa kukwasa omwegi wa Bibuli?

¹⁰ Gambira omwegi ebyakuhikireho. Bwaba buri obwire burungi gambira omwegi oku wayegire amazima, oku wayehanganire ekizibu n’oku Yehova yakukwasize omu kubaho kwawe. (Zab 78:4, 7) Ebyakuhikireho nibibasa kuba ari byo omwegi ari kwetenga kuhurira. Nibibasa kutuma okwikiriza kweye kwahama ninga shi bimukwase kutunguka ahika aha kubatizibwa. Kandi eco nikibasa kumukwasa kwehanganira ebigezo ebi ari kubugana. (1 Pet  5:9) Gabriel, omupayoniya w’omuri Burazili nayijuka ecamukwasize obu yabire ari kwega Bibuli. Akagira ati: “Ku nahurire ebyahikire ahari benetata, nkamanya ku Yehova ari kureba ebizibu byona ebi turi kubugana. Kandi yaba babasize kubyehanganira, nanye nkabibasa.”

11-12. Ahabw’enki tushemerire kwakira abegi abari kwija omu nterane tushemerirwe?

¹¹ Kugira ngu omwegi wa Bibuli atunguke ahike aha kubatizibwa, ashemerire kwekwatanisa omu nterane burijo kandi azigasirwemu. (Heb 10:24, 25) Omuburizi nabasa kuba ow’okubanza kweta omwegi weye ngu ayije omu nterane. Obwe rero yija omu nterane twena tushemerire kumuhiga ngu agume kuzekwatanisamu. Eco nitubasa kukikora tuta?

¹² Yakira omwegi oshemerirwe. (Rom 15: 7) Twayakira omwegi wa Bibuli tushemerirwe nabasa kugumizamu kwekwatanisa omu nterane. Muramuse oshemerirwe kandi omwanjurire abandi, konka otari kukora ebintu ebiratume yayehurira kubi. Muganirire ahakuba omuburizi weye nabasa kuba atakizire, ninga shi hine endijo mirimo eyi ari kukora omu Nju y’Obukama. Hurikiza ge ebi omwegi ari kukugambira kandi omwereke ku nomufaho. Ni bata oku eco kiri kubasa kukwasa omwegi? Yetegereze ebyahikire ahari Dmitrii owabatizibwe omu myaka mice eyahwire kandi hati ori omuhereza w’ekibina. Nayijuka ebyabireho omu nterane zeye z’okubanza. Akagira ati: “Mwenetata akandeba nyemerire nyenka aheru nyine obwoba rero yayija kunyakira. Bingi bakija kundamusya. Mazima ebyo bikantangaza. Nkashemererwa munonga kandi nahurira nagira ecetengo c’okwekwatanisa omu nterane burijo. Oku nayehurire tinkakuhuriragaho kwiha nazarwa.”

13. Ni bata oku emitwarize yawe mirungi eri kubasa kukwasa abegi ba Bibuli?

¹³ Batereho ecokureberaho kirungi. Emitwarize yawe nebasa kutuma omwegi yayikiriza ku ebi ari kwega gari amazima. (Mat 5:16) Vitalii, omupayoniya w’omuri Moldova, akagamba ati: “Nkareba oku abandi b’omu kibina babire bari kubaho, bari kutekateka, n’emitwarize yabo. Eco kikampamiza ku Abahamya ba Yehova bari kugenda na Ruhanga.”

14. Ni bata oku emitwarize yawe eri kubasa kutuma omwegi yatunguka?

¹⁴ Kugira ngu omwegi ayijuze ebiri kushabwa ngu abatizibwe, naba ashemerire kuta omu nkora ebi ari kwega. Konka eco tiko kiri korobera buri omwe. Konka omwegi ku ari kureba oku kuta emisinge ya Bibuli omu nkora cakugasire, nikituma na we yayenda kukutoreza. (1 Kor 11:1) Reba ebyahikire ahari Hanae owu tubire tugambireho. Akagamba ati: “Benetata na banyanyazi bakaba bari kuta omu  nkora ebi nabire ndi kwega. Nkega oku ndi kubasa kuba omuntu ori kugaruramu abandi amani kandi ori kusaasira, n’oku ndi kubasa kwereka rukundo. Buri izoba bakaba nibagamba ebintu birungi aha bandi. Nkahurira nayenda kubatoreza.”

15. Tukuratize ebiri omu Nfumu 27:17, ahabw’enki tushemerire kuba banywani b’abegi ba Bibuli bagumizamu kwija omu nterane?

¹⁵ Ba munywani w’omwegi. Omwegi yagumizamu kwija omu nterane mwereka ku nomufaho. (Fil 2:4) Nobasa kuganira na we, ogezaho kumumanya ge. Nobasa kumusima ahabw’empinduka zona ezi yakora, kandi omubuze ebikwatirine n’oku ari kwega Bibuli, embera z’eka yeye n’omurimo gweye. Ebyo biganiro nibibasa kutuma mwaba abanywani. Waba munywani w’omwegi wawe nikimukwasa kukora entunguka kandi ahika n’aha kubatizibwa. (Shoma omu Nfumu 27:17.) Hati Hanae ni omupayoniya w’obwire bwona. Akagamba ebyabireho ku yagire omu nterane aha murundi g’okubanza ati: “Ku natungire abanywani omu kibina nkatandika kwija omu nterane ntari kosha, kandi nkaba ninzekwatanisamu n’omu bwire obu nabire nduhire. Nkatunga abanywani basya kandi eco kikankwasa kureka abanywani ababire batari kuhereza Yehova. Nkaba ndi kwenda kuba munywani wa Yehova na benetata na banyanyazi. Ni yo nshonga nashaziremu kubatizibwa.”

16. Ni enki ekindi eki turi kubasa kukora kugira ngu omwegi wa Bibuli ahurire aturize omu kibina?

¹⁶ Omwegi ku aragumizemu kutunguka, omukwase kugumizamu kuhurira ari ow’omu kibina. Eco nobasa kukikora ori kumwakira omu ka yawe. (Heb 13:2) Denis otwire omuri Moldova nayijuka ebyabireho obu yabire ari kwega Bibuli. Akagamba ati: “Benetata bakaba nibakunda kunyeta n’omukazi wange ngu turye hamwe. Omuri obwo bwire bakaba nibatugambira oku Yehova yabakwasize. Ebyo bikatugumya, byatuma twareba ku okukorera Yehova birije kutuma twabona emigisha omu biro by’omu misho.” Omwegi wawe yamara kuba omuburizi nobasa kumweta mugenda hamwe kuburira. Diego, omuburizi w’omuri Burazili akagamba ati: “Benetata bingi bakaba nibanyeta ngu tugende hamwe omu murimo g’okuburira. Eco kikatuma nabamanya ge. Nkabegeraho byingi kandi nahurira naba munywani wa Yehova na Yesu.”

17. Ni bata oku abazehe bari kubasa kukwasa abegi ba Bibuli?

¹⁷ Gira obwire bw’okuba n’abegi ba Bibuli. Imwe bazehe, mwayereka ku nimufa aha begi ba Bibuli nikibakwasa kutunguka kandi bahika aha kubatizibwa. Nobasa kuganirira abegi ba Bibuli burijo bayija omu nterane. Nibareba ku ori kubafaho wayijuka  amazina gabo, na munonga batandika kuha ebitekateko. Nobasa kukora entebekanisa kugira ngu ogume ogende n’ababurizi omu kwegesa abegi ba Bibuli. Ebyo nibibasa kukwasa omwegi nk’oku otari kutekateka. Omupayoniya ori kwetwa Jackie, otwire omuri Nigeriya akagamba ati: “Abegi abingi nibatangara ku bari kumanya ngu benetata abari kwekwatanisa nanye omu kubegesa ni abazehe. Omwegi omwe akagamba ati: ‘Eco Pasita wange tari kubasa kukikora. Natayayira abagiga kusha ninga shi akutayayira wamuha esente!’” Ogo mwegi hati nayekwatanisa omu nterane.

18. Nk’oku biri kugambwa omu Byakozirwe 20:28, ni bata oku abazehe bari kubasa kuhikiriza omurimo ogu bahibwe?

¹⁸ Manyiza ababurizi kandi obagaruremu amani. Abazehe mwine omurimo g’omugasho g’okukwasa ababurizi kuba ababurizi barungi ba Bibuli. (Shoma omu Byakozirwe 20:28.) Omuburizi yaba ari kwitwa enshoni kwegesa omwegi wa Bibuli n’iwe oriho, nobasa kuba ni we wayegesa. Jackie, owu tubire tugambireho akagira ati: “Burijo abazehe nibambuza embera z’abegi bange ba Bibuli. Nibampa obuyambi obu ndi kwetenga natunga ebizibu aha kwegesa abegi bange ba Bibuli.” Abazehe nibabasa kukora kihango omu kugaruramu amani ababurizi ba Bibuli n’okubakwasa kwehangana. (1 Tes 5:11) Jackie nayongeraho ati: “Ninshemererwa ku abazehe bari kungaruramu amani kandi bakansima ahabw’ebi ndi kukora. Ebyo bigambo nibiba biri nk’otwizi oturi kufuka omu bwire bw’omushana mwingi. Ku bari kunsima nikituma nayeyesiga kandi nkizaho kutunga okushemererwa okuri kuruga omu murimo g’okwegesa abantu Bibuli.”—Enf 25:25.

19. Ni kuha kushemererwa oku twena turi kubasa kutunga?

¹⁹ N’obu twakuba tutine abu turi kwegesa Bibuli, nabwo nitubasa kugira owu twakwasa kukura omu by’omwika. Nitubasa kukwasa omuburizi yaba ari kwegesa omwegi weye Bibuli, turi kugira ebi twagamba konka twerinda kugamba ebigambo byingi. Nitubasa kuba banywani b’abegi ba Bibuli bayija aha Nju y’Obukama, kandi tubatereho ecokureberaho kirungi. Kandi abazehe nibabasa kugaruramu amani abegi ba Bibuli, bari kugira obwire bw’okuba na bo, bamanyiza ababurizi ba Bibuli kandi babasima. Mazima nitutunga okushemererwa kwingi twamanya ku turi kugira eki twakora omu kukwasa abandi kumanya Tata witu w’omu iguru, Yehova.