1-2. Woananom na wobotum aboa Bible suanyi ma oeenya nkɔenyim na oeetum abɔ esu?

AKYERƐBAA bi a wɔfrɛ no Amy a ɔwɔ Fiji kãa dɛ: “Nna m’enyi gye dza murusũa wɔ Bible mu no ho. Nna minyim dɛ nokwar no ara nye no. Naaso aber a mehyɛɛ ase dɛ menye enuanom robɔ no na ɔboaa me ma meyɛɛ nsesa ahorow na mobɔɔ esu.” Amy n’asɛm yi ma yehu nokwasɛm tsitsir bi. Ɔnye dɛ: Sɛ Bible suanyi bi nya mboa fi afofor a wɔwɔ asafo no mu hɔ a, obotum aboa no ma ɔaakɔ do enya nkɔenyim na ɔaabɔ esu.

² Ɔdawurbɔfo biara wɔ dza obotum ayɛ dze aboa afofor ma wɔaaba asafo no mu. (Eph. 4:16) Ɔkwampaaefo bi a wɔfrɛ no Leilani a ɔwɔ Vanuatu kãa dɛ: “Wɔkã dɛ, Ɔbaakofo nntsetse abofra. Mususu dɛ dɛmara na esuafoyɛ edwuma no so tse; mpɛn pii no, ɔgye asafo mũ no nyinara mbɔdzembɔ ana yeetum aboa obi ma ɔaaba nokwar no mu.” Sɛ abofra bi botum enyin abɛyɛ panyin pa a, obehia n’ebusuafo, n’anyɛnkofo nye n’akyerɛkyerɛfo nyinara hɔn mboa. Mboa a wɔdze ma no bi nye dɛ wɔhyɛ no nkuran na wɔma onya asetsena mu esuadze a no ho hia. Dɛmara na adawurbɔfo so botum dze hɔn afotu, hɔn nkuranhyɛ nye hɔn nhwɛdo pa aboa Bible esuafo ma woeenya nkɔenyim na woeetum abɔ esu.​—Mbɛ. 15:22.

3. Ebɛnadze na isũa fi nsɛm a Ana, Dorin, na Leilani kãe no mu?

³ Ebɛnadze ntsi na ɔsɛ dɛ ɔdawurbɔfo a ɔnye obi sũa Bible no gye mboa a afofor dze bɛma osuanyi no to mu? Hyɛ dza ɔkwampaaefo tsitsir bi a wɔfrɛ no Ana a ɔwɔ Moldova kãe no nsew. Ɔkãa dɛ: “Ɔnnda famu dɛ nyimpa kor bedzi Bible suanyi a orinya nkɔenyim no n’ehiadze nyinara ho dwuma.”  Ɔkwampaaefo tsitsir bi a wɔfrɛ no Dorin a ɔsom wɔ dɛm ɔman no ara mu no so kãa dɛ: “Mpɛn pii no, adawurbɔfo afofor tum kã nsɛm a ɔka mo suanyi no n’akoma, biribi a mara mpo monndween ho da.” Leilani so kãa biribi fofor ntsi a ɔsɛ dɛ yɛma hɛn enyi gye ber a afofor aboa hɛn suanyi no. Ɔkãa dɛ: “Sɛ osuanyi no hu dwen a enuanom dwen noho nye ɔdɔ a wɔda no edzi kyerɛ no no a, ɔma ohu dɛ yɛyɛ Jehovah no nkorɔfo ampa.”​—John 13:35.

4. Ebɛnadze na yebosusu ho wɔ adzesua yi mu?

⁴ Naaso bi a ibebisa woho dɛ, ‘Mibesi dɛn aboa Bible suanyi bi ma oeenya nkɔenyim aber a ɔnnyɛ emi na menye no sũa adze?’ Hom mma yɛnhwɛ dza yebotum ayɛ aber a obi akã akyerɛ hɛn dɛ yenkegya no ma ɔnkɛyɛ ne Bible adzesua no. Bio so, yɛbɔhwɛ dza yebotum ayɛ ber a osuanyi no ahyɛ ase dɛ ɔreba asafo nhyiamu no. Afei, yɛbɔhwɛ dza asafo mu mpanyimfo botum ayɛ dze aboa Bible esuafo ama woeenya nkɔenyim na woeetum abɔ esu.

5. Sɛ irikegya obi ma ɔaakɛyɛ ne Bible adzesua a, ebɛnadze na ɔsɛ dɛ eyɛ?

⁵ Sɛ yɛnye obi rusũa Bible no a, kyerɛkyerɛfo no tsitsir na ɔyɛ n’asodzii dɛ ɔbɔboa osuanyi no ma ɔaatse Nyankopɔn n’Asɛm no ase. Sɛ kyerɛkyerɛfo no kã kyerɛ wo dɛ kegya no a, ɔsɛ dɛ ibu woho dɛ eyɛ no boafo. Wodze ara nye dɛ ebɔboa no. (Ɔsɛnk. 4:9, 10) Ebɛn ndzɛmba pɔtsee na ibotum ayɛ dze aboa ma Bible adzesua no eetu mpon?

6. Sɛ irikegya obi ma ɔaakɛyɛ ne Bible adzesua a, ibesi dɛn dze ngyinadosɛm a ɔwɔ Mbɛbusɛm 20:18 no ayɛ edwuma?

⁶ Siesie woho ma Bible adzesua no. Dzi kan bisa ɔkyerɛkyerɛfo no ma ɔnkã osuanyi noho nsɛm kakra nkyerɛ wo. (Kenkan Mbɛbusɛm 20:18.) Ibotum ebisa no dɛ: “Ebɛnadze na inyim fa wo Bible suanyi no ho? Ebɛn asɛntsir na hom bosusu ho? Ebɛnadze na ebɛpɛ dɛ wo suanyi no hyɛ no nsew wɔ adzesua no mu? Aber a adzesua no rokɔ do no, ebɛnadze na ɔsɛ dɛ meyɛ anaa mekã, na ebɛnadze na ɔnnsɛ dɛ meyɛ anaa mekã? Ebɛnadze na obotum ahyɛ osuanyi no nkuran ma oeenya nkɔenyim?” Ɔda edzi kofee dɛ, ɔkyerɛkyerɛfo no rennkã osuanyi no no kukua mu nsɛm nnkyerɛ wo dze, naaso dza ɔbɛkã akyerɛ wo no botum aboa wo ma eesiesie woho. Akyerɛbaa Joy a ɔyɛ asɛmpatserɛwnyi no nye hɔn a wokegya no ma ɔkɛyɛ ne Bible adzesua no susu nsɛm a ɔtsetse dɛm ho. Ɔkãa dɛ: “Nkɔmbɔ a ɔtse dɛm no boa obi a orikegya me ma maakɛyɛ adzesua no ma onya ɔpɛ dɛ ɔbɔboa osuanyi no, na ohu dza ɔbɛkã aber a adzesua no rokɔ do no.”

7. Sɛ irikegya obi ma ɔaakɛyɛ ne Bible adzesua a, ebɛnadze ntsi na no ho hia dɛ isiesie woho?

⁷ Sɛ irikegya obi ma ɔaakɛyɛ ne Bible adzesua a, ɔbɛyɛ papa dɛ ibesiesie woho ama dza  wobosũa no. (Ezra 7:10) Dorin a yeedzi kan akã noho asɛm no kãa dɛ: “Sɛ obi a orikegya me ma maakɛyɛ adzesua no siesie noho a, m’enyi sɔ. Sɛ ɔba dɛm a, ɔkã nsɛm a ɔbɔboa osuanyi no.” Sɛ iyi da nkyɛn a, bi a iyi bɛma osuanyi no ehu dɛ hom beenu nyina esiesie homho yie ama adzesua no, na iyi bɛyɛ nhwɛdo pa ama no. Sɛ enntum ennsiesie woho amma adzesua no nyinara mpo a, annyɛ yie koraa no ɔsɛ dɛ egye mber kakra dze hwehwɛ nsɛntsitsir a ɔwɔ adzesua no mu no na ema ɔtsena w’adwen mu.

8. Sɛ erobɔ mpaa wɔ Bible adzesua ase a, ibesi dɛn akã nsɛm pɔtsee a ɔfa osuanyi no ho?

⁸ Mpaabɔ ho hia papaapa aber a yɛreyɛ Bible adzesua no, dɛm ntsi sɛ wɔkã kyerɛ wo dɛ ɔwo na ebɔbɔ mpaa a, dzi kan dwendwen dza ebɛkã wɔ wo mpaabɔ mu no ho. Sɛ eyɛ dɛm a, bi a ibohu ndzɛmba pɔtsee a ɔsɛ dɛ ebɔ ho mpaa. (Ndw. 141:2) Akyerɛbaa bi a wɔfrɛ no Hanae a ɔwɔ Japan no da ho ara kaa mpaa a akyerɛbaa bi a ɔnye ne Bible kyerɛkyerɛfo no bɛseraa no no bɔe no. Ɔkãa dɛ: “Muhun dɛ ɔnye Jehovah wɔ ebusuabɔ a no mu yɛ dzen, nna mepɛ dɛ meyɛ tse dɛ ɔno. Bio so, aber a ɔbɔɔ me dzin wɔ mpaa no mu no, metsee nka dɛ ɔdɔ me.”

9. Dɛ mbrɛ James 1:19 ma yehu no, ebɛnadze na ibotum ayɛ ama aayɛ ɔboafo pa ber a hom nye obi reyɛ Bible adzesua no?

⁹ Boa kyerɛkyerɛfo no ber a adzesua no rokɔ do no. Akyerɛbaa ɔkwampaaefo tsitsir bi a wɔfrɛ no Omamuyovbi a ɔwɔ Nigeria kãa dɛ: “Sɛ obi yɛ ɔboafo pa a, aber a adzesua no rokɔ do no odzi ekyir. Ɔkã nsɛm a ɔfa adzesua no ho, naaso ɔnnkasa pii, osiandɛ ɔgye to mu dɛ kyerɛkyerɛfo no na ɔsɛ dɛ ɔyɛ adzesua no.” Ber a adzesua no rokɔ do no, ibesi dɛn ehu ber a ɔsɛ dɛ ekasa nye asɛm a ɔsɛ dɛ ekã? (Mbɛ. 25:11) Sɛ kyerɛkyerɛfo no nye osuanyi no rekasa a, yɛ dzinn tsie hɔn yie. (Kenkan James 1:19.) Sɛ eyɛ dɛm a, ibohu ber pa a ɔfata dɛ ekasa. Naaso, ɔsɛ dɛ edwen dza ebɛkã no ho yie ansaana akasa. Dɛ nhwɛdo no, ɔnnsɛ dɛ ekasa pii, itwa kyerɛkyerɛfo no n’ano ber a ɔrekyerɛkyerɛ nsɛm mu, anaa edan nkɔmbɔ no kɔ asɛntsir fofor do. Mbom ibotum akã asɛm tsiabaa bi, ayɛ mfatoho bi, anaa ebisa asɛm bi a ɔbɔboa osuanyi no ma ɔaatse dza worusũa no ase. Ɔtɔ da a, bi a ebɛtse nka dɛ innyi pii a ebɛkã afa dza worusũa no ho. Naaso sɛ ekamfo suanyi no na ekyerɛ noho enyigye a, ɔbɔboa no pii ma oeenya nkɔenyim.

10. Ebɛn kwan do na bi a wo suahu bɔboa Bible suanyi bi?

¹⁰ Enye hɔn nkyɛ wo suahu. Sɛ no ho ba hia a, ibotum akã mbrɛ isii sũaa nokwar no, mbrɛ esi egyina nsɛndzendzen bi ano anaa mbrɛ esi ehu dɛ Jehovah roboa wo wɔ w’asetsena mu no ho asɛm kakra akyerɛ osuanyi no. (Ndw. 78:4, 7) Obotum aba dɛ, dza nna osuanyi no hia dɛ ɔtse ara na ekãa kyerɛɛ no no. Iyi botum ahyɛ ne gyedzi dzen anaa wɔaahyɛ no nkuran ma ɔaakɔ do enya nkɔenyim na oeetum abɔ esu.  Na bi a obotum aboa no ma oeehu mbrɛ obesi egyina nsɔhwɛ bi a orihyia no ano. (1 Pet. 5:9) Gabriel a ɔyɛ ɔkwampaaefo wɔ Brazil no kaa dza ɔboaa no ber a nna orusũa Bible no. Ɔkãa dɛ: “Enuanom no hɔn suahu a wɔkãa kyerɛɛ me no maa muhun dɛ Jehovah hu nsɛndzendzen a yehyia no, na sɛ wotumii gyinaa ano a, nna ɔnodze mara so mubotum egyina ano.”

11-12. Ebɛnadze ntsi na ɔsɛ dɛ yefi enyigye mu ma Bible suanyi bi a ɔaba asafo nhyiamu no akɔaba?

¹¹ Sɛ Bible suanyi bi botum enya nkɔenyim na ɔaabɔ esu a, ɔsɛ dɛ ɔba asafo nhyiamu dabaa na onya do mfaso. (Heb. 10:24, 25) Bi a, ne kyerɛkyerɛfo no bɔto nsa afrɛ no dɛ ɔmbra asafo nhyiamu. Da a odzi kan a ɔbɛba no, hɛn nyinara botum ahyɛ no nkuran ma ɔaakɔ do aba Ahendzi Asa do. Ebɛn akwan na yebotum afa do ayɛ dɛm?

¹² Fa enyigye ma osuanyi no akɔaba. (Rom. 15:7) Sɛ osuanyi no ba asafo nhyiamu na yɛma no akɔaba a, bi a ɔbɔboa no ma ɔaakɔ do aba Ahendzi Asa do. Mbrɛ ɔbɛyɛ a osuanyi no n’enyi bɛka no, fi enyigye mu kyia no, na fa no kyia afofor. Mma nnya adwen dɛ obi nye no bɛkasa; bi a nna ne kyerɛkyerɛfo no innyae mmbodurii anaa ɔwɔ asodzi bi a ɔsɛ dɛ odzi ho dwuma. Kyɛn w’aso pɛnn tsie dza osuanyi no bɛkã na kyerɛ no ho enyigye. Sɛ ifi enyigye mu ma osuanyi no akɔaba a, ebɛnadze na obotum efi mu aba? Dmitrii bɔɔ esu no mfe kakraabi nye yi, na sesei ɔrosom dɛ asafo mu somfo. Hom mma yɛnhwɛ asɛm a ɔkãe faa asafo nhyiamu a odzi kan a ɔkɔree no ho. Ɔkãa dɛ: “Aber a onua bi hun dɛ migyina Ahendzi Asa no nkyɛn a mayɛ basaa no, ɔbɛfaa me kɔr dan mu. Enuanom pii baa me nkyɛn bekyiaa me. Ɔyɛɛ me nwanwa dɛ! M’enyi gyee araa ma nna me yamu a nkyɛ da biara yɛyɛ asafo nhyiamu wɔ dapɛn no mu. Mbrɛ misii tsee nka no, nna monnkɔr beebiara ma menntsee nka dɛm da.”

13. Ebɛn nkantando na wo ndzeyɛɛ botum enya wɔ Bible suanyi bi do?

¹³ Yɛ nhwɛdo pa ma osuanyi no. Wo ndzeyɛɛ botum aboa Bible suanyi no ma ɔaagye edzi dɛ oeehu nokwar no. (Matt. 5:16) Vitalii a seseiara ɔsom dɛ ɔkwampaaefo wɔ Moldova no kãa dɛ: “Muhun mbrɛ hɔn a wɔwɔ asafo no mu no si bɔ hɔn bra, wosusu nsɛm ho na wɔyɛ hɔn adze. Iyi maa mebɛgyee dzii dɛ Jehovah Adasefo yɛ Nyankopɔn no nokwar asomfo ampa.”

14. Ebɛn kwan do na bi a wo nhwɛdo bɔboa osuanyi bi ma oeenya nkɔenyim?

¹⁴ Sɛ osuanyi no bɛfata ama esubɔ a, no ho hia dɛ ɔdze dza orusũa no yɛ edwuma. Nnyɛ aber nyina na iyi ne yɛ da famu. Naaso, sɛ osuanyi no hu mbrɛ Bible mu ngyinadonsɛm a edze yɛ edwuma no si boa wo a, bi a iyi bɛhyɛ no nkuran ma oeesũasua wo. (1 Cor. 11:1) Hyɛ asɛm a Hanae a yeedzi kan akã noho asɛm no kãe no nsew. Ɔkãa dɛ: “Mubohun dɛ dza  murusũa no, ɔno ara na enuanom no so dze yɛ edwuma wɔ hɔn asetsena mu. Mubohun mbrɛ mibesi ahyɛ afofor nkuran, mbrɛ mibesi dze afofor hɔn mfom akyɛ hɔn nye mbrɛ mibesi ada ɔdɔ edzi. Aber nyina, nna wɔkã afofor ho nsɛmpa. Nna mepɛ dɛ musũasua hɔn.”

15. Ebɛn kwan do na Mbɛbusɛm 27:17 boa hɛn ma yehu siantsir a ɔsɛ dɛ yɛfa Bible suanyi bi nyɛnko aber a ɔba asafo nhyiamu no?

¹⁵ Fa osuanyi no nyɛnko. Aber a osuanyi no ba asafo nhyiamu no, kɔ do kyerɛ noho enyigye. (Phil. 2:4) Ebɛnadze ntsi na enye no mmbɔ nkɔmbɔ? Ibotum akamfo no wɔ nsesa ahorow a ɔreyɛ no ho, na ebisa no ne Bible adzesua, n’ebusua nye n’edwuma ho nsɛm. Naaso yɛ ahwɛyie na emmbisa no nsɛm bi a ɔbɛyɛ dɛ erefeefee ne nsɛm mu. Nkɔmbɔ a ɔtse dɛm no botum ama hom anyɛnkofa no aasɔ. Sɛ efa osuanyi no nyɛnko a, ebɔboa no ma oeenya nkɔenyim na oeetum abɔ esu. (Kenkan Mbɛbusɛm 27:17.) Seseiara, Hanae som dɛ daa kwampaaefo. Ɔrekã ber a ɔhyɛɛ ase dɛ ɔrokɔ asafo nhyiamu no ho asɛm no, ɔkãa dɛ: “Aber a mibenyaa anyɛnkofo wɔ asafo no mu no, nna mohwɛ kwan dɛ mobɔkɔ asafo nhyiamu dabaa, na sɛ maberɛ mpo a nna mokɔ. Anyɛnkofo afofor a minyae no maa m’enyi gyee, na iyi boaa me ma menye hɔn a wɔnnsom Jehovah no twaa anyɛnkofa mu. Nna mepɛ dɛ motwe bɛn Jehovah nye enuanom no kɛse. Dɛm ntsi, misii gyinae dɛ mobɔbɔ esu.”

16. Ebɛnadze fofor na ibotum ayɛ dze aboa Bible suanyi bi ma n’enyi aka asafo no mu?

¹⁶ Aber a osuanyi no kɔ do nya nkɔenyim na ɔyɛ nsesa ahorow no, boa no ma onhu dɛ ɔka asafo no ho. Ibotum ada ahɔhoyɛ su edzi dze aboa no wɔ dɛm kwan no do. (Heb. 13:2) Denis a ɔwɔ Moldova no kaa aber a nna wɔnye no sũa Bible no, na ɔkãa dɛ: “Nna enuanom no taa to nsa frɛ emi na me yer, na yɛnye hɔn kɔbɔ mu gye hɛn enyi. Nna wɔkã mbrɛ Jehovah esi aboa hɔn no ho asɛm kyerɛ hɛn. Iyi hyɛɛ hɛn nkuran. Bɔ a yɛnye enuanom no bɔe no boaa hɛn ma yɛbɛgyee dzii dɛ nna yɛpɛ dɛ yɛsom Jehovah na sɛ yɛyɛ dɛm a, yebenya asetsena pa.” Sɛ Bible suanyi no nya bɛyɛ ɔdawurbɔfo pɛr a, ibotum so ato nsa afrɛ no na enye no aabɔ mu akɔ asɛnka. Ɔdawurbɔfo bi a wɔfrɛ no Diego a ɔwɔ Brazil kãa dɛ: “Nna enuanom pii to nsa frɛ me ma menye hɔn bɔ mu kɔ asɛnka. Nna iyi yɛ kwan pa a medze bohu hɔn yie. Aber a meyɛɛ dɛm no, musũaa pii fii hɔn hɔ na metsee nka dɛ mabɛn Jehovah nye Jesus kɛse.”

17. Ebɛnadze na asafo mu mpanyimfo botum ayɛ dze aboa Bible esuafo?

¹⁷ Hom nnya ber mma Bible esuafo no. Asafo mu mpanyimfo, sɛ hom kyerɛ dɛ hom dɔ esuafo no na hom dwen hɔnho a, hom botum aboa hɔn ma woeenya nkɔenyim na woeetum abɔ esu. Ana hom botum agye ber nye Bible esuafo  no abɔ nkɔmbɔ dabaa wɔ asafo nhyiamu ase? Sɛ hom bɔ hɔn edzin frɛ hɔn a, hom bɛma wɔatse nka dɛ hom dwen hɔnho, tsitsir aber a wɔahyɛ ase ma mbuae wɔ asafo nhyiamu ase no. Ana hom botum ayɛ hom ber nhyehyɛɛ yie na hom nye ɔdawurbɔfo bi akɛyɛ ne Bible adzesua? Bi a hom benya nkantando kɛse wɔ osuanyi no do akyɛn dza nna hom susu no. Ɔkwampaaefo bi a wɔfrɛ no Jackie a ɔwɔ Nigeria no kãa dɛ: “Sɛ m’esuafo no mu piinara bohu dɛ onua a menye no baa hɔn nkyɛn no yɛ asafo mu panyin a, ɔyɛ a ɔyɛ hɔn nwanwa. M’esuafo no mu kor kãa dɛ: ‘Mo sɔfoe rennyɛ dɛm da. Esikafo nkotsee na ɔsera hɔn, ɔno mpo no gyedɛ wotua no kaw!’” Seseiara, dɛm osuanyi no ba asafo nhyiamu.

18. Asodzi a wɔdze ahyɛ asafo mu mpanyimfo nsa a wɔakã ho asɛm wɔ Asomafo Ndwuma 20:28 no, wobesi dɛn edzi ho dwuma?

¹⁸ Hom ntsetse Bible akyerɛkyerɛfo na hom nhyɛ hɔn nkuran. Asafo mu mpanyimfo, hom wɔ asodzi a no mu yɛ dur dɛ hom boa adawurbɔfo ma wotu mpon wɔ hɔn asɛnka edwuma no mu, na wɔbɛyɛ asɛmpakafo nye akyerɛkyerɛfo pa. (Kenkan Asomafo Ndwuma 20:28.) Sɛ ɔdawurbɔfo bi fɛr dɛ ɔbɛyɛ Bible adzesua aber a eka noho a, ibotum ayɛ adzesua no ama no. Jackie a yeedzi kan akã noho asɛm no kãa dɛ: “Asafo mu mpanyimfo no bisa me Bible esuafo no ho nsɛm dabaa. Sɛ mihyia nsɛndzendzen wɔ adzesua a menye Bible esuafo no yɛ mu a, wɔma me nyansahyɛ a ɔboa me.” Asafo mu mpanyimfo botum ayɛ pii dze ahyɛ akyerɛkyerɛfo nkuran na woeekenyan hɔn ma wɔaakɔ do ayɛ asɛnka edwuma no. (1 Thess. 5:11) Jackie toaa do dɛ: “Sɛ asafo mu mpanyimfo hyɛ me nkuran na wɔkã kyerɛ me dɛ hɔn enyi sɔ edwumadzen a meyɛ no a, m’enyi gye. Hɔn nsɛm a ɔtse dɛm no ma m’ahom ka moho tse dɛ mbrɛ ewia abɔ na enya nsu nwin bi abɔ egu w’akoma do. Sɛ wɔkamfo me a, ɔma minya ahotodo kɛse na ɔma minya enyigye wɔ Bible adzesua ahorow a meyɛ so mu.”​—Mbɛ. 25:25.

19. Ebɛn enyigye na hɛn nyinara botum enya?

¹⁹ Sɛ yennyi Bible suanyi seseiara mpo a, yebotum aboa obi ma oeenya nkɔenyim na oeetum abɔ esu. Yebotum dze hɛn nsɛm a yeesiesie no aboa ɔkyerɛkyerɛfo no aber a adzesua no rokɔ do no, naaso ɔnnsɛ dɛ yɛkasa pii. Sɛ esuafo no ba Ahendzi Asa do a, yebotum afa hɔn nyɛnko na yɛdze hɛn ndzeyɛɛ ayɛ nhwɛdo pa ama hɔn. Bio so, sɛ asafo mu mpanyimfo nya ber ma Bible esuafo no a, obotum ahyɛ hɔn nkuran. Afei so, sɛ asafo mu mpanyimfo tsetse Bible akyerɛkyerɛfo na wɔkamfo hɔn a, obotum ahyɛ hɔn so nkuran. Enyigye biara nnyi hɔ a ɔkyɛn iyi dɛ yebohu dɛ mboa kakraabi mpo a yɛdze boa obi no ama ɔaabɔdɔ hɛn Egya Jehovah na ɔrosom no!