1-2. Кʹи дькарә али хԝәндәкʹаред Кʹьтеба Пироз бькә кӧ әԝана бәрбь ньхӧмандьне һәрʹьн?

ЖЬНЬКӘКӘ бь наве Ами, йа кӧ ль Фижийе дьжи, ӧса дьбежә: «Мьн жь һинбуна Кʹьтеба Пироз гәләк шабун дьстанд. Мьн фәʹм кьр кӧ рʹийа рʹаст әв ә. Диса жи, һʹәта кӧ мьн тʹәви хушк-бьра һәвалти нәкьр, мьн жийина хԝә нәдьгӧһаст у әз бәрбь ньхӧмандьне нәдьчум». Сәрһатийа Амийе нишани мә дькә кӧ аликʹарийа хушк-бьра гәләк фәрз ә, ԝәки хԝәндәкʹаре Кʹьтеба Пироз бәрбь ньхӧмандьне һәрʹә.

² Һәр мьзгинван дькарә алийе хԝәда аликʹарийе бьдә ԝәки щьват мәзьн бә (Әфәси 4:16). Пешәнгәкә бь наве Леилани, йа кӧ ль Вануатуйе дьжи, ӧса дьбежә: «Дьбежьн кӧ зарʹ жь алийе тʹәмамийа гӧндва те мәзьнкьрьн. Бь тʹәхмина мьн, шьхӧле һазьркьрьна шагьрта жи ӧса йә. Сәва кӧ кәсәк бьбә Шәʹде Йаһоԝа, аликʹарийа тʹәмамийа щьвате лазьм ә». Гава зарʹ мәзьн дьбә, малбәт, һәвал у дәрсдар аликʹарийе дьдьнә ԝи. Әԝана зарʹ һелан дькьн у дәрсед фәрз ԝи һин дькьн. Мина ве йәке, һʹәму мьзгинван дькарьн бь ширәта, һелане у мәсәла хԝә али хԝәндәкʹаред Кʹьтеба Пироз бькьн кӧ әԝана бәрбь ньхӧмандьне һәрʹьн (Мәтʹәлок 15:22).

3. Әм дькарьн жь готьнед хушкед мә Ана у Леилани у бьре мә Дорин чь һин бьн?

³ Гәло ԝе чьма баш бә ԝәки мьзгинване кӧ һинбуна Кʹьтеба Пироз дәрбаз дькә, аликʹарийа мьзгинванед дьн ԛәбул бькә? Хушкәкә бь наве Ана, йа кӧ ль Молдовайе ча пешәнга мәхсус хьзмәт дькә, ӧса дьбежә: «Сәва кӧ хԝәндәкʹарәки Кʹьтеба Пироз пешда һәрʹә, тʹәне аликʹарийа дәрсдар бәс нинә». Бьре мә Дорин жи ль Молдовайе ча пешәнге мәхсус хьзмәт дькә. Әԝ ӧса дьбежә:  «Гәләк щар, гава мьзгинванәки дьн те сәр һинбуна мьн, әԝ тьштәки хԝәш дьбежә, чь кӧ ԛәт һʹьше мьнрʹа жи дәрбаз нәбьбу, у әв готьн дьле хԝәндәкʹар дьгьрә». Леилани бәʹса мәʹникә дьн жи дькә: «Гава хԝәндәкʹар һʹьзкьрьн у дьлгәрмийа хушк-бьра дьвинә, әԝе фәʹм кә кӧ әм щьмәʹта Йаһоԝа нә» (Йуһʹәнна 13:35).

4. Ве готареда әме дәрһәԛа чь шеԝьр кьн?

⁴ Тӧ дьбәкә бәрхԝә дькʹәви: «Һәгәр әз һинбуне дәрбаз накьм, гәло әз чаԝа дькарьм али хԝәндәкʹар бькьм кӧ әԝ пешда һәрʹә?» Ньһа әме бьвиньн кӧ гава әм тенә тʹәглифкьрьне сәр һинбуна Кʹьтеба Пироз, йан гава хԝәндәкʹаред ну тенә щьвате, әм чаԝа дькарьн али ԝан бькьн. Ӧса жи, әме бьвиньн кӧ рʹуспийед щьвате чаԝа дькарьн али хԝәндәкʹаред Кʹьтеба Пироз бькьн кӧ әԝ бәрбь ньхӧмандьне һәрʹьн.

5. Гава тә тʹәглифи сәр һинбуна Кʹьтеба Пироз кьрьнә, рола тә чь йә?

⁵ Сәр һинбуна Кʹьтеба Пироз, һәри зедә дәрсдар щабдар ә кӧ али хԝәндәкʹаре хԝә бькә кӧ әԝ Кʹьтеба Пироз фәʹм бькә. Бир нәкә кӧ һәгәр тә тʹәглифи сәр һинбуне кьрьнә, тӧ тʹәне аликʹар и (Ԝаиз 4:9, 10). Ле гәло тӧ ча дькари ԝәʹде һинбуне бьби аликʹарәки баш?

6. Гава тӧ сәр һинбунәкә Кʹьтеба Пироз тейи тʹәглифкьрьн, ԝе баш бә кӧ тӧ чь бьки?

⁶ Бона һинбуна Кʹьтеба Пироз хԝә һазьр бькә. Йа пешьн, дәрсдаррʹа бежә бьра дәрһәԛа хԝәндәкʹаре хԝә һьнәки тәрʹа гьли кә (Мәтʹәлок 20:18 бьхунә). Мәсәлә, тӧ дькари ӧса бьпьрси: «Хԝәндәкʹар йәки чаԝа йә? Баԝәрийа ԝи чь йә? Һуне дәрһәԛа кʹижан тʹемайе хәбәр дьн? Тӧ дьхԝази кӧ хԝәндәкʹар жь ве дәрсе чь һин бә? Ԝәʹде һинбуне, гәло тьштәк һәйә, кӧ гәрәке әз нәвежьм йан нәкьм? Әз чаԝа дькарьм хԝәндәкʹар һелан бькьм кӧ әԝ пешда һәрʹә?» Һьлбәт нә лазьм ә кӧ дәрсдар дәрһәԛа хԝәндәкʹаре хԝә һәр тьшти әшкәрә бькә, ле әԝ диса жи дькарә дәрһәԛа ԝи һьнә тьшт гьли кә ԝан хушк-бьрарʹа, йед кӧ тʹәви ԝи тенә сәр һинбуне. Мисйонерәкә бь наве Щой ӧса дькә. Әԝ дьбежә: «Әв йәк али мьзгинване дьн дькә кӧ әԝ хԝәндәкʹар дьһа баш нас бькә у бьзаньбә кӧ әԝ дькарә ԝәʹде һинбуне чь бежә».

7. Чьма фәрз ә кӧ мьзгинване дьн хԝә бона һинбуне һазьр бькә?

⁷ Гава кәсәк тә тʹәглифи сәр һинбуна хԝә дькә, ԝе баш бә кӧ тӧ хԝә бона дәрсе һазьр бьки (Әзра 7:10). Бьре мә Дорин ӧса дьбежә: «Ԝе баш бә кӧ мьзгинване дьн жи хԝә бона һинбуне һазьр бькә. Бь ви щурʹәйи, әԝе бькарьбә дьһа баш аликʹарийе бьдә». Сәрда жи, хԝәндәкʹар ԝе  бьвинә кӧ ԝә һәрдӧ жи рʹьнд хԝә һазьр кьрийә, у әв йәк ԝе бона ԝи мәсәләкә баш бә. Һәгәр мәщала тә тʹӧнә бә кӧ тӧ хԝә рʹьнд һазьр бьки, ԝе диса жи баш бә кӧ тӧ фькьред фәрз йед дәрсе бьзаньби.

8. Ԝе чьма баш бә ԝәки тӧ пешда бьфькьри кӧ сәр һинбуне дәрһәԛа чь дӧа бьки?

⁸ Ԝәʹде һинбуна Кʹьтеба Пироз, дӧа пʹарәкә фәрз ә. Ләма пешда бьфькьрә кӧ тӧйе чь бежи һәгәр лазьм бә кӧ тӧ дӧа бьки. Бь ви щурʹәйи, дӧайе тә ԝе дьһа конкрет у жь дьл бә (Зәбур 141:2). Хушкәкә бь наве Һанае, йа кӧ ль Жапонйайе дьжи, тинә бира хԝә кӧ дӧайед хушка кӧ тʹәви дәрсдара ԝе дьһат сәр һинбуне, сәр ԝе чаԝа һʹӧкӧм дькьр: «Мьн дит кӧ әԝ гәләк незики Йаһоԝа йә, у мьн дьхԝәст бьбьм мина ԝе. Ӧса жи, ве йәке кӧ әԝе дӧайед хԝәда наве мьн һьлдьда, дьле мьн гәрм дькьр».

9. Ль гора Аԛуб 1:19, тӧ чаԝа дькари ԝәʹде һинбуна Кʹьтеба Пироз бьби аликʹарәки баш?

⁹ Пьштгьрийа дәрсдар бькә. Хушкәкә бь наве Омамуйави, йа кӧ ль Нижәрйайе пешәнга мәхсус ә, ӧса дьбежә: «Ԝе баш бә кӧ мьзгинване дьн ԝәʹде һинбуне рʹьнд гӧһ бьдә, бь зедәйи хәбәр нәдә у бир нәкә ԝәки әԝе кӧ һинбуне дәрбаз дькә, дәрсдар ә». Ԝәʹде һинбуне, гәрәке тӧ кʹәнге у чаԝа хәбәр ди? (Мәтʹәлок 25:11). Гава дәрсдар у хԝәндәкʹар хәбәр дьдьн, рʹьнд гӧһ бьдә (Аԛуб 1:19 бьхунә). Бь ви щурʹәйи, тӧйе һазьр би кӧ ԝәхта рʹаст тьштәки бежи. Рʹьнд бьфькьрә пешийа кӧ тӧ тьштәки бежи. Бь зедәйи хәбәр нәдә, хәбәрдана дәрсдар нәбьрʹә у дәрбази тʹемәкә дьн нәбә. Ле тӧ дьбәкә дькари бь щаб, мәсәлә йан пьрсәкә кьн али хԝәндәкʹар бьки кӧ әԝ дәрсе дьһа баш фәʹм бькә. Дәрһәԛа һьнә тʹема, дьбәкә тә зор те кӧ тӧ тьштәки бежи. Диса жи, һәгәр тӧ бь дьлгәрми пʹайе хԝәндәкʹар бьди, әв йәк ԝе бешьк дьле ԝи бьгьрә у али ԝи бькә кӧ әԝ пешда һәрʹә.

10. Сәрһатийа тә чаԝа дькарә али хԝәндәкʹарәки бькә?

¹⁰ Бәʹса сәрһатийа хԝә бькә. Һәгәр дьбә, кьн хԝәндәкʹаррʹа бежә кӧ тӧ чаԝа һати сәр рʹийа рʹастийе, Йаһоԝа чаԝа али тә кьрийә у тә чаԝа сәри тәнгасийарʹа дәрхьст (Зәбур 78:4, 7). Сәрһатийа тә дькарә мерхасийе бьдә хԝәндәкʹар, баԝәрийа ԝи дьһа ԛәԝи бькә у али ԝи бькә кӧ әԝ бәрбь ньхӧмандьне һәрʹә йан жи сәри тәнгасийарʹа дәрхә (1 Пәтрус 5:9). Бьраки бь наве Габриел, йе кӧ Бразилйайеда дьжи у пешәнг ә, тинә бира хԝә кӧ әԝи жь сәрһатийед мьзгинванед дьн чаԝа кʹар стандьбу: «Гава мьн сәрһатийед хушк-бьра дьбьһистьн, мьн фәʹм кьр кӧ Йаһоԝа тәнгасийед мә дьвинә. Ӧса жи, әз дьфькьрим кӧ һәгәр хушк-бьред дьн сәркʹәтьн, әз жи дькарьм сәркʹәвьм».

11-12. Ԝе чьма баш бә кӧ әм жь дьл сьлаве бьдьн хԝәндәкʹаред кӧ тʹәзә тенә щьвина?

¹¹ Сәва кӧ хԝәндәкʹар бәрбь ньхӧмандьне һәрʹьн, гәләк фәрз ә кӧ әԝана бенә щьвина у жь ԝан кʹаре бьстиньн (Ибрани 10:24, 25). Хԝәндәкʹар һʹәчʹи зәʹф жь алийе дәрсдаред хԝәва щара пешьн тенә тʹәглифкьрьне. Гава әԝ тʹәзә тенә щьвина, әм гьшк дькарьн ԝана һелан бькьн кӧ әԝана тʹьме бенә щьвата. Гәло әм чаԝа дькарьн ве йәке бькьн?

¹² Сәр щьвате жь дьл сьлаве бьдә хԝәндәкʹара (Рʹомайи 15:7). Һәгәр хушк у бьра бь дьлгәрми сьлаве бьдьн хԝәндәкʹара, әԝ йәк ԝе дьле ԝан бьгьрә у һелан бькә кӧ диса бенә щьвата. Жь дьл сьлаве бьдә хԝәндәкʹара у ԝана тʹәви кәсед дьн жи бьдә наскьрьн, ле ӧса кӧ әԝ әʹщьз нәбә. Щарна, дьбәкә дәрсдаред ԝан һе нәһатьнә Оде йан әԝана бь тьштәки дьн мьжул ьн; ләма ԝе баш бә кӧ тӧ тʹәви ԝан хәбәр ди. Гәло әԝ йәк чаԝа дькарә сәр ԝан һʹӧкӧм бькә? Дина хԝә бьдә сәрһатийа бьраки мә бь наве Дмитри. Әԝ чәнд сал пешда һатьбу ньхӧмандьн у ньһа бәрдәстийе щьвате йә. Дмитри дәрһәԛа щьвина хԝә йа пешьн ӧса дьбежә: «Ԝәхта кӧ әз һатьм бәр Ода щьвате, дьле мьн һʹәвәки нәрʹьһʹәт бу. Ле бьраки әз дитьм у тʹәви мьн кʹәтә һӧндӧр. Гәләк хушк-бьра незики мьн бун кӧ сьлаве бьдьн мьн. Әз гәләк ша бум. Мьн хԝәрʹа гот ‹Хԝәзьл һәр рʹож щьвин һәбуна›. Мьн тʹӧ щийе дьн тьштәки ӧса нәдитьбу».

13. Рʹабун-рʹуньштьна тә дькарә сәр хԝәндәкʹаред Кʹьтеба Пироз чаԝа һʹӧкӧм бькә?

¹³ Бьбә мәсәләкә баш. Рʹабун-рʹуньштьна тә дькарә нишани хԝәндәкʹара бькә кӧ әм бь рʹасти шагьртед Иса Мәсиһ нә (Мәтта 5:16). Бьраки бь наве Витали, йе кӧ ньһа ль Молдовайе пешәнг ә, ӧса дьбежә: «Мьн дит кӧ хушк-бьра чаԝа дьжин, чь дьфькьрьн у рʹабун-рʹуньштьна ԝан чь щурʹәйи йә. Әԝ йәк бона мьн избаткьрьн бу кӧ Шәʹдед Йаһоԝа бь рʹасти жи хьзмәткʹаред Хԝәде нә».

14. Мәсәла тә чаԝа дькарә али хԝәндәкʹара бькә кӧ әԝана рʹӧһʹанида пешда һәрʹьн?

¹⁴ Бона кӧ хԝәндәкʹар бькарьбьн бенә ньхӧмандьне, лазьм ә кӧ әԝана ль гора тьштед кӧ әԝана һин дьбьн, бьжин. Әв йәк щарна һеса нинә. Ле гава әԝана дьвиньн кӧ тӧ жь принсипед Кʹьтеба Пироз чаԝа кʹаре дьстини, әв йәк дькарә ԝана һелан кә кӧ чʹәʹв бьдьнә тә (1 Корьнтʹи 11:1). Хушка мә Һанае, йа кӧ мә бәʹса ԝе кьрьбу, ӧса дьбежә: «Хушк-бьра ль гора тьштед кӧ әз һин дьбум, дьжитьн. Мьн дьдит кӧ әз чаԝа дькарьм мәрьва бьшьдиньм, бьбахшиньм ԝан у һʹьзкьрьна хԝә нишан бькьм. Ԝана  һәртʹьм дәрһәԛа кәсед дьн позитив хәбәр дьда. Мьн жи дьхԝәст мина ԝан бьм».

15. Ль гора Мәтʹәлок 27:17, чьма фәрз ә кӧ әм тʹәви хԝәндәкʹаред кӧ тенә щьвина һәвалтийе бькьн?

¹⁵ Тʹәви хԝәндәкʹарʹа һәвалтийе бькә. Гава хԝәндәкʹар тенә щьвина, дина хԝә бьдә ԝан (Филипи 2:4). Тʹәви ԝан хәбәр дә. Мәсәлә, тӧ дькари пʹайе ԝан бьди кӧ әԝана һинбуна Кʹьтеба Пирозда пешда дьчьн. Ӧса жи, тӧ дькари дәрһәԛа малбәт йан шьхӧлед ԝан бьпьрси. Бь сайа ве йәке, тӧ дькари тʹәви ԝан һәвалтийе бьки у али ԝан бьки кӧ әԝана бәрбь ньхӧмандьне һәрʹьн. Ле нәкʹәвә нав шьхӧлед ԝанә шәхси (Мәтʹәлок 27:17 бьхунә). Һанае ньһа пешәнга һәртʹьм ә. Әԝ дәрһәԛа ԝәхта кӧ тʹәзә дьһатә щьвина, ӧса дьбежә: «Чьԛас зедә мьн щьватеда хԝәрʹа һәвал дьдитьн, һаԛас зедә мьн щьвин һʹьз дькьр, у гава әз ԝәстийайи бум, әз диса жи дьчумә щьвина. Мьн жь һәвалтийа тʹәви хушк-бьра гәләк шабун дьстанд, у ве йәке али мьн дькьр кӧ әз һәләԛәтийа хԝә тʹәви һәвалед кӧ Шәʹдед Йаһоԝа нибун, бьԛәтиньм. Мьн дьхԝәст дьһа незики Йаһоԝа у хушк-бьра бьм, ләма жи мьн сафи кьр бемә ньхӧмандьне».

16. Тӧ чаԝа дькари али хԝәндәкʹара бьки кӧ әԝана щьватеда хԝә рʹьһʹәт тʹәхмин бькьн?

¹⁶ Чахе хԝәндәкʹар пешда дьчьн у жийина хԝә дьгӧһезьн, али ԝан бькә кӧ әԝана хԝә ча пʹара щьвате тʹәхмин кьн. Ләма ԝе баш бә кӧ тӧ һьндава ԝан меванһʹьз би (Ибрани 13:2). Бьраки бь наве Денис, йе кӧ ль Молдовайе хьзмәт дькә, тинә бира хԝә гава әԝ һе хԝәндәкʹар бу, әԝ ӧса дьбежә: «Әз у жьна мьн, әм чәнд щара дьһатьн тʹәглифкьрьн кӧ тʹәви хушк-бьра ԝәхт дәрбаз кьн. Ԝана мәрʹа дьгот кӧ Йаһоԝа чаԝа али ԝан кьрьбу. Ве йәке әм һелан дькьрьн у хԝәстьна мә зедә дькьр кӧ Йаһоԝарʹа хьзмәт бькьн. Мә фәʹм кьр кӧ жийина мә ԝе пʹьрʹ хԝәш бә.» Паши кӧ хԝәндәкʹар дьбьн мьзгинван, тӧ дькари тʹәви ԝан дәркʹәви хьзмәте. Мьзгинванәки жь Бразилйайе бь наве Диего ӧса дьбежә: «Гәләк бьра гази мьн дькьрьн кӧ әз тʹәви ԝан һәрʹьм хьзмәте. Бь ви щурʹәйи, мьн ԝана рʹьнд наскьрьн. Әз гәләк тьшт һин дьбум, у мьн хԝә дьһа незики Йаһоԝа у Иса Мәсиһ тʹәхмин дькьр».

17. Рʹуспи чаԝа дькарьн али хԝәндәкʹара бькьн?

¹⁷ Бона хԝәндәкʹаред Кʹьтеба Пироз ԝәʹдә бьвинә. Рʹуспино, һʹьзкьрьн у һәләԛәтийа ԝә дькарә али хԝәндәкʹара бькә кӧ әԝана бәрбь ньхӧмандьне һәрʹьн. Мәсәлә, ԝе баш бә кӧ һун щьватеда тʹәви ԝан хәбәр дьн. Ӧса жи, ԝе баш бә кӧ  һун навед ԝан бир нәкьн, илаһи гава әԝана щабе дьдьн. Гәло һун дькарьн щарна тʹәви мьзгинванед дьн һәрʹьн сәр һинбунед ԝан? Һун дькарьн сәр ԝана гәләк һʹӧкӧм бькьн. Хушкәкә бь наве Щеки, йа кӧ ль Нижәрйайе дьжи, ӧса дьбежә: «Гава хԝәндәкʹар педьһʹәсьн ԝәки бьре кӧ тʹәви мьн һат сәр һинбуна ԝан рʹуспики щьвате йә, әԝ әʹщебмайи дьминьн. Хԝәндәкʹарәк ӧса гот: ‹Кʹәшише мьн начә мала хәлԛе. Әԝ тʹәне дьчә мала дәԝләмәнда, у тʹәне һәгәр жерʹа пʹәра бьдьн!›» Әв хԝәндәкʹар ньһа те щьвина.

18. Ль гора Кʹаред Шандийа 20:28, рʹуспи чаԝа дькарьн щабдарийа хԝә биньн сери?

¹⁸ Дәрсдаред Кʹьтеба Пироз һин бькә у һелан бькә. Рʹуспино, йәк жь щабдарийед ԝәйә фәрз әв ә, кӧ һун али мьзгинвана бькьн ԝәки әԝана бьбьн дәрсдаред щерʹьбанди (Кʹаред Шандийа 20:28 бьхунә). Һәгәр мьзгинванәк шәрм бькә кӧ һинбуна Кʹьтеба Пироз бәр тә дәрбаз кә, бежә кӧ тӧ һинбуне дәрбаз ки. Щеки ӧса дьбежә: «Рʹуспи һәртʹьм дьпьрсьн кӧ һале хԝәндәкʹаред мьн чаԝа йә. Гава әз ньзаньм кӧ ча али хԝәндәкʹаред хԝә бькьм кӧ әԝана пешда һәрʹьн, әз жь ширәтед рʹуспийа гәләк кʹаре дьстиньм». Бәле, һелана рʹуспийа бона дәрсдара гәләк керһати йә (1 Тʹесалоники 5:11). Щеки дьбежә: «Гава рʹуспи мьн һелан дькьн у дьбежьн кӧ әԝана шьхӧлед мьн ԛимәт дькьн, әз гәләк ша дьбьм. Чаԝа кӧ ль рʹожәкә гәрм, ава сар мәрьв хԝәш те, готьнед ӧса жи мьн хԝәш тен. Пʹайе ԝан дьл дьдьнә мьн у али мьн дькьн кӧ әз жь дәрбазкьрьна һинбунед Кʹьтеба Пироз һе зедә шабуне бьстиньм» (Мәтʹәлок 25:25).

19. Чь дькарә шабуне бьдә мә һәр кәси?

¹⁹ Һәгәр ньһа хԝәндәкʹарәки мә тʹӧнә йә жи, әм дькарьн али хԝәндәкʹаред хушк-бьра бькьн кӧ әԝана жь алийе рʹӧһʹанива пешда һәрʹьн. Ԝәʹде һинбуне, әм дькарьн бь готьнед хԝә пьштгьрийа дәрсдар бькьн, ле гәрәке әм дәрбазкьрьна һинбуне һьлнәдьнә дәсте хԝә. Гава хԝәндәкʹар тен щьвина, әм дькарьн тʹәви ԝан һәвалтийе бькьн у ԝанрʹа бьбьн мәсәлә. Ԝе баш бә кӧ рʹуспийед щьвате бона һеланкьрьна хԝәндәкʹара ԝәхт бьвиньн. Ӧса жи, ԝе баш бә кӧ әԝана дәрсдара һин бькьн у пʹайе ԝан бьдьн. Рола мә чьԛас бьчʹук бә жи, йәкә әм шабуне дьвиньн гава али кәсәки дькьн ԝәки әԝ Баве мә Йаһоԝа һʹьз бькә у ԝирʹа хьзмәт бькә.