1-2. Mũrutwo wa Bibilia ateithagĩrĩrio nũũ nginya agakinyĩrĩra kũbatithio?

AMY ũrĩa ũikaraga Fiji ooigire ũũ: “Nĩ ndakenagĩra maũndũ marĩa nderutaga kuuma Bibilia-inĩ. Nĩ ndamenyaga ũyũ nĩguo ũhoro wa ma. No rĩrĩa ndambĩrĩirie kũnyitanĩra na aarĩ na ariũ a Ithe witũ, nĩguo ndahotire gwĩka mogarũrũku marĩa maabataranagia na nginya ngĩbatithio.” Ũhoro ũcio wa Amy ũratũruta ũndũ ũyũ wa bata: Mũrutwo wa Bibilia no akũre kĩĩroho na ihenya nginya akinyĩrĩre kũbatithio, angĩteithĩrĩrio nĩ andũ arĩa angĩ kĩũngano-inĩ.

² Ahunjia othe kĩũngano-inĩ no mateithĩrĩrie arutwo a Bibilia gũkũra kĩĩroho. (Ef. 4:16) Mwarĩ wa Ithe witũ ũmwe painia wĩtagwo Leilani kuuma Vanuatu ooigire ũũ: “Kwĩragwo mwana areragwo nĩ itũũra rĩothe. Ũguo noguo gũthiaga harĩ gũtua andũ arutwo. Kĩũngano gĩothe nĩ kĩnyitanagĩra harĩ gũteithia mũndũ gũka ũhoro-inĩ wa ma.” Andũ a famĩlĩ, arata, na arutani, othe nĩ manyitaga itemi harĩ gũteithĩrĩria mwana nĩguo akũre. Mekaga ũguo na njĩra ya gwĩkĩra mwana ũcio ngoro na kũmũruta maũndũ ma bata. Na njĩra o ta ĩyo, ahunjia no mahe arutwo a Bibilia ũtaaro, mamekĩre ngoro, na mamaigĩre kĩonereria kĩega, na ũndũ ũcio ũmateithie makinyĩrĩre kũbatithio.—Thim. 15:22.

3. Ũreruta atĩa kuumana na ciugo cia Ana, Dorin, na Leilani?

³ Mũhunjia ũrĩ na mũrutwo wa Bibilia agĩrĩirũo gũkena nĩkĩ hĩndĩ ĩrĩa ahunjia arĩa angĩ marateithĩrĩria mũrutwo ũcio? Painia ũmwe wa mwanya wĩtagwo Ana kuuma Moldova ooigire ũũ: “Ti ũndũ mũhũthũ harĩ mũndũ ũmwe kũhingia mabataro mothe ma mũrutwo rĩrĩa ambĩrĩria gũkũra kĩĩroho.” Dorin ũrĩa ũtungataga arĩ painia wa mwanya bũrũri-inĩ o ũcio nake ooigire: “Kaingĩ ahunjia moigaga maũndũ o na itarĩ ndeciria marĩa  mahutagia ngoro cia arutwo a Bibilia.” Leilani akĩgweta ũndũ ũngĩ ũbatiĩ gũtũma tũkenere ũteithio ũrĩa tũraheo ooigire: “Wendo ũrĩa mũrutwo angĩonio no ũtũme amenye kũna atĩ ithuĩ nĩ ithuĩ ndungata cia Jehova.”—Joh. 13:35.

4. Tũkwarĩrĩria maũndũ marĩkũ gĩcunjĩ-inĩ gĩkĩ?

⁴ O na kũrĩ ũguo no wĩyũrie atĩrĩ, ‘Ingĩhota atĩa gũteithia mũrutwo wa mũhunjia ũngĩ akũre kĩĩroho?’ Rekei twarĩrĩrie ũrĩa tũngĩka rĩrĩa twanyitwo ũgeni nĩ mũhunjia ũngĩ tũkerute na mũrutwo wake, na ũrĩa tũngĩka rĩrĩa mũrutwo wa Bibilia ambĩrĩria gũka mĩcemanio-inĩ. Ningĩ nĩ tũkuona ũrĩa athuri a kĩũngano mangĩteithĩrĩria arutwo a Bibilia nginya makinyĩrĩre kũbatithio.

5. Wĩra waku nĩ ũrĩkũ rĩrĩa wanyitwo ũgeni nĩ mũhunjia mũthiĩ mũkerute na mũrutwo wake?

⁵ Mwarimũ wa Bibilia nĩwe ũkoragwo na ũigĩrĩrĩki wa gũteithia mũrutwo ataũkĩrũo nĩ Kiugo kĩa Ngai. Mũhunjia angĩkũnyita ũgeni mũthiĩ mũkerute na mũrutwo wake, wĩra waku ũbatiĩ gũkorũo arĩ kũmũteithĩrĩria. (Koh. 4:9, 10) No rĩrĩ, ũngĩka atĩa nĩguo ũteithie mũhunjia ũcio mwathiĩ kwĩruta na mũrutwo?

6. Ũngĩhũthĩra atĩa ũtaaro wa Thimo 20:18 rĩrĩa wanyitwo ũgeni nĩ mũhunjia ũngĩ mũkerute na mũndũ Bibilia?

⁶ Wĩhaarĩrie mbere ya gũthiĩ kũrĩ mũrutwo. Wa mbere, ĩra mwarimũ akwĩre ũhoro mũnini ũngĩgũteithia kũmenya mũrutwo. (Thoma Thimo 20:18.) No ũmũrie ũũ: “Nĩ maũndũ marĩkũ ũĩ megiĩ mũrutwo ũcio? Mũrathoma gĩcunjĩ kĩrĩkũ? Nĩ ũndũ ũrĩkũ ũrenda mũrutwo anyite gĩcunjĩ-inĩ kĩu? Hihi nĩ harĩ ũndũ njagĩrĩirũo kana itagĩrĩirũo kuuga kana gwĩka tũkĩĩruta nake? Ingĩkĩra mũrutwo ũcio ngoro atĩa athiĩ na mbere gũkũra kĩĩroho?” Hatarĩ nganja, mwarimũ ndangĩkwĩra maũndũ ma hitho megiĩ mũrutwo, no maũndũ marĩa egũkwĩra no magũteithie. Mwarĩ wa Ithe witũ Joy ũrĩa ũtungataga arĩ mishonarĩ, nĩ aragĩrĩria maũndũ macio hamwe na ahunjia arĩa maramũtwara kũrĩ arutwo ake. Ooigire ũũ: “Kwarĩrĩria maũndũ macio hamwe na ũrĩa ũrandwara kwĩruta na mũrutwo, nĩ kũmũteithagia kũmenya maũndũ megiĩ mũrutwo ũcio na maũndũ marĩa angiuga rĩrĩa tũreruta.”

7. Wagĩrĩirũo kũhaarĩria nĩkĩ rĩrĩa mũrathiĩ kwĩruta na mũrutwo wa mũhunjia ũngĩ?

⁷ Rĩrĩa wanyitwo ũgeni mũthiĩ mũkerute na mũrutwo wa Bibilia nĩ wega kũhaarĩria harĩa mũgũthiĩ gũthoma. (Ezar. 7:10) Mũrũ wa Ithe witũ Dorin ũrĩa ũkũgwetetwo ooigire ũũ: “Nĩ ngenaga hĩndĩ ĩrĩa mũhunjia ũrĩa nyitĩte ũgeni ahaarĩria harĩa tũgũthiĩ kwĩruta na mũrutwo. Ũndũ ũcio nĩ ũmũteithagia kuuga maũndũ mekũguna mũrutwo.” Ũndũ ũcio ningĩ nĩ ũteithagia mũrutwo kuona atĩ inyuerĩ nĩ mũhaarĩirie, na kwoguo mũkamũigĩra kĩonereria kĩega. O na ũngĩaga kũhaarĩria na njĩra ndikĩru harĩa mũgũthoma, tigĩrĩra atĩ nĩ wahaarĩria maũndũ marĩa manene.

8. Ũngĩka atĩa nĩguo mahoya maku makorũo na ũguni harĩ mũrutwo wa Bibilia?

 ⁸ Mahoya nĩ ma bata harĩ wĩruti wa Bibilia na kwoguo mũhunjia angĩkwĩra nĩ ũkũhoithia, wĩcirie kabere maũndũ marĩa ũkũgweta mahoya-inĩ. Ũngĩka ũguo no ũhote kũhoithia mahoya mekũhutia mũrutwo ngoro. (Thab. 141:2) Hanae ũrĩa ũikaraga Japan, no aririkanaga mahoya marĩa maahoithagio nĩ mwarĩ wa Ithe witũ ũmwe mookaga na mwarimũ wake kũmũruta Bibilia. Ooigire ũũ: “Mahoya make nĩ maatũmaga njigue ũrĩa arĩ na ũrata mũrũmu hamwe na Jehova na ngenda kũhaana take. Ningĩ rĩrĩa agweta rĩĩtwa rĩakwa mahoya-inĩ, ũndũ ũcio nĩ watũmaga njigue atĩ nĩ nyendetwo.”

9. Kũringana na Jakubu 1:19, nĩ atĩa ũngĩka nĩguo ũteithĩrĩrie mwarimũ akĩĩruta na mũrutwo wake?

⁹ Teithĩrĩria mwarimũ mũkĩĩruta na mũrutwo. Mwarĩ wa Ithe witũ Omamuyovbi ũrĩa ũtungataga arĩ painia wa mwanya bũrũri-inĩ wa Nigeria ooigire ũũ: “Mũhunjia ũrĩa ũnyitĩtwo ũgeni nĩ agĩrĩirũo gũthikĩrĩria wega hĩndĩ ĩrĩa mwarimũ mareruta na mũrutwo wake. Nĩ anyitanagĩra ndeereti-inĩ o na gũtuĩka ndaragia mũno tondũ nĩ aririkanaga atĩ mwarimũ nĩwe ũrĩ na ũigĩrĩrĩki wa gũtongoria wĩruti ũcio.” Ũngĩmenya atĩa hĩndĩ ĩrĩa wagĩrĩirũo kwaria na nĩ maũndũ ta marĩkũ ũngĩgweta? (Thim. 25:11) Thikagĩrĩria na kinyi rĩrĩa mwarimũ na mũrutwo mararanĩria. (Thoma Jakubu 1:19.) Ũngĩka ũguo, norĩo tu ũngĩhota gũteithĩrĩria hĩndĩ ĩrĩa yagĩrĩire. O na kũrĩ ũguo, nĩ wagĩrĩirũo kwamba gwĩciria ũtanaria. Kwa ngerekano, ndwagĩrĩirũo kwaria mũno, gũtinia mwarimũ hĩndĩ ĩrĩa arageria gũtaarĩria ũndũ mũna, kana kwambĩrĩria kwarĩrĩria ũndũ ũngĩ ngũrani na ũrĩa mũraarĩrĩria. No no ũteithie mũrutwo kũnyita ũndũ ũrĩa ũrarĩrĩrio na njĩra ya kwaria na njĩra nguhĩ, kũruta ngerekano, kana kũũria kĩũria. Rĩngĩ narĩo, no ũigue atĩ ndũrabatara kuongerera maũndũ makĩria megiĩ ũndũ ũrĩa ũrarĩrĩrio. No ũngĩgaathĩrĩria mũrutwo na ũmuonie atĩ nĩ ũramũrũmbũiya, no ũmũteithie gũthiĩ na mbere gũkũra kĩĩroho.

10. Maũndũ marĩa wĩyoneire mangĩteithia mũrutwo wa Bibilia atĩa?

¹⁰ Mũtaarĩrie maũndũ marĩa wĩyoneire. Ũngĩona kwagĩrĩire, no ũtaarĩrie mũrutwo na njĩra nguhĩ ũrĩa werutire ũhoro wa ma, ũrĩa wahotire gũtooria ũndũ mũna mũritũ, kana ũrĩa wonete Jehova agĩgũteithia ũtũũro-inĩ waku. (Thab. 78:4, 7) Kũigua maũndũ ta macio no gũkorũo na ũteithio mũnene harĩ mũrutwo. Maũndũ macio no mekĩre wĩtĩkio wake hinya, kana mamwĩkĩre ngoro athiĩ na mbere nginya akinyĩrĩre kũbatithio. Ningĩ no mamũteithie kuona ũrĩa angĩhiũrania na igerio angĩkorũo akĩgerera. (1 Pet. 5:9) Mũrũ wa Ithe witũ wĩtagwo Gabriel ũrĩa ũtungataga arĩ painia bũrũri-inĩ wa Brazil, nĩ aririkanaga kĩrĩa kĩamũteithirie rĩrĩa eerutaga Bibilia. Ooigire ũũ: “Kũigua maũndũ marĩa ariũ a Ithe witũ meeyoneire, nĩ kwandeithirie kuona atĩ Jehova nĩ onaga moritũ  marĩa tũracemania namo. Ũndũ ũcio wandeithirie kuona atĩ angĩkorũo nĩ maatooririe, o na niĩ no ndoorie.”

11-12. Mũrutwo wa Bibilia angĩũka mũcemanio-inĩ twagĩrĩirũo kũmũnyita ũgeni tũcanjamũkĩte nĩkĩ?

¹¹ Nĩguo mũrutwo akũre kĩĩroho nginya akinyĩrĩre kũbatithio, nĩ agĩrĩirũo gũthiaga mĩcemanio ya kĩũngano ategũtĩrĩria. Gwĩka ũguo no gũkorũo na ũguni mũnene harĩ we. (Ahib. 10:24, 25) Kaingĩ, mwarimũ nĩwe ũnyitaga mũrutwo ũgeni mũcemanio-inĩ wake wa mbere. Oka mũcemanio, ithuothe no tũmwĩkĩre ngoro athiĩ na mbere gũkaga Nyũmba-inĩ ya Ũthamaki. Tũngĩka ũguo na njĩra ta irĩkũ?

¹² Nyita mũrutwo ũgeni ũkenete. (Rom. 15:7) Mũrutwo wa Bibilia angĩnyitwo ũgeni wega mĩcemanio-inĩ, ũndũ ũcio no ũtũme erirĩrie gũkaga Nyũmba-inĩ ya Ũthamaki. Mũgeithie ũcanjamũkĩte na ũmũmenyithanie na andũ arĩa angĩ na njĩra ĩgũtũma aigue aiganĩire. Ndũgatue atĩ mwarimũ wake nĩ ekũrũmbũyania nake tondũ no akorũo nĩ acereirũo, kana akorũo na mawĩra mangĩ araruta Nyũmba-inĩ ya Ũthamaki. Thikĩrĩria na kinyi maũndũ marĩa mũrutwo aroiga na ũmuonie atĩ nĩ ũramũrũmbũiya biũ. Kũnyita mũrutwo ũgeni ũcanjamũkĩte kũngĩkorũo na ũguni ũrĩkũ? Ta wĩcirie ũhoro wĩgiĩ Dmitrii ũrĩa wabatithirio mĩaka ĩigana ũna mĩhĩtũku na rĩu atungataga arĩ ndungata ya kĩũngano. Akĩaria ũhoro wĩgiĩ rĩrĩa aathiire mũcemanio-inĩ riita rĩake rĩa mbere ooigire ũũ: “Mũrũ wa Ithe witũ ũmwe aangorire ndũgamĩte nja wa Nyũmba ya Ũthamaki ndĩ na guoya na akĩnjarĩria na njĩra ya wendo akĩnjĩra tũingĩranie nake. Andũ aingĩ nĩ mookire kũngeithia na ũndũ ũcio ũkĩngegia mũno. Nĩ ndendire ũndũ ũcio mũno nginya ngĩambĩrĩria kwĩĩra kaba kũngĩkoragwo na mũcemanio ta ũcio o mũthenya. Ndioimĩte nyonete ũndũ ta ũcio handũ hangĩ o hothe.”

13. Kĩonereria gĩaku kĩega kĩngĩkorũo na ũguni ũrĩkũ harĩ mũrutwo wa Bibilia?

¹³ Iga kĩonereria kĩega. Kĩonereria gĩaku kĩega no gĩteithie mũrutwo wa Bibilia kuona atĩ ithuĩ nĩ ithuĩ Akristiano a ma. (Mat. 5:16) Mũrũ wa Ithe witũ Vitalii ũrĩa ũtungataga arĩ painia bũrũri-inĩ wa Moldova ooigire ũũ: “Nĩ ndaaroraga ũrĩa andũ kĩũngano-inĩ maraikara, ngarora mwĩcirĩrie wao na mĩtugo yao. Ũndũ ũcio nĩ wandeithirie gũkorũo na ma atĩ Aira a Jehova nĩo marũmagĩrĩra ndini ĩrĩa ya ma.”

14. Kĩonereria gĩaku kĩngĩteithia mũrutwo atĩa gũthiĩ na mbere?

¹⁴ Nĩguo mũrutwo agĩrĩre kũbatithio, nĩ arabatara kũhũthĩra maũndũ marĩa areruta. Kaingĩ ũndũ ũcio ndũkoragwo ũrĩ mũhũthũ. No mũrutwo angĩona ũrĩa ũgunĩkaga nĩ ũndũ wa kũhũthĩra motaaro ma Bibilia, no ende kwĩgerekania nawe. (1 Kor. 11:1) Ta wĩcirie ũhoro wĩgiĩ Hanae ũrĩa ũkũgwetetwo na hau kabere. Ooigire ũũ: “Aarĩ na ariũ a Ithe witũ nĩ meekaga maũndũ marĩa nderutaga. Nĩ  nderutire kuumana nao ũrĩa ingĩũmĩrĩria andũ arĩa angĩ, ũrĩa ingĩmohera, na ũrĩa ingĩmonia wendo. Hingo ciothe maaragia maũndũ mega megiĩ andũ arĩa angĩ, na ndendaga kwĩgerekania nao.”

15. Tũngĩhũthĩra atĩa Thimo 27:17 ũhoro-inĩ wĩgiĩ mũrutwo wa Bibilia?

¹⁵ Tuĩka mũrata wa mũrutwo. O ũrĩa mũrutwo arathiĩ na mbere gũka mĩcemanio, nĩ wagĩrĩirũo gũthiĩ na mbere kũmuonia atĩ nĩ ũramwĩciria. (Afil. 2:4) No ũgerie kwaria nake nĩguo ũmũmenye makĩria. Ũtekũingĩrĩra maũndũ make kĩũmbe, no ũmũcokerie ngatho nĩ ũndũ wa mogarũrũku marĩa ekĩte ũtũũro-inĩ wake, ũmũrie ũhoro wĩgiĩ wĩruti wake, famĩlĩ yake, na wĩra ũrĩa arutaga. Kwaranĩria nake na njĩra ta ĩyo no gũtũme mũtuĩke arata. Ũngĩtuĩka mũrata wa mũrutwo wa Bibilia no ũmũteithĩrĩrie athiĩ na mbere nginya akinyĩrĩre kũbatithio. (Thoma Thimo 27:17.) Hanae rĩu atungataga arĩ painia wa hĩndĩ ciothe. Akĩaria ũhoro wĩgiĩ rĩrĩa aambĩrĩirie gũthiĩ mĩcemanio ooigire ũũ: “O ũrĩa ndathiire na mbere kũgĩa na arata kĩũngano-inĩ, noguo nderiragĩria gũthiĩ mĩcemanio-inĩ, na ndathiaga nginya rĩrĩa ndĩraigua ndĩ mũnogu. Nĩ ndakenagĩra gũkorũo hamwe na arata acio akwa erũ, na ũndũ ũcio nĩ wandeithirie gũtiga thiritũ na andũ arĩa mataatungatagĩra Jehova. Ndendaga gũkuhĩrĩria Jehova makĩria, o hamwe na aarĩ na ariũ a Ithe witũ. Na kwoguo ngĩtua itua rĩa kũbatithio.”

16. Ũngĩka atĩa nĩguo ũteithie mũrutwo wa Bibilia akenere gũkorũo arĩ kĩũngano-inĩ?

¹⁶ O ũrĩa mũrutwo arathiĩ na mbere gũkũra kĩĩroho na gwĩka mogarũrũku ũtũũro-inĩ wake, mũteithie kũigua arĩ gĩcunjĩ gĩa kĩũngano. No wĩke ũguo na njĩra ya kũmũnyita ũgeni na kũmuonia ũtaana. (Ahib. 13:2) Mũrũ wa Ithe witũ Denis ũrĩa ũikaraga Moldova nĩ aririkanaga ũrĩa gwathiire hĩndĩ ĩrĩa eerutaga Bibilia. Ooigire ũũ: “Tũrĩ na mũtumia wakwa, nĩ twanyitirũo ũgeni maita maigana ũna nĩ aarĩ na ariũ a Ithe witũ nĩguo tũhũthĩre mahinda hamwe nao. Nĩ maatũtaarĩirie ũrĩa monete Jehova akĩmateithia. Ũndũ ũcio nĩ watwĩkĩraga ngoro. Mahinda macio nĩ maatũteithirie kuona atĩ nĩ ũndũ mwega gũtungatĩra Jehova na atĩ gwĩka ũguo nĩ kũngĩatũteithirie gũkorũo na ũtũũro mwega mahinda marĩa maroka.” Mũrutwo wa Bibilia agĩrĩra gũtuĩka mũhunjia, no ũmũnyite ũgeni mũthiĩ nake ũtungata-inĩ. Mũhunjia ũmwe wĩtagwo Diego kuuma Brazil ooigire ũũ: “Ariũ a Ithe witũ aingĩ nĩ maanyitaga ũgeni tũkahunjie hamwe nao. Ũndũ ũcio nĩ wandeithirie mũno kũmamenya. Kũmenyana nao nĩ kwandeithirie kwĩruta maũndũ maingĩ, na gũkĩndeithia kũigua nguhĩrĩirie Jehova na Jesu makĩria.”

17. Athuri a kĩũngano mangĩteithia arutwo a Bibilia atĩa?

¹⁷ Hũthagĩra mahinda hamwe na arutwo. Athuri a kĩũngano, mũngĩrũmbũyagia arutwo na njĩra ya wendo, no mũmateithie gũkũra kĩĩroho  nginya makinyĩrĩre kũbatithio. Ethagai mahinda ma kwaria nao kaingĩ rĩrĩa moka mĩcemanio-inĩ. No mone atĩ nĩ mũrakenio nĩo mũngĩririkanaga marĩĩtwa mao, makĩria rĩrĩa mambĩrĩria kũruta macokio mĩcemanio-inĩ. Ningĩ nĩ wega mũgethaga mahinda mũgathiĩ hamwe na mũhunjia hĩndĩ ĩrĩa arathiĩ kwĩruta na mũrutwo wa Bibilia. Gwĩka ũguo no kũhutie mũrutwo na njĩra ũtangĩĩcirĩria. Painia wĩtagwo Jackie ũrĩa ũikaraga Nigeria ooigire: “Arutwo aingĩ nĩ mamakaga rĩrĩa mamenya atĩ mũrũ wa Ithe witũ ũrĩa ndĩranyitĩte ũgeni tũthome hamwe nao nĩ mũthuri wa kĩũngano. Mũrutwo ũmwe wa Bibilia ooigire ũũ: ‘Mũhunjia witũ ndangĩka ũguo. Aceeragĩra o andũ arĩa atongu na ndangĩmaceerera matamũrĩhĩte.’” Mũrutwo ũcio rĩu nĩ athiaga mĩcemanio.

18. Athuri a kĩũngano mangĩhingia atĩa wĩra ũrĩa mehokeirũo o ta ũrĩa Atũmwo 20:28 yonanĩtie?

¹⁸ Menyeragia na ũgekĩra arutani a Bibilia ngoro. Inyuĩ athuri a kĩũngano, mũkoragwo na wĩra wa bata wa gũteithia ahunjia makorũo na moimĩrĩro mega ũtungata-inĩ, na makorũo marĩ ahunjia na arutani ega a Bibilia. (Thoma Atũmwo 20:28.) Angĩkorũo mũhunjia nĩ araigua guoya gũtongoria wĩruti wa Bibilia mũrĩ nake, wĩrutĩre kũmũteithia gũtongoria. Jackie ũrĩa ũkũgwetetwo na hau rũgongo ooigire ũũ: “Kaingĩ athuri a kĩũngano nĩ manjũragia ũhoro wĩgiĩ arutwo akwa a Bibilia. Rĩrĩa ndacemania na ũritũ mũna ngĩtongoria wĩruti wa Bibilia, nĩ maaheaga ũtaaro ũngĩndeithia.” Athuri no makorũo na itemi inene harĩ gwĩkĩra ngoro ahunjia mathiĩ na mbere na ũtungata wao. (1 Thes. 5:11) Jackie aacokire akiuga ũũ: “Nĩ njiguaga ndekĩrũo ngoro rĩrĩa athuri manjĩra atĩ nĩ makenagio nĩ kĩyo gĩakwa. Njiguaga ndacanjamũrũo nĩ ciugo ciao o ta ũrĩa mũndũ aiguaga acanjamũrũo anyua maĩ mahehu kũrĩ na ũrugarĩ mũingĩ. Rĩrĩa mangathĩrĩria nĩ njiguaga ndagĩa na ũmĩrĩru, na gĩkeno kĩrĩa ngĩaga nakĩo nĩ ũndũ wa kũruta andũ Bibilia gĩkongerereka.”—Thim. 25:25.

19. Nĩ ũndũ ũrĩkũ ũngĩtũrehera gĩkeno ithuothe?

¹⁹ O na angĩkorũo ihinda-inĩ rĩrĩ tũtirĩ na mũndũ tũraruta Bibilia, no tũteithĩrĩrie arutwo a Bibilia makinyĩrĩre kũbatithio. Tũngĩkorũo tũhaarĩirie wega ũrĩa tũkuuga, no tũteithĩrĩrie mwarimũ rĩrĩa mareruta na mũrutwo o na tũtekwaria mũno. No tũthondeke ũrata na arutwo a Bibilia arĩa maroka Nyũmba-inĩ ya Ũthamaki, na tũmaigĩre kĩonereria kĩega. Nao athuri a kĩũngano no mekĩre arutwo ngoro na njĩra ya kũhũthĩra mahinda hamwe nao, na mekĩre arutani ngoro na njĩra ya kũmamenyeria na kũmagaathĩrĩria. Na githĩ to tũkene mũno tũngĩmenya atĩ nĩ harĩ ũndũ twekire o na angĩkorũo no ũndũ mũnini, na tũgĩteithĩrĩria mũndũ ende na atungatĩre Jehova?