1-2. Ko hai kua maeke ke lagomatai e tagata fakaako Tohi Tapu ke holo atu ke papatiso?

“FIAFIA lahi au ke he mena ne fakaako e au ke he Tohi Tapu,” ui e Amy ne nofo i Fiti. “Iloa e au ko e kupu mooli. Ka ko e mogo ne kamata au ke fakalataha mo e tau matakainaga ti lagomatai he tau mena ia au ke taute e tau hikiaga mo e papatiso.” Fakamaama he tala ha Amy e mooli he mena nei: Liga tumau e tagata fakaako Tohi Tapu ke holo ki mua ke he papatiso ka moua e ia e lagomatai he falu he fakapotopotoaga.

² Igatia e tagata fakailoa mo e lagomatai a ia ne foou ke fai vala he fakapotopotoaga. (Efeso 4:16) Ko e paionia ko Leilani ne nofo i Vanuatu, ne pehē: “Maeke e maaga katoa ke feaki e tama. Pihia foki e manatu haaku ke he taute tutaki; maeke e fakapotopotoaga ke tamai e taha tagata ki loto he kupu mooli.” Ti ko e tau tagata he magafaoa, tau kapitiga, mo e tau faiaoga kua fai vala oti ke lagomatai e tama ke lahi. Taute e lautolu e mena nei he fakamafana e tama mo e fakaako ki a ia e tau matapatu fakaakoaga. Maeke foki e tau tagata fakailoa ke fakatonu, fakamafana, mo e fakatoka e fakafifitakiaga mitaki ma e tau tagata fakaako Tohi Tapu he lagomatai a lautolu ke holo atu ke papatiso.​—Fakatai 15:22.

3. Ko e heigoa kua fakaako e koe mai he tau mena ne talahau e Ana, Dorin, mo Leilani?

³ Ko e ha kua lata e tagata fakailoa ne taute e fakaako Tohi Tapu ke fiafia he lagomatai he falu he fakapotopotoaga e tagata fakaako Tohi Tapu? Ko Ana ko e paionia pauaki i Moldova,  ne pehē, “Uka lahi ke he taha e tagata ke leveki e tau manako oti he tagata fakaako Tohi Tapu ka kamata a ia ke holo ki mua.” Ko Dorin ko e matakainaga taane paionia pauaki, ne fekafekau he motu ia foki ne pehē, “Fa mahani ke talahau he falu tagata fakailoa e taha mena ne hokotia ke he loto he tagata fakaako, ko e taha mena ne nakai manatu au ki ai.” Talahau foki e Leilani e taha kakano, “Ko e fakaalofa mo e mafanatia ne fakakite ke he tagata fakaako ka lagomatai a ia ke mailoga e tau tagata ha Iehova.”​—Ioane 13:35.

4. Ko e heigoa ka fakatutala a tautolu he vala tala nei?

⁴ Ka e liga manatu a koe, ‘Ko e heigoa haaku ka taute ke lagomatai e tagata fakaako Tohi Tapu ke holo ki mua ka nakai ko au ne taute e fakaako Tohi Tapu?’ To fakatutala ke he mena ke taute ka uiina a tautolu ke he fakaako Tohi Tapu mo e mena ka taute e tautolu ka kamata e tagata fakaako Tohi Tapu ke fano ke he tau feleveiaaga. To kitia foki e tautolu e puhala ka lagomatai he tau motua e tau tagata fakaako Tohi Tapu ke holo atu ke he papatiso.

5. Ko e heigoa e matagahua kua lata a koe ke taute ka uiina a koe ke fano he fakaako Tohi Tapu?

⁵ He fakaako Tohi Tapu, ko e matagahua pauaki he faiaoga ke lagomatai e tagata fakaako ke maama e Kupu he Atua. Ka uiina he faiaoga a koe ke fakatauō mo ia, lata a koe ke eke mo hoa haana. Ko e matagahua haau ke lalago a ia. (Fakama. 4:9, 10) Ka ko e heigoa haau ka taute ke eke mo lagomatai mitaki he fakaako Tohi Tapu?

6. Ka uiina a koe ke fano ke he fakaako Tohi Tapu, fakagahua fēfē e koe e matapatu fakaakoaga he Tau Fakatai 20:18?

⁶ Tauteute ma e fakaako Tohi Tapu. Fakamua, hūhū ke he faiaoga ke tala atu ki a koe e taha mena hagaao ke he tagata fakaako. (Totou Tau Fakatai 20:18.) Liga hūhū a koe: “Ko e heigoa haau ne iloa ke he tagata fakaako Tohi Tapu? Ko e heigoa e matakupu haau ka fakaako mo ia? Ko e heigoa e foliaga haau ke he fakaakoaga nei? Fai mena nakai ne lata po ke nakai lata au ke taute po ke talahau he fakaakoaga? Ko e heigoa haau ka taute ke fakamafana e tagata fakaako ke holo ki mua?” Maaliali ai, to nakai tala atu he faiaoga e tau vala tala fakatagata he tagata fakaako, ka ko e mena ka tala atu e ia ki a koe to lagomatai. Ko e misionare ko Joy ne tutala ke he tau mena nei mo lautolu ne ō mo ia ke he fakaako Tohi Tapu. Pehē a ia: “Lagomatai he mena nei e hoa haaku ke fiafia ke he tagata fakaako mo e iloa e mena ke talahau he mogo ka fakaako.”

7. Ko e ha kua lata a koe kua eke mo hoa ke tauteute ma e fakaakoaga?

⁷ Ka uiina a koe ke fano ke he fakaakoaga, mitaki ke tauteute e koe e vala tala ka fakatutala ki ai. (Esera 7:10) Ko Dorin ne totoku  fakamua, ne pehē: “Fakaaue au ka tauteute e hoa haaku ma e fakaakoaga. Ti maeke a ia ke talahau e tau manatu kua aoga.” Lafi ki ai, to mailoga he tagata fakaako kua tauteute fakamitaki a mua mo e to fakatoka he mena nei e fakafifitakiaga mitaki ma haana. Pete ka nakai maeke a koe ke tauteute katoatoa e vala tala, lali ke fai magaaho ke moua e tau matapatu manatu he fakaakoaga.

8. Maeke fēfē e liogi haau he fakaako Tohi Tapu ke fai kakano mooli?

⁸ Ko e liogi ko e vala aoga he fakaako Tohi Tapu, ti manamanatu tuai ke he mena ke talahau ka ole ki a koe ke liogi. To fai kakano mooli e liogi haau. (Sala. 141:2) Ko Hanae ko e matakainaga fifine ne nofo i Sapanī, ne manatu agaia e tau liogi he matakainaga fifine ne hau mo e faiaoga Tohi Tapu haana. Pehē a ia: “Logona e au e fakafetuiaga malolō haana mo Iehova ti manako au ke tuga a ia. Logona foki e au e fakaalofa he talahau e ia e higoa haaku he tau liogi haana.”

9. Ia Iakopo 1:19, ko e heigoa haau ka taute ke eke mo hoa mitaki he fakaako Tohi Tapu?

⁹ Lalago e faiaoga he magaaho fakaako. “Ko e hoa mitaki kua muitua ke he fakaakoaga,” ui e Omamuyovbi ko e paionia pauaki i Nigeria. “Talahau he hoa e tau manatu hokulo ka e nakai tutala tumau he mailoga ko e matagahua he faiaoga ke taute e fakaako.” Ko e magaaho fe kua lata a koe ke talahau e taha mena ti ko e heigoa ne lata a koe ke talahau? (Fakatai 25:11) Fanogonogo fakamitaki he tutala e faiaoga mo e tagata fakaako. (Totou Iakopo 1:19.) Mautali mogoia a koe ke lagomatai ka latatonu. Lata a koe ke manamanatu to vagahau. Tuga anei, nakai manako a koe ke tutala tumau, fakatauhele e manatu ne fakamaama he faiaoga, po ke tutala ke he taha matakupu kehe. Ka ko e tali kū, fakatai, po ke hūhū haau ka lagomatai ke fakamaama fakamaaliali e manatu ne kua fakaako. Falu magaaho, liga logona hifo e koe kua nakai fai mena ke lafi ke he matakupu. Kaeke ke nava a koe ke he tagata fakaako mo e fakakite e fiafia fakatagata ki a ia to lagomatai lahi e koe a ia ke holo ki mua.

10. To lagomatai fēfē he tala haau e tagata fakaako Tohi Tapu?

¹⁰ Talahau e tau iloaaga haau. Ka latatonu, maeke a koe ke tala age fakakū ke he tagata fakaako e puhala ne iloa e koe e kupu mooli, puhala ne kautū a koe ke he lekua, po ke puhala kua kitia e koe e lagomatai ha Iehova ke he moui haau. (Sala. 78:4, 7) Liga ko e mena nei kua lata e tagata fakaako ke logona. Liga fakamalolō e tua haana po ke fakamafana a ia ke matutaki ke holo atu ke papatiso. Ti liga fakakite ki a ia e puhala ke kautū ke he kamatamata kua fehagai mo ia. (1 Pete. 5:9) Ko Gabriel ne nofo i Brazil ko e paionia mogonei ne manatu e puhala ne lagomatai a ia he fakaako e Tohi Tapu. Pehē a ia: “He logona e au e  tau mena ne tutupu ke he tau matakainaga, fakaako ki a au na iloa e Iehova e tau lekua ha tautolu. Ka kautū a lautolu to maeke foki au.”

11-12. Ko e ha kua lata a tautolu ke fakafeleveia mafanatia e tagata fakaako Tohi Tapu kua hau ke he tau feleveiaaga?

¹¹ Ma e tagata fakaako Tohi Tapu ke holo atu ke papatiso, lata a ia ke fano tumau ke he tau feleveiaaga mo e aoga mai i ai. (Hepe. 10:24, 25) Liga to uiina he faiaoga a ia ke he feleveiaaga fakamua. Ka hau a ia, maeke a tautolu oti ke fakamafana a ia ke hau tumau ke he Fale he Kautu. Taute fēfē e tautolu e mena ia?

¹² Fakafeleveia mafanatia ke he tagata fakaako. (Roma 15:7) Ka fakafeleveia fakamitaki e tagata fakaako ke he tau feleveiaaga, to manako a ia ke hau tumau ke he Fale he Kautu. He nakai fakafuafuakelea e tagata fakaako, fakafeleveia mafanatia ki a ia mo e uta a ia ke feleveia mo e falu. Ua manatu teao kua fai tagata ne leveki a ia; liga mule po ke fai matagahua e faiaoga haana ke taute. Fanogonogo fakamitaki ke he mena ne talahau he tagata fakaako ti fakakite e fiafia ki a ia. Maeke fēfē he feleveia mafanatia haau ke lauia e tagata fakaako? Mailoga e mena ne tupu ki a Dmitrii, ne fai tau laia he papatiso mo e ko e fekafekau lagomatai mogonei. He liu manatu e feleveiaaga fakamua haana, ui e ia: “Kitia he matakainaga taane au ne fakatali i fafo he Fale he Kautu ti totonu a ia he uta au ki loto. Tokologa ne o mai ke feleveia mo au. Ofo lahi au. Fiafia lahi mahaki au ki ai, ti manako ke fai feleveiaaga he tau aho oti he faahi tapu. Nakaila fai mena pihia kua tupu ki a au.”

13. Lauia fēfē e tagata fakaako Tohi Tapu ha ko e mahani haau?

¹³ Fakatoka e fakafifitakiaga mitaki. Ko e mahani haau ka lagomatai e tagata fakaako Tohi Tapu ke talitonu kua moua e ia e kupu mooli. (Mata. 5:16) Ko Vitalii ko e paionia mogonei i Moldova, ne ui: “Mailoga e au e puhala moui, manamanatu, mo e mahani he falu he fakapotopotoaga. Omoomoi he mena nei au, ko e Tau Fakamoli a Iehova kua o fano mooli mo e Atua.”

14. To lagomatai fēfē he fakafifitakiaga haau e taha tagata ke tumau e holo ki mua?

¹⁴ Ke hokotia e tagata fakaako ke papatiso kua lata a ia ke fakagahua e mena ne fakaako e ia. Nakai mukamuka tumau e mena nei. Ka kitia he tagata fakaako e puhala kua aoga a koe he fakagahua e tau matapatu fakaakoaga he Tohi Tapu, liga manako a ia ke fifitaki a koe. (1 Kori. 11:1) Manamanatu ke he tala ha Hanae ne totoku fakamua. Pehē a ia: “Kua fitā e tau matakainaga he taute e tau mena ne fa e fakaako au ki ai. Kitia e au e puhala kua lata au ke fakamafana mo e fakamagalo atu mo e fakakite e fakaalofa. Talahau tumau e lautolu  e tau mena mitaki hagaao ke he falu. Manako au ke fifitaki a lautolu.”

15. Lagomatai fēfē he Tau Fakatai 27:17 a tautolu ke kitia e kakano kua lata a tautolu ke kapitiga mo e tagata fakaako Tohi Tapu he matutaki a ia ke hau he tau feleveiaaga?

¹⁵ Kapitiga ke he tagata fakaako. He tumau e tagata fakaako ke fano ke he tau feleveiaaga, tumau ke fakakite e fiafia ki a ia. (Filipi 2:4) Lali ke iloa mitaki a ia. He nakai hūhū lahi ke he tau mena fakatagata, maeke a koe ke nava ki a ia ke he tau hikiaga mitaki ne kua taute e ia mo e hūhū hagaao ke he fakaako Tohi Tapu, magafaoa, mo e gahua haana. Liga fakatata fakalahi he tau fakatutala nei a mutolu. Ka fakakapitiga a koe ke he tagata fakaako, lagomatai e koe a ia ke holo atu ke papatiso. (Totou Tau Fakatai 27:17.) Eke a Hanae mogonei mo paionia tumau. He liu manatu e fina atu fakamua haana ke he tau feleveiaaga, pehē a ia: “He moua e au e tau kapitiga he fakapotopotoaga, kamata au ke amaamanaki lahi atu ke he tau feleveiaaga, mo e fano foki ka lolelole. Fiafia au ke fakalataha mo e tau kapitiga foou haaku ti lagomatai he mena nei au ke fakaoti e kapitiga mo e tau tagata ne nakai tapuaki ki a Iehova. Manako au ke fakatata lahi ki a Iehova mo e tau matakainaga. Ti fifili au ke papatiso.”

16. Ko e heigoa foki e mena ka taute e koe ke lagomatai e tagata fakaako Tohi Tapu ke logona hifo e fiafia i loto he fakapotopotoaga?

¹⁶ He matutaki e tagata fakaako ke holo ki mua mo e taute e tau hikihikiaga, lagomatai a ia ke logona hifo ko ia taha he fakapotopotoaga. Maeke a koe ke taute e mena nei he fakamokoi. (Hepe. 13:2) Ko Denis ne nofo i Moldova, ne manatu e mogo ne fakaako Tohi Tapu a ia, ti pehē: “Lagaloga e uiina ki a au mo e hoana haaku ke fiafia auloa mo e tau matakainaga. Logona e maua e puhala ne lagomatai e Iehova a lautolu. Fakamafana he mena ia a maua. Lagomatai he tau magaaho nei a maua ke talitonu kua manako a maua ke fekafekau ki a Iehova, mo e to amaamanaki a maua ke he moui ofoofogia.” Ka hokotia e tagata fakaako Tohi Tapu ke eke mo tagata fakailoa, maeke a koe ke uiina foki a ia ke ō he gahua fakamatala. Ko Diego ko e tagata fakailoa i Brazil, ne pehē: “Tokologa e matakainaga taane ne uiina au ke ō he gahua fakamatala. Ko e puhala mitaki lahi anei ke iloa mitaki a lautolu. He taute pihia e au, loga e mena ne fakaako e au ti tata lahi ki a Iehova mo Iesu.”

17. Lagomatai fēfē he tau motua e tau tagata fakaako Tohi Tapu?

¹⁷ Fai magaaho ma e tau tagata fakaako Tohi Tapu. Tau motua, lagomatai he fiafia ha mutolu e tau tagata fakaako ke holo atu ke papatiso. Maeke nakai a koe ke tutala tumau mo e tau tagata fakaako Tohi Tapu he tau feleveiaaga? To fiafia a lautolu ka manatu e koe e tau  higoa ha lautolu, mua atu ka kamata a lautolu ke tali. Maeke nakai a koe ke fai magaaho ke fano mo e tagata fakailoa ka taute e ia e fakaako Tohi Tapu mo e taha tagata? Liga lahi e mena ne maeke a koe ke lagomatai e tagata fakaako ke he mena ne manatu e koe. Ko e paionia ko Jackie ne nofo i Nigeria, ne pehē: “Tokologa e tagata fakaako ne ofo he iloa ko e matakainaga taane ne ō mo au ke he fakaako ha lautolu ko e motua. Taha e tagata fakaako Tohi Tapu ne talahau: ‘Ai maeke e akoako haaku ke taute e mena ia. Ahiahi ni a ia ke he tau tagata monuina mo e ka totogi a ia!’” Fano e tagata fakaako ia mogonei ke he tau feleveiaaga.

18. Fakamooli fēfē he tau motua e matagahua ne tuku age ki a lautolu he Gahua 20:28?

¹⁸ Fakamahani mo e atihake e tau faiaoga Tohi Tapu. Tau motua, ha ha ia mutolu e matagahua uho lahi ke lagomatai e tau tagata fakailoa ke lauia mitaki he gahua fakamatala ha lautolu, putoia ai e gahua fakaako Tohi Tapu. (Totou Gahua 20:28.) Ka mā e matakainaga ke taute e fakaako Tohi Tapu kaeke ko koe i ai, ole ke taute e koe e fakaako. Ko Jackie ne totoku fakamua, ne ui: “Hūhū tumau e tau motua hagaao ke he tau tagata fakaako Tohi Tapu haaku. Ka uka ia au ke taute e fakaako Tohi Tapu, foaki e lautolu e lagomatai aoga.” Lahi e mena ka taute he tau motua ke tomatoma mo e fakalagalaga e tau faiaoga ke fakauka. (1 Tesa. 5:11) Lafi e Jackie: “Fiafia au ka atihake he tau motua au mo e tala mai kua loto fakaaue a lautolu ke he gahua malolō haaku. Fakahauhau he tau kupu pihia au ke tuga e kalase vai momoko he aho vela. Fakamalolō he nava ha lautolu e mauokafua haaku mo e fakalahi e fiafia ke he gahua fakaako Tohi Tapu.”​—Fakatai 25:25.

19. Ko e heigoa e fiafia ka moua e tautolu oti?

¹⁹ Pete ne nakai taute e tautolu e fakaako Tohi Tapu mogonei, maeke agaia a tautolu ke lagomatai e taha tagata ke tupu fakaagaaga. He nakai tutala tumau, maeke he tau tali tauteute fakamitaki ha tautolu ke lalago e faiaoga he magaaho fakaako. Fakakapitiga ke he tau tagata fakaako ka o mai a lautolu ke he Fale he Kautu, ti eke a tautolu mo tau fakafifitakiaga mitaki ma lautolu. Maeke he tau motua ke atihake e tau tagata fakaako he fai magaaho mo lautolu mo e fakamahani mo e nava ke he tau faiaoga. Fiafia lahi a tautolu ka taute e taha mena pete he tote ke lagomatai e taha tagata ke fakaalofa mo e fekafekau ke he Matua ko Iehova!