10-زەرتتەۋ ماقالاسى
زەرتتەۋشىگە شومىلدىرۋ راسىمىنەن وتۋگە قاۋىم بولىپ كومەكتەسەيىك!
«ٵر مۇشە ٶز مىندەتىن دۇرىس اتقارعاندا، دەنە وسەدى» (ەفەس. 4:16).
85-ٵن ٴبىر-ٴبىرىڭدى قارسى الىڭدار
اڭداتپا *
1، 2. كيەلى كىتاپتى زەرتتەيتىن ادامنىڭ رۋحاني ٶسىپ، شومىلدىرۋ راسىمىنەن وتۋىنە كىمدەر كومەكتەسە الادى؟
فيدجيدە تۇراتىن ەمي ەسىمدى ايەل بىلاي دەيدى: «كيەلى كىتاپتى زەرتتەپ، ٴبىلىم العان ماعان قاتتى ۇنايتىن. ٴبىلىپ جاتقاندارىم شىندىق ەكەنىن دە تۇسىنەتىنمىن. ٴبىراق باۋىرلاستارمەن ارالاسقاننان كەيىن عانا قاجەتتى وزگەرىستەر جاساپ، شومىلدىرۋ راسىمىنەن ٶتتىم». بۇل جاعداي مىنا نارسەنى انىق كورسەتەدى: كوپ جاعدايدا زەرتتەۋشىلەر باۋىرلاستاردىڭ كومەگىن كورگەندە عانا قادامدار جاساپ، شومىلدىرۋ راسىمىنەن وتەدى.
2 قاۋىمدا قاتارىمىزدىڭ كوبەيۋىنە ٵربىر جاريالاۋشى ۇلەس قوسا الادى (ەفەس. 4:16). ۆانۋاتۋ ارالىندا تۇراتىن لەيلاني ەسىمدى ٸزاشار بىلاي دەيدى: «حالىقتا «ٴبىر بالانى بۇكىل اۋىل وسىرەدى» دەگەن ٴسوز بار. مەن شاكىرت دايىنداۋدى دا وسىعان ۇقساتامىن. بىرەۋدىڭ شىندىققا كەلۋىنە بۇكىل قاۋىمنىڭ كومەگى كەرەك-اق». راسىندا دا، بالانىڭ جاقسى ادام بولىپ وسۋىنە اتا-اناسى عانا ەمەس، جاقىن تۋىستارى مەن مەكتەپتەگى مۇعالىمدەرى دە ۇلەس قوسادى. سول سياقتى قاۋىمداعى باۋىرلاستار دا اقىل-كەڭەستەرىمەن، ٶز ۇلگىلەرىمەن، ماقتاۋ سوزدەرىمەن زەرتتەۋشىنى دەمەپ، شومىلدىرۋ راسىمىنەن وتۋگە دايىنداي الادى (ناق. س. 15:22).
3. اننا، دورين مەن لەيلانيدىڭ سوزدەرىنەن نە تۇسىنەمىز؟
3 ٴسىز بىرەۋمەن كيەلى كىتاپتى زەرتتەيسىز بە؟ ولاي بولسا، زەرتتەۋ ساباعىنا شاقىرعان باۋىرلاستاردىڭ كومەگىن قابىلداڭىز. مولدوۆادا تۇراتىن اننا دەگەن ارنايى ٸزاشار: «رۋحاني جەتىلىپ كەلە جاتقان ادامنىڭ بارلىق قاجەتتىلىگىن قامداۋ جالعىز وزىڭە وتە اۋىر»،— دەيدى. سول ەلدە قىزمەت ەتىپ جۇرگەن دورين ەسىمدى ارنايى ٸزاشار بولسا بىلاي دەيدى: «زەرتتەۋ ساباعىنا كەلگەن جاريالاۋشىلاردىڭ ايتقاندارى زەرتتەۋشىگە قالاي اسەر ەتكەنىن كورگەندە، تاڭعالىپ قالاتىنمىن. مەن ونداي ويلاردى ايتا الماس ەدىم». لەيلاني تاعى بىلاي دەپ قوستى: «باۋىرلاستاردىڭ كورسەتكەن سۇيىسپەنشىلىگى مەن جىلۋلىعىنىڭ ارقاسىندا زەرتتەۋشىلەر قۇدايدىڭ شىنايى حالقىن تاپقاندارىن تۇسىنە الادى» (جوح. 13:35).
4. وسى ماقالا نە جايلى بولماق؟
4 ٴسىز باسقا باۋىرلاسپەن زەرتتەيتىن ادامنىڭ رۋحاني وسۋىنە مەن قالاي ۇلەس قوسا الامىن دەپ ويلايتىن شىعارسىز. وسى ماقالادا ٴبىز زەرتتەۋ ساباعىنا شاقىرىلعاندا جانە سول زەرتتەۋشى قاۋىمعا كەلە باستاعاندا وعان قالاي كومەكتەسە الاتىنىمىزدى كورەمىز. سونداي-اق زەرتتەۋشىنىڭ رۋحاني ٶسىپ، شومىلدىرۋ راسىمىنەن وتۋىنە اقساقالدار قالاي كومەكتەسە الاتىنىن بىلەمىز.
زەرتتەۋ ساباعىنا شاقىرىلساڭىز
زەرتتەۋ ساباعىنا شاقىرىلساڭىز، وتىلەتىن ساباققا دايىندالىپ بارىڭىز (5—7-ابزاستاردى قاراڭىز)
5. زەرتتەۋ ساباعىنا شاقىرىلعان جاريالاۋشىنىڭ ٴرولى قانداي؟
5 زەرتتەۋشىگە قۇداي ٴسوزىن تۇسىنۋگە كومەكتەسەتىن ەڭ ٴبىرىنشى ادام — تالىمگەرى. ال ٴسىز زەرتتەۋ ساباعىنا شاقىرىلساڭىز، تالىمگەردىڭ وڭ قولى ەكەنىڭىزدى ۇمىتپاڭىز. ونى قولداپ، كومەكتەسىپ وتىرىڭىز (ۋاع. 4:9، 10). زەرتتەۋ ساباعىنىڭ ٴماندى، ماعىنالى وتۋىنە قالاي ۇلەس قوسا الاتىنىمىزدى كەلەسى ابزاستاردان بىلەمىز.
6. باسقا باۋىرلاستىڭ زەرتتەۋ ساباعىنا قاتىساتىن بولساڭىز، ناقىل سوزدەر 20:18 دەگى ٴپرينسيپتى قالاي قولدانا الاسىز؟
6 زەرتتەۋ ساباعىنا دايىندالىڭىز. الدىمەن، تالىمگەردەن زەرتتەۋشى جايلى ٴبىراز ٴبىلىپ الىڭىز (ناقىل سوزدەر 20:18 وقىڭىز). ودان بىلاي دەپ سۇراساڭىز بولادى: «زەرتتەۋشى قانداي ادام، نەگە سەنەدى؟ ساباق نە تۋرالى بولادى؟ وسى ساباقتان زەرتتەۋشىنىڭ نەنى تۇسىنگەنىن قالايسىڭ؟ زەرتتەۋ ساباعىندا ىستەمەۋىم كەرەك، ايتپاۋىم كەرەك نەمەسە كەرىسىنشە، ايتۋىم كەرەك نارسەلەر بار ما؟ زەرتتەۋشىنىڭ العا باسا بەرۋىنە قالاي كومەكتەسە الامىن؟» ارينە، تالىمگەر سىزگە زەرتتەۋشىنىڭ سىرلارىن اشپاعانمەن، ونىڭ باسقا ايتقاندارى سىزگە باعىت بەرىپ، كومەك بولا الادى. ميسسيونەر بولىپ قىزمەت ەتەتىن دجوي ەسىمدى ايەل باۋىرلاسىمىز زەرتتەۋ ساباعىنا كەلەتىن جاريالاۋشىعا وسى جايىندا ايتىپ قويادى ەكەن. «زەرتتەۋشى جايلى ايتىپ بەرگەننىڭ ارقاسىندا باۋىرلاستار ساباققا ىنتامەن قاتىسادى، پايدالى ويلاردى ايتا الادى»،— دەيدى دجوي.
7. زەرتتەۋ ساباعىنا دايىندالىپ بارعانىڭىز نە ٷشىن ماڭىزدى؟
7 ٴسىز زەرتتەۋ ساباعىنا شاقىرىلساڭىز، وتىلەتىن ساباققا جاقسىلاپ دايىندالىپ بارعانىڭىز دۇرىس. مۇنداي مۇمكىندىگىڭىز بولماسا، ساباقتىڭ نەگىزگى ويلارىن ٴبىر شولىپ شىعىڭىز (ەزرا 7:10). دورين دەگەن ەر باۋىرلاسىمىز تاعى بىلاي دەيدى: «سەرىگىم زەرتتەۋ ساباعىنا دايىندالىپ كەلسە، قاتتى ريزا بولىپ قالامىن. سونداي كەزدە ول ساباققا جاقسى اتسالىسىپ وتىرادى». ەكەۋىڭىزدىڭ دە زەرتتەۋ ساباعىنا دايىندالىپ كەلگەندەرىڭىز زەرتتەۋشىنىڭ نازارىنان تىس قالمايدى. ول دا بۇدان وزىنە ساباق الادى.
8. زەرتتەۋ ساباعىندا ايتاتىن دۇعاڭىز ٴماندى، مازمۇندى بولۋ ٷشىن نە ىستەي الاسىز؟
8 زەرتتەۋ ساباعىنىڭ ماڭىزدى ٴبىر بولىگى — دۇعا. سوندىقتان مەنەن دۇعا ەتۋدى وتىنسە، نە تۋرالى ايتامىن دەپ الدىن الا دايىندالىپ قويىڭىز. سوندا دۇعاڭىز ٴماندى دە مازمۇندى بولادى (ٴزاب. 141:2). جاپونيادا تۇراتىن حانايو ەسىمدى ايەل كەزىندە زەرتتەۋ ساباعىندا ٴبىر جاريالاۋشىنىڭ ايتقان دۇعاسىن ەسىندە جاقسى ساقتاپ قالىپتى. «ونىڭ دۇعاسىنان ەحوبامەن قارىم-قاتىناسى وتە جاقىن ەكەنىن سەزدىم. مەن دە ول سياقتى بولسام عوي دەپ ويلادىم. دۇعادا مەنىڭ اتىمدى ايتقانىنا دا ريزا بولىپ قالدىم»،— دەيدى حانايو.
9. جاقىپ 1:19 دا ايتىلعانداي، زەرتتەۋ ساباعىندا جۇرگىزۋشىگە تىرەك بولۋ ٷشىن نە ىستەي الاسىز؟
9 تالىمگەرگە تىرەك بولىڭىز. نيگەرياداعى ٴبىر ارنايى ٸزاشار بىلاي دەيدى: «زەرتتەۋ ساباعىندا جاقسى سەرىك دەپ مۇقيات تىڭداپ، ورىندى جەرلەردە جاقسى ويلار قوسىپ وتىراتىن جاريالاۋشىنى ايتار ەدىم. ول تىم كوپ سويلەپ، زەرتتەۋدى ٶزى جۇرگىزىپ كەتپەيدى». ولاي بولسا، زەرتتەۋدە نە ايتۋدى، قاشان ايتۋدى قالاي بىلە الامىز؟ (ناق. س. 25:11). بۇل ٷشىن تالىمگەر مەن زەرتتەۋشىنىڭ ايتىپ جاتقاندارىن مۇقيات تىڭداڭىز (جاقىپ 1:19 وقىڭىز). سوندا، ٴساتى تۋعاندا اڭگىمەگە ارالاسا الاسىز. ٴبىراق بايقاڭىز، تىم كوپ سويلەپ كەتپەڭىز، تالىمگەردىڭ وي جەلىسىن ٴبولىپ جىبەرمەڭىز جانە باسقا تاقىرىپقا سەكىرىپ كەتپەڭىز. تاقىرىپتى اشا ٴتۇسۋ ٷشىن قىسقاشا ٴبىر وي نە مىسال ايتساڭىز بولادى نەمەسە سۇراق قويساڭىز بولادى. ال اسا ٴبىر الىپ-قوسارىڭىز بولماسا، زەرتتەۋشىنى ماقتاپ قويىڭىز جانە ونىڭ ايتىپ جاتقاندارى ٴسىز ٷشىن ماڭىزدى ەكەنىن كورسەتىڭىز. قاراپايىم وسى ارەكەتتەر زەرتتەۋشىنىڭ العا باسۋىنا ۇلكەن سەپتىگىن تيگىزە الادى.
10. ٴسىزدىڭ باسىڭىزدان وتكەن جاعدايلار زەرتتەۋشىگە قالاي كومەكتەسۋى مۇمكىن؟
10 ٶز ومىرىڭىزدەن ايتا وتىرىڭىز. رەتى كەلىپ جاتسا، زەرتتەۋشىگە شىندىققا قالاي كەلگەنىڭىزدى، قيىندىقتاردى قالاي جەڭگەنىڭىزدى جانە ەحوبانىڭ سىزگە قالاي كومەكتەسكەنىن قىسقاشا بايانداپ بەرىڭىز (ٴزاب. 78:4، 7). كىم بىلەدى، ٴسىز زەرتتەۋشىگە وتە قاجەت مالىمەتتى ايتاتىن شىعارسىز. وسىلاي ونىڭ سەنىمىن قاتايتىپ، شومىلدىرۋ راسىمىنەن وتۋگە تالپىندىرىپ جىبەرەرسىز نەمەسە قيىندىعىمەن كۇرەسۋدىڭ جولىن كورسەتەرسىز (پەت. 1-ح. 5:9). برازيليادا ٸزاشار بولىپ قىزمەت ەتىپ جۇرگەن گابريەل دەگەن ەر باۋىرلاس كيەلى كىتاپتى زەرتتەگەن كەزى جايىندا بىلاي دەيدى: «باۋىرلاستار باستارىنان وتكەن جاعدايلارىن ايتىپ بەرگەندە، ەحوبا كىمنىڭ قانداي قيىندىقپەن كۇرەسىپ جۇرگەنىن جاقسى بىلەتىنىن ٴتۇسىندىم. ولار ٶز قيىندىقتارىن جەڭە السا، مەن دە جەڭە الامىن عوي دەپ ويلادىم».
زەرتتەۋشى قاۋىمعا كەلە باستاسا
زەرتتەۋشىنىڭ قاۋىمعا كەلىپ تۇرۋىنا ٴبارىمىز اسەر ەتە الامىز (11-ابزاستى قاراڭىز)
11، 12. نەگە ٴبىز پاتشالىق سارايىنا كەلگەن زەرتتەۋشىنى جىلى قارسى الۋىمىز كەرەك؟
11 زەرتتەۋشى العا باسىپ، شومىلدىرۋ راسىمىنەن ٶتۋ ٷشىن، قاۋىم كەزدەسۋلەرىنە بارىپ، ونىڭ پايداسىن كورۋى كەرەك (ەۆر. 10:24، 25). زەرتتەۋشىنى العاش رەت قاۋىم كەزدەسۋىنە الىپ كەلەتىن تالىمگەرى شىعار. ٴبىراق ونىڭ قاۋىمعا ٵرى قاراي دا كەلە بەرۋىنە جاريالاۋشىلاردىڭ ٴبارى كومەكتەسە الادى. وسى ورايدا ٴسىز نە ىستەي الاسىز؟
12 قۇشاق جايا قارسى الىڭىز (ريم. 15:7). باۋىرلاستار قۋانا قارسى السا، زەرتتەۋشى پاتشالىق سارايىنا تاعى دا كەلگىسى كەلۋى مۇمكىن. ول قىسىلىپ، ٶزىن ىڭعايسىز سەزىنبەس ٷشىن، جىلى امانداسىڭىز، ىشكە كىرگىزىپ، وزگەلەرمەن تانىستىرىڭىز. سوزدەرىن دەن قويىپ تىڭداپ، جاعدايىن ٴبىلىڭىز. وعان قارايتىن تالىمگەرى بار عوي دەپ ويلاماڭىز. ويتكەنى ول باۋىرلاسىمىز كەشىگىپ جاتقان شىعار نەمەسە قاۋىمدا قانداي دا ٴبىر مىندەتتەرى بار شىعار. زەرتتەۋشىنى قۇشاق جايا قارسى العانىمىز وڭ ناتيجەسىن بەرۋى مۇمكىن. بۇعان وسىدان بىرنەشە جىل بۇرىن شومىلدىرۋ راسىمىنەن وتكەن ٴدميترييدىڭ وقيعاسى دالەل. ول بىلاي دەيدى: «پاتشالىق سارايىنا ٴبىرىنشى رەت كەلگەندە قوبالجىپ، سىرتتا تۇردىم. سوندا جىلى ٴجۇزدى ٴبىر ەر باۋىرلاس مەنى ىشكە كىرگىزدى. قاسىما كوپ ادام كەلىپ امانداستى. شىنىمدى ايتسام، بۇلاي بولادى دەپ كۇتپەدىم. ماعان قاتتى ۇناعانى سونشالىق، اپتانىڭ ٵر كۇنىندە كەزدەسۋ بولسا عوي دەپ ويلادىم. ويتكەنى باسقا ەش جەردە مەن ٶزىمدى بۇلاي جاقسى سەزىنبەگەن ەدىم». دميتريي قازىر قاۋىمدا — قىزمەت كومەكشىسى.
13. ٴسىزدىڭ جاقسى ٴجۇرىس-تۇرىسىڭىز زەرتتەۋشىگە قالاي اسەر ەتۋى مۇمكىن؟
13 ۇلگى بولىڭىز. زەرتتەۋشى ٴسىزدىڭ ۇلگىلى ٴجۇرىس-تۇرىسىڭىزعا قاراپ، شىندىقتى تاپقانىن تۇسىنە الادى (مات. 5:16). قازىر مولدوۆادا ٸزاشار بولىپ قىزمەت ەتەتىن ۆيتاليي بىلاي دەيدى: «مەن قاۋىمداعى باۋىرلاستاردىڭ قالاي ٶمىر سۇرەتىنىن، كوزقاراستارىن، ٴجۇرىس-تۇرىستارىن باقىلايتىنمىن. سوندا ەحوبا كۋاگەرلەرى شىنىمەن-اق قۇداي جولىندا جۇرەتىنىنە كۇمانىم بولمادى».
14. زەرتتەۋشىنىڭ رۋحاني ٶسىپ، شومىلدىرۋ راسىمىنەن وتۋىنە قالاي كومەكتەسە الاسىز؟
14 شومىلدىرۋ راسىمىنەن وتۋگە تالپىنىپ جۇرگەن زەرتتەۋشى الىپ جاتقان ٴبىلىمىن ومىردە قولدانىپ ۇيرەنۋى كەرەك. ٴبىراق بۇل وڭاي بولا بەرمەيدى. دەسە دە ٴسىزدىڭ كيەلى كىتاپ پرينسيپتەرىن قولدانىپ، باقىتتى بولىپ جۇرگەنىڭىزدى كورگەندە، ول دا ارەكەت ەتۋگە تالپىنا باستايدى (قور. 1-ح. 11:1). حانايو باۋىرلاس بىلاي دەيدى: «مەن باۋىرلاستارعا قاراپ، الىپ جاتقان ٴبىلىمىمدى قالاي قولدانۋعا بولاتىنىن كورەتىنمىن. ولاردان ادامداردى ماقتاۋدى، كەشىرۋدى، ٴسۇيۋدى ۇيرەندىم. مەن بىرەۋدىڭ بىرەۋدى جامانداپ جاتقانىن ەستىمەيتىنمىن. مەن دە سولار سياقتى بولعىم كەلەتىن».
15. قاۋىمعا كەلىپ جۇرگەن زەرتتەۋشىمەن دوس بولۋدىڭ ماڭىزدىلىعىن ناقىل سوزدەر 27:17 قالاي كورسەتەدى؟
15 زەرتتەۋشىمەن دوس بولىڭىز. زەرتتەۋشى جينالىسقا كەلە باستاعاننان وعان كوڭىل بولە بەرىڭىز (ٴفىلىپ. 2:4). ودان كيەلى كىتاپتى قالاي زەرتتەپ جۇرگەنى جايىندا، جۇمىسى جايىندا سۇراپ اڭگىمەلەسىڭىز. ٴبىراق جەكە ومىرىنە ارالاسىپ كەتپەڭىز. جاساپ جاتقان كىشىگىرىم قادامدارى ٷشىن ماقتاپ قويىڭىز. مۇنداي اڭگىمەلەر دوستىققا جەتەلەيدى. ال ونىمەن دوس بولساڭىز، وعان شومىلدىرۋ راسىمىنەن وتۋگە كومەكتەسە الاسىز (ناقىل سوزدەر 27:17 وقىڭىز). جوعارىدا اتى اتالعان حانايو ەسىمدى ايەل قازىر — تۇراقتى ٸزاشار. قاۋىمعا ەندى كەلە باستاعان كەزى جايىندا ول بىلاي دەيدى: «كەيبىر باۋىرلاستارمەن جاقىن ارالاسقاندىقتان، قاۋىم كەزدەسۋلەرىنە بارعىم كەلىپ تۇراتىن، ٴتىپتى شارشاپ تۇرسام دا باراتىنمىن. كۋاگەر دوستارىمدى جاقسى كورگەندىكتەن، قۇدايعا سەنبەيتىن بۇرىنعى دوستارىممەن بايلانىسىمدى ٷزۋ اۋىر تيمەدى. مەن باۋىرلاستارعا دا، ەحوباعا دا جاقىن بولا بەرگىم كەلدى. ٴسۇيتىپ، شومىلدىرۋ راسىمىنەن ٶتتىم».
16. كيەلى كىتاپتى زەرتتەۋشى قاۋىمعا كەرەك ەكەنىن سەزىنۋ ٷشىن تاعى نە ىستەي الاسىز؟
16 زەرتتەۋشى ومىرىندە وزگەرىستەر جاساپ، رۋحاني وسە كەلە، وعان قاۋىمعا كەرەك ەكەنىن تۇسىنۋگە كومەكتەسىڭىز. مۇنىڭ ٴبىر جولى — ونى قوناققا شاقىرۋ (ەۆر. 13:2). مولدوۆادا قىزمەت ەتەتىن دەنيس كيەلى كىتاپتى زەرتتەپ جۇرگەن كەزىن ەسكە ٴتۇسىرىپ بىلاي دەيدى: «باۋىرلاستار ايەلىم ەكەۋمىزدى قوناققا شاقىرىپ تۇراتىن. اڭگىمەلەرىنەن ەحوبا ولارعا قالاي كومەكتەسكەنىن بىلگەندە، كادىمگىدەي قاناتتانىپ قالاتىنبىز. سول وتىرىستاردان كەيىن ەحوباعا قىزمەت ەتەمىز دەگەن شەشىمىمىز ودان سايىن بەكي ٴتۇستى جانە ٴبىزدى كەرەمەت بولاشاق كۇتىپ تۇرعانىنا دا سەنىمىمىز ارتتى». كيەلى كىتاپتى زەرتتەيتىن ادام جاريالاۋشى بولعان كەزدە، ونى قىزمەتكە شاقىرىپ تۇرىڭىز. برازيليادا تۇراتىن ديەگو بىلاي دەيدى: «ۋاعىزداۋعا مەنى كوپ باۋىرلاس شاقىرىپ تۇراتىن. باۋىرلاستارمەن جاقىنىراق تانىسۋدىڭ ەڭ كۇشتى جولى وسى قىزمەت ەكەن. وسىلاي مەن ولاردان كوپ نارسە ۇيرەندىم، ٵرى ەحوبا مەن يساعا دا جاقىنداي ٴتۇستىم».
اقساقالدار قالاي كومەكتەسە الادى؟
اقساقالدار، شىن جۇرەكتەن كوڭىل بولگەندەرىڭىز زەرتتەۋشىنى رۋحاني وسۋگە تالپىندىرا الادى (17-ابزاستى قاراڭىز)
17. اقساقالدار زەرتتەۋشىلەرگە قالاي كومەكتەسە الادى؟
17 كيەلى كىتاپتى زەرتتەۋشىلەرگە ۋاقىت ٴبولىڭىز. اقساقالدار، سىزدەر زەرتتەۋشىلەرگە شىن جۇرەكتەن كوڭىل بولسەڭىزدەر، ولاردى شومىلدىرۋ راسىمىنەن وتۋگە تالپىندىرا الاسىزدار. مىسالى، قاۋىم كەزدەسۋلەرىندە ولاردىڭ حال-جاعدايىن سۇراپ تۇراسىز با؟ زەرتتەۋشىلەردىڭ اتتارىن جاتتاپ الساڭىز، قاۋىمدا قول كوتەرگەندە اتىمەن اتاساڭىز، ولار ريزا بولىپ قالادى. ال قاۋىمدا ٴبىر باۋىرلاس ٴسىزدى زەرتتەۋ ساباعىنا شاقىراتىن بولسا، جوسپارىڭىزدى بەيىمدەي الاسىز با؟ ۇمىتپاڭىز، ٴسىز زەرتتەۋشىگە ٶزىڭىز ويلاعاننان دا كوپ كومەكتەسە الاسىز. نيگەريادا تۇراتىن دجەكي ەسىمدى ٸزاشار بىلاي دەيدى: «زەرتتەۋ ساباعىندا قاسىمداعى سەرىگىمنىڭ اقساقال ەكەنىن بىلگەندە، زەرتتەۋشىلەردىڭ كوبىسى تاڭعالىپ قالادى. ٴبىر زەرتتەۋشىنىڭ ايتقانى ەسىمدە: —مەنىڭ شىركەۋدەگى پاستورىم ەشقاشان ويتپەس ەدى. ول تەك اقشا تولەيتىن باي ادامدارعا عانا بارادى،— دەدى ول». بۇل زەرتتەۋشى قازىر قاۋىمعا كەلىپ ٴجۇر.
18. اقساقالدار ەلشىلەردىڭ ىستەرى 20:28 دەگى سوزدەردى قالاي قولدانسا بولادى؟
18 تالىمگەرلەردى ۇيرەتىڭىز جانە جىگەرلەندىرىڭىز. اقساقالدار، سىزدەرگە ماڭىزدى جاۋاپكەرشىلىك جۇكتەلگەن. سىزدەر جاريالاۋشىلارعا قىزمەتتەرىن جاقسى اتقارۋعا، سونىڭ ىشىندە كيەلى كىتاپتى زەرتتەۋ ساباقتارىن جاقسى جۇرگىزۋگە كومەكتەسە الاسىزدار (ەلشىلەردىڭ ىستەرى 20:28 وقىڭىز). زەرتتەۋ ساباعىنا بارعاندا، تالىمگەردىڭ سىزدەن قىسىلىپ تۇرعانىن بايقاساڭىز، زەرتتەۋ ساباعىن جۇرگىزىپ بەرۋدى ۇسىنىڭىز. «اقساقالدار مەنەن زەرتتەۋشىلەرىمنىڭ جاعدايىن سۇراپ تۇرادى. ولار زەرتتەۋ جۇرگىزگەندە قينالعان جەرلەرىمدى بايقاسا، جاقسى كەڭەستەر ايتىپ تۇرادى»،— دەيدى دجەكي. اقساقالدار زەرتتەۋ ساباعى بار باۋىرلاستاردى تاباندى بولۋعا تالپىندىرىپ، جىگەرلەندىرۋ ٷشىن كوپ نارسە ىستەي الادى (سال. 1-ح. 5:11). دجەكي بىلاي دەپ قوستى: «اقساقالدار سەنىڭ ەرەن ەڭبەگىڭدى قاتتى باعالايمىز دەگەندە، ٴماز بولىپ قالامىن. مۇنداي سوزدەر ىستىق كۇندەگى سالقىن سۋداي سەرگىتىپ تاستايدى، بويىما سەنىمدىلىك قۇيىپ، زەرتتەۋ ساباعىن ٵرى قاراي دا قۋانا جۇرگىزە بەرۋگە كۇش بەرەدى» (ناق. س. 25:25).
19. باۋىرلاستاردىڭ بارلىعى قانداي قۋانىشقا بولەنە الادى؟
19 ٴبىزدىڭ زەرتتەۋ ساباعىمىز بولماسا دا قاۋىمداعى زەرتتەۋشىلەردىڭ رۋحاني وسۋىنە ٶز سەپتىگىمىزدى تيگىزە الامىز. باسقا باۋىرلاستىڭ زەرتتەۋ ساباعىنا شاقىرىلساڭىز، قوسار ويىڭىزدى دايىنداپ بارىڭىز. سوندا تالىمگەردى قولداپ، كومەكتەسە الاسىز. ٴبىراق كوپ سويلەۋدىڭ قاجەتى جوق. زەرتتەۋشىلەر پاتشالىق سارايىنا كەلە باستاعاندا ولارمەن دوستاسىپ، جاقسى ٴجۇرىس-تۇرىسىڭىزبەن ۇلگى كورسەتە بەرىڭىز. اقساقالدار بولسا ۋاقىت تاۋىپ، ولارعا كوڭىل بولە الادى، ال تالىمگەرلەرىن ۇيرەتىپ، ولاردى ماقتاپ وتىرسا بولادى. سوندا زەرتتەۋشىنىڭ ەحوبانى جاقسى كورىپ، وعان قىزمەت ەتۋىنە كىشكەنە-كىشكەنەدەن ٴبارىمىز كومەكتەسە الامىز. بۇل ٴبىزدى زور قۋانىشقا بولەيدى ەمەس پە؟!
79-ٵن ولارعا بەرىك تۇرۋدى ۇيرەتىڭدەر
^ 5-ابزاس كيەلى كىتاپتى زەرتتەۋ ساباعى بارىمىزدە جوق شىعار، ٴبىراق قاۋىمعا كەلىپ جۇرگەن قىزىعۋشىنىڭ شومىلدىرۋ راسىمىنەن وتۋىنە ٴبارىمىز كومەكتەسە الامىز. ال قالاي كومەكتەسە الاتىنىمىزدى وسى ماقالادان بىلەمىز.
