1-2. Xinaateti ayyaanaaban diccidi xammaqettanaadan ooni maaddana danddayii?

FIIJI giyo biittan deˈiya Eema hagaadan gaasu: “Taani Geeshsha Maxaafaappe tamaaridobaa keehi dosaas. Hegee tuma gidiyoogaa taani eraas. SHin, taani ishanttuuranne michchonttuura wodiyaa aattiyoogaa doommidoogee issi issiban laamettada xammaqettanaadan tana maaddiis.” Hagee keehi koshshiyaabaa nuna tamaarissees, gubaaˈiyan deˈiya harati xinaateta maaddiyo wode, eti ayyaanaaban diccidi xammaqettana danddayoosona.

² Aassiyaageeti ubbay gubaaˈiyaa asaa qooday gujjanaadan maaddana danddayoosona. (Efi. 4:16) Vanuwatu giyo haruuruwan deˈiya Leelano giyo issi aqinyiyaa hagaadan gaasu: “Hagaadan giyo leemiso haasayay deˈees: Issi naˈi diccanaadan heeran deˈiya asa ubbay maaddees. Erissiyo ashkkara oottiyo nu oosoykka hegaara issi mala gaada qoppays; darotoo issi uri tumaa eranaadan gubaaˈee maaddees.” Hegaa gishshawu, issi naˈi gastta gidanaadan yelidaageetu, hara dabbotu, so asaa laggetunne timirtte keettan tamaarissiyaageetu ubbaa maadoy koshshees. Eti naˈaa minttettiyoogaaninne goˈˈiyaabaa tamaarissiyoogan maaddana danddayoosona. Hegaadankka, gubaaˈiyaa ishanttinne michchontti xinaateti ayyaanaaban diccidi xammaqettanaadan maaddanawu eta zorana, minttettananne leemiso gidana danddayoosona.—Lee. 15:22.

3. Aana, Dorini, qassi Leelana yootidobaappe neeni ay tamaaray?

³ Xannaˈissiya uri gubaaˈiyan deˈiya harati A xinaatiyaa maaddiyo wode ufayttana koshshiyoy aybissee? Moldova biittan dumma aqinye gidada haggaaziya Aana hagaadan gaasu, “Issi xinaatiyawu  daroban maadoy koshshees; qassi Geeshsha Maxaafaa xannaˈissiyaagee barkka he ubbaban maaddiyoogee metana danddayees.” Moldova biittan dumma aqinye gididi haggaaziya Dorini hagaadan giis, “Darotoo, aassiya harati xinaatiyaa wozanaa denttettiya taani mule qoppa erennabaa yootoosona.” Harati maaddiyo wode nuuni ufayttana koshshiyo hara gaasuwaa Leelana hagaadan gaasu, “Nuuni issi xinaatiyaa siiqiyoogeenne awu qoppiyoogaa bessiyoogee I Yihoowa Markkata shaakki eranaadan maaddana danddayees.”—Yoh. 13:35.

4. Nuuni ha huuphe yohuwan ay xannaˈanee?

⁴ SHin, ‘Xinaatiyaa xannaˈissiyay tana gidana xayikkonne, issi xinaatee ayyaanaaban diccanaadan maaddanawu ay oottana danddayiyaanaa?’ gaada qoppana danddayaasa. Issi uri issippe xannaˈissanaadan nuna shoobbiyo wodenne Geeshsha Maxaafaa xinaatee shiiqota shiiqiyoogaa doommiyo wode nuuni ay oottana danddayiyaakko ane beˈoos. Xinaateti ayyaanaaban diccidi xammaqettanaadan cimatikka waati maaddana danddayiyaakko beˈana.

5. Issippe xannaˈissanaadan issi uri nena shoobbiyo wode neeni ay oottana koshshii?

⁵ Xannaˈissiyo wode, xinaatee Xoossaa Qaalaa akeekanaadan maaddiyo gita aawatettay deˈiyoy xannaˈissiyaagaassa. Xannaˈissiyaagee neeni aara xannaˈissanaadan shoobbikko, neeni shoobettidoy A maaddanaassa. (Era. 4:9, 10) SHin, xannaˈissiyo wode loytta maaddiyaagaa gidanawu ay oottana danddayay?

6. Neeni issi uraara Geeshsha Maxaafaa xannaˈissiyo wode, Leemiso 20:18n deˈiya zoriyaa waata oosuwan peeshshana danddayay?

⁶ Xannaˈissanawu giigetta. Koyruwan, xinaatiyaabaa amaridabaa yootanaadan xannaˈissiyaagaa oychcha. (Leemiso 20:18 nabbaba.) Hagaadan oychchana danddayaasa: “Xinaatiyaabaa neeni eriyoobay aybee? Neeni aara xannaˈiyo huuphe yohoy aybee? Xinaatee ha xannaˈiyoobaappe ay tamaaranaadan koyay? Xannaˈiyo wode taani oottana woy haasayana koshshiyaabatinne koshshennabati deˈiyoonaa? Xinaatee ayyaanaaban diccanaadan taani waata minttettana danddayiyaanaa?” Xannaˈissiyaagee xinaatiyaabaa xuurabaa neeyyo yootennaagee qoncce; shin maaddana danddayiyaabaa yootees. Joy giyo issi misoonaawiyaa banaara xannaˈissanawu shoobbiyoogeetuura hegaa haasayawusu. A hagaadan gaasu: “Hegaadan haasayiyoogee tanaara xannaˈissanawu shoobettida uri xinaatiyaa maaddanawu koyanaadaaninne xannaˈiyo wode ay haasayanaakko kuuyanaadan maaddees.”

7. Neeni issi uraara xannaˈissanawu shoobettiyo wode giigettana koshshiyoy aybissee?

⁷ Issippe xannaˈissanaadan issi uri nena shoobbikko, xannaˈissiyoobaa neeni giigettiyoogee keehi loˈˈo. (Izi. 7:10) Dorini hagaadan  giis: “Tanaara xannaˈissiyaagee xinaatiyawu giigettidi yiyo wode taani keehi ufayttays. Yaatiyo wode I maaddiya qofaa yootana danddayees.” Hegaa bollikka, intte naaˈˈaykka loytti giigettidoogaa xinaatee akeekana danddayees; qassi yaatiyoogan awu loˈˈo leemiso gideeta. Neeni he huuphe yohuwaa loytta giigettana danddayennaba gidikkonne, waanna qofaa akeekanawu amarida wodiyaa bazzana danddayaasa.

8. Xannaˈissiyo wode ne woossiyo woosay maaddiyaagaa gidanaadan waatana danddayay?

⁸ Xannaˈissiyo wode keehi koshshiyaabaappe issoy woosaa gidiyo gishshawu xannaˈissiyaagee neeni woossanaadan oychchikko, woossanaabaa qoppa. Yaatikko ne woosay keehi maaddiyaagaa gidana danddayees. (Maz. 141:2) Jaappaanen deˈiya Anaya, O xannaˈissiyaara shoobbin yiida michchiyaa woossido woosaa hanno gakkanawu hassayawusu. A hagaadan gaasu: “Yihoowaara A dabbotido dabbotay mino gidiyoogaa taani akeekaas; qassi I mala gidanawu koyaas. A ba woosan ta sunttaa xeesido wode, A tana siiqiyoogaakka taani akeekaas.”

9. Yaaqooba 1:19y yootiyoogaadan, xannaˈissiyo wode loytta maaddiyaagaa gidanawu waatana danddayay?

⁹ Xannaˈissiyo wode xannaˈissiyaagaa maadda. Nayjeeriyan deˈiya dumma aqinyiyaa Omamuyova hagaadan gaasu: “Xannaˈissanawu shoobettida uri loytti ezggiyoogee maaddees. He uri loˈˈo qofaa yootikkonne, xannaˈissiyoogee xannaˈissiyaagaa aawatetta gidiyoogaa I eriyo gishshawu darobaa haasayenna.” Yaatiyo gishshawu, neeni issibaa awude haasayana koshshii, qassi waata haasayana koshshii? (Lee. 25:11) Xannaˈissiyaageenne xinaatee haasayiyo wode loytta ezgga. (Yaaqooba 1:19 nabbaba.) Yaatada, bessiya wodiyan maaddana danddayaasa. Neeni haasayanaappe kase qoppana bessees. Leemisuwawu, neeni darobaa haasayananne xannaˈissiyaagee issibaa qonccissiyo wode kelttiyaa gelana bessenna; qassi hara dummatiya qofaa haasayana koshshenna. SHin qantta qofaa yootiyoogan, leemisuwaa woy oyshaa goˈettiyoogan xannaˈiyoobay qoncce gidanaadan maaddana danddayaasa. Issi issitoo, xannaˈiyo qofaa xeelliyaagan darobaa haasayana bessennabadan neeyyo siyettana danddayees. Gidoppe attin, xannaˈiyaagaa neeni galatiyaabanne awu qarettiyaaba gidikko, I ayyaanaaban diccanaadan loytta maaddana.

10. Nena gakkidabaa yootiyoogee issi xinaatiyaa waati maaddana danddayii?

¹⁰ Nena gakkidabaa etawu yoota. Xinaatiyaa maaddana danddayiyaaba gidikko, neeni tumaa waata siyidaakko, paaciyaa waata xoonidaakko, woy Yihooway nena waati maaddidaakko xinaatiyawu qanttan yootana danddayaasa. (Maz. 78:4, 7) Hegee xinaatee siyana koshshiyaaba gidana danddayees. Hegee A ammanuwaa minttana woy I aggennan ayyaanaaban diccidi xammaqettanaadan minttettana danddayees. Qassi I bana gakkiiddi deˈiya metuwaa  waati xoonanaakko akeekanaadan maaddana danddayees. (1 PHe. 5:9) Brazilen haˈˈi aqinye gididi haggaaziya Gabreeli Geeshsha Maxaafaa kase xannaˈiyo wode bana maaddidabaa hassayidi hagaadan giis: “Taani ishantta gakkidabaa siyido wode, nuna gakkiya metuwaa Yihooway akeekiyoogaa eraas. Qassi eti metuwaa xoonana danddayikko, taanikka xoonana danddayays.”

11-12. SHiiquwaa yiida xinaatiyaa nuuni ufayssan mokkana koshshiyoy aybissee?

¹¹ Issi xinaatee ayyaanaaban diccidi xammaqettanawu, gubaaˈe shiiqota ubbatoo shiiqidi goˈettana bessees. (Ibr. 10:24, 25) Koyro shiiquwaa shiiqanaadan xannaˈissiyaagee A shoobbana danddayees. I shiiquwaa shiiqiyo wode, nuuni ubbay I SHiiquwaa Addaraashaa yiyoogaa aggennaadan minttettana danddayoos. Nuuni ayba ogetun hegaadan oottana danddayiyoo?

¹² Xinaatiyaa ufayssan mokka. (Roo. 15:7) Issi xinaatee shiiquwaa yiyo wode nuuni A mokki ekkikko, I aggennan SHiiquwaa Addaraashaa yaanawu koyana danddayees. Xinaatee boorasenna mala A pashkki gaada sarotanne haratuura eretissa. A haasayissa; ayssi giikko, A xannaˈissiyaagee SHiiquwaa Addaraashaa biron waayi gakkana woy I yan oottiyoobi daana danddayees. Xinaatee yootiyoobaa loytta ezgga, qassi awu qoppiyoogaa bessa. Neeni ufayssan xinaatiyaa mokkiyoogee A waati maaddana danddayii? Amarida layttappe kase xammaqettidi haˈˈi gubaaˈiyawu oottiyaagaa gididi haggaaziya Dimitira hanotaa qoppa. I koyro shiiqido shiiquwaabaa hassayidi hagaadan giis: “Taani SHiiquwaa Addaraashaa gelanawu yayyada eqqidoogaa issi ishay beˈidi tana ekkidi geliis. Daroti yiidi tana sarotidosona. Taani keehi maalaalettaas. Taani hegaa keehi dosido gishshawu, shiiqoy galla galla deˈanaadan koyaas. Taani hegaa malabaa harasan mule beˈa erikke.”

13. Neeni loˈˈo leemiso gidiyoogee issi xinaatiyaa waati maaddana danddayii?

¹³ Loˈˈo leemiso gida. Neeni loˈˈo leemiso gidiyoogee nuuni tumu Kiristtaaneta gidiyoogaa xinaatee ammananaadan maaddana danddayees. (Maa. 5:16) Moldova biittan haˈˈi aqinye gididi haggaaziya Vitali hagaadan giis: “Taani gubaaˈiyan deˈiya haratu deˈoy, qofaynne eeshshay ay malakko akeekaas. Hegee Yihoowa Markkatu haymaanootee tuma gidiyoogaa taani ammananaadan oottiis.”

14. Neeni loˈˈo leemiso gidiyoogee issi uri aggennan ayyaanaaban diccanaadan waati maaddana danddayii?

¹⁴ Xinaatee xammaqettanaappe kase tamaariyoobaa oosuwan peeshshana koshshees. Hegee issi issitoo metana danddayees. SHin Geeshsha Maxaafay yootiyo maarata oosuwan peeshshiyoogan neeni ay keena goˈettidaakko xinaatee akeekiyo wode, I ne leemisuwaa kaallanawu koyana danddayees. (1 Qor. 11:1) Qommoora ibaa  denttido Anayi hanotaa qoppa. A hagaadan gaasu: “Taani oottanawu baaxetaydda deˈiyoobaa ishanttinne michchontti oottiiddi deˈoosona. Taani waata eta minttettana, siiqananne atto gaana danddayiyaakko akeekaas. Eti haratubaa awudekka loˈˈobaa haasayoosona. Taani eta leemisuwaa kaallana koyays.”

15. Xinaatee ubbatoo shiiqota shiiqiyo wode nuuni aara laggetana koshshiyoy aybissakko akeekanaadan Leemiso 27:17y waati maaddii?

¹⁵ Xinaatiyawu lagge gida. Xinaatee shiiqota aggennan shiiqiyo wode, neeni awu qoppiyoogaa ubbatoo bessa. (Pili. 2:4) A loyttada eranawu baaxetana danddayaasa. I ayyaanaaban dicciyoogaa beˈiyoogee nena keehi ufayssiyoogaa yootana danddayaasa. I xannaˈiyoobaa, A soo asaabaanne oosuwaabaa oychchana danddayaasa. SHin A yeellayana danddayiyaabaa oychchennaadan naagetta. Hegaadan haasayiyoogee intte issoy issuwaara laggetanaadan maaddana danddayees. Neeni xinaatiyaara laggetikko, I ayyaanaaban diccidi xammaqettanaadan maaddana danddayaasa. (Leemiso 27:17 nabbaba.) Anaya haˈˈi ubba wode aqinye gidada haggaazawusu. A shiiquwaa shiiqiyoogaa koyro doommido wodiyaa hassayada hagaadan gaasu: “Taani gubaaˈiyan deˈiyaageetuura laggetido wode, shiiqota yeemuwan naagiyoogaanne daafurido wodekka shiiqiyoogaa doommaas. Taani ooratta laggetuura laggetidoogan ufayttaas, qassi hegee Yihoowawu goynnenna asatuura laggetiyoogaa agganaadan tana maaddiis. Taani Yihoowakko, ishanttukkonne michchonttukko shiiqanawu koyaas. Hegaa gishshawu, taani xammaqettanawu kuuyaas.”

16. Xinaatee gubaaˈiyan ufayttanaadan maaddanawu harabaa ay oottana danddayay?

¹⁶ Xinaatee ayyaanaaban aggennan dicciyo wode, ikka gubaaˈiyaa asa gididabadan qoppanaadan maadda. Neeni imattaa mokkiyoogan hegaadan oottana danddayaasa. (Ibr. 13:2) Moldovan deˈiya Denisi Geeshsha Maxaafaa kase xannaˈiyo wodiyaabaa hassayidi hagaadan giis: “Ishantti ta machchiyaanne taani etaara wodiyaa aattanaadan darotoo shoobbidosona. Eti banttana Yihooway waati maaddidaakko nuussi yootidosona. Hegee nuna minttettiis. Nuuni Yihoowawu haggaazanawu murttanaagaanne keehi ufayssiya deˈuwaa deˈanaagaa ammanettida.” Xinaatee aassiyaagaa gidiyo wode, nenaara haggaazanaadankka shoobbana danddayaasa. Brazilen aassiya Diyegoy hagaadan giis: “Daro ishantti banttanaara haggaazanaadan tana shoobbidosona. Hegee taani eta loytta eranaadan keehi maaddiis. Yaatiyoogan, taani darobaa tamaaraas, qassi Yihoowaaranne Yesuusaara keehi dabbotaas.”

17. Cimati xinaateta waati maaddana danddayiyoonaa?

¹⁷ Xinaatetussi wodiyaa bazzite. Cimatoo, xinaateta intte siiqiyoogeenne etawu qoppiyoogee eti ayyaanaaban diccidi xammaqettanaadan  maaddana danddayees. SHiiqotun xinaateta ubbatoo haasayissana danddayeeta. Eti shiiquwan qofaa yootiyoogaa doommiyo wode, intte eta sunttaa hassayikko etawu qoppiyoogaa eti akeekana. Aassiyaagaara issi uraa Geeshsha Maxaafaa xannaˈissanawu wodiyaa bazzana danddayeetii? Xannaˈiya ura intte qoppidoogaappe aaruwan maaddana danddayeeta. Nayjeeriyan deˈiya Jaako giyo aqinyiyaa hagaadan gaasu: “Tanaara eta xannaˈissiya ishay cima gidiyoogaa eridi daro xinaateti maalaalettidosona. Issi xinaatee hagaadan giis: ‘Ta pastteree hegaadan mule ootti erenna. I dure asaa xallaa oychchees; hegaakka eti miishshaa qanxxikko oychchees!’” He xinaatee haˈˈi shiiqota shiiqees.

18. Cimati 1 PHeexiroosa 5:2n deˈiya qofaa waati oosuwan peeshshana danddayiyoonaa?

¹⁸ Xannaˈissiyaageeta loohissitenne minttettite. Cimatoo, aassiyaageeti loytti sabbakanaadaaninne tamaarissanaadan maaddiyo gita aawatettay intteyyo deˈees. (1 PHeexiroosa 5:2 nabbaba.) Issi uri ba xinaatiyaa inttenaara xannaˈissanawu yayyikko, xannaˈissanawu intte oychchana danddayeeta. Qommoora ibaa denttido Jaaka hagaadan gaasu: “Cimati ta xinaatetubaa ubbatoo tana oychchoosona. Xannaˈissanawu taani metootiyo wode, eti maaddiya zoriyaa yootoosona.” Cimati xannaˈissiyaageeta minttettanawu darobaa oottana danddayoosona. (1 Tas. 5:11) Jaaka gujjada hagaadan gaasu: “Cimati tana minttettiyo wodenne taani minnada oottiyoobaa eti nashshiyo wode ufayttays. Hegaa mala minttettiya qofay hombbiya gallassi irxxa haattaa uyiyoogaa mala. Eti yootiyo minttettiyaabay taani loytta xannaˈissiyoogaa akeekanaadaaninne keehi ufayttanaadan tana maaddiis.”—Lee. 25:25.

19. Nuuni ubbay ay oottiyoogan ufayttana danddayiyoo?

¹⁹ Nuuni ha wodiyan Geeshsha Maxaafaa xannaˈissenaba gidikkonne, issi uri ayyaanaaban diccidi xammaqettanaadan maaddana danddayoos. Xannaˈissiyo wode darobaa haasayennan, nuuni loytti giigettido qofaa yootiyoogan xannaˈissiyaagaa maaddana danddayoos. Xinaateti SHiiquwaa Addaraashaa yiyo wode nuuni etaara laggetananne etawu loˈˈo leemiso gidana danddayoos. Hegaa bollikka, cimati xinaatetussi wodiyaa bazziyoogan, qassi xannaˈissiyaageeta loohissiyoogaaninne galatiyoogan eta minttettana danddayoosona. Nuuni issi uri Yihoowa siiqanaadaaninne awu haggaazanaadan maaddanawu, guuttaba gidikkonne issibaa oottana danddayiyo wode keehi ufayttoos!