1-2. Mittu Qullaawu Maxaafi rosaanchi ayyaanaamittetenni lophe cuuamanno gede kaaˈla dandiitannori ayeooti?

EMII yinanniti Fijii gobbara heedhanno rodoo togo yitino: “Qullaawa Maxaafa xiinxallanni rosoommare lowo geeshsha baxoomma. Rosoommari halaale ikkinota afoomma. Kayinni ayyaanaamittetenni lophe cuuamoommahu roduuwunniwa aana hanafumma gedensaanniiti.” Emii woˈnaalshinni, mittu Qullaawu Maxaafi rosaanchi songote giddo noo roduuwi kaaˈlitusiro ayyaanaamittetenni lophe cuuamara dandaannota ronseemmo.

² Mittu mittunku halashshaanchi songo lophitanno gede kaaˈla dandaanno. (Efe. 4:16) Vaanuati yinanni gobbara heedhannoti Leelaani yinanni suwisaancho togo yitino: “‘Mitto qaaqqo lossannohu qacha woˈmaho’ yinanni yaatto no. Manna rosaano assano hatto labbannoe; mittu manchi halaalu minira daanno gede kaaˈlitannotino songo woˈmate.” Maatete miilla, jaallasinna rosu mini rosiisaano mittu qaaqqi lophanno gede lowore kaaˈlitanno. Insa hatto assitannohu qaaqqo jawaachishshenna hasiisannosi roso rosiisseeti. Hatteente gede halashshaanono Qullaawu Maxaafi rosaano amaalte, jawaachishshenna dancha lawishsha ikkite ayyaanaamittetenni lophite cuuantanno gede kaaˈla dandiitanno.—Law. 15:22.

3. Aana, Doriininna Leelaani yinanni roduuwi coyidhinorinni maa rosootto?

³ Qullaawa Maxaafa xiinxallissanno roduuwi wolootu roduuwi kaaˈlitannonsata giwa hasiissannonsakkihu mayiraati? Hanni Moldoovaho heedhannoti Aana yinanniti baxxitino suwisaancho yitinore laˈno: “Qullaawu Maxaafi rosaanchi ayyaanaamittetenni lophanno  gede hasiisannosire baala wonsha mittu manchira duha ikkitara dandiitanno.” Hatte gobbankura baxxino suwisaancho ikke soqqamannohu Doriini yinanni rodii togo yiino: “Duucha woyite halashshaano ani hede egennoommokkire Qullaawu Maxaafi rosaano wodanira coannore coyidhanno.” Leelaani, wolootu kaaˈlitannonke woyite maahoyye yaa hasiissannonkehu mayiraatiro coyidhanni togo yitino: “Qullaawu Maxaafi rosaanchi roduuwu baxillenna shaqqille leellishshannosi gara laˈˈasi Yihowa manna ikkinoommota afanno gede kaaˈlitannosi.”—Yoh. 13:35.

4. Konni birxichira maa ronseemmo?

⁴ Ikkollana togo yitine heddinanniha ikkara dandaanno: ‘Ani xiinxalliseemmokkihu Qullaawu Maxaafi rosaanchi ayyaanaamittetenni lophanno gede hiitto asse kaaˈleemmo?’ Hanni mittu halashshaanchi ledosi Qullaawa Maxaafa xiinxallinseemmo gede koyisinkeronna mittu rosaanchi gambooshshe daa hanafiro maa assa dandiineemmoro laˈno. Hattono songote cimeeyye Qullaawu Maxaafi rosaano ayyaanaamittetenni lophite cuuantanno gede kaaˈla dandiitanno gara laˈneemmo.

5. Mittu rodii ledosi Qullaawa Maxaafa xiinxallisatto gede koyisihero ate qeechi maati?

⁵ Qullaawu Maxaafi xiinxallo yannara, rosaanchu Maganu Qaale wodanchanno gede roore kaaˈlannohu rosiisaanchosiiti. Mittu rodii ledosi xiinxallisatto gede koyisihero, ati isi kaaˈlaancho ikkoottota deˈooti. (Ros. 4:9, 10) Xiinxallote yannara dancha gede kaaˈlate maa assa dandaatto?

6. Qullaawu Maxaafi xiinxallora koyinsannihe woyite Lawishsha 20:18te nooha xintu seera harunsa dandaattohu hiittoonniiti?

⁶ Xiinxallisate qixxaawi. Rosiisaanchu rosaanchu daafira mitore kulannohe gede balaxxe xaˈma dandaatto. (Lawishsha 20:18 nabbawi.) Togo yite xaˈma dandaatto: “Hanni Qullaawu Maxaafi rosaanchikki daafira kulattoe? Xiinxallitinannihu hiikkonne birxichooti? Konni birxichinni isira rosiisattora hasiˈroottori maati? Xiinxallote yannara assa hasiissannoeri woy assa hasiissannoekkiri maati? Rosaancho jawaachishate assa dandeemmori maati?” Rosaanchisi fojo kulannohekkiti egennantinote; kayinni kulannoheri kaaˈlahera dandaanno. Joyi yinanniti misiyoone ikkite soqqantanno rodoo ledose Qullaawa Maxaafa xiinxallissanno roduuwira togoore kultanno. Ise togo yitino: “Ledoˈya xiinxallissannorira kuleemmansari insa rosaancho kaaˈlate kaˈanno gedenna xiinxallote yannara mayitannoro heddanno gede kaaˈlannonsa.”

7. Xiinxallote koyinsihero qixxaawa hasiissannohehu mayiraati?

⁷ Xiinxallote koyinsihero xiinxallissinanni birxicho balaxxe qixxaawittoro danchaho. (Izi. 7:10) Aleenni kullihu Doriini yinanni rodii togo yiino: “Ledoˈya xiinxallisannohu balaxe qixxaawasi hagiirsiissannoe. Hatto assiro  isi kaaˈlannore coyiˈra dandaanno.” Qoleno rosaanchu lamunku seekkitine qixxaabbinoonnita huwatanno; tini qolte isira dancha lawishsha ikkitanno. Xiinxallissinanni birxicho seekkite qixxaawate yanna hoogittoro nafa, qara qara hedo laˈˈate woˈnaali.

8. Xiinxallote yannara huuccatto danchu garinni assa dandaattohu hiittoonniiti?

⁸ Qullaawa Maxaafa xiinxallinsanni woyite huuccatto lowo geeshsha hasiissannote; konnira huuccatto assatto gede koyinsihero mayyaattoro balaxxe hedi. Hatto assittoro huuccattokki roore jawaachishshannota ikkitanno. (Far. 141:2) Jaappaanete heedhannoti Hanaye yinanni rodoo Qullaawu Maxaafi rosiisaanchose koyisseenna daggino rodoo assitino huuccatto qaagge togo yitino: “Huuccitino huuccatto Yihowa ledo kaajju jaaloomi nooseta leellishshanno; anino ise gede ikka hasiˈroomma. Qoleno ane suˈma gante huuccituta lowo geeshsha hagiidhoomma.”

9. Yaiqoobi 1:19 kultanno garinni, xiinxallisate koyinsihero dancha gede kaaˈlate maa assa dandaatto?

⁹ Xiinxallote yannara rosiisaancho kaaˈli. Nayijeeriyaho heedhannoti Omamuyoobi yinanniti baxxitino suwisaancho togo yitino: “Ledonke xiinxallissannori seekkite harunsitannoha ikkiro, tini lowore kaaˈlitanno. Insa lowore kaaˈlitannoha ikkirono, roore anga xiinxallisannohu rosiisaancho ikkinota huwattino daafira lowore dicoyidhanno.” Mamoote coyiˈra hasiissannoheronna maa coyiˈrattoro afa dandaattohu hiittoonniiti? (Law. 25:11) Rosiisaanchunna rosaanchu hasaabbanno woyite seekkite macciishshi. (Yaiqoobi 1:19 nabbawi.) Dancha gede kaaˈla dandaattohu hatto assittoro callaati. Coyiˈrattora albaanni seekkite heda hasiissannoheti egennantinote. Lawishshaho, lowore coyiˈra, rosiisaanchu coyiˈranni heeˈreenna mereero ea woy wole birxicho kayisse hasaawa dihasiissannohe. Ikkollana haranchore coyidhe, lawishsha horoonsidhe, woy xaˈmo xaˈmite rosaanchoho rosannori xawe leellannosi gede kaaˈla dandaatto. Mito woyite rosiisaanchu coyiˈrinori aana ledattori hoogara dandaanno. Kayinni rosaancho naadittoronna ayyaanaamittetenni lophate assannorira galatittosiro tini lowo geeshsha kaaˈlitannosi.

10. Woˈnaalshikki Qullaawu Maxaafi rosaancho kaaˈlara dandaannohu hiittoonniiti?

¹⁰ Woˈnaalshakki kulisi. Hasiisannoha ikkiro, rosaanchoho halaale macciishshootto gara, qarra ikkinohere qeelte saootto gara woy Yihowa kaaˈlinohe gara haransite kula dandaatto. (Far. 78:4, 7) Togoo woˈnaalshi rosaancho kaaˈlasira dandaanno. Kuni woˈnaalshi ammanasi jawaattanno gede woy ayyaanaamittetenni lophe cuuamanno gede kaaˈlasira dandaanno. Hattono iillanni noosi fonqolo qeele saˈˈanno gara afate kaaˈlasira dandaanno. (1 Phe. 5:9) Biraazilete heeˈrannohu Gabireeli yinannihu suwisaancho ikke soqqamanno rodii Qullaawa Maxaafa xiinxalli woyite kaaˈlinosire qaage togo yiino: “Roduuwu kultinoe woˈnaalsha macciishshummo woyite, Yihowara qarrinke leellannota wodanchoommo.  Insa qarra ikkinonsare qeela dandiitu geeshsha anino qeela dandeemmo.”

11-12. Gambooshshe dayinoha Qullaawu Maxaafi rosaancho anga fanne haaˈra hasiissannonkehu mayiraati?

¹¹ Qullaawu Maxaafi rosaanchi ayyaanaamittetenni lophe cuuamate, ganye songote gambooshshe daanna gambooshshunni horo afiˈra hasiissannosi. (Ibi. 10:24, 25) Rosiisaanchisi iso gambooshsheho mite yee koyisasira dandaanno. Isi gambooshshe daanno woyite, daa agurannokki gede baalunku jawaachisha dandiineemmo. Tenne assa dandiineemmohu hiittoonniiti?

¹² Rosaancho anga fantine haadhe. (Rom. 15:7) Rosaanchu gambooshshe daanno woyite anga fanne haaˈneemmosiha ikkiro, gambooshshe woˈmanka woyite daara dandaanno. Saalanno gede assitinikkinni faasiiqqine keere haadhesi hattono wolootu ledo egensiissesi. Iso wolu manni towaatanni noohu gede assitine heddinoonte; rosiisaanchisi gambooshshe barrisiˈrinoha woy wole looso loosanni nooha ikkara dandaanno. Rosaanchu coyiˈranno woyite seekkitine macciishshe hattono heddinannisita leellishshe. Rosaancho anga fantine haaˈraˈne kaaˈlitannosihu hiittoonniiti? Hanni boodu diri albaanni cuuaminohunna xa songote soqqamaancho ikke soqqamanni noohu Dimitiri yinanni rodii woˈnaalsha laˈno. Isi gambooshshe mite yee haˈri woyitita qaage togo yiino: “Waajje Gambooshshu Addaraashera gobbaanni uurre noommoha lae, mittu rodii shaqqillunni Addaraashe ledosi eˈˈeemmo gede assinoe. Lowo roduuwi dagge keere haadhinoe. Tenne lae dhagge assiˈroommo. Tenne lowo geeshsha baxoommo daafira, gambooshshu mayi barru baalalla heeˈra yee halchoommo. Togoo coye horo wolewa afe diegennoommo.”

13. Akatiˈne Qullaawu Maxaafi rosaano kaaˈlannohu hiittoonniiti?

¹³ Dancha lawishsha ikke. Akatiˈne Qullaawu Maxaafi rosaanchi halaale afiˈrinota ammananno gede kaaˈlasira dandaanno. (Mat. 5:16) Moldoovaho heedhannoti Vitaali yinanni suwisaancho togo yitino: “Songote giddo noo roduuwi heedhanno heeshshonna akattansa hittootero wodanchoomma. Tini Yihowa Farciˈraasine addinta Maganu ledo qaaffannore ikkitinota ammaneemma gede assitinoe.”

14. Kiˈne lawishshi mittu manchi ayyaanaamittetenni lophanno gede kaaˈlara dandaannohu hiittoonniiti?

¹⁴ Rosaanchu cuuamate ikkado ikkanno gede rosinore loosunni leellisha hasiissannosi. Tenne assa shota ikka hooggasira dandiitanno. Ikkirono Qullaawu Maxaafi amaale harunsaˈne kiˈne kaaˈlitinoˈne gara laˈˈanno woyite isino kiˈne lawishsha harunsara dandaanno. (1 Qor. 11:1) Hanni aleenni kullite Hanaye woˈnaalsha laˈno. Ise togo yitino: “Ani Qullaawu Maxaafinni rosanni noommare roduuwu loosunni leellishshanni no. Insa lae woloota jawaachisha, gatona yaanna baxille leellisha dandeemmahu hiittoonniitiro rosoomma. Insa woˈmanka woyite wolootu  daafira danchare coyidhanno. Anino insa lawishsha harunsa hasiˈreemma.”

15. Lawishsha 27:17 mittu rosaanchi gambooshshe ganye daanno woyite isira jaala ikka hasiissannonkehu mayiraatiro anfeemmo gede kaaˈlitannonkehu hiittoonniiti?

¹⁵ Jaalla ikkensa. Rosaanchu gambooshshe ganye daanno woyite, isira woˈmanka woyite heddinannita leellishshe. (Fil. 2:4) Iso hasaawisa dandiitinanni. Heeshshosi giddo mito coye biddi assiˈrino daafira galattinasira dandiitinanni; hattono umisi hajo giddora eˈinikkinni Qullaawu Maxaafi xiinxallosi, maatesinna loosisi daafira xaˈma dandiitinanni. Tini mimmitu ledo albinni roore egennantinanni gede kaaˈlitaˈnera dandiitanno. Rosaanchu jaala ikkitiniro ayyaanaamittetenni lophe cuuamanno gede kaaˈlitinannisi. (Lawishsha 27:17 nabbawi.) Hanaye xa woˈma yanna suwisaancho ikkite soqqantanni no. Ise mite yite gambooshshe hadhu woyitita qaagge togo yitino: “Songote roduuwi ledo jaala ikkumma kawa gambooshshe quqquxame agadha hanafoomma; daafure noomma woyite nafa gambooshshe dihoseemma. Kuri roduuwi ledo jaala ikka hagiirsiissinoe; hattono Yihowa magansidhannokkiri ledo nooe jaalooma agureemma gede kaaˈlitinoe. Albinni roore Yihowawanna roduuwunniwa shiqa hasiˈroomma. Hakko daafira cuuamate murciˈroomma.”

16. Mittu rosaanchi gambooshshe daanno woyite borsannokki gede kaaˈlate wolere maa assa dandiitinanni?

¹⁶ Mittu rosaanchi ayyaanaamittetenni lophanno woyitenna heeshshosi giddo mito coye biddi assiˈranno woyite songote miila ikkinota afanno gede kaaˈlesi. Iso wosinsidhine tenne assa dandiitinanni. (Ibi. 13:2) Moldoovaho heeˈrannohu Deenisi yinanni rodii Qullaawa Maxaafa xiinxalli warita qaage togo yiino: “Roduuwu anenna minaamaˈya insa ledo yanna sayinseemmo gede duucha higge koyissinonke. Insa Yihowa kaaˈlinonsahu hiittoonniitiro kultinonke. Tini jawaachishshinonke. Insa ledo yanna sayisanke Yihowara soqqama hasiˈneemmo gedenna isira soqqammummoro albillitte abbara qaale eino atoote afiˈneemmota ammanneemmo gede assitinonke.” Qullaawu Maxaafi rosaanchi halashshaancho ikkihu gedensaanni, kiˈne ledo soqqansho fulanno gedeno koyisa dandiitinanni. Biraazilete heeˈrannohu Diyego yinanni halashshaanchi togo yiino: “Lowo roduuwi insa ledo soqqansho fuleemmo gede koyissinoe. Tini insa ledo dancha gede egennameemmo gede assitinoe. Hatto assaˈya lowore roseemmo gede hattono Yihowawanna Yesuusiwa albinni roore shiqeemmo gede kaaˈlitinoe.”

17. Cimeeyye Qullaawu Maxaafi rosaano kaaˈla dandiitannohu hiittoonniiti?

¹⁷ Qullaawu Maxaafi rosaano kaaˈlate yanna gaaˈme. Cimeeyye, Qullaawu Maxaafi rosaano baxxinannitanna insara heddinannita leellishaˈne ayyaanaamittetenni lophite cuuantanno gede kaaˈlitansara dandiitanno. Gambooshshunniwa  Qullaawu Maxaafi rosaano ledo ganyitine hasaawa dandiitinanni? Insa suˈmansa affinoonnita affanno woyite, roorenkanni gambooshshunniwa dawaro qola hanaffuro suˈmansa woshshitine galattinanninsa woyite heddinanninsata affanno. Qullaawa Maxaafa xiinxallissanno roduuwi ledo xiinxallisate pirogiraameˈne biddi assiˈra dandiitinanni? Tini, rosaancho kiˈne heddinoonnihunni aleenni kaaˈlitasira dandiitanno. Nayijeeriyaho heeˈrannohu Jaaki yinanni suwisaanchi togo yiino: “Batinye rosaano ane ledo insa Qullaawa Maxaafa xiinxallisara dayinohu cimeessa ikkinota affanno woyite dhagge assidhanno. Mittu rosaanchi, ‘Ninke sawaakooti horo togo diassitanno. Insa dureeyyeewanna woxe baatannonsa manniwa calla martanno’ yiino.” Kuni rosaanchi xa gambooshshe daanni no.

18. Cimeeyye 1 Pheexiroosi 5:2te kulloonni garinni uyinoonninsa looso loosa dandiitannohu hiittoonniiti?

¹⁸ Qullaawu Maxaafi rosiisaano qajeelsensa hattono jawaachishshensa. Cimeeyye, halashshaano dancha gede sabbakkannorenna rosiissannore ikkitanno gede kaaˈlate qeechi nooˈne. (1 Pheexiroosi 5:2 nabbawi.) Mittu rodii ate ledo heeˈre Qullaawa Maxaafa xiinxallisa waajjiro, ati xiinxallisattora dandaattota kulisi. Aleenni kullihu Jaaki togo yiino: “Cimeeyye Qullaawu Maxaafi rosaanoˈya daafira ganyite xaˈmitannoe. Rosaanchoˈya xiinxalliseemmo woyite mitu coyi leella hoogiero kaaˈlitannoe.” Cimeeyye Qullaawu Maxaafi rosiisaano jawaachishatenna kaaˈlate lowore assa dandiitanno. (1 Tes. 5:11) Jaaki lede togo yiino: “Songote cimeeyye jawaachishshannoe woyitenna diinaggaawe asseemmore naaddanno woyite lowo geeshsha hagiidheemmo. Insa coyidhannori fooggashsheenna angoonnihu qiidino wayi gede gabbi assannoe. Insa ane galatansa worba ikkeemmo gedenna Qullaawa Maxaafa rosiisate loosiˈyanni albinni roore hagiidheemmo gede assitinoe.”—Law. 25:25.

19. Baalunku maa assine hagiidha dandiineemmo?

¹⁹ Xaa yannara Qullaawu Maxaafi xiinxallo hooggunkero nafa, wolootu roduuwi xiinxallissannore ayyaanaamittetenni lophitanno gede kaaˈla dandiineemmo. Xiinxallinseemmo woyite lowore coyiˈnummokkinni dancha gede qixxaamboommo hedo coyiˈne rosiisaancho kaaˈla dandiineemmo. Rosaano gambooshshe dagganno woyite jaallansa ikka dandiineemmo; hattono dancha lawishsha ikkineemmonsa. Songote cimeeyyeno rosaano kaaˈlate yanna gaaˈmite insa jawaachisha dandiitanno; qoleno rosiisaano qajeelsitannonsa, hattono galattannonsa. Assineemmori shiimare ikkiro nafa, mittu manchi iimi Annanke Yihowa baxannonna isira soqqamanno gede kaaˈlanke lowo geeshsha hagiirsiissannonke!