1-2. Kansi ni ŵani angayavye wophunzila Baibo kuti alute pasogolo mpaka kubatizika?

KALONGOSI Amy, wa ku Fiji elaŵila kuti, “Nenzokonda zenenzophunzila kufumila m’Baibo. Nenzoziŵa kuti zenze zacendi. Koma peneyamba kutandala na akwasu na azilongosi a mumpingo, niye penecinja umoyo wangu nobatizika.” Zecilaŵila kalongosi Amy zutiphunzisa mfundo yofunika ngako iyi: Wophunzila Baibo ocinja zinthu ziyakine pa umoyo noyenelela ubatizo ngati oyavyiwa na ŵanthu ayakine mumpingo.

² Wofalisa aliyense angayavye ophunzila Baibo kuti ayambe kukatizhyana na mpingo. (Aef. 4:16) Kalongosi Leilani wa ku Vanuatu, wamene ni mpainiya, elaŵila kuti: “Pali mwambi uyakine wamene utanthauza kuti aliyense m’munzi angayavye kuti mwana akule. Nuganiza kuti n’cimozimozi na zucitika pa nchito yopanga ophunzila; zudalila mpingo wonse kuti uyavye munthu kuwela m’cendi.” Makolo, abanja, ayao na matica oyavya ngako kuti mwana akule. Ocita izi mwa kulimbikisha mwana nomuphunzisa mfundo zofunika. Molingana na izi, ofalisa angatwale malangizo, kulimbikisha noonesha cisanzo ciweme kwa ophunzila Baibo, zamene zingaŵayavye kuluta pasogolo mpaka kubatizika.​—Miy. 15:22.

3. Kansi mwaphunzilapo cinji pa zecilaŵila kalongosi Ana, mkwasu Dorin na kalongosi Leilani?

³ Ndaŵa yanji wofalisa wamene ni mwineco waphunzilo, ofunika kusangalala ngati ofalisa mumpingo oyavya phunzilo yake? Onani zecilaŵila kalongosi Ana wa ku Moldova, wamene ni mpainiya wapadela. Yove elaŵila kuti: “Wophunzila Baibo ofunika kuyavyiwa m’mbali zinyinji. Ndipo n’cinthu covuta kuti munthu  m’mozi akwanishe kumuyavya m’mbali zonse.” Mkwasu Dorin wa ku Moldova, wamene otumikila monga mpainiya wapadela, elaŵila kuti: “Kanyinji-kanyinji, ofalisa olaŵila zinthu zokata mtima kuli wophunzila Baibo, zamene nenze nikaliyoziganizilapo.” Kalongosi Leilani elaŵila soti cifukwa ciyakine catufunikila kukondwela ngati ayakine oyavya phunzilo yasu. Yove eciti: “Ngati wophunzila Baibo oona cikondi na cisamalilo ca akwasu na azilongosi, zumuyavya kuzindikila kuti nise cendi atumiki a Yehova.”​—Yoh. 13:35.

4. Kansi tilaŵizhyane cinji m’nkhani ino?

⁴ Payakine mungazikonshe kuti, ‘Kansi ningacite cinji kuti niyavye wophunzila Baibo kuluta pasogolo pamene n’neo lini numusogoza phunzilo?’ Lomba, tiyeni tilaŵizhyane zatingacite ngati muyakine watisenga kuti tilute naye ku phunzilo ya Baibo koma soti zatingacite ngati wophunzila Baibo wayamba kupezeka pa misonkhano. Tione soti mwamene akulu angayavyile wophunzila Baibo kuluta pasogolo mpaka kubatizika.

5. Kansi mufunika kucita cinji ngati wofalisa muyakine wakusengani kuti mulute naye ku phunzilo yake?

⁵ Pa phunzilo ya Baibo, womuphunzisa niye ali na udindo woyavya wophunzila kumvwishisha Mau a Mulungu. Ngati wofalisa wakusengani kuti mulute naye ku phunzilo yake, mufunika kuona kuti nimwe mthandizi wake. (Mla. 4:9, 10) Koma kansi mungacite cinji kuti munkhale mthandizi muweme pa phunzilo ya Baibo?

6. Ngati wofalisa muyakine wakusengani kuti mulute naye ku phunzilo yake, kansi mungaseŵenzeshe tyani mfundo yopezeka pa Miyambo 20:18?

⁶ Mufunika kukonzekela. Coyamba, mukokonsha womuphunzisa Baibo kuti akuuzhyeni ziyakine zokhuza wophunzila Baibo wake. (Ŵelengani Miyambo 20:18.) Mungakonshe kuti: “Kansi muziŵa zotyani zokhuza wophunzila Baibo wanu? Kansi mukuyophunzila naye mutu wotyani? Kansi mufuna mukagogomezele mfundo zotyani pa mutu wamene uyu? Kansi pali zilizonse zanufunika kupewa kucita olo kulaŵila patili pa phunzilo? Kansi ningamulimbikishe tyani kuti alute pasogolo?” Mosakaikila, womuphunzisa angakuuzhyeni lini nkhani zacisinsi zokhuza wophunzila wake, koma zaangakuuzhyeni zingakuyavyeni. Kalongosi Joy wamene ni m’mishonale, okonda kulaŵizhyana makonsho aŵa ngati watola wofalisa muyakine kuti alute naye ku phunzilo yake. Yove elaŵila kuti: “Kulaŵizhyana izi, kuyavya wofalisa wanaluta naye ku phunzilo kunkhala na cidwi mwa wophunzila wangu noziŵa zaangalaŵilepo pa phunzilo.”

7. Ndaŵa yanji mufunika kukonzekela ngati wofalisa muyakine wakusengani kuti mulute naye ku phunzilo yake?

⁷ Ngati wofalisa muyakine wakusengani kuti mulute naye ku phunzilo yake, mungacite luweme kukonzekela zati mukaphunzile. (Eza.  7:10) Mkwasu Dorin, watatomola koyambilila elaŵila kuti: “Nuyamikila ngako ngati wofalisa wanaluta naye ku phunzilo okonzekela. Izi zuyavya kuti akolaŵilapo mfundo zoyavya.” Kuyangizhyila apo, wophunzila Baibo azindikile kuti monse aŵili mwekonzekela, ndipo izi zitwale cisanzo ciweme kwa yove. Olo kuti nthawi ziyakine mungakwanishe lini kukonzekela luweme phunzilo yonse, mungacite bwino kupeza mfundo zikulu-zikulu zamene zingamuyavye.

8. Kansi mufunika kucita cinji kuti mukokwanisha kutwala pemphelo yokata mtima ngati mwineco wa phunzilo wakusengani kuti mupemphele?

⁸ Pemphelo ni mbali yofunika ngako pa phunzilo. Tetyo, mufunika kuganizila zamungalaŵile m’pemphelo ngati mwineco wa phunzilo wakusengani kuti mupemphele. Ngati mucita izi, pemphelo yanu inkhale yokata mtima. (Sal. 141:2) Kalongosi Hanae wa ku Japan, akalukumbukila mapemphelo yeenzotwala kalongosi wamene enzowela na mphunzisi wake wa Baibo. Yove elaŵila kuti: “Neona kuti enze pa ushamwali wotang’a na Yehova, ndipo nenzofunishisha kunkhala monga ni yove. Nenzolimvwa soti kunkhala wokondewa peenzotomola zina yangu m’mapemphelo.”

9. Molingana na Yakobo 1:19, mungacitenji kuti munkhale mthandizi muweme posogoza phunzilo?

⁹ Mukoyavya wophunzisa pa phunzilo. Kalongosi Omamuyovbi wa ku Nigeria, wamene ni mpainiya wapadela, elaŵila kuti, “Mthandizi muweme okonkha mosamala pausogoza phunzilo. Olaŵilapo mfundo zoyavya, koma opewa kulaŵilapo ngako cifukwa ozindikila kuti mphunzisi niye ali na udindo wosogoza phunzilo.” Kansi mungaziŵe tyani pamufunika kulaŵilapo olo zamungalaŵilepo pa phunzilo? (Miy. 25:11) Mukomvwishila mosamala pamene mphunzisi na wophunzila Baibo olaŵizhyana. (Ŵelengani Yakobo 1:19.) Izi zingakuyavyeni kuziŵa nthawi yoyenela yamungalaŵilepo. Koma mufunika kuganizilapo mukaliyolaŵila. Mwacisanzo, mufunika lini kulaŵilapo ngako, kujuŵa mau wophunzisa ngati olaŵila olo kuyamba nkhani iyakine. Koma mwa kulaŵilapo mwacidule, kuseŵenzesha fanizo olo konsho mungayavye kumvwikisha mfundo yamuphunzila. Nthawi ziyakine, mungaone kuti muliye zinyinji zamungalaŵile. Koma ngati muyamikila noonesha cidwi kwa wophunzila Baibo, mungamuyavye kuti alute pasogolo.

10. Kansi zokumana nazo zanu zingayavye tyani wophunzila Baibo?

¹⁰ Mukomuuzhyako zokumana nazo zanu. Ngati ni poyenelela, mungauzhyeko wophunzila Baibo mwemwephunzilila cendi, mwemwegonjesela mavuto yemwekumana nayo olo mwecikuyavyilani Yehova mu umoyo wanu. (Sal. 78:4, 7) Payakine cokumana naco canu niye cingayavye wophunzila Baibo. Cingamuyavye kutang’isha cikhulupililo cake nomulimbikisha kupitilizhya kuluta pasogolo mpaka kubatizika. Izi zingamuyavye kuziŵa mwaangagonjesele mayeselo yakukumana nayo. (1 Pet. 5:9) Mkwasu  Gabriel wa ku Brazil, wamene otumikila monga mpainiya wanthawi zonse, okumbukila mwecipindulila peenzophunzila Baibo. Yove elaŵila kuti: “Penecimvwa zokumana nazo za akwasu, nephunzilapo kuti Yehova oziŵa mavuto yatukumana nayo. Ndipo ngati ove eyagonjesa, niye kuti nane ningakwanishe kuyagonjesa.”

11-12. Ndaŵa yanji tufunika kuŵalandila mwaubwenzi ophunzila Baibo amene owela pa misonkhano?

¹¹ Kuti wophunzila Baibo alute pasogolo nobatizika, ofunika kupezeka pa misonkhano ya mpingo nthawi zonse nopindula nayo. (Aheb. 10:24, 25) Mosakaikila, mphunzisi wake niye angamuitile ku misonkhano. Wophunzila Baibo akafwika pa misonkhano, tonse tingamulimbikishe kuti apitilizhye kuwela ku Ng’anda ya Ufumu. Kansi tingacite tyani zamene izi?

¹² Mulandileni mwaubwenzi wophunzila Baibo. (Aro. 15:7) Ngati tamulandila luweme wophunzila Baibo, zingamulimbikishe kuti apitilizhye kusonkhana. Muyavyeni kunkhala womasuka mwa kumulandila mwaubwenzi nomuziŵikisha kuli ayakine. Mukolaŵila naye cifukwa payakine womuphunzisa Baibo angacelwe kufwika olo angankhale wotangwanika na nchito ziyakine za pa Ng’anda ya Ufumu. Mukomvwishila mosamala zakulaŵila nomuonesha cidwi. Kansi kumulandila luweme wophunzila Baibo kungamuyavye tyani? Ganizilani cisanzo ca mkwasu Dmitrii wamene ebatizika calombapano, ndipo lomba otumikila monga mtumiki woyavya. Yove elaŵila kuti: “Nukumbukila nthawi yoyamba penefwika pa misonkhano. Mkwasu muyakine peciona kuti nuyembekeza panja pa Ng’anda ya Ufumu, enitola noluta nane mkati. Akwasu na azilongosi anyinji ewela kuzonipasa moni. Nedabwa ngako soti. Nesangalala ngako cakuti nenzolakalaka kusonkhana siku iliyonse. Nenze nikaliyoonapo zoteti.”

13. Kansi cisanzo canu ciweme cingayavye tyani wophunzila Baibo?

¹³ Mukoonesha cisanzo ciweme. Cisanzo canu cingayavye wophunzila Baibo kuziŵa kuti nise Akhristu acendi. (Mat. 5:16) Mkwasu Vitalii wa ku Moldova, wamene ni mpainiya wanthawi zonse, elaŵila kuti: “Neona nkhalidwe ya ayakine mumpingo na mweenzocitila vinthu. Izi zenisimikizhyila kuti Mboni za Yehova ni atumiki a Mulungu acendi.”

14. Kansi cisanzo canu cingayavye tyani wophunzila Baibo kuluta pasogolo?

¹⁴ Kuti wophunzila Baibo ayenelele kubatizika, ofunika kuseŵenzesha zakuphunzila. Kucita izi n’kosapepuka. Koma ngati wophunzila Baibo oona mwamene kuseŵenzesha mfundo za m’Baibo kukuyavyilani, naye angalimbikishiwe kutolela cisanzo canu. (1 Akor. 11:1) Ganizilani cisanzo ca kalongosi Hanae, watatomola koyambilila. Yove elaŵila kuti: “Akwasu na azilongosi enzocita zinthu zeenzoniphunzisa. Nephunzila mwaningankhalile wolimbikisha,  wokhululukila koma soti mwaningaoneshele cikondi. Nthawi zonse, enzolaŵila zinthu ziweme zokhuza ayakine. Ndipo nenzofunishisha kutolela cisanzo cao.”

15. Kansi Miyambo 27:17 yutiyavya tyani kuziŵa cifukwa cake tufunika kunkhala pa ushamwali na ophunzila Baibo amene ofwika pa misonkhano?

¹⁵ Nkhalani pa ushamwali na wophunzila Baibo. Ngati wophunzila Baibo opezeka pa misonkhano, mufunika kupitilizhya kumuonesha cidwi. (Afil. 2:4) Mukoyesayesa kumuziŵa luweme. Mungamuuzhye mwamusangalalila kuona kuti wacinja mbali ziyakine pa umoyo wake. Mungamukonshe soti zokhuza phunzilo ya Baibo, banja yake koma soti nchito. Koma mufunika kunkhala osamala kuti musakonshe makonsho amene angam’citishe nsoni. Makambilano oteti, angacitishe kuti muyambe kukatizhyana ngako. Mukankhala shamwali wa wophunzila Baibo, mungamuyavye kuluta pasogolo nobatizika. (Ŵelengani Miyambo 27:17.) Lomba, kalongosi Hanae otumikila monga mpainiya wanthawi zonse. Koma akalukumbukila nthawi peciyamba kupezeka pa misonkhano. Yove elaŵila kuti: “Penepeza ashamwali mumpingo, neyamba kuyembekezela mwacidwi nthawi yosonkhana. Ndipo nenzoyesayesa kufwika pa misonkhano olo pa nthawi yakuti naŵeŵa. Nenzosangalala kutandala na ashamwali alomba a mumpingo, ndipo izi zeniyavya kuleka kutandala na ŵanthu amene enzolambila lini Yehova. Nenzofunishisha kunkhala pa ushamwali wotang’a na Yehova koma soti akwasu na azilongosi. Izi zenicitisha kuti nibatizike.”

16. Kansi mufunika kucita cinji ciyakine kuti muyavye wophunzila Baibo kumvwa kuti ali mbali ya mpingo?

¹⁶ Wophunzila Baibo pakupitilizhya kuluta pasogolo nocinja mbali ziyakine pa umoyo wake, tufunika kumuyavya kumvwa kuti naye ali mbali ya mpingo. Tingacite izi mwa kunkhala awanzi. (Aheb. 13:2) Pokumbukila nthawi yeenzophunzila Baibo, mkwasu Denis wa ku Moldova elaŵila kuti: “Nthawi zinyinji, akwasu na azilongosi enzoitila neo na mkazi wangu kuti tikatandale nao. Enzotifotokozela mwamene Yehova eŵayavyila. Izi zetilimbikisha ngako. Maceza aya yetiyavya kusimikizhyila kuti tenzofunishisha kutumikila Yehova na kuti, kucita izi niye kungatiyavye kunkhala na umoyo uweme.” Wophunzila Baibo akayenelela kunkhala wofalisa wosabatizika, mungomutola poluta mu utumiki. Mkwasu Diego wa ku Brazil, elaŵila kuti: “Akwasu anyinji enzonisenga kuti nilute nao mu utumiki. Izi zeniyavya kuti niŵaziŵe luweme. Nenzophunzila zinyinji penenzoluta nao mu utumiki, ndipo izi zeniyavya kunkhala pa ushamwali na Yehova koma soti Yesu.”

17. Kansi akulu angayavye tyani ophunzila Baibo?

¹⁷ Mukopeza nthawi yotandala na wophunzila Baibo. Akulu, ngati muŵaonesha cidwi na cikondi ophunzila Baibo, mungaŵayavye kuti alute pasogolo nobatizika. Mukopatula nthawi yolaŵizhyana  na ophunzila Baibo misonkhano ikaliyoyamba olo pavuli pake. Aone kuti musamala za ove ngati mukumbukila zina yao, makamaka ngati ayamba kuyankhapo pa misonkhano. Mukopatula nthawi yoluta na ofalisa osiyanasiyana ku maphunzilo ŵao. Izi zingaŵayavye ngako ophunzila Baibo. Kalongosi Jackie wa ku Nigeria, wamene ni mpainiya, elaŵila kuti: “Ophunzila Baibo anyinji, odabwa akaziŵa kuti mkwasu wenewela naye ni mkulu mumpingo. Wophunzila Baibo muyakine elaŵila kuti: ‘Abusa ŵasu angacite lini voteti. Oyendela tyala ŵanthu olemela ndipo ocita izi ngati aŵalipila!’” Lomba, wophunzila Baibo uyu opezeka pa misonkhano.

18. Molingana na Machitidwe 20:28, kansi akulu angakwanilishe tyani udindo wao?

¹⁸ Mukophunzisa nolimbikisha ofalisa. Akulu, muli na udindo ukulu ngako woyavya ofalisa kuti ankhale aluso mu utumiki, kuyangizhyilapo posogoza maphunzilo. (Ŵelengani Machitidwe 20:28.) Ngati wofalisa ocita nsoni kusogoza phunzilo pamuli naye, mungacite luweme kusogoza phunzilo yamene iyo. Kalongosi Jackie, watatomola lombapano, elaŵila kuti: “Nthawi zinyinji, akulu onikonsha zokhuza maphunzilo ŵangu a Baibo. Ngati pali mbali zanisacita bwino posogoza maphunzilo a Baibo, akulu onipasa malangizo mwacikondi.” Akulu angacite zinyinji polimbikisha ofalisa. (1 Ates. 5:11) Kalongosi Jackie eyangizhyilapo kuti: “Nusangalala ngako ngati akulu anilimbikisha noniuzhya kuti oyamikila nchito yanucita. Mau oteti, onisisimula monga ni mwazucitikila ukamwa manzi yozizila pa siku yakuti kwapya ngako. Ciyamikilo cao, cuyangizhyila cidalilo koma soti cimwemwe cangu pa nchito yopanga ophunzila.”​—Miy. 25:25.

19. Kansi n’cinji cingatipase cimwemwe tonse?

¹⁹ Nangu kuti ayakine a seo tiliye mwai wosogoza phunzilo ya Baibo pali lomba, tonse tingakwanishe kuyavya munthu muyakine kuluta pasogolo mpaka kubatizika. Tingayavye wosogoza phunzilo ngati tutwala ndemanga zokonzekelewa bwino nopewa kulaŵilapo ngako. Tufunika kunkhala pa ushamwali na ophunzila Baibo amene owela ku Ng’anda ya Ufumu, noŵaonesha cisanzo ciweme. Akulu angayavye ophunzila Baibo mwa kupatula nthawi yotandala nao ndipo angayavye ofalisa mwa kuŵaphunzisa noŵayamikila. Kulaŵila cendi, tusangalala ngako ngati tacitako mbali itontho poyavya munthu muyakine kuti ayambe kukonda Yehova nomutumikila.