1-2. Ngubani longasita umuntfu lofundzelwa liBhayibheli kutsi atfutfuke aze abhajatiswe?

AMY lohlala eFiji utsi: “Bengikutsandza lebengifundziswa kona, bengati kutsi kuliciniso. Ngatsi nangicala kucitsa sikhatsi nebazalwane nabodzadze, loko kwangisita ngenta lushintjo ekuphileni kwami futsi ngabhajatiswa.” Loku lokwenteka ku-Amy kusifundzisa nali liciniso lelibalulekile: Manyenti ematfuba ekutsi umuntfu lofundziswa liBhayibheli achubeke atfutfuka aze abhajatiswe nangabe asitwa nangulabanye ebandleni.

² Bonkhe bamemeteli bangabasita labasandza kucala kuta emihlanganweni kutsi babe yincenye yelibandla. (Ef. 4:16) Lelinye lihlahlandlela lokutsiwa nguLeilani, lelihlala eVanuatu, litsi: “Kunesaga lesitsi: Wonkhe muntfu emmangweni angasita ekukhuliseni umntfwana. Ngicabanga kutsi kungulokufanako nangekwenta bafundzi; kudzingeka libandla libambisane kuze lisite umuntfu emukele liciniso.” Emalunga emndeni, bangani kanye nabothishela badlala indzima lenkhulu kuze basite umntfwana akhule. Loku bakwenta ngekutsi bamkhutsate baphindze bamfundzise tifundvo letibalulekile. Ngendlela lefanako, bamemeteli bangameluleka umuntfu lofundziswa liBhayibheli, bamkhutsate futsi bambekele sibonelo lesihle, loko kungamsita atfutfuke aze abhajatiswe.—Taga 15:22.

3. Yini loyifundzako kulokwashiwo ngu-Ana, Dorin, naLeilani?

³ Kungani ummemeteli lochuba sifundvo seliBhayibheli kufanele ajabule nangabe labanye bamemeteli basita umfundzi?  Naka naku lokwashiwo ngu-Ana, lolihlahlandlela lelikhetsekile eMoldova: “Kumatima kutsi umuntfu munye enetise tonkhe tidzingo temuntfu lofundzelwa liBhayibheli.” Dorin, naye lolihlahlandlela lelikhetsekile eMoldova, utsi: “Etikhatsini letinyenti, bamemeteli basho lokutsite lokutsintsa inhlitiyo yemfundzi lebewungakaze ukucabange.” Leilani usho lesinye sizatfu, utsi: “Nangabe umfundzi abona kutsi bazalwane nabodzadze bayamtsandza futsi bayamnakekela, loko kumenta abone kutsi sibantfu baJehova.”—Joh. 13:35.

4. Sitawucoca ngani kulesihloko?

⁴ Nanobe kunjalo, kungenteka uyatibuta, ‘Yini lengingayenta kuze ngisite umfundzi atfutfuke ngisho kungasimi lomfundzisako?’ Ase sicoce ngekutsi yini lesingayenta nangabe lotsite asimema kutsi sihambe naye nakayochuba sifundvo seliBhayibheli, naloko lesingakwenta nangabe umfundzi sekacala kuta emihlanganweni. Sitawuphindze sibone kutsi labadzala belibandla bangamsita njani umfundzi atfutfuke aze abhajatiswe.

5. Yini longayenta nawumenywe kutsi ube khona nakuchutjwa sifundvo seliBhayibheli?

⁵ Nakuchutjwa sifundvo seliBhayibheli, ngumsebenti wemfundzisi kusita umfundzi kutsi acondze liVi laNkulunkulu. Nangabe lona lofundzisako akumeme kutsi ube khona nakachuba lesifundvo, kufanele ukhumbule kutsi uyele kuyomsita. (Shu. 4:9, 10) Yini longayenta kuze ube lusito nakuchutjwa lesifundvo?

6. Nawumenywe kutsi ube khona nakuchutjwa sifundvo seliBhayibheli, ungasisebentisa njani simiso lesikuTaga 20:18?

⁶ Silungiselele lesifundvo seliBhayibheli. Cale ucele lona lofundzisako akutjele lokutsite ngemfundzi. (Fundza Taga 20:18.) Ungambuta: “Yini loyatiko ngalomfundzi? Nitawube nifundza siphi sihloko? Nguliphi liphuzu lofuna umfundzi alicondze? Yini lokufanele ngiyente nobe ngingayenti futsi yini lokufale ngiyisho nobe ngingayisho? Ngingamkhutsata njani umfundzi kutsi atfutfuke?” Kuliciniso kutsi umfundzisi angeke akutjele tindzaba temfundzi letiyimfihlo, kodvwa loko latakutjela kona kungaba lusito. Joy, lositfunywa selivangeli uyacoca ngaloku nalabo lahamba nabo nakayochuba sifundvo seliBhayibheli. Utsi: “Loko kusita lengihamba naye kutsi abe nendzaba nemfundzi futsi ati naloko langakusho nakusachubeka lesifundvo.”

7. Kungani kufanele ulungiselele nawumenywe kutsi ube khona nakuchutjwa sifundvo?

⁷ Nangabe umenywe kutsi ube khona nakuchutjwa sifundvo, kuhle kutsi ulungiselele loko lokutawube kucocwa ngako. (Ezra 7:10) Dorin utsi: “Ngiyajabula nangabe lengihamba  naye asilungiselele lesifundvo. Loko kwenta kutsi avete emaphuzu lalusito.” Ngetulu kwaloko, umfundzi utawubona kutsi nobabili nilungiselele kahle, futsi loko kutawuba sibonelo lesihle kuye. Ngisho nobe ungakakhoni kulungiselela kahle, tinike sikhatsi sekufuna emaphuzu layinhloko alesifundvo.

8. Yini longayenta kuze uciniseke kutsi umthantazo lowenta nakunemuntfu lofundzelwa liBhayibheli ucondzile?

⁸ Umthantazo ubaluleke kakhulu nakuchutjwa sifundvo seliBhayibheli, ngako cabanga ngekutsi utawutsini nangabe ucelwa kutsi uthantaze. Loko kutowenta umthantazo wakho kutsi ube ngulocondzile. (Hla. 141:2) Hanae lohlala eJapan, solo uyawukhumbula umthantazo lowentiwa ngulomunye dzadze lebekahamba nalona bekamfundzisa liBhayibheli. Utsi: “Ngabona kutsi bekanebuhlobo lobuhle naJehova, futsi nami bengikufuna loko. Ngabona nekutsi uyangitsandza ngesikhatsi afaka ligama lami emthantazweni wakhe.”

9. Ngekusho kwaJakobe 1:19, yini longayenta kuze ube lusito kulohamba naye nanichuba sifundvo seliBhayibheli?

⁹ Sita lofundzisako nakachuba sifundvo. Omamuyovbi, lolihlahlandlela lelikhetsekile eNigeria utsi: “Umuntfu lolusito, uhambisana nani nanifundza. Usho emaphuzu lamahle, kodvwa akakhulumi kakhulu ngobe uyati kutsi ngumsebenti wemfundzisi kuchuba lesifundvo.” Kufanele ukhulume nini futsi kanjani? (Taga 25:11) Lalelisisa njengobe lona lofundzisako akhuluma nemfundzi. (Fundza Jakobe 1:19.) Nawenta njalo, utawukhona kusita ngesikhatsi lesifanele. Kodvwa kufanele ucabange ngaphambi kwekutsi ukhulume. Nasi sibonelo, akukafaneli ukhulume kakhulu, uphazamise lona lofundzisako nakasachazela umfundzi nobe ukhulume ngalenye indzaba leyehlukile kulena lenicoca ngayo. Kodvwa kufanele usebentise emagama lambalwa, umfanekiso nobe umbuto kuze usite ucacise liphuzu lokukhulunywa ngalo. Ngalesinye sikhatsi, ungatfola kutsi kute lokunganani longakusho ngaloku lokucocwa ngako, kodvwa nangabe umncoma umfundzi, ukhombisa nekutsi unendzaba naye loko kungamsita kutsi atfutfuke.

10. Kungamsita njani umfundzi kumcocela ngetintfo letenteke ekuphileni kwakho?

¹⁰ Cocela umfundzi ngetintfo letenteke ekuphileni kwakho. Nangabe kungamsita umfundzi, mcocele indlela lowatfola ngayo liciniso, indlela lowancoba ngayo inkinga letsite nobe indlela lobone ngayo sandla saJehova ekuphileni kwakho. (Hla. 78:4, 7) Kungenteka kutsi nguloko umfundzi bekadzinga kukuva. Kungakucinisa kukholwa kwakhe nobe kumkhutsate kutsi achubeke atfutfuka aze abhajatiswe. Kungamkhombisa nendlela  yekuncoba luvivinyo labhekene nalo. (1 Phet. 5:9) Gabriel, lohlala eBrazil losekalihlahlandlela ukhumbula loko lokwamsita ngesikhatsi asadadisha liBhayibheli. Utsi: “Nangiva bazalwane bacoca ngaloko lokwenteke ekuphileni kwabo, ngabona kutsi Jehova uyatibona tinkinga lesibhekana nato. Nangabe bakhona kutincoba, nami ngingakhona.”

11-12. Kungani kufanele simemukele ngemusa umuntfu lofundzelwa liBhayibheli naketa emihlanganweni?

¹¹ Kuze umuntfu lofundzelwa liBhayibheli atfutfuke agcine abhajatisiwe, kufanele abe khona njalo emihlanganweni yelibandla futsi azuze kuyo. (Heb. 10:24, 25) Kungenteka lona lafundza naye ammemele emihlanganweni. Naketile, sonkhe singamkhutsata kutsi achubeke eta eHholweni leMbuso. Singakwenta njani loko?

¹² Memukeleni ngemusa. (Rom. 15:7) Nangabe umuntfu lofundzelwa liBhayibheli ativa emukelekile emihlanganweni, kungenteka achubeke eta eHholweni leMbuso. Mbingelele ngemusa futsi umetfule kulabanye. Coca naye, ngobe kungenteka kutsi lona lafundza naye usengakefiki nobe kunaleminye imisebenti layentako eHholweni leMbuso. Mlalelisise futsi ukhombise kutsi unendzaba naye. Kungamsita njani umfundzi kumemukela kahle? Naka naku lokwenteka kuDmitrii, lowabhajatiswa eminyakeni lembalwa leyendlulile futsi losekayinceku lesebentako. Nakakhumbula lokwenteka nakacala kuya emihlanganweni, utsi: “Lomunye umzalwane wangibona ngime ngaphandle eHholweni leMbuso ngesaba, futsi waba nemusa, wangena kanye nami. Labanyenti beta bangibingelela. Ngamangala kakhulu. Ngajabula kakhulu kangangekutsi ngafisa kutsi kube mane sita emihlanganweni onkhe malanga. Bengingakake ngikubone loku.”

13. Indlela lotiphatsa ngayo ingamtsintsa njani umuntfu lofundzelwa liBhayibheli?

¹³ Bani sibonelo lesihle. Indlela lotiphatsa ngayo ingenta umfundzi abone kutsi leli liciniso. (Mat. 5:16) Vitalii, losekalihlahlandlela eMoldova, utsi: “Nganaka indlela labanye ebandleni lebebaphila ngayo, bacabanga ngayo nalebebatiphatsa ngayo. Loko kwangenta ngaciniseka kutsi BoFakazi BaJehova basenkholweni yeliciniso.”

14. Sibonelo sakho singamsita njani umfundzi kutsi atfutfuke?

¹⁴ Kuze umfundzi alungele kubhajatiswa, kufanele akusebentise loko lakufundzako. Loko akusiko melula ngaso sonkhe sikhatsi. Kodvwa nangabe umfundzi abona kutsi kukuzuzisa njani kusebentisa timiso teliBhayibheli, angafuna kukulingisa. (1 Khor.  11:1) Cabanga ngalokwenteka kuHanae, lesike sakhuluma ngaye. Utsi: “Bazalwane nabodzadze bebakwenta loko bengikufundza. Ngabona kutsi ngingabakhutsata njani labanye, ngibacolele futsi ngibakhombise kutsi ngiyabatsandza. Bebahlale bakhuluma kahle ngalabanye. Bengifuna kubalingisa.”

15. Taga 27:17 tikuveta njani kubaluleka kwekuba ngumngani wemfundzi njengobe achubeka eta emihlanganweni?

¹⁵ Bani ngumngani wemfundzi. Njengobe umfundzi achubeka aba khona emihlanganweni, hlale ukhombisa kutsi unendzaba naye. (Fil. 2:4) Coca naye. Ungamphenyi tindzaba takhe, kodvwa mncome ngelushinjo lalwentile futsi umbute ngesifundvo sakhe, ngemndeni nangemsebenti. Loko kunganenta nisondzelane. Nawuba ngumngani wemfundzi, usuke umsita kutsi atfutfuke aze abhajatiswe. (Fundza Taga 27:17.) Nyalo Hanae sewulihlahlandlela lelivamile. Nakakhumbula loko lokwenteka nakasacala kuya emihlanganweni, utsi: “Njengobe bengicala kuba nebangani ebandleni, ngacala kulangatelela kuya emihlanganweni futsi bengiya ngisho ngidziniwe. Bengitsandza kuba nebangani bami labasha futsi loko kwangisita ngayekela kuba ngumngani webantfu labangamkhonti Jehova. Bengifuna kusondzela kuJehova nakubazalwane nabodzadze. Ngako ngancuma kubhajatiswa.”

16. Yini longayenta kuze usite umuntfu lofundzelwako akhululeke nakasemihlanganweni?

¹⁶ Njengobe umfundzi atfutfuka futsi enta lushintjo, msite ative ayincenye yelibandla. Loko ungakwenta ngekungenisa tihambi. (Heb. 13:2) Denis lohlala eMoldova, nakakhumbula ngesikhatsi asafundziswa liBhayibheli, utsi: “Bazalwane bebamema mine nemkami tikhatsi letinyenti kutsi sicitse sikhatsi nabo. Bebasicocela kutsi Jehova ubasite njani. Loko kwasikhutsata. Kwasenta saciniseka kutsi sifuna kukhonta Jehova nekutsi sitawuphila imphilo lejabulisako.” Nangabe umuntfu lofundzelwa liBhayibheli sekangummemeteli, ungamcela kutsi ahambe nawe nawuyoshumayela. Diego, longummemeteli waseBrazil, utsi: “Bazalwane labanyenti bebangimema kutsi ngihambe nabo nasiyoshumayela. Loku kwangisita ngabati kancono. Kunyenti lengakufundza, futsi ngativa ngisondzelene naJehova naJesu.”

17. Labadzala belibandla bangabasita njani bantfu labafundzelwa liBhayibheli?

¹⁷ Citsa sikhatsi nebantfu labafundzelwa liBhayibheli. Nine labadzala belibandla, nangabe nibatsandza bantfu labafundzelwa liBhayibheli futsi nibanakekela, ningabasita kutsi batfutfuke baze babhajatiswe. Ungakhona yini kutinika sikhatsi sekucoca nabo nanisemihlanganweni?  Batawubona kutsi unendzaba nabo nawuwakhumbula emagama abo, ikakhulukati nasebacale kuphendvula emihlanganweni. Ungatinika yini sikhatsi sekuhamba nemmemeteli nakayochuba sifundvo? Kungenteka loko kungamsita kakhulu umuntfu lofundzelwako. Jackie, lohlala eNigeria futsi lolihlahlandlela, utsi: “Bantfu labanyenti lengifundza nabo liBhayibheli bayamangala nabeva kutsi lomzalwane lengihamba naye nangitofundza nabo ungulomdzala welibandla. Lomunye lengifundza naye watsi: ‘Umfundisi wami angeke akwente loku. Uvakashela labanjingile kuphela futsi nakhona nabatombhadala!’” Nyalo lona lofundzelwa liBhayibheli uba khona emihlanganweni.

18. Labadzala belibandla bangawenta njani umsebenti labaniketwe wona lobhalwe kuMisebenti 20:28?

¹⁸ Baceceshe futsi ubakhutsate labachuba tifundvo teliBhayibheli. Nine labadzala belibandla, ninemsebenti lobalulekile wekusita bamemeteli kutsi bawente kahle umsebenti wekushumayela futsi bafundzise kahle. (Fundza Imisebenti 20:28.) Nangabe ummemeteli esaba kuchuba sifundvo seliBhayibheli nakahamba nawe, mchubele. Jackie, lesike sakhuluma ngaye, utsi: “Labadzala belibandla bavame kungibuta ngetifundvo tami. Nangibhekana netinkinga nangichuba sifundvo, banginika teluleko letilusito.” Kunyenti lokungentiwa ngulabadzala belibandla kuze bakhutsate bamemeteli labachuba tifundvo. (1 Thes. 5:11) Jackie uchubeka atsi: “Ngiyajabula nangabe labadzala bangikhutsata futsi bangitjela kutsi bayabonga ngemsebenti lengiwenta ngekutimisela. Emavi lanjalo angicabula kuhle kwemanti labandzako nakushisa lilanga. Emavi abo lanemusa ayangikhutsata futsi angenta ngitfole injabulo lenyenti nangichuba tifundvo teliBhayibheli.”—Taga 25:25.

19. Yini sonkhe lengasenta sijabule?

¹⁹ Ngisho nobe kute lesimchubela sifundvo seliBhayibheli kwanyalo, kodvwa singamsita lotsite kutsi atfutfuke aze abhajatiswe. Singamsita lochuba sifundvo seliBhayibheli ngekutsi sisho emaphuzu lalungiselelwe kahle, kodvwa singakhulumi kakhulu. Singaba bangani bebafundzi nabeta eHholweni leMbuso, futsi sibabekele sibonelo lesihle. Labadzala belibandla bangabakhutsata bafundzi ngekutsi bacitse sikhatsi nabo futsi bakhutsate bamemeteli labachuba tifundvo teliBhayibheli ngekutsi babaceceshe futsi babancome. Sijabula kakhulu nasenta lokutsite, ngisho nobe kukuncane kangakanani kuze sisite umuntfu kutsi atsandze Jehova futsi amkhonte.