1, 2. ¿Jara akaalinjainjanaka wanee wayuu ekirajaakai sünain tü Wiwüliakat süpüla woutiisain nia?

«KAMALAINSÜ maʼin tamüin shiʼipaʼaya tü tatüjakat sünainjee tü Wiwüliakat», müsü sünüiki Amy, kepiasü chaa Fiyi. Anuu sooʼomüin sünüiki: «Tayaawata aaʼu pansaain tü sümakat tü Wiwüliakat, nnojotpejeʼe tanouteʼerüin takuwaʼipa. Shia tanouteʼeraka anainjee takuwaʼipa aleewajiraain taya namaa na wawalayuukana jee woutiisaka taya mapa». Wayaawata aaʼu sünainjee sukuwaʼipa Amy choʼujaain wakaalinjain na ekirajaakana sünain tü Wiwüliakat süpüla kooʼomüin nanoula jee woutiisain naya.

² Eeshii süpüla wakaalinjain napüshuaʼa na jekenakana sünain anoujaa (Éf. 4:16, TNM). Anuu sünüiki wanee pürekutsoot kanüliaka Leilani, kepiasü chaa Vanuatu: «Saashin wayuu, eʼreechi miyoʼuwaa wanee jintüi nükaalinjünüle natuma na kepiakana pejepünaa nünain. Müsia neʼe sukuwaʼipa wekirajapa wayuu sünain tü Wiwüliakat, wakaalinjainjachi nia süpüla nunoujainjachin wanaa wamaa». Jamüshijaʼa wanee jintüi, ekirajünüshi natuma nüpüshi, natuma na naʼaleewainyuukana jee na profesorkana. «Maaʼaya pia tachonchee», münawalinjachi amüin otta choʼujaasü nikirajünüin süpüla nütüjain süpüleerua nukuwaʼipa. Shiainjatü naaʼinraka tia na wawalayuukana süpüla nakaalinjain chi wayuu ekirajaakai sünain tü Wiwüliakat süpüla woutiisain nia. Aashajaanawalinjachi amaa, «anasü tü paainjakat», münawalinjachi amüin jee anainjatü nakuwaʼipa na wawalayuukana nuʼupala (Prov. 15:22).

3. ¿Kasa watüjaka sünainjee tü sümakat Ana, Leilani otta tü nümakat Dorín?

³ ¿Jamüsü nnojoluinjatka mojushiin wamüin nakaalinjeere na wawalayuukana na wekirajüinkana? Anuu sünüiki wanee pürekutsoot pesiaat, Ana sünülia, kepiasü chaa Moldavia: «Wainma tü kasa ekirajünüinjatkalü anain wanee wayuu ekirajaaka sünain tü Wiwüliakat. Nnojotsüjeseʼe süpüla sükaalinjünüin sutuma waneesia neʼe wayuu». Anuu nünüiki wanee pürekutsoot pesiaat kanüliakai  Dorín: «Eesü neweetirüle pütchi analuʼut na wawalayuukana atanatka naaʼin na wekirajüinkana». Anuu sooʼomüin tü sümakat Leilani nnojoluinjatka mojushiin anainjee wamüin nakaaliinjünüin na wekirajüinkana: «Waaʼinrüle tia nayaawateerü aaʼu na wekirajüinkana wayain na anoujashii shiimainshiikana saaʼujee alin naya napüla na wawalayuukana jee kamaneein naya namüin» (Juan 13:35).

4. ¿Kasa wekirajaainjatka anain sünain ekirajaayakat tüü?

⁴ Eeshiijaʼa wasakirüle waaʼin: «¿Kasache taaʼinrajatka süpüla takaalinjain nikirajüin wanee wawala?». Sünain ekirajaayakat tüü, wekirajaweerü anain tü waaʼinrajatkat nuunejaapa waya wanee wawala sünain ekirajaa wanee wayuu otta tü waaʼinrajatkat nuutkajaale wamaa nikirajüin wanee wawala. Wekirajaweerü anain tü eekat süpüla naaʼinrüin na laülaashiikana süpüla nakaalinjain na ekirajaakana sünain tü Wiwüliakat süpüla woutiisain naya.

5. ¿Kasa jülüjainjatka waaʼin wounejaanüle nutuma wanee wawala sünain ekirajaa wayuu?

⁵ Wanee wawala ekirajakai wanee wayuu sünain tü Wiwüliakat, niainjachi ekirajakai chia wayuukai süpüla niyaawatüin saaʼu tü nünüikikat Maleiwa. Nuunejaale waya wanee wawala sünain ekirajaa wayuu, jülüjainjatü waaʼin wakaalinjainjachin nia (Ecl. 4:9, 10). ¿Kasache waaʼinrajatka soʼunnaa nikirajüin wanee wayuu chi wawalakai?

6. ¿Kasa anaka süpüla waaʼinrüin saashin Proverbios 20:18 wounejaanapa sünain ekirajaa wayuu?

⁶ Yapa waya. Wasakira palajana chi wawalakai süchiki nukuwaʼipa chi nikirajüinkai (paashajeʼera Proverbios 20:18). Eeshi süpüla wasakirüin nia kasain nunoujain anain chi nikirajüinkai, jeʼrain nuuyase, jaraliin nüpüshin, kasain nikirajaainjatüin anain chia wayuukai otta kasainjatüin waküjain nümüin süpüla watütüleʼerüin naaʼin. Jülüjainjatpejeʼe waaʼin nnojoluin süpüla nüküjainjatüin wamüin chi wawalakai süpüshuaʼaleʼeya nukuwaʼipa chia nikirajüinkai. Tia shia tü saaʼinrakat wanee misioneera kanüliaka Joy suunejaapa na wawalayuukana sünain ekirajaa wayuu. Anuu sünüiki: «Natüjaapa saaʼu na wawalayuukana nakuwaʼipa na tekirajakana sünain tü Wiwüliakat, kapülasü naaʼin nakuwaʼipa otta natüjaa aaʼu tü nanüikinjatkat sünain ekirajawaa».

7. Nuunejaale waya wanee wawala sünain ekirajaa wayuu, ¿jamüsü yapainjatka watuma tü ekirajaanajatkalü anain?

⁷ Nuunejaapa waya wanee wawala sünain ekirajaa wayuu, anasü yapale watuma tü ekirajaanajatkalü anain (Esd. 7:10). Anuu nünüiki Dorín: «Talatüsü taaʼin yapale tü ekirajaanajatkalü anain nutuma chi wawala tounejaakai, jama eein süpüla nükaalinjain taya sünain ekirajaa». Müle shia watuma niyaawateerü aaʼu nikirajüin chi wawalakai yapain watuma tü  pütchikat. Isale wachiki yapain watuma tü wekirajaainjatkalü anain, anasü wanaʼlaale sümüin tü saashajaakalü achiki süpüla wayaawatüin saaʼu süpüshiyaakaije.

8. ¿Kasa jülüjainjatka waaʼin suchuntunüle wamüin woʼuraajüinjanain sünain ekirajaa wayuu?

⁸ Choʼujaasü woʼuraajüinjanain namaa na wekirajüinkana süpülapünaa wekirajaain. Yapainjatüjeseʼe watuma tü wanüikinjatkat nuchuntule wanee wawala woʼuraajüinjanain, mayaa wayaawateerü aaʼu kasain wachuntajatüin napüleerua na ekirajaakana (Sal. 141:2). Eesü wanee wawala kanüliaka Hanae chejeʼewat Japón, sotusü saaʼin tü suchuntakat nümüin Maleiwa wanee wawala oʼunapuʼuka sümaa tü wawala ekirajakat shia sünain tü Wiwüliakat, müsü shia: «Tayaawata aaʼu sünainjee tü sünüikikat aleewashaatain shia nümaa Jeʼwaa, meesü takuwaʼipa maʼaka saaʼin shiaka. Anasü maʼin taaʼin sutuma suchuntuin tanülia suʼuraajapa nümüin Maleiwa».

9. Saashin Santiago 1:19, ¿kasa waaʼinrajatka süpüla wakaalinjain wanee wawala nikirajapa wayuu?

⁹ Wakaalinja naya sünain ekirajaa. Anuu sünüiki wanee pürekutsoot pesiaat kanüliaka Omamuyovbi, kepiaka Nigeria: «Soʼunnaa nikirajüin wanee wawala wanee wayuu sünain tü Wiwüliakat, anasü jülüjale naaʼin chi nuʼuyaajanakai tü pütchi ekirajünakalü anain. Eesü süpüla nüküjain wanee pütchi analuʼut nümüin chi nikirajüinkai, nnojolinjachipajaʼa asoutuin pejeewa nia süka nnojolin niain ekirajüin». ¿Kasa wayaawateetka atuma anale süpüla wasoutuin soʼunnaa nikirajünüin wanee wayuu otta jamüinjatüin wanüiki? (Prov. 25:11). Jülüja waaʼin nünüiki chi wawala ekirajakai sümaa nünüiki chi ekirajünakai (paashajeʼera Santiago 1:19). Waaʼinrüle tia, wakaalinjeena naya sünain ekirajaa. Nnojoishii wayainjanain yootoshaanain otta nnojoishii waya yootuinjanain süchiki wanee kasa nnojotka sünainpünaain tü ekirajünakalü anain. «Jiatta paa», nnojoishii makuʼu müinjanain waya nümüin chi ekirajüshikai. Eepejeʼe süpüla wasakirüin jee wapansaajüin wanee pütchi nnojotka niyaawatüin aaʼu chi nikirajüinkai. Eeshijaʼa nnojorüle müin wakaalinjakai naaʼin chi wawalakai, eepejeʼe süpüla wakooʼomüinrüin nunoula chi nikirajüinkai waküjale pütchi analuʼut nümüin jee kapürale waaʼin nukuwaʼipa.

10. ¿Jamüsü jalouijeetka nümüin chi wayuu ekirajaakai waküjale jamakuwaʼipaliin wanoujaka?

¹⁰ Waküja süchiki tü wakuwaʼipakat sünain anoujaa. Eesü süpüla waküjain nümüin chi ekirajaakai sünain tü Wiwüliakat jamakuwaʼipaliin waya süpüla woutiisain, kasain eejiraain amaa waya otta kasain nükaalinjain anain waya Jeʼwaa (Sal. 78:4, 7). Eesüjaʼa sukalinjeechire tia wanee ekirajaakai sünain tü Wiwüliakat süpüla sükooʼomüinraain nunoula jee sütütüleʼerüin naaʼin süpüla woutiisain nia jaʼitasü kapüleein tü alatakat nümüin (1 Ped. 5:9). Eeshi wanee pürekutsoot kanüliakai Gabriel, kepiakai chaa Brasil, anuu nünüiki süchiki tü akaalinjakat nia nuʼttaiwaʼaya sünain ekirajawaa sünain tü Wiwüliakat:  «Tayaawata aaʼu sutuma tü namakat na wawalayuukana nütüjaain saaʼu Jeʼwaa tü oʼttaakat wamüin. Nountuin naya wawalayuukana noʼttaain süchikumüin tü alatakat namüin süka nükaalinjain naya Jeʼwaa, meechia tayaʼaya».

11, 12. ¿Jamüshii kamaneeinjanaka waya nümüin nikirajüin chi wawalakai nüntapa sünain tü outkajawaakat?

¹¹ Kooʼomüinjeerü nunoula wanee wayuu jee woutiisamaateechi nia nuutkajaale waneepia wamaa (Heb. 10:24, 25). Nuutkajaapa wamaa wanee wayuu soʼu tü palajatkat nukua, eeshii süpüla watütüleʼerüin naaʼin süpüla ayatüin naaʼinrüin tia waneepia. ¿Jamüinjatü sukuwaʼipa watuma?

¹² Kamanee waya nümüin (Roma 15:7). Kamaneere waya nümüin chi wayuu ekirajaakai nüntapa sünain tü outkajawaakat, eeshiijaʼa ayateechire nuutkajaain wamaa. Kamanee waya nümüin jee weʼraajira nia na wawalayuukana. Weʼrüle kupaain chi wawala ekirajakai nia jee nnojoiyüire nüntüin, yooto waya nümaa. Jülüja waaʼin tü nümakat wamüin jee kapüla nia waaʼin. ¿Kasa anasü niʼreetka suluʼujee tia? Jülüjataa waaʼin tü nümakat Dimitri, eetaairü maʼaka jeʼra juya süchikijee woutiisain jee aʼyataashi nia maaʼulu neʼipajee na laülaashiikana. Anuu nünüiki süchiki tü palajatkat nukua sünain tü outkajawaakat: «Tantapa eemüin tü Piichi Outkajaaleekat, nnojoishi taya ekerotuin süka mmoluin taya, niʼraka taya wanee wawala, nürütkaaka tanainmüin ‹jalaichi›, nümaka tamüin. Ponusü maʼin taaʼin süka wainmain na wawalayuu asakakana taya, ‹kasataalejeseʼe woutkajaain weinshi›, tamaka süka kamalain maʼin tamüin tia teʼrakat».

13. ¿Kasa niyaawateetka aaʼu chi ekirajaakai anale wakuwaʼipa nüpüleerua?

¹³ Ana wakuwaʼipa nüpüleerua. Anale wakuwaʼipa nüpüleerua chi wayuu ekirajaakai sünain tü Wiwüliakat, niyaawateerü aaʼu shiimain tü wanoujakalü anain (Mat. 5:16). Anuu nünüiki wanee pürekutsoot kanüliakai Vitali, chejeʼewai Moldavia: «Wanaa sümaa teʼrüin anain nakuwaʼipa na wawalayuukana jee waneejatüin tü jülüjakat naaʼin suulia tü jülüjakat naaʼin na wayuu manoujainsaliikana, tayaawata aaʼu nayain na anoujashii shiimainshiikana na aküjaliikana pütchi nüchiki Jeʼwaa».

14. ¿Kasa keeʼireejeetka naaʼin chi ekirajaakai müleka anale wakuwaʼipa nuʼupala?

¹⁴ Woutiiseere wanee wayuu ekirajaakai sünain tü Wiwüliakat, naaʼinrüin tü nikirajaakalü anain. Nnojotpejeʼe mapüleein tia. Shiasaʼa niʼrapa anain wakuwaʼipa sutuma waaʼinrüin tü sümakat tü Wiwüliakat, keeʼireejeerü naaʼin naaʼinrüin tia (1 Cor. 11:1). Anuu sünüiki Hanae, tü wachuntayütkalü anülia paalapa: «Teʼrüin na wawalayuukana naaʼinrüin tü tekirajaakalü anain suluʼujee tü Wiwüliakat, natütüleʼerüin saaʼin wayuu, motuin naaʼin tü kasa mojusü aainjünakat namüin jee alin napüla wayuu otta  naküjain waneepia kasa anasü süchiki wayuu. Müsüjeseʼe meein takuwaʼipa maʼaka nayakana».

15. Saashin Proverbios 27:17, ¿jamüshii aleewainjanaka waya namaa na ekirajaakana sünain tü Wiwüliakat outkajaakana wamaa?

¹⁵ Aleewaa waya nümaa. Kapülainjachi waaʼin chi ekirajaakai sünain tü Wiwüliakat nüntaiwaʼaya sünain tü outkajawaakat (Filip. 2:4). Eeshi süpüla wasakirüin nia sünain nüpüshi, kasain niʼyataain anain otta jamüin naaʼin sutuma nikirajaain sünain tü Wiwüliakat. Nnojoipejeʼe wasakiijakuʼu wamüinjachin nia süpüla watüjaain saaʼu süpüshuaʼa tü alatakat nümüin. Eesü süpüla waküjain nümüin talatüin waaʼin süka niiʼiratüin nukuwaʼipa. Waaʼinrüle tia, aleeweena maʼin waya nümaa jee wakooʼomüinreerü nunoula süpüla woutiisain nia (paashajeʼera Proverbios 27:17). Hanae pürekutsoot rekulaat maaʼulu, süküjain jamüin saaʼin wanaa sümaa suutkajaʼawalin. Anuu sünüiki: «Aleewapa maʼin taya namaa na wawalayuukana, oʼuneesü maʼin taya waneepia sünain tü outkajawaakat, jaʼitairü mapüsain taya ayatüsia taya oʼunuin. Talatüsü taya namaa na jekenakana taʼaleewain, nnojoluitpakalaka taya aleewain namaa na nnojoliikana wanaawain aaʼin tamaa. Woutiisaka taya süka aleeweein taya nümaa Jeʼwaa otta namaa na wawalayuukana».

16. ¿Kasa maa eeka süpüla waaʼinrüin süpüla talatüin naaʼin na ekirajaashiikana namaa na wawalayuukana?

¹⁶ Sümaʼinruʼu sunoutaain nukuwaʼipa wanee ekirajaakai sünain tü Wiwüliakat, anainjatü naaʼin watuma namaa na wawalayuukana. Eeshi süpüla wounejaʼawalin nia wepialuʼumüin jee sünain aaʼinraa kasa shiale (Heb. 13:2). Anuu nünüiki wanee wawala, Denís nünülia, kepiakai chaa Moldavia: «Tekirajaaiwaʼaya sünain tü Wiwüliakat, nounejaʼawalin taya na wawalayuukana sümaa taʼwayuuse süpüla walatirüin kaʼi namaa. Atütülaasü maʼin waaʼin natuma süka naküjain wamüin süchiki tü kasa anasü naaʼinrakat Jeʼwaa napüleerua. Tayaawata aaʼu sünainjee tia anain maʼin aʼyatawaa nümüin Jeʼwaa otta aneerüin wakuwaʼipa sutuma tia». Kettaapa wanee wayuu ekirajaakai sünain tü Wiwüliakat süpüla aküjaa pütchi, eeshi süpüla wamaain nia sünain aküjaa pütchi. Anuu nünüiki wanee wawala Diego nünülia, chejeʼewai Brasil: «Toʼttaiwaʼaya sünain aküjaa pütchi, wainma na wawalayuu ounejaakana taya süpüla aküjaa pütchi, teʼraajakalaka maʼin naya suluʼujee tia. Wainma kasa tatüjaka nanainjee otta aleewashi maʼin taya nümaa Jeʼwaa otta Jesuu sünainjee tia».

17. ¿Kasa eeka süpüla naaʼinrüin na laülaashiikana napüleerua na ekirajaakana sünain tü Wiwüliakat?

¹⁷ Jütütüleʼera naaʼin na ekirajaakana sünain tü Wiwüliakat. Jiakana laülaashiikana, eeshii süpüla jükaaliinjain na ekirajaakana sünain tü Wiwüliakat süpüla woutiisain naya kapürale jaaʼin naya jee aire naya jüpüla. Anashii yootowaire jia motsomüin namaa sünain tü outkajawaakat.  Aneerü naaʼinya juchuntule nanülia, shialeekajaʼa nayaletpa najapü sünain tü outkajawaakat. Anasü jükatarüle kaʼi süpüla juʼunüin nümaa wanee wawala sünain ekirajaa wayuu, jaaʼinrüle tia, atütülaajeerü maʼin naaʼin na ekirajaakana sünain tü Wiwüliakat. Anuu sünüiki wanee pürekutsoot, Jackie sünülia, kepiaka chaa Nigeria: «Wainma na tekirajüin ponokana aaʼin laülaashin chi tawala tamaakai. Anuu nünüiki wanee tekirajüin: ‹Nnojorüleejaʼa süpüla naaʼinrüinjatüin tia chi pastootkai, süka nayain neʼe noʼunuin epialuʼumüin na washinnuukana shiyaaluʼu nanneetse›». Outkajaaichipa maaʼulu yaa chia wayuukai.

18. ¿Kasa naaʼinrajatka na laülaashiikana süpüla nekeraajüin tü sümakat Aluwataaushikana 20:28?

¹⁸ Jikirajaa otta jütütüleʼera naaʼin na wawalayuukana. Jiakana laülaashiikana, aneekünüshii jia süpüla jikirajüin na wawalayuukana süpüla natüjain aküjaa pütchi otta ekirajaa wayuu (paashajeʼera Aluwataaushikana 20:28). Müle mmotkai naaʼin wanee wawala sünain ekirajaa wayuu juʼupala, «anashi tayale ekirajüin», jüma nümüin. Anuu sünüiki Jackie süchikuaʼa: «Nasakirawalin taya na laülaashiikana nanain na tekirajüinkana, shiasaʼa eere wanee kasa isaka tachiki, nakaalinjamaatüin taya sünain». Makalaka eein süpüla sütütülaain naaʼin na wawalayuukana natuma na laülaashiikana süpüla ayatüinya naya sünain ekirajaa wayuu (1 Tes. 5:11). Anuu joo sünüiki Jackie: «Anasü taaʼin süka natütüleʼerawalin taya na laülaashiikana otta sutuma kojutuin namüin tü taʼyataainkat, mataasü süsamalaakai taaʼin sutuma nanüiki, maʼaka süsamalüin taaʼin wüin saamatüsü. ‹Tounteerü tia›, maa müsü taaʼin taleʼeruʼu sümaa talatüin taaʼin» (Prov. 25:25).

19. ¿Kasa eeka süpüla talatüin atuma waaʼin?

¹⁹ Eeshiijaʼa nnojoliire wekirajüin wayuu sünain tü Wiwüliakat, eepejeʼe süpüla watütüleʼerüin naaʼin nekirajüin na wawalayuukana süpüla kooʼomüin nanoula. Waashajaa süchiki wanee pütchi atütüleʼereetka naaʼin nikirajüin chi wawalakai, nnojoliinjanapejeʼe wayain alanaʼaleein sünain yootoo wanaa sümaa nikirajüin. Aleewaa waya namaa na ekirajaakana sünain tü Wiwüliakat noutkajaapa wamaa otta ana wakuwaʼipa napüleerua. Yootule na laülaashiikana namaa na ekirajaakana sünain tü Wiwüliakat süchiki tü kasa anasü naaʼinrakat, atütülaajeerü naaʼin sutuma tia. Atütülaajeerü naaʼin na wawalayuukana nekirajünüle sünain ekirajaa wayuu jee nepelisitaajünüle natuma na laülaashiikana. Talatashaateena waya wakaalinjale nekirajüin na wawalayuukana süpüla alinjachin Jeʼwaa napüla jee naʼyataain nümüin.