1-2. Ana ŵani ŵampaka amkamuchisye jwakulijiganya Baibulo kuti ayiche pakubatisidwa?

MLONGO jwine jwakusatama ku Fiji lina lyakwe Amy jwajitite, “Nayinonyelaga yanalijiganyaga m’Baibulo ligongo namanyililaga kuti uli usyesyene. Panatandite kunguluka ni abale ni alongo yangamuchisye kuti njenje ndamo syangu mwamti mpakana nabatisidwe.” Yaŵasimene nayo Amy mpaka yitujiganye chindu chakusosekwa mnope chakuti, jwakulijiganya Baibulo mpaka ajawule pasogolo soni kubatisidwa ni chikamuchisyo cha abale ni alongo mumpingo.

² Jwakulalichila jwalijose mpaka akamuchisye kuti ŵandu ŵasambano ayicheje mu mpingo. (Aef. 4:16) Yaŵasasile mpayiniya jwine lina lyakwe Leilani, yikusakamulana ni maloŵe gakuti, jika jangawuma mbili. Jwalakwe jwatite, “Yeleyi yikulandana ni masengo gakumjiganya mundu kuti aŵe jwakulijiganya jwa Klistu. Mpingo wosope ukusasosekwa kamuchisya kuti mundu atande kumtumichila Mlungu.” Mundu kuti akombole kutenda yine yakwe yikusasosekwa kuti ŵandu ŵane amkamuchisye. Ŵanduŵa mpaka amkamuchisye, kumlimbikasya soni kumjongolela kuti yakutendayo yikomboleche. Mwakulandana ni yeleyi, ŵandu wosope mu mpingo mpaka amlimbikasye soni kumlosya chisyasyo chambone jwakulijiganya Baibulo. Yeleyi mpaka yimkamuchisye kuti ayikane pa kubatisidwa.—Mis. 15:22.

3. Ana tukulijiganya chichi pa yindu yaŵasasile ŵandu ŵane mundimeji?

³ Ligongo chichi jwakutendesya lijiganyo lya Baibulo akusosekwa kusangalalaga ŵakulalichila ŵane pakumkamuchisya jwakulijiganyajo? Alole yaŵaŵechete mpayiniya jwapadela jwine jwakusatama ku Moldova jwalakwe jwatite, “Jwakulijiganya Baibulo akusasosekwa yindu yejinji , myoyo mundu jumo nganaŵa akombwele kumkamuchisya yosopeyo.” Mpayiniya jwapajika jwine jwakusatama m’chilambo chichichi jwatite, “Abale ni alongo ŵane ŵasalilaga  ŵandu ŵanajiganyaga Baibulo yindu yakwakamuchisya mnope yele unejo ngamkaningombola kuyitenda.” Nombe Leilani jwasasilesoni umbone wine, jwalakwe jwatite, “Chinonyelo chatukusalosya kwa jwakulijiganya Baibulo, chikusamkamuchisya jwalakwe kumanyilila kuti tuli ŵakutumichila ŵa Yehofa ŵasyesyene.”—Yoh. 13:35.

4. Ana chitulijiganye chichi munganiji?

⁴ Nambope mwine mpaka aliwusyeje kuti, ‘Ana mpaka namkamuchisye chamtuli jwakulijiganya Baibulo kwawula pasogolo chitamilecho lijiganyolyo nganiliŵa lyangu?’ Kwende tulole yampaka tutende naga atuŵendile kuti tumpechesye mjetu ku lijiganyo lya Baibulo. Chitulolesoni yine yampaka tutende naga jwakulijiganya Baibulojo atandite kusimanikwa nawo pa misongano. Nambosoni chitulole yampaka atende achakulungwa ŵa mumpingo pakumkamuchisya jwakulijiganya Baibulo kuti abatisidwe.

5. Ana akusosekwa kutenda chichi naga ŵane ŵaŵendile kuti ŵapechesye ku lijiganyo lya Baibulo?

⁵ Pakutendesya lijiganyo lya Baibulo, msyene lijiganyolyo ni jwakusakola udindo wekulungwa wakumkamuchisya jwakulijiganyajo kugapikanichisya chenene Maloŵe ga Mlungu. Mundu paŵaŵendile kuti ampechesye ku lijiganyo, alijigaleje mpela agambile kuŵa jwakupechesya. Masengo gawo gali kumkamuchisya msyene lijiganyolyo. (Jwak. 4:9, 10) Sambano wawojo mpela ŵakupechesya, mpaka atende uli kuti lijiganyolyo lijende chenene?

6. Ana mpaka akamulichisye masengo chamtuli maloŵe ga pa Misyungu 20:18, pampechesye mjawo kulijiganyo lya Baibulo?

⁶ Akosecheleje chenene lijiganyolyo. Chandanda amwusyeje msyene lijiganyolyo yindu yine yakwamba jwakulijiganyajo. (Aŵalanje Misyungu 20:18.) Mpaka amwusye yindu mpela ayi, “Ana akumanyililapo chichi yakwamba jwakulijiganyajo? Ana chakakambilane mtwe wapi? Ana akusaka kuti jwakulijiganyajo akamanyilile yindu yapi? Ana akusaka kuti palijiganyopo ngaŵechete yindu yapi, soni ngaŵambale kuŵecheta yapi? Ana akusaka kuti ngamlimbikasye jwakulijiganya Baibulojo pa yindu yapi?” Akajembecheyaga kuti msyene lijiganyojo mpaka ŵasalile yindu yosope yene atamose yachimsisi yakwamba jwakulijiganyajo. Nambope pa yindu yine yamnono yampaka ŵalondechesyeyo mpaka yakamuchisye mnope. Mmishonale jwine lina lyakwe Joy, aŵele ali mkutenda yeleyi pamŵendile mundu jwine kuti ampechesye ku lijiganyo lyakwe lya Baibulo. Jwalakwe jwatite, “Kukambilana yeleyi ni ŵandu ŵakusaka kumbechesya ku lijiganyo lyangu lya Baibulo kwakamuchisye kuti ammanyilile chenene jwakulijiganyajo soni kuti akaŵechete yindu yakumlimbikasya.”

7. Ligongo chichi jwakupechesya kulijiganyo lya Baibulo akusosekwa kosechela chenene?

⁷ Naga ŵaŵendile kuti akatendesye nawo lijiganyo, mpaka yiŵe chenene kukosechela mtwe wachakakambilanewo. (Esa. 7:10) M’bale jwine jwatite, “Ngusayamichila mnope jwakumbechesya kulijiganyo pakosechele chenene. Yeleyi yikusakamuchisya kuti apelecheje ndemanga  syakamuchisya.” Konjechesya pelepa jwakulijiganyajo akusamanyilila kuti wosope mwakosechele chenene. Yeleyi yikusamlimbikasya kuti nombe najo akosecheleje. Atamose kuti ali nganapata ndaŵi jakosechela lijiganyo lyosopelyo, mpaka atende chenene kupata ndaŵi jagamba kulola mfundo syekulungwakulungwa sya munganijo.

8. Ana mpaka atende chichi kuti apelecheje lipopelo lyakamula mtima pakutendesya lijiganyo lya Baibulo?

⁸ Lipopelo jili mbali jakusosekwa mnope palijiganyo lya Baibulo. Myoyo akusosekwa aganichisyeje chilepe yampaka aŵechete paŵendedwe kuti akapopele kulijiganyo lya Baibulo. Yeleyi, yichitendekasya kuti lipopelo lyawo liŵe lyakamula mtima. (Sal. 141:2) Hanae jwakusatama ku Japan, akusakumbuchilape mapopelo gaŵapelekaga mlongo juŵayikaga yimpepe ni mlongo jwine juŵamjiganyaga Baibulo. Jwalakwe jwatite, “Nayiwonaga kuti mlongoju ali paunasi wambone ni Yehofa mwamti none nakumbilaga ndili mpela jwelejo. Nayiwonaga kuti akusanonyela mnope pakolasile lina lyangu pakupopela.”

9. Mwakamulana ni Yakobo 1:19, ana wawojo mpaka atende chichi kuti aŵe jwakamuchisya jwambone pa lijiganyo?

⁹ Amkamuchisyeje msyene lijiganyojo. Mpayiniya jwapadela jwine jwa ku Nigeria jwatite, “Jwakupechesya ku lijiganyo jwambone akusapikanilaga mwakusamala palikutendekwa lijiganyolyo. Jwakupechesyaju akusapeleka ndemanga syambone, nambo ngakusatupiya yakuŵecheta. Akusatenda yeleyi ali mkukumbuchila kuti msyene lijiganyolyo ni jwakulongolela pakwiganya.” Ana mpaka amanyilile uli ndaŵi jakusosekwa kuŵecheta soni mwampaka aŵechetele pali palijiganyo? (Mis. 25:11) Apikanileje mwachidwi pakuŵecheta msyene lijiganyojo soni pakuŵecheta jwakulijiganyajo. (Aŵalanje Yakobo 1:19.) Kutenda yeleyi kuchakamuchisya kuti aŵechete pandaŵi jakuŵajilwa. Myoyo aganichisyeje kaje mkanaŵe kuŵecheta. Mwachisyasyo, ngakusosekwa kutupiya yakuŵecheta kapena kumkata mkamwa soni kujitanda ngani jine msyene lijiganyolyo pakulondesya yindu yakusosekwa mnope. Mpaka apeleche ndemanga mwachidule, kupelechela chisyasyo kapena kuwusya chiwusyo champaka chilondesye chenene mfundo jajikwiganyidwajo. Mpaka tuyiwone kuti ngatukusosekwa konjechesya yejinji palijiganyo ŵane paŵechete. Nambope, naga tukumyamchila jwakulijiganyajo soni kulosya kuti tukusamnonyela, mpaka tumkamuchisye kuti ajawule pasogolo.

10. Ana yatukusasimana nayo paumi wetu mpaka yimkamuchisye chamtuli jwakulijiganya?

¹⁰ Amsalileje jwakulijiganya Baibulo jwawo yaŵasimene nayo. Naga yili yakuŵajilwa, amsalileje jwakulijiganya Baibulo jwawo mwaŵalijiganyichisye usyesyene, yaŵatesile pakumalana ni yakusawusya, soni yatite Yehofa pakwakamuchisya wawojo paumi wawo. (Sal. 78:4, 7) Mwine pamsalile yindu yine yaŵasimene nayo wawojo ni yampaka yimkamuchisyesoni jwalakwejo. Yeleyi mpaka yimlimbikasye jwalakwe kwawula pasogolo ni kubatisidwa. Nambosoni yeleyi mpaka yimkamuchisye jwalakwe kuti akombole kumalana ni yakusawusya yakusimana nayo. (1 Pet. 5:9) M’bale Gabriel jwakusatama ku Brazil jwele apano akutumichila  mpela mpayiniya, akusakumbuchila yaŵatite pakumkamuchisya pandaŵi jaŵalijiganyaga Baibulo. Jwalakwe ŵatite, “Panapikene yakusawusya yaŵasimanaga nayo abale nayiweni kuti Yehofa akusalolaga yakusawusya yatukusimana nayo. Naga jemanjaji ŵakombwele kumalana nayo yakusawusyayi nikuti nombene mpaka ngombole.”

11-12. Ligongo chichi tukusosekwa kwapochela chenene ŵakulijiganya Baibulo ŵakusayika kumisongano?

¹¹ Kuti jwakulijiganya Baibulo ayikane pakubatisidwa, akusasosekwa asimanikweje pamisongano ndaŵi syosope. (Aheb. 10:24, 25) Nambo yeleyi kuti yikomboleche akusasosekwa kumŵilanjila kumisongano. Payiche ku misonganoko, abale ni alongo wosope akusosekwa kumlimbikasya kuti akaleka kusongana. Ana mpaka tutende chamtuli yeleyi?

¹² Ampocheleje ni magasa gaŵili jwakulijiganya Baibulojo. (Alo. 15:7) Naga jwakulijiganya Baibulo akulipikana kuti tumpochele chenene payiche pamisongano yichimtendekasya kuti akaleka kusongana. Mmalo mwakumtendekasya jwakulijiganyajo kulipikana kuŵa jwakutaŵika, amkomasyeje soni kummanyikasya kwa ŵandu ŵane. Akaganisyaga kuti mwine pana jwine jwampaka amsamalileje. Mpaka yisimanikwe kuti mwine jwakusamjiganya Baibulo atanganidwe ni yindu yine kapena nganaŵe kopochela. Jwakulijiganya Baibulojo pakuŵecheta ampikanileje soni alosyeje kuti akusamnonyela. Ana kumpochela chenene jwakulijiganya Baibulo mpaka kumkamuchisye chamtuli? Alole chisyasyo cha m’bale jwine jwele apano akutumichila mpela mtumiki jwakamuchisya. Jwalakwe jwatite, “M’bale jwine ŵambweni ndili njimi pasa pa Nyumba ja Uchimwene mwakulosya kuti soŵile kwakwinjilila, kaneko jwalakwe ŵayiche kukunjigala ni kusalila pakutama. Ŵandu ŵajinji ŵayiche kukungomasya, yeleyi yasimonjesye mnope. Nasangalele mnope mwamti nasakaga misongano jili mkutendekwa lisiku lililyose. Yeleyi nganinayiwoneje kulikose.”

13. Ana ndamo syawo mpaka simkamuchisye chamtuli jwakulijiganya Baibulo?

¹³ Alosyeje chisyasyo chambone. Ndamo syawo mpaka simkamuchisye jwakulijiganya Baibulo kuyiwona kuti apatile usyesyene. (Mat. 5:16) Mpayiniya jwine jwa ku Moldova jwatite, “Nalijiganyisye mwakusatendela yindu abale ni alongo mumpingo kaganisye kawo soni ndamo syawo. Yeleyi yasimichisye une kuti ŵa Mboni sya Yehofa akusamtumichila Mlungu jusyesyene.”

14. Ana chisyasyo chawo mpaka chakamuchisye chamtuli ŵane kwawula pasogolo?

¹⁴ Jwakulijiganya Baibulo kuti aŵajilwe kubatisidwa akusosekwa kukamulichisya masengo yakulijiganya. Yeleyi yikusaŵa yakusawusya ndaŵi sine. Nambo jwakulijiganya Baibulo pakulola yindu yambone yapatile wawojo ligongo lyakamulichisya masengo yiwundo ya m’Baibulo, nombe najo mpaka atande kukamulichisya masengo yalijiganyisye. (1 Akoli. 11:1) Aganichisye yaŵasimene nayo Hanae jwatumkolasile kundanda kula. Jwalakwe jwatite, “Abale ni alongo nganagamba  kunjiganyape, nambo ŵatendagasoni yindu yaŵanjiganyagayo. Nalijiganyisye yampaka ndende pakwalimbikasya ŵane, pakwakululuchila soni pakwanonyela. Ndaŵi syosope ŵaŵechetaga yindu yambone ya ŵane. Yeleyi yandendekasisye kuti njigalile chisyasyo chawo.”

15. Ana lilemba lya Misyungu 27:17, likutukamuchisya chamtuli kukuwona kusosekwa kwa kuŵa paujakwe ni jwakulijiganya Baibulo jwatandite kusimanikwa pa misongano?

¹⁵ Aŵeje paujakwe ni jwakulijiganya Baibulojo. Alosyeje kuti akusatenda chidwi ni jwakulijiganya Baibulojo pakupitilisya kusimanikwa pa misongano. (Afil. 2:4) Atendeje yindu yakuti ammanyilile chenene soni amyamichileje mwakutendela yindu. Mpaka atende yeleyi mwakumwusya mwalikwendela lijiganyo lyakwe, liŵasa lyakwe nambosoni masengo gakwe. Nambo akusosekwa kusamala kuti pakumwusya akamtesya sooni. Kutenda yeleyi kuchakamuchisya kuti asyoŵekane najo. Pakutenda yakomboleka kuti aŵe paujakwe ni jwakulijiganya Baibulo, mpaka amkamuchisye jwalakwe kuti ajawule pasogolo ni kwika pa kubatisidwa. (Aŵalanje Misyungu 27:17.) Apano Hanae ali mpayiniya jwakutamilichika. Jwalakwe pakukumbuchila lisiku lyakwe lyandanda kusimanikwa pa misongano ja mpingo jwasasile kuti, “Panagambile kupata achimjangu mumpingo, ndaŵi jijojo natandite kujinonyela misongano ja mpingo mwamti najawulaga ku misonganoko atamose pambesile. Napatile achimjangu ŵasambano. Yeleyi yangamuchisye kuti ndeche kunguluka ni achimjangu ŵakala ŵele nganamtumichilaga Yehofa. Nasakaga kuŵa paunasi wambone ni Yehofa soni abale ni alongo. Kaneko nasagwile kuti mbatisidwe.”

16. Ana mpaka atende chindu chine chapi pakumkamuchisya jwakulijiganya Baibulo kuti akatendaga chilendo pali kumpingo?

¹⁶ Jwakulijiganya Baibulo pakupitilisya kwawula pasogolo, amkamuchisyeje kuti akalipikanaga mpela mlendo mumpingomo. Mpaka atende yeleyi mwakupata ndaŵi jakunguluka najo. (Aheb. 13:2) Denis jwakusatumichila ku Moldova pajwakumbuchilaga ndaŵi jaŵalijiganyaga Baibulo jwatite, “Ndaŵi syejinji abale ni alongo ŵatuŵilangaga kuti tukakunguluche nawo yimpepe. Jemanjaji ŵatusalilaga yaŵatite Yehofa pakwakamuchisya. Mwamti yatulimbikasyaga mnope. Yeleyi yatukamuchisye kuŵa ŵakusimichisya kumtumichila Yehofa, soni twayiweni kuti tuchikola umi wambone naga tukutenda yeleyi.” Jwakulijiganya Baibulo pamjitichisye kuŵa jwakulalichila, mpaka amŵende kuti ajende najo yimpepe pakwawula kukulalichila. Jwakulalichila jwine jwa ku Brazil lina lyakwe Diego jwatite, “Abale ŵajinji ŵaŵendaga kuti njawule nawo kukulalichila. Yeleyi yangamuchisye kuti namanyilile chenene. Nalijiganyisye yindu yejinji, soni nalipikanaga kuti ndili paunasi wambone mnope ni Yehofa soni Yesu.”

17. Ana achakulungwa ŵa mumpingo mpaka ŵakamuchisye chamtuli ŵakulijiganya Baibulo?

¹⁷ Apateje ndaŵi jakunguluka ni jwakulijiganya Baibulo. Chinonyelo chakusalosya achakulungwa  ŵamumpingo, mpaka chimkamuchisye jwakulijiganya Baibulo kuti abatisidwe. Ana akusatenda yakuti akungulucheje ni jwakulijiganya Baibulo payiche kumisongano? Jemanjaji mpaka amanyilile kuti akusiŵaganichisya mnope paŵakolasile lina mnopemnope pandaŵi jakwanga pa misongano. Mpaka alinganye ndandanda jakuti ŵapechesyeje ŵakulalichila ŵane pakwawula kukutendesya majiganyo gawo. Kutenda yeleyi mpaka kumkamuchisye mnope jwakulijiganyajo. Mpayiniya jwine jwakusatama ku Nigeria lina lyakwe Jackie jwatite, “Ŵandu ŵajinji ŵangusinajiganya Baibulo akusasimonga mnope panasalile kuti mundu junayiche najo ali jwamkulungwa jwa mumpingo. Jwakulijiganya Baibulo jwine jwasasile kuti, ‘Abusa ŵa ku chalichi kwetu nganaŵa atesile yeleyi, akusagamba kwajendela ŵandu ŵasichile ŵampaka ŵape mbiya.’” Apano jwakulijiganya Baibuloju akusasongana.

18. Ana achakulungwa ŵa mumpingo mpaka akamulichisye masengo chamtuli maloŵe gagali pa Masengo 20:28?

¹⁸ Ŵakamuchisyeje soni kwalimbikasya ŵakusatendesya majiganyo ga Baibulo. Achakulungwa ŵa mumpingo, akwete udindo wekulungwa mnope wakwakamuchisya abale ni alongo kuti alalichileje mwakamula mtima soni kuti atendesyeje chenene majiganyo ga Baibulo. (Aŵalanje Masengo 20:28.) Naga jwakulalichila akutenda sooni kutendesya lijiganyolyo wawojo ali papopo, mpaka agambe kumpochela. Jackie jwatumkolasile jula jwasasile kuti, “Achakulungwa ŵa mumpingo ŵanonyelaga kuwusya mwagakwendela majiganyo gangu ga Baibulo. Jemanjaji payiweni kuti pana yindu yayikusawusya pangutendesya lijiganyo akusangamuchisya.” Achakulungwa ŵa mumpingo mpaka atende chenene pakwalimbikasya soni kwakamuchisya ŵakulalichila kuti ajawule pasogolo. (1 Ates. 5:11) Jackie jwasasilesoni kuti, “Ngusasangalala mnope achakulungwa ŵa mumpingo pakulimbikasya soni kusalila kuti akusayamichila masengo gangusatendaga. Maloŵe gelega gakusasangalasya mnope, mwamti gakusaŵa mpela ngumwa mesi gakusisima mundaŵi ja lyuŵa. Kuyamichilaku kukusandendekasya kuti mbeje jwakusangalala ligongo lya masengo gangukamula gakwajiganya ŵandu Baibulo.”—Mis. 25:25.

19. Ana wosopewe mpaka tuŵe ŵakusangalala ni chichi?

¹⁹ Atamose kuti mwine apano nganitukola lijiganyo lya Baibulo lyatukutendesya, nambope mpaka tumkamuchisye mundu kuti ayikane pakubatisidwa. Tuŵecheteje ndemanga syekosechele chenene patumpechesye mjetu ku lijiganyo lya Baibulo. Nambo tukatupiyaga yakuŵecheta. Jwakulijiganya Baibulo payiche ku Nyumba ja Uchimwene, tugopocheje najo, soni tumlosyeje chisyasyo chambone. Achakulungwa ŵamumpingo mpaka ŵalimbikasye ŵakulijiganya Baibulo mwakupata ndaŵi jakunguluka nawo. Jemanjaji mpaka ŵalimbikasyesoni ŵakulalichila mwakwakamuchisya soni kwayamichila. Kusala yisyene, tukusasangalala mnope patumkamuchisye mundu jwine kuti atande kumnonyela soni kumtumichila Yehofa.