1-2. Nanyi utena kukwatekesa odixibulu dya Bibidya kukula kate kubatizu?

PHANGE Emi, watungu ku ixi ya Fiji wambe: “Emengawabhela yoso ingexile mudilonga mu Bibidya. Ngejidile kwila, yene mwene okidi. Maji okyangikwatekesa kulungulula o ima kumwenyu wami ni kudibatizala, okudilunga ni jiphange mukyônge.” Omusoso wamana Emi ulonga okidi kiki kyabetokota: Odixibulu dya Bibidya dikula dingi kyambote kate kubatizu, kyoso kyatambula okikwatekesu kya jiphange jengi mukilunga.

² Aboki oso mukilunga atena kukwatekesa odixibulu dya Bibidya kukula munzumbi. (Efe. 4:16) Sayi muboki wathembu yoso, amwixana Leilani, watungu ku ixi ya Vanuatu, wambe: “Kwabhingi dyembu dyamuvimba phala kusasa omona. Kyene kimoxi we ni kikalakalu kya kulonga maxibulu. Muveji javulu, odixibulu dikula dingi kyambote ni kikwatekesu kya aboki oso mukilunga.” Ojitata ni athu amukwa kumwiji, omakamba ni alongexi kuxikola, enyoso yâ akwatekesa omona kate kya kituka mwadyakime. Ene abhanga kiki mukuswinisa ni kulonga omona ima yakatunda yalungu ni mwenyu. Kyene we kimoxi. O aboki mukilunga atena kubhana idimwinu, kuswinisa ni kubhana phangu yambote kumaxibulu a Bibidya. Kubhanga kiki, kwandakwatekesa omaxibulu kukula kate kubatizu.—Jisa. 15:22.

3. Ihi itudilonga mu izwelu yaphange Ana, Dorin, ni Leilani?

³ Mukonda dyahi o aboki amulonga odixibhulu asanguluka ni kikwatekesu kibhana o aboki engi kudixibulu dyê? Phange Ana, muboki wakatunda watungu ku ixi ya Moldavia, wambe: “Odixibulu dya Bibidya dyabhingi kikwatekesu kyavulu, omuthu umoxi ubheka we, katena kubhana okikwatekesu kyoso kyabhindamena odixibulu.” Phange Dorin, muboki wakatunda watungu ku ixi ya Moldavia, wambe: “Muveji javulu, o aboki  ungendanawu mulonga o Bibidya ku maxibulu mami, azwela kima, eme kingakixinganekene.” Phange Leilani, twamutumbula kya kudima, wazwela kima kyengi dingi kimusangulukisa kyoso kyaya mulong’o Bibidya ni aboki amukwa. Mwene wambe: “Ohenda ni kilangidilu kilondekesa ojiphange ku dixibulu, kimukwatekesa kutendela kwila, etumwene tu mundu wa Jihova.”—Nzwá 13:35.

4. Ihi itwandadilonga mumbandu yiyi?

⁴ Maji nange udibhwidisa: ‘Kyebhi kingitena kukwatekesa odixibulu kukula munzumbi, se k’emeku ngamukwendesa omilongi yê ya Bibidya?’ Twandadilonga se ihi itutena kubhanga kyoso phange kyatubhinga phala kumuxinjikila kulonga o Bibidya kudixibulu dyê. Twandamona we se ihi itwatokala kubhanga kyoso dixibulu kyamateka kuya muyônge. Kudisukilu twandamona kyebhi otufunga kyatena kukwatekesa omaxibulu kukula kate kubatizu.

5. Kyebhi okikalakalu kyê se phange ukubhinga phala kumuxinjila kulong’o Bibidya kudixibulu dyê?

⁵ Mukulonga o Bibidya, omuboki wenemukwendesa omilongi kudixibulu, mwene wala ni kikalakalu kya kumukwatekesa kutendela o Mak’a Nzambi. Se phange ukubhinga phala kumuxinjikila kulonga o Bibidya kudixibulu dyê, eye watokala kudimona kala umukwatekexi wê. Kifwa, eye watokala kumukwatekesa. (Ndo. 4:9, 10) Maji ihi iwatokala kubhanga phala kukwatekesa mwene kyambote mukwenu kyoso kimuya ni kulong’o Bibidya?

6. Kyebhi ki utena kukumbidila Jisabhu 20:18, kyoso phange kyakubhinga phala kumuxinjikila kulonga o Bibidya kudixibulu dyê?

⁶ Dipelepalale kyambote ande dya kuya mulong’o Bibidya. Kyadyanga, ebhwidisa omuboki wandakwendesa omilongi phala kukutangela ima yofele yalungu ni dixibulu. (Tanga Jisabhu 20:18.) Eye utena kumwibhwidisa: “Okwila utena kungitangela ima yofele yalungu ni dixibulu? Kibatulu mba disa dyebhi diwamudilonga nê? Mukibatulu kiki eye wamesena kwila odixibulu didilonga pondo yebhi? Okwila sayi kima kingatokala kukibhanga mba kuzwela mukithangana kitwandaya ni kumulonga o Bibidya? Kyebhi kingitena kukwatekesa odixibulu didi kukula munzumbi?” Mukidi, omuboki kanda kutangela ima yavulu yalungu ni dixibulu dyê. Maji wandakutangela ima yandakukwatekesa kwijiya kyambote odixibulu. Phange yamuhatu amwixana Joy, mukunji wajixi jengi, wenemuzwela o ima yiyi kwa yo amujixinjikila kulonga o Bibidya kumaxibulu mê. Mwene wambe: “Kujimbulula o ima yiyi kwamukwetu ungamuboka nê, kimubhangesa kumesena kukwatekesa odixibulu, ni kusola kyambote o izwelu mukithangana kitwandalonga o Bibidya.”

7. Mukonda dyahi wabhingi kudipelepalala ande dyakuya muxinjikila phange kulonga o Bibidya kudixibulu dyê?

⁷ Se phange ukubhinga phala kumuxinjikila kulonga o Bibidya ku dixibulu dyê, eye watokala kudilonga okibatulu mba disa dimwandalonga.  (Eji. 7:10) Phange yadiyala amwixana Dorin, twamutumbula kudimatekenu wambe: “Eme ngisanguluka kyavulu kyoso kingitonginina kwila, omuboki wamukwenda neme wapelepalala we ombandu itwamulonga kudixibulu dyami. Mukonda kiki kingidyelesa kwila, mwene wandazwela ima yandakwatekesa odixibulu.” Kumandu yengi, odixibulu wandatena kumona kwila, kiyadi kyetu twadipelepalala kyambote. Okiki kyandamubhana phangu yambote, kyandamukwatekesa we kwenda ni kudipelepalala. Nemwene se kiwala ni kithangana kyasoko phala kudilonga odisa dyoso, eye utena kukatula kakithangana phala kwijiya kyambote ojipondo jabetakota jimwandalonga.

8. Mukulonga o Bibidya ihi iwatokala kubhanga phala kusamba mu ukexile wambote?

⁸ Mukulonga o Bibidya, twene musamba kudimatekenu ni kudisukilu. Kyenyikiphe, xinganeka ni kithangana kyasoko mu ima iwandazwela se akubhinga phala kusamba. Se kyene ki ubhanga, mukusamba kiwanda bhana jihonda, wandatumbula ngo o ima yatokala. (Jisá. 141:2) Phange yamuhatu amwixana Hanae watungu ku ixi ya Japão, kate kindala kiki kajimbi omusambu wabhangele phange yamuhatu wendele ni phange wexile kumulonga o Bibidya. Phange Hanae wambe: “Bhukaxi ka izwelu eme ngatonginina kwila mwene wexile ni ukamba wambote ni Jihova. Eme we ngamesenene kukala ni ukamba wambote ni Jihova kala mwene. Ngadivu kwila angizolo, kyoso mwene kyatumbula odijina dyami mumusambu.”

9. Kala kilondekesa Tiyaku 1:19, ihi itena kubhanga yo axinjikila phala kukwatekesa omuboki wamukwendesa omilongi ya Bibidya?

⁹ Kwatekesa mukwenu wamukwendesa omilongi ya Bibidya. Phange yamuhatu amwixana Omamuyovbi muboki wakatunda ku ixi ya Nigeria, wambe: “Omuthu ukwatekesa kyambote, yo wivwa kyambote mukithangana kya kulonga o Bibidya. Mwene uzwela ima yambote, maji kazwela kyavulu. Mwene wejiya kwila, omuboki wamukwendesa omilongi ya Bibidya, mwene wala ni kikalakalu kya kutula o Mak’a Nzambi kumuxima wadixibulu.” Kyenyikiphe, kithangana kyebhi kiwatokala kuzwela? Ihi iwatokala kuzwela? (Jisa. 25:11) Ivwidila kyambote kyoso omuboki wamukwendesa omilongi a Bibidya, kyaya ni kuzwela ni dixibulu. (Tanga Tiyaku 1:19.) Kyenyiki, eye wandatena kutonginina o kithangana kyambote phala kuzwela. Mukidi, eye watokala kuxinganeka kyambote ande dya kuzwela. Mukifika, eye kiwatokala kuzwela kyavulu, kiwatokala kubatula o izwelu ya muboki wamukwendesa omilongi, mba kumateka kuzwela maka engi, oyo umwamuzwela ki ene. Maji bhukaxi ka izwelu yofele, kifika mba kibhwidisu, eye utena kukwatekesa kujimbulula opondo imwamulonga. Sayi ithangana eye wanda divwa kwila kiwabhingi kubandekesa ima yavulu mu ima imwamulonga. Maji lembalala kwila, okuximana ni kusuwa o dixibulu, kwandamukwatekesa kukula munzumbi.

10. Kutanga omusoso wé kudixibulu kutena kumukwatekesa kyebhi?

 ¹⁰ Tanga omusoso wé. Eye utena kutangela kudixibulu kyebhi kiwadilongo okidi, ibhidi yebhi iwatolola ni kyebhi Jihova kya kukwatekesa kumwenyu wê. (Jisá. 78:4, 7) Nange omusoso wê wene wabhindamene odixibulu, wandakolesa okixikanu kyê, wandamuswinisa kukolokota kate kyamubatizala. Utena we kumukwatekesa kutololo o ibhidi yamudibhananayu. (1 Phe. 5:9) Phange Gabriel kindala muboki wathembu yoso ku ixi ya Brasil, walembala yamukwatekesa kyoso kyamateka kudilonga o Bibidya. Mwene wambe: “Kyoso kingevu omusoso waphange weza mungilonga o Bibidya, ngatonginina kwila, mbe Jihova wejiya o ibhidi itudibhananayu. Eme ngabanze: Se phange yú watena ku itolola, eme we ngitena.”

11-12. Mukonda dyahi twatokala kutambulula kyambote omaxibulu kyoso kyeza muyônge?

¹¹ Phala dixibulu kukula kate kubatizu, mwene watokala kuya ni kukatula jinga mbote muyônge. (Jihe. 10:24, 25) Muveji javulu, omulongexi mwene wanda kwixana odixibulu phala kwiza mukyônge muveji yadyanga. Maji kyoso kyeza, etwenyoso twatokala kuswinisa odixibulu phala n’a vutuka dingi mu Kididi kya Ubhezelu. Kyebhi kitutena kubhanga kiki?

¹² Sangesa odixibulu ni henda yoso. (Loma 15:7) Se tubhangesa odixibulu kudivwa kyambote muyônge yetu, kikyanda mubhonza kuvutuka dingi mu Kididi kya Ubhezelu. Se kubhangesa odixibulu kudivwa kyayibha, menekena ni nguzu yoso odixibulu, mulondekesa we ku aboki ni akwenu mukilunga, maji kana kumukwatesa jisonyi mba kumubhangesa kudivwa kyayibha. Se mulongexi wê kabhixila luwa, eye utena kudizwelesa ne hanji. Ivwidila kyambote kyoso dixibulu kyaya ni kuzwela, londekesa kwila eye wamusuwu. Ihi itena kubhita se utambulula kyambote odixibulu mu kilunga? Phange Dimitri, amubatizala tumivu kudima, kindala wamusidivila kala mukwatekexi watufunga. Yalungu ni kyônge kyê kyadyanga, mwene wambe: “Sayi phange wangisange bhukanga ngexile mukingila. Ni henda yoso mwene wangambata etu twabokona kumoxi mu Kididi kya Ubhezelu. Kitwabokona, athu avulu eza mungimenekena. Eme ngadiwanene kyavulu. Ngakiwabhela kyavulu, kate ngamesenene kuvutuka izuwa yoso kusemana. O ukexilu ungadivu kumuxima wami, nuka ngadivwile mu kididi kyengi.”

13. Owendelu wê wambote utena kukwatekesa kyebhi odixibulu dya Bibidya?

¹³ Bhana phangu yambote. Owendelu wê wambote, utena kuxikinisa odixibulu dya Bibidya kwila, etu mwene tu Jikidistá jakidi. (Mat. 5:16) Phange Vitali kindala wamusidivila kala muboki wakatunda ku ixi ya Moldavia, wambe: “Eme ngamono owendelu wa athu mukilunga, o ukexilu wa wakuxinganeka ni kyebhi kyexile mudibhana mudya. O ima ingamono yangixikinisa  kwila, o Jimbangi ja Jihova, ene mwene o Jikidistá jakidi.”

14. Kyebhi owendelu we utena kukwatekesa muthu kukula jinga munzumbi?

¹⁴ Ande dyakumubatizala, odixibulu watokala kukumbidila yoso yamudilonga. Sayi ithangana kibhonza kubhanga kiki. Maji kyoso odixibulu kyamona ombote iwenemukatula mukonda dya kukumbidila o itumu ya Bibidya, mwene wandamesena we kukukayela. (1 Kol. 11:1) Tala ophangu ya phange Hanae twamutumbula kudimatekenu. Mwene wambe: “Ojiphange akexilemukumbidila mwene ku mwenyu wa o ima yakexile mungilonga. Eme ngamono kyebhi kingitena kuswinisa, kuloloka ni kulondekesa henda kwa akwetu. Mu ithangana yoso, ene azwela ngó ima yambote yalungu ni akwa. Eme ngamesenene kyavulu kukayela ophangu ya.”

15. Kala kilondekesa Jisabhu 27:17 mukonda dyahi twatokala kubhanga ukamba ni maxibulu kyoso kyaya ni kwiza jinga muyônge?

¹⁵ Bhanga ukamba ni maxibulu. Kyoso odixibulu kyaya ni kwiza muyônge, eye we watokala kusuluka ni kumusuwa. (Fil. 2:4) Eye utena kusota kwa ejiya dingi kyambote. Se kusota kwijia kyavulu, eye utena kumuximana mukulungulula kima kumwenyu wê, utena kumwibhwidisa we kyebhi kyamumona omilongi ya Bibidya, kyebhi kyala omwiji ni salu yé. Ojithathe jiji jitena kubandekesa o ukamba wenu. Okubhanga ukamba ni dixibulu dyê, kutena kumukwatekesa kukula kate kubatizu. (Tanga Jisabhu 27:17.) Phange Hanae kindala wamusidivila kala muboki wathembu yoso. Mukulembalala kyoso kyamateka kuya muyônge, mwene wambe: “Kyoso kingayi ni kubandekesa omakamba mukilunga, ngexile we dingi ni hanji ya kwiza muyônge. Ngexile muya nemwene se ngabhwila. Eme ngawabhele kyavulu kukala ni makamba mami awubhe. Kuwabhela o ukamba wawu, kwangikwatekesa kubatula o ukamba ni yo kexile mubheza Jihova. Kuma ngamesenene kya kudibatizala, ngasolo kuzukama dingi kwa Jihova ni kujiphange.”

16. Ihi dingi itutena kubhanga phala kukwatekesa odixibulu kusanguluka mukilunga?

¹⁶ Kyoso odixibulu kyaya ni kukula ni kulungulula o ima kumwenyu we, eye watokala kumukwatekesa kudivwa kwila, mwene watokala kya mukilunga. Eye utena kubhanga kiki, mukumutambulula kyambote. (Jihe. 13:2) Phange Denis ku ixi ya Moldavia, mukulembalala kyoso kyamateka kudilonga o Bibidya mwene wambe: “Muveji javulu, eme ni muhatwami exile mutwixana phala kubhita kithangana ni jiphange. Twexile mwa evwa kuzwela kyebhi Jihova kyenemwakwatekesa. Okiki kya tuswinisa we. O ithangana itwabhiti ni jiphange yatuxikinisa, yatubhangesa kumesena kusidivila we Jihova, ni kukala we ni kidyelelu kya kukala ni mwenyu wakalelaku kuhadya.” Kyoso odixibulu kya kituka muboki, eye utena kumwixana phala kuboka kumoxi. Phange Diego watungu ku ixi ya Brasil wambe: “Jiphange javulu jangixana phala kuboka kumoxi. Kubhita nawu kithangana kwangikwatekesa kwa ejiya dingi  kyambote. Kyoso kingexile muboka nawu, ngadilongo ima yavulu. Ngadivu kwila, ngazukama dingi kwa Jihova ni Jezú.”

17. Kyebhi otufunga kyatena kukwatekesa omaxibulu a Bibidya?

¹⁷ Sota kubhita kithangana ni maxibulu a Bibidya. Tufunga, ohenda imulondekesa kumaxibulu itena kwakwatekesa kukula kate kubatizu. Okwila utena kuxisa kakithangana phala kuzwela ni maxibulu muyônge? Ene andadivwa kwila eye wa asuwu se ukamba kujimba omajinamâ, kotelele kyoso kyamateka kutambwijila muyônge. Okwila utena kusota kithangana phala kuboka kumoxi ni aboki enemulonga o Bibidya kumaxibulu? Okubhanga kiki kitena kukwatekesa kyavulu odixibulu. Phange Jackie muboki wathembu yoso, ku ixi ya Nigeria, wambe: “Sayi maxibulu mami adiwana kyoso kingatangela kwila, ophange wamukwenda n’eme kafunga. Sayi dixibulu dya Bibidya wambele kiki: ‘O pastore yami mungeleja, nuka weji bhanga kiki. Mwene ukunda ngo ojimvwama ni yo amufuta kitadi.’” Odixibulu didi kindala dyamuya jinga muyônge.

18. Kyebhi otufunga kyatena kukumbidila okikalakalu kya abhana kala kilondekesa Ikalakalu 20:28?

¹⁸ Longa ni kuswinisa o aboki. Tufunga, enu mwala ni kikalakalu kyadikota: Okukwatekesa o aboki kuditunda kyambote mu ukunji ni kulonga o Bibidya ni uhete wosoko. (Tanga Ikalakalu 20:28.) Se omuboki wala ni jisonyi ja kulonga bhu pholo yê, eye utena kudibhakula phala kwendesa omilongi ya Bibidya. Phange Jakie twamutumbula kudima, wambe: “Muveji javulu, otufunga asota kwijiya kyebhi kyala omaxibulu mami a Bibidya? Kyoso kingidibhana ni ibhidi mukulonga o Bibidya, ene angibhana jindunge jambote, jingikwatekesa.” Otufunga atena kukwatekesa kyavulu o aboki amulonga o Bibidya. (1 Tes. 5:11) Phange Jackie wambe dingi: “Eme ngikiwabhela kyoso otufunga kyangiswinisa ni kungiximana mukikalakalu kingenemubhanga. O izwelu yâ ingibhana nguzu kala menya atalala mukizuwa kyatema, ibandekesa okidyelelu ni kisangusangu kyami mukikalakalu kyakulonga o Bibidya.”—Jisa. 25:25.

19. Kisangusangu kyebhi kitutena kukala nakyu etwenyoso?

¹⁹ Ne mwene se kindala kiki kitwamulonga Bibidya, tutena kukwatekesa muthu kubhixila kate kubatizu. Se kuzwela kyavulu, tutena kubandekesa kima kyandakwatekesa muboki ni mukwetu wamukwendesa omilongi. Tutena we kubhanga ukamba ni maxibulu kyoso kyamateka kwiza mu Kididi kya Ubhezelu. Tutena we kwabhana phangu yambote. Otufunga atena kuswinisa omaxibulu mukukatula kithangana phala kuzwela nawu. Atena kukwatekesa o aboki mukwalonga ni kwa ximana. Tusanguluka kyavulu kyoso kitubhanga kima, ne mwene kama kofele, phala kukwatekesa muthu kuzola ni kusidivila Tata yetu, Jihova!