1-2. Ngwani weelede kugwasya muntu wiiya Bbayibbele kuti ayinkilile kunembo kusikila akabbabbatizigwe?

MUCHIZI uutegwa Amy uukkala kuFiji wakaamba kuti: “Ndakali kubotelwa loko anzindakali kwiiya muBbayibbele. Ndakabona kuti aaka kakali kasimpe. Pesi kuliswaanizya abakwesu abachizi nkuko kwakandigwasya kuti ndibweze ntaamu ziyandikana, mpawo ndakazoobbabbatizigwa.” Zyakachitika kuli Amy zituyiisya kuti: Muntu wiiya Bbayibbele ulakonzya kwiinkilila kunembo kayiya kusikila azoobbabbatizigwe kuti wajana lugwasyo kubakwesu abachizi bamumbungano.

² Sikupupulula umwi awumwi ulakonzya kugwasya bantu bayiya Bbayibbele kuti baze mumbungano. (Ef. 4:16) Umwi payona uutegwa Leilani uukkala kuVanuatu wakaamba kuti: “Kuli kasimpi kati, mwana ngwabantu boonse. Ndibonaanga mbukubede akubantu bayiya Bbayibbele, mbambungano yoonse.” Bamumpuli, beenzuma amaticha bali aamulimu ngubachita kugwasya mwana kuti akomene kabotu. Balazichita eezi kwiinda mukumusungwaazya akumuyiisya. Munzila iikozyenie, basikupupulula balakonzya kugwasya bantu bayiya Bbayibbele kuti bayinkilile kunembo kusikila bazoobbabbatizigwe kwiinda mukubagwasya kuti basale kabotu, mukubasungwaazya akuba chikozyano chilikabotu kuli mbabo.—Tus. 15:22.

3. Wayiyaanzi kuzwa kuli zyakaambwa aaAna, Daniel aLeilani?

³ Kuti sikupupulula kali aamuntu ngwayiyaawe Bbayibbele, nkamboonzi nayelede kugwasigwa aabamwi kuti muntu ngwayiyaawe ayinkilile kunembo? Umwi payona uuyandikana uutegwa Ana uukkala kuMoldova wakati: “Nkuyumu kuti muntu uumwi agwasye muntu ngwayiyaawe Bbayibbele kuti ayinkilile kunembo nkaambo  muntu ooyo nga uyanda kugwasigwa munzila zyiingi.” Mukwesu uutegwa Daniel * uubeleka kali payona uuyandikana wakuMoldova wakati: “Bamwi basikupupulula balakonzya kubuzya muntu ngundiiyaawe Bbayibbele zintu nzinditakonzyi kwaamba. Zintu eezyo zilakonzya kumusika aamoyo.” Leilani wakaamba kuti: “Kutondeezya muntu wiiya Bbayibbele luyando, kulakonzya kumugwasya kuti abone kuti Bakamboni mbakombi baJehova bakasimpe.”—Joh. 13:35.

4. Tulalanga-langaanzi muchiiyo eechi?

⁴ Ulakonzya kulibuzya kuti, ‘Kujana ndamugwasya biyeni muntu wiiya awumwi muntu Bbayibbele kuti ayinkilile kunembo kusikila akabbabbatizigwe?’ Lino atulange-lange kuti niinzi nzitweelede kuchita kuti umwi muntu watukumbila kuti twiinkaawe kuchiiyo chakwe chaBbayibbele anzitweelede kuchita kuti muntu wiiya Bbayibbele wasaanguna kunjila miswaangano. Alubo tulalanga-langa nzibeelede kuchita baalu kuti bagwasye muntu wiiya Bbayibbele kuti ayinkilile kunembo kusikila akabbabbatizigwe.

5. Nguuli mulimu nguyelede kuchita kuti umwi sikupupulula wakukumbila kuti umusindikile kuchiiyo chakwe?

⁵ Munaachiiyo nguwe uli aamulimu wakugwasya muntu ngwayiyaawe Bbayibbele kuti amvwisisisye zili muJwi lyaLeza. Pesi kuti umwi sikupupulula wakukumbila kuti umusindikile kuchiiyo chakwe weelede kuziba kuti mulimu wako ngwakumugwasya. (Muk. 4:9, 10) Nkinkaako, niinzi nzweelede kuchita kuti umugwasye kuti chiiyo chakwe chiinkilile kunembo?

6. Kujana waabelesya biyeni malayilile aali muli Tusimpi 20:18 chiindi nwaakumbilwa aawumwi sikupupulula kuti umusindikile kuchiiyo chakwe?

⁶ Libambile nzimutakayiye. Chakusaanguna, kumbila munaachiiyo kuti akubuzye makani mache biyo atala amuntu ngwayiyaawe Bbayibbele. (Bala Tusimpi 20:18.) Ulakonzya kubuzya kuti, ‘Muntu ngwiiyaawe usyomaanzi? Wakakomenena kuli? Mupati biyeni? Muyanda kuzooyiya atala aanzi? Nchiichili chiiyo nchuyanda kuti muntu ngwiiyaawe amvwisisisye? Kuli nzindeelede kwaamba naakuti kutaamba chiindi mwanooyiya? Uyanda kuti ndimusungwaazye kuti achiteenzi? Munaachiiyo takoowamba makani ansiswa pe atala amuntu ngwayiyaawe pesi nzyatakubuzye zilakonzya kukugwasya kuti umuzibe kabotu. Eezi nzizyo zichitwa awumwi mumishinali uutegwa Joy. Wakati: “Kubuzya muntu uundisindikila makani mache atala amuntu ngundiiyaawe kupa kuti abe aachiyandisyo kumuntu ooyo akuti abone mbayelede kumugwasya.”

7. Nkamboonzi nweelede kulibambila kuti umwi sikupupulula wakukumbila kuti umusindikile kuchiiyo chakwe?

⁷ Kuti umwi sikupupulula wakukumbila kuti umusindikile kuchiiyo chakwe weelede kulibambila nzimutakayiye. (Ezr. 7:10) Daniel waambwa kumasaangunino wakaamba kuti: “Ndilabotelwa kuti muntu ngundilikwiinkaawe  walibambila. Eezi zilakonzya kupa kuti aambe zintu zigwasya muntu ngundiiyaawe.” Kuyungizya aali zeezi, kuti moonse mwalibambila kabotu, zilakonzya kugwasya muntu wiiya Bbayibbele kuti abone mbukuyandikana kulibambila. Kuti teewajana chiindi chakulibambila kabotu, yezya kulanga-langa twaambo tupati tuli muchiiyo nchimutakayiye.

8. Kujana wachita biyeni kuti ukombe munzila itamusike aamoyo muntu ulikwiiya Bbayibbele?

⁸ Nkombyo nchipanzi chiyandikana loko chiindi nimulikwiiya aamuntu Bbayibbele. Nkinkaako, kuti munaachiiyo wakukumbila kuti ukakombe kuchiiyo chakwe weelede kuyeeyesesya kuchitila kuti ukaambe zintu zitakamusike aamoyo muntu ulikwiiya Bbayibbele. (Int. 141:2) Hanae uukkala kuJapan uchiziyeeyede nkombyo zyakali kukombwa asikupupulula wakali kusindikila muntu wakali kumuyiisya Bbayibbele. Wakati: “Ndakabona kuti muchizi ooyo wakali abweenzinyina busimide aJehova alubo ndakaba aachiyandisyo chakuba mbuli nguwe. Ndakabona kuti muchizi ooyo wakali kundiyanda nkaambo wakali kubikkilizya zina lyangu munkombyo zyakwe.”

9. Kweendelana alugwalo lwa Jakobo 1:19, niinzi nzweelede kuchita kuti ube mugwasilizi uulikabotu?

⁹ Gwasya munaachiiyo chiindi nalikuyiisya. Umwi payona uuyandikana uutegwa Omamuyovbi uukkala kuNigeria wakati: “Mugwasilizi ulikabotu ulaswiilisisya chiindi nimulikwiiya.” Alubo wakayungizya kuti: “Mugwasilizi ulakonzya kwaamba zimwi zyiiyo pesi tayelede kuvuzya twaambo nkaambo nga ulizi kuti munaachiiyo nguwe ulaamulimu wakuyiisya muntu ngwayiyaawe.” Kujana wachiziba biyeni chiindi nchweelede kwaambuula azintu nzweelede kwaambuula? (Tus. 25:11) Weelede kuswiilisisya chiindi munaachiiyo amuntu ngwayiyaawe nibalikwiiya. (Bala Jakobo 1:19.) Kuti wachita oobo zilakugwasya kubona chiindi chakuti anduwe waambuule. Nikuba boobo, weelede kuyeeya kutanaambuula. Muchikozyano, toyelede kwaamba zintu zyiingi, kumunjila munkanwa munaachiiyo nalikupandulula kamwi kaambo naakuti kwaambuula nkani iisiyene anzimulikwiiya. Ulakonzya kugwasya muntu wiiya Bbayibbele kwiinda mukubelesya chikozyano, mubuzyo naakuti kwaamba majwi mache. Kuti wabona kuti takwe nzukonzya kwaamba naakuti kuyungizya, ulakonzya kulumbayizya muntu ulikwiiya Bbayibbele akumutondeezya kuti ulaandaba anguwe. Kuti wachita oobo, nga ulikumugwasya kuti ayinkilile kunembo.

10. Zintu zyakakuchitikila mubuumi kujana zyamugwasya biyeni muntu ulikwiiya Bbayibbele?

¹⁰ Buzya muntu wiiya Bbayibbele zyakakuchitikila mubuumi. Kuti kazichita ulakonzya kubuzya muntu wiiya Bbayibbele mbuwakajana kasimpe, mapenzi ngwaakaswaana aJehova mbaakakugwasya mubuumi bwako. (Int. 78:4, 7) Zyakakuchitikila zilakonzya kumugwasya muntu ulikwiiya Bbayibbele. Zilakonzya kusimya lusyomo lwakwe akumugwasya kuti ayinkilile kunembo kusikila akabbabbatizigwe. Alubo zilakonzya kumugwasya  kuti azunde mapenzi ngalikuswaana. (1 Pet. 5:9) Umwi payona uukkala kuBrazil uutegwa Gabriel uchiyeeyede mbaakagwasigwa chiindi naakali kwiiya Bbayibbele. Wakaamba kuti: “Nindakamvwa zyakachitikila bakwesu, ndakabona kuti Jehova ulaabona mapenzi ngituswaana. Alubo ndakabona kuti, kuti bamwi kabali bakaazunda andime ndilakonzya kwaazunda.”

11-12. Nkamboonzi nitweelede kumutambula kabotu muntu wiiya Bbayibbele kuti wasika kumiswaangano?

¹¹ Kuti muntu wiiya Bbayibbele ayinkilile kunembo kusikila akabbabbatizigwe weelede kunjila miswaangano chiindi choonse alubo kuchita oobo kuyoomugwasya. (Heb. 10:24, 25) Muntu umuyiisya weelede kumutamba kumiswaangano. Kuti sikwiiya Bbayibbele wasika kumiswaangano, toonse tweelede kumusungwaazya kuti ayinkilile kunembo kasika kumiswaangano. Kujana twamusungwaazya biyeni?

¹² Mutambule kabotu. (Rom. 15:7) Kuti twamutambula kabotu muntu wiiya Bbayibbele chiindi naasika kumiswaangano, zilapa kuti ayinkilile kunembo kasika kumiswaangano. Tweelede kumujuzya akumutondeezya bamwi bakwesu abachizi pesi tutachiti zintu zitape kuti abe abweeme. Tatweelede kuyeeyela kuti muntu ngwayiyaawe nguwe weelede kumugwasya nkaambo chimwi chiindi muntu ooyo ulakonzya kuti ulijisikini ayimwi milimu naakuti ulakonzya kunonoka. Tweelede kumuswiilisisya chiindi nalikwaambuula akutondeezya kuti tuli aandaba anguwe. Kuchita oobo kweeta mpinduunzi? Dmitrii waba aaminyaka miche kabbabbatizidwe alubo ubeleka kali mubelesi uubelekela wakaamba atala achiindi naakasaanguna kwiinka kumiswaangano. Wakati: “Umwi mukwesu wakajana ndiliimvwi aanze aaNg’anda yaBwaami mpawo twakanjilaamwi mukati. Bantu biingi bakasika kuzoondijuzya. Zyakandigambya loko. Ndakabotelwa loko zyakuti ndakaba aachiyandisyo chakuti kaansinga tunjila miswaangano buzuba abuzuba. Taakwe mpundakali ndabona zili boobo.”

13. Nzila njitulijataayo imugwasya biyeni muntu wiiya Bbayibbele?

¹³ Ba chikozyano chilikabotu. Nzila njitulijataayo ilakonzya kugwasya muntu wiiya Bbayibbele kuti abone kuti tuli maKristu bakasimpe. (Mt. 5:16) Mukwesu uutegwa Vitalii uukkala kuMoldova uubeleka kali payona wakaamba kuti: “Nindakatalika kuziba nzila njibayeeyaayo, njibalijataayo anzibachita bakwesu abachizi zyakapa kuti ndibe aachoonzyo chakuti Bakamboni baJehova maKristu bakasimpe.”

14. Chikozyano chako chilikabotu kujana chamugwasya biyeni muntu wiiya Bbayibbele kuti ayinkilile kunembo?

¹⁴ Kuti muntu wiiya Bbayibbele ayelele kubbabbatizigwa, weelede kubelesya zintu nzyayiya mubuumi bwakwe. Kuchita oobo takuli kuuba pe. Pesi kuti muntu wiiya Bbayibbele wabona mbulookugwasigwa akaambo kakutobela malayilile aali muBbayibbele zilapa kuti anguwe ayande  kutobelezya chikozyano chako. (1 Kor. 11:1) Hanae waambwa kumasaangunino wakaamba kuti: “Ndakabona kuti bakwesu abachizi bakali kutondeezya buntu mbundakali kweezya kuti andime ndibe aabo. Ndakayiya mbundeelede kusungwaazya bamwi, kubalekelela akubatondeezya luyando. Bakali kukkala kabaambuula zintu zilikabotu atala bamwi. Ndakali kuyanda kuba mbuli mbabo.”

15. Kweendelana alugwalo lwa Tusimpi 27:17, niinzi chikonzya kuchitika kuti twamvwanana amuntu wiiya Bbayibbele uusika kumiswaangano?

¹⁵ Ba mweenzinyina. Tondeezya kuti uli aandaba amuntu wiiya Bbayibbele chiindi nayinkilila kunembo kusika kumiswaangano. (Flp. 2:4) Jana chiindi chakwaambuulaawe. Mulumbe akaambo kazintu zibotu nzyalikuchita. Alubo ulakonzya kubuzya atala anzyalikwiiya, mpuli yakwe amulimu. Pesi utabuzyi zintu zitape kuti ataangunuki. Kujana chiindi chakwaambuula anguwe kulapa kuti muzibane kabotu. Kuti wamvwanana aamuntu wiiya Bbayibbele zilakuubila kuti umugwasye kwiinkilila kunembo kusikila akabbabbatizigwe. (Tusimpi 27:17.) Hanae lino wakaba payona wachiindi choonse. Uchiyeeyede chiindi naakasaanguna kunjila miswaangano. Wakaamba kuti: “Nindakatalika kumvwanana abakwesu abachizi mumbungano, kwakali kwabundinonokela kunjila miswaangano zyakuti ndakali kwiinka luzutu nikuba kandikatede. Kwakali kundinoneezya kubaamwi abakwesu abachizi alubo eezi zyakandigwasya kuti ndisiyane aabeenzuma bakatali kabotu. Ndakali kuyanda kuswena aafwiifwi abakwesu abachizi, nkinkaako ndakazoosala kuti ndibbabbatizigwe.”

16. Nziizili zimwi nzitweelede kuchita kuti tugwasye muntu wiiya Bbayibbele kuti alimvwe kayandikana mumbungano?

¹⁶ Gwasya muntu wiiya Bbayibbele uunjila miswaangano kuti alimvwe kayandikana mumbungano. Ulakonzya kuzichita eezi kwiinda mukumutamba kuti muzoobe aamwi. (Heb. 13:2) Denis uukkala kuMoldova uchiyeeyede zyakali kuchitika naakali kwiiya Bbayibbele. Wakaamba kuti: “Chiindi chiingi bakwesu abachizi bakali kututamba ime amwanakazi wangu mumaanda aabo. Bakatubuzya Jehova mbaakabagwasya. Eezi zyakatusungwaazya loko. Kututamba nkubakali kuchita bakwesu abachizi kwakatugwasya kuti tuyande kubelekela Jehova alubo twakabona kuti, kuti twachita oobo twakali kuyoobotelwa.” Kuti muntu wiiya Bbayibbele waba sikupupulula, ulakonzya kumutamba kuti mwiinke aamwi mumulimu wakukambawuka. Mukwesu wakuBrazil uutegwa Diego wakaamba kuti: “Bakwesu bakali kunditamba kuti twiinke aamwi mumulimu wakukambawuka. Eezi zyakandigwasya kuti ndibazibe kabotu, ndiiye zyiingi kuzwa kuli mbabo akuti ndiswene aafwiifwi aJehova aJesu.”

17. Baalu nga balabagwasya biyeni bantu bayiya Bbayibbele?

¹⁷ Amujane chiindi chakubaamwi ambabo. Nibaalu, kuti mwatondeezya kuti mulaandaba abantu  bayiya Bbayibbele zilakonzya kubagwasya kuti bayinkilile kunembo kusikila bakabbabbatizigwe. Amujane chiindi chakwaambuula aabo chiindi nibasika kumiswaangano. Muntu wiiya Bbayibbele ulakonzya kubona kuti ulaandaba anguwe kuti wamwaamba zina, kapati chiindi nalikusandula kumiswaangano. Ulakonzya kukumbila sikupupulula ulaamuntu ngwayiyaawe Bbayibbele kuti mwiinke aamwi kuchiiyo chakwe. Kuchita oobo kulakonzya kugwasya muntu wiiya Bbayibbele kuti ayinkilile kunembo. Payona uutegwa Jackie uukkala kuNigeria wakaamba kuti: “Bantu biingi mbindiiyaabo Bbayibbele balagamba chiindi nibaziba kuti muntu ngundilikweenda aawe mwaalu. Umwi muntu ngundiiyaawe wakati: ‘Pasta wangu tazichiti pe eezi. Uswaya bantu banotede luzutu bakonzya kumubbadala.’ Lino muntu ooyo wabunjila miswaangano.”

18. Baalu ngabalawuchita biyeni mulimu ngubapedwe waambidwe muli Milimo 20:28?

¹⁸ Amugwasye basikupupulula alubo mubasungwaazye. Nibaalu, muli aamulimu mupati wakugwasya basikupupulula kuti babe aluzibo mumulimu wakukambawuka akuyiisya. (Bala Milimo 20:28.) Mulakonzya kuyiisya muntu wiiya Bbayibbele kuti munaachiiyo kataangunukide kuchita oobo kamuliwo. Jackie waambwa aajulu wakati: “Baalu bakkala kababuzya atala abantu mbindiiyaabo Bbayibbele. Kuti ndaswaanana aabuyumu-yumu chiindi nindilikuyiisya nga bandigwasya.” Baalu balakonzya kusungwaazya basikupupulula kuti bazumanane kwiiya aabantu mbibayiyaabo Bbayibbele. (1 Tes. 5:11) Jackie wakayungizya kuti: “Ndilabotelwa chiindi baalu nibandisungwaazya akundilumba akaambo kamilimu njindichita. Majwi aabo aali mbuli maanzi aatontola kumuntu uukatede. Kundilumbayizya nkubakachita kwakapa kuti ndibe aachoonzyo chakuti nzindilikuchita zilikabotu alubo kwakapa kuti ndibotelwe.”—Tus. 25:25.

19. Niinzi chikonzya kupa kuti toonse tubotelwe?

¹⁹ Nikuba kuti tatukwe muntu ngutwiiyaawe Bbayibbele lino pesi tulakonzya kugwasya umwi muntu kuti ayinkilile kunembo kusikila akabbabbatizigwe. Kuti wakumbilwa awumwi sikupupulula kuti umusindikile kuchiiyo chakwe, utakakuvuzyi twaambo pe pesi ukaambe zintu ziche zikonzya kugwasya muntu ulikwiiya. Tulakonzya kumvwanana abantu bayiya Bbayibbele basika kumiswaangano akuba chikozyano chilikabotu kulimbabo. Baalu balakonzya kusungwaazya bantu bayiya Bbayibbele kwiinda mukujana chiindi chakwaambuula aambabo. Alubo balakonzya kugwasya basikupupulula akubalumbayizya akaambo kamilimu njibachita. Toonse tuyoobotelwa kuti twachita chimwi chintu kuti tugwasye muntu wiiya Bbayibbele kuti ayande Jehova akumubelekela.