1-2. Ko hai ‘e lava ke tokoni ki ha ako Tohi Tapu ke fakalakalaka ‘o papitaisó?

“NA‘Á KU sai‘ia ‘aupito ‘i he me‘a na‘á ku ako mei he Tohi Tapú,” ko e lea ia ‘a Amy, ‘oku nofo ‘i Fisi. “Na‘á ku ‘ilo‘i ko e mo‘oní ia. Ka ko ‘eku toki feohi pē mo e fanga tokouá na‘á ku fai ai ‘a e ngaahi liliú pea fakalakalaka ‘o papitaiso.” Ko e hokosia ‘a Amy ‘oku fakamamafa‘i ai ‘a e mo‘oni mahu‘inga ko ení: ‘Oku ngalingali ‘e fakalakalaka ange ha ako Tohi Tapu ki he papitaisó ‘i he taimi ‘okú ne ma‘u ai ha tokoni mei he ni‘ihi ‘i he fakataha‘angá.

² ‘E lava ke tokoni ‘a e tokotaha malanga taki taha ki he tupulaki ‘a e fakataha‘angá. (‘Ef. 4:16) Ko ha tāimu‘a ko Leilani, ‘oku nofo ‘i Vanuatu, ‘okú ne pehē: “‘Oku ‘i ai ‘a e lea ‘oku pehē ‘oku fiema‘u ki ha kolo ke nau tauhi ha ki‘i tama. ‘Oku ou tui ‘oku tatau pē ia mo e ngaohi ākongá; ‘oku fa‘a fiema‘u ki ha fakataha‘anga ke nau ‘omai ha taha ki he mo‘oní.” Ko e ngaahi mēmipa ‘o e fāmilí, kaungāme‘á mo e kau faiakó ‘oku nau tokoni kotoa ki ha ki‘i tama ke ne hoko ‘o matu‘otu‘a. ‘Oku nau fai eni ‘aki hono fakalototo‘a‘i ‘a e ki‘i tamá pea ako‘i kiate ia ‘a e ngaahi lēsoni mahu‘inga. ‘I he tu‘unga meimei tatau, ko e kau malangá ‘e lava ke nau fai ha fale‘i, fakalototo‘a‘i pea fokotu‘u ha fa‘ifa‘itaki‘anga lelei ki he kau ako Tohi Tapú, ‘o tokoni ke nau fakalakalaka ‘o papitaiso.​—Pal. 15:22.

3. Ko e hā ‘okú ke ako mei he fakamatala ‘a Ana, Dorin mo Leilani?

³ Ko e hā ‘oku totonu ai ki he tokotaha malanga ‘okú ne fakahoko ha ako Tohi Tapu ke ne tali lelei ‘a e tokoni ‘a e kau malanga kehé ki he tokotaha akó? Fakatokanga‘i ‘a e me‘a ‘oku lea‘aki ‘e Ana, ko ha tāimu‘a makehe ‘i Molotova, “‘Oku mātu‘aki faingata‘a ki ha toko taha ke ne feau ‘a e fiema‘u kotoa ha tokotaha ako Tohi Tapu  ‘i he kamata ke ne fakalakalaká.” Ko Dorin, ko ha tāimu‘a makehe ‘oku ngāue ‘i he fonua tatau, ‘okú ne pehē, “‘Oku fa‘a lea‘aki ‘e he kau malanga kehé ha me‘a ‘oku maongo ki he loto ‘o e tokotaha akó, ko ha me‘a na‘e ‘ikai te u teitei fakakaukau ki ai.” ‘Oku toe lave ‘a Leilani ki ha ‘uhinga ‘e taha, “Ko e ‘ofa mo e tokanga ‘oku fakahaa‘i ki he tokotaha akó ‘oku tokoni ia ke ne ‘ilo‘i ai ‘a e kakai ‘a Sihová.”​—Sione 13:35.

4. Ko e hā te tau lāulea ki ai ‘i he kupu ko ení?

⁴ Kae kehe, te ke fifili nai, ‘‘E lava fēfē ke u tokoni ki ha tokotaha ako Tohi Tapu kapau ‘oku ‘ikai ko au ‘oku ou fakahoko ‘a e akó?’ Tau lāulea angé ki he me‘a ‘e lava ke tau fai ‘i hono fakaafe‘i kitautolu ke kau ‘i ha ako Tohi Tapu pea mo e me‘a ‘e lava ke tau fai ‘i he kamata ke ma‘u fakataha ‘a e tokotaha ako Tohi Tapú. Te tau toe vakai ki he founga ‘e lava ke tokoni‘i ai ‘e he kau mātu‘á ‘a e kau ako Tohi Tapú ke fakalakalaka ‘o papitaisó.

5. Ko e hā ho ngafa ‘i hono fakaafe‘i koe ke kau ki ha ako Tohi Tapu?

⁵ ‘I ha ako Tohi Tapu, ko e fatongia tefito ‘o e faiakó ke ne tokoni‘i ‘a e tokotaha akó ke ne mahino‘i ‘a e Folofola ‘a e ‘Otuá. Kapau ‘oku fakaafe‘i koe ‘e he faiakó ke mo ō ki ha ako, ‘oku totonu ke ke vakai kiate koe ko ha hoa ngāue. Ko ho ngafá ke poupou kiate ia. (Tml. 4:9, 10) Ka ko e hā ‘a e me‘a ‘e lava ke ke fai ke tokoni ke ola lelei ‘a e ako Tohi Tapú?

6. ‘I ho‘o kau ki ha ako Tohi Tapu, ‘e lava fēfē ke ke ngāue‘aki ‘a e tefito‘i mo‘oni ‘i he Palōveepi 20:18?

⁶ Teuteu ki he ako Tohi Tapú. ‘Uluakí, ‘eke ki he faiakó ha me‘a fekau‘aki mo e tokotaha akó. (Lau ‘a e Palōveepi 20:18.) ‘E lava ke ke ‘eke ange: “Ko e hā ‘a e puipuitu‘a ‘o e tokotaha ako Tohi Tapú? Ko e hā ‘a e kaveinga ‘e fai ai ‘a e akó? Ko e hā ho‘o taumu‘a ki he ako ko ení? ‘Oku ‘i ai ha me‘a ‘oku totonu pe ‘ikai totonu ke u fai pe lea‘aki ‘i he lolotonga ‘a e akó? Ko e hā nai ‘a e me‘a te ne fakalototo‘a‘i ‘a e tokotaha akó ke fakalakalaká?” ‘Oku hā mahino, he‘ikai ke vahevahe ‘e he faiakó ha fakamatala fakapulipuli, ka ko e me‘a ‘okú ne vahevahé ‘e lava ke ‘aonga. Ko ha misinale ko Joy na‘á ne fai ha fetalanoa‘aki peheni mo e fa‘ahinga ‘okú ne ‘alu mo ia ki ha ako Tohi Tapu. ‘Okú ne pehē: “‘Oku tokoni ‘a e fetalanoa‘aki ko ení ki hoku hoá ke ne mahu‘inga‘ia ‘i he tokotaha akó peá ne ‘ilo‘i ‘a e founga ke tokoni ai ki he akó.”

7. Ko e hā ‘oku fiema‘u ai ke ke teuteu kapau ‘okú ke ‘alu mo ha taha ki ha‘ane ako?

⁷ Kapau ‘oku fakaafe‘i koe ke kau ki ha ako, ‘e lelei kapau te ke teuteu ‘a e fakamatala ‘e fai ki ai ‘a e lāuleá. (‘Ēsela 7:10) ‘Oku pehē ‘e Dorin, ‘a e tokoua na‘e lave ki ai ki mu‘á: “‘Oku ou hounga‘ia ‘i he taimi ‘oku teuteu ai hoku hoá ki he akó. ‘E lava leva ke ne kau mohu ‘uhinga ki ai.” ‘Ikai ko ia pē, ‘oku ngalingali ‘e fakatokanga‘i ‘e he tokotaha akó ho‘omo teuteu leleí, pea ‘e hoko eni ko ha fa‘ifa‘itaki‘anga lelei kiate ia. Neongo kapau ‘oku ‘ikai malava ke ke teuteu faka‘āuliliki  ‘a e fakamatalá, ko e koloa pē ke ke vahe‘i ha taimi ke kumi ‘a e ngaahi poini tefitó.

8. ‘E lava fēfē ke ke fakapapau‘i ‘oku mohu ‘uhinga ho‘o lotu ‘i ha ako Tohi Tapu?

⁸ Ko e lotú ko ha konga mahu‘inga ia ‘i ha ako Tohi Tapu, ko ia fakakaukau tokamu‘a ki he me‘a ke lea‘aki kapau ‘e kole atu ke ke fai ha lotu. Pea ‘oku ngalingali ‘e mohu ‘uhinga ange ho‘o lotú. (Saame 141:2) Ko Hanae, ‘oku nofo ‘i Siapani, ‘okú ne kei manatu‘i pē ‘a e lotu na‘e fai ‘e ha tuofefine na‘e ‘alu ange mo ‘ene faiako Tohi Tapú. ‘Okú ne pehē: “Na‘á ku ongo‘i ‘a e mālohi ‘ene kaume‘a mo Sihová, pea na‘á ku loto ke hangē ko iá. Na‘á ku toe ongo‘i na‘e ‘ofa‘i au ‘i he‘ene fakakau hoku hingoá ‘i he‘ene lotú.”

9. Fakatatau ki he Sēmisi 1:19, ‘e lava fēfē ke ke fai ha tokoni ‘aonga ‘i ho‘o kau ki ha ako Tohi Tapu?

⁹ Poupou ki he faiakó lolotonga ‘a e akó. “Ko ha hoa ‘oku tokoni te ne muimui ‘i he me‘a ‘oku fai ai ‘a e akó,” ko e lea ia ‘a Omamuyovbi, ko ha tāimu‘a makehe ‘i Naisīlia. “‘Oku fai ‘e he hoá ha tokoni ‘aonga kae ‘ikai ke lahilahi fakamatala, ‘o ‘ilo‘i ko e faiakó ‘okú ne tataki ‘a e akó.” ‘E lava fēfē ke ke ‘ilo‘i ‘a e taimi mo e founga ke tokoni ai ki he akó? (Pal. 25:11) Fanongo lelei lolotonga ‘a e talanoa ‘a e faiakó mo e tokotaha akó. (Lau ‘a e Sēmisi 1:19.) Ko e toki taimi ia te ke mateuteu ai ke fai ha tokoni ‘o ka fe‘ungamālie. Ko e mo‘oni, kuo pau ke ke ngāue‘aki ‘a e fakafuofua lelei. Ko e fakatātaá, he‘ikai te ke loto ke lahilahi fakamatala, fakahoha‘asi ‘a e faka‘uhinga ‘a e faiakó pe lave ki ha kaveinga kehe. Ka ‘e lava ke ke tokoni ke fakama‘ala‘ala ‘a e poini ‘oku ako‘í ‘aki ha fakamatala nounou, talanoa fakatātā pe ko ha fehu‘i. ‘I he taimi ‘e ni‘ihi, ‘okú ke ongo‘i nai ‘oku ‘ikai ke lahi ha me‘a ke ke tānaki ki he akó. Ka ‘o kapau ‘okú ke fakaongoongolelei‘i ‘a e tokotaha akó pea fakahāhā ‘a e mahu‘inga‘ia fakafo‘ituitui ‘iate ia, te ke tokoni lahi ai kiate ia ke fakalakalaka.

10. ‘E anga-fēfē nai ‘a e tokoni ho‘o hokosiá ki ha tokotaha ako Tohi Tapu?

¹⁰ Vahevahe ho‘o hokosiá. ‘E lava ke ke fakamatala nounou ki he tokotaha akó, ‘o ka fe‘ungamālie, ‘a e founga na‘á ke ako ai ‘a e mo‘oní, iku‘i ha pole pe ko e founga na‘á ke vakai ai ki hono tokoni‘i ‘e Sihova ho‘o mo‘uí. (Saame 78:4, 7) ‘E lava ke hoko ho‘o hokosiá ko e me‘a tofu pē ia ‘oku fie fanongo ki ai ‘a e tokotaha akó. ‘E fakaivimālohi‘i nai ai ‘ene tuí pe fakalototo‘a‘i ia ke fakalakalaka ai pē ‘o papitaiso. Pea ‘e fakahaa‘i nai ai kiate ia ‘a e founga ke iku‘i ai ha ‘ahi‘ahi ‘okú ne fehangahangai mo ia. (1 Pita 5:9) Ko Gabriel, ‘oku nofo ‘i Pelēsila pea ngāue he taimí ni ko ha tāimu‘a, ‘okú ne manatu‘i ‘a e founga na‘á ne ma‘u ‘aonga ai ‘i he‘ene kei ako Tohi Tapú. ‘Okú ne pehē: “‘I he‘eku fanongo ki he hokosia ‘a e fanga tokouá, na‘á ku ‘ilo‘i ‘oku vakai mai ‘a Sihova ki he ngaahi pole ‘oku tau fehangahangai mo iá. Pea kapau ‘oku lava ‘o nau iku‘i ia, te u lava foki mo au.”

11-12. Ko e hā ‘oku totonu ai ke tau talitali lelei loto-māfana ha tokotaha ako Tohi Tapu ‘okú ne ma‘u ‘a e fakatahá?

¹¹ Ke fakalakalaka ha tokotaha ako Tohi Tapu ‘o papitaiso, kuo pau ke ne ma‘u ma‘u pē ‘a e ngaahi fakataha ‘a e fakataha‘angá pea ma‘u ‘aonga mei ai. (Hep. 10:24, 25) ‘Oku ngalingali, ko e faiakó te ne fuofua fakaafe‘i ia ki he fakatahá. ‘I he‘ene ma‘u iá, ko kitautolu kotoa ‘e lava ke tau fakalototo‘a‘i ia ke ha‘u ma‘u pē ki he Fale Fakataha‘angá. ‘E lava fēfē ke tau fai pehē?

¹² Talitali lelei loto-māfana ‘a e tokotaha akó. (Loma 15:7) Kapau ‘oku ongo‘i ‘e he tokotaha akó ‘oku talitali lelei ia ki he fakatahá, ‘oku ngalingali ‘e hokohoko atu ‘ene ha‘u ki he Fale Fakataha‘angá. Fakafe‘iloaki loto-māfana ki he tokotaha akó pea fakafe‘iloaki ia ki he ni‘ihi kehé, ‘o ‘oua ‘e ‘ai ia ke ne ongo‘i mā. ‘Oua ‘e fakakaukau ‘oku ‘osi ‘i ai ha taha ‘okú ne tokanga‘i ia; mahalo ‘oku tuai mai ‘a e faiakó pe ‘okú ne fakahoko ha fatongia kehe. Mātu‘aki tokanga ki he me‘a ‘oku lea‘aki ‘e he tokotaha akó pea fakahāhā ‘a e mahu‘inga‘ia fakafo‘ituitui ‘iate ia. Ko e hā ‘a e ola ho‘o talitali lelei loto-māfana iá? Fakatokanga‘i ‘a e hokosia ‘a Dmitrii, na‘á ne papitaiso ‘i he ngaahi ta‘u si‘i kuo maliu atú pea ngāue he taimí ni ko ha sevāniti fakafaifekau. ‘I he manatu ki he‘ene fuofua ma‘u ‘a e fakatahá, ‘okú ne pehē: “Na‘e sio mai ha tokoua kiate au ‘i he‘eku talitali mo e ilifia ‘i tu‘a ‘i he Fale Fakataha‘angá peá ne anga-lelei ‘o taki au ki loto. Na‘e ha‘u ‘a e tokolahi ‘o fakalea mai kiate au. Na‘á ku ‘ohovale mo‘oni. Na‘á ku sai‘ia lahi ai pea na‘á ku faka‘amu na‘e ‘i ai ha fakataha ‘i he ‘aho kotoa ‘o e uiké. Na‘á ku ongo‘i ha me‘a na‘e te‘eki ‘aupito ke u hokosia ia ‘i ha toe feitu‘u.”

13. ‘Oku anga-fēfē kaunga ho‘o tō‘ongá ki ha tokotaha ako Tohi Tapu?

¹³ Fokotu‘u ha fa‘ifa‘itaki‘anga lelei. Ko ho‘o tō‘ongá ‘e lava ke ne fakatuipau‘i ‘a e tokotaha ako Tohi Tapú kuó ne ma‘u ‘a e mo‘oní. (Māt. 5:16) Ko Vitalii, ‘okú ne ngāue he taimí ni ko ha tāimu‘a ‘i Molotova, ‘okú ne pehē: “Na‘á ku vakai ki he founga mo‘ui, fakakaukau mo e tō‘onga ‘a e ni‘ihi ‘i he fakataha‘angá. Na‘á ku tuipau heni ko e Kau Fakamo‘oni ‘a Sihová ‘oku nau ‘a‘eva mo‘oni mo e ‘Otuá.”

14. ‘E tokoni fēfē nai ho‘o fa‘ifa‘itaki‘angá ki ha tokotaha ke fakalakalaka ai pē?

¹⁴ ‘Oku fiema‘u ki ha tokotaha ako ke ne ngāue‘aki ‘a e me‘a ‘okú ne akó ke taau ai ke papitaiso. ‘Oku ‘ikai ke fa‘a faingofua eni. Ka ‘i he taimi ‘oku vakai ai ‘a e tokotaha akó ki he anga ho‘o ma‘u ‘aonga mei hono ngāue‘aki ‘a e ngaahi tefito‘i mo‘oni Fakatohitapú, ‘e lava ke ue‘i ai ia ke fa‘ifa‘itaki kiate koe. (1 Kol. 11:1) Fakakaukau ki he hokosia ‘a Hanae, na‘e lave ki ai ki mu‘á. ‘Okú ne fakamatala: “Na‘e hoko ‘a e fanga tokouá mo e fanga tuofāfiné ko e ngaahi fa‘ifa‘itaki‘anga mo‘oni ‘o e me‘a na‘á ku akó. Na‘á ku vakai ki he founga ke hoko ai ko ha  tokotaha fakalototo‘a mo fa‘a fakamolemole mo e founga ke u fakahaa‘i ai ‘a e ‘ofá. Na‘a nau talanoa lelei ma‘u pē fekau‘aki mo e ni‘ihi kehé. Na‘á ku loto ke fa‘ifa‘itaki kiate kinautolu.”

15. ‘Oku anga-fēfē hono tokoni‘i kitautolu ‘e he Palōveepi 27:17 ke vakai ki he ‘uhinga ‘oku totonu ai ke tau fakakaume‘a ki ha tokotaha ako Tohi Tapu ‘i he‘ene hokohoko atu ke ma‘u ‘a e fakatahá?

¹⁵ Fakakaume‘a ki he tokotaha akó. ‘I he hokohoko atu ‘a e tokotaha akó ke ma‘u ‘a e ngaahi fakatahá, hanganaki fakahāhā ‘a e mahu‘inga‘ia fakafo‘ituitui ‘iate ia. (Fil. 2:4) Fēfē ke ke talanoa kiate ia. ‘E lava ke ke fakaongoongolelei‘i ia ki ha liliu kuó ne fai pea ‘eke ange pe ‘oku fēfē ‘ene ako Tohi Tapú, ko hono fāmilí mo ‘ene ngāué, kae faka‘ehi‘ehi mei hono fakamaa‘i iá. ‘E hoko nai ‘a e ngaahi fetalanoa‘aki ko ení ke mo vāofi ange. ‘I ho‘o fakakaume‘a ki he tokotaha akó, ‘okú ke tokoni ai ke ne fakalakalaka ‘o papitaiso. (Lau ‘a e Palōveepi 27:17.) ‘Oku ngāue ‘a Hanae he taimí ni ko ha tāimu‘a tu‘uma‘u. ‘I he manatu ki he fuofua taimi na‘á ne ma‘u ai ‘a e ngaahi fakatahá, ‘okú ne pehē: “‘I he‘eku ma‘u ‘a e ngaahi kaume‘a ‘i he fakataha‘angá, na‘á ku fakatu‘otu‘a ma‘u pē ke ma‘u ‘a e fakatahá ‘o a‘u ki he taimi na‘á ku ongo‘i hela‘ia aí. Na‘á ku fiefia ke feohi mo hoku ngaahi kaume‘a fo‘oú, pea na‘e tokoni eni ke u fakangata ai ‘eku kaume‘a mo e fa‘ahinga na‘e ‘ikai ke mau tui tataú. Na‘á ku loto ke vāofi ange mo Sihova mo e fanga tokouá mo e fanga tuofāfiné. Ko ia ai, na‘á ku fili ke papitaiso.”

16. Ko e hā ha toe me‘a ‘e lava ke ke fai ke tokoni ai ki ha tokotaha ako Tohi Tapu ke ongo‘i fiemālie ‘i he fakataha‘angá?

¹⁶ ‘I he hokohoko atu ‘a e tokotaha akó ke fakalakalaka pea fai ‘a e ngaahi liliú, tokoni‘i ia ke ne ongo‘i ‘okú ne kau ‘i he fakataha‘angá. ‘E lava ke ke fai eni ‘aki ‘a e hoko ‘o anga-talitali kakai. (Hep. 13:2) ‘I he vakai atu ‘a Denis, ‘okú ne ngāue he taimí ni ‘i Molotova ki he taimi na‘á ne kei ako Tohi Tapu aí, ‘okú ne pehē: “‘I he taimi lahi, na‘e fakaafe‘i au mo hoku uaifí ke feohi mo e fanga tokouá. Na‘á ma fanongo ai ki he anga ‘enau fakamo‘oni‘i hono tokoni‘i kinautolu ‘e Sihová. Na‘e fakalototo‘a ia kiate kimaua. Na‘e tokoni‘i kimaua ‘i he ngaahi fakatahataha ko ení ke ma fakapapau‘i ‘ema loto ke tauhi kia Sihová pea mo e ‘i ai ha mo‘ui fakaofo na‘e fakatatali mai kiate kimaua.” ‘I he taau pē ‘a e tokotaha ako Tohi Tapú ke hoko ko ha tokotaha malangá, ‘e lava foki ke ke fakaafe‘i ia ke mo ‘alu ‘i he ngāue fakafaifekaú. Ko Diego, ko ha tokotaha malanga mei Pelēsila, ‘okú ne pehē: “Na‘e fakaafe‘i au ‘e he fanga tokoua tokolahi ke mau ō ‘i he ngāue fakafaifekaú. Ko e founga lelei taha eni ke maheni ai mo kinautolú. ‘I he‘eku fai pehē, na‘á ku ako ai ‘a e me‘a lahi pea na‘á ku ongo‘i ofi ange ai kia Sihova mo Sīsū.”

17. ‘E lava fēfē ke tokoni ‘a e kau mātu‘á ki he kau ako Tohi Tapú?

¹⁷ Vahe‘i ha taimi ki he kau ako Tohi Tapú. Kau mātu‘a, ko ho‘omou mahu‘inga‘ia anga-‘ofá ‘e  tokoni ki he kau akó ke nau fakalakalaka ‘o papitaiso. ‘E lava ke ke talanoa ma‘u pē ki he kau ako Tohi Tapú ‘i he fakatahá? Te nau ongo‘i ho‘o mahu‘inga‘iá kapau te ke manatu‘i honau hingoá, tautefito ‘i he taimi te nau fai ai ha tali. ‘E lava ke ke vahe‘i ha taimi ke ‘alu mo ha tokotaha malanga ki he‘ene ako Tohi Tapú? He‘ikai nai te ke ‘ilo‘i ‘a e lahi ho‘o tokoni ki he tokotaha akó. Ko ha tāimu‘a ko Jackie, ‘oku nofo ‘i Naisīlia, ‘okú ne pehē: “‘Oku ‘ohovale ‘a e kau ako tokolahi ‘i he‘enau ‘ilo‘i ko e tokoua na‘á ku ‘alu atu mo ia ki he‘enau akó ko ha mātu‘a. Na‘e pehē ‘e ha tokotaha ako Tohi Tapu: ‘He‘ikai ke teitei fai pehē ‘emau faifekaú. ‘Okú ne ‘a‘ahi pē ki he kau tu‘umālié pea kapau pē te nau totongi ia!’” Ko e tokotaha ako ko iá ‘okú ne ma‘u ‘a e ngaahi fakatahá.

18. ‘E lava fēfē ke fakakakato ‘e he kau mātu‘á ‘a e fatongia kuo tuku ange kiate kinautolu hangē ko ia ‘i he Ngāue 20:28?

¹⁸ Ako‘i mo fakalototo‘a‘i ‘a e kau faiako Tohi Tapú. Kau mātu‘a, ‘oku mou ma‘u ‘a e fatongia mafatukituki ke tokoni‘i ‘a e kau malangá ke ola lelei ‘enau ngāue fakafaifekaú, kau ai ‘enau ako Tohi Tapú. (Lau ‘a e Ngāue 20:28.) Kapau ‘oku mā ha tokotaha ke ne fakahoko ha ako Tohi Tapu ‘i ho‘o ‘i aí, tala ange ke ke fakahoko ‘a e akó. Ko Jackie, na‘e lave ki ai ki mu‘á, ‘okú ne pehē: “‘Oku fa‘a ‘eke mai ‘e he kau mātu‘á ‘eku kau ako Tohi Tapú. ‘I he‘eku fehangahangai mo ha pole ‘i hono fakahoko ha ako Tohi Tapu, ‘oku nau ‘omai ha fale‘i ‘aonga.” ‘E lava ke fai ‘e he kau mātu‘á ‘a e me‘a lahi ke faka‘ai‘ai mo fakalototo‘a‘i ‘a e kau faiakó ke nau kītaki. (1 Tes. 5:11) ‘Oku toe pehē ‘e Jackie: “‘Oku ou sai‘ia ‘i hono fakalototo‘a‘i au ‘e he kau mātu‘á pea tala mai ‘oku nau hounga‘ia ‘i he‘eku ngāue mālohí. Ko e ngaahi lea ko iá ‘oku fakaivifo‘ou kiate au ‘o hangē ko ha ipu vai mokomoko ‘i ha ‘aho vela. Ko ‘enau fakaongoongoleleí ‘oku fakalahi ai ‘eku tuipau mo e fiefia ‘i hono fakahoko ‘a e ako Tohi Tapú.”​—Pal. 25:25.

19. Ko e hā ‘a e fiefia ‘e lava ke tau ma‘u kotoá?

¹⁹ Neongo kapau ‘oku ‘ikai ke tau fakahoko ha ako Tohi Tapu, ‘e lava ke tau kei tokoni pē ki ha tokotaha ke tupulaki fakalaumālie. ‘E lava ke tau poupou ki ha faiako lolotonga ha ako ‘aki ‘etau fai ha fakamatala ‘osi teuteu lelei kae ‘ikai ke lahilahi fakamatala. ‘E lava ke tau fakakaume‘a ki he kau akó ‘i he‘enau ha‘u ki he Fale Fakataha‘angá, pea ‘e lava ke tau hoko ko ha fa‘ifa‘itaki‘anga lelei kiate kinautolu. Pea ‘e lava ke fakalototo‘a‘i ‘e he kau mātu‘á ‘a e kau akó ‘aki hono vahe‘i ha taimi kiate kinautolu pea ako‘i mo fakaongoongolelei‘i ‘a e kau faiakó. Ko hono mo‘oní, ko e hā ha fiefia ‘e toe lahi ange ‘i he‘etau ‘ilo‘i na‘a tau fai na‘a mo ha ki‘i tokoni ki ha tokotaha ke ‘ofa pea tauhi ki he‘etau Tamaí, ‘a Sihova?