1-2. Kasi ni njani wangawovwira msambiri wa Baibolo kuti wabatizike?

AMY uyo wakukhala ku Fiji wakuti: “Nkhatemwanga chomene ivyo nkhasambiranga pa sambiro la Baibolo. Nkhamanyanga kuti nkhusambira unenesko. Kweni kuwungana na ŵabali na ŵadumbu ndiko kukanovwira kuti nisinthe nkharo yane na kubatizika.” Ivyo vikachitikira Amy vikutisambizga fundo yakuti: Msambiri wa Baibolo wangakura mwauzimu na kubatizika para wawovwirika na ŵanji mu mpingo.

² Mupharazgi waliyose wangawovwirapo kuti msambiri wa Baibolo wawunganenge na mpingo. (Efe. 4:16) Mupayiniya munyake zina lake Leilani uyo wakukhala ku Vanuatu wakuti: “Pali mazgu ghakuti, mwana wa munyako ngwako. Nkhuwona kuti ndivyoso vikukhumbikwa pakovwira munthu kuti waŵe msambiri. Mpingo wose ukwenera kovwirapo kuti munthu wize mu unenesko.” Mwachiyelezgero, kuti mwana wakure, ŵamumbumba yake, ŵabwezi ŵake, na ŵasambizgi ŵake ŵakovwirapo. Ŵakuchita nthena mwakumukhozga na kumusambizga vinthu vyakuzirwa. Ndimo viliriso na msambiri wa Baibolo. Ŵabali na ŵadumbu mu mpingo ŵangamukhozga na kumulongora chiyelezgero chiwemi, kumovwira kuti wakure na kubatizika.—Zinth. 15:22.

3. Kasi tikusambirapo vichi pa ivyo Ana, Dorin, na Leilani ŵakayowoya?

³ Chifukwa wuli mwenecho wa sambiro la Baibolo wakwenera kukondwa para ŵapharazgi ŵanyake mu mpingo ŵakovwira msambiri wake wa Baibolo? Wonani ivyo wakayowoya Ana, mupayiniya wapadera ku Moldova. Iyo wakati: “Ntchakusuzga chomene kuti munthu yumoza wawovwire msambiri wa Baibolo pa masuzgo ghose agho wakukumana nagho apo wakukura mwauzimu.” Dorin, uyo  ni mupayiniya wapadera mu charu chenechichi, wakuti: “Kanandi ŵapharazgi ŵanyake ndiwo ŵakuyowoya fundo iyo yikuchontha msambiri, fundo iyo ine naghanaghanangako yayi.” Leilani wakayowoyaso chifukwa chinyake icho tikwenera kukondwera para ŵanji ŵakovwira msambiri withu. Wakati: “Chitemwa na lusungu ivyo msambiri wakulongoreka vingamovwira kuti wamanye kuti ndise nadi ŵanthu ŵa Yehova.”​—Yoh. 13:35.

4. Kasi mu nkhani iyi tidumbiskanenge vichi?

⁴ Kweni nyengo zinyake mungajifumba kuti, ‘Kasi ningachita wuli kuti novwire msambiri wa Baibolo kuti wakure mwauzimu uku ni msambiri wane yayi?’ Tiyeni tiwone ivyo tingachita para munyithu watichemera pa sambiro lake la Baibolo kweniso para msambiri wamba kwiza ku maungano. Tiwonengeso ivyo ŵalara ŵangachita kuti ŵawovwire msambiri kuti wakure mwauzimu na kubatizika.

5. Kasi mukwenera kuchita wuli usange munyake wamuchemerani ku sambiro lake?

⁵ Pa sambiro la Baibolo, mwenecho wa sambiro ndiyo chomene wali na mulimo wa kovwira msambiri kuti wapulikiske Mazgu gha Chiuta. Para wamupemphani kuti mulute nayo ku sambiro lake, mukwenera kovwirana nayo pa sambiro. (Muph. 4:9, 10) Ipo kasi mungachita wuli kuti muŵe movwiri muwemi pa sambiro?

6. Kasi mungalondezga wuli lemba la Zintharika 20:18 para munyinu wamupemphani kuti mulute lumoza ku sambiro lake?

⁶ Nozgekerani sambiro la Baibolo. Chakwamba, fumbani mwenecho wa sambiro kuti wamuphaliraniko vinyake vyakukhwaskana na msambiri wake. (Ŵazgani Zintharika 20:18.) Mungafumba kuti: “Kasi munganilongosolerako vichi vyakukhwaskana na msambiri winu? Kasi mwamusambira mutu wuli? Kasi ni fundo wuli izo mungatemwa kuti msambiri wakazimanye mu mutu uwu? Kasi pali vinyake ivyo mukuwona kuti ningakayowoya panji kuleka kuyowoya pa sambiro? Kasi ningakamukhozga wuli msambiri winu kuti wakure mwauzimu?” Mwenecho wa sambiro wakwenera yayi kuphalira ŵapharazgi ŵanyake vinthu vyachisisi ivyo msambiri wake wali kumuphalira, kweni wangayowoya waka fundo zakovwira. Mishonale munyake zina lake Joy wakutemwa kudumbiskana fundo izi na awo wakuluta nawo ku sambiro lake. Iyo wakuti: “Ivyo tikudumbiskana vikovwira uyo nenda nayo kuti waŵe na khumbo lakovwira msambiri kweniso kumanya ivyo wangakayowoya pa sambiro.”

7. Chifukwa wuli mukwenera kunozgekera sambiro para mukuluta na munthu ku sambiro lake?

⁷ Para munthu wamuchemerani ku sambiro lake, chingaŵa chiwemi chomene kunozgekerathu ivyo mwamusambira. (Ezir. 7:10) Mubali Dorin uyo tamuzunura kale mu nkhani iyi, wakuti: “Nkhukondwa chomene para uyo naluta nayo ku sambiro wanozgekera ivyo tamusambira na munthu. Para wanozgekera ndipo wakuyowoya  fundo izo zingamufika pamtima msambiri.” Para muchitenge nthena, msambiri wamanyenge kuti mose mwangunozgekera makora sambiro, ndipo muŵenge chiyelezgero chiwemi. Nanga ni para mulije nyengo yakuti munganozgekera sambiro lose, yezgani kusanga nyengo yakuwona waka fundo zikuru mu sambiro ilo.

8. Kasi mungachita wuli kuti pa sambiro la Baibolo mulombenge vinthu vyakupulikikwa makora?

⁸ Lurombo ndwakuzirwa chomene pa sambiro, ntheura para mwenecho wa sambiro wamupemphani kuti mulombe, mukwenera kunozgekerathu ivyo muyowoyenge. Para mwanozgekerathu ndipo lurombo lwinu luŵenge lwakupulikikwa makora. (Sal. 141:2) Hanae, uyo wakukhala ku Japan, wachali kukumbuka malurombo gha mudumbu munyake. Mudumbu uyu wakiziranga lumoza na uyo wakamusambizganga Baibolo. Hanae wakuti: “Nkhawona kuti mudumbu uyu wakaŵa paubwezi wakukhora na Yehova, ndipo nane nkhakhumbanga kuŵa nga ndiyo. Kweniso nkhawonanga kuti wakunitemwa chifukwa wakazunuranga zina lane mu malurombo ghake.”

9. Kuyana na Yakobe 1:19, kasi mungachita wuli kuti muŵe movwiri muwemi pa sambiro la Baibolo?

⁹ Movwiranenge nayo msambizgi. Omamuyovbi, uyo ni mupayiniya wapadera ku Nigeria wakuti: “Movwiri muwemi pa sambiro ni uyo wakutegherezga chomene panyengo iyo mukusambira na munthu. Wakuyowoya fundo ziwemi kweni nyengo yitali yayi chifukwa wakumanya kuti mwenecho wa sambiro ndiyo wakulongozga.” Kasi mungamanya wuli nyengo iyo mungayowoyerapo ndiposo ivyo mungayowoya? (Zinth. 25:11) Mutegherezgenge chomene apo msambizgi wakudumbiskana na msambiri wake. (Ŵazgani Yakobe 1:19.) Para mwachita nthena ndipo mungamanya apo mungayowoyapo. Kweni mukwenera kuchita mwamahara. Mwachiyelezgero, mukwenera yayi kuyowoya chomene, kudumulizga msambizgi, panji kwambiska nkhani yinyake. Kweni mungayowoya waka fundo yakudumura, chiyelezgero, panji kufumba fumbo kuti fundo iyo mukusambira yipulikikwe makora. Nyengo zinyake mungawona kuti mulije fundo yakuti musazgirepo. Kweni manyani kuti mungawovwira msambiri kuti wakure mwauzimu usange mungamulumba na kumulongora chitemwa.

10. Kasi ivyo vili kumuchitikiranipo vingawovwira wuli msambiri wa Baibolo?

¹⁰ Yowoyani ivyo vikamuchitikiranipo. Para mukuwona kuti vingawovwira msambiri, mungalongosora mwakudumura umo mukasambilira unenesko, umo mukamazgira suzgo linyake ilo mukaŵa nalo, panji umo Yehova wamovwilirani pa umoyo winu. (Sal. 78:4, 7) Mwamanya wuli, panji ivi ndivyo vingawovwira chomene msambiri. Vingakhozga chipulikano chake panji kumukhozga kuti wakure mwauzimu na kubatizika. Kweniso vingamovwira kuti watonde chiyezgo icho wakukumana nacho. (1 Pet. 5:9) Gabriel, uyo wakukhala ku Brazil ndipo sono ni mupayiniya, wakukumbuka ivyo vikamovwira apo wakasambiranga Baibolo. Iyo wakuti: “Nkhati napulika  ivyo vikaŵachitikirapo ŵabali, nkhasambira kuti Yehova wakuwona masuzgo ghithu. Ndipo mu mtima nkhati usange ŵabali aŵa ŵakamarana na masuzgo ghawo, mbwe nane ningamarana nagho.”

11-12. Chifukwa wuli tikwenera kumupokelera makora msambiri para wiza ku maungano?

¹¹ Kuti msambiri wa Baibolo wakure mwauzimu na kubatizika, nyengo zose wakwenera kwiza ku maungano na kusanga nagho chandulo. (Heb. 10:24, 25) Ntchakuwonekerathu kuti msambizgi wake wazamumuchemera ku maungano. Para wiza ku maungano, tose tingamuchiska kuti walutilire kwiza ku Nyumba ya Ufumu. Kasi tingachita wuli nthena?

¹² Mupokelerani na mawoko ghaŵiri. (Rom. 15:7) Para msambiri wapokelereka makora pa maungano, wangalutilira kwiza ku Nyumba ya Ufumu. Mutawuzgani mwachimwemwe na kumulongosora ku ŵabali na ŵadumbu ŵanyake kuti ŵamanyane, kweni mwambura kumukhozga soni. Lekani kumulaŵiska waka chifukwa chakuti ni msambiri winu yayi, chezgani nayo. Nyengo zinyake msambizgi wake wangaŵa kuti wachedwa kwiza ku Nyumba ya Fumu panji watangwanika na milimo yinyake pa Nyumba ya Ufumu. Mutegherezgenge chomene ivyo msambiri wakuyowoya, ndipo longorani kuti mukumutemwa. Kasi pangaŵa uwemi wuli para mwamupokelera makora? Wonani ivyo vikachitikira Dmitrii, uyo wali kubatizika vyaka vyasonosono apa ndipo sono ni muteŵeti wakovwira. Iyo wakukumbuka ivyo vikachitika zuŵa lakwamba apo wakiza ku maungano. Iyo wakuti: “Mubali munyake wakaniwona kuti nimilira waka kuwaro kwa Nyumba ya Ufumu chifukwa cha wofi ndipo wakanitora na kunjira nane. Ŵanthu ŵanandi ŵakiza na kunitawuzga. Nkhazizwa chomene. Ivyo vikachitika vikanikondweska chomene mwakuti nkhadokera nga tingaŵanga na maungano zuŵa lililose. Vyanthena nkhaŵa kuti nindaviwonepo kawiro.”

13. Kasi nkharo yinu yiwemi yingawovwira wuli msambiri?

¹³ Muŵe chakuwonerapo chiwemi. Nkharo yinu yingawovwira msambiri kuti wakhorwe kuti wasanga unenesko. (Mat. 5:16) Vitalii, uyo ni mupayiniya ku Moldova, wakuti: “Nkhawonanga umo ŵanthu mu mpingo ŵakukhalira, umo ŵakughanaghanira, ndiposo umo ŵakuchitira vinthu. Ivi ndivyo vikanikhorweska kuti Ŵakaboni ŵa Yehova ndiwo ntchisopa chaunenesko.”

14. Kasi nkharo yinu yingawovwira wuli msambiri kuti walutilire kukura mwauzimu?

¹⁴ Kuti msambiri waŵe wakwenelera kubatizika, wakwenera kulondezga ivyo wakusambira. Ichi ntchipusu yayi nyengo zose. Kweni para msambiri wakuwona vyandulo ivyo mukusanga chifukwa cha kulondezga fundo za mu Baibolo, nayo wangadokera kuchita nga ndimwe. (1 Kor. 11:1) Wonani ivyo vikachitikira Hanae, uyo tamuzunura kale mu nkhani iyi. Iyo wakuti: “Nkharo ya ŵabali na ŵadumbu yikakolerananga  na ivyo nkhasambiranga. Nkhasambirako umo ningakhozgera ŵanyane, umo ningagowokelera ŵanyane, kweniso umo ningalongolera chitemwa. Nyengo zose ŵakayowoyanga viwemi vya ŵanji. Nkhakhumbanga chomene kuchita nga ndiwo.”

15. Kasi lemba la Zintharika 27:17 likutovwira wuli kuti tiŵe paubwezi na msambiri wa Baibolo para wakwiza ku maungano?

¹⁵ Muŵe paubwezi na msambiri. Apo msambiri wakulutilira kwiza ku maungano, lutilirani kumulongora chitemwa. (Fil. 2:4) Muchezgenge nayo kuti mumumanye makora. Mumuwongenge usange wakusintha vinthu vinyake, mufumbani umo sambiro la Baibolo likwendera, umo ŵamumbumba yake ŵaliri, ndiposo umo ntchito yake yikwendera, kweni kumufumba vinthu ivyo vikumukhwaskani yayi. Ivi vingawovwira kuti muŵe nayo paubwezi. Para muli paubwezi na msambiri, vingawovwira kuti wakure mwauzimu na kubatizika. (Ŵazgani Zintharika 27:17.) Pasono Hanae ni mupayiniya wanyengozose. Iyo wakukumbuka zuŵa lakwamba ilo wakizira ku maungano, ndipo wakuti: “Nkhati naŵa na ŵabwezi mu mpingo, nkhamba kutemwako chomene ku maungano, ndipo nkhalutanga nanga ningavuka. Nkhaŵatemwanga chomene ŵabwezi ŵane ŵaphya, ndipo ivi vikanovwira kuti nidumure ubwezi na awo ŵakuleka kusopa Yehova. Nkhakhumbanga kuŵa paubwezi na Yehova ndiposo ŵabali na ŵadumbu. Ntheura nkhasankha kubatizika.”

16. Kasi ntchivichi chinyake icho mungachita kuti movwire msambiri wa Baibolo kuti wakondwenge mu mpingo?

¹⁶ Apo msambiri wakulutilira kukura mwauzimu na kusintha umoyo wake, movwirani kumanya kuti nayo ntchigaŵa cha mpingo. Mungachita nthena para mukumuchemera ku nyumba kwinu na kuchezga nayo. (Heb. 13:2) Denis, uyo wakuteŵetera ku Moldova, wakukumbuka ivyo vikachitika apo wakasambiranga Baibolo, ndipo wakuti: “Nyengo zinandi ŵabali ŵakanichemanga na muwoli wane kuti tikachezge nawo. Ŵakatiphaliranga umo Yehova wakuŵawovwilira pa umoyo wawo. Ivi vikatikhozganga chomene. Ntchezgo izi zikatovwira kuti tinweke chomene kuteŵetera Yehova na kuŵa na chigomezgo chose kuti tiŵenge na umoyo uwemi para tachita nthena.” Para msambiri wa Baibolo waŵa mupharazgi, mungamba kumuchema kuti mwende nayo mu uteŵeti. Diego, uyo ni mupharazgi ku Brazil, wakuti: “Ŵabali ŵanandi ŵakanipemphanga kuti nende nawo mu uteŵeti. Iyi yikaŵa nthowa yiwemi chomene yakuti niŵamanye makora. Nkhasambira vinandi chifukwa cha kwenda nawo, ndipo nkhawonanga kuti nili paubwezi na Yehova na Yesu.”

17. Kasi ŵalara ŵangawovwira wuli ŵasambiri ŵa Baibolo?

¹⁷ Paturani nyengo yakuchezga na ŵasambiri ŵa Baibolo. Para mwaŵalara mukulongora chitemwa na lusungu ku ŵasambiri ŵa Baibolo,  mbwenu ŵangakura mwauzimu na kubatizika. Nyengo zose muchezgengepo na ŵasambiri ŵa Baibolo pa maungano. Ŵangawonaso kuti mukuŵatemwa usange mukukumbuka mazina ghawo, chomenechomene para ŵamba kuzgorapo pa maungano. Mwalekerachi kupatura nyengo kuti mazuŵa ghanyake mulutenge na mupharazgi ku masambiro ghake? Para mungachita nthena, mbwenu movwirenge chomene ŵasambiri aŵa kuluska umo imwe mwaghanaghaniranga. Mupayiniya munyake zina lake Jackie, uyo wakukhala ku Nigeria, wakuti: “Ŵasambiri ŵanandi ŵakuzizwa chomene para ŵamanya kuti mubali uyo ŵanguluta nayo ku sambiro lawo ni mubali mulara. Msambiri munyake wa Baibolo wakati: ‘Mliska wa ku tchalitchi lane wangachita yayi nthena. Wakwenda waka mu nyumba za ŵasambazi pera kweniso pekha para ŵamupa ndalama!’” Msambiri uyu sono wakwiza ku maungano.

18. Kasi ŵalara ŵangafiska wuli mulimo uwo ŵali kupika, uwo uli pa Milimo 20:28?

¹⁸ Sambizgani na kukhozga ŵapharazgi. Ŵalara, muli na ntchito yikuru yakovwira ŵapharazgi kuti ŵaŵe ŵaluso pakupharazga na kusambizga ŵanthu. (Ŵazgani Milimo 20:28.) Para munyake wakuchita soni kuchitiska sambiro la Baibolo para imwe mulipo, mbwenu jipelekani kuti muchitiske ndimwe. Jackie, uyo tamuzunura kale mu nkhani iyi, wakuti: “Nyengo zose ŵalara ŵakunifumba za ŵasambiri ŵane ŵa Baibolo. Para nili na masuzgo ghanyake pakuchitiska sambiro la Baibolo, ŵakunipa ulongozgi wakovwira.” Ŵalara ŵangachita vinandi chomene kuti ŵakhozge ŵapharazgi. (1 Tes. 5:11) Jackie wakutiso: “Nkhukondwa chomene para ŵalara ŵakunikhozga na kuniphalira kuti ŵakuwonga chomene ivyo nkhuchita mu uteŵeti. Mazgu agha ghakunikondweska nga namwa tumaji twakuzizima nyengo ya kotcha. Para ŵanilumba, nkhukhuka chomene na uteŵeti kweniso nkhuŵa wakukondwa chomene.”​—Zinth. 25:25.

19. Kasi tijipulikenge wuli para nase tingawovwirapo kuti munthu wafike pakubatizika?

¹⁹ Nanga panyengo yasono tingaŵa kuti tilije sambiro la Baibolo, kweni tingawovwira munthu munyake kuti wakure mwauzimu na kubatizika. Kwambura kuyowoya vinandinandi pa sambiro, tingawovwira msambizgi mwakuyowoya fundo zakudumura kweni zakuphikika makora. Tingapanga ubwezi na ŵasambiri para ŵiza ku Nyumba ya Ufumu, ndipo tingaŵa chakuwonerapo chiwemi kwa iwo. Kweniso ŵalara ŵangakhozga ŵasambiri na ŵasambizgi wuwo. Ŵangakhozga ŵasambiri usange ŵakupatura nyengo yakuchezga nawo, ndipo ŵangakhozga ŵasambizgi usange ŵakuŵasambizga na kuŵalumba. Nadi, tiŵenge ŵakukondwa chomene para nase tingachitapo kanthu kuti munthu munyake wafike pa kutemwa Adada ŵithu, A Yehova, na kuŵateŵetera.