1, 2. ¿Ajkia inijuantij uelis kipaleuisej se katli momachtia tlaj kinekij ma moatsonpoliuilti?

AMY katli eua Fiyi kiijtoua: “Nechpaktiyaya tlen nechmachtiyayaj”. Nojkia kiijtoua: “Maske nijmatiyaya nimomachtiyaya tlen melauak, amo nijchiuayaya kampeka nijpatlas nonemilis. Tlauel nechpaleuik nimouikas ininuaya toikniuaj pampa uelki nijpatla se keski tlamantli uan nimoatsonpoliuiltik”. Tlen kipanok Amy kinextia se tlamantli tlen tlauel ipati: se akajya katli momachtia Biblia uelis nojua kuali tlaneltokas uan moatsonpoliuiltis tlaj nochi toikniuaj kipaleuiaj.

² Nochi toikniuaj uelis tlapaleuisej ma moskalti tlanechikoli (Efes. 4:16). Se precursora tlen eua Vanuatu katli itoka Leilani, kiijtok: “Miakej kiijtouaj tlaj kinekij kuali ma moskalti se okichpil, moneki tlapaleuisej miakej maseualmej. Uan nimoiljuia kiampa pano kema titlamachtiaj, pampa moneki ma tlapaleuikaj nochi toikniuaj ipan tlanechikoli tlaj kinekij se akajya ma mochiua se Cristo itokilijka”. Kema kiiskaltiaj se konetl nochi tlapaleuiaj, kej ichampoyouaj, iuampoyouaj uan katli kimachtisej pampa nochi kiyolchikauaj uan kinextiliaj kuajkuali tlamantli. Nojkia, nochi toikniuaj uelis kipaleuisej se katli kimachtiaj ma moatsonpoliuilti tlaj kitlajtolmakaj, kiyolchikauaj uan kimachtiaj ika tlen kichiuaj (Prov. 15:22).

3. ¿Tlake tijyekouaj tlen kiijtouaj Ana, Dorín uan Leilani?

³ Tlaj tijmachtiaj se akajya, ¿kenke moneki tijkauasej sekinok nojkia ma kipaleuikaj? Ma tikitakaj tlen kiijtoua Ana, se precursora especial uan itstok ipan Moldavia: “Se katli kimachtiaj  moneki ma kipaleuikaj ipan miak tlamantli, uan katli kimachtia amo uelis iselti kipaleuis”. Seyok precursor especial katli itoka Dorín uan nojkia nopaya eua kiijtoua: “Miakpa sekinok toikniuaj kiiljuiaj katli nikinmachtia se tlamantli tlen asi ipan iyolo, uan uelis na amo kema nimoiljuiskia nopa”. Leilani nojkia kiijtoua kenke moneki kipaleuisej katli momachtia: “Kema se katli kimachtiaj kiita tikikneliaj, kipaleuis ma kiita nelnelia tiitstokej ipan Jehová itlanechikol” (Juan 13:35).

4. ¿Tlake tikitasej ipan ni tlamachtili?

⁴ Uelis timotlatsintokia: “¿Kenijkatsa uelis nijpaleuis se akajya tlaj amo na nijmachtia?”. Ipan ni tlamachtili tikitasej tlake uelis tijchiuasej kema se toikni techtlaneuis ma titlamachtikaj iuaya uan kema katli momachtia peuas yas ipan tlanechikoli. Nojkia tikitasej tlake uelis kichiuasej ueuejtlakamej uan kiampa kinpaleuisej katli momachtiaj Biblia ma moatsonpoliuiltikaj.

5. ¿Tlake moneki tijchiuas tlaj se akajya mitstlaneuis titlamachtis iuaya?

⁵ Kema se toikni kimachtia se akajya, ya kinamiki kipaleuis nopa maseuali ma kikuamachili Biblia. Yeka, tlaj techtlaneuis ma titlamachtikaj, ma tikilnamikikaj tojuantij san tijpaleuiaj (Ecl. 4:9, 10). Uajka, ¿tlake uelis tijchiuasej tlaj tijnekij tijpaleuisej kej kinamiki?

6. ¿Kenijkatsa uelis tijchiuasej tlen kiijtoua Proverbios 20:18 kema se toikni techtlaneui ma titlamachtikaj iuaya?

⁶ Kuali ximokualchijchiua. Achtoui, ma tikiljuikaj nopa toikni katli tlamachtia ma techiljui se keski tlamantli tlen katli kimachtia (xijpoua Proverbios 20:18). Uelis tijtlatsintokisej tlake kimati tlen katli kimachtia, tlake tlamachtili kiitasej uan tlake kineki ma kiyeko ipan nopa tlamachtili. Nojkia, uelis tijtlatsintokisej tlaj kinamikiskia tijchiuasej se keski tlamantli o amo, uan kenijkatsa ueliskia tijpaleuisej ma tlaneltoka. Maske toikni amo kinamiki techiljuis nochi tlen kipano katli kimachtia, tlen kiijtos uelis techpaleuis. Se misionera katli itoka Joy kiampa kichiua kema tlamachtia ininuaya sekinok. Ya kiijtoua: “Nopa kipaleuia katli iuaya nitlamachtia kimatis tlake kiijtos uan kenijkatsa kipaleuis”.

7. ¿Kenke tlauel ipati kuali timokualchijchiuasej?

⁷ Moneki kuali timokualchijchiuasej kema se toikni techtlaneui ma titlamachtikaj iuaya (Esd. 7:10). Dorín, katli tikijtojkej ipan párrafo eyi kiijtoua: “Nijtlaskamati kema katli iuaya nitlamachtia kuali mokualchijchiua, kiampa kipankixtia tlen tlauel ipati”. Nojkia, tlauel kipaleuia katli momachtia kema kiita nopa omej toikniuaj kuali mokualchijchiuaj. Yeka, kema  amo ueli nochi timokualchijchiuaj, uelis tikitasej kampa tlauel pankisa tlen nopa tlamachtili.

8. ¿Tlake techpaleuis kema timomaijtosej uan kiampa titlajtlanisej tlen nelia moneki kema titlamachtisej?

⁸ Kema tijmachtiaj se akajya, tlauel ipati timomaijtosej, yeka tlaj toikni katli tlamachtia kiijtos tojuantij ma tijchiuakaj moneki kuali timoiljuisej tlake tikijtosej. Kiampa tikiljuisej Jehová tlen nelia kipoloua nopa maseuali (Sal. 141:2). Hanae, se tosiuaikni katli eua Japón, kiilnamiki kenijkatsa momaijtouayaya tosiuaikni katli yauiyaya iuaya katli kimachtiyaya. Kiijtoua: “Nikitak nopa toikni tlauel kuali mouampojchijtoya iuaya Jehová uan na nojkia nijnekiyaya nijchiuas kej ya. Uan kema momaijtouayaya uan nechtokaxtiyaya, kuali nijyolmatiyaya”.

9. Kej kiijtoua Santiago 1:19, ¿tlake uelis tijchiuasej uan kiampa titlapaleuisej kema titlamachtiaj iuaya se akajya?

⁹ Ma tijpaleuikaj katli tlamachtia. Se precursora especial katli eua Nigeria uan itoka Omamuyovbi kiijtoua: “Tlauel kuali kema katli iuaya titlamachtiaj kuali tlakaktok. Nojkia, maske kipankixtia se tlamantli amo tlauel kamanalti pampa kiilnamiki amo ya kiyakana nopa tlamachtili”. Uajka, ¿kema kinamiki tikamanaltisej uan tlake tikijtosej? (Prov. 25:11). Kuali ma tijtlakakilikaj tlen kiijtoua toikni uan katli kimachtia (xijpoua Santiago 1:19). Tlaj kiampa tijchiuaj, uelis tijmatisej kenijkatsa titlapaleuisej. Yeka, amo moneki tlauel tikamanaltisej, amo tijchiuasej kema toikni kamanaltitok yon tikixtomasej seyok tlamachtili. Uajka, ¿tlake tijchiuasej? Uelis tikijtosej se keski tlajtoli, se neskayotl o tijchiuilisej se tlajtlanili tlen kipaleuis kuali ma kikuamachili tlen momachtia. Maske uelis timoiljuisej amo tlauel tijpaleuiaj katli kimachtiaj, ma tikilnamikikaj uelis tijyolchikauasej uan timotekipachosej ipan tlen kipano, kiampa tijpaleuisej kuali ma tlaneltoka.

10. ¿Kenijkatsa uelis kipaleuis katli momachtia tlaj tikiljuisej tlen techpanotok?

¹⁰ Ma tikiljuikaj tlen techpanotok. Tlaj tikitaj kinamiki, uelis tikiljuisej katli momachtia kenijkatsa tijyekojkej tlen melauak, kenijkatsa tikixnamijkej tlaouijkayotl o kenijkatsa techpaleuijtok Jehová (Sal. 78:4, 7). Tlen tikijtosej uelis tlauel kipaleuis katli momachtia. Uelis nojua kuali tlaneltokas, kichiuas se keski tlamantli tlen kipaleuis ma moatsonpoliuilti uan kipaleuis kimatis kenijkatsa kiixnamikis kuesoli (1 Ped. 5:9). Gabriel, se toikni precursor katli eua Brasil, kiijtoua tlake kipaleuik kema kimachtiyayaj: “Toikniuaj nechpouilijkej tlen kinpanok, nopa nechpaleuik ma nikita Jehová kuali kimati tlake kuesoli  tikixnamikij. Nikitak tlaj inijuantij uelkej kiixnamijkej tlen kinpanok, na nojkia ueliskia nijchiuas”.

11, 12. ¿Kenke moneki kuali tikinselisej katli momachtiaj kema yauij tlanechikoli?

¹¹ Tlaj se katli momachtia kineki kuali tlaneltokas uan moatsonpoliuiltis, moneki nochipa yas tlanechikoli uan kichiuas kampeka ma kipaleui tlen nopaya kiyekoua (Heb. 10:24, 25). Uelis katli kimachtia achtoui ya kitlaneui ma yaui tlanechikoli uan yeka yaui. Uajka, ¿tlake uelis tijchiuasej tlaj tijnekij tijpaleuisej nojua ma monechiko?

¹² Kuali ma tikinselikaj katli momachtiaj (Rom. 15:7). Tlaj kuali tikinseliaj katli momachtiaj, nojua kinekisej yasej tlanechikoli. Yeka, kuali ma tikintlajpalokaj, ma tikinpaleuikaj kinixmatisej sekinok toikniuaj uan amo ma tikinpinaualtikaj. Ma tikamanaltikaj ininuaya pampa uelis katli kinmachtia ayamo asi o motekiuijtok. Kuali ma tijtlakakilikaj tlen kiijtosej. ¿Kenijkatsa kinpaleuis tlaj kiampa tijchiuasej? Ma tikitakaj tlen kiijtoua Dimitri, katli kipia san se keski xiuitl moatsonpoliuiltik uan nama tlatekipanoua kej tlapaleuijketl. Ya kiilnamiki kema achtoui yajki tlanechikoli, kiijtoua: “Niijkatoya kalteno kampa mosentiliaj uan tlauel nipinauayaya. Kema se toikni nechitak kuali nechnojnotski uan nechuikak kalijtik. Nimosentlachilik kema miakej yajkej nechtlajpalotoj. Tlauel nechpaktik, nijnekiyaya mojmostla ma onka tlanechikoli. Amo kema kiampa nijyolmajtoya”.

13. ¿Kenijkatsa uelis kinpaleuis katli momachtiaj kej timonejnemiltiaj?

¹³ Kuali ma timonejnemiltikaj. Katli momachtia uelis kipaleuis kej timonejnemiltiaj pampa kiitas tlen momachtia nelia melauak (Mat. 5:16). Vitali, se precursor tlen eua altepetl Moldavia, kiijtoua: “Kema nikitak kenijkatsa itstoyaj toikniuaj, kenijkatsa moiljuiyayaj uan kenijkatsa monejnemiltiyayaj, nechpaleuik nikitas Jehová itlanechikol eli nopa religión tlen melauak”.

14. ¿Kenijkatsa kej timonejnemiltiaj uelis kipaleuis ma tlaneltoka se katli momachtia?

¹⁴ Tlaj se katli momachtia kineki moatsonpoliuiltis, moneki kichiuas tlen momachtia, maske kemantika ouij. Kema kiitas kenijkatsa techpaleuijtok ipan tonemilis tlen Biblia tlamachtia, kiyololinis nojkia kiampa ma kichiua (1 Cor. 11:1). Ma tikitakaj kenijkatsa kipaleuik Hanae katli tikijtojkej ipan párrafo 8. Kiijtoua: “Toikniuaj kichiuayayaj ipan ininnemilis tlen na nijyekojtiauiyaya. Nopa nechpaleuik ma niteyolchikaua, ma nitetlapojpoljui uan ma niteikneli. Toikniuaj  nochipa kiniljuiyayaj sekinok tlen kinpaleuiyaya. Yeka, nijnejki nijchiuas kej inijuantij”.

15. Kej kiijtoua Proverbios 27:17, ¿kenke moneki timouampojchiuasej ininuaya katli pejtokej yauij tlanechikoli?

¹⁵ Ma timouampojchiuakaj ininuaya. Kema katli momachtiaj yauij tlanechikoli, ma tijnextikaj techtekipachoua tlen kinpano (Filip. 2:4). Ma tikamanaltikaj uan ma timouampojchiuakaj ininuaya, nopa kinpaleuis kuali ma tlaneltokakaj uan kinekisej moatsonpoliuiltisej. Uelis tikiniljuisej tiyolpakij pampa kipatlatokej se keski tlamantli. Nojkia, uelis tikintlatsintokisej kenijkatsa kiitaj tlen momachtijtokej, kenijkatsa itstokej ininchampoyouaj uan kampa tekitij. Kema kiampa tijchiuasej, moneki tikitasej amo tikintlatsintokisej tlen kichiuas ma pinauakaj (xijpoua Proverbios 27:17). Hanae katli nama tlatekipanoua kej precursora kiijtoua kenijkatsa kiyolmatiyaya kema pejki monechikoua. Kiijtoua: “Kema pejki nimouampojchiua ininuaya toikniuaj nechpaleuik nojua nijnejki nias tlanechikoli. Nochipa niauiyaya maske tlauel nisiajtoya. Tlauel nechpaktiyaya niitstos ika nouampoyouaj, uan nechpaleuik ayokmo ma nimouika ininuaya katli achtouia eliyayaj nouampoyouaj. Nijnekiyaya niitstos Jehová inechka uan ininuaya toikniuaj, yeka nijnejki nimoatsonpoliuiltis”.

16. ¿Tlake seyok tlamantli moneki tijchiuasej uan kiampa katli momachtia kuali kiyolmatis?

¹⁶ Kema katli momachtia nojua kuali tlaneltokatias, ma tijpaleuikaj kuali ma kiyolmati ipan tlanechikoli. Uan uelis kiampa tijchiuasej tlaj kuali tijseliaj ipan tochaj (Heb. 13:2). Denís, se toikni katli tlatekipanoua ipan Moldavia kiilnamiki kema kimachtiyayaj: “Nosiua uan na, miakpa techtlaneuiyayaj ininchaj toikniuaj. Tlauel techyolchikauayayaj kema kiijtouayayaj kenijkatsa Jehová kinpaleuijtoya. Nopa techpaleuik ma tijnekikaj tijtekipanosej Jehová uan ma tikitakaj tijseliskiaj miak tlateochiualistli”. Kema se akajya peua tlajtolmoyaua uelis tikiljuisej sansejko ma titlajtolmoyauakaj. Toikni Diego katli eua Brasil kiijtoua: “Miakej toikniuaj nechiljuiyayaj ma nitlajtolmoyaua ininuaya, kiampa tlauel kuali nikinixmatki, nijyekok miak tlamantli uan nojua kuali nimouampojchijki ininuaya Jehová uan Jesús”.

17. ¿Tlake uelis kichiuasej ueuejtlakamej uan kiampa kinpaleuisej katli momachtiaj?

¹⁷ Xijchiua kampeka tiitstos ininuaya katli momachtiaj. Ueuejtlakamej uelis kinpaleuisej katli momachtiaj ma moatsonpoliuiltikaj, tlaj kinikneliaj uan kintekipachoua tlen kinpano. ¿Uelis inkamanaltisej ininuaya maske se kentsi ipan tlanechikoli?  Inijuantij kiitasej inkinikneliaj tlaj inkiilnamikij inintoka, kej kema tlanankilisej ipan tlanechikoli. ¿Ueliskia inkichiuasej kampeka intlamachtitij iuaya se toikni? Nopa tlauel kipaleuis katli kimachtia. Jackie, se precursora katli eua Nigeria kiijtoua: “Miakej katli nikinmachtia mosentlachiliaj kema kimatij katli yajki nouaya tlamachtito eli se ueuejtlakatl. Se katli nijmachtia kiijtok: ‘Katli tlayakana ipan noreligión amo kema kiampa kichiuaskia. Ya yaui san kampa tlatominpiaj uan tlaj kitlaxtlauiaj’”. Nama katli nijmachtia yaui ipan tlanechikoli.

18. ¿Kenijkatsa ueuejtlakamej uelis kichiuasej tlen kiijtoua Hechos 20:28?

¹⁸ Kinpaleuisej sekinok kuali ma tlamachtikaj. Ueuejtlakamej, inmojuantij moneki inkinpaleuisej toikniuaj kuali ma tlajtolmoyauakaj uan ma tlamachtikaj (xijpoua Hechos 20:28). Tlaj se akajya majmaui tlamachtis inmouaya, uajka inmojuantij xijpaleuikaj. Jackie kiijtoua: “Ueuejtlakamej nochipa nechtlatsintokiaj kenijkatsa itstokej katli nikinmachtia, uan nechpaleuiaj kema amo nijmati kenijkatsa nikinpaleuis”. Ueuejtlakamej uelis kinyolchikauasej uan kinpaleuisej toikniuaj nojua kuali ma tlamachtikaj (1 Tes. 5:11). Jackie nojua kiijtoua: “Nechyolchikaua kema ueuejtlakamej kiijtouaj kipatiitaj nopa tekitl tlen nijchiua. Tlen nechiljuiaj nechyolsejseltia kej nopa atl tlen nikiji kema tlauel tlatotonia. Nojkia tlen kiijtouaj nechpaleuia amo ma nimajmaui uan ma niyolpaki kema nitlamachtia” (Prov. 25:25).

19. ¿Tlake ueliskia kichiuas ma tiyolpakikaj?

¹⁹ Maske uelis amo aka tijmachtiaj, nojkia uelis tijpaleuisej se akajya kuali ma tlaneltoka. Kema se toikni tlamachtia, uelis tijpaleuisej kema tikijtosej tlen nelia kipaleuis katli kimachtia. Ma timouampojchiuakaj ininuaya kema yauij tlanechikoli uan kuali ma timonejnemiltikaj. Ueuejtlakamej moneki kikauasej tonali uan kiampa kinyolchikauasej katli momachtiaj. Nojkia moneki kinpaleuisej katli tlamachtiaj nojua kuali ma tlamachtikaj uan kiniljuisej kuali kichiuaj ininteki. Tlaj titlapaleuiaj, tlauel tiyolpakisej kema se katli momachtia peuas kiiknelis uan kitekipanos Jehová.